Ko Te Hahaʼi “Mai Te ʼu Lea Kehekehe” ʼe Nātou Logo Anai Ki Te Logo Lelei

“Ko te ʼu tagata e toko hogofulu mai te ʼu lea kehekehe ʼo te ʼu puleʼaga ʼe nātou [ʼui fēnei] anai: ‘ ʼE mātou fia ʼolo anai mo koutou, koteʼuhi neʼe mātou logo ki te lau ʼaē ko te ʼAtua ʼe nofo mo koutou.’ ”​—Sakalia 8:⁠23.

 1. Neʼe ko te faigamālie fea ʼaē neʼe faka fealagia ai e Sehova ke kamata ia te faka mafola ki te hahaʼi lea kehekehe pea mo lanu kehekehe?

 NEʼE ko te faigamālie lelei ʼaia, he neʼe ko te ʼaho ʼo te Penikosite ʼo te taʼu 33 ʼo totatou temi. ʼI te ʼu vāhaʼa ki muʼa atu, ko te kau Sutea pea mo te kau poloselite mai te ʼu kolo e 15 ʼo te Puleʼaga Loma pea mo ʼihi ʼatu ʼu kolo, neʼe nātou ʼōmai ki Selusalemi ki te toʼotoʼoga ʼo te Pāsikate. ʼI te ʼaho ʼaia, neʼe mole hage ko te mole femahinoʼaki ʼa te hahaʼi ʼo te Tule ʼo Papele, kae ko te toko lauʼi afe hahaʼi ʼaia neʼe nātou fagono mo mahino ki te hahaʼi neʼe nātou fonu ʼi te laumālie maʼoniʼoni, ʼe nātou tala te logo lelei ʼaki te ʼu lea kehekehe ʼo te hahaʼi ʼo te puleʼaga. (Gaue 2:​1-12) Ko te lakaga ʼaia, ʼaē neʼe fakatuʼu ai te kokelekasio faka Kilisitiano pea mo kamata ai ia te gāue faka malamanei ʼaē neʼe fai hoholo ʼo aʼu mai ki te temi nei: ʼaē ko te ako ʼo te hahaʼi ʼi te ʼu lea kehekehe.

 2. Koteā ʼaē neʼe tupu ai te ‘ōfo’ ʼa te hahaʼi ʼo te ʼu lea kehekehe ʼi tanatou logo ki te ʼu tisipulo ʼa Sesu ʼi te Penikosite ʼo te taʼu 33 ʼo totatou temi?

² ʼE lagi neʼe palalau te ʼu tisipulo ʼa Sesu ʼi te lea Faka Keleka, te lea māhani ʼa te hahaʼi ʼo te temi ʼaia. Neʼe nātou toe palalau foki ʼi te lea Faka Hepeleo, ʼaē neʼe fakaʼaogaʼi ʼi te fale lotu. Kae ʼi te ʼaho ʼaia ʼo te Penikosite, neʼe “ōfo” te hahaʼi ʼi tanatou logo ʼe palalau te ʼu tisipulo ʼi te ʼu lea kehekehe ʼa te hahaʼi. Neʼe koteā tona fua? Neʼe malave ki te loto ʼo te hahaʼi ia te ʼu moʼoni maʼuhiga ʼaē neʼe nātou logo kiai ʼi tanatou lea. ʼI te fakaʼosi ʼo te ʼaho ʼaia, ko te kiʼi kūtuga tisipulo neʼe liliu ʼo kaugamālie ko te toko 3 000 tupu!​—Gaue 2:​37-42.

3, 4. Neʼe feafeaʼi te gāue fai faka mafola ʼi te mavae ʼa te ʼu tisipulo mai Selusalemi, mo Sutea, pea mo Kalilea?

³ Mole faʼa fualoa ki te ʼosi ʼo te meʼa fakaofoofo ʼaia neʼe hoko, neʼe hoko te fakataga lahi ʼi Selusalemi, pea ko “natou leva nee mavetevete, nee natou fagonogono holo te Logolelei o te Folafola.” (Gaue 8:​1-4) ʼO ʼuhiga mo Filipo, ʼe tou lau iā Gaue kapite 8, neʼe ko te tagata fai faka mafola evaselio ʼi te lea Faka Keleka. Neʼe fai faka mafola ia Filipo ki te kau Samalitana, pea toe fai faka mafola foki ki te tagata ofisie Etiopea neʼe ina tali lelei te logo ʼo ʼuhiga mo Kilisito.​—Gaue 6:​1-5; 8:​5-13, 26-40; 21:​8, 9.

