Kotou Tuputupu Tuʼumaʼu ʼi Tokotou Loto Fakafetaʼi
Kotou Tuputupu Tuʼumaʼu ʼi Tokotou Loto Fakafetaʼi
“ ʼE maʼuhiga . . . tau ʼu manatu! Ê ʼAtua, ʼe natou lahi ʼaupitō!”—Pesalemo 139:17.
1, 2. He koʼē ʼe tonu ke tou leleiʼia te Folafola ʼa te ʼAtua, pea neʼe fakahā feafeaʼi e te tagata fai pesalemo ia tona loto fakafetaʼi?
NEʼE ko he meʼa taulekaleka ʼaē neʼe maʼu. ʼI te toe laga ʼo te fale lotu ʼa Sehova ʼi Selusalemi, neʼe maʼu e te Pelepitelō Lahi ko Ilikia ia “te tohi ʼo te lao ʼa Sehova ʼaē neʼe fai e Moisese,” pea ʼe mahino ia neʼe ko te ʼuluaki tohi ʼaē neʼe faka kātoa kua hili kiai taʼu e 800! ʼE kotou lava fakakaukauʼi koa te meʼa ʼaē neʼe logoʼi e te Hau ko Sosiasi ʼaē neʼe manavasiʼi ki te ʼAtua ʼi te temi ʼaē neʼe foaki age ai ki ia te tohi? Neʼe maʼuhiga kiā te ia te tohi pea neʼe ina foimo foaki atu aipē ki tana sīkalaipe ko Safane ke ina lau leʼo lahi.—2 Fakamatala 34:14-18.
2 Iā ʼaho nei, ko te Folafola ʼa te ʼAtua peʼe kātoa peʼe faka koga kae kua lava lau e te ʼu toko lauʼi miliale hahaʼi. Koia, ʼe feala ke ʼui ko te Tohi-Tapu ʼe mole kei ʼaoga peʼe mole kei maʼuhiga? Kailoa ia! ʼI te Folafola ʼa te ʼAtua, ʼe tou maʼu ai te ʼu manatu ʼa te Māfimāfi, pea neʼe tohi moʼo tokoni kiā tātou. (2 Timoteo 3:16) Moʼo fakahā tana manatu ʼo ʼuhiga mo te Folafola ʼa te ʼAtua, neʼe tohi fēnei e te tagata fai pesalemo ko Tavite: “ ʼE maʼuhiga kiā te au tau ʼu manatu! Ê ʼAtua, ʼe natou lahi ʼaupitō!”—Pesalemo 139:17.
3. Koteā ʼaē ʼe hā mai ai ko Tavite neʼe ko he tagata mālohi ʼi te faʼahi fakalaumālie?
3 Ko te loto fakafetaʼi ʼa Tavite kiā Sehova, mo tana Folafola, pea mo tana fakatuʼutuʼu ʼo ʼuhiga mo te tauhi moʼoni neʼe mole vaivai ia. Ko te ʼu tuʼuga pesalemo matalelei ʼaē neʼe tohi e Tavite, ʼe natou fakahā te ʼu meʼa ʼaē neʼe ʼi tona loto. Ohagē lā, neʼe ina tohi fēnei iā Pesalemo 27:4: “Ko te meʼa e tahi neʼe au kole kiā Sehova—ko te meʼa ʼaia ʼaē ʼe au kumi anai; ke au nofo ʼi te ʼapi ʼo Sehova ʼi te ʼaho fuli ʼo toku maʼuli, ke au sio ki te matalelei ʼo Sehova pea mo au mamata ʼaki he fakavikiviki tona fale lotu.” ʼI te faka Hepeleo, ko te kupusiga palalau “mamata ʼaki he fakavikiviki” ko tona faka ʼuhiga ke haga mamata, mo sivisivi, mo sio fakafiafia mo fakavikiviki. ʼE mahino mai, ko Tavite neʼe ko he tagata mālohi ʼi te faʼahi fakalaumālie pea neʼe ina leleiʼia moʼoni te ʼu fakatuʼutuʼu fakalaumālie ʼa Sehova pea neʼe kai mo ʼinu ki te ʼu moʼoni fuli fakalaumālie ʼaē neʼe fakahā age e te ʼAtua. Ko tana faʼifaʼitaki ʼo ʼuhiga mo tona loto fakafetaʼi ʼe tuha ke faʼifaʼitakiʼi.—Pesalemo 19:7-11.
