“Ko Te ʼu Ala ʼa Sehova ʼe Faitotonu”

“Ko te ʼu ala ʼa Sehova ʼe faitotonu, pea ko te kau faitotonu ʼaē ka nātou haʼele ai anai.”​—Osea 14:⁠9.

1, 2. Neʼe feafeaʼi te kamataʼaga ʼaē neʼe foaki e Sehova ki te kau Iselaele, kae koteā ʼaē neʼe hoko kiā nātou?

 ʼI TE temi ʼo te polofeta ko Moisese, neʼe foaki e Sehova he kamataʼaga faitotonu ki te kau Iselaele. Kae ʼi te kamata ʼo te valu sēkulō ʼi muʼa ʼo totatou temi, ʼi te kua fakalialia ʼaupito ʼo tonatou ʼaluʼaga, neʼe tauteaʼi ai nātou e te ʼAtua ʼuhi ko tanatou agahala mamafa. ʼE hā lelei ia te faʼahi ʼaia ʼi te ʼu kapite 10 ki te 14 ʼo Osea.

² Neʼe liliu te loto ʼo Iselaele ʼo malualoi. Ko te hahaʼi ʼo te ʼu telepi e hogofulu ʼo te puleʼaga ʼaia neʼe nātou “to ia te agakovi,” pea nātou utu te heʼe faitotonu. (Osea 10:​1, 13) Neʼe ʼui fēnei e Sehova: “ ʼI te temi ʼaē neʼe kei tamasiʼi ai ia Iselaele, neʼe au ʼofa ai, pea mai Esipito neʼe au pāuiʼi toku foha.” (Osea 11:1) Neʼe faka ʼāteainaʼi e te ʼAtua te kau Iselaele mai tanatou nonofo popūla ʼi Esipito, kae neʼe nātou fakamālo age kiā te ia ʼaki te loi pea mo te lotomamahi. (Osea 11:12) Koia neʼe fai e Sehova te tokoni ʼaenī kiā nātou: “ ʼE tonu ke ke toe liliu mai ki tou ʼAtua, ʼo taupau te lotoʼofa pea mo te faitotonu.”​—Osea 12:⁠6.

 3. Koteā ʼaē neʼe hoko ki te talagataʼa ʼa Samalia, kae neʼe koteā ʼaē neʼe tonu ke fai e te kau Iselaele ke fakahā age e te ʼAtua tona loto manavaʼofa kiā nātou?

³ Neʼe hoko te fakaʼauha fakamataku ki Samalia pea mo tona ʼu hau, ʼuhi ko tanatou talagataʼa. (Osea 13:​11, 16) Kae ko te kapite fakaʼosi ʼo te lea faka polofeta ʼa Osea ʼe kamata ʼaki te kole ʼaenī: “Koutou liliu mai kiā Sehova tokotou ʼAtua, Ê Iselaele.” Kanapaula neʼe loto fakahemala ia te kau Iselaele ʼo faiga ke fakamolemole age te ʼAtua, ʼe mahino ia ʼe ina fakahā age anai ia tona loto manavaʼofa kiā nātou. ʼE moʼoni, neʼe tonu ke nātou fakamoʼoni ko “te ʼu ala ʼa Sehova ʼe faitotonu” pea mo nātou haʼele ai.​—Osea 14:​1-6, 9.

 4. Ko te ʼu pelesepeto fea ʼaē ka tou vakaʼi anai ʼi te lea faka polofeta ʼa Osea?

⁴ Ko te koga ʼaenī ʼo te lea faka polofeta ʼa Osea ʼe maʼu ai te ʼu tuʼuga pelesepeto, ʼe tokoni mai ke tou haʼele mo te ʼAtua. ʼE tou vakaʼi anai te ʼu pelesepeto ʼaenī: (1) ʼE fakamaʼua e Sehova he tauhi ʼe mole malualoi, (2) ʼe fakahā e te ʼAtua he ʼofa agatonu ki tana hahaʼi, (3) ʼe tonu ke tou falala tuʼumaʼu kiā Sehova, (4) ko te ʼu ala ʼa Sehova ʼe faitotonu tuʼumaʼu, pea (5) ko te kau agahala ʼe feala hanatou toe liliu mai kiā Sehova.

