Kei Koutou Manatuʼi Koa?

Neʼe koutou leleiʼia koa te ʼu Tule Leʼo fakamuli? Koutou vakaʼi peʼe koutou lava tali ki te ʼu fehuʼi ʼaenī:

• He koʼe ʼe fakatatau te ʼuluaki agahala​—ia te talagataʼa ʼa Atama​—ki he mahaki faka famili?

ʼE hage ko he mahaki, he neʼe tuku holo e Atama te agahala ki tona hōloga. Koia ʼaē ʼe tou maʼu ai te agahala, ohage pe ko ʼihi fānau ʼaē ʼe nātou maʼu he mahaki mai tanatou ʼu mātuʼa.​—15/8, pasina 5.

• Koteā te ʼu tupuʼaga tāfito ʼo te tuputupu ʼo te agamālohi ʼi te temi nei?

Ko Satana ʼe ina faigaʼi ke ina fakamaliu kehe te hahaʼi mai ia Sehova, heʼe ina fakahū ki tonatou ʼu loto te holi ki te agamālohi, ʼaki he ʼu ʼata, he ʼu musika, pea mo te ʼu gaoʼi viteo ʼaē ʼe nātou uga te kau gaoʼi ke nātou agamālohi pea mo fai fakapō. ʼE toe tupu te agamālohi ʼa te hahaʼi ʼuhi ko te ʼu agamālohi ʼaē ʼe fakahā ʼi te televisio pea mo te ʼu sulunale.​—1/9, pasina 29.

• Neʼe ko ai koa ia Posio Pilato?

Neʼe ko he tagata Loma, neʼe mole ko he ʼaliki maʼuhiga, pea neʼe kau ʼi te solia. Neʼe fakanofo kovana ia Pilato e te Hau Loma ko Tipelio, ʼi te potu fenua ʼo Suta ʼi te taʼu 26 ʼo totatou temi. ʼI te fakamāuʼi ʼo Sesu, neʼe logo ia Pilato ki te ʼu tukugakovi ʼaē neʼe fai e te kau takitaki Sutea. ʼI tana fia lelei ki te hahaʼi, neʼe ina tali ke matehi ia Sesu.​—15/9, pasina 10 ki te 12.

• Koteā te “fakaʼiloga” ʼaē neʼe talanoa kiai ia Mateo 24:​3, MN?

ʼE lahi te ʼu koga ʼo te fakaʼiloga ʼaia. ʼI te fakaʼiloga ʼaia ʼe ʼi ai te tau, te hoge, te taʼi mahaki, pea mo te ʼu mafuike, pea ʼe ina faka fealagia anai ki te kau tisipulo ʼa Sesu ke nātou ʼiloʼi tana “ ʼi henī” ʼo feiā mo “te fakaʼosi ʼo te tuʼu ʼo te ʼu faʼahiga meʼa ʼaenī.”​—1/10, pasina 4 ki te 5.

• Neʼe koteā te Diaspora, pea neʼe ko te ʼu fenua fea ʼaē neʼe kau kiai?

ʼE faka ʼuhiga te kupu ʼaia ki te kau Sutea ʼaē neʼe mole māʼuʼuli ʼi Palesitina. ʼI te ʼuluaki sēkulō, neʼe hahaʼi te kau Sutea ʼaē neʼe nonofo ʼi Silia, mo Asia Veliveli, mo Papiloni pea mo Esipito, pea neʼe mole faʼa hahaʼi te kau Sutea ʼaē neʼe nonofo ʼi te potu Eulopa ʼo te Puleʼaga Loma.​—15/10, pasina 12.

• ʼE feala koa ki he Kilisitiano ke ina taupau he leʼo ʼo loto ʼe maʼa mo kapau ʼe ina tali he gāue ʼe fakaʼaogaʼi ai he fana?

Ko te fai o he gāue ʼe ina fakamaʼua kiai te fakaʼaogaʼi ʼo he fana peʼe ko he tahi age mahafu, ʼe fakalogo ki te loto takitokotahi. Kae ʼe feala ʼi te taʼi gāue ʼaia ke hoko ai he ligi toto mo kapau ʼe fakaʼaogaʼi he mahafu, pea mo lavea ai he tahi, mo kapau ʼe ʼohofiʼi kita peʼe ka kita puke he tahi. Ko he Kilisitiano ʼe ina fakaʼaogaʼi he mahafu, ʼe mole ʼavage anai hona ʼu pilivilesio makehe ʼi te kokelekasio. (1 Timoteo 3:​3, 10)​—1/11, pasina 31.

• Mai tona ʼaluʼaga ʼaē ko te kupu “Halamaketone” ʼe haʼu mai te kupuʼi palalau “Moʼuga ʼo Mekito,” ko tona faka ʼuhiga koa ʼe fakahoko anai te tau ʼo Halamaketone ʼi he moʼuga ʼi te fenua Alape?

Kailoa. ʼE mole ʼi ai he Moʼuga ʼo Mekito, kae ko he kiʼi sia ʼe haga ifo ki te malaʼe ʼi ʼIselaele. ʼE mole feala anai ki “te ʼu hau ʼo te kele pea mo tanatou ʼu kautau” ke nātou feʼauga ʼi te potu ʼaia. ʼE fakahoko anai te tau lahi ʼa te ʼAtua ʼi te kele kātoa, pea ʼe ina fakagata anai te ʼu tau fuli. (Apokalipesi 16:​14, 16; 19:19; Pesalemo 46:​8, 9)​—1/12, pasina 4 ki te 7.