“E Tahi Fua’pe Anai e Te Tagata Tana Kavega”
“E Tahi Fua’pe Anai e Te Tagata Tana Kavega”
“ ʼE tou tahi huʼi maʼua anai ki te ʼAtua maʼa tatou takitokotahi.”—Loma 14:12, MN.
1. Koteā te maʼua ʼaē neʼe tonu ke fakahoko e te ʼu tama Hepeleo e toko tolu?
IĀ TEITEI sēkulō e ono ki muʼa atu, neʼe māʼuʼuli ʼi Papiloni ia te ʼu tūpulaga Hepeleo e toko tolu pea neʼe tonu ke nātou fai te tonu maʼuhiga neʼe fakalogo kiai tonatou maʼuli peʼe ko tonatou mate. ʼE tonu anai koa ke nātou tulolo iā muʼa ʼo te fakatātā lahi, ʼo mulimuli ki tona fakamaʼua ʼaē ʼi te lao ʼo te fenua? Peʼe nātou fakafisi anai koa ki te tauhi ʼaia, ʼo iku ai mo honatou lī ki he afi kakaha? Neʼe mole maʼu he temi kiā Satalake, mo Mesake, pea mo Apeteneko ke nātou kumi tokoni ki he tahi, pea neʼe mole pe la hona ʼaoga kiā nātou ke nātou fai ia te faʼahi ʼaia. Neʼe mole nātou lotolotolua, kae neʼe nātou ʼui fēnei: “ ʼE tonu ke ke ʼiloʼi, Ê hau, ʼe mole mātou tauhi ki tou ʼu ʼatua, pea ko te fakatātā aulo ʼaē neʼe ke fakatuʼu, ʼe mole mātou atolasio anai kiai.” (Taniela 3:1-18) Ko te ʼu tama Hepeleo ʼaia e toko tolu neʼe nātou fakahoko tonatou maʼua ʼaē ke nātou fai he tonu ʼo ʼuhiga mo te meʼa ʼaē ka hoko kiā nātou.
2. Ko ai ʼaē neʼe ina ʼeke ia Pilato ke ina fai he tonu ʼo ʼuhiga mo Sesu Kilisito, pea ko te faʼahi ʼaia neʼe ina faka ʼāteaina koa ia ia mai tana hala?
2 Hili kiai sēkulō e ono, neʼe logo te kovana ki te ʼu tukugakovi ʼaē neʼe fai ʼo ʼuhiga mo te tagata, kae neʼe ina ʼiloʼi papau ʼi tana sivisivi ia te tagata ʼaē neʼe tukugakoviʼi, neʼe mole ina fai hana meʼa ʼe kovi. Kae ko te hahaʼi ia neʼe loto nātou ke matehi ia te tagata ʼaia. Logola tana mole loto ʼaē ke matehi te tagata, kae neʼe mole lagolago ia ki ai he neʼe ina muliʼi pe ia te meʼa ʼaē neʼe loto kiai ia te hahaʼi. ʼI tana fanofano, neʼe ina ʼui fēnei: “ ʼE au maʼa au ʼi te toto ʼo te tagata nei.” Pea neʼe ina tuku ke ʼave te tagata ʼaia ʼo haʼi ki te pou. ʼIo, ko Posio Pilato neʼe mole fai tona maʼua ʼaē ko te fai ʼo he tonu ʼo ʼuhiga mo Sesu Kilisito, kae neʼe ina tuku te hahaʼi ke nātou fai te tonu maʼa ia. Koia, ʼe mole ko te vai ʼaē ka ina fakamaʼa anai ia ia mai tana hala, ʼi tana tuku ʼaē ke fakatūʼā ia Sesu ki te mate kae neʼe mole ina fai hana meʼa ʼe kovi.—Mateo 27:11-26, MN; Luka 23:13-25.
