Tou Liliu Ko He ʼu Minisi Faiva Pea Mo Popoto

“Kua au liliu ko meʼa fuli maʼa te hahaʼi kehekehe, ke feala ai haku hāofaki niʼihi.”—1 Kolonito 9:​22, MN.

1, 2. (a) Ko te ʼu ʼaluʼaga fea ʼaē neʼe faiva ai ia te ʼapositolo ko Paulo ʼi tana minisitelio? (b) Koteā ʼaē neʼe ʼui e Paulo ʼo ʼuhiga mo tana fakahoko ʼo tana gāue?

 NEʼE faigafua tana fai palalau mo te hahaʼi popoto pea mo te hahaʼi faʼu falelā. Neʼe faiva ʼi te fakalotoʼi ʼo te kau takitaki Loma pea mo te kau gāue kele Filisia. ʼAki tana ʼu tohi neʼe ina uga te kau Keleka popoto pea mo te kau Sutea ʼaē neʼe fia mulimuli ki te Lao ʼa Moisese. Neʼe faigataʼa te faka lākahalaʼi ʼo tana ʼu akonaki he neʼe malave mālohi ki te hahaʼi. Neʼe faiga ke ina maʼu he faka felogoi mo te hahaʼi fuli ke feala hana taki ʼo niʼihi kiā Kilisito.​—Gaue 20:⁠21.

² Ko te tagata ʼaia neʼe ko te ʼapositolo ko Paulo, neʼe ko he minisi poto pea mo faiva. (1 Timoteo 1:12) Neʼe fakatotonu age e Sesu kiā ia ke ina “ ʼave te huafa ʼo Kilisito ki te ʼu puleʼaga, ʼo feiā ki te ʼu hau pea mo te ʼu foha ʼo Iselaele.” (Gaue 9:​15, MN ) Neʼe ina tali feafeaʼi tana gāue ʼaia? Neʼe ina ʼui fēnei: “Kua au liliu ko meʼa fuli maʼa te hahaʼi kehekehe, ke feala ai haku hāofaki niʼihi. Kae ʼe au fai ia meʼa fuli ʼuhi ko te logo lelei, ke au maʼu mo niʼihi.” (1 Kolonito 9:​22, 23, MN ) Koteā te ako ʼe tou tāʼofi mai te faʼifaʼitaki ʼa Paulo ʼe ʼaoga anai kiā tatou ke feala hatatou tuputupu ʼi tatatou fai faka mafola pea mo tatatou faiako?

Ko Te Tagata Kua Fetogi ʼe Ina Fakahoko Tona Maʼua Faigataʼa

 3. Neʼe feafeaʼi te aga ʼa Paulo ki te kau Kilisitiano ʼi muʼa ʼo tana tafoki ki te Lotu Faka Kilisitiano?

³ Ko Paulo, neʼe ko he tagata koa neʼe faʼa kātaki tuʼumaʼu, mo agalelei pea mo ina fai ia te maʼua ʼaē neʼe foaki age? Kailoa ia! ʼI te tauhi fakavale ʼa Saulo (te higoa ʼāfea ʼaia ʼo Paulo) ki te Lotu Faka Sutea, neʼe lahi te ʼu fakataga ʼaē neʼe ina fai ki te ʼu tisipulo ʼa Kilisito. ʼI tana kei tūpulaga, neʼe lagolago ki te fakapogi ʼo Setefano. Ki muli age, neʼe lahi tana gaohi koviʼi ia te kau Kilisitiano. (Gaue 7:58; 8:​1, 3; 1 Timoteo 1:13) Neʼe hoko atu tana fai ia “te ʼu fakamataku pea mo te ʼu fai fakapō ʼo fakafeagai ki te kau tisipulo ʼo te ʼAliki.” Neʼe mole gata ʼaki pe tana tuli te hahaʼi tui ʼi Selusalemi, kae neʼe ina hoko atu mo te fakatagaʼi ʼo nātou mai te potu noleto ʼo aʼu ki Tamaso.​—Gaue 9:​1, 2, MN.

