Kotou Tokoni Ki Te Hahaʼi Ke Natou Fakalogo Ki Te ʼu Akonaki ʼAē ʼe Akoʼi Mai ʼi Te Tohi-Tapu

“Pea ko ae i te kele lelei, ko natou ae e natou fagono ki te folafola pea e natou taofi mo he loto e taau mo lelei pea e natou fua i te kataki.”—Luka 8:15.

1, 2. (a) Koteā te tupuʼaga ʼo te tā ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? (b) ʼI te ʼu taʼu ʼaenī kua hili, neʼe tapuakinaʼi feafeaʼi e Sehova ia te ʼu faiga ʼo tana ʼu kaugana ʼi tanatou fai ni ʼu tisipulo?

 “ ʼE KO he tohi ʼe lelei ʼaupitō. Pea ko nātou ʼaē ʼe natou ako te Tohi-Tapu mo au, ʼe natou toe leleiʼia te tohi. ʼE tou lava kamata he ʼu ako Tohi-Tapu ʼi te ʼu muʼa matapā ʼaki te tohi ʼaia.” Ko te ʼui ʼaia ʼa te pioniē temi kātoa ʼa te kau Fakamoʼoni ʼa Sehova ʼo ʼuhiga mo te tohi Koteā ʼAē ʼe Akoʼi Moʼoni Mai ʼi Te Tohi-Tapu? * ʼO ʼuhiga pē mo te tohi ʼaia, neʼe ʼui fēnei e te tahi tehina fai faka mafola ʼo te Puleʼaga kua matuʼa: “Iā taʼu e 50 ʼi taku kei mālohi ʼi te minisitelio neʼe au maʼu te pilivilēsio ʼaē ko te tokoni ki te hahaʼi tokolahi ke natou ʼiloʼi ia Sehova. Kae ʼi tona fakahagatonu, ʼe lelei ʼaupitō te tohi ʼaenī pea mo matalelei te ʼu pāki fakaloto mālohi ʼaē ʼe tuʼu ai.” ʼE fēia koa lā mo takotou manatu ʼo ʼuhiga mo te tohi Te Ako Mai Te Tohi-Tapu? Neʼe tā te tohi ako faka Tohi-Tapu ʼaia moʼo tokoni atu ke kotou fakahoko fakalelei ia te fakatotonu ʼaenī ʼa Sesu: “Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē, . . . ʼo kotou ako ia nātou ke natou mulimuli ki te ʼu meʼa fuli pē ʼaē neʼe au fakatotonu atu kiā koutou.”—Mateo 28:19, 20, MN.

² ʼE mahino ia, ʼe fiafia Sehova ʼi tana sio ifo ki te ʼu toko 6 miliona tupu kau Fakamoʼoni ʼe natou fakalogo mo he loto kātoa ki te fakatotonu ʼa Sesu ʼaē ke fai ni ʼu tisipulo. (Tāʼaga Lea 27:11) ʼE mahino ia, ʼe tapuakinaʼi anai e Sehova ia tanatou ʼu faiga. Ohagē lā, lolotoga te taʼu 2005, neʼe faka mafola ia te logo lelei ʼi te ʼu fenua e 235, pea teitei pē ko ako Tohi-Tapu e 6 061 500 neʼe fai. Koia, tokolahi te hahaʼi neʼe natou ‘logo ki te folafola ʼa te ʼAtua pea mo natou tali, ʼo mole natou tali ohagē ko he folafola ʼa he tagata kae ohagē ko te folafola moʼoni ʼa te ʼAtua.’ (1 Tesalonika 2:13) Lolotoga te ʼu taʼu e lua kua hili, ʼe ko te vaelua ʼo te toko miliona tisipulo foʼou kua natou faka ʼalutahi tonatou maʼuli mo te ʼu lēkula ʼa Sehova pea mo foaki tonatou maʼuli ki te ʼAtua.