ʼE Fakamaʼua e Sehova He Tauhi ʼe Mole Malualoi

 5. Ko te faʼahiga tauhi feafeaʼi ʼaē ʼe fakamaʼua e Sehova ke tou fai age kiā te ia?

⁵ ʼE fakamaʼua e Sehova ke tou fai age kiā te ia he tauhi taputapu ʼe maʼa kae ʼe mole malualoi. Kae neʼe liliu ia Iselaele ko he “fuʼu vite ʼe mole [fua pea] ʼe fakahaʼu ʼo mate.” Ko te hahaʼi ʼo Iselaele neʼe nātou ‘faʼu te ʼu tuʼuga ʼaletale’ moʼo fai ʼaki te tauhi hala. Ko te kau ʼaposita ʼaia neʼe nātou fakatuʼu mo te ʼu pou​—lagi neʼe ko he ʼu foʼi maka lalahi neʼe fakatuʼu ke fai ʼaki he tauhi ʼe heʼemaʼa. Neʼe fakatuʼutuʼu e Sehova ke ina maumauʼi te ʼu ʼaletale ʼaia pea mo te ʼu pou ʼaia.​—Osea 10:​1, 2.

 6. Ke feala hatatou haʼele mo te ʼAtua, koteā te aga ʼaē ʼe mole tonu ke tou maʼu?

⁶ ʼE mole tonu ke malualoi te ʼu kaugana ʼa Sehova. Kae koteā ʼaē neʼe hoko ki te kau Iselaele? ‘Neʼe liliu tonatou loto ʼo malualoi’! Logola neʼe nātou fai ʼi te temi muʼa te fuakava mo Sehova, ke nātou liliu ko te hahaʼi ʼaē kua foaki kiā te ia, kae neʼe ʼui e Sehova neʼe nātou malualoi. Koteā te ako ʼe tou tāʼofi mai ai? Kapau kua tou foaki totatou maʼuli ki te ʼAtua, ʼe mole tonu ke tou malualoi. ʼE fakatokagaʼi fēnei mai iā Tāʼaga Lea 3:32: “Ko te tagata ʼaē ʼe haʼele fakapikopiko ʼe ko he meʼa fakalialia kiā Sehova, kae ʼe kaumeʼa ia mo te hahaʼi faitotonu.” Ke feala hatatou haʼele mo te  ʼAtua, ʼe tonu ke tou maʼu te ʼofa “ ʼaē ʼe haʼu mai he loto ʼe maʼa pea mo he leʼo ʼo loto ʼe lelei pea mo he tui ʼe mole malualoi.”​—1 Timoteo 1:​5, MN.

ʼE ʼOfa Agatonu Sehova Ki Tana Hahaʼi

7, 8. (a) ’Ko te ʼu ʼaluʼaga fea ʼaē ʼe feala ai ke tou maʼu ia te ʼofa agatonu ʼa te ʼAtua? (b) Koteā ʼaē ʼe tonu ke tou fai mo kapau neʼe tou agahala mamafa?

⁷ Kapau ʼe mole malualoi tatatou tauhi kiā Sehova pea mo tou fai ʼaki he agatonu, ʼe ina tapuakina anai tatou ʼaki tona lotoʼofa peʼe ko tona ʼofa agatonu. Neʼe ina ʼui fēnei ki te kau Iselaele talagataʼa: “Koutou to maʼa koutou ʼi te aga faitotonu; koutou utu ʼo mulimuli ki te lotoʼofa. Koutou gāueʼi maʼa koutou he kele maʼuli, ʼi te temi ʼaē ʼe tonu ai ke kumi ia Sehova ʼo aʼu ki tana haʼu ʼo akoʼi atu ia te aga faitotonu.”​—Osea 10:⁠12.