⁴ ʼI te mavae ʼa te kau Kilisitiano ʼo kumi nofoʼaga ʼi he ʼu potu ʼe tuʼu ʼi tuʼa atu ʼo te ʼu tuʼakoi ʼo Selusalemi, ʼo Sutea, pea mo Kalilea, neʼe nātou felāveʼi ai mo te hahaʼi ʼo te tahi ʼu lanu pea mo te ʼu hahaʼi ʼo ʼihi lea. Ko ʼihi ia nātou neʼe gata pe tanatou fai faka mafola ki te kau Sutea. Kae ko te tisipulo ko Luka neʼe ina ʼui fēnei: “Nee i ai ihi o natou, ko he u tagata mai Sipele mo Silenea, nee natou feleu mo te kau Keleka, pea nee natou fagonogono kia natou te Logolelei o te Aliki ko Sesu.”​—Gaue 11:​19-21.

Ko He ʼAtua ʼe Mole Fakapalatahi —Ko He Logo Maʼa Te Hahaʼi Fuli

 5. ʼE ʼiloga feafeaʼi ʼi te logo lelei te mole fakapalatahi ʼa Sehova?

⁵ ʼE ʼalutahi te ʼu fetogi ʼaia mo te ʼu fakatuʼutuʼu ʼa te ʼAtua, heʼe mole fakapalatahi ia. ʼI te ʼosi fakatonutonuʼi e Sehova ia te ʼapositolo ko Petelo ke fetogi tana manatu ʼo ʼuhiga mo te ʼu puleʼaga, neʼe loto fakafetaʼi ia Petelo ʼo ʼui fēnei:  “ ʼE moʼoni, kua au mahino ko te ʼAtua ʼe mole fakapalatahi; kae ʼi te puleʼaga fuli pe ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.” (Gaue 10:​34, 35, MN; Pesalemo 145:9) ʼI te temi ʼaē neʼe ʼui ai e te ʼapositolo ko Paulo ʼaē ki muʼa atu neʼe ina fakatagaʼi te kau Kilisitiano, ko te “finegalo [ʼo te ʼAtua] ke fakamauli te tagata fuape,” neʼe ina fakamoʼoni ko te ʼAtua ʼe mole fakapalatahi. (1 Timoteo 2:4) ʼE ʼiloga te mole fakapalatahi ʼa te Tupuʼaga, heʼe ina foaki ia te ʼamanaki ʼo te Puleʼaga, ki te hahaʼi kehekehe, ʼo te lanu kehekehe, mo te puleʼaga kehekehe peʼe ko te lea kehekehe.

6, 7. Ko te ʼu lea faka polofeta fea ʼaē neʼe fakakikite ai ko te logo lelei ʼe faka mafola anai ʼi te malamanei kātoa ʼi te ʼu lea kehekehe?

⁶ Neʼe kua fakakikite ʼi he ʼu sēkulō ki muʼa atu, ia te faka mafola ʼaia ʼo te logo lelei ʼi te ʼatu ʼu puleʼaga. ʼE ʼui fēnei ʼi te lea faka polofeta ʼa Taniela, “neʼe foaki kiā [Sesu] te pule, pea mo te fakaʼaliʼaliki, pea mo te puleʼaga, koteʼuhi ke tauhi kiā te ia te hahaʼi, pea mo te ʼu fenua, pea mo te ʼu faʼahiga lea kehekehe.” (Taniela 7:14) ʼE hā te hoko ʼo te fakakikite faka Tohi-Tapu ʼaia, heʼe kua tā te nusipepa ʼaenī iā lea e 151 pea mo tufa ʼi te malamanei kātoa, ʼo feala ai hakotou lau ia te ʼu faʼahi ʼaē ʼe talanoa ʼo ʼuhiga mo te Puleʼaga ʼo Sehova.

