Te ʼu Fehuʼi ʼa Te Kau Lautohi

ʼE feala koa ki he Kilisitiano ke lelei tona leʼo ʼo loto mo kapau ʼe ina tali he gāue ʼe fakamaʼua ai ke nofo mo hana fana?

Ko te kau Fakamoʼoni ʼa Sehova ʼi te malamanei kātoa ʼe nātou fakahoko fakalelei tonatou maʼua ʼaē ke nātou taupau te maʼuli ʼo tonatou ʼu famili. (1 Timoteo 5:8) Kae ʼe ʼi ai te ʼu gāue ʼe fakafeagai ʼaupito ki te ʼu pelesepeto faka Tohi-Tapu pea ʼe tonu ke nātou fakafisi kiai. ʼI te ʼu gāue ʼaia, ʼe ʼi ai te gāue ʼo ʼuhiga mo te gaoʼi paʼaga, mo te fakaʼaogaʼi kovi ʼo te toto, pea mo te uga ʼa te hahaʼi ke nātou fakaʼaogaʼi te pata. (Isaia 65:11; Gaue 15:29; 2 Kolonito 7:1; Kolose 3:5) ʼE ʼi ai te tahi faʼahiga gāue, logola ʼe mole koviʼia ʼi te Tohi-Tapu, kae ʼe feala ke fakatupu kovi ai ki tokita leʼo ʼo loto peʼe ko te leʼo ʼo loto ʼo ʼihi.

Ko takita kau ki he gāue ʼe fakamaʼua ai takita fakaʼaogaʼi ʼo he fana peʼe ko he tahi age mahafu tau, ʼe tahi fakalogo pe kiā kita. Kae ko te taʼi gāue ʼaia ʼe feala ke hoko ai he ligitoto mokā ʼe tonu ke kita fakaʼaogaʼi takita fana. Koia ʼe tonu ke vakavakaʼi e he Kilisitiano ʼi te faikole peʼe ina faʼa fanahi anai he tahi mokā hoko he tuʼutāmaki. Ko he tahi ʼe nofo mo hana fana ʼe feala ke hoko ki ai he tuʼutāmaki peʼe mate ai mokā ʼohofiʼi ia ia.

ʼE lagi feala ke toe fua kovi ki ʼihi ia te tonu ʼaē ʼe kita fai. Ohage la, ko te maʼua tāfito ʼo he Kilisitiano ʼe ko te faka mafola ʼo te logo lelei ʼo te Puleʼaga ʼo te ʼAtua. (Mateo 24:14) ʼE feala koa hakita akoʼi ki te hahaʼi ke nātou “nofo tokalelei mo te hahai fuape,” kae gāue kita ʼaki he fana moʼo taupau ʼo tokita maʼuli? (Loma 12:18) Pea e feafeaʼi ki te fānau pea mo nātou ʼo te famili? ʼE mole koa fakatupu tuʼutāmaki ki te loto fale hakita nofo mo he fana ʼi tokita ʼapi? Pea tahi ʼaē meʼa, ʼe feala koa ke tūkia niʼihi ʼi te tonu neʼe kita fai ʼo ʼuhiga mo te gāue ʼaia?​—Filipe 1:⁠10.

ʼI te ʼu “ ʼaho fakamuli” ʼaenī, kua kaugamālie te hahaʼi ʼe nātou “fekai, mole manako ki te meʼa ʼaē ʼe lelei.” (2 Timoteo 3:​1, 3, MN ) Ko he tahi ʼe ina ʼiloʼi ia te faʼahi ʼaia, ʼe feala koa ke “mole he valoki e fai” kiā ia mo kapau ʼe ina filifili he gāue ʼe fakamaʼua ke taka mo hana fana pea ʼe maʼua anai ke ina fakaʼaogaʼi mo kapau ʼe felāveʼi mo he ʼu hahaʼi ʼe aga fekai? (1 Timoteo 3:10) Kailoa ia. ʼUhi ko te faʼahi ʼaia, ʼe mole feala ke faka ʼuhiga ʼi te kokelekasio te taʼi tagata ʼaia ʼe ‘heʼe mele,’ mo kapau ʼe haga nofo mo he fana logola tona kua tokoniʼi fakalelei ʼaki te Tohi-Tapu. (1 Timoteo 3:2; Tito 1:​5, 6) Koia ko te taʼi tagata peʼe ko te taʼi fafine ʼaia ʼe mole feala ia ke ina fakahoko he pilivilesio makehe ʼi te kokelekasio.

Neʼe fakamoʼoni age e Sesu ki tana ʼu tisipulo mo kapau ʼe nātou fakamuʼamuʼa te ʼu meʼa ʼo te Puleʼaga ʼi tonatou maʼuli, ʼe mole ʼaoga ke nātou tuʼania fau ʼo ʼuhiga mo te ʼu meʼa tāfito ʼo te maʼuli. (Mateo 6:​25, 33) Koia kapau ʼe tou tuku tatatou falala kātoa kiā Sehova, “ko ia totonu ʼe lagolago anai kiā [tatou]. ʼE mole ina fakagafua anai ke tūkia ia ia ʼaē ʼe faitotonu.”​—Pesalemo 55:22.