⁸ Kana ʼui la neʼe fakahemala te kau Iselaele ʼo kumi ia Sehova, kanaʼaula ʼe fiafia anai ‘ ʼo akoʼi age kiā nātou ia te aga faitotonu.’ Kapau neʼe tou fai he agahala mamafa, tou kumi ia Sehova, ʼo tou kole ke ina fakamolemole mai pea mo tou kumi te tokoni fakalaumālie ʼa te kau tagata ʼāfea. (Sakopo 5:​13-16) Tou toe kumi mo te takitaki ʼa te laumālie maʼoniʼoni ʼa te ʼAtua, heʼe “ko ia ae e ina to i tona kakano, mai te kakano e ina utu anai te aga maveuveu. Kae kia ia ae e ina to i te Laumalie, mai te Laumalie e ina utu anai te mauli heegata.” (Kalate 6:8) Kapau ʼe tou “to i te Laumalie,” pea ʼe haga taupau anai e te ʼAtua tana ʼofa agatonu kiā tatou.

9, 10. ʼE faka ʼuhiga feafeaʼi kiā Iselaele ia te ʼu palalau ʼaē ʼe tuʼu iā Osea 11:​1-4?

⁹ ʼE feala ke tou falala ʼe ʼofa tuʼumaʼu Sehova ʼi tana ʼu felogoi mo tana hahaʼi. ʼE hā te faʼahi ʼaia iā Osea 11:​1-4, ʼaē ʼe tou lau fēnei: “ ʼI te temi ʼaē neʼe kei tamasiʼi ai ia Iselaele, neʼe au ʼofa ai, pea mai Esipito neʼe au pāuiʼi toku foha. . . . Neʼe nātou fai sākilifisio ki te ʼu fakatātā ʼo Paale, pea neʼe nātou fakahake te ʼu kohu faka sākilifisio ki te ʼu pāki togi. Kae ko au ʼaē neʼe au akoako ia Efalaime [te kau Iselaele] ke poto ʼi te haʼele, ʼo au puke nātou ʼaki toku ʼu nima; neʼe mole nātou fakamoʼoni neʼe au fakamālōlō nātou. Neʼe au toho nātou ʼaki te ʼu maea ʼo te tagata fakakelekele, ʼaki te ʼu maea ʼo te ʼofa, ʼo au liliu maʼa nātou ohage ko nātou ʼaē ʼe nātou lagaʼi te ʼakau toho mai tonatou ʼu kaugao, pea ʼaki he agamālū neʼe au fafaga ia nātou takitahi.”

¹⁰ ʼE fakatātā ʼi te ʼu vaega ʼaia ia Iselaele ki he tamasiʼi. ʼAki te ʼofa, neʼe akoʼi e Sehova ia te kau Iselaele ke nātou popoto ʼi te haʼele, ʼo ina folahi tona ʼu nima kiā nātou. Pea neʼe ina haga taki nātouʼaki “te ʼu maea ʼo te ʼofa.” ʼE malave ki te loto te fakamatala ʼaia! Kapau ko koutou ko he tāmai peʼe ko he faʼē ʼe koutou fia tokoni ki takotou kiʼi tamasiʼi ʼi tana kamata haʼele. ʼE koutou folahi tokotou ʼu nima. Kapau la neʼe koutou māʼuʼuli ʼi te ʼu temi muʼa, ʼe lagi koutou fai anai ohage ko te tokolahi ʼo te ʼu mātuʼa Iselaele. Neʼe nātou toho ni ʼu maea ke tāpiki kiai tanatou ʼu kiʼi tamaliki, ke mole nātou fetokaʼi. ʼE feiā te ʼofa ʼa Sehova kiā koutou. ʼE fiafia ʼi tana taki koutou ʼaki “te ʼu maea ʼo te ʼofa.”