⁷ Neʼe fakakikite ʼi te Tohi-Tapu ia te temi ʼaē ka logo ai anai te hahaʼi lea kehekehe ki te logo ʼo te maʼuli. Neʼe fakakikite e Sakalia ko te tauhi moʼoni ʼe ina taki mai anai te tokolahi, ʼo ina ʼui fēnei: “ ʼE hoko anai ʼi te ʼu ʼaho ʼaia, ko te ʼu tagata e toko hogofulu mai te ʼu lea kehekehe ʼo te ʼu puleʼaga ʼe nātou puke anai te tapaʼi kofu ʼo te tagata Sutea [ko te Kilisitiano fakanofo, ʼe kau ki “te Iselaele a te Atua”], ʼo nātou ʼui fēnei: ‘ ʼE mātou fia ʼolo anai mo koutou, koteʼuhi neʼe mātou logo ki te lau ʼaē ko te ʼAtua ʼe nofo mo koutou.’ ” (Sakalia 8:23; Kalate 6:16) ʼO ʼuhiga mo te ʼu meʼa ʼaē  neʼe sio kiai, neʼe ʼui fēnei e te ʼapositolo ko Soane: “Neʼe au sio, pea koʼeni te toe hahaʼi tokolahi, ʼe mole feala tona lau e he tahi, mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli, ʼe nātou tutuʼu iā muʼa ʼo te hekaʼaga faka hau pea iā muʼa ʼo te Akeno.” (Apokalipesi 7:​9, MN ) Ko te ʼu lea faka polofeta ʼaia ʼe hoko moʼoni nei!

Neʼe Fakahoko Te Fai Faka Mafola Ki Te Hahaʼi Kehekehe

 8. Koteā te ʼu fetogi ʼo te temi ʼaenī ʼe tonu ai ke tou fetogi mo tatatou fai faka mafola?

⁸ Iā ʼaho nei, tokolahi te hahaʼi ʼe nātou mavae ʼo ʼolo ki he tahi fenua, ʼuhi ko te mondialisation. Tokolahi te hahaʼi mai te ʼu faʼahi ʼaē ʼe hoko ai te ʼu tau pea mo te ʼu faigataʼaʼia ʼo te maʼuli, ʼe nātou feholaki ki te ʼu fenua koloāʼia, ʼo nātou faiga ke nātou māʼuʼuli fīmālie ʼi te faʼahi faka paʼaga. ʼE lahi te ʼu fenua, kua fakatuʼu ai te ʼu nofoʼaga ʼa te hahaʼi matāpule ʼaē ʼe nātou feholaki mai tonatou ʼu fenua. Ohage la, ʼi Finilani ʼe ko lea e 120 tupu, ʼi Ositalalia ʼe ko lea e 200 tupu. Pea ʼi te kolo pe e tahi ʼi Amelika, ko San Diego, ʼe ko lea e 100 tupu!

 9. Koteā te fakatuʼutuʼu ʼe tonu ke tou fai ʼo ʼuhiga mo te kau matāpule ʼo totatou telituale?

⁹ ʼI totatou ʼuhiga minisi Kilisitiano, ʼe ko he fihifihia koa kiā tatou ʼi tatatou minisitelio ia te hahaʼi matāpule ʼaia? Kailoa ia! ʼE ko he faigamālie ʼaia ke tou fakalahi ai tatatou fai faka mafola​—ʼe ko ‘he ʼu gāueʼaga kua lelei ki te taʼukai.’ (Soane 4:35) ʼE tou tōkakaga ʼo taupau te hahaʼi ʼaē ʼe nātou mahino ki tonatou masiva fakalaumālie, tatau aipe peʼe ko te kau matāpule. (Mateo 5:3) Koia, ʼi te taʼu fuli ko te kaugamālie ʼo te ʼu “lea kehekehe” ʼe nātou liliu ko te ʼu tisipulo ʼa Kilisito. (Apokalipesi 14:​6, MN ) Ohage la, ʼi te māhina ʼo ʼAukusitō 2004, neʼe fai te fai faka mafola ʼi Siamani iā lea e 40. Pea ʼi Ositalalia, talu mai te ʼu taʼu e 18 neʼe faka mafola te logo lelei iā lea e 30. ʼI Keleka, ko te kau Fakamoʼoni ʼa Sehova neʼe nātou faka mafola ki te hahaʼi ʼe nātou palalau kiā lea e 20. ʼI te malamanei kātoa, ko te toko 80 ʼi te teau ʼo te kau Fakamoʼoni ʼa Sehova ʼe mole nātou palalau Faka Pilitania,  ia te lea ʼaē ʼe palalauʼi ʼi te malamanei kātoa.

