Tou Fakamamaʼo Mai Te Tauhi Hala

“ ‘Koutou mavae mai te lotolotoiga ʼo nātou, pea ke koutou mavae kehe mai ai,’ ko te ʼui ʼaia ʼa Sehova, ‘pea ʼaua naʼa koutou fāfā ki te meʼa ʼaē ʼe heʼemaʼa.’ ”—2 Kolonito 6:​17, MN.

1. E feafeaʼi te maʼuli fakalaumālie ʼo te hahaʼi ʼaē ʼe nātou fia tauhi fakamalotoloto ki te ʼAtua?

 TOKOLAHI te hahaʼi ʼe nātou fia tauhi fakamalotoloto ki te ʼAtua, kae ʼe mole nātou ʼiloʼi ia te moʼoni ʼo ʼuhiga mo te ʼAtua pea mo te ka haʼu ʼo te malamanei. Koia ʼe nātou nonofo ai ʼi te fakapōʼuli pea mo te lotolotolua, ʼi tanatou mole maʼu ia te ʼu tali ʼo ʼuhiga mo te ʼu faʼahi maʼuhiga ʼaia. Ko te toko lauʼi miliona hahaʼi ʼe nātou kaugana ki te ʼu meʼa fai fakalauʼakau, mo te ʼu toʼotoʼoga faka temonio, pea mo te ʼu fakafiafia ʼaē ʼe fakafeagai ki totatou Tupuʼaga. Lagi, ʼe faka tui ia te hahaʼi ʼo tokotou telituale pea mo tokotou ʼu kāiga ki te ʼifeli, ki te Tahitolu Tapu, mo te nefesi tuputupua, pea mo he tahi age ʼu akonaki hala.

2. Koteā ʼaē neʼe fai e te kau takitaki lotu, pea koteā tona fua?

 ² Ko ai koa ʼaē ʼe tupu ai te mafola ʼo te fakapōʼuli fakalaumālie? ʼE koutou punamaʼuli anai ki te tali ʼo ʼuhiga mo te fehuʼi ʼaia, kae ʼe tupu te mafola ʼo te fakapōʼuli fakalaumālie, heʼe ko te ʼu lotu​—te ʼu kautahi faka lotu faka malamanei pea mo tonatou ʼu takitaki, ʼaē ʼe nātou faka mafola ia te ʼu akonaki ʼe fakafeagai ki te ʼu manatu ʼa te ʼAtua. (Maleko 7:​7, 8) Koia, neʼe hēhē ai ia te tokolahi ʼo te hahaʼi, ʼo nātou tui ʼe nātou tauhi ki te ʼAtua moʼoni, kae ʼi tona fakahagatonu ʼe nātou fakafeagai kiā te ia. ʼE fakaʼofaʼofa nei ia te malamanei ʼi te faʼahi fakalaumālie ʼuhi ko te ʼu lotu hala.

3. Ko ai ʼaē ʼe ina puleʼi ia te ʼu lotu hala, pea koteā te fakamatala ʼaē ʼe fai ʼi te Tohi-Tapu ʼo ʼuhiga mo ia?

³ Ko te ʼu lotu hala ʼe puleʼi e te laumālie fakapulipuli. Pea ʼo ʼuhiga mo te laumālie ʼaia, neʼe ʼui fēnei e te ʼapositolo ko Paulo: “[Ko] te ʼatua ʼo te tuʼu ʼo te ʼu faʼahiga meʼa ʼaenī [neʼe] ina fakakiviʼi ia te ʼatamai ʼo nātou ʼaē ʼe mole tui, ke ʼaua naʼa faka mālamagia nātou e te mālama gigila ʼo te logo lelei faka kolōlia ʼo ʼuhiga mo Kilisito, ʼaē ko te pāki ʼo te ʼAtua.” (2 Kolonito 4:​4, MN ) ʼE ko Satana te Tevolo ia “te ʼatua ʼo te tuʼu ʼo te ʼu faʼahiga meʼa ʼaenī.” Ko ia ʼaē ʼe ina puleʼi ia te ʼu lotu hala. Neʼe tohi fēnei e Paulo: “Ko Satana totonu ʼe ina fakaliliu tuʼumaʼu pe ia ia ko he ʼāselo ʼo te mālama. Koia ʼe mole ko he meʼa fakapunamaʼuli mo kapau ko tana kau minisi ʼe nātou fakaliliu tuʼumaʼu aipe ia nātou ko he ʼu minisi ʼo te faitotonu.” (2 Kolonito 11:​14, 15, MN ) Moʼo fakahalaʼi te hahaʼi ke nātou tui ki tana ʼu loi, ʼe faiga e Satana ke hage te meʼa ʼaē ʼe kovi ʼe ko he meʼa ʼe lelei.

