Ko Halamaketone—Ko He Kamataʼaga Fakafiafia

KO TE kupu “Halamaketone” ʼe haʼu mai te kupu faka Hepeleo ko Hala-Maketone, peʼe ko “Te Moʼuga ʼo Mekito.” ʼE tou maʼu te kupu ʼaia iā Apokalipesi 16:​16, ʼaē ʼe ʼui fēnei ai: “Nee natou maopoopo ki te potu nee higoa fakahepeleo ko halamaketone.” Ko ai ʼaē ʼe māʼopoʼopo ʼi Halamaketone, pea koteā tona tupuʼaga? Iā Apokalipesi 16:​14, ʼe tou lau fēnei: “[Ko] te u hau o te malama-nei katoa” ʼe nātou māʼopoʼopo “ki te tau o te aho [“lahi,” MN ] o te Atua Mafimafi.” ʼE mahino ia, ʼi tatatou lau te vaega ʼaia ʼe malaga ai te tahi ʼu fehuʼi. ʼE hoko ʼifea te tau ʼaia ʼa “te u hau”? Koteā te tupuʼaga ʼo tanatou tau ʼaia, pea ko ai ʼaē ʼe nātou tauʼi? ʼE nātou fakaʼaogaʼi anai koa te ʼu foʼi pulu nukeleʼea, ohage ko te ʼui ʼa te tokolahi? ʼE ʼi ai anai koa he ʼu hahaʼi ka hāo anai ʼi Halamaketone? Tou tuku ke tali kiai te Tohi-Tapu.

Ko te talanoa ʼaē ki te “Moʼuga ʼo Mekito” ko tona faka ʼuhiga koa ʼe hoko anai ia Halamaketone ʼi he moʼuga ʼo Iselaele. Kailoa ia. ʼUluaki, ʼe mole ʼi ai he moʼuga feiā​—ʼi te kolo ʼāfea ʼo Mekito, ʼe ʼi ai te kiʼi moʼuga e meta 20 tona māʼoluga pea ʼe tuʼu ʼi ʼoluga ʼo te malaʼe ʼe nā feōvi. Tahi ʼaē meʼa, ko te ʼu tafaʼaki ʼo te kolo ko Mekito ʼe mole feala ke fakamāʼopoʼopo fuli kiai “te u hau o te kelekele pea mo anatou fua tau.” (Apokalipesi 19:19) Kae neʼe hoko ʼi Mekito te ʼu tau fakamataku pea mo lalahi ʼi te hisitolia ʼo Iselaele. Koia, ko te higoa ko Halamaketone ʼe ina fakatātā he tau maʼuhiga, pea ko te tokotahi pe ʼaē ka mālo ai.​—Vakaʼi te fakamatala ʼaē ʼe ʼātakai, ko tona kupu tāfito “Ko Mekito ʼe Ko He Fakatātā Lelei” ʼi te pasina 5.

Ko Halamaketone ʼe mole ko he fetauʼaki pe ʼa te ʼu puleʼaga, heʼe ʼui iā Apokalipesi 16:14 ko “te u hau o te malama-nei katoa” ʼe nātou fakatahitahi fuli “ki te tau o te aho [“lahi,” MN ] o te Atua Mafimafi.” ʼI tana lea faka polofeta, neʼe ʼui e Selemia “ko te hahaʼi ʼaē ka matehi anai e Sehova” ʼe nātou leta anai “mai te tahi potu taupotu ʼo te kele ʼo aʼu ki te tahi potu taupotu ʼo te kele.” (Selemia 25:33) Koia, ko Halamaketone ʼe mole ko he fetauʼaki ʼa he ʼu puleʼaga ʼi he potu ʼo Iselaele, kae ʼe ko te tau ʼa Sehova, pea ʼe hoko anai ʼi te kele kātoa.