10. Koteā te maʼua ʼa te kau fai faka mafola takitokotahi ʼo ʼuhiga mo te fai ʼo ni ʼu tisipulo ʼi “te ʼu fenua fuli”?

¹⁰ ʼE hoko nei te fakatotonu ʼa Sesu ʼaē ke “fai ni ʼu tisipulo ʼi te hahaʼi ʼo te ʼu fenua fuli.” (Mateo 28:​19, MN ) Iā fenua e 235, ko te kau Fakamoʼoni ʼa Sehova ʼe nātou fakalogo ki te fakatotonu ʼaia, ʼo nātou tufa te ʼu tohi faka Tohi-Tapu ia lea e 400 tupu. Tatau aipe peʼe tā e te kautahi ʼa Sehova he ʼu tohi maʼa te hahaʼi, kae ʼe tonu ki te kau fai faka mafola takitokotahi ke nātou fakahā ia te logo ʼo te Tohi-Tapu ki “te hahaʼi fuape” ʼi te lea ʼaē ʼe nātou mahino kiai. (Soane 1:​7, MN ) ʼE faka fealagia ai ʼaki te gāue logo tahi ʼaia ke fakaʼaʼu ia te logo lelei ki te toko lauʼi miliona kau matāpule. (Loma 10:​14, 15) Ei, ko tatou fuli ʼe tonu ke tou kau kiai!

Tou Ako He Tahi Lea

11, 12. (a) He koʼe ʼe tonu ke tou ako he tahi lea, pea ʼe tokoni feafeaʼi mai anai te laumālie maʼoniʼoni? (b) He koʼe ʼi te agamāhani, ʼe lelei ke tou faka mafola ki te hahaʼi ʼi tanatou lea?

¹¹ Iā ʼaho nei, tokolahi te kau fai faka mafola ʼe nātou fia ako he tahi lea, kae ʼe mole tonu pe ke nātou fakalogo ke tokoni faka milakulo age ia te laumālie ʼo te ʼAtua. (1 Kolonito 13:8) ʼE ko he meʼa faigataʼa ia te ako ʼo he lea foʼou. Māʼiape la mo nātou ʼaē ʼe nātou popoto ʼi he tahi lea, ʼe lagi tonu ke nātou fetogi tanatou faʼahiga manatu pea mo tanatou faʼahiga fai faka mafola ke fia logo te hahaʼi ki te logo ʼo te Tohi-Tapu ʼaē ʼe faka mafola age ki tanatou lea, kae ʼe mole nātou fenua tahi pea mo kehekehe tonatou ʼu agaʼi fenua. Pea ʼi te agamāhani, ʼe umiuminoa te hahaʼi ʼaē ʼe ʼōmai mai he tahi fenua, pea ʼe ko he meʼa faigataʼa hatatou mahino ki tanatou faʼahiga fakakaukau.

¹² Kae ko te laumālie maʼoniʼoni ʼe lagolago tuʼumaʼu ki te ʼu kaugana ʼa Sehova ʼo ʼuhiga mo tanatou ʼu faiga ʼaē ke nātou tokoni ki te hahaʼi matāpule. (Luka 11:13) Ko te laumālie maʼoniʼoni ʼe mole ina foaki faka milakulo mai anai he ʼu fealagia ʼi te lea, kae ʼe ina lava fakatuputupu tatatou fia felogoi mo te hahaʼi ʼaē ʼe mole lea tahi mo tatou. (Pesalemo 143:10) Ko te faka mafola peʼe ko te akoʼi ʼo te logo ʼo te Tohi-Tapu ki te hahaʼi ʼaki he lea ʼe mole nātou māhani kiai, ʼe feala ke malave ki ʼonatou ʼatamai, kae ke feala hona malave ki ʼonatou loto, ʼi te agamāhani ʼe lelei age ke tou palalau ʼi tanatou lea​—te lea ʼaē ka malave ki tanatou ʼu fakaʼamu, mo te ʼu meʼa ʼaē ʼe ina uga nātou, pea mo tanatou ʼu ʼamanaki.​—Luka 24:⁠32.

13, 14. (a) He koʼe ko ʼihi ʼe nātou ako he tahi lea moʼo fai ʼaki tanatou minisitelio? (b) Koteā te maʼuli faka sākilifisio ʼaē ʼe fai e ʼihi?

¹³ Tokolahi te kau fai faka mafola ʼo te Puleʼaga ʼe nātou fai faka mafola ʼi te ʼu telituale ʼo te hahaʼi matāpule, heʼe nātou tokagaʼi ʼe nātou tali lelei te moʼoni ʼo te Tohi-Tapu. Ko ʼihi ʼe nātou logoʼi ʼe nātou lotomālohi mokā nātou faigaʼi he ʼu ʼaluʼaga faigataʼa pea mo lelei tanatou selevisi. ʼE ʼui e te filiale ʼa te kau Fakamoʼoni ʼa Sehova ʼi te potu saute ʼo Eulopa, ko te “tokolahi ʼaē ʼe ʼōmai mai te Potu Esite ʼo Eulopa ʼe nātou fia logo ki te moʼoni.” ʼE ko he meʼa fakafiafia he tokoni ki te taʼi hahaʼi ʼaia!​—Isaia 55:​1, 2.