11. Neʼe liliu feafeaʼi te ʼAtua ‘ohage ko he tahi ʼe ina lagaʼi he ʼakau toho’?

¹¹ ʼI tana ʼu felogoi mo te kau Iselaele, ko Sehova neʼe “liliu maʼa nātou ohage ko nātou ʼaē ʼe nātou lagaʼi te ʼakau toho mai tonatou ʼu kaugao, pea ʼaki he agamālū neʼe [ina] fafaga ia nātou takitahi.” Neʼe hage te aga ʼaē neʼe fai e te ʼAtua ko he tahi ʼe ina lagaʼi peʼe ina tohotoho ki muli he ʼakau toho ke faigafua ki te manu hana kai. Kae ʼi te temi ʼaē neʼe fakafisi ai ia te kau Iselaele ki te ʼakau toho ʼa Sehova, ʼaē neʼe ina fakatātā tanatou fakalogo kiā te ia, neʼe nātou tali leva te ʼakau toho ʼo tonatou ʼu fili agamālohi. (Teutalonome 28:​45, 48; Selemia 28:14) ʼOfa pe ke mole puleʼi tatou e totatou fili lahi ko Satana, pea mo tou maʼuli mamahi ʼi tana pule mālohi. Kae tou haga haʼele agatonu mo totatou ʼAtua ʼofa.

 Koutou Falala Tuʼumaʼu Kiā Sehova

12. Ohage ko tona tohi iā Osea 12:​6, koteā ʼaē ʼe fakamaʼua mai ke feala hatatou haga haʼele mo te ʼAtua?

¹² Ke tou haga haʼele mo te ʼAtua, ʼe tonu ke tou falala tuʼumaʼu kiā te ia. Neʼe tala fēnei ki te kau Iselaele: “Kiā [koutou], ʼe tonu ke [koutou] toe liliu mai ki [tokotou] ʼAtua, ʼo [koutou] taupau te lotoʼofa pea mo te faitotonu, pea ke [koutou] falala tuʼumaʼu ki [tokotou] ʼAtua.” (Osea 12:6) Neʼe feala ki te kau Iselaele ke nātou fakahā he fakamoʼoni ʼo tanatou liliu mai ʼaki he loto fakahemala kiā Sehova, ʼo nātou fakahā te ʼofa agatonu, mo aga faitotonu, pea mo ‘tanatou falala tuʼumaʼu ki te ʼAtua.’ Tatau aipe peʼe ko temi e fia kua tou haʼele ai mo te ʼAtua, kae ʼe tonu ke tou fakatotonu ke tou fakahā te lotoʼofa, mo te aga faitotonu, pea mo falala tuʼumaʼu ki te ʼAtua.​—Pesalemo 27:⁠14.

13, 14. ʼE fakaʼaogaʼi feafeaʼi e Paulo ia Osea 13:​14, pea koteā te tupuʼaga ʼaē ʼe tonu ai ke tou falala kiā Sehova?

¹³ Ko te lea faka polofeta ʼa Osea ʼaē neʼe fai ki te kau Iselaele, ʼe ina foaki mai he tupuʼaga maʼuhiga ke tou falala ai ki te ʼAtua. Neʼe ʼui fēnei e Sehova: “Mai te nima ʼo te Seole ʼe au toe totogi anai ia nātou; ʼe au toe ʼaumai anai ia nātou mai te mate. Ê Mate, ʼe ʼifea tau ʼu ʼakau māsila? Ê Seole, ʼe ʼifea tou mālohi fakaʼauha?” (Osea 13:14) Neʼe mole fakahāo nātou e Sehova mai te mate ʼi te temi ʼaia, kae ki muli age ʼe ina molehi anai ʼo talu ai ia te mate pea ʼe mole mālo anai te mate.