3. Ko te ʼu fehuʼi fea ʼaē kā tou vakaʼi anai ʼi te ʼalatike ʼaenī ʼo ʼuhiga mo te faʼahiga fakaʼaogaʼi ʼo te tohi Te Ako Mai Te Tohi-Tapu?

³ Neʼe kua kotou fai koa he ako Tohi-Tapu ʼa he tahi mole heʼeki faʼa fualoa? ʼI te mālamanei kātoa, ʼe kei ʼi ai te hahaʼi “mo he loto e taau mo lelei” ʼe natou logo ki te folafola ʼa te ʼAtua pea “e natou fua i te kataki.” (Luka 8:11-15) Tou vakaʼi age muʼa, te faʼahiga fakaʼaogaʼi ʼo te tohi Te Ako Mai Te Tohi-Tapu mokā kotou fai he ʼu tisipulo. ʼI te ako ʼaenī, ʼe tou vakaʼi anai he ʼu fehuʼi e tolu: (1) ʼE feafeaʼi hakotou kamata he ako Tohi-Tapu? (2) Ko te ʼu faʼahiga  puleʼaki fea ʼaē ʼe lelei ki te faiako? (3) ʼE feafeaʼi hakotou tokoni ki he tahi ke liliu ko he tahi ʼe ako pea mo liliu ki ʼamuli ko he faiako ʼo te Folafola ʼa te ʼAtua, te Tohi-Tapu?

ʼE Feafeaʼi Hakotou Kamata He Ako Tohi-Tapu?

4. He koʼē ko ʼihi ʼe natou tuʼaniaʼi anai te ako ʼo te Tohi-Tapu, pea ʼe feafeaʼi hakotou lava tokoni kiai ke ina tekeʼi ia te faʼahi ʼaia?

⁴ Kapau ʼe ʼui atu ke kotou hihiki mai he kauvai ki he tahi kauvai ʼo he vaitafe fālahi, ʼe lagi mole kotou fai anai ia te faʼahi ʼaia. Kae kapau ʼe fakaʼatu he ʼu maka ʼi te vaitafe, ʼe lagi kotou faiga anai ke kotou fakalaka ai. ʼO toe fēia pē, ʼe feala ki he tahi ʼe maʼumaʼua ke mole ina fia ako ia te Tohi-Tapu. Lagi ʼi tana manatu, ʼe tonu ke lahi tona temi pea mo tana faiga ʼaē ki te ako ʼo te Tohi-Tapu. ʼE feafeaʼi anai hakotou tokoni kiai ke ina tekeʼi ia te faʼahi ʼaia? ʼAki he ʼu fai palalau fakanounou ʼe fai putuputu, ʼe kotou lava fakaʼaogaʼi ai te tohi Te Ako Mai Te Tohi-Tapu ke feala ki he tahi ke ina ako te Folafola ʼa te ʼAtua. Kapau ʼe kotou teuteu lelei, ʼo tatuʼu ʼo ʼaʼahi, ʼe hagē anai ko he ʼu maka ʼe kotou ʼai moʼo fakatuputupu ia tana felōgoi ʼaē mo Sehova.

