Kotou Akoʼi Ki Te Hahaʼi Ia Te Meʼa ʼAē ʼe Akoʼi Moʼoni Mai ʼi Te Tohi-Tapu

“Kotou fai ni ʼu tisipulo ʼi te hahaʼi ʼo te ʼu fenua fuli pē, . . . ʼo kotou ako ia nātou.”—Mateo 28:19, 20, MN.

1. Koteā ʼaē ʼe tou lava ʼui ʼo ʼuhiga mo te maʼu ʼo te Tohi-Tapu?

 KO TE FOLAFOLA ʼA SEHOVA, te Tohi-Tapu, ʼe kau ki te ʼu tohi kua ʼāfea pea mo lahi ia tona tufa ʼi te mālamanei. Kua fakaliliu kiā teitei lea e 2 300 tupu. Ko te toko 90 tupu ʼi te teau ʼo te hahaʼi ʼi te kele kua natou maʼu ia te Tohi-Tapu ʼi tanatou lea.

2, 3. (a) He koʼē ʼe lahi te ʼu fakamahino kehekehe ʼo ʼuhiga mo te ʼu akonaki ʼo te Tohi-Tapu? (b) Ko te ʼu fehuʼi fea ʼaē kā tou vakaʼi anai?

² Ko te ʼu toko lauʼi miliona hahaʼi ʼe natou lau ʼi te ʼaho fuli he ʼu vaega ʼo te Tohi-Tapu. Ko ʼihi kua natou lau liuliuga ia te Tohi-Tapu mai te kamata ʼo aʼu ki te fakaʼosi. Ko te toko lauʼi afe kau takitaki lotu ʼe natou ʼui ʼe natou fakatafito tanatou ʼu akonaki ki te Tohi-Tapu kae ʼe mole natou lagolago ki te ʼu meʼa ʼaē ʼe ina akoʼi mai. ʼO hilifaki ki te ʼu fakamahino kehekehe ʼaia, ʼe toe ʼi ai foki mo te ʼu fihi ʼa te hahaʼi ʼaē ʼe natou lotu tahi. Ko ʼihi ʼe natou lotolotolua ʼo ʼuhiga mo te Tohi-Tapu, mo tona haʼuʼaga, pea mo tona ʼaoga. Tokolahi ʼe natou ʼui ʼe ko he tohi ʼe taputapu pē ia moʼo fakaʼaogaʼi ki he ʼu toʼotoʼoga, moʼo fai ni ʼu fakapapau peʼe moʼo fakamoʼoni mokā natou fakahā ia te moʼoni ʼi he fale telepinale.

³ ʼI tona fakahagatonu, ʼi te Tohi-Tapu ʼe maʼu ai te folafola mālohi ʼa te ʼAtua, peʼe ko he logo maʼa te mālamanei. (Hepeleo 4:12) Koia ʼaē ʼi totatou ʼuhiga kau Fakamoʼoni ʼa Sehova, ʼe tou fia akoʼi ki te hahaʼi ia te ʼu meʼa ʼaē ʼe akoʼi mai ʼi te Tohi-Tapu. ʼE tou fiafia ʼi tatatou fakahoko ia te fekau ʼaē neʼe foaki e Sesu Kilisito ki tana kau tisipulo, ʼi tana ʼui ʼaenī: “Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē, . . . ʼo kotou ako ia nātou.” (Mateo 28:19, 20, MN ) ʼI tatatou minisitelio, ʼe tou maʼu ai te ʼu hahaʼi ʼe fakamālotoloto, ʼe natou lotomamahi ʼuhi ko te ʼu fihi faka lotu ʼaē ʼe mafola ʼi te mālamanei. ʼE natou fia ʼiloʼi ia te moʼoni ʼo ʼuhiga mo totatou Tupuʼaga pea mo natou fia akoʼi ia te ʼu meʼa ʼaē ʼe akoʼi mai ʼi te Tohi-Tapu ʼo ʼuhiga mo te ʼaluʼaga moʼoni ʼo te maʼuli. Tou vakaʼi age muʼa te ʼu fehuʼi e tolu ʼaē ʼe lagaʼi e te tokolahi. ʼI te ʼu fehuʼi ʼaia, ʼe tou tokagaʼi anai te ʼu akonaki hala ʼaē neʼe fai e te kau takitaki lotu, pea tou vakaʼi leva te ʼu manatu ʼaē ʼe akoʼi moʼoni mai ʼi te Tohi-Tapu. Koʼenī te ʼu fehuʼi: (1) ʼE tokaga koa te ʼAtua kiā tātou? (2) He koʼē ʼe tou māʼuʼuli ʼi te kele? (3) Koteā ʼaē ʼe hoko kiā tātou mokā tou mamate?