3. He koʼe ʼe mole tonu ke tou tuku ki niʼihi ke nātou fai he ʼu tonu maʼa tatou?
3 Kae e feafeaʼi ʼo ʼuhiga mo koutou? Ka tonu ke koutou fai he ʼu tonu, ʼe koutou hage koa ko te ʼu tama Hepeleo e toko tolu, peʼe koutou tuku anai ki niʼihi ke nātou fai he tonu maʼa koutou? ʼE mole ko he meʼa faigafua hatatou fai ni ʼu tonu, heʼe tonu ke tou aga fakapotopoto moʼo fai ʼo he ʼu tonu ʼe lelei. ʼO ʼuhiga mo te ʼu fānau ʼaē kei liliki, ʼe ko te ʼu mātuʼa ʼaē ʼe tonu ke nātou fai he ʼu tonu ʼe lelei maʼa nātou. Kae ʼe faigataʼa anai te tonu ʼaē ka tou fai mo kapau ʼe ko he fihifihia ʼe faigataʼa tona puleʼakiʼi pea mo kapau ʼe pipiki kiai he ʼu tuʼuga meʼa ʼe tonu ke kita vakavakaʼi fakalelei. Pea ko te maʼua ʼaē ko te fai ʼo he ʼu puleʼaki, ʼe mole ko he maʼua mamafa, ke fakatahiʼi ki te “ ʼu kavega,” peʼe ki “te ʼu ʼaluʼaga faigataʼa,” ʼaē ʼe feala ke ʼamo maʼa tatou e te ʼu tēhina ʼaē ʼe nātou maʼu ia “te ʼu fealagia fakalaumālie.” (Kalate 6:1, 2, MN, kiʼi nota ʼi te lalo pasina) ʼE tonu ke tou fai ia te maʼua ʼaia heʼe “tou tahi huʼi maʼua anai ki te ʼAtua maʼa tatou takitokotahi.” (Loma 14:12, MN ) ʼE ʼui ʼi te Tohi-Tapu: “ ʼE tahi fua’pe anai e te tagata tana kavega totonu.” (Kalate 6:5) Kae e feafeaʼi hatatou fai he ʼu tonu ʼe lelei ʼi totatou maʼuli? ʼUluaki, ʼe tonu ke tou mahino ki ʼotatou tuʼakoi pea mo te ʼu kalitātē ʼaē ʼe tonu ke tou gāueʼi.
Te Fakatuʼutuʼu Maʼuhiga
4. Koteā te ako maʼuhiga ʼe tou maʼu mai te talagataʼa ʼa te ʼuluaki taumātuʼa ʼo ʼuhiga mo te ʼu tonu ʼaē ke tou fai?
4 ʼI te kamata mai ʼo te malamanei, neʼe fai e te ʼuluaki taumātuʼa ia te tonu neʼe fua kovi ki muli age. Neʼe nā filifili ke nā kai ki te fuaʼi ʼakau ʼo te fuʼu ʼakau ʼo te ʼiloʼi ʼo te meʼa ʼaē ʼe lelei pea mo te meʼa ʼaē ʼe kovi. (Senesi 2:16, 17) Koteā ʼaē neʼe fakatafito kiai tanā tonu? ʼE ʼui fēnei ʼi te Tohi-Tapu: “Neʼe sio ai te fafine ko te ʼakau neʼe lelei ki te kai pea neʼe ko he meʼa neʼe holi kiai te ʼu mata, ʼio, ko te ʼakau neʼe ko he meʼa lelei tona sioʼi. ʼO ina toliʼi ai te fuaʼi ʼakau, ʼo kai. Pea neʼe ina toe ʼavage foki ki tona ʼohoana ʼi tana kua nofo mo ia, pea neʼe ina kai.” (Senesi 3:6) Neʼe fai e Eva te tonu ʼaia he neʼe manatu pe ia kiā ia totonu. Pea ko Atama neʼe ina toe muliʼi pe ia te tonu ʼaē neʼe fai e Eva. ʼO tupu ai te “mafola [ʼa te agahala pea mo te mate] . . . ki te tagata fuli pe.” (Loma 5:12, MN ) ʼAki te talagataʼa ʼa Atama pea mo Eva, ʼe tou maʼu ia te ako maʼuhiga ʼo ʼuhiga mo te ʼu tuʼakoi ʼo te tagata: kapau ʼe mole takitaki te tagata e te ʼAtua, pea ʼe kovi anai te ʼu tonu ʼaē ka ina fai.
