‘Koutou ʼOlo Pea Ke Koutou Fai Ni ʼu Tisipulo, ʼo Papitemaʼi Ia Nātou’
‘Koutou ʼOlo Pea Ke Koutou Fai Ni ʼu Tisipulo, ʼo Papitemaʼi Ia Nātou’
“Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou . . . , ʼo koutou ako ia nātou ke nātou mulimuli ki te ʼu meʼa fuli pe ʼaē neʼe au fakatotonu atu kiā koutou.”—Mateo 28:19, 20, MN.
1. Koteā te fakapapau ʼaē neʼe fai e te puleʼaga ʼo Iselaele ʼi te vaʼe Moʼuga ʼo Sinai?
KUA hili nei kiai taʼu e 3 500, ko te puleʼaga kātoa ʼo Iselaele neʼe nātou fai ia tanatou fakapapau ki te ʼAtua. Neʼe nātou māʼopoʼopo ʼi te vaʼe Moʼuga ʼo Sinai, pea neʼe nātou tala leʼo lahi fēnei: “Ko meʼa fuli ʼaē kua folafola kiai ia Sehova, ʼe mātou lotolelei ke mātou fai.” Talu mai te ʼaho ʼaia, neʼe liliu ia te kau Iselaele ko te hahaʼi kua foaki tonatou maʼuli ki te ʼAtua, ko tana “koloā makehe.” (Ekesote 19:5, 8; 24:3) Neʼe nātou falala ʼe puipui anai nātou e te ʼAtua pea mai he taʼiake ki he tahi taʼiake ʼe nātou māʼuʼuli anai ʼi te fenua “ ʼe hali ai te huʼa pipi mo te meli.”—Levitike 20:24.
2. Koteā te felogoi ʼe lava maʼu e te hahaʼi mo te ʼAtua iā ʼaho nei?
2 Kae ohage ko tona ʼui e te tagata fai pesalemo ko Asafe, ko te kau Iselaele “neʼe mole nātou taupau te fuakava ʼa te ʼAtua, pea neʼe mole nātou fia haʼele ʼi tana lao.” (Pesalemo 78:10) Neʼe mole nātou taupau te fakapapau ʼaē neʼe fai e tanatou ʼu kui kiā Sehova. Pea ki muli age, neʼe mole kei nātou maʼu ia te felogoi makehe ʼaē neʼe maʼu e tanatou ʼu kui pea mo te ʼAtua. (Tagata Tānaki 5:4; Mateo 23:37, 38) Koia, ko te ʼAtua neʼe ina “tokagaʼi te ʼu puleʼaga ke toʼo mai ai he hahaʼi ki tona huafa.” (Gaue 15:14, MN ) Pea ʼi te ʼu ʼaho fakamuli ʼaenī, ʼe ina tānaki “te toe hahaʼi tokolahi, ʼe mole feala tona lau e he tahi, mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli,” ko he hahaʼi ʼe nātou tali ʼaki he loto fiafia ki te faʼahi ʼaenī: “Ko te fakamaʼuli, ʼe tou maʼu mai totatou ʼAtua, ʼaē ʼe ʼafio ʼi te hekaʼaga faka hau, pea mo te Akeno.”—Apokalipesi 7:9, 10, MN.
3. Ko te ʼu faʼahi fea ʼaē ʼe tonu ke fai e he tahi ke feala hana felogoi mo te ʼAtua?
3 Kapau ʼe tou fia kau ʼi te hahaʼi ʼaē ʼe nātou felogoi lelei mo te ʼAtua, pea ʼe tonu ke tou foaki totatou maʼuli kiā Sehova pea mo fakahā ia te faʼahi ʼaia ʼi muʼa ʼo te kaugamālie ʼaki te papitema. Ko te fakapapau ʼaia pea mo tatatou papitema, ʼe tou fakahā ai tatatou fakalogo ki te fakatotonu ʼa Sesu ʼaē neʼe ina fai ki tana ʼu tisipulo: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe au fakatotonu atu kiā koutou.” (Mateo 28:19, 20, MN ) Neʼe fakalogo ia te kau Iselaele ki te lau age e Moisese ia “te tohi ʼo te fuakava.” (Ekesote 24:3, 7, 8) Koia, neʼe nātou ʼiloʼi tonatou ʼu maʼua ʼaē kiā Sehova. ʼO toe feiā pe mo tatou iā ʼaho nei, ʼe maʼuhiga ʼi muʼa ʼo tatatou papitema ke tou maʼu ia te ʼatamai mālama totonu ʼo ʼuhiga mo te finegalo ʼo te ʼAtua ʼaē ʼe tou maʼu ʼi tana Folafola, ia te Tohi-Tapu.