 4. Koteā te fetogi ʼaē neʼe tonu ke fai e Paulo moʼo fakahoko tana gāue?

⁴ Ko te tupuʼaga ʼo te fehiʼa mālohi ʼa Paulo ki te Lotu Faka Kilisitiano, heʼe ʼi tana manatu neʼe ko te lotu foʼou ʼaia ʼe fakatupu kovi anai ki te Lotu Faka Sutea, heʼe ina tali anai he ʼu akonaki foʼou ʼe mole lelei. Pea ko Paulo neʼe ko “he Faliseo,” ko tona faka ʼuhiga neʼe “ko he tahi neʼe tuku keheʼi.” (Gaue 23:​6, MN ) Koutou fakakaukauʼi age muʼa te punamaʼuli ʼa Paulo ʼi tana ʼiloʼi ʼaē, logola neʼe ʼi ai te tahi kau Kilisitiano, kae neʼe fili ia ia e te ʼAtua ke ina faka mafola ia Kilisito ki te kau Senitile! (Gaue 22:​14, 15; 26:​16-18) Ko te kau Faliseo neʼe mole nātou fia kakai mo te hahaʼi ʼaē neʼe nātou ʼui ʼe ko te kau agahala! (Luka 7:​36-39) ʼE mahino ia, neʼe tonu ke ina fai he toe fetogi lahi moʼo faka ʼalutahi tana manatu mo te finegalo ʼo te ʼAtua ʼaē ke ina hāofaki ia te hahaʼi kehekehe.​—Kalate 1:​13-17.

 5. E feafeaʼi hatatou faʼifaʼitakiʼi ia Paulo ʼi tatatou minisitelio?

⁵ ʼE lagi tou fai mo tatou ia te gāue ʼaia. Kapau ʼe tou felāveʼi mo ni matāpule ʼi totatou telituale, ʼe tonu ke tou tōkakaga ki tatatou aga pea mo ʼaua naʼa tou fakapalatahi. (Efeso 4:​22-24) Peʼe tou mahino kiai peʼe kailoa, kae ʼe tou mulimuli ki te ʼu agaʼi fenua ʼaē neʼe tutupu mo ia, pea mo te ʼu meʼa ʼaē neʼe akoʼi mai kiā tatou. ʼE feala ai ke tupu iā tatou he ʼu manatu fakapalatahi, pea mo he ʼu manatu fefeka. ʼE tonu ke tou tekeʼi te ʼu manatu ʼaia mo kapau ʼe tou fia maʼu te hahaʼi ʼaē ʼe hage ko ni ʼu ōvi pea mo tou tokoni kiā nātou. (Loma 15:7) Neʼe fai ia te faʼahi ʼaia e Paulo. Neʼe ina tali ke ina fakalahi tana minisitelio. ʼAki tona ʼofa ki te hahaʼi, neʼe liliu ʼo faiva ʼi te faiako pea ʼe ko he faʼahi ʼe  tonu ke tou faʼifaʼitakiʼi. Ka tou ako te minisitelio ʼo te “ ʼapositolo . . . ʼo te ʼu puleʼaga,” pea ʼe tou mahino ai neʼe ko te tagata neʼe tokaga ki te hahaʼi, mo palalau ki te ʼu meʼa neʼe mahino kiai te hahaʼi, pea mo faiva ʼi te fai faka mafola pea mo te faiako. a​—Loma 11:​13, MN.

Neʼe Poto Palalau ʼi Te ʼu ʼAluʼaga Kehekehe ʼo Tana Minisitelio

 6. Neʼe ʼiloga feafeaʼi te fakaʼapaʼapa ʼa Paulo ki te maʼuli ʼa te hahaʼi, pea neʼe koteā tona fua?

⁶ Neʼe fakaʼapaʼapa ia Paulo ki te tui ʼa te hahaʼi pea mo tonatou maʼuli. ʼI te temi ʼaē neʼe palalau ai ki te Hau ko Akilipa 2, neʼe fakamoʼoni e Paulo ko te hau ʼe ina “ ʼiloʼi lelei te ʼu agaʼi fenua fuli ʼo feiā mo te ʼu fihi ʼaē neʼe hoko ʼi te kau Sutea.” Neʼe poto ia Paulo ʼi te fakaʼaogaʼi ʼo te ʼu akonaki ʼaē neʼe faka tui kiai ia Akilipa, pea neʼe fai palalau mo te hau ki te ʼu meʼa ʼaē neʼe mahino lelei kiai. Ko te ʼu fai palalau ʼa Paulo neʼe tāsilo lelei pea mo fakalotoʼi, koia neʼe tupu ai te ʼui fēnei ʼa Akilipa: “ ʼI he kiʼi temi siʼi pea ke faka tafoki au ke au liliu ko he Kilisitiano.”​—Gaue 26:​2, 3, 27, 28, MN.