5. ʼE takitaki feafeaʼi tatou e Sehova, pea koteā ʼaē ka tou fai anai ke fua lelei ai kiā tatou?
5 ʼE tou fiafia heʼe takitaki tatou e Sehova ʼAtua. ʼE ʼui fēnei mai ʼi te Tohi-Tapu: “ ʼE logo anai tou ʼu taliga ki he folafola ʼe haʼu mai ʼou tuʼa, ʼo ina ʼui fēnei: ‘Koʼeni te ala. Koutou haʼele ai,’ mo kapau ʼe tonu ke koutou ʼolo ki te faʼahi mataʼu peʼe kapau ʼe tonu ke koutou ʼolo ki te faʼahi hema.” (Isaia 30:21) ʼE palalau mai ia Sehova kiā tatou ʼaki tana Folafola, ia te Tohi-Tapu. ʼE tonu ke tou ako te Tohi-Tapu pea mo maʼu ia te ʼatamai mālama totonu. Ke fua lelei ia te ʼu tonu ʼaē ʼe tou fai, ʼe tonu ke tou kai ki te “meʼa kai fefeka [ʼaē] ʼe ʼa nātou ʼaē kua kātoa tonatou ʼuhigaʼi tagata.” ʼO feiā mo tatou, “ ʼaki [tatatou] fakaʼaogaʼi, [ʼe tou] maʼu te ʼu fealagia fakakaukau ʼaē neʼe akoʼi moʼo ʼiloʼi ia te meʼa ʼaē ʼe lelei pea mo te meʼa ʼaē ʼe kovi.” (Hepeleo 5:14, MN ) Kapau ʼe tou maʼuliʼi te ʼu meʼa ʼaē ʼe tou ako mai te Folafola ʼa te ʼAtua, pea ʼe tou akoʼi ai anai totatou ʼu fealagia fakakaukau.
6. Koteā ʼaē ʼe ʼaoga ke gāue lelei totatou leʼo ʼo loto?
6 Ka tou fai he tonu, ʼe maʼuhiga ke tou fakaʼaogaʼi totatou leʼo ʼo loto. Ko te fealagia ʼaia, ʼe feala hana fai faifakamāu, pea ʼe feala ke ina “faka lākahalaʼi peʼe ina faka lākatonuʼi” tatou. (Loma 2:14, 15, MN ) Kae ke lelei te ʼu tonu ʼaē ʼe fai e totatou leʼo ʼo loto, ʼe tonu ke akoʼi ʼaki te ʼatamai mālama ʼo te Folafola ʼa te ʼAtua pea mo ina maʼuliʼi te Folafola ʼaia. Ko he leʼo ʼo loto ʼe mole akoʼi, ʼe faigafua pe anai tona fakalotoʼi e te ʼu agaʼi fenua, e te ʼu hahaʼi ʼo te vāhaʼa fale, peʼe feala ke ina kākāʼi tatou. ʼE feafeaʼi anai totatou leʼo ʼo loto mo kapau ʼe hoko putuputu tatatou mole tokagaʼi ia tana ʼu fakatokaga pea mo maumauʼi te ʼu lēkula fakaʼatua? ʼAki te temi ʼe feala anai ke hage kua fakaʼiloga “ ʼaki te ukamea kakaha,” ohage ko he kakano kua patupatu, ʼe mole kei ina logoʼi he meʼa ʼe malave age kiai. (1 Timoteo 4:2) Tahi ʼaē meʼa, ʼe ko he takitaki lelei ia he leʼo ʼo loto neʼe akoʼi ʼaki te Folafola ʼa te ʼAtua.