Kae koutou tokagaʼi, iā Apokalipesi 16:​16, ʼe ʼui ai ko Halamaketone ʼe ko he “potu.” ʼI te Tohi-Tapu, ko he “potu” ʼe feala ke faka ʼuhiga ki he ʼaluʼaga peʼe ko he mafuliʼaga​—pea ʼi te ʼaluʼaga ʼaenī, ko te malamanei kātoa ʼaē ka fakatahitahi anai moʼo fakafeagai kiā Sehova. (Apokalipesi 12:​6, 14) ʼI Halamaketone, ko te ʼu puleʼaga fuli ʼo te kele ʼe nātou māʼopoʼopo anai moʼo fakafeagai ki “te fua tau o te lagi” ʼaē ʼe takitaki e te pule tau, te “Hau o te u hau, Aliki o te u aliki,” ia Sesu Kilisito.​—Apokalipesi 19:​14, 16.

Kae ʼe moʼoni koa te ʼui ʼaē ko Halamaketone ʼe ko he maumauʼi kātoa ʼo te malamanei ʼaki te ʼu pulu faka nukeleʼea, peʼe ko te feʼīʼaki ʼa he fetuʼu pea mo te kele? ʼE tuku anai koa e te ʼAtua ʼofa ke hoko he tuʼutāmaki feiā ki te hahaʼi pea mo te kele? Kailoa ia. Neʼe ina ʼui fakalelei neʼe mole ina faʼu “noa” ia te kele, kae “neʼe ina faʼu ke nofoʼi.” (Isaia 45:18; Pesalemo 96:10) ʼI Halamaketone, ʼe mole maumauʼi anai e Sehova totatou kele ʼo ina fakaʼauha kātoa. Kae ʼe ina “maumauʼi [anai] . . . natou e natou maumauʼi te kelekele.”​—Apokalipesi 11:⁠18.

ʼE Hoko ʼAfea Ia Halamaketone?

ʼI te fakalaka ʼo te ʼu sēkulō, neʼe fai tuʼumaʼu pe te fehuʼi ʼaenī: Ko ʼafea ʼaē ka hoko ai ia Halamaketone? Neʼe lahi te ʼu tali neʼe fai. ʼE lava tokoni mai te tohi ʼo Apokalipesi ke tou ʼiloʼi te  meʼa ʼaē ʼe ʼui ʼi te Tohi-Tapu ʼo ʼuhiga mo te temi ʼaē ka hoko ai te tau maʼuhiga ʼaia. Iā Apokalipesi 16:​15, ʼe fakapipiki ia Halamaketone mo te haʼu ʼa Sesu ohage ko he tagata kaihaʼa. Ko te fakatātā ʼaia neʼe toe fakaʼaogaʼi e Sesu moʼo talanoa ʼo ʼuhiga mo tana haʼu ʼo fakahoko te fakamāu ʼo te tuʼu ʼaenī.​—Mateo 24:​43, 44; 1 Tesalonika 5:⁠2.

Ohage ko tona fakahā ʼi te ʼu lea faka polofeta ʼa te Tohi-Tapu ʼaē kua hoko, talu mai te taʼu 1914 ʼe tou māʼuʼuli ʼi te ʼu ʼaho fakamuli ʼo te tuʼu ʼaenī. a ʼI te fakaʼosi ʼo te ʼu ʼaho fakamuli, ʼe hoko anai te temi ʼaē neʼe fakahigoaʼi e Sesu ʼe ko te “mamahi lahi.” ʼE mole fakahā mai ʼi te Tohi-Tapu te loaloaga ʼo te temi ʼaia, kae ko te ʼu ʼaluʼaga ʼaē ka hoko ʼi te temi ʼaia, ʼe fakamataku ʼaupito anai ʼi te ʼu ʼaluʼaga ʼaē kua ʼosi hoko ʼi te malamanei. ʼE iku anai te mamahi lahi ʼaia ki Halamaketone.​—Mateo 24:​21, 29.