4. Koteā ʼaē neʼe ʼui ʼi te Lao ʼa te ʼAtua ki te Iselaele ʼāfea ʼo’ uhiga mo te kau polofeta loi?

⁴ ʼE tauteaʼi mālohi te lotu hala ʼi te Tohi-Tapu! Ohage la, ʼi te Lao ʼa Moisese, neʼe fakatokaga lelei ki te ʼu kaugana ʼa te ʼAtua ke nātou fakafeagaiʼi ki te kau polofeta loi. Ko he tahi neʼe lagolago ki te ʼu akonaki hala pea mo tauhi ki te ʼu ʼatua loi, neʼe tonu ke ‘matehi he neʼe fakafeagai kiā Sehova.’ Neʼe fakatotonu ki te kau Iselaele ke nātou ‘toʼo te meʼa ʼaē ʼe kovi ʼaē neʼe ʼi te lotolotoiga ʼo nātou.’ (Teutalonome 13:​1-5) Ko Sehova ʼe fakafeagai ʼaupito ki te ʼu lotu hala.​—Esekiele 13:⁠3.

5. Ko te ʼu fakatokaga fea ʼaē ʼe tonu ke tou tokagaʼi iā ʼaho nei?

⁵ Ko Sesu Kilisito pea mo tana kau ʼapositolo neʼe nātou fakahā lelei te manatu ʼa Sehova ʼo ʼuhiga mo te ʼu lotu hala. Neʼe fakatokagaʼi fēnei e Sesu tana ʼu tisipulo: “Koutou tokaga ki te kau polofeta lohi, e natou omai kia koutou mo onatou kofu fakaʼakeno, kae ko he u lupo kaikai i onatou loto.” (Mateo 7:15; Maleko 13:​22, 23) Neʼe tohi fēnei e Paulo: “ ʼE haʼu te hāūhāū ʼa te Atua mai te lagi ki te hahaʼi aga heʼe lotu pea mo heʼe faitotonu ʼaē ʼe nātou taʼomia ia te moʼoni ʼaki te loi.” (Loma 1:​18, MN ) ʼE tonu ki te kau Kilisitiano moʼoni, ke nātou tokagaʼi ia te ʼu fakatokaga ʼaenī pea mo nātou fakamamaʼo mai he tahi ʼe ina fufū ia te moʼoni ʼo te Folafola ʼa te ʼAtua, peʼe ina faka mafola he ʼu akonaki loi!​—1 Soane 4:⁠1.

Koutou Hola Mai Ia “Papiloni Lahi”

6. Koteā te fakamatalatala ʼaē ʼe fai ʼi te Tohi-Tapu ʼo ʼuhiga mo “Papiloni Lahi”?

⁶ Koutou tokagaʼi pe koteā ia te fakamatala ʼaē ʼe fai ʼi te tohi ʼo Apokalipesi  ʼo ʼuhiga mo te lotu hala. ʼE ina fakatātā ia te lotu hala ki he fafine paomutu ʼe konahia, pea ʼe ina puleʼi te ʼu tuʼuga puleʼaga pea mo tonatou hahaʼi. Ko te fafine fakatātā ʼaia ʼe fai folonikasio mo te ʼu hau, pea ʼe konahia ʼi te toto ʼo te kau atolasio moʼoni ʼa te ʼAtua. (Apokalipesi 17:​1, 2, 6, 18) Ko te higoa ʼaē ʼe tohi ʼi tona laʼe ʼe ina fakatātā tana aga heʼeʼaoga pea mo aga fakalialia. Ko tona higoa ʼe ko “Papiloni Lahi, te faʼē ʼa te kau fafine paomutu pea mo te ʼu meʼa fakalialia ʼo te kele.”​—Apokalipesi 17:​5, MN.