7. Koteā te fakatuʼutuʼu ʼaē ʼe maʼuhiga ʼaupito moʼo fai ʼo he ʼu puleʼaki ʼe fakapotopoto?
7 Ko he ʼatamai mālama ʼo ʼuhiga mo te Tohi-Tapu pea mo te maʼuliʼi ʼo te ʼu meʼa ʼaē ʼe tou ako, ʼe ko he fakatuʼutuʼu maʼuhiga ʼaupito moʼo fakahoko totatou maʼua ʼaē ke tou fai ia he ʼu tonu ʼe fakapotopoto. ʼE mole tonu anai ke tou fai fakavilivili he tonu ʼo ʼuhiga mo he ʼaluʼaga, kae ʼe tou kumi muʼa ʼi te Tohi-Tapu ia te ʼu pelesepeto fakaʼatua ʼaē ʼe pipiki ki te faʼahi ʼaia, pea mo tou fakaʼaogaʼi totatou ʼu fealagia fakakaukau ʼo ʼuhiga mo te maʼuliʼi ʼo te ʼu pelesepeto ʼaia. Tatau aipe mo kapau ohage ko Satalake, mo Mesake pea mo Apeteneko ʼe tonu ke tou fai fakavilivili he ʼu tonu, kae ʼe lelei age anai he tonu ʼe tou fai mo kapau ʼe tou maʼu ia te ʼatamai mālama ʼo te Folafola ʼa te ʼAtua pea mo tou fakaʼaogaʼi moʼo akoʼi fakalelei ia totatou leʼo ʼo loto. Ke tou mahino ki te fua lelei ʼaē ʼo totatou tuputupu ʼi te faʼahi fakalaumālie ki te fealagia ʼaē ke tou fai he ʼu puleʼaki, tou tāʼofi muʼa ʼaluʼaga e lua ʼo totatou maʼuli.
Ko Ai Anai ʼAē Ka Tou Fakakaugā Kiai?
8, 9. (a) Ko te ʼu pelesepeto fea ʼaē ʼe ʼasi ai te ʼaoga ke tekeʼi te ʼu fakakaugā kovi? (b) ʼE faka ʼuhiga pe koa te ʼu fakakaugā kovi ki te hahaʼi ʼaē ʼe mole tui ki te ʼAtua moʼoni? Koutou fakamahino.
8 Neʼe tohi fēnei e te ʼapositolo ko Paulo: “ ʼAua naʼa koutou faihala. Ko te ʼu fakakaugā kovi ʼe nātou maumauʼi te ʼu agamāhani ʼaē ʼe lelei.” (1 Kolonito 15:33, MN ) Neʼe ʼui fēnei e Sesu Kilisito ki tana ʼu tisipulo: “ ʼE mole koutou kau ʼi te malamanei.” (Soane 15:19, MN ) ʼAki te ʼu pelesepeto ʼaia, ʼe tou mahino vave ʼe mole tonu ke tou fakakaugā mo te kau folonikasio, te kau tono, te kau kaihaʼa, te kau konahia, pea mo ʼihi atu hahaʼi ʼe nātou fai he ʼu aga ʼe heʼeʼaoga. (1 Kolonito 6:9, 10) ʼI tatatou tuputupu ʼi te mahino ʼo ʼuhiga mo te moʼoni ʼo te Tohi-Tapu, ʼe tou ʼiloʼi ai ʼe feala ke tou tuʼutāmaki mo kapau ʼe tou fakakaugā mo te faʼahiga hahaʼi ʼaia mokā tou sioʼi tanatou ʼu aga ʼi te ʼu ʼata, ʼi te televisio, peʼe ʼi te olotinatea, peʼe ʼi te ʼu tohi ʼaē ʼe tou lau. ʼE toe ʼaoga te tokoni ʼaenī mo kapau ʼe tou kau ki he ʼu fai palalau ʼi te Iteneti, mo nātou ʼaē ʼe “nātou fufū tonatou ʼuhiga moʼoni.”—Pesalemo 26:4.
9 E feafeaʼi kiā nātou ʼaē ʼe tou fakakaugā ki ai, ʼe mole nātou fai he ʼu aga heʼeʼaoga kae ʼe mole nātou tui ki te ʼAtua moʼoni? ʼE ʼui fēnei mai ʼi te Tohi-Tapu: “Ko te malamanei kātoa ʼe takoto ia ʼi te mālohi ʼo te agakovi.” (1 Soane 5:19, MN ) Ko te vaega ʼaenī ʼe tokoni mai ke tou mahino, ko te ʼu fakakaugā kovi ʼe mole faka tuʼakoi pe kiā nātou ʼaē ʼe fakaʼaoʼaoganoa, peʼe kiā nātou ʼaē ʼe mole maʼa tonatou maʼuli. Koia, ʼe ko he aga fakapotopoto anai mo kapau ʼe tou fakakaugā pe mo nātou ʼaē ʼe nātou ʼoʼofa kiā Sehova.