Kotou Loto Fakafetaʼi Ki Te Pilivilēsio ʼo Te ʼIloʼi ʼo Te Moʼoni Faka Tohi-Tapu
4. Koteā te tupuʼaga ʼo te ‘fonu ʼa Sesu ʼi te fiafia ʼi te laumālie māʼoniʼoni’?
4 Ko te mahino loloto ki te Folafola ʼa te ʼAtua ʼe mole fakalogo ia ki te poto fakatagata peʼe ki te ako ʼaē ʼe foaki ʼi te mālamanei, ʼaē ʼe feala ke ina fakatupu he loto fiameʼameʼa. Kae ʼe fakalogo ia ki te ʼofa makehe ʼo Sehova, ʼaē ʼe ina foaki ki te kau agavaivai mo tauhi fakamālotoloto, heʼe natou mahino ki te ʼaoga ʼaē kiā nātou ia te ʼu meʼa fakalaumālie. (Mateo 5:3; 1 Soane 5:20) ʼI te ʼiloʼi ʼaē e Sesu ko ʼihi tagata heʼe haohaoa neʼe tohi tonatou ʼu higoa ʼi te lagi, “neʼe fonu ia ʼi te fiafia ʼi te laumālie māʼoniʼoni pea neʼe ʼui māʼana: ‘Tamai, ʼe au vikiviki kiā te koe iā muʼa ʼo te hahaʼi, ʼAliki ʼo te lagi mo te kele, he neʼe ke fufū fakalelei te ʼu meʼa ʼaenī ki te kau popoto pea mo te hahaʼi ʼaē ʼe gāue fakaʼatamai, kā kua ke fakahā koe kiā nātou liliki.’ ”—Luka 10:17-21, MN.
5. He koʼē neʼe mole tonu ke meʼa noaʼi e te kau tisipulo ʼa Sesu ia te ʼu moʼoni ʼo te Puleʼaga ʼaē neʼe fakahā age kiā nātou?
5 ʼI tana ʼosi fai ia te faikole fakamālotoloto ʼaia, neʼe mafuli age Sesu ki tana kau tisipulo pea mo ʼui māʼana: “Manūʼia ia te ʼu mata ʼaē ʼe sio ki te ʼu meʼa ʼaē ʼe kotou sisio kiai. Koteʼuhi ʼe au tala atu kiā koutou, e tokolahi te ʼu polofetā pea mo te ʼu hau, neʼe natou holi ke natou sisio ki te ʼu meʼa ʼaē ʼe kotou sisio kiai, kae neʼe mole natou sisio kiai, pea mo logo ki te ʼu meʼa ʼaē ʼe kotou logo kiai, kae neʼe mole natou logo kiai.” ʼEī, neʼe tokoniʼi e Sesu tana kau tisipulo agatonu ke ʼaua naʼa natou meʼa noaʼi te ʼu moʼoni taulekaleka ʼo te Puleʼaga ʼaē neʼe fakahā age kiā nātou. Ko te ʼu moʼoni ʼaia neʼe mole fakahā ki te ʼu taʼiake muʼamuʼa ʼo te ʼu kaugana ʼa te ʼAtua, pea ʼe mahino ia neʼe mole fakahā ki te “kau popoto pea mo te hahaʼi ʼaē ʼe gāue fakaʼatamai” ʼi te temi ʼo Sesu!—Luka 10:23, 24, MN.
6, 7. (a) Koteā te ʼu tupuʼaga ʼaē ʼe tonu ai ke tou loto fakafetaʼi ki te ʼu moʼoni fakaʼatua? (b) Koteā te kehekehe ʼe tou sio kiai iā ʼaho nei ʼi te lotu moʼoni pea mo te lotu hala?