7, 8. Neʼe folonikasio feafeaʼi ia te fafine paomutu, pea koteā tona ʼu fua?

⁷ Ko te fakamatala ʼaē ʼe maʼu ʼi te Tohi-Tapu ʼo ʼuhiga mo Papiloni Lahi, ʼe ʼalutahi mo te ʼu agaaga ʼo te ʼu lotu hala fuli ʼo te malamanei. Logola te mole logo tahi ʼa te ʼu lotu ʼe lauʼi afe ʼi he foʼi kautahi faka malamanei, kae ʼe nātou logo tahi ʼi tanatou ʼu fakatuʼutuʼu pea mo tanatou ʼu gāue. Ohage ko tona fakatātā ki he fafine paomutu ʼi te tohi ʼo Apokalipesi, ko te lotu hala ʼe ina puleʼi mālohi ia te ʼu puleʼaga. ʼE fakatatau ia te lotu hala ki he fafine ʼe heʼe agatonu ki te ʼu fakapapau ʼo te nofo ʼohoana, he neʼe fai fuakava ohage ʼe folonikasio mo te ʼu puleʼaga faka politike. Neʼe tohi fēnei e Sakopo: “Kau fafine tono, ʼe mole koutou ʼiloʼi koa la ko te ʼofa ki te malamanei ʼe ko he fehiʼa ia ki te ʼAtua? Ko ʼaē ʼe fia kaumeʼa mo te malamanei ʼe liliu ia ko he fili ʼo te ʼAtua.”​—Sakopo 4:​4, MN.

⁸ ʼI te fakatahi ʼaia ʼa te lotu pea mo te ʼu puleʼaga, neʼe tupu ai te maʼuli mamahi ʼa te malamanei. Ko te polofesea sivi politike Afelika ko Xolela Mangcu neʼe ina ʼui fēnei: “Neʼe lahi te kau mātea ʼi te hisitolia ʼo te tagata, ʼuhi pe ko te fakatahiʼi ʼa te lotu pea mo te kau fai politike.” Mole heʼeki faʼa fualoa, neʼe ʼui fēnei ʼi te sulunale: “Iā ʼaho nei, ko te ʼu tokakovi ʼaē neʼe lahi ai te kau mate pea mo fakamataku ʼaupito . . . neʼe hoko ʼuhi ko te lotu.” Ko te ʼu lauʼi miliona hahaʼi neʼe mamate ʼi te ʼu tau faka lotu. Neʼe toe ligi toto ia Papiloni Lahi, ʼi tana fakatagaʼi pea mo matematehi ia te ʼu kaugana ʼa te ʼAtua.​—Apokalipesi 18:⁠24.

9. ʼE ʼasi feafeaʼi ʼi te tohi ʼo Apokalipesi ia te fehiʼa ʼa Sehova ki te lotu hala?

⁹ ʼE hā lelei te fehiʼa ʼa Sehova ki te lotu hala ʼi te meʼa ʼaē ka hoko anai kiā Papiloni Lahi. ʼE ʼui fēnei iā Apokalipesi 17:16 (MN ): “Ko te ʼu tala e hogofulu ʼaē neʼe ke sio kiai, pea mo te manu fekai, ko nātou ʼaia ʼe nātou fēhihiʼa anai ki te fafine paomutu pea ʼe nātou fakaliliu anai ia ia ʼo maumau pea mo telefua, pea ʼe nātou kai anai tona ʼu kakano pea mo nātou tutu kātoa anai.” ʼUluaki, ʼe matehi anai ia e he manu fekai lahi ʼo ina kai tona sino. Pea ko te ʼu koga ʼo tona sino ʼaē ka toe, ʼe tutu kātoa anai. Koia ko te ʼu puleʼaga ʼo te malamanei ʼe nātou fakaʼauha feiā anai ia te lotu hala, heʼe ʼeke anai nātou e te ʼAtua ke nātou fai ia te faʼahi ʼaia. (Apokalipesi 17:17) Kua tonu ke fakaʼauha ia Papiloni Lahi, ia te kautahi ʼo te ʼu lotu hala. “ ʼE mole toe maʼu anai ia ia ʼi he ʼaho.”​—Apokalipesi 18:​21, MN.