ʼE Tokaga Koa Te ʼAtua Kiā Tātou?

4, 5. He koʼē ʼe manatu te hahaʼi ʼe mole tokaga te ʼAtua kiā tātou?

⁴ Tou kamata vakaʼi age muʼa te fehuʼi ʼaenī: ʼE tokaga koa te ʼAtua kiā tātou? ʼI meʼa fakaʼofaʼofa, heʼe tokolahi te hahaʼi ʼi tanatou manatu ʼe mole tokaga ia te ʼAtua kiā tātou. He koʼē ʼe natou manatu fēia? ʼUluaki, ʼuhi heʼe natou māʼuʼuli ʼi te mālama ʼe fonu ai te fehiʼa, te tau, pea mo te mamahi. ʼE natou manatu fēnei: ‘Kanapau lā ʼe tokaga moʼoni te ʼAtua kiā tātou, ʼe ina fakagata anai te ʼu tuʼutāmaki ʼaenī ʼe hoko.’

⁵ Ko te tahi tupuʼaga ʼo tanatou manatu ʼe mole tokaga te ʼAtua kiā tātou, ʼuhi heʼe ko te kau takitaki lotu ʼe natou lagolago ki te manatu ʼaia. Koteā ʼaē ʼe ʼui e te kau takitaki lotu ʼi te agamāhani mokā hoko he tuʼutāmaki? ʼI te temi ʼaē neʼe mamate fakaʼī ai ia te ʼu kiʼi tamaliki e toko lua ʼa te fafine ʼi te ʼala, neʼe ʼui fēnei age e tona pule takitaki lotu: “Neʼe ko te finegalo ʼo te ʼAtua. Neʼe fia fai ia te ʼAtua ki hana tahi ʼu ʼāselo e toko lua.” Kā  fai e te kau takitaki lotu hanatou ʼu palalau fēia, pea ʼe natou tukugākoviʼi tāfito ia te ʼAtua ʼo ʼuhiga mo te ʼu meʼa kovi ʼaē ʼe hoko ʼi te kele. Kae neʼe tohi fēnei e te tisipulo ko Sakopo: “Aua naa lau e he tahi moka fakahalai: ‘Kua fakahalai au e te Atua.’ Koteuhi e mole mafai e te Atua ke ina ahiahi te kovi pea e mole ina fakahalai he tahi.” (Sakopo 1:13) Ko Sehova ʼAtua ʼe mole ina fai ʼi he temi he meʼa ʼe kovi. ʼEī, “ ʼe mamaʼo te ʼAtua moʼoni ʼi te fai ʼo he meʼa ʼe kovi.”—Sopo 34:10.

6. Ko ai ʼaē ʼe ina uga te agakovi pea mo te mamahi ʼaē ʼe hoko ʼi te mālamanei?

⁶ Pea he koʼē ia ʼe lahi ʼaupitō te agakovi pea mo te mamahi? Ko tona tupuʼaga, heʼe kua lītuʼa te mālamanei ki te Takitaki ʼa te ʼAtua, ʼo mole natou fia fakalogo ki tana ʼu lao faitotonu pea mo tana ʼu pelesepeto. ʼE mole ʼiloʼi e te hahaʼi ʼo te mālamanei ʼe natou fakalogo ki te takitaki ʼo te Fili ʼo te ʼAtua ia Satana, heʼe “mauli te malama-nei katoa i te Kovi.” (Soane 5:19) Kā tou mahino ki te faʼahi ʼaia, pea ʼe faigafua anai hatatou ʼiloʼi pe koʼē ʼe hoko ia te ʼu ʼaluʼaga kovi ʼaia. Ko Satana ʼe agakovi, ʼe loto fehiʼa, ʼe kākā, pea mo fai fakapō. Koia ʼe mole tonu ai ke tou punamaʼuli mo kapau ʼe tou sio ki te hahaʼi ʼo te mālamanei ʼe natou maʼu ia te ʼu agaaga ʼo te pule ʼaia. Koia lā ʼaē ʼe lahi ʼaupitō ai ia te agakovi!

