‘Fakahā Te ʼĀteaina Ki Te Hahaʼi Pilisoni’

ʼI TE kamata ʼo tona minisitelio, neʼe fakahā e Sesu ʼe kau ki tana gāue ia te “fakaha ki te hahai pilisoni te ateaina.” (Luka 4:18) ʼO mulimuli ki te faʼifaʼitaki ʼa tanatou Pule, ko te kau Kilisitiano moʼoni ʼe nātou faka mafola te logo lelei ʼo te Puleʼaga ki “te tagata fuape,” ʼo nātou faka ʼāteaina ai nātou mai te haʼisia fakalaumālie pea mo tokoni kiā nātou ke liliu tonatou maʼuli ʼo lelei age.​—1 Timoteo 2:⁠4.

Iā ʼaho nei, ʼi te gāue ʼaia ʼe kau ai ia te fai faka mafola ki te hahaʼi ʼaē ʼe pilisoniʼi moʼoni ʼuhi ko te ʼu aga kovi kehekehe neʼe nātou fai pea ʼe nātou fia fai ki he ʼāteaina fakalaumālie. ʼE tou fiafia anai ʼi te fakamatala fakaloto mālohi ʼo ʼuhiga mo te ʼu gāue ʼa te kau Fakamoʼoni ʼa Sehova ʼi te ʼu fale pilisoni ʼi Ukelenia pea mo ʼihi atu fenua ʼi Eulopa.

Neʼe Nātou Popūla Ki Te Toloke Pea Kua Nātou Liliu Ko Te Kau Kilisitiano

Kua taʼu 38 ia Serhii, a pea kua taʼu 20 tana nofo pilisoni. Neʼe ina fakaʼosi tana ako ʼi te fale pilisoni. ʼE ina ʼui fēnei: “Kua fualoa kiai, neʼe pilisoniʼi au he neʼe au fai fakapo, pea mole heʼeki ʼosi toku temi pilisoni. ʼI te fale pilisoni neʼe au aga fekai, pea ko ʼihi kau pilisoni neʼe nātou mātataku ia au.” Neʼe ina logoʼi ai koa hona ʼāteaina? Kailoa. Lolotoga te ʼu taʼu, neʼe maʼuli popūla ia Serhii ki te toloke, mo te kava, pea mo te suluka.

Ki muli age, ko te tagata neʼe nā pilisoni tahi neʼe ina fakahā age ia te moʼoni ʼo te Tohi-Tapu. Neʼe hage kiā ia ko he mālama ʼi he potu fakapōʼuli. ʼI te ʼu kiʼi māhina ʼaia, neʼe ina līaki te ʼu meʼa ʼaē neʼe popūla kiai, kae ina faka mafola te logo lelei, pea mo papitema. ʼI te temi nei ʼe lahi te ʼu gāue ʼa Serhii ʼi te fale pilisoni, heʼe gāue temi kātoa maʼa Sehova. Neʼe tokoni ki te toko fitu hahaʼi pilisoni ke nātou fetogi tonatou maʼuli pea mo liliu ko te ʼu tēhina fakalaumālie. Ko te toko ono iā nātou kua mavae mai te fale pilisoni, kae ʼe kei pilisoni pe ia Serhii. Kae ʼe mole lotovaivai, heʼe fiafia ʼi tana lava tokoni ki ʼihi ke nātou maʼu he ʼāteaina mai tonatou popūla fakalaumālie.​—Gaue 20:⁠35.