Mai tona ʼaluʼaga ʼaē ko Halamaketone ʼe ko “te tau o te aho [“lahi,” MN ] o te Atua Mafimafi,” koia ʼe mole feala ai ke fakaholomuli e te tagata ia te ʼaho ʼaia. Ko Sehova neʼe ina fakatuʼutuʼu he ‘temi kua fakakatofa’ moʼo kamata te tau ʼaia. “ ʼE mole tauhala anai ia.”​—Hapakuke 2:⁠3.

ʼE Totonu Te Tau ʼAē ʼe Fakahoko e Te ʼAtua Faitotonu

Kae he koʼe ʼe tauʼi anai e te ʼAtua te kele kātoa? ʼE ʼi ai te pikipikiga ʼo Halamaketone pea mo te  kalitātē tāfito ʼo Sehova, ʼaē ko te faitotonu. ʼE ʼui fēnei ʼi te Tohi-Tapu: “ ʼE ʼofa Sehova ki te faitotonu.” (Pesalemo 37:28) Neʼe sio ki te ʼu gāue heʼe faitotonu fuli ʼaē neʼe hoko ʼi te hisitolia ʼa te tagata, ʼo tupu ai tana ʼita ʼaki he ʼita ʼe matatonu. Koia neʼe ina hinoʼi tona ʼAlo ke ina fakahoko he tau faitotonu moʼo fakaʼauha te tuʼu agakovi kātoa ʼaenī.

ʼE ko Sehova tokotahi pe ʼaē ʼe feala ke ina fakahoko he tau ʼe totonu pea mo ina fakaʼauha ia nātou ʼaē ʼe tonu ke fakaʼauha, pea mo hāofaki te hahaʼi faitotonu ʼi te ʼu potu kehekehe ʼaē ʼe nātou māʼuʼuli ai. (Mateo 24:​40, 41; Apokalipesi 7:​9, 10, 13, 14) Pea ko ia tokotahi pe ʼaē ʼe feala ke ina puleʼi te kele kātoa, heʼe ko ia ʼaē neʼe ina fakatupu.​—Apokalipesi 4:⁠11.

Koteā ʼaē ka fakaʼaogaʼi anai e Sehova moʼo tauʼi tana ʼu fili? ʼE mole tou ʼiloʼi. Ko te faʼahi ʼaē ʼe tou ʼiloʼi ʼe maʼu e te ʼAtua te ʼu fealagia moʼo fakaʼauha kātoa te ʼu puleʼaga agakovi. (Sopo 38:​22, 23; Sofonia 1:​15-18) Kae ʼe mole kau anai te kau atolasio ʼa te ʼAtua ki te tau. Ko te meʼa ʼaē neʼe hā ʼaē ʼe fakamatala iā Apokalipesi kapite 19, ʼe fakahā ai ko nātou ʼāteaina pe ʼaē ka tau ʼi Halamaketone, ʼe ko te ʼu kautau ʼo te lagi pea mo Sesu Kilisito. ʼE mole kau anai kiai he tahi ʼi te ʼu kaugana ʼa Sehova ʼi te kele.​—2 Fakamatala 20:​15, 17.

Ko Te ʼAtua Poto ʼe Ina Fai He Fakatokaga

E feafeaʼi kiā nātou ʼaē ka hāofaki? ʼE tou fakaʼamu age ke mole matehi he tahi ʼi Halamaketone. Neʼe ʼui fēnei e te ʼapositolo ko Petelo: “Ko Sehova . . . ʼe mole ina loto ke fakaʼauha he tahi kae ʼe loto ia ke aʼu te hahaʼi fuli pe ki te fakahemala.” (2 Petelo 3:​9, MN ) Pea neʼe ʼui e te ʼapositolo ko Paulo “ko tona finegalo [ʼa te ʼAtua] ke fakamauli te tagata fuape, pea ke natou kaku ki te iloi o te mooni.”​—1 Timoteo 2:⁠4.