 7. ʼI tana fai faka mafola ki te hahaʼi ʼi Lisitala, neʼe fakahā feafeaʼi e Paulo tana poto ʼi te palalau ki te hahaʼi kehekehe?

⁷ Tahi ʼaē meʼa, neʼe poto Paulo ʼi te palalau ki te hahaʼi kehekehe. Koutou fakatokagaʼi tana faigaʼi ʼaē ke mole atolasio age te kaugamālie kiā ia pea mo Palenapasi ʼi te kolo ʼo Lisitala. ʼO ʼuhiga mo te hahaʼi ʼaia neʼe lea faka Likaonia, neʼe ʼui ʼe nātou kau ʼi te hahaʼi ʼaē neʼe mole faʼa lelei tanatou ako pea ʼe nātou faka tui ʼaupito ki te ʼu meʼa fakamanamana. Iā Gaue 14:​14-18, neʼe ʼui e Paulo ko te ʼu meʼa ʼaē neʼe faʼu, te ʼua pea mo te ʼu fasiga taʼu, ʼe ko te fakamoʼoni ʼaia ʼo te māʼoluga ʼaupito ʼo te ʼAtua moʼoni. Neʼe faigafua te mahino ki tana akonaki, pea ko he faʼahi neʼe ina “taofi ai te hahai tanatou failaulau” kiā Paulo pea mo Palenapasi.

 8. Ko te ʼu ʼaluʼaga fea ʼaē neʼe fakahā ai e Paulo neʼe poto ʼi te palalau ki te hahaʼi kehekehe, logola ʼi ʼihi temi neʼe ʼita ai?

 ⁸ ʼE tou mahino lelei neʼe mole haohaoa ia Paulo pea ʼi ʼihi temi neʼe ʼi ʼita ʼaupito ai. Ohage la, ʼi te tahi ʼaho neʼe fakatō ki laloʼi ia ia pea mo hala tona fakatonutonuʼi, pea neʼe ina fai te ʼu tali palalau fefeka ki te tagata Sutea ʼe higoa ko Ananiasi. Kae ʼi te fakahā age kiā ia neʼe ina leakoviʼi te pelepitelo lahi, neʼe foimo fai fakalelei atu aipe ia Paulo he neʼe mole ina ʼiloʼi. (Gaue 23:​1-5) ʼI Ateni, neʼe ʼuluaki “mamahi tona loto i tana mamata ki te kolo nee fonu ai ko te u taulaʼatua.” Kae ʼi tana akonaki ʼi te Moʼuga ʼo Malesio, neʼe lolomi e Paulo tona ʼita. Neʼe palalau ki te kau Ateni ʼi tonatou fakatahiʼaga, ʼo ina fai tana ʼu palalau ki te faʼahi ʼe nātou lava felogoi ai, ʼe ko tonatou ʼaletale ʼe tohi ai “Ki Te Atua Hee Ilo” pea mo ina fakahā age te higoa ʼo te tagata fai tuketuke.​—Gaue 17:​16-28.

 9. Neʼe fakahā feafeaʼi e Paulo tona poto ʼi te felogoi mo te hahaʼi kehekehe?

⁹ Ka faiakonaki ia Paulo ki ni ʼu hahaʼi kehekehe, neʼe ina fakahā tona poto ʼi te felogoi mo te hahaʼi. Neʼe ina tokagaʼi tanatou ʼu agaʼi fenua pea mo te ʼu meʼa ʼaē neʼe akoʼi age kiā nātou. ʼI tana faitohi ki te kau Kilisitiano ʼo Loma, neʼe mahino ki tanatou māʼuʼuli ʼi te taulaga ʼo te mālohi lahi ʼo te temi ʼaia. Ko te puani tāfito ʼo te tohi ʼa Paulo ki te kau Kilisitiano ʼi Loma, ko tana talanoa ki te mālo ʼa te mālohi ʼo Kilisito moʼo totogi ia te agahala ʼa Atama ʼaē ʼe ina fakahalaʼi te hahaʼi. Neʼe ina fai te ʼu palalau neʼe malave ki te loto ʼo te kau Kilisitiano Loma pea mo nātou ʼaē ʼi ʼonatou tafaʼaki.​—Loma 1:4; 5:​14, 15.