10. ʼE tonu ke tou feafeaʼi ʼo ʼuhiga mo te lotu hala?

 ¹⁰ ʼE tonu ke feafeaʼi te kau atolasio moʼoni ʼo ʼuhiga mo Papiloni Lahi? ʼE tala fakahagatonu mai ʼi te Tohi-Tapu: “Koutou mavae mai ia te ia, e taku hahaʼi, mo kapau ʼe mole koutou fia kau mo ia ki tana ʼu agahala, pea mo kapau ʼe mole koutou fia maʼu he vahe ʼo tona ʼu tautea.” (Apokalipesi 18:​4, MN ) Ko nātou ʼaē ʼe fia hāo ʼi te ʼaho ʼaia, ʼe tonu ke nātou mavae mai te lotu hala ʼi muʼa ʼo tona tauteaʼi. ʼI te kei nofo ʼa Sesu Kilisito ʼi te kele, neʼe ina fakakikite, tokolahi ʼi te ʼu ʼaho fakamuli ʼe nātou ʼui anai neʼe nātou fakalogo kiā te ia. (Mateo 24:​3-5) Kae kiā nātou ʼaia, ʼe ina ʼui age anai: “Neʼe heʼeki au ʼiloʼi au ia koutou! Koutou fakamamaʼo atu ia te au, ia koutou ʼaē ʼe gāue ohage ko he ʼu tagata ʼe nātou manuki ki te lao.” (Mateo 7:​23, MN ) Ko te Hau ko Sesu Kilisito ʼaē kua fakanofo nei ʼi selo, ʼe fakafeagai ki te lotu hala.

E Feafeaʼi Hatatou Fakamamaʼo Mai Te Lotu Hala?

11. Koteā ʼaē ʼe tonu ke tou fai moʼo fakamamaʼo mai te lotu hala?

¹¹ Ko te kau Kilisitiano moʼoni ʼe nātou fakamamaʼo mai te lotu hala, ʼo nātou fakafeagai ki te ʼu akonaki ʼa te lotu hala. Ko tona faka ʼuhiga ʼe mole tou fakalogo anai ni ʼu polokalama faka lotu ʼi te lātio peʼe sioʼi ʼi te televisio, pea ʼe mole tou lau anai he ʼu tohi faka lotu ʼe talanoa ai ki ni ʼu loi ʼo ʼuhiga mo te ʼAtua pea mo tana Folafola. (Pesalemo 119:37) ʼE tou toe aga fakapotopoto anai mo kapau ʼe mole tou lagolago ki ni ʼu gāue faka sosiale pea mo he ʼu fakafiafia ʼe pipiki ki he kautahi ʼe kaugā gāue mo te lotu hala. Tahi ʼaē meʼa, ʼe mole tou lagolago ki he meʼa ʼe pipiki ki te tauhi hala. (1 Kolonito 10:21) Kapau ʼe tou fakamamaʼo mai te ʼu meʼa ʼaia, pea ʼe mole tou tō anai ki “he hele, ʼaki te filosofia pea mo te ʼu kākā ʼaē ʼe vaʼiganoa, ʼo mulimuli ki te talatuku fakatagata, ʼo mulimuli ki te ʼu meʼa tāfito ʼo te malamanei, kae mole mulimuli kiā Kilisito.”​—Kolose 2:​8, MN.

12. Koteā ʼaē ʼe tonu ke fai e he tahi ʼe fia ʼāteaina mai te kautahi faka lotu hala?

¹² Kapau ʼe fia liliu he tahi ko he Fakamoʼoni ʼa Sehova kae ʼe kei tuʼu tona higoa ʼi te lotu hala, koteā anai ʼaē ka ina fai? ʼI te agamāhani, ʼe ina fai hana tohi moʼo fakahā tana mavae ʼi tana lotu, ʼo fakamoʼoni ʼe mole kei fia kau ki te lotu hala. ʼE maʼuhiga tāfito kiā ia ke ʼiloga lelei tana mole kei tali he faʼahiga kākā fakalaumālie mai te tauhi hala. Ko te ʼu meʼa ʼaē ka ina fai, ʼe ʼiloga ai tana fia liliu ko he Fakamoʼoni, ʼe ina fakahā lelei ai ki te kautahi faka lotu pea mo tona kau takitaki lotu, tana mole kei fia mulimuli ki te lotu ʼaia.