4. Koteā te meʼa ʼe tonu ke fai e ia ʼaē ʼe fia papitema? (Vakaʼi mo te fakamatala ʼaē ʼe ʼātakai ʼi ʼoluga.)
4 ʼE mahino mai, neʼe loto e Sesu ke maʼu e tana ʼu tisipulo he fakatafitoʼaga mālohi ʼo tanatou tui, ʼi muʼa ʼo tanatou papitema. Neʼe ina akoʼi age ki tana ʼu tisipulo, ke mole gata ʼaki pe tanatou ʼolo ʼo fai ni ʼu tisipulo, kae neʼe toe maʼua foki ke nātou akoʼi age ke nātou ‘mulimuli kiā meʼa fuli ʼaē neʼe ina fakatotonu age.’ (Mateo 7:24, 25; Efeso 3:17-19) Koia, ko nātou ʼaē kua feala ke papitemaʼi, ʼi te agamāhani neʼe akoʼi muʼa nātou ʼaki te Tohi-Tapu lolotoga ni ʼu māhina peʼe ʼi he taʼu kātoa peʼe lua, ʼo mahino mai, ko te tonu ʼaia ke nātou papitema, neʼe mole ko he meʼa neʼe fai fakavilivili peʼe fai kae ʼe mole heʼeki nātou mahino lelei kiai. ʼI te ʼaho ʼo te papitema, ʼe ʼio ia nātou ʼaē ka papitema ki te ʼu fehuʼi maʼuhiga e lua. Neʼe fakamahino lelei mai e Sesu, ko ‘tatatou Ei ʼe ko te Ei, pea ko tatatou Oho ʼe ko te Oho,’ koia ʼe ʼaoga ai kiā tatou fuli ke tou fakakaukauʼi lelei te maʼuhiga ʼo te ʼu fehuʼi ʼaia ki te papitema.—Mateo 5:37.
Te Fakahemala Pea Mo Te Foaki ʼo Tota Maʼuli
5. Koteā te ʼu koga maʼuhiga e lua ʼe pipiki ki te ʼuluaki fehuʼi?
5 ʼI te ʼuluaki fehuʼi ʼaē ʼe fai kiā ia ʼaē ʼe papitema, ʼe fehuʼi age: Peʼe kua fakahemala koa ʼo ʼuhiga mo tona maʼuli ʼāfea pea mo fakapapau kiā Sehova ke ina fakaʼaogaʼi tona maʼuli moʼo fai ʼo tona finegalo. Pea ʼo ʼuhiga mo te fehuʼi ʼaia, ko ʼona koga maʼuhiga e lua ʼe tonu ke fai ʼi muʼa ʼo te papitema, ko te fakahemala pea mo te foaki ʼo tota maʼuli.
6, 7. (a) He koʼe ʼe maʼuhiga kiā nātou fuli ʼaē ʼe papitema ke nātou fakahemala? (b) Ko te ʼu fetogi fea ʼaē ʼe tonu ke fai e he tahi ʼe fakahemala?
6 He koʼe koa ʼe tonu ke tou fakahemala ʼi muʼa ʼo tatatou papitema? ʼE ʼui fēnei e te ʼapositolo ko Paulo: “ ʼI te temi ʼaē, neʼe tou mulimuli ki te ʼu holi ʼo totatou kakano.” (Efeso 2:3, MN ) ʼI muʼa ʼo tatatou maʼu ia te ʼatamai mālama totonu ʼo ʼuhiga mo te finegalo ʼo te ʼAtua, neʼe tou māʼuʼuli ohage ko te malamanei, ʼo mulimuli ki tana ʼu aga pea mo tana ʼu fakatuʼutuʼu. Ko totatou maʼuli neʼe puleʼi e te ʼatua ʼo te tuʼu ʼaenī, ia Satana. (2 Kolonito 4:4) Kae ʼi tatatou kua mahino ki te finegalo ʼo te ʼAtua, kua tou fakatotonu ke “mole kei tou māʼuʼuli moʼo fai ia te ʼu holi fakatagata, kae ke tou māʼuʼuli moʼo fai ia te finegalo ʼo te ʼAtua.”—1 Petelo 4:2, MN.