¹⁴ Kae ke fua lelei te gāue ʼaia, ʼe tonu ke tou loto papau kiai pea mo māʼuʼuli faka sākilifisio. (Pesalemo 110:3) Ohage la, tokolahi te ʼu famili Fakamoʼoni Saponia neʼe nātou tuku tonatou ʼu ʼapi matalelei ʼi te ʼu kolo lalahi kae nātou ʼolo ki te ʼu koga meʼa mamaʼo moʼo tokoni ki te ʼu hahaʼi mai Siaina ke nātou ako te Tohi-Tapu. ʼI te potu uesite ʼo Amelika, ʼe ʼolo tuʼumaʼu te kau fai faka mafola lolotoga hola e tahi peʼe lua, ki te ʼu nofoʼaga Filipine moʼo fai ʼo te ʼu ako Tohi-Tapu. ʼI Nolovesi, ʼe fai e te taumātuʼa te ako  Tohi-Tapu ʼa te famili mai Afghanistan. ʼE nā fakaʼaogaʼi ia te kaupepa lahi Fakapilitānia pea mo Faka Nolovesi Koteā ʼAē ʼe Fakamaʼua Mai e Te ʼAtua Kia Tatou? a ʼE lau e te famili te ʼu palakalafe ʼi te lea Faka Pelesia, ko he lea ʼe teitei tatau mo tanatou lea ʼaē ko te Faka Dari. ʼE nātou fai palalau ʼi te lea Fakapilitānia pea mo Faka Nolovesi. ʼE ko he tapuakina lahi te taʼi loto faka sākilifisio ʼaia pea ʼe kita maʼu ai he ʼu fakapale lahi mokā tali te logo lelei e te kau matāpule. b

15. E feafeaʼi hatatou kau fuli ki te fai faka mafola ki te hahaʼi matāpule?

¹⁵ ʼE feala koa hakotou kau ki te gāue ʼaia ʼaē ko te fai faka mafola ki te hahaʼi matāpule? ʼE lagi lelei ke koutou kamata tohi ki he moʼi pepa ia te kau matāpule ʼaē ʼe nonofo ʼi tokotou telituale. ʼOsi ʼaia, koutou ʼave he ʼu kiʼi pepa lotu peʼe ko he ʼu kaupepa lalahi ʼi te ʼu lea ʼaia. Ko te kiʼi kaupepa Une bonne nouvelle pour des gens de toutes nations, ʼaē neʼe tā ʼi te 2004, neʼe ko he meʼa gāue moʼo faka mafola te ʼamanaki ʼo te Puleʼaga, heʼe ko te logo ʼaē ʼe tuʼu ai ʼi te ʼu lea kehekehe ʼe faigafua pea mo fakaloto mālohi.​—Vakaʼi te alatike “Une bonne nouvelle pour des gens de toutes nations” ʼi te pasina 32.

“Koutou ʼOʼofa Ki Te Matāpule”

16. Koteā ʼaē neʼe tali lelei e te ʼu tagata ʼāfea moʼo tokoni ki te hahaʼi matāpule?

¹⁶ Peʼe tou ako he tahi lea peʼe kailoa, kae ko tatou fuli ʼe tou lava lagolago ki te ako fakalaumālie ʼo te kau matāpule ʼi totatou telituale. Neʼe akoʼi e Sehova tana hahaʼi ke nātou “ ʼoʼofa ki te matāpule.” (Teutalonome 10:​18, 19) Ohage la, ʼi te kolo lahi ʼi te Potu Noleto ʼo Amelika, ko te ʼu kokelekasio e nima ʼe nātou fai tanatou ʼu fono ʼi te Fale ʼo Te Puleʼaga pe e tahi. ʼE lahi te ʼu fale fono, ʼe fetofetogi ʼi te taʼu fuli te ʼu hola fono, koia neʼe tō ʼi te ʼu ʼAhotapu afiafi te ʼu fono lea Faka Siaina. Kae tokolahi ʼi te kau matāpule ʼaē ʼe gāue ʼi te ʼu fale kai neʼe mole nātou lava kau ki te ʼu fono ʼo te ʼaho ʼaia. Koia ko te ʼu tagata ʼāfea ʼo ʼihi kokelekasio neʼe nātou tali lelei ke nātou fetogi tonatou ʼu hola fono ke ʼuluaki fai ʼi te ʼAhotapu ia te fono ʼa te kokelekasio lea Faka Siaina.

