Te ʼu Fehuʼi ʼa Te Kau Lautohi

Ko te fakaʼiloga fea ʼaē ʼe talanoa kiai iā Apokalipesi 7:⁠3?

ʼE ʼui fēnei iā Apokalipesi 7:​1-3: “Nee au mamata kia aselo e fa nee tutuʼu ia agele e fa o te kelekele. Nee natou puke ia lau matagi e fa o te kelekele, ke aua naʼa agi te matagi ki te kelekele, pe ki te tai, pe ki he akau. Pea nee au mamata ki he tahi aselo nee hake ake i te hopoʼaga o te laʼa. Nee ina too te fakailoga o te Atua mauli. Nee kalaga leo lahi kia aselo e fa, nee foaki kia natou te malohi ki te maumauʼi o te kelekele pea mo te tai: ‘Aua tautou kapa ki te kelekele pe ki te tai, pe ki te vao akau o kaku ki te temi e osi ai taku fakailoga te u lae o te u faifekau o totatou Atua.’ ”

Kā tuku ifo anai te “lau matagi e fa” pea ʼe iku anai ki “te ahiahi lahi,” ia te fakaʼauha ʼo te ʼu lotu hala pea mo te toe ʼo te mālama agakovi ʼaenī. (Apokalipesi 7:14) Ko “[te] u kaugana a te Atua” ʼe ko te ʼu tehina fakanofo ʼo Kilisito ʼaē kei māʼuʼuli ʼi te kele. (1 Petelo 2:9) Koia, ʼe fakahā ʼi te lea faka polofeta ʼaenī, ko te fakaʼiloga ʼo te ʼu tehina ʼo Kilisito ʼe kātoa anai mokā hoko mai te mamahi lahi. Kae ko te tahi age ʼu vaega faka Tohi-Tapu ʼe natou fakahā ʼe ʼi ai te fakaʼiloga ʼuluaki, ʼe fai ki te kau fakanofo. Koia ʼaē, ʼi ʼihi temi, ʼe tou talanoa ai ki te fakaʼiloga ʼuluaki pea mo te fakaʼiloga fakaʼosi. Ko te ʼu faʼahi fea ʼaē ʼe kehekehe ai te ʼu fakaʼiloga ʼaia e lua?

Tou vakaʼi age muʼa te faka ʼuhiga ʼo te kupu “fakailoga.” ʼI te temi ʼāfea, ko he fakamaʼu neʼe ko he meʼa gāue neʼe fakaʼaogaʼi moʼo fakaʼiloga ʼo he pepa. ʼE toe faka ʼuhiga ki he meʼa fakaʼiloga. ʼI te temi ʼaia, neʼe fakamaʼu he pepa moʼo fakaʼiloga tona fakamoʼoni peʼe ko tona haʼuʼaga.​—1 Hau 21:8; Sopo 14:⁠17.

Neʼe fakatatau e Paulo ia te laumālie māʼoniʼoni ki he fakamaʼu ʼi tana ʼui ʼaenī: “Ko ia ae e ina fakamalohiʼi matou mo koutou ia Kilisito pea ko ia  ia ae e ina tuku mai kia matou te taakai lolo: e ko te Atua, iaʼia ae nee ina [fakaʼiloga] matou pea mo tuku ki omatou loto te u fakamooni o te Laumalie.” (2 Kolonito 1:​21, 22) Koia, ʼaki tona laumālie māʼoniʼoni ko Sehova ʼe ina fakanofo te kau Kilisitiano ʼaia moʼo fakamoʼoni kua natou liliu ʼaʼana.

Kae ko faʼahi ʼe lua ʼe fai ʼi te temi ʼaē ʼe fakaʼiloga ai te kau fakanofo. Ko te fakaʼiloga ʼuluaki ʼe mole tatau mo te fakaʼiloga fakaʼosi (1) ʼi tona fakatuʼutuʼu pea (2) mo te temi. Ko te fakaʼiloga ʼi tona ʼuluaki faka ʼuhiga, ʼe fai moʼo fili he tahi ke kau ki te kau Kilisitiano fakanofo. Ko te fakaʼiloga ʼi tona faka ʼuhiga fakaʼosi, ʼe fai moʼo fakamoʼoni ko ia ʼaē neʼe fili pea kua fai ki ai te fakaʼiloga kua ina fakahā kātoa tana agatonu. ʼI te fakaʼiloga fakaʼosi leva, ʼe hoki tuʼu ʼo talu ai ‘ki te laʼe’ ʼo te Kilisitiano fakanofo moʼo fakamoʼoni ʼo talu ai ko te ‘kaugana ʼo totatou ʼAtua’ neʼe agatonu pea neʼe ʼahiʼahiʼi tana tui. Ko te fakaʼiloga ʼaē ʼe talanoa kiai iā Apokalipesi kāpite 7, ʼe faka ʼuhiga ki te koga fakaʼosi ʼo te fakaʼiloga ʼaia.​—Apokalipesi 7:⁠3.