Moʼo fakahoko te faʼahi ʼaia, neʼe fai e Sehova te fakatuʼutuʼu poto, ke faka mafola “te logo lelei ʼo te puleʼaga” ʼi te kele kātoa, iā lea e teau tupu. ʼE maʼu e te hahaʼi ʼo te malamanei kātoa te fealagia ʼaē ke nātou hāo ʼi te tau ʼaia mo nātou māʼuʼuli. (Mateo 24:​14, MN; Pesalemo 37:34; Filipe 2:12) Ko nātou ʼaē ʼe nātou tali te logo lelei ʼe feala ke nātou hāo ʼi Halamaketone pea mo māʼuʼuli haohaoa ʼo heʼegata ʼi te palatiso ʼi te kele. (Esekiele 18:​23, 32; Sofonia 2:3; Loma 10:13) ʼE fai anai te faʼahi ʼaia e te ʼAtua, heʼe ko he ʼAtua ʼofa.​—1 Soane 4:⁠8.

Ko He ʼAtua ʼOfa ʼe Feala Koa Ke Ina Fakahoko He Tau?

Kae ʼe feʼekeʼaki e te tokolahi peʼe lava feafeaʼi ki he ʼAtua ʼofa ke ina matehi pea mo fakaʼauha he tokolahi. ʼE feala ke tou fakatatau te ʼaluʼaga ʼaia ki he ʼapi ʼe fonu ai te ʼu kumā. ʼE mahino ia, ʼe koutou tali anai ke matehi te ʼu kumā e te tagata ʼaē ʼaʼana te ʼapi, ke haohaoa tona famili mai te ʼu mahaki.

ʼO toe feiā pe, ʼe tonu ke fakahoko e Sehova ia Halamaketone ʼuhi ko tona ʼofa lahi ki te hahaʼi. Ko te fakatuʼutuʼu ʼa te ʼAtua ke liliu te kele ko he palatiso, mo māʼuʼuli haohaoa te hahaʼi pea mo māʼuʼuli tokalelei, pea ‘ke mole ʼi ai he tahi ʼe ina fakamatakuʼi ia nātou.’ (Mikea 4:​3, 4; Apokalipesi 21:4) Koia koteā ʼaē ʼe tonu ke fai kiā nātou ʼaē ʼe agamālohi pea mo agakovi, ʼaē ʼe nātou fakatupu tuʼutāmaki ki te maʼuli tokalelei pea mo fīmālie ʼa te hahaʼi? ʼE tonu ke matehi e te ʼAtua te hahaʼi agakovi ʼaē ʼe mole nātou fia fetogi, ke feala hana hāofaki ia te kau faitotonu.​—2 Tesalonika 1:​8, 9; Apokalipesi 21:⁠8.

Ia ʼaho nei, ʼe lahi te ʼu tau pea mo te ligi toto neʼe hoko ʼuhi ko te pule ʼa te ʼu tagata agahala pea mo tanatou manatu pe ki te ʼu lelei maʼa tonatou puleʼaga. (Tagata Tānaki 8:9) ʼI tanatou faiga ʼaē ke nātou fakalahi tonatou mālohi, ko te ʼu puleʼaga fakatagata ʼe nātou meʼa noaʼi ʼosi ia te Puleʼaga ʼa te ʼAtua ʼaē kua fakatuʼu. ʼE mole ʼiloga iā nātou he fia līaki ʼo tanatou pule ke nātou fakalogo ki te ʼAtua pea mo Kilisito. (Pesalemo 2:​1-9) Ko te ʼu puleʼaga ʼaia ʼe tonu ke toʼo, ke feala ke fakahoko te pule faitotonu ʼa te Puleʼaga ʼa te ʼAtua ʼaē ʼe puleʼi e Kilisito. (Taniela 2:44) ʼE tonu ke hoko ia Halamaketone moʼo fakatokatoka ʼo talu ai te fakafifihi ʼo ʼuhiga mo te puleʼi ʼo te kele pea mo te malamanei.