7. Koteā te tahi tupuʼaga ʼo tatatou maʼuli mamahi?

⁷ Ko te tahi tupuʼaga ʼo tatatou maʼuli mamahi ʼuhi ko totatou ʼuhiga heʼe haohaoa. ʼI te agamāhani, ko te tagata agahala ʼe mole ina tali ke puleʼi ia ia, ʼo tupu ai te ʼu tau, mo te ʼu gaohi koviʼi, pea mo te mamahi. Koia, ʼe ʼui fēnei ai iā Tagata Tānaki 8:9: “Ko te tagata ʼe ina puleʼi te tagata ki tona malaʼia.” Ko te tahi tupuʼaga ʼo te mamahi ʼa te hahaʼi, heʼe ko “te ʼu temi pea mo te ʼu meʼa fakafokifā” ʼe hoko kiā tātou fuli. (Tagata Tānaki 9:11) ʼI te agamāhani, kā felāveʼi te hahaʼi mo te ʼu malaʼia he neʼe natou nonofo ʼi he koga meʼa ʼe hoko fakapunamaʼuli ai he tuʼutāmaki.

8, 9. ʼE tou ʼiloʼi feafeaʼi ko Sehova ʼe tokaga moʼoni kiā tātou?

⁸ ʼE ko he meʼa fakaloto fīmālie hatatou ʼiloʼi ʼe mole tupu mai ia Sehova ia te ʼu mamahi. Kae ʼe tokaga moʼoni koa te ʼAtua kiā tātou ʼo ʼuhiga mo te ʼu meʼa ʼaē ʼe hoko ʼi totatou maʼuli? ʼE feala hatatou tali fakahagatonu kiai, ʼeī ʼe tokaga ia kiā tātou! ʼE tou ʼiloʼi ko Sehova ʼe tokaga kiā tātou, heʼe fakahā mai ʼi tana Folafola te tupuʼaga ʼo tana fakagafua ʼaē ke maʼuli mamahi te hahaʼi ʼo te mālamanei. Ko te ʼu tupuʼaga ʼo te fakagafua e te ʼAtua ia te mamahi, ʼe pipiki kiā faʼahi e lua: tona pule faʼitaliha pea mo te agatonu ʼa te hahaʼi. Ko Sehova ko te Tupuʼaga māfimāfi, koia ʼe mole ko hona maʼua ke ina ʼui mai ia te tupuʼaga ʼaē ʼo tana fakagafua te mamahi. Kae ʼe ina fakahā mai pē tona tupuʼaga ʼuhi heʼe tokaga kiā tātou.

⁹ Kotou tokagaʼi te tahi fakamoʼoni ʼo te tokaga ʼa te ʼAtua kiā tātou. Neʼe “mamahi . . . tona loto” ʼi te fonu ʼo te kele ʼi te agakovi ʼi te temi ʼo Noe. (Senesi 6:5, 6) Kua fetogi koa ia te manatu ʼa te ʼAtua iā ʼaho nei? Kailoa ia, mole heʼeki fetogi ia. (Malakia 3:6) ʼE fehiʼa ki te heʼe faitotonu pea mo te mamahi ʼaē ʼe tau mo te hahaʼi. ʼI te Tohi-Tapu ʼe fakahā mai kua vave fakaʼauha e te ʼAtua ia te ʼu  mamahi fuli pē ʼaē ʼe tau mo te hahaʼi, ʼaē ʼe tupu mai te takitaki ʼa te tagata pea mai te fakahala ʼa te Tēvolo. ʼE mole ko he fakamoʼoni koa lā ʼaia ʼe tokaga ia te ʼAtua kiā tātou?