5. He koʼē ʼe tonu ke kotou lau ia te tohi Te Ako Mai Te Tohi-Tapu?

⁵ Kae ʼi muʼa ʼo takotou tokoni ki he tahi age ke ina maʼu te ʼu lelei ʼo te tohi Te Ako Mai Te Tohi-Tapu, ʼe tonu muʼa kiā kotou totonu ke kotou fakamāmāhani ʼo lau ia te tohi ʼaia. Kua kotou lau kātoa koa ia te tohi? Ko te taumātuʼa ʼi tanā ʼolo ʼo mālōlō neʼe nā ʼave te tohi pea neʼe nā kamata lau ʼi tanā nonofo ʼi te mataʼone. Ko te fafine ʼo te kolo neʼe ina lolotoga fakatau te ʼu meʼa ki te kau tulisi, pea ʼi tana fakaovi age kiā nāua, neʼe ina fakatokagaʼi te kupu tāfito ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? Neʼe ina ʼui age ki te taumātuʼa, ʼi te ʼu kiʼi hola pē ki muʼa atu neʼe faikole ki te ʼAtua ʼo ʼuhiga mo te fehuʼi neʼe ina fia maʼu hona tali kiai. Neʼe fiafia ia te taumātuʼa ʼi te fakahā age e te fafine ia te meʼa ʼaē neʼe hoko ki ai, ʼo nā foaki age tana tohi. Kua kotou ‘toʼo’ koa he temi moʼo lau ʼo te tohi, ʼo lagi liuga lua, lolotoga hakotou fakatuʼutuʼu, peʼe ko he temi mālōlō ʼi te gāue peʼe ʼi te faleako? (Efeso 5:15, 16) Kapau ʼe kotou fai fēia, ʼe kotou fakamāmāhani anai mo te tohi faka Tohi-Tapu ʼaia pea ʼe kotou toe maʼu ai foki mo he ʼu faigamālie ke kotou fakahā ki niʼihi te ʼu manatu ʼaē ʼe tuʼu ʼi te tohi.

6, 7. ʼE feafeaʼi hakotou fakaʼaogaʼi ia te tohi Te Ako Mai Te Tohi-Tapu moʼo kamata ʼaki he ʼu ako Tohi-Tapu?

⁶ Kā kotou tuku te tohi ki he tahi ʼi te minisitelio, kotou fakaʼaogaʼi fakalelei te ʼu pāki, mo tona ʼu vaega faka Tohi-Tapu, pea mo te ʼu fehuʼi ʼaē ʼe tuʼu ʼi te pāsina 4, mo te pāsina 5, pea mo te pāsina 6. Ohagē lā, ʼe feala anai ke kotou kamata ʼaki te fehuʼi ʼaenī: “ ʼUhi ko te ʼu fihifihia lahi ʼaē ʼe tau mo te mālamanei iā ʼaho nei, ʼi takotou manatu ʼe tonu koa ke kotou maʼu he falala moʼoni moʼo takitaki ʼo koutou?” ʼI takotou ʼosi lau ia te tali, kotou lau age ia 2 Timoteo 3:16, 17, pea mo fakamahino age ʼe fakahā mai ʼi te Tohi-Tapu ia te puleʼaki moʼoni ki te ʼu fihifihia ʼo te mālamanei. ʼOsi ʼaia, kotou fakahā age ia te ʼu pāki ʼaē ʼe tuʼu ʼi te pāsina 4 pea mo te 5, pea mo fehuʼi age: “ ʼI te ʼu ʼaluʼaga ʼaē ʼe tuʼu ʼi te ʼu pāki ʼaenī, ko te fihifihia fea ʼaē ʼe kotou tuʼaniaʼi tāfito?” Kā kua ina fakahā atu tana manatu, kotou tuku age te tohi ʼo kotou lau age ʼi takotou Tohi-Tapu ia te vaega faka Tohi-Tapu ʼaē ʼe pipiki kiai. Ki muli age, kotou lau age  te ʼu manatu ʼaē ʼe tuʼu ʼi te pāsina 6 pea mo fehuʼi age: “ ʼI te ʼu fehuʼi e ono ʼaē ʼe tuʼu ʼi te lalo pāsina, ko te fehuʼi fea ʼaē ʼe ke fia maʼu tona tali?” Kā kua ina fakahā atu tana manatu, kotou fakahā age te kāpite ʼaē ʼe tali ki te fehuʼi ʼaia, kotou tuku age te tohi, pea kotou fai ni ʼu fakatuʼutuʼu ke kotou toe liliu ʼo tali ki te fehuʼi ʼaē neʼe kotou lagaʼi.