¹⁴ ʼI tana tohi ki te kau Kilisitiano fakanofo, neʼe fakaʼaogaʼi e Paulo te lea faka polofeta ʼa Osea pea neʼe ina tohi fēnei: “Ka kofuʼi anai e te meʼa ʼaē ʼe popo ia te meʼa ʼaē ʼe mole popo, pea ka kofuʼi anai e te meʼa ʼaē ʼe mate ia te tuputupua, pea ʼe hoko anai te folafola ʼaenī neʼe tohi: ‘ ʼE folo te mate ʼo talu ai.’ ‘Mate, ʼe ʼifea tau mālo? Mate, ʼe ʼifea tau ʼakau taki?’ Ko te ʼakau māsila ʼaē ʼe ina fakatupu te mate ʼe ko te agahala, kae ko te mālohi ʼo te agahala ʼe ko te Lao. Tou fakafetaʼi ki te ʼAtua, ʼi tana foaki mai kiā tatou te mālo ʼaki totatou ʼAliki ko Sesu Kilisito!” (1 Kolonito 15:​54-57, MN ) Neʼe fakatuʼuake e Sehova ia Sesu mai te mate, ʼo ina foaki ai he fakamoʼoni ko te hahaʼi ʼaē ʼe manatuʼi e te ʼAtua ʼe ina fakatuʼuʼake anai nātou. (Soane 5:​28, 29) ʼE ko he tupuʼaga fakafiafia ʼaia ke tou falala kiā Sehova! Kae ʼo hilifaki ki te ʼamanaki ʼaē ki te fakatuʼuake, ʼe ʼi ai te tahi meʼa ʼe ina uga tatou ke tou haʼele mo te ʼAtua.

Ko Te ʼu Ala ʼa Sehova ʼe Faitotonu Tuʼumaʼu

15, 16. Koteā ʼaē neʼe fakakikite ʼo ʼuhiga mo Samalia, pea neʼe hoko feafeaʼi te lea faka polofeta?

¹⁵ Ko tatatou tui ʼaē ko “te ʼu ala ʼa Sehova ʼe faitotonu” ʼe tokoni mai ke tou haga haʼele mo te ʼAtua. Ko te hahaʼi ʼo Samalia neʼe mole nātou haʼele ʼi te ʼu ala faitotonu ʼa te ʼAtua. Koia, neʼe tonu ai ke nātou utu te ʼu fua kovi ʼo tanatou agahala pea mo tanatou mole tui kiā Sehova. Neʼe fakakikite fēnei: “ ʼE tauteaʼi anai ia Samalia, he neʼe agatuʼu moʼoni ki tana ʼAtua. ʼE nātou mamate anai ʼi te heletā. ʼE laliki anai tanatou fānau, pea ʼe avahi anai te fatu ʼo tanatou ʼu fafine faitama.” (Osea 13:16) ʼE fakahā ʼi te ʼu fakamatala ʼo te hisitolia ko te kau Asilia, ʼaē neʼe nātou mālo ʼi Samalia, neʼe lagi nātou fai te ʼu aga fakamataku ʼaia.

¹⁶ Ko Samalia neʼe ko te kolo hau ʼo te ʼu telepi e hogofulu ʼo te puleʼaga ʼo Iselaele. Kae ʼi te vaega ʼaia, ko te higoa Samalia ʼe lagi faka ʼuhiga ki te telituale kātoa ʼo te puleʼaga ʼaia. (1 Hau 21:1) Ko te Hau ʼo Asilia ko Salemanasale 5, neʼe ina ʼātakai te kolo ʼo Samalia ʼi te taʼu 742 ʼi muʼa ʼo totatou temi. ʼI te temi ʼaē neʼe tō ai ia Samalia ʼi te taʼu 740 ʼi muʼa ʼo totatou temi, tokolahi ʼi te kau ʼaliki neʼe ʼave ʼo faka ʼaunofo ʼi Mesopotamia pea mo Metia. ʼE mole ʼiloʼi lelei pe neʼe ʼohofi ia Samalia e Salemanasale 5 peʼe ko te tagata ʼaē neʼe hoa kiā ia, ko Salekoni 2. (2 Hau 17:​1-6, 22, 23; 18:​ 9-12) Kae ko te ʼu fakamatala ʼo ʼuhiga mo Salekoni ʼe talanoa ki te ʼave popūla ʼa te toko 27 290 kau Iselaele ki te ʼu koga meʼa ʼo Eufalate ʼo ʼoluga pea mo Metia.