10. Koteā te manatu ʼa Sehova ʼo ʼuhiga mo te ʼu mamahi ʼaē ʼe tau mo te tagata?

¹⁰ Neʼe mole fakahā e te kau takitaki lotu ia te moʼoni ʼo ʼuhiga mo te ʼAtua ʼi tanatou ʼui ʼaē ko te ʼu tuʼutāmaki ʼe hoko ʼuhi ko tona finegalo. Kae ko Sehova ʼe ina fakagata anai te ʼu mamahi ʼaē ʼe tau mo te tagata. ʼE ʼui fēnei iā 1 Petelo 5:7: “E tokaga ia kia koutou.” ʼE ko te manatu ʼaia ʼe akoʼi moʼoni mai ʼi te Tohi-Tapu!

He Koʼē ʼe Tou Māʼuʼuli ʼi Te Kele?

11. Koteā ʼaē ʼi te agamāhani ʼe ʼui e te ʼu lotu ʼo te mālamanei ʼo ʼuhiga mo te maʼuli ʼo te tagata ʼi te kele?

¹¹ Tou vakaʼi leva te lua fehuʼi ʼaē ʼe fai e te tokolahi: He koʼē ʼe tou māʼuʼuli ʼi te kele? Ko te ʼu lotu ʼo te mālamanei ʼi te agamāhani ʼe natou ʼui ko te tagata ʼe maʼuli faka temi pē ia ʼi te kele. ʼE natou faka ʼuhiga te kele ohagē ko he kiʼi meʼa fakatupu tūkia ʼi te ʼala ʼo te maʼuli ki he tahi faʼahi. Ko ʼihi kau takitaki lotu ʼe natou akoʼi te hahaʼi ʼaki he ʼu manatu hala, ko te ʼAtua ʼe ina fakaʼauha anai te kele nei ʼi he ʼaho. Koia ʼuhi ko te taʼi ʼu akonaki ʼaia, tokolahi ʼe natou ʼui ʼe tonu ke natou fakaʼaogaʼi kātoa tonatou maʼuli koteʼuhi ko te ikuʼaga ʼo tonatou maʼuli ko te mate. Koteā ʼaē ʼe akoʼi moʼoni mai ʼi te Tohi-Tapu ʼo ʼuhiga mo te tupuʼaga ʼo tatatou māʼuʼuli ʼi te kele?

12-14. Koteā ʼaē ʼe akoʼi mai ʼi te Tohi-Tapu ʼo ʼuhiga mo te fakatuʼutuʼu ʼa te ʼAtua ki te kele pea mo te mālamanei?

¹² ʼE ʼi ai te fakatuʼutuʼu taulekaleka ʼa te ʼAtua ki te kele pea mo te mālamanei. “Neʼe mole ina fakatupu noa” kae “neʼe ina faʼu ke nofoʼi.” (Isaia 45:18) Tahi ʼaē, ko Sehova “neʼe ina fakatuʼu te kele ki ʼona fakatafito; pea ʼe mole toe gaugaue anai ʼo aʼu ki he ʼu temi ʼe mole ʼiloʼi hona gataʼaga, peʼe talu ai.” (Pesalemo 104:5) Ko tatatou akoʼi ia te ʼu manatu ʼaia ʼo ʼuhiga mo te fakatuʼutuʼu ʼa te ʼAtua ki te kele pea mo te mālamanei, ʼe feala ke tokoni mai ke tou mahino, pe koʼē ʼe tou māʼuʼuli ʼi te kele.