⁷ Ko te fakahāhā ʼo te tohi neʼe fai iā minuta e nima. ʼI te ʼu kiʼi minuta ʼaia, kua kotou ʼiloʼi te meʼa ʼaē ʼe tuʼania kiai, neʼe kotou lau age te ʼu vaega faka Tohi-Tapu e lua pea mo fakamahino age, pea kua kotou teuteuʼi te fakatafito ki takotou toe liliu ʼo ʼaʼahi. Lagi ko te kiʼi fai palalau ʼaia, neʼe ko he fakaloto mālohi pea mo he fakafimālie kua ina maʼu talu mai tana tupu. Koia, māʼiapē lā mo he tahi ʼe maʼumaʼua kae lagi fiafia anai ʼi he ʼu kiʼi minuta mokā ʼe fai palalau mo koutou, ke ina maʼu he tokoni ʼe ina taki anai ia ia ki te “ala e alu ki te mauli.” (Mateo 7:14) ʼAki te temi, pea ʼo mulimuli ki te tuputupu ʼo tana fia logo, ʼe tonu anai ki te ako ke fuafualoa atu tona fai. ʼE feala leva ke fai te faʼahi ʼaia, ʼo kotou kole age ke kotou heheka mo ia pea mo fai te ako ke fuafualoa atu.

Te ʼu Faʼahiga Puleʼaki ʼAē ʼe Lelei Ki Te Faiako

8, 9. (a) ʼE feafeaʼi hakotou teuteuʼi he tahi ʼe ina ako te Tohi-Tapu ke ina tauʼi he ʼu fihifihia pea mo he ʼu ʼahiʼahi ʼe lava hoko ki ai? (b) ʼE lava maʼu ʼifea he ʼu meʼa moʼo laga ʼo he tui ke mālohi moʼo tekeʼi ʼo te ʼu fihifihia?

⁸ Kapau kua kamata fakalogo he tahi ki te ʼu manatu ʼaē ʼe akoʼi mai ʼi te Tohi-Tapu, ʼe lagi tau anai mo he ʼu fihifihia ʼe fakatupu kovi ki tana tuputupu ʼi te faʼahi fakalaumālie. Neʼe ʼui fēnei e te ʼapositolo ko Paulo: “Ko natou katoa e fia mauli fakalotu ia Kilisito Sesu, e fakatagai anai.” (2 Timoteo 3:12) Neʼe fakatatau e Paulo ia te ʼu fihifihia ʼaia ki he afi ʼe ina lava maumauʼi he ʼu meʼa ʼe maumau gafua, kae mole ina lava maumauʼi he ʼu meʼa ohagē ko te ʼaulo, mo te siliva, pea mo te ʼu maka maʼuhiga. (1 Kolonito 3:10-13; 1 Petelo 1:6, 7) Moʼo tokoni kiā ia ʼaē ʼe ako ke ina gāueʼi he ʼu kalitātē ke feala hana tauʼi te ʼu fihifihia ʼaē kā tau anai mo ia, ʼe tonu ke kotou tokoni ki ai ke mālohi ʼi te tekeʼi ʼo te ʼu fihifihia ʼaē ʼe hagē ko he afi.

⁹ Ko te tagata fai pesalemo ʼe ina fakatatau “te ʼu folafola ʼa Sehova” ki te “siliva kua fakamaʼa ʼi he gutuʼumu kele kakaha, kua fakamaʼa tuʼa fitu.” (Pesalemo 12:6) ʼE tou maʼu ʼi te Tohi-Tapu ia te ʼu meʼa maʼuhiga kehekehe ʼaē ʼe feala ke fakaʼaogaʼi moʼo laga ʼo he tui ke mālohi. (Pesalemo 19:7-11; Tāʼaga Lea 2:1-6) Pea ko te tohi Te Ako Mai Te Tohi-Tapu ʼe ina fakahā mai peʼe feafeaʼi hata liliu ʼo faiva ʼi te fakaʼaogaʼi ʼo te Tohi-Tapu.

10. ʼE feafeaʼi hakotou fakahā kiā ia ʼaē ʼe ako ia te maʼuhiga ʼo te Tohi-Tapu?