6 ʼI totatou temi, kua lahi age te ʼu tupuʼaga ʼaē ke tou loto fakafetaʼi ai kiā Sehova ʼo ʼuhiga mo te ʼu moʼoni fakaʼatua, heʼe ʼaki tana “tagata kaugana agatonu mo poto,” neʼe ina foaki ki tana ʼu kaugana he mahino ʼe lahi age ki tana Folafola. (Mateo 24:45, MN; Taniela 12:10) ʼO ʼuhiga mo te temi fakaʼosi, neʼe tohi fēnei e te polofetā ko Taniela: “Ko te tokolahi ʼe natou ʼolo anai ʼi hē mo hē, pea ko te ʼatamai mālama moʼoni ʼe mahu anai.” (Taniela 12:4) ʼE kotou fakamoʼoni koa iā ʼaho nei kua “mahu” te ʼatamai mālama ʼo te ʼAtua pea ko te ʼu kaugana ʼa Sehova ʼe fafaga lelei ia nātou ʼi te faʼahi fakalaumālie?
7 ʼE tou sio ai ki kehekehe ʼo te mahu fakalaumālie ʼa te ʼu kaugana ʼa te ʼAtua pea mo te maveuveu faka lotu ʼi te Papiloni Lahi! Koia neʼe ko te tokolahi ʼaē neʼe kākāʼi ʼi te lotu hala peʼe mole kei natou tui kiai, kua natou tafoki mai ki te tauhi moʼoni. Ko nātou ʼaia ʼe ko he faga ovi “ ʼe mole [natou] fia kau [mo Papiloni Lahi] ki tana ʼu agahala” peʼe ke natou “maʼu he vahe ʼo tona ʼu tautea.” Ko Sehova pea mo tana ʼu kaugana ʼe natou fakaafe ia te taʼi hahaʼi fuli ʼaia ke natou ʼomai ki te kōkelekāsio faka Kilisitiano moʼoni.—Apokalipesi 18:2-4, MN; 22:17.
Te Loto Fakafetaʼi ʼa Te Faga Ovi Ki Te ʼAtua
8, 9. ʼE hoko feafeaʼi iā ʼaho nei te ʼu palalau ʼaē ʼe tuʼu iā Asea 2:7?
8 ʼO ʼuhiga mo tona ʼapi tauhi fakalaumālie, neʼe fakakikite fēnei e Sehova: “ ʼE au luluʼi anai te ʼu puleʼaga fuli, pea ʼe tonu anai ke hū mai te ʼu meʼa ʼaē ʼe manakoʼia ʼo te ʼu puleʼaga fuli; pea ʼe au fakafonu anai ʼaki te kolōlia te fale ʼaenī.” (Asea 2:7) Ko te lea faka polofetā taulekaleka ʼaia neʼe hoko ʼi te temi ʼo Asea, ʼi te toe liliu ʼa te hahaʼi ʼo te ʼAtua ʼo toe laga te fale lotu ʼi Selusalemi. Iā ʼaho nei, ko te ʼu palalau ʼa Asea neʼe toe hoko ʼo ʼuhiga mo te fale lotu lahi fakalaumālie ʼa Sehova.
9 Ko te ʼu toko lauʼi miliona kua fakatahiʼi ʼi te fale lotu moʼo tauhi ki te ʼAtua “i te mooni mo te laumalie,” pea ʼe ʼomai ʼi te taʼu fuli ia te ʼu toko lauʼi teau afe ʼo “te ʼu meʼa ʼaē ʼe manakoʼia ʼo te ʼu puleʼaga fuli.” (Soane 4:23, 24) Ohagē lā, ʼe hā ʼi te tānaki gāue faka mālamanei ʼo te taʼu gāue 2006, ʼe ko te toko 248 327 neʼe papitema moʼo fakahā te kua foaki ʼo tonatou maʼuli kiā Sehova. ʼE fakatatau ʼi te ʼaho fuli ʼe ko he toko 680 hahaʼi foʼou ʼe papitemaʼi! Ko tanatou manako ki te moʼoni pea mo tanatou fia tauhi kiā Sehova ko he ʼu kau fai faka mafola ʼo te Puleʼaga, ʼe ko he fakamoʼoni neʼe taki moʼoni mai nātou e te ʼAtua.—Soane 6:44, 65.
10, 11. Fakahā he faʼifaʼitaki ʼe hā ai pee feafeaʼi te loto fakafetaʼi ʼa te hahaʼi ʼo ʼuhiga mo te ʼu moʼoni faka Tohi-Tapu.