¹³ Iā Senesi kāpite 1 pea mo te kāpite 2, ʼe ina fakahā mai neʼe tokaga lahi ia Sehova ki te teuteuʼi ʼo te kele ke nofoʼi e te tagata. ʼI te fakaʼosi ʼo tana fakatupu ia te kele, ko meʼa fuli neʼe “lelei ʼaupitō.” (Senesi 1:31) Neʼe tuku e te ʼAtua ia te ʼuluaki tagata pea mo te ʼuluaki fafine, ko Atama mo Eva, ki te ʼōloto taulekaleka ʼo Eteni pea mo foaki age kiā nāua ia te meʼa kai lelei fuapē. ʼO ina ʼui fēnei age ki te ʼuluaki taumātuʼa: “Koulua fānaunau, pea koulua liliu ʼo hahaʼi, pea koulua fakafonu te kele, pea koulua puleʼi.” Neʼe tonu ke nā fānaunau, ke nā fakalahi atu te ʼu tuʼakoi ʼo te palatiso, pea mo nā puleʼi fakaʼofa ia te ʼu manu.—Senesi 1:26-28.

¹⁴ Ko te fakatuʼutuʼu ʼa Sehova ke maʼuli ʼi te kele ʼo talu ai he fāmili ʼe haohaoa. ʼE ʼui fēnei ʼi te Folafola ʼa te ʼAtua: “ ʼE maʼu anai te kele e te kau faitotonu, pea ʼe natou nonofo ai anai ʼo talu ai.” (Pesalemo 37:29) ʼEī, ko te hahaʼi ʼe natou maʼu anai te maʼuli heʼegata ʼi te Palatiso ʼi te kele. Neʼe ko te fakatuʼutuʼu ʼaia ʼa te ʼAtua, pea ko te faʼahi ʼaia ʼe akoʼi moʼoni mai ʼi te Tohi-Tapu!

Koteā ʼAē ʼe Hoko Kiā Tātou Mokā Tou Mamate?

15. Koteā ʼaē neʼe akoʼi e te tokolahi ʼi te kau takitaki lotu ʼo te mālamanei ʼo ʼuhiga mo te meʼa ʼaē ʼe hoko kiā tātou mokā tou mamate?

¹⁵ Tou vakaʼi age leva ia te tolu fehuʼi ʼaē ʼe fai e  te tokolahi: Koteā ʼaē ʼe hoko kiā tātou mokā tou mamate? Tokolahi ʼi te kau takitaki lotu ʼo te mālamanei ʼe natou akoʼi ʼe ʼi ai te meʼa, ʼi tota sino, ʼe hoko atu tona maʼuli ʼi te hili ʼo te mate. Ko ʼihi kūtuga lotu ʼe kei natou tui ki te akonaki ʼaē ko te ʼAtua ʼe ina fakatūʼā te kau agakovi ʼi te ʼifeli kakaha. Kae ʼe ko he moʼoni koa? Koteā ʼaē ʼe akoʼi moʼoni mai ʼi te Tohi-Tapu ʼo ʼuhiga mo te mate?

16, 17. ʼI te Tohi-Tapu, ʼe feafeaʼi ia te ʼaluʼaga ʼo te kau mate?

¹⁶ ʼE ʼui fēnei ʼi te Folafola ʼa te ʼAtua: “Ko te kau māʼuʼuli ʼe natou ʼiloʼi ʼe natou mamate anai; kae ko te kau mate, ʼe mole kei natou ʼiloʼi he meʼa, pea ʼe mole kei ʼi ai honatou totogi.” Mai tona ʼaluʼaga ʼaē ko te kau mate, “ ʼe mole kei natou ʼiloʼi he meʼa,” ʼe mole kei natou logoʼi he meʼa, mo sio, mo palalau, mo mamanu, peʼe natou manatu. ʼE mole kei ʼi ai honatou totogi. ʼE feafeaʼi hanatou lava fai ia te faʼahi ʼaia? ʼE mole feala ke natou fai hanatou gāue! Tahi ʼaē, “ko tonatou ʼofa pea mo tonatou fehiʼa pea mo tonatou fuaʼā kua pulinoa ia,” heʼe mole kei natou lava fakahā ia te ʼu meʼa ʼaē ʼi tonatou loto.—Tagata Tānaki 9:5, 6, 10.