17. Koteā ʼaē ʼe tonu ke tou fai ke ʼaua naʼa tou meʼa noaʼi ia te ʼu lēkula ʼa te ʼAtua?

¹⁷ Ko te hahaʼi ʼo Samalia neʼe nātou māʼuʼuli mamahi ʼuhi ko tanatou mole mulimuli ki te ʼu ala faitotonu ʼa Sehova. ʼI totatou ʼuhiga Kilisitiano ʼaē kua foaki totatou maʼuli ki te ʼAtua, ʼe toe hoko anai kiā tatou he ʼu fua kovi mo kapau ʼe tou fai tuʼumaʼu te agahala, pea mo fehiʼa ki te ʼu lēkula faitotonu ʼa te ʼAtua. ʼOfa pe ke mole tou fai te aga ʼaia ʼe kovi, kae ke tou maʼuliʼi te tokoni ʼaenī ʼa te ʼapositolo ko Petelo: “Ke ʼaua naʼa mamahi he tahi iā koutou ohage ko he tahi ʼe fai fakapō, peʼe ko he tahi ʼe kaihaʼa, peʼe ko he tahi ʼe ina fai te meʼa ʼaē ʼe kovi, peʼe ohage ko he tahi ʼe fia ʼiloʼi meʼa fuli. Kae kapau ʼe tali mamahi ʼuhi ko he Kilisitiano, pea ke ʼaua naʼa ufiufi, kae ke ina haga faka kolōliaʼi ia te ʼAtua ʼi te huafa ʼaia.”​—1 Petelo 4:​15, 16, MN.

18. ʼE lava feafeaʼi hatatou “haga faka kolōliaʼi ia te ʼAtua”?

¹⁸ ʼE tou “haga faka kolōliaʼi ia te ʼAtua” mokā tou haʼele ʼi tona ʼu ala faitotonu, kae mole tou fai ohage ko te meʼa ʼaē ʼe tou loto kiai. Neʼe fai fakapō ia Kaino he neʼe ina filifili ʼi tona loto faʼitaliha, ke ina meʼa noaʼi ia te fakatokaga ʼaē neʼe fai age e Sehova ʼo ʼuhiga mo te agahala ʼaē neʼe ina ʼamanaki fai. (Senesi 4:​1-8) Ko Palaame neʼe ina tali te totogi ʼaē neʼe foaki age e te hau ʼo Moape, kae neʼe mole ina lava fai he faitutuku ki Iselaele. (Faka au 24:10) Pea neʼe matehi e te ʼAtua ia te tagata Levite ko Kole pea mo te tahi ʼu hahaʼi, ʼuhi ko tanatou fakafeagai ki te takitaki ʼa Moisese pea mo Alone. (Faka au 16:​1-3, 31-33) ʼE mahino ia ʼe mole tou fia mulimuli ki te “ala ʼo Kaino” ʼaē neʼe fai fakapō, peʼe tou mulimuli “ki te fakahēʼi ʼo Palaame,” peʼe fakaʼauha tatou “ ʼuhi ko te agatuʼu ʼa Kolea.” (Suta 11, MN ) Kae kapau neʼe tou hēʼia, pea ʼe fakaloto fīmālie tatou e te lea faka polofeta ʼa Osea.

ʼE Feala Ke Toe Liliu Te Kau Agahala Kiā Sehova

19, 20. Koteā te ʼu sākilifisio ʼaē neʼe feala ke momoli e te kau Iselaele?