10. Koteā ʼaē ka tokoni mai ke tou fai he ʼu tonu fakapotopoto ʼo ʼuhiga mo tatatou ʼu felogoi mo te hahaʼi ʼo te mālama?
10 ʼE mole feala pea ʼe mole tonu ke tou lītuʼa ʼosi ki te hahaʼi ʼo te malamanei. (Soane 17:15) ʼE tou felāveʼi mo te hahaʼi ʼo te malamanei ʼi tatatou minisitelio faka Kilisitiano, pea mo tatatou ako ʼi te ʼu faleako, pea mokā tou ʼolo ki te gāue. ʼE mahino ia ko he Kilisitiano ʼe ʼohoana mo he tahi ʼe mole tui kiā Sehova, ʼe lahi anai tana felogoi mo te hahaʼi ʼo te mālama. Kae ka tou akoʼi fakalelei totatou ʼu fealagia fakakaukau, pea ʼe tou mahino anai ki te kehekehe ʼo te tuʼakoi ʼo tatatou felogoi mo te hahaʼi ʼo te mālama pea mo te fia aga fakakaumeʼa ʼaē mo nātou. (Sakopo 4:4) Koia, ʼe tou fai anai he ʼu tonu fakapotopoto ʼo ʼuhiga mo hatatou kau anai ki he ʼu gāue ʼi tuʼa atu ʼo te faleako, ohage la ko he ʼu faigaoʼi pea mo he ʼu meʼe, pea mo tatatou kau ki he ʼu fakafiafia pea mo he ʼu fai kakai neʼe fai e totatou ʼu kaugā gāue.
E Feafeaʼi Te Filifili ʼo He Gāue?
11. Kapau ʼe tou filifili he gāue, ko te faʼahi fea ʼaē ka tou ʼuluaki vakaʼi anai?
11 Kapau ʼe tou fakaʼaogaʼi fakapotopoto ia te ʼu pelesepeto faka Tohi-Tapu, pea ʼe lelei anai te ʼu tonu ʼaē ka tou fai ʼo ʼuhiga mo totatou maʼua ʼaē ke kita ‘tokaga ki te hahaʼi ʼo tota loto fale.’ (1 Timoteo 5:8) ʼE tou ʼuluaki vakaʼi anai peʼe feafeaʼi ia te gāue—peʼe koteā te ʼu meʼa ʼaē ka fakamaʼua mai e te gāue ʼaia ke kita fai. ʼE kovi ia te gāue ʼaē ʼe lagolago ki ni ʼu aga ʼe tauteaʼi ʼi te Tohi-Tapu. Koia ʼe mole tali anai e te kau Kilisitiano ke nātou fai ni ʼu gāue ʼe pipiki ki te tauhi tamapua, ki te kaihaʼa, ki te huki toto, peʼe ki he tahi ʼatu ʼu aga ʼe tauteaʼi ʼi te Tohi-Tapu. Tatau aipe peʼe fakamaʼua mai e totatou patolo ke kita loi pea mo kita kaihaʼa ia te hahaʼi, kae ʼe mole tou fai anai ia te ʼu faʼahi ʼaia.—Gaue 15:29; Apokalipesi 21:8.
12, 13. ʼO mole gata pe ʼi te filifili ʼo te gāue ʼaē ke tou fai, koteā te tahi age ʼu faʼahi maʼuhiga ʼe tonu anai ke tou vakaʼi ʼo ʼuhiga mo te gāue?