7 ʼAki ia te maʼuli foʼou ʼaia, ʼe tou maʼu ai ia te ʼu tapuakina lahi. Kae ko te tapuakina ʼaē ʼe maʼuhiga tāfito, ʼe ko tatatou ʼu felogoi mo Sehova, ʼaē neʼe fakatatau e Tavite ki hana fakaafe ke tou hū ki tona “falelā” pea mo tona “moʼuga taputapu” ʼa te ʼAtua, pea ʼe ko he toe pilivilesio ʼaupito. (Pesalemo 15:1) Kae ko Sehova ʼe ina fakaafe pe anai ia nātou ʼaē ʼe nātou “haʼele agatonu pea mo . . . [nātou] maʼuliʼi te faitotonu, pea mo maʼu te moʼoni ʼi [ʼonatou] loto.” (Pesalemo 15:2) ʼO mulimuli ki totatou ʼu ʼaluʼaga takitokotahi ʼi muʼa ʼo tatatou ako ia te moʼoni, neʼe lagi tou fai he ʼu aga ʼe kovi, koia ʼe maʼua anai ke tou fetogi tatatou aga pea mo totatou ʼu ʼulugaaga ke feala hatatou mulimuli ki te ʼu fakamaʼua ʼaia. (1 Kolonito 6:9-11; Kolose 3:5-10) Ko te faʼahi ʼaē ʼe ina uga tatou ke tou fai ia te ʼu fetogi ʼaia ʼe ko te fakahemala—ko he lotomamahi fakamalotoloto ʼo ʼuhiga mo te maʼuli ʼāfea pea mo he tukupau ke tou fakafiafia ia Sehova. Ko te fakahemala ʼaia ʼe iku anai ki he fetogi kātoa ʼo totatou maʼuli—ʼaē ko te līaki ʼo te faʼahiga maʼuli ʼo te malamanei pea tatatou manatu pe ʼaē kiā kita totonu, kae ke tou fai te meʼa ʼaē ʼe fiafia ai te ʼAtua.—Gaue 3:19.
8. E feafeaʼi te foaki ʼo totatou maʼuli ki te ʼAtua, pea koteā tona pikipikiga mo te papitema?
8 Koʼeni te lua koga ʼo te ʼuluaki fehuʼi ʼaē ʼe fai ki te kau papitema: ko te foaki ʼo totatou maʼuli kiā Sehova moʼo fai ia tona finegalo. ʼI muʼa ʼo te papitema, ʼe ko he faʼahi maʼuhiga ke kita foaki tota maʼuli ki te ʼAtua. ʼE ko he fakapapau ʼe tou fai ʼi te faikole, moʼo fakahā kiā Sehova totatou loto ʼaē ke tou kaugana kiā te ia ʼaki ia Kilisito. (Loma 14:7, 8; 2 Kolonito 5:15) Hili te fakapapau ʼaia, kua liliu ia Sehova ko totatou Pule, pea ohage ko Sesu ʼe tou fiafia ʼi te fai ʼo te finegalo ʼo te ʼAtua. (Pesalemo 40:8; Efeso 6:6) Ko tatatou fakapapau ʼaia kiā Sehova ʼe tou fai tuʼa tahi pe ʼi totatou maʼuli. Kae ko te foaki ʼo totatou maʼuli kiā Sehova neʼe kita fai tokotahi pe ʼi te faikole, pea ʼi te ʼaho ʼo te papitema ʼe tou fakahā ki te kaugamālie ke nātou ʼiloʼi fuli kua tou fai ia te potu ʼaia ki tatatou Tāmai ʼaē ʼe ʼi selo.—Loma 10:10.
9, 10. (a) Koteā ʼaē ʼe fakamaʼua ki te fai ʼo te finegalo ʼo te ʼAtua? (b) Koteā ʼaē neʼe mahino kiai te kau ofisie Nasi ʼo ʼuhiga mo tatatou fakapapau?