¹⁷ Koteā ʼaē ʼe ʼui ʼi te Tohi-Tapu ʼo ʼuhiga mo te akonaki faigafua ʼaia pea mo tāsilo lelei—ko te kau mate ʼe mole hoko atu tonatou maʼuli ʼi he tahi faʼahi. ʼE mole he meʼa ʼi tota sino ʼe kei maʼuli mokā kua tou mamate, pea mo toe tupu ʼi he tahi age sino, ohagē ko tona ʼui e natou ʼaē ʼe tui ki te toe tupu ʼaki he tahi age sino. ʼE feala ke tou toʼo te fakatā ʼaenī moʼo fakamahino ia te faʼahi ʼaia: Ko te maʼuli ʼaē ʼe tou maʼu nei ʼe hagē ko te ulo ʼo he foʼi sela. Kā mate te ulo ʼo te foʼi sela, ʼe mole ʼalu te ulo ʼaia ki he tahi faʼahi. Kua mate pē ia.

18. Kā mahino ia ia ʼaē ʼe ako te Tohi-Tapu ko te kau mate ʼe mole kei natou ʼiloʼi he meʼa, koteā ʼaē ʼe feala ke ina ʼui?

¹⁸ Tou fakakaukauʼi age muʼa te ʼu meʼa ʼaē ʼe pipiki ki he moʼoni ʼe faigafua pea mo mālohi. ʼI te temi ʼaē kua mahino ai ia ia ʼaē ʼe ako ʼe mole ʼiloʼi e te kau mate he meʼa, ʼe faigafua anai hana ʼui, ko te meʼa ʼaē neʼe vevele ʼi te loto ʼo tana ʼu kui ʼi muʼa ʼo tanatou mamate, ʼe mole kei feala hanatou fai age ki ai he meʼa. ʼE tonu foki ke toe mahino kiā ia te puani ʼaenī, ko te hahaʼi ʼaē neʼe ʼoʼofa kiai pea kua mamate ʼe mole kei natou logo, mo sio, mo palalau, mo logoʼi peʼe natou manatu. Tahi ʼaē, ʼe mole feala ke natou maʼuli tokotahi ʼi te pulekatolio, peʼe fakamamahiʼi nātou ʼi he afi kakaha. Kae ʼe akoʼi mai ʼi te Tohi-Tapu , ko te kau mate ʼaē ʼe manatuʼi e te ʼAtua, ʼe fakatuʼuake anai nātou. ʼE ko he ʼamanaki taulekaleka!—Soane 5:28, 29.

Ko He Tohi Foʼou Ke Tou Fakaʼaogaʼi

19, 20. ʼI totatou ʼuhiga Kilisitiano, koteā totatou maʼua, pea koteā te tohi faka Tohi-Tapu ʼaē neʼe tā ke tou fakaʼaogaʼi tāfito ʼi tatatou minisitelio?

¹⁹ ʼI te ʼalatike ʼaenī, neʼe tou vakaʼi pē ia fehuʼi e tolu ʼe lagaʼi e te hahaʼi. Pea ʼi te ʼu fehuʼi ʼaia, ko te ʼu manatu ʼaē ʼe akoʼi mai ʼi te Tohi-Tapu ʼe faigafua pea mo totonu. ʼE ko he meʼa fakafiafia hata fakahā te ʼu moʼoni ʼaia kiā nātou ʼaē ʼe natou fia ʼiloʼi ia te ʼu manatu ʼaē ʼe akoʼi mai ʼi te Tohi-Tapu! Kae ʼe kei lahi te ʼu fehuʼi maʼuhiga ʼe tonu ki te hahaʼi ʼaē ʼe fakamālotoloto ke natou maʼu he ʼu tali ʼe lelei. ʼI totatou ʼuhiga Kilisitiano, ko totatou maʼua ke tou tokoni ki te hahaʼi ke natou maʼu ia te ʼu tali ʼo te ʼu fehuʼi ʼaia.