ʼE fakahoko anai e Sehova ia Halamaketone ke fua lelei ki te malamanei. ʼI te ʼāsili kovi ʼo te ʼu  ʼaluʼaga ʼo te malamanei, ʼe gata pe anai mo te takitaki haohaoa ʼa te ʼAtua te fealagia ʼaē ke ina fakafimālieʼi ʼo talu ai te loto ʼo te hahaʼi fuli pe. ʼE hoki feala pe anai ki tona Puleʼaga ke ina fakatuʼu te tokalelei pea mo te maʼuli fiafia. ʼE feafeaʼi anai te ʼaluʼaga ʼo te malamanei mo kapau ʼe mole fai e te ʼAtua he meʼa? ʼE mole hoko atu anai koa te fehiʼa, mo te agamālohi, pea mo te ʼu tau ʼi te malamanei, ohage ko tona hoko lolotoga ni ʼu sēkulō ʼi te pule ʼa te tagata? ʼI tona ʼuhiga moʼoni, ko te tau ʼo Halamaketone ʼe ko te puleʼaki pe ʼaia e tahi ʼe lelei kiā tatou!​—Luka 18:​7, 8; 2 Petelo 3:⁠13.

Ko Te Tau ʼAē Ka Ina Fakagata Anai Te ʼu Tau Fuli

ʼE fakahoko anai ʼi Halamaketone te meʼa ʼaē neʼe mole heʼeki fakahoko e he tahi age tau​—ko te fakagata ʼo te ʼu tau fuli. Ko tatou fuli ʼe tou fakaʼamu ke pulihi te ʼu tau. Kae ko te ʼu faiga ʼa te tagata neʼe mole feala ke ina fakagata ai te tau. Ko te mole lava fakagata e te tagata ia te tau ʼe ko he fakamoʼoni ʼaia ki te ʼu palalau ʼaenī ʼa Selemia: “ ʼE au ʼiloʼi pe, Ê Sehova, ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) ʼO ʼuhiga mo te ʼu meʼa ʼaē ka fakahoko e Sehova, ʼe fakapapau fēnei ʼi te Tohi-Tapu: “Neʼe ina fakagata te ʼu tau ʼo aʼu ki te potu taupotu ʼo te kele. ʼE ina fasifasiʼi te nahau pea mo maumauʼi te tao; ʼe ina tutu te ʼu saliote ʼi te afi.”​—Pesalemo 46:​8, 9.

ʼI te temi ʼaē ka fakaʼaogaʼi ai e te ʼu puleʼaga tanatou ʼu mahafu moʼo fetauʼaki pea mo maumauʼi te kele, ʼi te temi ʼaia ko te Tupuʼaga ʼo te kele ʼe ina fakahoko anai ia Halamaketone! (Apokalipesi 11:18) Koia ko te tau ʼaia ʼe ina fakahoko anai te meʼa ʼaē neʼe ʼamanaki kiai te ʼu tagata ʼaē neʼe manavasiʼi ki te ʼAtua ʼi te ʼu temi ki muʼa atu. Ko te ʼaho ʼaia ʼe ko he lagavaka anai ki te maʼua ʼaē ke puleʼi e Sehova ʼAtua te ʼu fakatupu fuli, heʼe ko ia ʼaē neʼe ina faʼu ia te kele.

Koia ko te hahaʼi ʼaē ʼe manako ki te faitotonu ʼe mole tonu ke nātou mātataku ʼo ʼuhiga mo Halamaketone. ʼE feala ia ke nātou maʼu ai te ʼamanaki. Ko te tau ʼo Halamaketone ʼe ina pulihi anai ʼi te kele te aga fakahehema fuli pe pea mo te agakovi, pea mo ina fakatuʼu anai he tuʼu foʼou faitotonu ʼi te pule ʼo te Puleʼaga Faka Mesianike ʼa te ʼAtua. (Isaia 11:​4, 5) Ko Halamaketone ʼe mole ko he fakaʼauha fakamataku, kae ʼe ko he kamataʼaga fakafiafia anai maʼa te hahaʼi faitotonu ʼaē ka nātou māʼuʼuli anai ʼo heʼegata ʼi te kele ʼaē ka liliu ko he palatiso.​—Pesalemo 37:⁠29.

