Te ʼu Tēhina Foʼou ʼi Te Kolesi Pule
Te ʼu Tēhina Foʼou ʼi Te Kolesi Pule
ʼI TE Feliafā uhu ʼo te ʼaho 24 ʼo ʼAukusitō 2005, neʼe maʼu te logo fakafiafia ʼi te televisio ʼi te Petele ʼaē ʼo Amelika pea mo ʼaē ʼo Kanata. ʼI te ʼaho 1 ʼo Sepetepeli 2005, neʼe fakahū ki te Kolesi Pule ʼa te kau Fakamoʼoni ʼa Sehova ia te ʼu tēhina e toko lua: ko Geoffrey W. Jackson pea mo Anthony Morris 3.
Neʼe kamata te selevisi pionie ʼa te Tēhina ko Jackson ʼi te māhina ʼo Fepualio 1971, ʼi Tasmanie, ʼi Ositalalia. ʼI te māhina ʼo Sūnio 1974, neʼe ʼohoana mo Jeanette (Jenny). Mole faʼa fualoa kiai, neʼe hinoʼi nāua ke nā pionie makehe. Mai te taʼu 1979 ʼo aʼu ki te taʼu 2003, neʼe nā gāue misionea ʼi te ʼu motu ʼo te Pasifika: ko Tuvalu, Haʼamoa pea mo Fisi. ʼI tanā selevisi ʼi te ʼu motu ʼaia, ko te Tēhina pea mo te Tuagaʼane Jackson neʼe nā toe kau ki te gāue lahi ʼaē ko te fakaliliu ʼo te ʼu tohi faka Tohi-Tapu. ʼI te kamata ʼo te taʼu 1992, neʼe gāue te Tēhina ko Jackson ʼi te Filiale ʼo Haʼamoa, pea ʼi te taʼu 1996 ʼi te Filiale ʼo Fisi. ʼI te māhina ʼo ʼApelili 2003, ko ia pea mo Jenny neʼe nā kau ki te famili ʼo te Petele ʼi Amelika pea neʼe nā kau ki te Selevisi ʼo Te Fai Fakaliliu. Mole faʼa fualoa kiai, neʼe tokoni te Tēhina ko Jackson ki te Komite Faiako ʼo te Kolesi Pule.
ʼO feiā mo te Tēhina ko Morris neʼe kamata tana selevisi ʼi te taʼu 1971 ʼi Amelika. ʼI Tesepeli ʼo te taʼu ʼaia, neʼe ʼohoana mo Susan, pea neʼe nā hoko atu tanā selevisi pionie iā teitei taʼu e 4, ʼo aʼu ki te tupu ʼo tanā ʼuluaki tama ko Jesse. Ki muli age, neʼe tupu tanā tahi tama ko Paul. Pea ʼi te taʼu 1979, neʼe toe toʼo e te Tēhina ko Morris ia tana selevisi pionie temi kātoa. ʼI te hū ako ʼa te ʼu tama, neʼe toe kau mo tona ʼohoana ki te selevisi. Neʼe lagolago te famili ki te gāue ʼaē neʼe fai ʼi te ʼu koga meʼa ʼaē neʼe lahi ai te gāue, ohage ko te motu ʼo Rhode pea mo Caroline du Nord, ʼi Amelika. ʼI Caroline du Nord, neʼe fai e te Tēhina ko Morris te gāue ʼa te taupau faka siliko, pea neʼe kau tona ʼu foha ki te selevisi pionie. Pea ʼi te ʼu taʼu 19 ʼo Jesse pea mo Paulo, neʼe fakaafe nāua ki te Petele ʼi Amelika. ʼI te temi ʼaia, neʼe kamata ai te gāue faka siliko ʼa te Tēhina ko Morris. Ki muli age, ʼi te taʼu 2002, neʼe fakaafe ia ia pea mo Susan ke nā gāue ʼi te Petele, ʼo nā kamata ʼi te ʼuluaki ʼaho ʼo te māhina ʼo ʼAukusitō. Neʼe gāue te Tēhina ko Morris ʼi te Selevisi Gāue ʼi Patterson, pea ki muli age neʼe tokoni ki te Komite Gāue ʼo te Kolesi Pule.
ʼO fakatahiʼi te ʼu tēhina foʼou ʼaia ki te Kolesi Pule ʼaē ʼe kau ki ai ia: C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; pea mo D. Sydlik. Ko te ʼu tēhina fuli ʼo te Kolesi Pule ʼe ko te ʼu Kilisitiano fakanofo.