²⁰ ʼE ko he meʼa faigataʼa ia te akoʼi ʼo te ʼu moʼoni faka Tohi-Tapu ʼi hona ʼaluʼaga ʼe faigafua pea mo malave ki te loto ʼo te hahaʼi. Moʼo tokoniʼi ʼo tātou ke tou lava fai ia te faʼahi ʼaia, neʼe tā e “te tagata kaugana agatonu mo poto” ia he tohi ke tou  fakaʼaogaʼi tāfito ʼi tatatou minisitelio faka Kilisitiano. (Mateo 24:45-47, MN ) Ko te tohi e pāsina 224, ko tona kupu tāfito Koteā ʼAē ʼe Akoʼi Moʼoni Mai ʼi Te Tohi-Tapu?

21, 22. ʼE feafeaʼi te ʼu puani maʼuhiga ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu?

²¹ ʼI te Fakatahi Faka Tisitilike ʼa te kau Fakamoʼoni ʼa Sehova ʼo te taʼu 2005/2006 ʼaē ko tona kupu tāfito “Te Fakalogo Ki Te ʼAtua,” neʼe fakahā ai te tohi ʼaia, pea ʼe ʼi ai tona ʼu puani kehekehe ʼe maʼuhiga. Ohagē lā, ko pāsina e nima ʼi te kamataʼaga ʼo te tohi, ʼe ʼaoga ki te kamata ʼo he ʼu ako Tohi-Tapu. ʼE lagi faigafua anai hakotou fakaʼaogaʼi ia te ʼu pāki pea mo te ʼu vaega faka Tohi-Tapu ʼi te ʼu pāsina ʼaia ki te fai palalau. ʼE lagi kotou toe fakaʼaogaʼi foki te faʼahi ʼaia ʼo te tohi moʼo fakahā ki te kau ako Tohi-Tapu, te faʼahiga kumi ʼo te ʼu kāpite pea mo te ʼu vaega faka Tohi-Tapu.

²² Ko te ʼu kupu ʼaē ʼe fakaʼaogaʼi ʼi te tohi ʼe faigafua pea mo tāsilo lelei. Neʼe fai ia te gāue lahi ki te tā ʼo te tohi moʼo uga ʼo ia ʼaē ʼe ako ke lave ki tona loto ia te ʼu manatu ʼaē ʼe tuʼu ʼi te tohi. ʼI te kamataʼaga ʼo te ʼu kāpite fuli, ʼe ʼi ai te ʼu fehuʼi pea mo te fakamatala ʼe ʼātakai ʼi te fakaʼosi, ko tona kupu tāfito “Te ʼu Meʼa ʼAē ʼe Akoʼi Mai ʼi Te Tohi-Tapu.” ʼI te ʼu fakamatala ʼaē ʼe ʼātakai, ʼe tou maʼu ai te ʼu tali faka Tohi-Tapu ki te ʼu fehuʼi ʼaē ʼi te kamataʼaga ʼo te kāpite. ʼAki te ʼu pāki pea mo te ʼu fakamatala ʼaē ʼe tuʼu ʼi te tohi, ʼe feala anai kiā ia ʼaē ʼe ako ke ina tāʼofi he ʼu puani foʼou. Tatau aipē peʼe mahino gafua ia te kupu tāfito ʼo te tohi, kae ʼe ʼi ai te tahi ʼu fakamahino ʼe feala anai hakotou vakaʼi te ʼu manatu tāfito e 14 mo kapau ʼe tonu ke foaki age he tahi ʼu fakamahino kiā ia ʼaē ʼe ako.

23. Koteā te ʼu tokoni ʼe foaki atu ʼo ʼuhiga mo te fakaʼaogaʼi ʼo te tohi Te Ako Mai Te Tohi-Tapu ki te ʼu ako Tohi-Tapu?

²³ Ko te tohi Te Ako Mai Te Tohi-Tapu? neʼe tā moʼo tokoni kiā tātou ke tou akoʼi te hahaʼi fuli ʼo te ʼu lotu kehekehe. Kapau ko ia ʼaē ʼe ako ʼe mole ina maʼu ia te ʼatamai mālama ʼo ʼuhiga mo te Tohi-Tapu, ʼe lagi lelei ke fai liuliuga tana ako ʼi he kāpite pē e tahi. ʼAua naʼa fakaviliviliʼi fau he ako, kae tou faiga ke malave ia te ako ki te loto ʼo ia ʼaē ʼe ako. Kapau ʼe mole mahino lelei ki he lea fakatātā ʼe tuʼu ʼi te tohi, fakamahino age peʼe fakaʼaogaʼi he tahi lea fakatātā. Kotou teuteuʼi fakalelei ia te ako, kotou fakaʼaogaʼi lelei ia te tohi, pea mo kotou kole tokoni ki te ʼAtua ke kotou ‘fakahā fakalelei te folafola ʼo te moʼoni.’—2 Timoteo 2:15.