10 Tokolahi ʼo te hahaʼi tauhi fakamālotoloto ʼaia neʼe taki mai nātou ki te moʼoni, ʼuhi he neʼe natou mahino ki “te kehekehe ʼo te tagata faitotonu pea mo te tagata agakovi, te kehekehe ʼo te tagata ʼaē ʼe kaugana ki te ʼAtua pea mo te tagata ʼaē ʼe mole kaugana kiā te ia.” (Malakia 3:18) Kotou fakatokagaʼi te maʼuli ʼo Wayne mo Virginia, ko te taumātuʼa neʼe nā kau ʼi te Lotu Polotesitā kae neʼe lahi tanā ʼu fehuʼi neʼe mole nā maʼu te ʼu tali kiai. Neʼe nā fēhihiʼa ki te tau pea neʼe nā hoha ʼi tanā sio ʼaē ki te tapuakiʼi e te kau takitaki lotu ia te kau sōlia pea mo te ʼu mahafu tau. ʼI te fakaʼaluʼalu ʼo tanā mātutuʼa, neʼe nā fakatokagaʼi neʼe mole kei ʼofainaʼi nāua e te hahaʼi ʼo te lotu ʼaē neʼe nā kau kiai, logolā ko Virginia neʼe fai kāpite ʼi te ʼAhotapu lolotoga ni ʼu taʼu. Neʼe nā ʼui fēnei: “Neʼe mole he tahi neʼe tatuʼu mai kiā māua mo tokaga mai ki tomā maʼuli fakalaumālie. Ko te meʼa ʼaē neʼe loto tāfito kiai te lotu, ko tamā foʼi falā. Neʼe kua mā lotovaivai.” Neʼe toe lēsili age tanā lotovaivai ʼi te fakagafua ʼaē e tanā lotu te ʼu felāveʼi fakasino ʼa te tagata mo te tagata.
11 ʼAki te temi, ko te mokopuna fafine ʼo Wayne pea mo Virginia, pea ki muli age mo tanā taʼahine neʼe nā liliu ko te ʼu Fakamoʼoni ʼa Sehova. Logolā ʼi te kamata neʼe mole fia fai e Wayne pea mo Virginia ki te moʼoni, kae ki muli age neʼe fetogi tanā manatu pea mo nā tali ke fai hanā ako Tohi-Tapu. Neʼe ʼui fēnei e Wayne: “Iā māhina pē e tolu, neʼe lahi age te ʼu meʼa ʼaē neʼe mā mahino kiai ʼi te Tohi-Tapu ʼi te ʼu meʼa ʼaē neʼe mā ako ʼi tamā lotu lolotoga taʼu e 70! Neʼe mole heʼeki mā ʼiloʼi ko te huafa ʼo te ʼAtua ʼe ko Sehova, pea neʼe mole mā ʼiloʼi he meʼa ʼo ʼuhiga mo te Puleʼaga pea mo te Palatiso ʼi te kele.” ʼAki te temi, neʼe kamata kau leva te taumātuʼa fakamālotoloto ʼaia ki te ʼu fono pea mo te minisitelio. Neʼe ʼui fēnei e Virginia: “Neʼe mā fia fakahā te moʼoni ki te hahaʼi fuli.” Neʼe nā papitema ʼi te taʼu 2005, ʼi tonā taʼu 80. Neʼe nā ʼui fēnei: “Neʼe mā maʼu tomā fāmili faka Kilisitiano moʼoni.”
Kotou Loto Fakafetaʼi Ki Tokotou “Teuteu o Uhiga Mo Te Gaue Lelei Fuape”