9 Koteā ʼaē ʼe fakamaʼua mai mo kapau ʼe tou fia muliʼi te faʼifaʼitaki ʼa Sesu ʼo ʼuhiga mo te fai ʼo te finegalo ʼo te ʼAtua? Neʼe ʼui fēnei e Sesu ki tana ʼu tisipulo: “Kapau ʼe fia muli mai he tahi iā te au, ke fakafisi ia kiā ia totonu pea ke ina toʼo tona pou fakamamahi pea ke muli tuʼumaʼu iā te au.” (Mateo 16:24, MN ) ʼI te vaega ʼaenī, neʼe fakahā lelei e Sesu ia te ʼu faʼahi e tolu ʼe tonu ke tou fai. ʼUluaki, ʼe tonu ke tou “fakafisi” kiā tatou totonu. Ko tona faka ʼuhiga, ʼe tonu ke tou situʼa ki te ʼu meʼa ʼaē ʼe tou loto kiai, ki totatou ʼu vaivaiʼaga pea mo tali ia te ʼu tokoni pea mo te takitaki ʼa te ʼAtua. Lua, ʼe tonu ke tou ‘toʼo totatou pou fakamamahi.’ ʼI te temi ʼo Sesu, neʼe fakatātā e te pou fakamamahi ia te fakalainoa pea mo te mamahi. ʼI totatou ʼuhiga Kilisitiano, ʼe tou tali anai ʼi ʼihi temi ke fakamamahiʼi tatou ʼuhi ko te logo lelei. (2 Timoteo 1:8) Tatau aipe peʼe manukinukiʼi tatou peʼe valokiʼi tatou e te malamanei, kae ohage ko Kilisito ʼe tou ‘meʼa noaʼi te ufiufi,’ heʼe tou fiafia ʼi tatatou ʼiloʼi ʼaē ʼe tou fakafiafia te ʼAtua. (Hepeleo 12:2) Tolu leva, tou “muli tuʼumaʼu” iā Sesu.—Pesalemo 73:26; 119:44; 145:2.
10 Ko ʼihi hahaʼi fakafeagai, neʼe nātou mahino ki te fakapapau ʼa te kau Fakamoʼoni ʼa Sehova ke nātou tauhi ʼāteaina pe ki te ʼAtua. Ohage la, ʼi Siamani ʼi te lotoʼā fakamamahi ʼa te kau Nasi ʼi Buchenwald, ko te kau Fakamoʼoni ʼaē neʼe mole nātou fakafisi ki tanatou tui, neʼe tonu ke nātou sinie te pepa ʼe ʼui fēnei ai: “ ʼE kei au kau pe ki te kau Ako ʼo Te Tohi-Tapu, pea ʼe mole au situʼa anai ki taku fakapapau ʼaē neʼe au fai kiā Sehova.” ʼE hā lelei ʼi te tohi ʼaia ia te manatu ʼa te ʼu kaugana agatonu fuli ʼa te ʼAtua ʼaē kua foaki tonatou maʼuli kiā te ia!—Gaue 5:32.
Ke ʼIloʼi Tatou Ko He ʼu Fakamoʼoni ʼa Sehova
11. Koteā te pilivilesio ʼe maʼu e ia ʼaē ʼe papitema?
11 ʼI te ʼuluaki koga ʼo te lua fehuʼi, ʼe fehuʼi ai kiā ia ʼaē ʼe papitema peʼe mahino ko tona papitemaʼi ʼe ina fakahā ai ko ia ʼe ko he Fakamoʼoni ʼa Sehova. ʼI tana ʼosi papitema, kua liliu leva ko he minisi neʼe fakanofo moʼo fakamoʼoni ki te huafa ʼo Sehova. ʼE ko he pilivilesio lahi pea mo he maʼua maʼuhiga. Ko ʼaē ʼe papitema ʼe ina maʼu te ʼamanaki ki te maʼuli heʼegata, mo kapau foki ʼe nofo agatonu kiā Sehova.—Mateo 24:13.