12 Pea kapau la ko te gāue ʼe mole he lēkula faka Tohi-Tapu ʼe fakafeagai kiai? ʼI te tuputupu ʼo tatatou mahino ki te moʼoni pea mo tatatou fakaʼaogaʼi ʼo totatou ʼu fealagia fakakaukau, ʼe tou fakatokagaʼi anai ʼihi faʼahi ʼe pipiki ki te gāue ʼaia. Kae ʼe feafeaʼi mo kapau ʼe ko he gāue ʼe fai ai he ʼu aga ʼe tauteaʼi ʼi te Tohi-Tapu, ohage la ko te tali ʼi te telefoni ʼi he fale faigaoʼi paʼaga? ʼE tonu ke tou vakavakaʼi peʼe ko ai ʼaē ʼe ina totogi tatou pea mo te faʼahi ʼaē ʼe fai ai ia te gāue. Ohage la, koteā anai te tonu ka fai e he tahi ʼe taki gāue, mo kapau ʼe fakaʼui age ke ina pena he ʼēkelesia, ʼaē ʼe ko he lagolago ʼaia ki te fakahaʼele ʼo te lotu hala?—2 Kolonito 6:14-16.
13 Kapau la ʼe tali e tota patolo he kotala ke fai e tana kau gāue, ohage ko te pena ʼo he fale tauhi ʼo te lotu hala. ʼI te faʼahi ʼaia, ʼe tou vakavakaʼi anai peʼe tou pule ki te gāue ʼaē ʼe fai, peʼe tou fakalogo ki he takitaki gāue, pea mo te lahi ʼo tatatou kau ki he faʼahiga gāue. Pea e feafeaʼi mo kapau ko he gāue ʼe mole tapuʼi ʼi te Tohi-Tapu, ohage ko te tufa tohi ki te ʼu potu fuli ʼo he kolo, pea mo te ʼu fale ʼaē ʼe fai ai te ʼu aga heʼeʼaoga? ʼE tonu anai ke vakaʼi te pelesepeto ʼaē ʼe tuʼu iā Mateo 5:45. ʼE tonu ke tou toe tokagaʼi foki peʼe ko te gāue ʼaē ʼe tou fai, ʼe malave feafeaʼi anai ki totatou leʼo ʼo loto ʼi te ʼaho fuli. (Hepeleo 13:18) ʼIo, ka tou fakahoko totatou maʼua ʼaē ke tou fai ʼo he ʼu tonu fakapotopoto ʼo ʼuhiga mo he gāue, ʼe ko he faka fealagia ʼaia ke tou hikihiki totatou ʼu fealagia fakakaukau pea mo akoʼi totatou leʼo ʼo loto ʼaē neʼe foaki mai e te ʼAtua.
“ ʼI Tou ʼu Ala Fuli Tokagaʼi Ia Ia”
14. Ka tou fai ni ʼu tonu, koteā anai te ʼu faʼahi ʼe lelei ke tou tokagaʼi?
14 Pea kapau la ko he ʼu tonu ʼo ʼuhiga mo te hoko atu ʼo tatatou ako ʼi he ʼu faleako lalahi, pea mo te tali peʼe ko te fakafisi ki he faʼahiga faitoʼo, koteā anai ʼaē ka tou fai? Ko he tonu pe ʼe tou fai, ʼe tonu ke ʼalutahi mo te ʼu pelesepeto faka Tohi-Tapu ʼaē ʼe pipiki ki te faʼahi ʼaia, pea mo tou fakaʼaogaʼi totatou ʼu fealagia fakakaukau moʼo vakavakaʼi peʼe feafeaʼi anai hatatou maʼuliʼi ia te ʼu pelesepeto ʼaia. Neʼe ʼui fēnei e te Hau poto ko Salomone ʼo te Iselaele ʼāfea: “Falala kiā Sehova ʼaki tou loto kātoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.”—Tāʼaga Lea 3:5, 6.