12. Koteā ʼaē ʼe foaki tuʼumaʼu e Sehova ki tana ʼu kaugana, pea koteā ʼaē ʼe tonu ke tou fai ke fua lelei ai kiā tātou?
12 ʼE tokoni tuʼumaʼu ia Sehova ki tana ʼu kaugana ki te fai ʼo tona finegalo. Ohagē lā, ko Noe neʼe foaki age ki ai te ʼu fakatotonu ki te faʼu ʼo te ʼaleka—ko he fakatuʼutuʼu neʼe tonu ke muliʼi fakalelei ʼi tona kamata fai! Pea neʼe hoko te faʼahi ʼaia. Koteā tona tupuʼaga? Koteʼuhi ko Noe “neʼe [ina] fai . . . ia meʼa fuli, ʼo mulimuli pē ki te ʼu meʼa ʼaē neʼe fakatotonu age e te ʼAtua. Pea neʼe ina fai ʼo mulimuli pē kiai.” (Senesi 6:14-22) Iā ʼaho nei, ʼe toe fēia pē foki, ʼe foaki e Sehova ia meʼa fuli ki tana ʼu kaugana moʼo fai ʼo tona finegalo. ʼE moʼoni, ko tatatou ʼuluaki gāue, ʼe ko te faka mafola ʼo te logo lelei ʼo te Puleʼaga ʼo te ʼAtua ʼaē kua fakatuʼu, pea mo tou tokoni kiā nātou ʼaē ʼe tuha ke natou liliu ko he kau tisipulo ʼa Sesu Kilisito. Pea ohagē pē ko Noe, ʼe fakalogo te fua lelei ʼo tatatou gāue ki tatatou fakalogo. ʼE tonu ke tou fakalogo ʼo mulimuli ki te takitaki ʼaē ʼe foaki mai e Sehova ʼaki tana Folafola pea mo tana kautahi.—Mateo 24:14; 28:19, 20.
13. Koteā te ʼu fakatuʼutuʼu ʼe fai e Sehova moʼo akoʼi ʼo tātou?
13 Ke feala hatatou fakahoko te gāue ʼaia, ʼe tonu ke tou akoako ia te “fakaʼaogaʼi lelei” ʼo tatatou meʼa gāue tāfito—te Folafola ʼa te ʼAtua—ʼaē “e aoga ia ki te faiʼakonaki, mo te fakailoilo o te hala, mo te fakatonutonu, pea mo te fakaʼako i te susitisia, koteuhi ke katoa te tagata a te Atua, kua teuteu o uhiga mo te gaue lelei fuape.” (2 Timoteo 2:15, MN; 3:16, 17) Ohagē ko te ʼuluaki sēkulō, ʼe foaki e Sehova ia he ako maʼuhiga ʼaki ia te kōkelekāsio faka Kilisitiano. Iā ʼaho nei, ʼi te ʼu kōkelekāsio e 99 770, ʼe fai ʼi te vāhaʼa fuli te Ako Faka Teokalatike pea mo te Fono Gāue moʼo tokoni kiā tātou ki te minisitelio. ʼE kotou fakahā koa tokotou loto fakafetaʼi ki te ʼu fono maʼuhiga ʼaia, ʼo kau tuʼumaʼu kiai pea mo maʼuliʼi te ʼu meʼa ʼaē ʼe kotou logo ai?—Hepeleo 10:24, 25.
14. ʼE fakahā feafeaʼi e te ʼu kaugana ʼa Sehova ia tonatou loto fakafetaʼi ki te pilivilēsio ʼaē ʼo te tauhi ki te ʼAtua? (Kotou vakaʼi te tānaki gāue ʼaē ʼe tuʼu ʼi te pāsina 27 ki te pāsina 30.)
14 ʼI te kau ki te minisitelio ia te ʼu toko lauʼi miliona kaugana ʼa te ʼAtua ʼi te mālamanei kātoa, ʼe natou fakahā ia tonatou loto fakafetaʼi ki te ako ʼaē ʼe natou maʼu. Ohagē lā, ʼi te taʼu gāue 2006, ko te kau fai faka mafola e toko 6 741 444 neʼe natou fai hola e 1 333 966 199 ʼi te ʼu faʼahi kehekehe ʼo te gāue fai faka mafola, pea mo te ʼu ako Tohi-Tapu e 6 286 618. ʼE ʼi ai mo te tahi age ʼu fakaloto mālohi ʼe tou maʼu ʼi te tānaki gāue faka mālamanei. ʼE matou fakaloto mālohiʼi koutou ke kotou vakaʼi te tānaki gāue ʼaia ke kotou lotomālohi ai, ohagē ko totatou ʼu tehina ʼo te ʼuluaki sēkulō ʼaē neʼe lotomālohi ʼi te ʼu fakamatala ʼo te tuputupu ʼo te gāue fai faka mafola ʼaē neʼe fakahoko ʼi tonatou temi.—Gaue 1:15; 2:5-11, 41, 47; 4:4; 6:7.