10, 11. Neʼe feafeaʼi te ʼu lea fakatātā ʼaē neʼe fai e Paulo ki te hahaʼi? (Vakaʼi mo te kiʼi nota ʼi te lalo pasina.)

¹⁰ Koteā ʼaē neʼe fai e Paulo ʼi tana fia fakamahino ki te hahaʼi ia te ʼu moʼoni loloto ʼo te Tohi-Tapu? Moʼo fakamahino he ʼu manatu fakalaumālie faigataʼa, neʼe faiva ia te ʼapositolo ʼi te fakaʼaogaʼi ʼo te ʼu lea fakatātā ʼaē neʼe ʼiloʼi lelei e te hahaʼi pea mo nātou mahino gafua kiai. Ohage la, neʼe ʼiloʼi e Paulo ko te hahaʼi ʼo Loma neʼe nātou ʼiloʼi lelei te maʼuli ʼo te ʼu kaugana ʼi te Puleʼaga Loma. Pea tokolahi ʼi te hahaʼi ʼaē neʼe faitohi kiai, lagi neʼe ko te ʼu kaugana. Koia neʼe fakaʼaogaʼi ai e Paulo te maʼuli kaugana ko he fakatā moʼo lagolago ki tana fakamahino ia te puani maʼuhiga ʼo ʼuhiga mo takita filifili ke kita fakalogo ki te agahala peʼe ki te faitotonu.​—Loma 6:​16-20.

¹¹ ʼE ʼui fēnei ʼi te tohi: “ ʼI te kau Loma, ko he tagata pule neʼe feala ke ina faka ʼāteaina hana sinifu, peʼe neʼe feala ki te kaugana ke ina totogi tona pule ke faka ʼāteaina ia ia. Neʼe toe feala ke fai he fakatuʼutuʼu ʼo ʼuhiga mo te faka ʼāteaina ʼo he sinifu mo kapau ko te pule neʼe ko he ʼatua.” Ko he sinifu kua faka ʼāteaina neʼe feala ke hoko atu tana gāue maʼa tona pule kae neʼe foaki age hona totogi. Lagi neʼe manatu ia Paulo ki te faʼahi ʼaia ʼi tana faitohi ʼo ʼuhiga mo te filifili ʼa he tahi peʼe ko ai te pule ʼaē ʼe fia fakalogo kiai​—ko te agahala peʼe ko te faitotonu. Ko te kau Kilisitiano ʼi Loma neʼe faka ʼāteaina mai te agahala pea ʼi te temi nei ʼe nātou fakalogo ki te ʼAtua. Neʼe kua nātou ʼāteaina ke feala hanatou tauhi ki te ʼAtua, kae neʼe kei fakalogo kiā nātou mo kapau neʼe nātou loto kiai, ke nātou tauhi ki tonatou pule ʼāfea, ia te agahala. Ko te fakatā mahino faigafua ʼaia, neʼe ina uga te kau Kilisitiano takitokotahi ʼi Loma ke nātou fai te fehuʼi ʼaenī, ‘Ko ai te pule ʼaē ʼe au kaugana ki ai?’ b

ʼE Tou Maʼu Te Ako Mai Te Faʼifaʼitaki ʼa Paulo

12, 13. (a) Koteā te meʼa ʼaē ʼe tonu ke tou fai ʼi te temi nei ke feala ki ʼatatou palalau ke malave ki te loto ʼo te hahaʼi kehekehe? (b) Koteā te ʼu palalau ʼaoga ʼe fua lelei anai mo kapau ʼe koutou faka mafola ki te hahaʼi ʼaē ʼe nātou tau mo te ʼu ʼaluʼaga kehekehe?