¹⁹ Māʼiape la mo nātou ʼaē neʼe tūkia he neʼe nātou fai he agahala mamafa, ʼe feala ke nātou toe liliu kiā Sehova. Iā Osea 14:​1, 2, ʼe tou maʼu ia te kole ʼaenī: “Koutou liliu mai kiā Sehova tokotou ʼAtua, Ê Iselaele , he neʼe ke tūkia ʼi tau hala. Koutou toʼo mo koutou ni ʼu palalau pea mo koutou maliu mai kiā Sehova. Koutou ʼui fuli fēnei kiā te ia: ‘Fakalelei age ʼo fakamolemole te agahala; pea tali te meʼa ʼaē ʼe lelei, pea moʼo liufaki atu, ʼe mātou momoli atu anai te ʼu vitulo mui ʼo tomatou ʼu laugutu.’ ”

²⁰ Neʼe feala ki te kau Iselaele ʼaē neʼe fakahemala ke nātou momoli ki te ʼAtua ‘te ʼu vitulo mui ʼo tonatou ʼu laugutu.’ Ko te ʼu sākilifisio ʼaia neʼe ko he ʼu fakavikiviki neʼe fai fakamalotoloto. Neʼe talanoa ia Paulo ki te lea faka polofeta ʼaia ʼi tana uga te kau Kilisitiano ke nātou “momoli tuumau he sakilifisio o te fakavikiviki ki te Atua, ko te fua aia o te u laugutu e natou fakamooni ki tona Huafa.” (Hepeleo 13:15) ʼE ko he pilivilesio lahi te haʼele mo te ʼAtua pea mo te fai ʼo te ʼu sākilifisio ʼaia ia ʼaho nei!

21, 22. Koteā ʼaē neʼe toe maʼu e te kau Iselaele ʼaē neʼe fakahemala ʼi tanatou toe liliu ki tonatou fenua?

²¹ Ko te kau Iselaele ʼaē neʼe nātou tuku tanatou talagataʼa pea mo toe liliu ki te ʼAtua, neʼe nātou foaki kiā te ia ‘te ʼu vitulo mui ʼo tonatou ʼu laugutu.’ Neʼe toe lelei ai tonatou ʼaluʼaga fakalaumālie, ohage ko tona fakapapau e te ʼAtua. ʼE ʼui fēnei iā Osea 14:​4-7: “ ʼE au [ia Sehova] fakamālōlō anai tanatou heʼe agatonu. ʼE au ʼofa anai kiā nātou ʼaki toku loto lelei, he neʼe maliu toku ʼita mai ia ia. ʼE au liliu anai ohage ko te hahau maʼa Iselaele. ʼE mātala anai ohage ko te lilo, pea ʼe aka anai ohage ko te Lipani. ʼE mātala anai tona ʼu moto, pea ʼe liliu  anai tona ʼalikisia ohage ko te fuʼu oliveto pea mo tona magoni ohage ko te magoni ʼo Lipani. ʼE nātou toe nonofo anai ʼi tona malumalu. ʼE nātou fakahomo ake anai te ʼu fulumeto, ʼe nātou moto anai ohage ko te fuʼu vite. Ko tana fakamanatu ʼe hage anai ko te vino ʼo Lipani.”

²² Neʼe toe mālōlō ʼi te faʼahi fakalaumālie ia te kau Iselaele ʼaē neʼe fakahemala, pea neʼe nātou toe maʼu te ʼofa ʼo te ʼAtua. Neʼe hage ia Sehova ko he hahau fakamokomoko kiā nātou, he neʼe ina tapuakinaʼi lahi nātou. Ko te kau Iselaele ʼaia neʼe toe liliu ki tonatou fenua, neʼe nātou toe maʼu te ʼalikisia “ohage ko te fuʼu oliveto,” pea neʼe nātou haʼele ʼi te ʼu ala ʼa te ʼAtua. Mai tona ʼaluʼaga ʼaē ʼe tou loto papau ke tou haʼele mo Sehova ʼAtua, koteā ʼaē ʼe fakamaʼua mai ke tou fai?

Tou Haga Haʼele ʼi Te ʼu Ala Faitotonu ʼa Sehova

23, 24. Koteā te fakaloto mālohi ʼaē ʼe fakaʼosi ʼaki te tohi ʼo Osea, pea ʼe malave feafeaʼi kiā tatou?

