Ko Halamaketone—ʼE Ko He Fakaʼosi Fakamataku Koa?

KO HALAMAKETONE! ʼE koutou manatu koa ki he fakaʼauha kātoa ʼo te kele peʼe ko te ʼulo ʼo te ʼatulaulau? ʼE lahi te ʼu fenua kua nātou māhani ʼi te fakaʼaogaʼi ia te kupu ʼaia, pea maʼa nātou ʼe faka ʼuhiga ki he tuʼutāmaki fakamataku ka hoko anai ki te malamanei. Ko te ʼu ʼata ʼi te televisio mo te ʼu ʼata viteo, ʼe nātou fakahā ki te hahaʼi te ʼu meʼa fakamataku ʼaē ka hoko anai ʼi “Halamaketone.” ʼE mole faʼa mahino lelei te hahaʼi ki te faka ʼuhiga ʼo te kupu ʼaia pea ʼe ʼi ai mo te ʼu manatu hala ʼo ʼuhiga mo te kupu ʼaia. Logola ʼe tapuke te ʼu manatu ʼo ʼuhiga mo te faka ʼuhiga ʼo te kupu Halamaketone, kae ʼe lahi te ʼu manatu ʼe mole ʼalutahi mo te meʼa ʼaē ʼe akoʼi mai ʼi te Tohi-Tapu, te tohi ʼaē ʼe maʼu ai te kupu ʼaia.

Mai tona ʼaluʼaga ʼaē ʼe fakapipiki ʼi te Tohi-Tapu ia Halamaketone ki “te fakaosi o te malama-nei,” ʼe mole koutou manatu koa la ʼe maʼuhiga ʼaupito ke tou mahino lelei ki tona faka ʼuhiga moʼoni? (Mateo 24:3) Pea ʼe ko he aga fakapotopoto hatatou kumi ʼi te Folafola ʼa te ʼAtua, ʼaē ko te matapuna ʼo te moʼoni, te ʼu tali ʼo ʼuhiga mo Halamaketone pea koteā anai tona fua kiā koutou pea mo tokotou famili.

ʼI tatatou vakaʼi ʼaia ʼi te Tohi-Tapu, ʼe tou mahino ai anai ko Halamaketone ʼe mole ko he fakaʼosi fakamataku, kae ʼe ko he kamataʼaga foʼou anai maʼa te hahaʼi ʼaē ʼe nātou fia māʼuʼuli pea mo fiafia ʼi he mālama foʼou faitotonu. Kapau ʼe koutou lau te alatike ʼaē ka hoa mai ʼaē ʼe talanoa ʼo ʼuhiga mo te faka ʼuhiga moʼoni ʼo te kupu Halamaketone, pea ʼe koutou mahino lelei anai ki te moʼoni maʼuhiga ʼi te Tohi-Tapu.

[Talanoa/Paki ʼo te pasina 3]

KOTEĀ TAKOTOU MAHINO ʼO ʼUHIGA MO HALAMAKETONE?

• Ko he fakaʼauha faka nukeleʼea

• Ko te maumauʼi ʼo te kele

• Ko te feʼīʼaki ʼo he fetuʼu pea mo te kele

• Ko te fakaʼauha ʼo te kau agakovi e te ʼAtua