¹⁰ Lolotoga te ako, kotou fakahā kiā ia ʼaē ʼe ako ia te maʼuhiga ʼo te ʼu vaega faka Tohi-Tapu ʼaē ʼe tuʼu ʼi te ʼu kāpite. Kotou fakaʼaogaʼi te ʼu fehuʼi moʼo tokoni kiā ia ʼaē ʼe ako ke mahino ki te ʼu vaega faka Tohi-Tapu maʼuhiga pea mo tonatou faʼahiga maʼuliʼi. Kotou tōkakaga naʼa kotou ʼui age ki ai ia te meʼa ʼaē ʼe tonu ke ina fai. Kae kotou muliʼi ia te faʼifaʼitaki ʼa Sesu. ʼO ʼuhiga mo te fehuʼi neʼe fai age e te tagata neʼe poto ʼi te Lao, neʼe tali fēnei age e Sesu: “Kotea e tuu i te lao, pe e feafeai tau lau?” Neʼe tali age e te tagata ʼaki te manatu faka Tohi-Tapu, pea ko Sesu neʼe ina fakamahino age ia te faʼahiga maʼuliʼi ʼo te pelesepeto kiā ia totonu. ʼI tana fakaʼaogaʼi te lea fakatātā, neʼe toe tokoni foki ia Sesu ki te tagata ke mahino peʼe malave feafeaʼi te akonaki kiā te ia. (Luka 10:25-37) ʼE lahi ʼi te tohi Te Ako Mai Te Tohi-Tapu ia te ʼu lea fakatātā faigafua ʼe kotou lava fakaʼaogaʼi moʼo tokoni ki he tahi ʼe ako ke ina maʼuliʼi te ʼu pelesepeto faka Tohi-Tapu.

11. Ko palakalafe e fia e tonu ke kotou vakaʼi ʼi te ʼu ako?

¹¹ Ohagē ko te fakahā e Sesu ia te ʼu manatu faigataʼa ʼaki he ʼu faʼifaʼitaki ʼe faigafua, ʼe tuʼu ʼi te tohi Te Ako Mai Te Tohi-Tapu te ʼu manatu ʼe faigafua pea mo fakahagatonu moʼo fakamahino ia te Folafola ʼa te ʼAtua. (Mateo 7:28, 29) Kotou muliʼi tana faʼifaʼitaki. Kotou fakahā te ʼu manatu ʼaki he fakamahino ʼe faigafua, ʼe tāsilo lelei, pea mo totonu. ʼAua naʼa kotou fakaviliviliʼi fau te ako ʼo te tohi. Kae ʼo mulimuli pē ki te ʼu faigamālie pea mo te fealagia ʼo ia ʼaē ʼe ako, kotou fakafuafua te lahi ʼo te ʼu palakalafe ʼaē ke kotou vakaʼi lolotoga tana ako. Neʼe mahino ia Sesu ki te ʼu tuʼakoi ʼo tana kau tisipulo pea neʼe mole ina faka mafasiaʼi nātou ʼaki he tahi age ʼu manatu ʼe mole heʼeki ʼaoga kiā nātou ʼi te temi ʼaia.—Soane 16:12.

12. ʼE tonu ke kotou fakaʼaogaʼi feafeaʼi ia te tahi ʼu fakamahino?