15. Koteā te ako ʼaē ʼe tou maʼu mai te kau Kilisitiano ʼo te ʼuluaki sēkulō ʼo ʼuhiga mo te fai ʼo he ʼu tonu?
15 ʼI te agamāhani, ʼe malave ki ʼihi te ʼu tonu ʼaē ʼe tou fai, koia ʼe tonu ai ke tou tōkakaga ki te faʼahi ʼaia. Ohage la, ko te ʼu Kilisitiano ʼo te ʼuluaki sēkulō neʼe mole kei fakamaʼua kiā nātou ke nātou mulimuli ki te ʼu lēkula ʼo ʼuhiga mo te meʼa kai ʼaē neʼe fakamaʼua kiā nātou ʼi te Lao ʼa Moisese. Neʼe kua feala hanatou filifili ke nātou kai ki he faʼahiga meʼa kai neʼe ʼui ʼi te Lao neʼe heʼemaʼa pea neʼe mole tapuʼi ʼi te tahi ʼu ʼaluʼaga. Kae ko te ʼapositolo ko Paulo neʼe faitohi ʼo ʼuhiga mo te kai ʼo he kanoʼi manu neʼe fakaʼaogaʼi ki he tauhi tamapua: “Kapau e ko he meakai e higa ai toku tehina, e mole au toe kai kanoi’manu i he lakaga, naʼa au fakahiga toku tehina.” (1 Kolonito 8:11-13) Neʼe ina fakaloto mālohiʼi te kau ʼuluaki Kilisitiano ke nātou tokagaʼi ia te leʼo ʼo loto ʼo ʼihi, naʼa nātou tūkia ʼuhi pe ʼi tanatou kai ia te kanoʼi manu ʼaia. ʼE mole tonu ke liliu tatatou ʼu tonu ʼe ko “he ʼu meʼa fakatupu tūkia” ki niʼihi.—1 Kolonito 10:29, 32, MN.
Tou Kumi Te Poto Fakaʼatua
16. ʼE tokoni feafeaʼi mai te faikole ʼo ʼuhiga mo te ʼu tonu ʼaē ʼe tou fai?
16 Ko te faikole ʼe ko he tokoni lelei ʼaia mokā tou fai ni ʼu tonu. ʼE ʼui fēnei e te tisipulo ko Sakopo: “Kapau ko he tahi ia koutou e ina fia mau te poto, ke ina kole ki te Atua, e ina foaki mo te ofa ki te tagata fuape pea e mole ina valoki, e ina foakiʼage anai kia te ia.” (Sakopo 1:5) Koia ʼaki te faikole ʼe tou fakahā ai ia tatatou falala ʼaē kiā Sehova, pea mo tatatou fia kole tokoni ʼaē kiā te ia ʼo ʼuhiga mo te fai ʼo he ʼu tonu. Ka tou fakahā ki te ʼAtua moʼoni ia te ʼu meʼa ʼaē ʼe tou tuʼania kiai pea mo kumi tana takitaki, ʼe feala ke tokoni mai tona laumālie maʼoniʼoni ke lahi age tatatou mahino ki te Tohi-Tapu ʼo ʼuhiga mo te ʼu pelesepeto ʼaē ʼe tou lau pea mo ina fakamanatuʼi mai te ʼu meʼa ʼaē neʼe tou ako.
17. Koteā te tokoni ʼe lava foaki mai e niʼihi mokā tou fai he ʼu tonu?
17 ʼE feala koa ke tokoni mai niʼihi mokā tou fai he ʼu tonu? Ei, he neʼe fakatuʼutuʼu e Sehova ʼi te loto kokelekasio ia te ʼu tagata kua aga fakapotopoto moʼo tokoni mai kiā tatou. (Efeso 4:11, 12) ʼE nātou lava tokoni mai, pea ʼe tonu ke tou kumi tokoni kiā nātou, tāfito la mo kapau ʼe ko he tonu maʼuhiga ʼaē ʼe tonu ke kita fai. Ko te ʼu tagata ʼāfea ʼaē ʼe nātou maʼu te fakasiosio loloto ʼi te faʼahi fakalaumālie pea kua nātou māhani ki te ʼu ʼaluʼaga ʼo te maʼuli, ʼe feala ke nātou fakahā mai he tahi ʼu pelesepeto fakaʼatua ʼe lava tokoni kiā tatou ʼo ʼuhiga mo te ʼu tonu ʼaē ka tou toʼo, pea mo tokoni mai ke tou “ ʼiloʼi papau te ʼu meʼa ʼaē ʼe maʼuhiga tāfito.” (Filipe 1:9, 10, MN ) Kae tou tōkakaga, ke ʼaua naʼa fai e ʼihi he ʼu tonu maʼa tatou. Ko totatou maʼua ʼaia ʼe tonu ke tou ʼamo.