²³ Kapau ʼe tou fia haga haʼele mo te ʼAtua, ʼe tonu ke tou maʼu “te poto mai oluga” pea mo tou mulimuli tuʼumaʼu ki tona ʼu ala ʼaē ʼe faitotonu. (Sakopo 3:​17, 18) ʼE ʼui fēnei ʼi te ʼu vaega fakamuli ʼo te lea faka polofeta ʼa Osea: “Ko ai ʼaē ʼe poto, ke mahino ki te ʼu meʼa ʼaia? [Ko ai ʼaē ʼe] ʼatamai, ke ina ʼiloʼi ia te ʼu meʼa ʼaia? Heʼe ko te ʼu ala ʼa Sehova ʼe faitotonu, pea ko te kau faitotonu ʼaē ka nātou haʼele ai anai; kae ko te kau talagataʼa ʼaē ka nātou tūkia ai anai.”​—Osea 14:⁠9.

²⁴ Ke ʼaua naʼa takitaki tatou e te poto pea mo te ʼu manatu ʼa te mālama ʼaenī, kae tou tukupau ke tou haʼele ʼi te ʼu ala faitotonu ʼa te ʼAtua. (Teutalonome 32:4) Neʼe fai e Osea te faʼahi ʼaia lolotoga taʼu e 59 peʼe laka atu. Neʼe agatonu ʼo ina tala te ʼu logo mai te ʼAtua, ʼi tana ʼiloʼi ko nātou ʼaē neʼe popoto pea mo agatonu ʼe nātou mahino anai ki te ʼu folafola ʼaia. Kaeā tatou? Kapau ʼe kei tuku mai e Sehova he temi ke tou fai faka mafola ai, pea ʼe tou haga kumi anai ia nātou ʼaē ka nātou aga fakapotopoto anai ʼo tali ia tona ʼofa makehe. Pea ʼe tou fai fakafiafia ia te gāue ʼaia, ʼo lagolago kātoa ki “te tagata kaugana agatonu mo poto.”​—Mateo 24:​45-47, MN.

25. Ko tatatou vakavakaʼi ia te lea faka polofeta ʼa Osea ʼe tokoni mai ke tou fai tea?

²⁵ Ko tatatou vakavakaʼi ia te lea faka polofeta ʼa Osea ʼe tonu ke tokoni mai ke tou haga haʼele mo te ʼAtua, ʼaki te ʼamanaki ʼaē ke tou māʼuʼuli ʼo heʼegata ʼi te mālama foʼou ʼaē neʼe ina fakapapauʼi mai. (2 Petelo 3:13; Suta 20, 21) ʼE ko he toe ʼamanaki taulekaleka ia! ʼE hoko moʼoni anai kiā tatou te ʼamanaki ʼaia mo kapau ʼe hā ʼi tatatou ʼu palalau pea mo tatatou aga ʼe maʼuhiga kiā tatou te ʼu palalau ʼaenī: “Ko te ʼu ala ʼa Sehova ʼe faitotonu.”

ʼE Koutou Tali Feafeaʼi Anai?

• ʼE feafeaʼi anai te ʼu felogoi ʼa te ʼAtua mo tatou, mo kapau ʼe tou fai kiā te ia he tauhi maʼa?

• He koʼe ʼe tonu ke tou falala tuʼumaʼu kiā Sehova?

• He koʼe ʼe koutou tui papau ʼe faitotonu te ʼu ala ʼa Sehova?

• ʼE lava feafeaʼi hatatou haga haʼele ʼi te ʼu ala faitotonu ʼa Sehova?

[Fehuʼi]

[Paki ʼo te pasina 28]

Tou tali te tokoni fakalaumālie ʼa te kau tagata ʼāfea

[Paki ʼo te pasina 29]

Ko te lea faka polofeta ʼa Osea ʼe ina foaki mai he tupuʼaga lelei ke tou falala ki te ʼu fakapapau ʼa Sehova ʼo ʼuhiga mo te fakatuʼuake

[Paki ʼo te pasina 31]

Tou haga haʼele mo te ʼAtua ʼaki te ʼamanaki ʼaē ki te maʼuli heʼegata