¹² ʼE tou maʼu ʼi te tohi Te Ako Mai Te Tohi-Tapu te tahi ʼu fakamahino moʼona kupu tāfito e 14. ʼO  mulimuli pē ki te ʼu meʼa ʼaē ʼe ʼaoga kiā ia ʼaē ʼe ako, ʼe tonu kiā koutou kau faiako ke kotou ʼiloʼi te lahi ʼo te ʼu palakalafe ʼaē ke kotou vakaʼi fakatahi. Ohagē lā, kapau ʼe faigataʼa fau kiā ia ʼaē ʼe ako ia he manatu faka Tohi-Tapu ʼuhi ko te ʼu akonaki ʼāfea ʼaē neʼe tui kiai, ʼe lagi lelei he vakaʼi mo ia te tahi ʼu fakamahino ʼi te fakaʼosi ʼo te tohi pea mo tuku age ke ina lau te ʼu manatu. Tahi ʼaē, ʼe fakalogo anai te ʼu palakalafe ʼaē kā kotou vakaʼi ki te ʼu meʼa ʼaē ʼe ʼaoga kiā ia ʼaē ʼe ako. ʼE tou maʼu ʼi te tahi ʼu fakamahino ia te ʼu manatu faka Tohi-Tapu ʼe maʼuhiga, ohagē lā ko te “ ‘Nefesi’ pea mo te ‘Laumālie’—Koteā te faka ʼuhiga moʼoni ʼo te ʼu kupu ʼaia?” pea “Ko Ai Ia ‘Papiloni Lahi.’ ” ʼE lagi kotou fia palalau anai ki te ʼu manatu ʼaia mo ia ʼaē ʼe ako mo koutou. ʼE mole ʼi ai he ʼu fehuʼi ʼi te tahi ʼu fakamahino, koia ʼe lagi lelei anai ke kotou fakamāmāhani mo te ʼu manatu ke kotou ʼiloʼi te ʼu fehuʼi ʼaē ʼe ʼaoga ke kotou lagaʼi.

13. ʼE tokoni feafeaʼi te faikole ki te faka mālohiʼi ʼo te tui?

¹³ ʼE ʼui fēnei iā Pesalemo 127:1: “Kapau ʼe mole laga e Sehova totonu ia te fale, pea neʼe mole pē he ʼaoga ʼo te gāue kinakina ʼaē neʼe fai ai e tona ʼu tufuga.” Koia, kapau ʼe kotou teuteu ke kotou fai he ako Tohi-Tapu, kotou kole ia te tokoni ʼa Sehova. Ko te ʼu faikole ʼaē ʼe kotou fai ʼi te kamata pea mo te fakaʼosi ʼo te ako, ʼe ʼiloga ai takotou ʼu felōgoi mo Sehova. Fakaloto mālohiʼi ia ia ʼaē ʼe ako ke ina kole kiā Sehova ia te poto ke mahino ki Tana Folafola pea mo maʼu ia te mālohi mo maʼuliʼi ʼo tana ʼu tokoni. (Sakopo 1:5) Kapau ʼe ina fai ia te faʼahi ʼaia, ʼe mālohi anai ia ia ʼaē ʼe ako moʼo tauʼi ʼo te ʼu fihifihia pea mo hoko atu ia tana tuputupu moʼo faka mālohiʼi tana tui.

Kotou Tokoni Ki Te Kau Ako Tohi-Tapu Ke Natou Liliu Ko He Kau Faiako

14. Ko te tuputupu fea ʼe ʼaoga ke fai e he kau ako Tohi-Tapu?

¹⁴ Kapau ʼe fakalogo tatatou kau ako Tohi-Tapu ki “te ʼu meʼa fuli” ʼaē neʼe fakatotonu e Sesu ki tana kau tisipulo ke natou fai, ʼe tonu ke natou tuputupu ʼo liliu ko he kau ako ʼo te Folafola ʼa te ʼAtua moʼo liliu ko he kau faiako ʼo te Tohi-Tapu. (Mateo 28:19, 20, MN; Gaue 1:6-8) Koteā ʼaē ʼe kotou lava fai moʼo tokoni ki he tahi ʼe ako ke ina fai te taʼi tuputupu fakalaumālie ʼaia?

15. He koʼē ʼe tonu ke kotou fakaloto mālohiʼi ia ia ʼaē ʼe ako mo koutou ke kau ki te ʼu fono?

¹⁵ ʼI te kamata pē ʼo te ako ʼuluaki, fakaafe ia ia ʼaē ʼe ako ke kau mo koutou ki te ʼu fono. Fakamahino ki ai ko te ʼu fono ʼe ko he faʼahi ʼe kotou maʼu ai he ako ke kotou liliu ko he kau faiako ʼo te Folafola ʼa te ʼAtua. Lolotoga he ʼu vāhaʼa, toʼo he ʼu kiʼi minuta ʼi te fakaʼosi ʼo te ako moʼo fakamahino age ki ai ia te polokalama ʼo te ako fakalaumālie ʼaē ʼe kotou maʼu ʼi te ʼu fono kehekehe pea mo te ʼu fakatahi lalahi. Kotou fai palalau fakafiafia ʼo ʼuhiga mo te ʼu fua lelei ʼaē ʼe kotou maʼu ʼi te ʼu lakaga ʼaia. (Hepeleo 10:24, 25) Kapau kua tatuʼu mai ki te ʼu fono, ʼe liliu anai ia ko he faiako ʼo te Folafola ʼa te ʼAtua.