15. He koʼē ʼe mole tonu ke lotovaivai he tahi ʼi tana tauhi ʼaē kiā Sehova mo he loto kātoa?
15 Ko te fakavikiviki lahi ʼaē ʼe fai ʼi te taʼu fuli ki te ʼAtua, ʼe hā ai te loto fakafetaʼi lahi ʼaē ʼe maʼu e te ʼu kaugana ʼa Sehova ʼo ʼuhiga mo te pilivilēsio ʼo tanatou ʼiloʼi ia Sehova pea mo tanatou fagonogono tona huafa. (Isaia 43:10) ʼE mahino ia, ko te ʼu sākilifisio fakavikiviki ʼaē ʼe fai e ʼihi ʼo totatou ʼu tehina mo tuagaʼane kua mātutuʼa, mo mahamahaki, peʼe mo vaivavai, ʼe feala ke fakatatau ki te kiʼi meʼa ʼofa ʼa te fafine vītua. Kae ʼaua naʼa galo kiā tātou ko Sehova pea mo tona ʼAlo ʼe nā loto fakafetaʼi moʼoni kiā nātou fuli ʼaē ʼe natou tauhi age ki te ʼAtua mo he loto kātoa, heʼe natou fai ia meʼa fuli ʼe natou lavaʼi.—Luka 21:1-4; Kalate 6:4.
16. Koteā te ʼu meʼa gāue moʼo fai he ʼu ako neʼe foaki mai e te ʼAtua ʼi te ʼu taʼu ʼaenī kua hili?
16 ʼO mole gata pē totatou akoʼi e Sehova ki te minisitelio ʼaki tana kautahi, kae ʼe ina toe foaki mai kiā tātou ia he ʼu meʼa gāue lelei moʼo fai ʼo he ʼu ako Tohi-Tapu. ʼI te ʼu taʼu ʼaenī kua hili, ʼi te ʼu meʼa gāue ʼaia ʼe ʼi ai te ʼu tohi “La vérité qui conduit à la vie éternelle,” E Feala Keke Mauli O Heegata Ite Palatiso Ite Kele, Te ʼAtamai Mālama ʼAē ʼe Ina Taki Ki Te Maʼuli Heʼegata, pea ʼe mole heʼeki faʼa fualoa kua maʼu mo te tohi Koteā ʼAē ʼe Akoʼi Moʼoni Mai ʼi Te Tohi-Tapu? Ko nātou ʼaē ʼe natou loto fakafetaʼi moʼoni ki te ʼu fakatuʼutuʼu ʼaia, ʼe natou fakaʼaogaʼi lelei te ʼu tohi ʼaia ʼi te minisitelio.
Kotou Fakaʼaogaʼi Lelei Te Tohi Te Ako Mai Te Tohi-Tapu
17, 18. (a) Ko te ʼu faʼahi fea ʼo te tohi Te Ako Mai Te Tohi-Tapu ʼe kotou fia faka maʼuhigaʼi ʼi takotou fai faka mafola? (b) Koteā ʼaē neʼe ʼui e te taupau faka silikō ʼo ʼuhiga mo te tohi Te Ako Mai Te Tohi-Tapu?
17 Ko te tohi Koteā ʼAē ʼe Akoʼi Moʼoni Mai ʼi Te Tohi-Tapu? mo tona ʼu kāpite e 19, mo tona tahi ʼu fakamahino, pea mo faigafua tona ʼu kupu, ʼe ko he meʼa ʼofa ki te minisitelio. Ohagē lā, ko te kāpite 12 ʼe ko tona kupu tāfito “Te Maʼuli ʼAē ʼe Leleiʼia e Te ʼAtua.” Ko te kāpite ʼaia ʼe ina fakamahino kiā ia ʼaē ʼe ako peʼe feafeaʼi hana liliu ʼo kaumeʼa mo te ʼAtua, ko he faʼahi ʼe mole heʼeki mahino kiai te tokolahi peʼe ʼi tanatou manatu ʼe mole feala. (Sakopo 2:23) Neʼe tali feafeaʼi e te hahaʼi ia te tohi faka Tohi-Tapu ʼaia?