13. Ko te tokoni fea ʼaē ʼe fai mai ʼi te Tohi-Tapu ʼo ʼuhiga mo te lotu hala?

¹³ Neʼe tohi fēnei e te ʼapositolo ko Paulo: “ ʼAua naʼa koutou kaugā ʼamo fakatahi mo te hahaʼi ʼaē ʼe mole tui. Koteʼuhi, ʼe fakatahi feafeaʼi te faitotonu pea mo te meʼa noaʼi ʼo te lao? Peʼe feafeaʼi te felogoi ʼa te mālama pea mo te fakapōʼuli? Pea ʼe felogoi feafeaʼi ia Kilisito pea mo Peliale? Peʼe ko te vahe fea ʼaē ʼe fakatahi ai te tagata tui mo ʼaē ʼe mole tui? E feafeaʼi he felogoi ʼo te fale lotu ʼo te ʼAtua pea mo te ʼu tamapua? . . . ‘Koia ke koutou mavae mai te lotolotoiga ʼo nātou, pea ke koutou mavae kehe mai ai,’ ko te ʼui ʼaia ʼa Sehova, ‘pea ʼaua naʼa koutou fāfā ki te meʼa ʼaē ʼe heʼemaʼa.’ ” (2 Kolonito 6:​14-17, MN ) ʼE tou fakalogo anai ki te ʼu tokoni ʼaenī mo kapau ʼe tou fakamamaʼo mai te tauhi hala. Ko te tokoni ʼa Paulo ʼe ina fakamaʼua koa ke mole tou toe felogoi mo te hahaʼi ʼaē ʼe tauhi ki te lotu hala?

“Koutou Haga Haʼele ʼi Te Fakapotopoto”

14. ʼE tonu koa ke mole tou toe felogoi mo te hahaʼi ʼaē ʼe kau ki te tauhi hala? Koutou fakamahino.

¹⁴ ʼE tonu koa ki te kau atolasio moʼoni ke mole nātou toe felogoi mo te hahaʼi ʼaē ʼe kau ki te tauhi hala? ʼE tonu koa ke tou fakamamaʼo mai te hahaʼi ʼaē ʼe mole tauhi tahi mo tatou? Kailoa ia. ʼE ʼui fēnei ʼi te lua fakatotonu ʼi te ʼu fakatotonu lahi ʼaē e lua: “ ʼE tonu ke ke ʼofa ki tou kāiga ohage pe kiā koe totonu.” (Mateo 22:​39, MN ) ʼE mahino ia, ʼe tou fakahā totatou ʼofa ki te hahaʼi ʼi tatatou faka  mafola kiā nātou ia te logo lelei ʼo te Puleʼaga. ʼE tou toe ʼoʼofa kiā nātou mokā tou ako te Tohi-Tapu mo nātou pea mo tokoni kiā nātou ke nātou fakamamaʼo mai te tauhi hala.

15. Koteā te faka ʼuhiga ʼo te ʼui ʼaē ʼe “mole [tou] kau ʼi te malamanei”?

¹⁵ Ohage ko te ʼu tisipulo ʼa Sesu, ʼe tou faka mafola ia te logo lelei ki te hahaʼi, kae “ ʼe mole [tou] kau ʼi te malamanei.” (Soane 15:​19, MN ) Ko te kupu “malamanei” ʼaē ʼe fakaʼaogaʼi ʼi henī, ʼe faka ʼuhiga ki te hahaʼi ʼaē ʼe fakafeagai ki te ʼAtua. (Efeso 4:​17-19; 1 Soane 5:19) ʼE mole tou kau ʼi te malamanei heʼe tou fakafisi ki te ʼu aga, pea mo te ʼu palalau ʼaē ʼe fakafeagai kiā Sehova. (1 Soane 2:​15-17) Tahi ʼaē meʼa, ʼo mulimuli ki te pelesepeto ʼaē ko “te ʼu fakakaugā kovi ʼe nātou fakatupu kovi ki he ʼu agamāhani ʼe lelei,” ʼe mole tou fakakaumeʼa anai mo te hahaʼi ʼaē ʼe mole mulimuli ki tatatou ʼu lēkula faka Kilisitiano. (1 Kolonito 15:​33, MN ) Ko te mole kau ki te malamanei, ʼe ko he ‘fakamamaʼo mai te ʼu aga ʼuli ʼo te mālama.’ (Sakopo 1:27) Kae ʼe mole faka ʼuhiga leva tatatou mole kau ʼi te malamanei, ʼe mole kei feala hatatou felogoi mo te hahaʼi.​—Soane 17:​15, 16; 1 Kolonito 5:​9, 10.