16, 17. Koteā he ʼu fakatuʼutuʼu ʼe lava fai ʼe ia ʼaē ʼe ako Tohi-Tapu pea ʼe ina lava fakahoko?

¹⁶ Kotou tokoni kiā ia ʼaē ʼe ako Tohi-Tapu ke ina fai hana ʼu fakatuʼutuʼu pea ke ina fakahoko. Ohagē lā, fakaloto mālohiʼi ia ia ke ina fakahā te ʼu meʼa ʼaē ʼe ina ako ki hona kaumeʼa peʼe ki hona kāiga. Toe tokoniʼi foki ia ia, ke ina lau ia te Tohi-Tapu kātoa. Kapau ʼe kotou tokoni ki ai ke ina fai hana polokalama lau Tohi-Tapu pea mo fai tuʼumaʼu te faʼahi ʼaia, ʼe liliu anai te agamāhani ʼaia ko he fakatuʼutuʼu ʼe ina fai tatau aipē mo kapau kua ʼosi papitema. Tahi ʼaē meʼa, he koʼē ʼe mole kotou ʼui  age kiā ia ʼaē ʼe ako ke ina tāʼofi he vaega faka Tohi-Tapu ʼe tali ki he puani tāfito ʼo te ʼu kāpite ʼo te tohi Te Ako Mai Te Tohi-Tapu? Kapau ʼe kotou fai fēia, ʼe liliu anai ko “he tagata kua tuha ke . . . tuu ia mua o te Atua, ko he tagata gaue e mole ufiufi, e ina ave fakahagatonu te folafola o te mooni.”—2 Timoteo 2:15.

¹⁷ ʼE mole tonu pē ke akoʼi age kiā ia ʼaē ʼe ako ke ina tāʼofi fakaʼatamai he ʼu vaega faka Tohi-Tapu peʼe ke ina tali ʼaki pē tana ʼu palalau māhani, kae kotou fakaloto mālohiʼi ke ina fakamahino he ʼu vaega faka Tohi-Tapu mokā ina fai hana tali kiā nātou ʼaē ʼe natou fia mahino ki te tupuʼaga ʼo tana tui. Ko he ʼu akoako fai faka mafola ʼe lava tokoni ki ai, ʼe kotou fai anai he faʼifaʼitaki ʼo hokotou kāiga peʼe ko hokotou kaugā gāue ʼe fia mahino ki te ʼu akonaki ʼaē ʼe tui kiai. Kā tali ia ia ʼaē ʼe ako, fakahā age peʼe feafeaʼi te tali ʼaki “he agamalū pea mo he fakaʼapaʼapa lahi.”—1 Petelo 3:15, MN.

18. Kā liliu he tahi ʼe ako Tohi-Tapu ko he kaugā fagona, koteā te tahi age tokoni ʼe kotou lava foaki age ki ai?

¹⁸ ʼAki te temi, ʼe feala kiā ia ʼaē ʼe ako ke liliu ʼo kau ki te fai faka mafola ʼi te minisitelio. Fakahā ʼe ko he pilivilēsio hata kau ki te gāue ʼaia. (2 Kolonito 4:1, 7) Kapau kua ʼiloʼi e te kau tagata ʼāfea kua feala kiā ia ʼaē ʼe ako ke kaugā fagona, kotou akoako ia ia ke fai hana ʼu ʼuluaki palalau faigafua, ʼosi ʼaia pea kotou kaugā ʼolo mo ia ki te gāue fai faka mafola. Kotou haga gāue mo ia ʼi te ʼu ʼaluʼaga kehekehe ʼo te minisitelio, pea mo akoʼi age ki ai peʼe feafeaʼi hana teuteuʼi tana fai faka mafola pea mo te ʼu ʼaʼahi. ʼE ina muliʼi anai takotou faʼifaʼitaki lelei.—Luka 6:40.