[Kiʼi nota]

[Talanoa/Paki ʼo te pasina 5]

KO MEKITO ʼE KO HE FAKATĀTĀ LELEI

Neʼe lelei te tuʼulaga ʼo te kolo ʼāfea ʼo Mekito, he neʼe haga ki te potu ʼuesite ʼo te Malaʼe kele lelei ʼo Siseleele, ʼi te potu noleto ʼo Iselaele. Neʼe ina leʼoleʼohi te ʼu ala ʼaē neʼe fetaulaki ai te kau faifakatau koloā pea mo te kau solia mai te ʼu potu kehekehe. Pea neʼe liliu ia Mekito ko he kolo neʼe hoko ai te ʼu tau maʼuhiga. Neʼe tohi fēnei e te polofesea ko Graham Davies, ʼi tana tohi Cities of the Biblical World​—Megiddo: “Neʼe faigafua ki te hahaʼi faifakatau pea mo te hahaʼi mai te ʼu fenua kehekehe tanatou hū ki te kolo ʼo Mekito . . . kae kapau neʼe mālohi feʼauga te kolo ʼaia, neʼe feala pe hana faka tuʼakoi te fakaʼaogaʼi ʼo te ʼu ala ʼaia pea mo vakavakaʼi te ʼu faifakatau pea mo te ʼu tau. Koia ʼe mole tou punamaʼuli ai ki te faiga ʼa ʼihi kolo ke nātou tauʼi ke feala hanatou maʼu, pea ka nātou ʼohofi te kolo, pea neʼe nātou puipui mālohi te kolo ʼaia.”

Ko te hisitolia loaloaga ʼo Mekito neʼe kamata ʼi te taʼu lua afe ʼi muʼa ʼo totatou temi, ʼi te temi ʼaē neʼe mālo ai ia te hau ʼo Esipito ko Thutmose 3 ʼi tana tauʼi te ʼu hau ʼo Kanaane. Neʼe hoko atu te hisitolia ʼo aʼu ki te taʼu 1918, ʼi te temi ʼaē neʼe mālo ai ia te Senelale Pilitania ko Edmund Allenby ʼi te kautau ʼo Tulukia. ʼI Mekito, neʼe fakagafua e te ʼAtua ki te tuʼi fakamāu ko Palake ke ina fakaʼauha te Hau Kanaane ko Sapini. (Kau Tuʼi Fakamāu 4:​12-24; 5:​19, 20) ʼI te potu ʼaia neʼe mālo ai te Tuʼi Fakamāu ko Seteone ʼi tana fehōkosi mo te kau Matianite. (Kau Tuʼi Fakamāu 7:​1-22) Pea ʼi te kolo pe ʼaia, neʼe matehi ai te ʼu Hau ko Asalia pea mo Sosiasi.​—2 Hau 9:27; 23:​29, 30.

Koia ʼe ko he meʼa lelei te faka ʼuhiga ʼo Halamaketone ki te kolo ʼaia, he neʼe hoko ai te ʼu tuʼuga tau maʼuhiga. ʼE ko he fakatātā lelei ʼo te mālo kātoa ʼa te ʼAtua ʼi tana fehōkosi mo te ʼu mālohi fuli ʼaē ʼe fakafeagai kiā te ia.

[Haʼuʼaga ʼo te paki]

Pictorial Archive (Near Eastern History) Est.

[Paki ʼo te pasina 7]

Ko Halamaketone ʼe ko he kamataʼaga fakafiafia anai

[Paki ʼo te pasina 7]

ʼI te malamanei, ʼe fai te fakatokaga ki te hahaʼi pea ʼe foaki kiā nātou he faigamālie ke nātou hāo ʼi Halamaketone