Te ʼu Fehuʼi ʼa Te Kau Lautohi
Te ʼu Fehuʼi ʼa Te Kau Lautohi
Koteā te ako ʼaē ʼe tou tāʼofi ʼi te tapu ʼaenī ʼe tuʼu iā Ekesote 23:19: “ ʼE mole tonu anai ke ke fakamoho he ʼuhiʼi tao ʼi te huʼa pipi ʼo tana faʼē”?
Ko te fakatotonu ʼaia ʼaē ʼe ʼasi tuʼa tolu ʼi te Tohi-Tapu ʼi te Lao ʼa Moisese, ʼe lava ʼaoga kiā tatou ke tou mahino ki te meʼa ʼaē ʼe tāu mo feʼauga kiā mata ʼo Sehova, mo tona manavaʼofa, pea mo tana aga fakapelepele. ʼE toe ʼiloga ʼi te fakatotonu ʼaia tana fehiʼa ki te tauhi hala.—Ekesote 34:26; Teutalonome 14:21.
Ko te fakamoho ʼo te ʼuhiʼi tao peʼe ko he tahi age manu ʼi te huʼa pipi ʼo tana faʼē, ʼe fakafeagai ki te faʼahiga fakaʼaogaʼi ʼo te ʼu meʼa ʼaē neʼe fakatupu e Sehova. Neʼe foaki e te ʼAtua ia te huʼa pipi ʼo te tao fafine moʼo fafaga ʼo tona kiʼi ʼuhi, heʼe ʼaoga ki tana tuputupu. ʼE ʼui e te tagata poto, ko te fakamoho ʼo he ʼuhiʼi tao ʼi te huʼa pipi ʼo tana faʼē, ʼe “mole ko he fakaʼapaʼapa ʼaia ki te felogoi ʼaē neʼe fakatuʼutuʼu pea mo tapuakina e te ʼAtua ʼo ʼuhiga mo he tao fafine pea mo tona kiʼi ʼuhi.”
Pea tahi ʼaē meʼa, ʼe lau e ʼihi hahaʼi ko te fakamoho ʼo he ʼuhiʼi tao ʼi te huʼa pipi ʼo tana faʼē neʼe lagi ko he toʼotoʼoga faka pagani moʼo fakatō te ʼua. Kapau koia ʼaia, pea neʼe lagi fakatuʼu te tapu ʼaia moʼo puipui ia te kau Iselaele mai te ʼu toʼotoʼoga faka pagani pea mo fakalialia ʼo te ʼu puleʼaga ʼi te ʼu tafaʼaki ʼo nātou. Neʼe tapuʼi fakahagatonu ʼi te Lao ʼa Moisese ki te kau Iselaele ke mole nātou mulimuli ki te ʼu lao ʼo te ʼu puleʼaga ʼaia.—Levitike 20:23.
ʼE fakahā tāfito ʼi te lao ʼaenī ia te manavaʼofa lahi ʼo Sehova. Neʼe lahi te ʼu lao neʼe tapuʼi ai te fai ʼo he ʼu aga fakalialia ki te ʼu manu pea mo te ʼu fai tokoni ke ʼaua naʼa nātou fai he ʼu aga ʼe mole tuha mo te aga ʼaē ʼe tonu ke fai. Ohage la, ʼi te Lao neʼe tapuʼi ia te sākilifisioʼi ʼo he manu neʼe mole heʼeki ʼaho fitu tana nofo mo tana faʼē, mo te matehi fakatahi ʼo he manu mo tona ʼuhi ʼi te ʼaho e tahi, peʼe ko te matehi ʼi he fātaʼi ia he manu lele mo tona ʼu foʼi moa, peʼe ko tona ʼu kiʼi ʼuhi.—Levitike 22:27, 28; Teutalonome 22:6, 7.
ʼE mahino mai, ko te Lao neʼe mole ko he fakatuʼutuʼu pe ʼo he ʼu fakatotonu pea mo he ʼu tapu. ʼI te ʼu lelei ʼaē ʼe maʼu ʼi te Lao, ʼe ʼi ai tona ʼu pelesepeto moʼo akoʼi mai kiā tatou ia te ʼu aga ʼaē ʼe tonu ke fai, pea ʼe fakatātā lelei e te ʼu pelesepeto ʼaia ia te ʼu kalitātē fakaofoofo ʼa Sehova.—Pesalemo 19:7-11.
[Haʼuʼaga ʼo te paki pasina 31]
© Timothy O’Keefe/Index Stock Imagery