ʼE Fai Atu Te Fakaafe . . .

 ʼE Kei Pule Faʼitaliha Koa Ia Te ʼAtua Ki Te Kele?

TE ʼU ʼafā, te hake ʼa te peau, te ʼu mafuike, te ʼu mahaki fakamataku, te aga fakakākā ʼa te ʼu puleʼaga pea mo te ʼu pule gāue, te ʼu hahaʼi fai fakapō, te tau pea mo te ʼu fakafeagai ki te lao. ʼE mole hala he ʼaho mo tatatou logo ki te tala ʼa te ʼu logo ʼaia. Pe neʼe hoko kiā koutou he ʼu ʼaluʼaga feiā peʼe kailoa, kae ʼe koutou fia ʼiloʼi ia te ikuʼaga ʼo te malamanei pea mo fia ʼiloʼi peʼe liliu anai totatou maʼuli ʼo lelei age.

ʼO ʼuhiga mo te ʼu ʼaluʼaga ʼaia, ko te kau Fakamoʼoni ʼa Sehova, iā fenua e 200 tupu ʼi te malamanei kātoa, ʼe nātou fai anai te akonaki ki te kaugamālie, ko tona kupu tāfito ʼaenī: “ ʼE Kei Pule Faʼitaliha Koa Ia Te ʼAtua Ki Te Kele?” ʼE talanoa anai ia te akonaki ʼaia ki te ʼu tali ʼa te ʼAtua pea mo tana ʼu fakapapau ʼi tana Folafola, ia te Tohi-Tapu, ʼo ʼuhiga mo te ʼu fehuʼi maʼuhiga ʼaenī:

ʼE tokagaʼi koa e te ʼAtua ia te ʼu ʼaluʼaga ʼaē ʼe felāveʼi mo te tagata?

ʼE malave feafeaʼi kiā ia ia te ʼu faigataʼaʼia ʼo te malamanei?

ʼE ina loto koa ke koutou māʼuʼuli fiafia?

ʼI te teitei fenua fuli, ʼe fai anai ia te akonaki ʼi te ʼAhotapu, ʼaho 30 ʼo ʼApelili 2006, ʼi te ʼu Fale ʼo Te Puleʼaga ʼa te kau Fakamoʼoni ʼa Sehova. ʼE ko he meʼa fakafiafia anai ki te kau Fakamoʼoni, hanatou fakahā atu ia te hola ʼaē ka fai ai anai te fono ʼaia pea mo tona tuʼasila.

ʼE fakaafe atu koutou ke koutou ʼōmai ʼo logo ki te akonaki fakaloto mālohi ʼaia, ʼaē ʼe fakatafito ki te Tohi-Tapu. ʼE koutou maʼu ai anai te tali ki te fehuʼi ʼaenī: ʼE Kei Pule Faʼitaliha Koa Ia Te ʼAtua Ki Te Kele?