‘Haofaki Anai Ia Koutou . . . Pea Mo Natou e Fakalogo Kia Koutou’

19, 20. Koteā te fakatuʼutuʼu ʼe tonu ke tou maʼu, pea koteā tona tupuʼaga?

¹⁹ ʼE mole ko he meʼa faigafua hata tokoni ki he tahi ke ina maʼu ia “te ʼatamai mālama totonu ʼo te moʼoni.” (1 Timoteo 2:4, MN ) Kae ko te ʼu fiafia ʼo te maʼuli ʼe mole tou lava fakatatau mo te fiafia ʼaē ʼe kita maʼu mokā tou tokoni ki he tahi ke fakalogo ki te ʼu meʼa ʼaē ʼe akoʼi mai ʼi te Tohi-Tapu. (1 Tesalonika 2:19, 20) ʼIo, ʼe ko he pilivilēsio ʼe tou maʼu ko tātou ko te “u kauga gaue a te Atua” ʼi te gāue faiako faka mālamanei!—1 Kolonito 3:9.

²⁰ ʼAki ia Sesu Kilisito pea mo te kau ʼāselo mālohi, ʼe fakahoko anai e Sehova te tautea kiā nātou “ ʼaē ʼe mole natou ʼiloʼi te ʼAtua pea mo natou ʼaē ʼe mole natou fakalogo ki te logo lelei ʼo ʼuhiga mo totatou ʼAliki ko Sesu.” (2 Tesalonika 1:6-8, MN ) ʼE lahi te hahaʼi ke haofaki. ʼE feala koa hakotou fai he fakatuʼutuʼu ke kotou fai he ako Tohi-Tapu ʼi te tohi Koteā ʼAē ʼe Akoʼi Moʼoni Mai ʼi Te Tohi-Tapu? Kā kotou kau ki te gāue ʼaia, ʼe kotou maʼu ia te faigamālie ʼaē ke kotou “haofaki anai ia [koutou], . . . pea mo natou e fakalogo kia [koutou].” (1 Timoteo 4:16) Kua maʼuhiga age ʼi totatou temi, ke tou tokoni ki te hahaʼi ke natou fakalogo ki te ʼu meʼa ʼaē ʼe akoʼi mai ʼi te Tohi-Tapu.

[Kiʼi nota]

Koteā ʼAē Neʼe Kotou Ako?

• Koteā te tupuʼaga ʼo te tā ʼo te tohi Te Ako Mai Te Tohi-Tapu?

• ʼE feafeaʼi hakotou kamata he ʼu ako Tohi-Tapu ʼaki te tohi Te Ako Mai Te Tohi-Tapu?

• Ko te ʼu faʼahiga puleʼaki fea ʼaē ʼe lelei ki te faiako?

• ʼE kotou tokoni feafeaʼi ki he tahi ʼe ako ke liliu ko he faiako ʼo te Folafola ʼa te ʼAtua?

[Fehuʼi]

[Paki ʼo te pasina 8]

ʼE kotou fakaʼaogaʼi lelei koa te tohi ʼaia?

[Paki ʼo te pasina 9]

Ko he fai palalau fakanounou ʼe feala ke ina uga he tahi ke ina fia kumi te ʼatamai mālama ʼo te Tohi-Tapu

[Paki ʼo te pasina 11]

Koteā ʼaē ʼe kotou lava fai moʼo fakahā kiā ia ʼaē ʼe ako ia te maʼuhiga ʼo te Tohi-Tapu?

[Paki ʼo te pasina 12]

Kotou tokoni kiā ia ʼaē ʼe ako ke tuputupu ʼi te faʼahi fakalaumālie