Kotou Loto Fakafetaʼi ʼo ʼUhiga Mo Te ʼu Pilivilēsio Lahi

24, 25. Ko te ʼu pilivilēsio lahi fea ʼaē neʼe foaki e Sehova ki tana ʼu kaugana?

²⁴ Neʼe foaki e Sehova te ʼu pilivilēsio lahi ki tana ʼu kaugana. Neʼe ina faka fealagia mai ke tou akoʼi ia te moʼoni ʼo ʼuhiga mo ia. ʼAua naʼa tou meʼa noaʼi te pilivilēsio ʼaia! Heʼe ko te ʼAtua neʼe ina fufū tana ʼu fakatuʼutuʼu ki te hahaʼi fialahi kae neʼe ina fakahā kiā nātou ʼaē ʼe agavaivai. Ki te faʼahi ʼaia, neʼe ʼui fēnei e Sesu: “E au fakafetai atu kia te koe, Tamai, koteuhi kua ke fufu ia mea aeni [mai te] tagata poto mo atamai, pea ke fakaha kia natou liliki.” (Mateo 11:25) ʼE ko he pilivilēsio lahi hatatou kau ki te kau agavaivai ʼaē ʼe natou tauhi ki te Tuʼi ʼo Te ʼAtulaulau, ko Sehova.

²⁵ Neʼe foaki mai e Sehova ia te pilivilēsio ʼaē ke tou akoʼi ki ʼihi ia te moʼoni ʼo ʼuhiga mo ia. Tou manatuʼi neʼe mole totonu ia te ʼu fakamatala ʼaē neʼe fai ʼo ʼuhiga mo ia. Koia, tokolahi te hahaʼi neʼe mole natou ʼiloʼi ia te moʼoni ʼo ʼuhiga mo Sehova, ʼo natou manatu ʼe ko he ʼAtua ʼe mole tokaga pea mo loto fefeka. ʼE kotou lotolelei koa, pea mo holi ke kotou fakahā ia te moʼoni ʼo ʼuhiga mo te ʼAtua? ʼE kotou loto koa ke ʼiloʼi te moʼoni e te hahaʼi ʼaē ʼe natou kumi fakamālotoloto ia te ʼAtua? ʼOsi ʼaia, kotou fakahā ʼi takotou fakalogo ki te ʼAtua ia takotou faʼafai ʼi te fai faka mafola pea mo te akoʼi ʼo te hahaʼi ki te maʼuhiga ʼo te Tohi-Tapu. Ko te hahaʼi ʼaē ʼe natou kumi te moʼoni ʼe tonu ke natou ako te ʼu akonaki ʼaē ʼe akoʼi moʼoni mai ʼi te Tohi-Tapu.

Koteā Takotou ʼu Tali?

• ʼE tou ʼiloʼi feafeaʼi ko te ʼAtua ʼe tokaga kiā tātou?

• He koʼē ʼe tou māʼuʼuli ʼi te kele?

• Koteā ʼaē ʼe hoko kiā tātou mokā tou mamate?

• Ko te ʼu puani fea ʼo te tohi Te Ako Mai Te Tohi-Tapu ʼaē ʼe kotou leleiʼia tāfito?

[Fehuʼi]

[Paki ʼo te pasina 4]

Ko te Tohi-Tapu ʼe ina akoʼi mai ʼe gata anai te mamahi

[Haʼuʼaga ʼo te paki]

Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures

[Paki ʼo te pasina 5]

Ko te kau faitotonu ʼe natou māʼuʼuli anai ʼo heʼegata ʼi te Palatiso