12. Ko te maʼua fea ʼaē ʼe pipiki ki te pilivilesio ʼo tatatou fua ia te huafa ʼo Sehova?
12 ʼE ko he pilivilesio makehe te fua ʼo te huafa ʼo te ʼAtua māfimāfi ko Sehova. Neʼe ʼui fēnei e Mikea: “Ko te hahaʼi fuli ʼe nātou haʼele anai ʼi te huafa ʼo tonatou ʼatua, kae ko tatou, ʼe tou haʼele anai ʼi te huafa ʼo Sehova totatou ʼAtua ʼo aʼu ki he ʼu temi ʼe mole ʼiloʼi hona gataʼaga, ei, ʼo talu ai.” (Mikea 4:5) Kae ko te pilivilesio ʼaia ʼe ʼi ai tona fakamaʼua. ʼE tonu ke tou haga faiga ʼi totatou maʼuli ke tou fakahā ia tatatou fakaʼapaʼapa ki te huafa ʼo Sehova. Ohage ko tona fakamanatuʼi e Paulo ki te kau Kilisitiano ʼo Loma, kapau ʼe mole tou maʼuliʼi te logo ʼaē ʼe tou faka mafola, pea ʼe tou “moamoagaʼi” peʼe tou fakalainoaʼi te huafa ʼo te ʼAtua.—Loma 2:21-24.
13. He koʼe ko te maʼua ʼa te ʼu kaugana ʼa Sehova ke nātou fakamoʼoni ʼo ʼuhiga mo tonatou ʼAtua?
13 Ka liliu he tahi ko he Fakamoʼoni ʼa Sehova, pea ʼe tonu ke ina tali tona maʼua ʼaē ke fakamoʼoni ki tona ʼAtua. Neʼe fakaafe e Sehova ia te puleʼaga ʼo Iselaele ʼaē neʼe kua tauhi age kiā te ia, ke nātou liliu ko tana kau fakamoʼoni moʼo fakahā tona ʼuhiga ʼAtua heʼegata. (Isaia 43:10-12, 21) Kae neʼe mole fai e te kau Iselaele ia tonatou maʼua ʼaia, pea neʼe fakafisi ai leva ia Sehova kiā nātou. Iā ʼaho nei, ʼe fiafia te kau Kilisitiano ʼi tonatou pilivilesio ʼaē ko te faka mafola ia te huafa ʼo Sehova. ʼE tou fai ia te faʼahi ʼaia heʼe tou ʼoʼofa iā te ia pea mo tou fia tāpuhā tona huafa. E faigataʼa hatatou nonofo fakalogologo mokā tou ʼiloʼi ia te moʼoni ʼo ʼuhiga mo tatatou Tāmai ʼaē ʼe ʼi selo pea mo tona finegalo! ʼE tou manatu ohage ko te ʼapositolo ko Paulo ʼi tana ʼui ʼaenī: “Neʼe tuku mai kiā te au ia te maʼua. Ei, malaʼia kiā te au mo kapau ʼe mole au tala ia te logo lelei!”—1 Kolonito 9:16, MN.
14, 15. (a) ʼE tokoni feafeaʼi mai te kautahi ʼa Sehova ke tou tuputupu ʼi te faʼahi fakalaumālie? (b) Ko te ʼu fakatuʼutuʼu fea ʼaē ʼe tokoni mai kiā tatou ʼi te faʼahi fakalaumālie?
14 Ko te lua fehuʼi ʼe ina fakamanatuʼi kiā ia ʼaē ʼe papitema, ʼe tonu ke gāue fakatahi mo te kautahi ʼa Sehova ʼaē ʼe takitaki e tona laumālie maʼoniʼoni. ʼE mole ko tatou tokotahi pe ʼaē ʼe tou tauhi ki te ʼAtua, pea ʼe ʼaoga kiā tatou ia te tokoni, mo te lagolago, pea mo te fakaloto mālohi ʼa “te famili kātoa ʼo te ʼu tēhina.” (1 Petelo 2:17, MN; 1 Kolonito 12:12, 13) Ko te kautahi ʼa te ʼAtua ʼe tokoni tāfito mai ki tatatou tuputupu ʼi te faʼahi fakalaumālie. ʼE ina foaki mai te ʼu tuʼuga tohi faka Tohi-Tapu ke feala hatatou tuputupu ʼi te ʼatamai mālama totonu, pea ke tou aga fakapotopoto mokā tou tau mo ni ʼu fihifihia, pea mo gāueʼi tatatou ʼu felogoi mo te ʼAtua ke mālohi. Ohage ko he faʼē ʼe tokaga ke kai lelei tana tamasiʼi, ʼe toe feiā mo “te tagata kaugana agatonu mo poto” ʼe ina foaki mai ia te tuʼuga meʼa kai fakalaumālie ʼi tona temi totonu ke tou tuputupu ʼi te faʼahi fakalaumālie.—Mateo 24:45-47, MN; 1 Tesalonika 2:7, 8.