Ko te tahi ako ʼa Serhii ʼi te fale pilisoni ʼe higoa ko Victor, neʼe fakatau toloke pea mo toloke mo ia totonu. ʼI tana ʼosi mavae mai te fale pilisoni, neʼe haga tuputupu ia Victor ʼi te faʼahi fakalaumālie pea neʼe kau ʼi te Ako ʼo Te Minisitelio ʼi Ukelenia. ʼE lolotoga pionie makehe nei ʼi Moldavie. ʼE ʼui fēnei e Victor: “Neʼe au kamata suluka ʼi toku taʼu 8,  pea neʼe au ʼinu kava ʼi toku taʼu 12, pea ʼi toku taʼu 14 neʼe au fakaʼaogaʼi te toloke. Neʼe au fia fetogi toku maʼuli, kae neʼe mole he fua ʼo taku ʼu faiga. Pea ʼi te taʼu 1995, ʼi te temi pe ʼaē neʼe au ʼamanaki ai mo toku ʼohoana ke ma fakagata tamā fakatahi mo te ʼu fakakaugā kovi, neʼe mate toku ʼohoana he neʼe hukiʼi e te tagata ʼe agaʼi fakapō. Neʼe liliu ʼosi toku maʼuli ko he maʼuli fakaʼofaʼofa. Neʼe au fai te ʼu fehuʼi ʼaenī: ‘ ʼE ʼifea nei toku ʼohoana? Koteā ʼaē ʼe hoko ki he tahi mokā mate?’ Kae neʼe mole au maʼu he ʼu tali ki te ʼu fehuʼi ʼaia. Neʼe lēsili taku fakaʼaogaʼi ʼo te toloke moʼo galoʼi toku mamahi. Neʼe puke au e te kau polisi ʼuhi ko taku fakatau toloke pea neʼe fakatūʼā au ke taʼu nima toku pilisoniʼi. ʼI te fale pilisoni, neʼe tokoni mai ia Serhii ke au maʼu he tali ki taku ʼu fehuʼi. Neʼe tuʼa lahi taku fia līaki taku toloke, kae kua hoki feala ʼi te temi nei ʼaki te tokoni ʼa te Tohi-Tapu. ʼE mālohi ʼaupito ia te Folafola ʼa te ʼAtua!”​—Hepeleo 4:⁠12.

Ko Te Kau Fai Fakapō Loto Fefeka ʼe Fetogi Tonatou Maʼuli

Neʼe heʼeki fakaʼaogaʼi e Vasyl ia te toloke, kae neʼe ʼi ai te faʼahi neʼe popūla kiai. ʼE ina ʼui fēnei: “Ko taku toloke neʼe ko te faʼahiga fuhu ʼaē ʼe higoa ko te kick-boxing. Neʼe au akoako peʼe feafeaʼi haku aka ia te hahaʼi kae mole ʼiloga ai honatou ʼu lavea.” Neʼe fakaʼaogaʼi e Vasyl te agamālohi moʼo kaihaʼa te hahaʼi. “Neʼe tuʼa tolu toku pilisoniʼi, ʼo tupu ai taku mavete mo toku ʼohoana. Lolotoga toku ʼu taʼu pilisoni fakaʼosi e nima, neʼe au mahino ki te ʼu tohi ʼa te kau Fakamoʼoni ʼa Sehova. Neʼe tupu ai leva taku fia lau ia te Tohi-Tapu, kae neʼe kei au kau pe ki te meʼa ʼaē neʼe au manako kiai​—ko te kick-boxing.

“Kae hili māhina e ono ki taku lau ia te Tohi-Tapu, pea neʼe ʼi ai te meʼa neʼe ina fetogi toku maʼuli. Neʼe mole kei au fiafia mokā au mālo ʼi he fuhu. Pea neʼe au kamata sivisivi toku maʼuli ʼaki te koga tohi ʼo Isaia 2:​4, pea neʼe au mahino ai leva kapau ʼe mole au fetogi toku faʼahiga maʼuli, ʼe au nofo anai ʼo talu ai ʼi te fale pilisoni. Koia neʼe au laku taku ʼu meʼa fuhu pea mo kamata gāueʼi toku ʼulugaaga. Neʼe mole ko he meʼa faigafua, kae ʼaki te metitāsio pea mo te faikole tuʼumaʼu neʼe feala ai haku līaki taku ʼu agamāhani ʼaē ʼe kovi. ʼI ʼihi temi, neʼe au tagi ʼo kole mamahi kiā Sehova ke ina foaki mai he lotomālohi ke au mavae mai toku maʼuli popūla ʼaia. Pea neʼe ʼi ai leva tona ʼu fua.

