Une bonne nouvelle pour des gens de toutes nations

KO TE kiʼi kaupepa ʼaē ʼe tuʼu ʼi ʼoluga neʼe fakahā ʼi te Fakatahi Faka Tisitilike ʼa te kau Fakamoʼoni ʼa Sehova ʼo te taʼu 2004 pea mo te taʼu 2005 ʼaē ko tona kupu tāfito “Tou Haʼele Mo Te ʼAtua.” ʼE ko ʼona pasina e 96 pea ʼe tuʼu ai te logo nounou ia lea e 92, ʼo kamata ʼaki te lea Faka Alepania pea fakaʼosi ʼaki te lea Faka Yoruba, pea neʼe tā moʼo tokoni ki te faka mafola ʼo te logo lelei ʼo te Puleʼaga ki te hahaʼi fuli. (Mateo 24:14) Ko te ʼu fakamatala ʼaē ka hoa mai, ʼe ko te ʼu fua lelei ʼo te fakaʼaogaʼi ʼo te kiʼi kaupepa.

• ʼI tanatou ʼosi maʼu te kiʼi kaupepa ʼi te fakatahi, neʼe ʼolo te famili Fakamoʼoni ʼo haʼele ʼi te ʼu ʼōloto e tolu. ʼI te ʼu ʼōloto ʼaia neʼe nātou felāveʼi ai mo te hahaʼi mai Filipine, Holani, Initia, pea mo Pakisitani. ʼE ʼui fēnei e te tagata ʼohoana: “Logola neʼe palalau Faka Pilitania te hahaʼi fuli ʼaia, kae mai tona ʼaluʼaga ʼaē neʼe nātou mamaʼo mo tonatou ʼu fenua neʼe nātou fiafia ʼi tamatou fakahā age te logo ʼi tanatou lea. Neʼe nātou mahino lelei ai ko tatatou gāue ʼe fai ʼi te malamanei kātoa ʼi te logo tahi.”

• Neʼe fakahā e te tuagaʼane te kiʼi kaupepa ki te tagata Initia ʼe nā kaugā gāue. Neʼe fiafia ʼaupito te tagata ʼi tana sio ki te ʼu lea fuli ʼaē ʼe tuʼu ʼi te kiʼi kaupepa pea mo lau te logo ʼaia ʼi tana lea. ʼAki te kiʼi kaupepa ʼaia neʼe hoko ai te ʼu fai palalau ki te Tohi-Tapu. Ko te fafine Filipine ʼe nā kaugā gāue, neʼe toe fiafia mo ia ʼi tana lau ʼi te kiʼi kaupepa tana lea pea neʼe ina fia ʼiloʼi he tahi ʼu meʼa ʼo ʼuhiga mo te kau Fakamoʼoni ʼa Sehova.

• ʼI Kanata, ko te fafine mai Népal neʼe ina tali ke fai hana ako Tohi-Tapu mo he Fakamoʼoni ʼaki te telefoni, kae neʼe mole loto ia ke ʼalu age te tuagaʼane ki tona ʼapi. Kae ʼi te fakahā age e te tuagaʼane te kiʼi kaupepa ʼaki te logo ʼi tana lea, neʼe fiafia ʼaupito ai ʼo ina fakaafe ia te tuagaʼane ke ʼalu age ki tona ʼapi. Neʼe fia sio mata ki te logo ʼaē neʼe tā ʼi tana lea! Talu mai ai kua tali e te fafine ke fai hana ako Tohi-Tapu ʼi tona ʼapi.