16, 17. ʼE tonu ke feafeaʼi te kau Kilisitiano mokā nātou felogoi mo te hahaʼi ʼaē ʼe mole nātou ʼiloʼi ia te ʼu moʼoni ʼo te Tohi-Tapu?

¹⁶ ʼE tou felogoi feafeaʼi anai mo te hahaʼi ʼaē ʼe mole nātou ʼiloʼi ia te ʼu moʼoni ʼo te Tohi-Tapu? Ki te kokelekasio ʼo Kolose, neʼe tohi fēnei e Paulo: “Koutou haga haʼele ʼi te fakapotopoto ʼo ʼuhiga mo nātou ʼaē ʼo tuʼa, ʼo koutou totogi maʼa koutou te temi faigamālie. Koutou fai ke lelei tuʼumaʼu takotou ʼu palalau pea ke konakonaʼi ʼaki te māsima, ke koutou ʼiloʼi te tali ʼaē ʼe tonu ke koutou fai ki te hahaʼi takitokotahi.” (Kolose 4:​5, 6, MN ) Neʼe faitohi fēnei ia te ʼapositolo ko Petelo: “Koutou tāpuhā ʼi tokotou ʼu loto ia Kilisito ʼaē ko te ʼAliki, koutou nonofo teuteu tuʼumaʼu moʼo tali kiā nātou ʼaē ʼe nātou fehuʼi atu te tupuʼaga ʼo takotou falala, kae koutou tali ʼaki he agamālū pea mo he fakaʼapaʼapa lahi.” (1 Petelo 3:​15, MN ) Neʼe tokoniʼi e Paulo te kau Kilisitiano ke “ ʼaua naʼa nātou laukovi ki he tahi, ke ʼaua naʼa nātou liliu ko ni ʼu hahaʼi gutu tau, ke nātou popoto, ʼo nātou fakahā he agamālū ki te tagata fuli pe.”​—Tito 3:​2, MN.

¹⁷ ʼE mole tou aga fefeka anai peʼe fia matamuʼa ki te hahaʼi, heʼe ko tatou ko te kau Fakamoʼoni ʼa Sehova. Pea ka tou palalau ʼo ʼuhiga mo te hahaʼi ʼa he tahi lotu, ʼe mole tou palalau kovi anai ʼo ʼuhiga mo nātou, kae ʼe tou aga fakaʼeteʼete anai, tatau aipe peʼe tali koviʼi peʼe leakoviʼi tatou ʼi he ʼapi, e he vāhaʼa fale, peʼe ko he kaugā gāue.​—Kolose 4:6; 2 Timoteo 2:⁠24.

Tou “Haga Taupau Maʼu Ia Te Faʼifaʼitakiʼaga ʼo Te ʼu Folafola ʼo Te Maʼuli”

18. Koteā te ʼaluʼaga fakaʼofaʼofa fakalaumālie ʼe hoko kiā nātou ʼaē ʼe toe liliu ki te tauhi hala?

¹⁸ ʼE ko he meʼa fakaʼofaʼofa ki he tahi kua mahino ki te ʼu moʼoni faka Tohi-Tapu hana toe liliu ki te tauhi hala! ʼE fakahā ʼi te Tohi-Tapu ia te ʼu fua kovi ʼo te taʼi aga ʼaia: “Heʼe kapau ʼi tanatou ʼosi hāo mai te ʼu aga ʼuli ʼo te mālama, ʼuhi ko te ʼatamai mālama totonu ʼo te ʼAliki pea mo Fakamaʼuli ko Sesu Kilisito, ʼe nātou toe tuku ke toho nātou e te ʼu meʼa ʼaia pea mo nātou tō ai, ʼe kovi age tonatou ʼaluʼaga fakaʼosi ʼi tonatou ʼaluʼaga ʼaē ʼi te kamata. . . . Kua hoko kiā nātou ia te taʼaga lea moʼoni ʼaenī: Kua liliu ia te kuli ki tona lua, pea ko te sigamanu ʼaē neʼe kua fakamaʼa [neʼe toe liliu ʼo] teka makafulifuli ʼi te pela.”​—2 Petelo 2:​20-22.