“ ʼI taku ʼosi mavae mai te fale pilisoni, neʼe au fakatahitahi mo toku famili. ʼI te temi nei, ʼe au gāue ʼi te lameni mamala. ʼAki taku gāue ʼaia, ʼe ʼi ai toku temi ke au fai faka mafola mo toku ʼohoana pea mo fakahoko toku ʼu maʼua ʼi te kokelekasio.”

 Neʼe lahi te ʼu fale paʼaga ʼi Ukelenia neʼe kaihaʼa e Mykola pea mo tona ʼu kaumeʼa. Pea neʼe fakatūʼā ke pilisoniʼi iā taʼu e hogofulu. ʼI muʼa ʼo tona pilisoniʼi, neʼe misa tuʼa tahi pe​—moʼo teuteuʼi tana kaihaʼa ʼo te ʼēkelesia ʼaia. Neʼe mole hoko tana fakatuʼutuʼu ʼaia, kae ko tana ʼalu ʼaia ki te ʼēkelesia, neʼe tupu ai te tui ʼa Mykola ko te Tohi-Tapu ʼe fonu ai te ʼu hisitolia ʼe mole kita fia logo kiai ʼo ʼuhiga mo te ʼu pātele Orthodoxe, mo te ʼu sela, pea mo te ʼu toʼotoʼoga faka lotu. ʼE ina ʼui fēnei: “ ʼE mole au ʼiloʼi lelei peʼe koteā ʼaē neʼe tupu ai taku kamata lau ia te Tohi-Tapu. Neʼe au punamaʼuli ʼi taku sio ʼaē ʼe mole hage ko te ʼu meʼa ʼaē neʼe au manatu kiai!” Neʼe ina kole tana ako Tohi-Tapu pea neʼe papitema ʼi te 1999. Ka tou sio nei kiā ia, ʼe faigataʼa hata tui ko te tagata faifekau faka minisitelio agavaivai ʼaia, neʼe ko te tagata kaihaʼa ki muʼa atu, neʼe taka mo tana fana moʼo kaihaʼa te ʼu fale paʼaga!

Neʼe fakatūʼā ia Vladimir ki te mate. ʼI tana fakatalitali ke hoko mai tona matehi, neʼe faikole ki te ʼAtua pea neʼe ina fakapapau kiā Ia mo kapau ʼe hāo mai tona tūʼā mate pea ʼe kaugana anai kiā te Ia. ʼAki te temi, neʼe fetogi te lao, pea ko te fakatūʼā mate neʼe fetogi ʼaki te pilisoni ʼo talu ai. ʼO mulimuli ki te fakapapau ʼaē neʼe ina fai, neʼe kamata kumi e Vladimir ia te lotu moʼoni. Neʼe fefaitohiʼaki mo te ʼu faleako, pea neʼe maʼu tona pepa mai te Lotu Adventiste, kae neʼe mole fiafia ia.

Kae ʼi tana ʼosi lau te ʼu nusipepa Te Tule Leʼo pea mo te Réveillez-vous ! ʼi te tānakiʼaga tohi ʼo te fale pilisoni, neʼe faitohi ia Vladimir ki te filiale ʼa te kau Fakamoʼoni ʼa Sehova ʼi Ukelenia, ʼo ina kole ke ʼolo age ni ʼu tēhina ʼo ʼaʼahi ia ia. ʼI tona ʼaʼahi ʼaē e te ʼu tēhina, neʼe kua hage pe kiā ia ko he Fakamoʼoni pea neʼe fai faka mafola ʼi te fale pilisoni. Neʼe tokoni age te ʼu tēhina kiā ia ke liliu ko he kaugā fai faka mafola lelei. ʼI te lolotoga fai ʼo te alatike ʼaenī, ko Vladimir pea mo te toko fitu kaugā fai faka mafola ʼi te pilisoni ʼaia ʼe nātou fakatalitali ki tonatou papitema. Kae neʼe ʼi ai tonatou fihifihia. Ko te kau pilisoni ʼaē ʼe fakatūʼā ʼo talu ai, ʼe nātou koga fale tahi mo nātou ʼaē ʼe lotu tahi mo nātou, pea ko Vladimir mo tona ʼu kaugā pilisoni ʼe nātou lotu tahi. Ko ai ʼaē ʼe feala ke nātou fai faka mafola ki ai? ʼE nātou faka mafola ia te logo lelei ki te ʼu tagata leʼo ʼo te pilisoni pea mo nātou faitohi ki ʼihi.