ʼO ʼuhiga mo te temi ʼo te fakaʼiloga ʼuluaki, neʼe faitohi fēnei ia te ʼapositolo ko Paulo ki te kau Kilisitiano fakanofo: “Nee koutou fagono ki te folafola o te mooni, te Evaselio o toutou haofaki, ia te ia foki nee koutou tui pea nee [fakaʼiloga] koutou aki te Laumalie-Maonioni nee fakapapau mai.” (Efeso 1:​13, 14) ʼE lahi te ʼu fakamatala ʼi te Tohi-Tapu, ko te kau Kilisitiano ʼo te ʼuluaki sēkulō neʼe fakaʼiloga atu aipē ia nātou ʼi tanatou ʼosi fagono ki te logo lelei pea mo tanatou tui kiā Kilisito. (Gaue 8:​15-17; 10:44) ʼAki tonatou fakaʼiloga ʼaia, neʼe ʼiloʼi ai kua tali ia nātou e te ʼAtua. Kae ko te ʼofa ʼaia ʼo te ʼAtua neʼe feala pē ke puli iā nātou. He koʼē ʼe feala ke puli iā nātou ia te ʼofa ʼo te ʼAtua?

Neʼe ʼui e Paulo ko te kau Kilisitiano fakanofo neʼe “fakailoga [nātou] . . . o uhiga mo te aho o te fakamauli.” (Efeso 4:30) ʼE hā mai, ʼi te ʼosi ʼo te fakaʼiloga ʼuluaki pea ʼe hili anai ni ʼu taʼu kiai, ʼe tonu anai ki te kau fakanofo ke natou nonofo agatonu, mai te temi ʼaē neʼe fakaʼiloga ai nātou ʼaki te laumālie māʼoniʼoni ʼo aʼu ki te ‘ ʼaho ʼaē kā haofaki ai nātou’ mai tonatou ʼu sino fakakakano​—ko tona faka ʼuhiga ke natou nofo agatonu ʼo aʼu ki tonatou temi mate. (Loma 8:23; Filipe 1:23; 2 Petelo 1:10) Koia neʼe hoki feala ai kiā Paulo, ʼi tana kua aʼu ki te fakaʼosi ʼo tona maʼuli, ke ina ʼui fēnei: “Kua kaku taku lele ki tona gataʼaga, pea nee au taupau te tui. Koia, kua tuku o fakalogo mai kia te au te kolona o te susitisia.” (2 Timoteo 4:​6-8) ʼO oloi ki te manatu ʼaia, neʼe ʼui fēnei e Sesu ki te kōkelekāsio ʼo te kau Kilisitiano fakanofo: “Agatonu o kaku ki te mate, pea e au foaki atu anai kia te koe te kolona o te mauli.”​—Apokalipesi 2:10; 17:⁠14.

Ko te kupu “kolona” ʼe ko he tahi fakamahino ʼe vaha anai te temi ʼi te fakaʼiloga ʼuluaki pea mo te fakaʼiloga fakaʼosi. Koteā tona tupuʼaga? ʼI te temi muʼa, neʼe ko te agaʼi fenua mokā neʼe mālo he tahi ʼi te lele manavā ke fakapale ʼaki hona kolona. Ke ina maʼu te kolona, neʼe tonu ke mulimuli ki te ʼu faʼahi neʼe fakamaʼua ki te lele manavā. Neʼe tonu ke faiga mālohi ʼo lele ʼo aʼu ki te fakaʼosi. ʼO toe feiā mo te kau Kilisitiano fakanofo, hoki natou kātaki mālohi ʼo aʼu ki te fakaʼosi​—ko tona faka ʼuhiga mai te temi ʼaē neʼe fai ai kiā nātou te fakaʼiloga ʼuluaki ʼo aʼu ki te temi ʼaē kā natou maʼu ai te fakaʼiloga fakaʼosi​—ʼe fakapale anai nātou ʼaki te maʼuli tuputupua ʼi te lagi.​—Mateo 10:22; Sakopo 1:⁠12.

Ko te temi fea ʼaē kā maʼu ai anai te fakaʼiloga fakaʼosi e te toe ʼo te kau Kilisitiano fakanofo ʼaē neʼe kua natou maʼu te fakaʼiloga ʼuluaki? Ko te kau Kilisitiano fakanofo ʼaē ʼe kei māʼuʼuli ʼi te kele ʼe natou maʼu anai te fakaʼiloga ‘ ʼi ʼonatou laʼe’ ʼi muʼa ʼo te hoko mai ʼo te mamahi lahi. Ko te temi ʼaē kā tuku mai ai anai te ʼu matagi e fā ʼo te mamahi, kua fakaʼiloga kātoa anai ia te Iselaele fakalaumālie, logolā te kei māʼuʼuli ʼo te tokosiʼi ʼi te kele pea ʼe tonu ke fakaʼosi tonatou maʼuli fakakelekele.