ʼE Fua Lelei Tuʼumaʼu Anai Koa Ia Te ʼu Tonu ʼAē Ka Tou Fai?
18. Koteā te meʼa ʼaē ʼe feala ke tou ʼui ʼo ʼuhiga mo te fua ʼo he tonu ʼe lelei?
18 Ko te ʼu tonu ʼaē ʼe tou fai ʼo fakatafito ki te ʼu pelesepeto faka Tohi-Tapu pea mo fakakaukauʼi fakalelei, ʼe fua lelei tuʼumaʼu koa? Ei ʼe fua lelei ʼaki te temi, logola ʼi ʼihi temi, ʼe feala ke kita felāveʼi mo ni ʼu faigataʼaʼia ʼi te kamata. Ohage la, ko Satalake, mo Mesake, pea mo Apeteneko neʼe nātou ʼiloʼi ko te tonu ʼaē ka nātou fai ʼe iku anai ki tonatou mate, he neʼe mole nātou fia tauhi ki te foʼi fakatātā. (Taniela 3:16-19) ʼO toe feiā pe mo te kau ʼapositolo, ʼi tanatou ʼosi fakahā ʼi te Sanetualio ʼa te kau Sutea tanatou fakalogo ʼuluaki ʼaē ki te ʼAtua kae mole nātou fakalogo ki te tagata, neʼe ʼuluaki huipiʼi nātou pea faka ʼāteaina leva nātou ki muli age. (Gaue 5:27-29, 40) Tahi ʼaē meʼa, ʼuhi ko te ʼu “temi pea mo [te] ʼu meʼa [ʼaē ʼe hoko] fakafokifā,” ko he tonu ʼe tou fai ʼe feala ke hoko ai hona ʼu faigataʼaʼia kiā tatou. (Tagata Tānaki 9:11) Pea kapau ʼe tou tau mo ni ʼu mamahi logola neʼe tou fai he tonu ʼe lelei, tou falala kiā Sehova heʼe tokoni mai anai ke tou faʼa kātakiʼi te faʼahi ʼaia pea ʼe ina tapuakina anai tatou ʼi te ka haʼu.—2 Kolonito 4:7.
19. E feafeaʼi hatatou lototoʼa ʼo fakahoko totatou maʼua ʼaē ko te fai ʼo ni ʼu tonu?
19 Koia ka tou fai ni ʼu tonu, tou kumi te ʼu pelesepeto faka Tohi-Tapu pea mo fakaʼaogaʼi totatou fealagia fakakaukau moʼo fakahoko ʼo te ʼu tonu ʼaē neʼe fai. ʼE tou loto fakafetaʼi ki te tokoni ʼaē ʼe foaki mai e Sehova ʼaki tona laumālie maʼoniʼoni pea mo te ʼu tagata ʼāfea ʼi te kokelekasio! ʼAki te takitaki ʼaia pea mo te ʼu fakatuʼutuʼu ʼaē neʼe ina fai, ʼofa pe ke tou lototoʼa ʼo fakahoko ia totatou maʼua ʼaē ko te fai ʼo ni ʼu tonu fakapotopoto.
Koteā Te Ako Neʼe Koutou Tāʼofi?
● Koteā te fakatuʼutuʼu ʼaē ʼe maʼuhiga ʼaupito moʼo fai ʼo he ʼu tonu ʼe lelei?
● ʼE ʼiloga feafeaʼi anai tatatou tuputupu fakalaumālie ʼo ʼuhiga mo te filifili ʼo tatatou ʼu fakakaugā?
● Koteā te ʼu meʼa maʼuhiga ʼaē ʼe tonu ke kita vakaʼi mokā tou fai ni ʼu tonu ʼo ʼuhiga mo he gāue?
● Ko te tokoni fea ʼaē ʼe tou maʼu moʼo fai he ʼu tonu ʼe lelei?
[Fehuʼi]