Ko Nazar neʼe mavae ʼi Ukelenia ʼo ʼalu ki te République Tchèque, pea neʼe fakakaugā ai mo te kau kaihaʼa. ʼO tupu ai tona pilisoniʼi kiā taʼu e tolu vaelua. ʼI tana nofo ʼi te fale pilisoni, neʼe ina tali te ʼu ʼaʼahi ʼa te kau Fakamoʼoni ʼa Sehova mai te kolo ʼo Karlovy Vary, ʼo ina ako ai te moʼoni, pea neʼe fetogi ʼosi tona maʼuli. ʼI te sio ʼa te tahi tagata leʼo ki te fetogi ʼaia, neʼe ina ʼui age kiā nātou ʼaē neʼe pilisoni mo Nazar: “Kapau ʼe koutou liliu fuli anai ohage ko te tagata Ukelenia ʼaenī, pea ʼe maʼua anai ia ke au kumi haku tahi gāue.” Neʼe ʼui e te tahi: “Ko te kau Fakamoʼoni ʼa Sehova ʼaia ʼe nātou faiva ʼosi. ʼE haʼu he tahi ki te fale pilisoni ʼe ko he tagata agakovi; pea ka mavae ʼe kua liliu ia ko te tagata agalelei.” ʼI te temi nei kua toe liliu ia Nazar ki tona ʼapi. Neʼe ina ako te gāue tufuga ʼakau pea kua ʼohoana, pea ko ia mo tona ʼohoana ʼe nā kau ki te minisitelio temi kātoa. ʼE fakafetaʼi ki te ʼu ʼaʼahi ʼaē ʼe fai e te kau Fakamoʼoni ki te ʼu fale pilisoni!

Ko He Fakamoʼoni Mai Te Kau Maʼu Tuʼulaga

ʼE mole gata pe ki te kau pilisoni ʼaē ʼe nātou fakafetaʼi ki te tokoni ʼaē ʼe fai e te kau Fakamoʼoni ʼa Sehova. Ko Miroslaw Kowalski, ko te tagata fakafofoga ʼo te ʼu fale pilisoni ʼi Polonia, neʼe ina ʼui fēnei: “ ʼE mātou leleiʼia ʼaupito tanatou ʼu ʼaʼahi. Ko ʼihi kau pilisoni neʼe kovi ʼosi tonatou maʼuli. Neʼe lagi gaohi koviʼi nātou. . . . Ko te tokoni [ʼa te kau Fakamoʼoni] ʼe maʼuhiga ʼaupito heʼe mole lahi hamatou kau gāue pea mo te ʼu hahaʼi fai tokoni.”

Ko te pule ʼo te tahi fale pilisoni ʼi Polonia neʼe faitohi ki te filiale, ʼo kole ke fakalahi te gāue ʼa te kau Fakamoʼoni ʼa Sehova ʼi te fale pilisoni ʼaē ʼe pule ai. Koteā tona tupuʼaga? Neʼe ina ʼui fēnei: “Ko te ʼu ʼaʼahi ʼaē ʼe tau fai e te kau fakafofoga ʼa te Watchtower ʼe tokoni ki te kau pilisoni ke nātou fakatuputupu he ʼu kalitātē lelei ʼi te felogoi, pea mo pulihi tanatou feʼagamālohiʼaki.”