¹² Ohage ko Paulo, ʼe tonu ke tou tōkakaga, mo tou palalau ki te ʼu meʼa neʼe mahino kiai te hahaʼi, pea mo faiva ʼi tatatou ʼu palalau ke malave ki te  loto ʼo te hahaʼi. Moʼo tokoni ki te hahaʼi ke nātou mahino ki te logo lelei, ʼe mole feʼauga hatatou palalau feiā pe kiā nātou, ʼe tonu ke tou fakahā he logo kua tou teuteuʼi, peʼe tou tuku he ʼu tohi faka Tohi-Tapu. ʼE tou faiga ke tou toe ʼiloʼi te ʼu meʼa ʼaē ʼe ʼaoga kiā nātou, tanatou ʼu tuʼania, te ʼu meʼa ʼaē ʼe nātou manako pea mo fehiʼa kiai, te ʼu meʼa ʼaē ʼe nātou mātataku kiai pea mo tanatou ʼu manatu ʼo ʼuhiga mo te tahi ʼu hahaʼi. Logola ko he faʼahi ʼe faigataʼa ʼaupito, kae ko te kau fai faka mafola ʼo te Puleʼaga ʼi te malamanei kātoa ʼe nātou fiafia ʼi tona fai. Ohage la, ʼe ʼui fēnei ʼi te filiale ʼa te kau Fakamoʼoni ʼa Sehova ʼi Hukalia: “Ko te ʼu tēhina ʼe nātou fakaʼapaʼapa ki te ʼu agaʼi fenua pea mo te maʼuli ʼa ʼihi hahaʼi, pea ʼe mole nātou fakamaʼua age ke nātou muliʼi tanatou ʼu agaʼi fenua.” ʼI te ʼu potu fuli ʼo te kele, ko te faʼahiga maʼuli ʼaia ʼa te kau Fakamoʼoni.

¹³ ʼI te tahi fenua ʼo te ʼu Fenua Nai, ʼe tuʼaniaʼi e te tokolahi ia te mahaki, te akoʼi ʼo te fānau, pea mo te ako ʼaē ʼi te ʼu faleako. ʼI te fenua ʼaia, ko te kau fai faka mafola ʼe nātou talanoa tāfito ki te ʼu ʼaluʼaga ʼaia kae ʼe mole nātou talanoa ki te ʼu meʼa kovi ʼaē ʼe hoko ʼi te malamanei peʼe ki te ʼu fihifihia faigataʼa ʼo te maʼuli faka sosiale. ʼO toe feiā ʼi te kolo lahi ʼi Amelika, neʼe fakatokagaʼi e te kau fai faka mafola, ko te hahaʼi ʼo tonatou telituale ʼe nātou tuʼaniaʼi te ʼu aga fakakākā, te lahi ʼa te ʼu motokā ʼi te ala, pea mo te fai fakapō. ʼE fakaʼaogaʼi e te kau Fakamoʼoni te ʼu ʼaluʼaga ʼaia ʼo te maʼuli moʼo kamata ʼaki he ʼu fai palalau faka Tohi-Tapu, pea ʼe fua lelei. Ko nātou ʼaē ʼe faiva ʼi te fakaʼaogaʼi ia te Tohi-Tapu ʼi tanatou ʼu faiako, ʼe nātou tōkakaga ki te ʼu fai palalau ʼaē ʼe nātou fai, ʼe nātou fai te ʼu palalau ʼe fakatupu lotomālohi pea mo ʼaoga, ʼo nātou fakahā te maʼuhiga ʼo te gāueʼi ʼo te ʼu pelesepeto faka Tohi-Tapu ʼi te temi nei, pea mo te ʼamanaki taulekaleka ʼaē ka foaki anai e te ʼAtua ʼi te ka haʼu.​—Isaia 48:​17, 18; 52:15.