19. He koʼe ʼe maʼuhiga ke tou nonofo tōkakaga naʼa tuʼutāmaki totatou maʼuli fakalaumālie?

¹⁹ Tou nonofo tōkakaga ʼo ʼuhiga mo te ʼu faʼahi ʼaē ʼe feala ke nātou faka tuʼutāmaki totatou maʼuli fakalaumālie, heʼe feala pe ke tō ki te ʼu tuʼutāmaki ʼaia. Heʼe fakatokagaʼi fēnei tatou e te ʼapositolo ko Paulo: “ ʼE ʼui tonu e te folafola ʼaē ʼe haʼu mai te ʼAtua, ʼi te ʼu temi fakamuli, ʼe līaki anai e ʼihi tanatou tui, ʼo nātou fakalogo ki he ʼu folafola kākā mai he ʼu laumālie pea mo he ʼu akonaki ʼa te kau temonio.” (1 Timoteo 4:​1, MN ) ʼE tou māʼuʼuli nei ʼi “te u temi fakamuli.” Ko nātou ʼaē ʼe mole fakamamaʼo mai te lotu hala, ʼe feala ke “feʼāveʼaki [nātou] ʼi hē mo hē e te matagi ʼo te ʼu akonaki fuli pe, ʼaki te kākā ʼa te tagata, ʼi tanatou faiva ʼaē ʼi te faʼufaʼu ʼo te kākā.”​—Efeso 4:​13, 14, MN.

20. E feafeaʼi hatatou puipui ia tatou totonu mai te fakahala ʼa te lotu hala?

²⁰ E feafeaʼi hatatou puipui ia tatou totonu mai te fakahala ʼa te lotu hala? Tou fakaʼaogaʼi ia te ʼu puleʼaki fuli ʼaē ʼe foaki mai e Sehova, ohage la ko Tana Folafola, ia te Tohi-Tapu. (2 Timoteo 3:​16, 17)  Tahi ʼaē meʼa, ʼe foaki mai e Sehova ia te tuʼuga meʼa kai fakalaumālie ʼaki “te tagata kaugana agatonu mo poto.” (Mateo 24:​45, MN ) ʼI tatatou tuputupu ʼi te moʼoni, ʼe tonu ke tou fia ʼahiʼahiʼi ‘te meʼa kai mālohi ʼaē ʼa te hahaʼi kua fakapotopoto,’ pea mo tou fakatahi ki te ʼu faʼahi ʼaē ʼe tou ako ai ia te ʼu moʼoni fakalaumālie. (Hepeleo 5:​13, 14; Pesalemo 26:8) ʼOfa pe ke tou fakaʼaogaʼi kātoa ia te ʼu fakatuʼutuʼu ʼa Sehova, ke feala ai hatatou “haga taupau maʼu ia te faʼifaʼitakiʼaga ʼo te ʼu folafola ʼo te maʼuli.” (2 Timoteo 1:​13, MN ) Koia, ʼe tou lava fakamamaʼo mai te lotu hala.

Koteā ʼAē Neʼe Koutou Lava Tāʼofi?

● Ko ai koa ia “Papiloni Lahi”?

● Koteā ʼaē ʼe tonu ke tou fai moʼo fakamamaʼo mai te lotu hala?

● Ko te ʼu tuʼutāmaki fea ʼaē ʼe tonu ke tou tekeʼi ʼo ʼuhiga mo totatou maʼuli fakalaumālie?

[Fehuʼi]

[Paki ʼo te pasina 12]

ʼE koutou ʼiloʼi koa pe koʼe ʼe fakatātā ia “Papiloni Lahi” ki he fafine ʼe faiʼaga?

[Paki ʼo te pasina 13]

Kua tautea ia “Papiloni Lahi” ki te fakaʼauha