Neʼe tohi ʼi te sulunale Ukelenia, ko te tagata pilisoni neʼe mole kei kātoa tona fakakaukau pea neʼe fia fakamate, kae neʼe tokoniʼi e te kau Fakamoʼoni ʼa Sehova. ʼE fakamatala fēnei ai: “ ʼI te temi nei, ko te tagata ʼaia kua toe fakahaʼuhaʼu tona ʼatamai. ʼE mulimuli ki te ʼu gāue ʼaē ʼo te fale pilisoni pea ʼe ina tuku he faʼifaʼitaki lelei ki ʼihi kau pilisoni.”

Te ʼu Fua Lelei ʼi Tanatou Mavae ʼi Te Fale Pilisoni

Ko te ʼu gāue lelei ʼa te kau Fakamoʼoni ʼa Sehova ʼe mole gata pe ʼi te ʼu fale pilisoni. ʼE nātou  hoko atu tanatou tokoni ʼi te ʼosi mavae ʼa te kau pilisoni. Ko te ʼu Kilisitiano e toko lua, ko Brigitte pea mo Renate, neʼe nā tokoni ki te hahaʼi feiā lolotoga te ʼu taʼu. ʼE ʼui fēnei ʼi te nusipepa Siamani Main-Echo Aschaffenburg ʼo ʼuhiga mo nāua: “ ʼE nā tokaga ki te kau pilisoni fafine ia māhina e tolu peʼe nima ʼi tanatou ʼosi mavae mai te pilisoni, ʼo fakaloto mālohiʼi nātou ke nātou fakaʼaogaʼi fakalelei tonatou maʼuli. . . . Neʼe fakahā ia nāua ko te ʼu hahaʼi gāue kae mole totogi. . . . ʼE fakaloto mālohi pea mo ʼaoga tana ʼu felogoi mo te hahaʼi gāue ʼo te ʼu fale pilisoni.” Tokolahi te hahaʼi kua nātou foaki tonatou maʼuli kiā Sehova ʼuhi ko te taʼi tokoni ʼaia.

Māʼiape la mo nātou ʼe maʼu tuʼulaga ʼi te ʼu fale pilisoni, ʼe ʼaoga kiā nātou ia te ako faka Tohi-Tapu ʼaē ʼe fai e te kau Fakamoʼoni ʼa Sehova. Ohage la, ko Roman neʼe ko te tagata pule solia pea neʼe ko te tōketā ʼi te fale pilisoni Ukelenia. ʼI te ʼōmai ʼa te kau Fakamoʼoni ki tona ʼapi, neʼe ina tali ke fai hana ako Tohi-Tapu. ʼOsi ʼaia, neʼe logo ʼe mole fakagafua ki te kau Fakamoʼoni ke nātou ʼaʼahi te kau pilisoni ʼo te fale pilisoni ʼaē ʼe gāue ai. Pea neʼe ina kole ki te tagata pule, ke fakagafua kiā ia ke ina fakaʼaogaʼi te Tohi-Tapu ʼi tana gāue mo te kau pilisoni. Neʼe tali tana kole, pea neʼe ko te toko 10 pilisoni neʼe nātou fia logo ki te moʼoni. Neʼe fakahā tuʼumaʼu e Roman ki te kau pilisoni ʼaia, tana mahino ki te Tohi-Tapu, pea neʼe fua tana ʼu faiga. ʼI tonatou ʼosi faka ʼāteaina, ko ʼihi neʼe haga tuputupu pea mo nātou papitema ʼo liliu ko te kau Kilisitiano. ʼI tana sio ki te mālohi ʼo te Folafola ʼa te ʼAtua, neʼe ako fakamalotoloto ai e Roman ia te Tohi-Tapu. Neʼe mavae ʼi te solia pea neʼe ina hoko atu pe ia tana ako te Tohi-Tapu. ʼI te temi nei, ʼe fai faka mafola fakatahi mo te tahi neʼe pilisoni ʼi muʼa atu.