14. Fakamatala te ʼu ʼaluʼaga ʼaē ʼe ʼaoga ai ke tou mulimuli ki te ʼu meʼa ʼaē ʼe ʼaoga ki te hahaʼi.

¹⁴ ʼE toe lelei foki ke tou fetofetogi tatatou ʼu faʼahiga fai palalau ʼi te minisitelio, mai tona ʼaluʼaga ʼaē ʼe kehekehe te ʼu agaʼi fenua, te ako, pea mo te lotu ʼa te hahaʼi. ʼE mole tatau anai tatatou fai palalau mo te hahaʼi ʼaē ʼe nātou tui ki he Tupuʼaga kae mole nātou tui ki te Tohi-Tapu pea mo nātou ʼaē ʼe mole nātou faka tui ki te ʼAtua. Ka tou fai palalau mo he tahi ʼe ina ʼui ko te ʼu tohi faka lotu ʼe ko he meʼa pe ia moʼo fakalotoʼi ʼo te hahaʼi, ʼe mole tatau anai mo te fai palalau ʼaē ka tou fai mo he tahi ʼe faka tui ki te Tohi-Tapu. ʼE toe ʼaoga foki ke tou faka ʼalutahi tatatou ʼu fai palalau mo te ʼaluʼaga ʼo te hahaʼi ʼuhi heʼe kehekehe te ʼu ako ʼaē neʼe nātou maʼu. Ko te kau faiako faiva ʼe nātou fakaʼaogaʼi anai te ʼu palalau pea mo te ʼu lea fakatātā ʼaē ʼe  ʼalutahi mo te ʼu ʼaluʼaga ʼaē ʼe felāveʼi mo te hahaʼi.​—1 Soane 5:⁠20.

Ko He Tokoni Ki Te ʼu Minisi Foʼou

15, 16. He koʼe ʼe tonu ke akoʼi he ʼu minisi foʼou?

¹⁵ Neʼe mole tokaga pe Paulo ke poto ʼi tana ʼu faʼahiga faiakonaki. Neʼe mahino kiā ia ʼe tonu ke akoʼi pea mo akoako ia nātou kei foʼofoʼou, ohage la ko Timoteo pea mo Tito, ke nātou liliu ko ni ʼu minisi faiva. (2 Timoteo 2:2; 3:​10, 14; Tito 1:4) ʼO toe feiā mo totatou temi, kua ʼaoga tāfito ki te hahaʼi ke akoʼi nātou.

¹⁶ ʼI te 1914, ʼi te malamanei kātoa neʼe maʼu te kau fai faka mafola e teitei toko 5 000; pea iā ʼaho nei, ʼi te vāhaʼa fuli ʼe papitemaʼi te teitei toko 5 000 kau fai faka mafola foʼou! (Isaia 54:​2, 3; Gaue 11:21) Ka kamata fakatahi ni hahaʼi foʼou ki te kokelekasio faka Kilisitiano pea mo nātou fia kau ki te minisitelio, ʼe ʼaoga ke akoʼi pea mo takitaki nātou. (Kalate 6:6) ʼE maʼuhiga ke tou fakaʼaogaʼi te ʼu faʼahiga fai ʼa te Pule ko Sesu, ʼi te faiako pea mo te akoʼi ʼo te ʼu tisipulo. c

17, 18. E feafeaʼi hatatou tokoni ki te kau fai faka mafola foʼofoʼou ke nātou maʼu he loto falala ki te faka mafola ʼo te logo lelei ʼi te minisitelio?

¹⁷ Neʼe mole gata pe ʼi te maʼu e Sesu te hahaʼi pea mo ʼui ki tana ʼu ʼapositolo ke nātou fai palalau mo nātou. Neʼe ina fakahā tāfito ia te maʼuhiga ʼaē ke nātou fai faka mafola pea mo te maʼuhiga ʼaē ke nātou faikole ʼo ʼuhiga mo tanatou minisitelio. ʼOsi ʼaia, neʼe ina fai te ʼu fakatuʼutuʼu e tolu: ke ʼolo taki toko lua, mo foaki age he telituale, pea mo te logo ʼaē neʼe tonu ke nātou tala. (Mateo 9:​35-38; 10:​5-7; Maleko 6:7; Luka 9:​2, 6) ʼE tonu ke tou faʼifaʼitakiʼi. Peʼe tou tokoni ki tatatou ʼu fānau totonu, peʼe ko he ako foʼou, peʼe ko he tahi ʼe mole heʼeki kau ki te gāue fai faka mafola, ʼe lelei ke tou faiga ke tou akoako nātou.