15 ʼI te ʼu fono ʼo te vāhaʼa fuli, ʼe maʼu e te ʼu kaugana ʼa Sehova te ako ʼaē ʼe ʼaoga kiā nātou pea mo te fakaloto mālohi ʼi tonatou ʼuhiga Fakamoʼoni agatonu ʼa Sehova. (Hepeleo 10:24, 25) Ko te Ako Faka Teokalatike ʼe ina akoʼi tatou ke tou popoto ʼi te palalau ʼi muʼa ʼo te kaugamālie, pea ko te Fono Gāue ʼe tokoni mai ki tatatou faka mafola ia te logo lelei. Kae ʼaki tatatou kau ki te ʼu fono pea mo tatatou ako takitokotahi ʼo te ʼu tohi faka Tohi-Tapu, ʼe tou sio ai ki te laumālie ʼo Sehova, tana takitaki tana kautahi. ʼAki te ʼu fakatuʼutuʼu ʼaia, ko te ʼAtua ʼe ina fakatokagaʼi tuʼumaʼu tatou ʼo ʼuhiga mo te ʼu tuʼutāmaki, mo ina akoʼi tatou ke tou liliu ko he ʼu minisi faiva, pea mo tokoni mai ke tou nonofo ʼalaʼala tuʼumaʼu ʼi te faʼahi fakalaumālie.—Pesalemo 19:7, 8, 11; 1 Tesalonika 5:6, 11; 1 Timoteo 4:13.
Te Tupuʼaga ʼAē ʼe Ina Uga Tatou Ki Te Papitema
16. Koteā ʼaē ʼe ina uga tatou ke tou foaki totatou maʼuli kiā Sehova?
16 Ko te ʼu fehuʼi e lua ʼaē ʼe fai kiā nātou ʼe ʼamanaki papitema, ʼe ina fakamanatuʼi age te maʼuhiga ʼo te papitema ʼi te vai pea mo te ʼu maʼua ʼaē ʼe pipiki kiai. Koteā ʼaē ʼe ina uga nātou ke nātou papitema? ʼE tou liliu ko he ʼu tisipulo neʼe papitemaʼi, ʼe mole ʼuhi he neʼe fakakinauʼi tatou e he tahi, kae ʼe tupu heʼe ko Sehova ʼaē ʼe ina “taki” mai tatou kiā te ia. (Soane 6:44) Mai tona ʼaluʼaga ʼaē ko “te ʼAtua ʼe ʼofa,” ʼe ina puleʼi ia te ʼatulaulau ʼaki te ʼofa, kae mole ina fai ʼaki he taki fakakinau. (1 Soane 4:8, MN )ʼE tou fia tauhi kiā Sehova ʼuhi ko tona ʼu kalitātē pea mo tana faʼahiga tokaga ʼaē kiā tatou. Neʼe momoli mai e Sehova tona ʼAlo ulu tokotahi, pea mo ina fakapapauʼi mai ia te ka haʼu ʼe taulekaleka ʼaupito. (Soane 3:16) Moʼo fakafetaʼi ki te ʼu faʼahi ʼaia, ʼe tou fia foaki totatou maʼuli kiā te ia.—Tāʼaga Lea 3:9; 2 Kolonito 5:14, 15.
17. Ko ai ʼaē neʼe tou foaki ki ai totatou maʼuli?
17 ʼE mole tou foaki totatou maʼuli ki he manatu ʼe faka maʼuhigaʼi e te hahaʼi, peʼe ki he gāue ʼe nātou lagolago kātoa kiai, kae ʼe tou foaki kiā Sehova totonu. Ko te ʼu gāue ʼaē ʼe foaki e te ʼAtua ki tana hahaʼi ʼe feala ke fetogitogi, kae ko tanatou mōlaga kiā te ia, ʼe mole fetogi anai ia. Ohage la, ko te gāue ʼaē neʼe ina fakatotonu age kiā Apalahamo neʼe mole tatau ia mo te gāue ʼaē neʼe ina fakatotonu age kiā Selemia. (Senesi 13:17, 18; Selemia 1:6, 7) Kae ko nāua toko lua neʼe nā tahi fakahoko tanā ʼu gāue ʼaia neʼe tuku age e te ʼAtua, he neʼe nā ʼoʼofa kiā Sehova pea neʼe nā fia nonofo agatonu ʼo fai tona finegalo. Lolotoga te temi fakaʼosi ʼaenī, ko te kau tisipulo fuli ʼa Kilisito ʼaē neʼe papitema ʼe nātou faiga ke nātou fakalogo ki te fakatotonu ʼa Kilisito ʼaē ke nātou faka mafola ia te logo lelei ʼo te Puleʼaga pea mo fai ʼo ni ʼu tisipulo. (Mateo 24:14; 28:19, 20) Ko te fai ʼo te maʼua ʼaia ʼaki totatou loto kātoa, ʼe ko he faʼahi lelei ʼaia moʼo fakahā tatatou ʼofa ki totatou Tāmai ʼaē ʼe ʼi selo pea kua foaki moʼoni totatou maʼuli kiā te ia.—1 Soane 5:3.