Neʼe ʼui e te tagata pilisoni: “ ʼI henī ʼe tokoniʼi mātou e te Tohi-Tapu, mo te ʼu tohi faka Tohi-Tapu, pea mo te ako ʼo te Tohi-Tapu.” ʼE ʼasi mai ʼi te ʼu palalau ʼaenī ia te ʼaoga ʼo he ʼu tohi faka Tohi-Tapu ʼi ʼihi fale pilisoni. Koʼeni te fakamatala ʼa te tahi kokelekasio ʼi Ukelenia ʼo ʼuhiga mo te gāue ako Tohi-Tapu ʼaē ʼe fai ʼi te fale pilisoni: “Ko te kau takitaki ʼo te fale pilisoni ʼe nātou leleiʼia te ʼu tohi faka Tohi-Tapu ʼaē ʼe mātou foaki age. ʼE mātou tuku age te ʼu Tule Leʼo e 60 pea mo te ʼu Réveillez-vous ! e 60 ʼo te numelo fuli.” ʼE ʼui fēnei e te tahi kokelekasio: “ ʼE mātou tokaga ʼo foaki tamatou ʼu tohi ki te fale pilisoni ʼe ʼi ai tona ʼu fale tānakiʼaga tohi veliveli e 20, pea ʼe mātou tuku ki te ʼu fale takitahi ʼaia. ʼE ko kalato tohi e 20.” ʼI te tahi fale pilisoni, ʼe tānaki e te ʼu tagata leʼo tamatou ʼu tohi ʼi te fale tānakiʼaga tohi ke feala ki te kau pilisoni ke nātou lau te ʼu alatike.

ʼI te 2002, ko te filiale ʼi Ukelenia neʼe ina fakatuʼu te Pilo ʼe Tokaga Ki Te ʼu Fale Pilisoni. ʼO aʼu mai ki te temi nei, ko te pilo neʼe felogoi mo te ʼu fale pilisoni e 120 pea neʼe ina hinoʼi te ʼu kokelekasio ke gāue ki te ʼu fale pilisoni ʼaia. ʼI te māhina fuli ʼe teitei ko tohi e 50 ʼe maʼu mai te kau pilisoni, ko ʼihi iā nātou ʼe nātou kole mai hanatou ʼu tohi peʼe ko hanatou ako Tohi-Tapu. ʼE momoli e te filiale te ʼu tohi, te ʼu nusipepa, pea mo te ʼu kaupepa lalahi ki te kau pilisoni, ʼo aʼu ki te lava ʼaʼahi ʼo nātou e te ʼu tēhina ʼo te ʼu kolo ʼaē ʼe tuʼu ai te ʼu fale pilisoni ʼaia.

Neʼe faitohi fēnei ia te ʼapositolo ko Paulo ki tona ʼu tēhina: “Koutou manatui natou e nofo pilisoni.” (Hepeleo 13:3) Neʼe talanoa ʼo ʼuhiga mo nātou ʼaē neʼe pilisoni ʼuhi ko tanatou tui. Iā ʼaho nei, ʼe manatuʼi e te kau Fakamoʼoni ʼa Sehova ia nātou ʼaia ʼe pilisoniʼi, ʼo ʼaʼahi te ʼu fale pilisoni, pea mo “fakaha ki te hahai pilisoni te ateaina.”​—Luka 4:⁠18.

[Kiʼi nota]

[Paki ʼo te pasina 9]

Ko te ʼu kaupā ʼo te fale pilisoni ʼi Lviv, ʼi Ukelenia

[Paki ʼo te pasina 10]

Ko Mykola

[Paki ʼo te pasina 10]

Ko Vasyl mo tona ʼohoana ko Iryna

[Paki ʼo te pasina 10]

Ko Victor