¹⁸ ʼE ʼaoga ke tou tokoni lahi ki te kau fai faka mafola foʼo ke nātou maʼu he loto falala ʼo ʼuhiga mo te tala ʼo te logo lelei ʼo te Puleʼaga. ʼE koutou lava tokoni koa kiā nātou ke nātou teuteu pea mo akoako he ʼu ʼuluaki palalau nounou pea mo faigafua? ʼI te telituale, koutou fakahāhā age peʼe fai feafeaʼi te gāue, ʼo koutou fai te ʼu ʼuluaki ʼapi. ʼE koutou lava muliʼi te faʼifaʼitaki ʼa Seteone, ʼaē neʼe ina ʼui fēnei ki tana ʼu tagata tau: “ ʼE koutou sioʼi anai taku faʼahiga fai, pea ʼe koutou faʼifaʼitakiʼi anai.” (Kau Tuʼi Fakamāu 7:17) ʼOsi ʼaia, pea koutou tuku ki te kaugā fagona ke ina fisifisi hana matapā. Koutou vikiʼi te kau fai faka mafola foʼou ʼaia ʼo ʼuhiga mo tanatou ʼu faiga, pea kapau ʼe ʼaoga, koutou tokoniʼi nātou ke hikihiki tanatou fai faka mafola.

19. Koteā ʼaē ʼe tonu ke koutou faiga kiai moʼo ‘fakahoko fakalelei takotou minisitelio’?

¹⁹ Ke feala hatatou ‘fakahoko fakalelei tatatou minisitelio,’ ʼe tou faiga anai ke tou agalelei ki te hahaʼi ʼaē ʼe tou fai faka mafola kiai, pea mo tou ako te kau minisi foʼou ke nātou mulimuli ki tatatou faʼifaʼitaki. Ka tou mahino ki te maʼuhiga ʼo te ikuʼaga ʼo tatatou gāue​—moʼo foaki te ʼatamai mālama totonu ʼo te ʼAtua ʼaē ʼe ina faka fealagia te maʼuli​—pea ʼe tou tui papau ʼe tonu ke tou liliu “ko meʼa fuli maʼa te hahaʼi kehekehe, ke feala ai [hatatou] hāofaki niʼihi.”​—2 Timoteo 4:5; 1 Kolonito 9:​22, MN.

[Kiʼi nota]

ʼE Kei Koutou Manatuʼi Koa?

• E feafeaʼi hatatou faʼifaʼitakiʼi ia Paulo ʼi tatatou minisitelio?

• Koteā tatatou ʼu faʼahiga manatu ʼaē ʼe tonu ke tou fetogi?

• E feafeaʼi hatatou haga tala ia te logo ʼaki he manatu ʼe lelei?

• Koteā ʼaē ʼe ʼaoga ki te ʼu minisi foʼou ke feala hanatou falala ʼi te fai faka mafola?

[Fehuʼi]

[Fakamatala ʼo te pasina 29]

Ko te ʼapositolo ko Paulo neʼe tokaga ki te hahaʼi, mo palalau ki te ʼu meʼa neʼe mahino kiai te hahaʼi, pea mo faiva ʼi te fai faka mafola pea mo te faiako

[Fakamatala ʼo te pasina 31]

Neʼe fai e Sesu te ʼu fakatuʼutuʼu e tolu maʼa tana ʼu tisipulo: ke ʼolo taki toko lua, mo foaki age he telituale, pea mo te logo ʼaē neʼe tonu ke nātou tala

[Paki ʼo te pasina 28]

Neʼe fua lelei te fai faka mafola ʼa Paulo ki te hahaʼi fuli he neʼe palalau ʼo mulimuli ki te ʼu meʼa ʼaē neʼe mahino kiai te hahaʼi

[Paki ʼo te pasina 30]

Ko te ʼu minisi faiva ʼe nātou tokagaʼi te agaʼi fenua ʼa te hahaʼi

[Paki ʼo te pasina 31]

Ko te ʼu minisi faiva ʼe nātou tokoni ki te kau minisi foʼou ke nātou teuteu ki te minisitelio