18, 19. (a) Koteā ʼaē ʼe tou fakahā ki te kaugamālie ʼi te temi ʼaē ʼe tou papitema ai? (b) Koteā ʼaē ka tou vakaʼi anai ʼi te alatike ʼaē ka hoa mai?
18 ʼE mahino mai, ʼaki ia te papitema ʼe lahi anai ia te ʼu tapuakina ʼaē ka tou maʼu, koia ʼe ko he faʼahi ʼe tonu ke tou fakakaukauʼi lelei. (Luka 14:26-33) ʼE tou fakahā ʼi tatatou papitema, kua tou fakatotonu ke tou fakamuʼamuʼa te Puleʼaga iā meʼa fuli. (Luka 9:62) Ka tou papitema, ʼe tou fakahā moʼoni ki te kaugamālie: “Ko te ʼAtua ʼaia ʼe ko totatou ʼAtua ʼo aʼu ki he ʼu temi ʼe mole ʼiloʼi hona gataʼaga, ei, ʼo talu ai. Ko ia ʼaē ka ina taki anai tatou ʼo aʼu ki totatou mate.”—Pesalemo 48:14.
19 ʼE tou vakaʼi anai ʼi te alatike ʼaē ka hoa mai ia te tahi ʼu fehuʼi ʼe pipiki ki te papitema. ʼE feala koa ke ʼi ai ni ʼu tupuʼaga ʼe lelei, ke takuʼaki e he tahi tana mole fia papitema? Te taʼu tupu, ʼe ko he potu koa ʼe tonu ke tou tāʼofi? E feafeaʼi kiā tatou hatatou lagolago ki te toʼotoʼaga maʼuhiga ʼaia?
ʼE Feala Koa Hakotou Fakamahino?
● He koʼe ʼe tonu ki te kau Kilisitiano ke nātou fakahemala ʼi muʼa ʼo tonatou papitema?
● ʼE hoko feafeaʼi te foaki ʼo tota maʼuli ki te ʼAtua?
● Ko te ʼu maʼua fea ʼaē ʼe pipiki ki te pilivilesio ʼaē ʼo te fua ʼo te huafa ʼo Sehova?
● Koteā ʼaē ʼe tonu ke ina uga tatou ke tou fia papitema?
[Fehuʼi]
[Talanoa ʼo te pasina 22]
TE ʼU FEHUʼI E LUA ʼAĒ ʼE FAI ʼI TE ʼAHO ʼO TE PAPITEMA
ʼO fakatafito ki te sākilifisio ʼo Sesu Kilisito, kua koutou fakahemala koa ki takotou ʼu agahala pea kua koutou momoli koa tokotou maʼuli kiā Sehova moʼo fai tona finegalo?
ʼE mahino koa kiā koutou, ʼi takotou foaki tokotou maʼuli ki te ʼAtua pea mo tokotou papitema, ʼe koutou fakahā ko koutou ko he kau Fakamoʼoni ʼa Sehova, pea ʼe koutou fakatahi mo te kautahi fakaʼatua, ʼaē ʼe takitaki e te laumālie maʼoniʼoni?
[Paki ʼo te pasina 23]
Ko te foaki ʼo tota maʼuli, ʼe ko he fakapapau ʼe kita fai kiā Sehova ʼi te faikole
[Paki ʼo te pasina 25]
ʼE tou fakahā ʼi tatatou fai faka mafola kua tou foaki totatou maʼuli ki te ʼAtua