17. ʼE tonu ke tou tali feafeaʼi mokā fakatuʼutuʼu e ʼihi ke nātou ʼolo ʼo tokoni ki te hahaʼi matāpule?

¹⁷ Ko te ʼu tagata taupau ʼofa ʼe nātou tali ke ʼolo te ʼu tēhina faiva pea mo fakapotopoto ʼo tokoni ki te hahaʼi matāpule. ʼE feala ki he ʼu kokelekasio ke pupuli tonatou ʼu tēhina pea mo tuagaʼane faiva ʼaia, kae ʼe tatau te manatu ʼa te ʼu tagata taupau ʼaia mo ʼaē ʼa te ʼu tagata ʼāfea ʼo Lisitala pea mo Ikoniome. Ko te ʼu tagata ʼāfea ʼo te ʼu kolo ʼaia neʼe nātou tali lelei ke ʼalu ia Timoteo mo Paulo, logola te ʼaoga lahi ʼo Timoteo ki tonatou kokelekasio. (Gaue 16:​1-4) Tahi ʼaē meʼa, ko nātou ʼaē ʼe nātou takitaki te gāue fai faka mafola ʼe nātou haga fai te gāue ʼaia tatau aipe peʼe kehe te faʼahiga maʼuli ʼa te kau matāpule, mo tanatou agaʼi fenua, peʼe ko tanatou ʼu aga. ʼE nātou tali te ʼu ʼaluʼaga kehekehe ʼaia pea mo kumi he ʼu puleʼaki moʼo fakatuputupu he ʼu felogoi lelei ʼuhi ko te logo lelei.​—1 Kolonito 9:​22, 23.

18. Koteā te matapā lahi ʼo te gāue ʼaē ʼe ʼava kiā tatou fuli?

¹⁸ Ohage ko tona fakakikite, ko te logo lelei kua faka mafola ʼi “te ʼu lea kehekehe ʼo te ʼu puleʼaga.” Kei tuputupu te gāue ʼi te ʼu telituale matāpule. Ko te toko lauʼi afe kau fai faka mafola kua nātou hū ki te “matapā lahi [ʼaia] ki te gāue.” (1 Kolonito 16:​9, MN ) Kae ʼe ʼi ai te tahi meʼa ʼe tonu ke tou fai moʼo gāueʼi fakalelei te ʼu telituale ʼaia, pea ʼe tou talanoa anai kiai ʼi te alatike ʼaē ka hoa mai.

[Kiʼi nota]

ʼE Feala Koa Hakotou Fakamahino?

• E feafeaʼi hatatou faʼifaʼitakiʼi te mole fakapalatahi ʼa Sehova?

• ʼE tonu ke tou tali feafeaʼi te hahaʼi matāpule ʼo totatou telituale?

• He koʼe ʼe lelei ke tou fai faka mafola ki te hahaʼi ʼi tanatou lea?

• E feafeaʼi hatatou ʼoʼofa ki te kau matāpule ʼo totatou telituale?

[Fehuʼi]

[Mape/Paki ʼo te pasina 23]

(Vakaʼi te nusipepa)

Loma

KELETE

ASIA

FILISIA

PAMEFILIA

PONITO

KAPATOSIA

MESOPOTAMIA

METIA

PALETESE

ELAME

ALAPE

LIPEA

ESIPITO

SUTEA

Selusalemi

[Te ʼu vai]

Tai Metitelanea

Tai Uli

Tai Kula

Golfe Persique

[Paki]

ʼI te Penikosite ʼo te taʼu 33 ʼo totatou temi, ko te hahaʼi mai te ʼu kolo e 15 ʼo te Puleʼaga Loma pea mo ʼihi ʼatu ʼu kolo neʼe nātou logo ki te logo lelei ʼi tanatou lea

[Paki ʼo te pasina 24]

Tokolahi te kau matāpule ʼe nātou fia logo ki te ʼu moʼoni ʼo te Tohi-Tapu

[Paki ʼo te pasina 25]

ʼE tohi ʼi te pano, te higoa ʼo te Fale ʼo Te Puleʼaga iā lea e nima