18 ʼE fakamatala e te taupau faka silikō ʼi Ositalalia, ko te tohi Te Ako Mai Te Tohi-Tapu ʼe ko he faʼahiga “fakaafe fakavilivili ʼo te hahaʼi ki he fai palalau.” ʼE ina toe ʼui, ʼi te faigafua ʼaupitō ʼo te fakaʼaogaʼi ʼo te tohi, “neʼe ina faka fealagia ki te ʼu kaugā fai faka mafola ʼo te Puleʼaga e tokolahi ke natou falala pea mo fiafia ʼi te minisitelio. Koia lā ʼaē ko ʼihi neʼe natou faka higoaʼi te tohi ʼaia ʼe ko he ʼaulo!”
19-21. Fakamatala he ʼu faʼifaʼitaki ʼe hā ai te maʼuhiga ʼo te tohi Te Ako Mai Te Tohi-Tapu.
19 Neʼe ʼui fēnei e te fafine ʼi Kuiana ki te pioniē neʼe fai faka mafola age ki ai: “ ʼE mahino ia ko te ʼAtua ʼaē neʼe ina fekauʼi mai koe.” Neʼe heʼeki faʼa fualoa te liʼaki ʼo te fafine ʼaia mo tanā ʼu tamaliki e toko lua e te tagata ʼaē neʼe nā nonofo. Neʼe ʼavahi age e te pioniē te tohi Te Ako Mai Te Tohi-Tapu ʼi te kāpite 1 ʼi lalo ʼo te kupu tāfito “ ʼE Malave Feafeaʼi Ki Te ʼAtua Te ʼu Aga Kovi ʼAē ʼe Hoko Kiā Tātou?” pea mo lau age te palakalafe 11. Neʼe ʼui fēnei e te pioniē: “Neʼe malave ʼaupitō ki ai te ʼu puani ʼaē neʼe au fakahā age. Neʼe tuʼu ki ʼoluga, pea ʼalu ki muli ʼo tona fale koloa, ʼo tagi mamahi ai.” Neʼe tali e te fafine ʼaia ke fai hana ako Tohi-Tapu mo he tuagaʼane ʼo te kolo pea ʼe hoko atu tana tuputupu.
20 Ko José ʼaē ʼe nofo ʼi Sepania, neʼe mate tona ʼohoana ʼi te fakaʼī. Neʼe ina kumi hona fakafīmālie ʼi te toloke, pea neʼe ina toe maʼu foki mo te tokoni ʼi te faʼahi ʼo te gāue. Kae neʼe mole lava tali te kau tōketā ki te fehuʼi ʼaē neʼe hoha tāfito kiai ia José: “He koʼē neʼe fakagafua e te ʼAtua ke mate toku ʼohoana?” ʼI te tahi ʼaho, neʼe felāveʼi ai ia José mo Francesc ʼaē neʼe gāue ʼi te sōsiete ʼaē neʼe gāue ai. Neʼe ʼui age e Francesc ke nā vakaʼi fakatahi te kāpite 11 ʼo te tohi Te Ako Mai Te Tohi-Tapu, ko tona kupu tāfito “He Koʼe Koa ʼe Fakagafua e Te ʼAtua Te ʼu Mamahi?” Pea neʼe malave ʼaupitō kiā José ia te ʼu fakamahino faka Tohi-Tapu pea mo te faʼifaʼitaki ʼo te tagata faiako pea mo te kaugā ako. Neʼe kamata ai tana ako, pea ʼalu ki te fakatahi faka silikō, pea ʼe tatuʼu nei ki te ʼu fono ʼaē ʼe fai ʼi te Fale ʼo Te Puleʼaga ʼo te kolo.
21 Ko Roman, ʼe taʼu 40, ko he tagata ʼe gāue ʼi Polonia, neʼe fakaʼapaʼapa tuʼumaʼu ki te Folafola ʼa te ʼAtua. Kae ʼi te lahi fau ʼo tana gāue, neʼe mole vave tana tuputupu ʼi tana ako Tohi-Tapu. Pea neʼe ʼalu ki te fakatahi faka tisitilike, ʼo ina maʼu ai te tohi Te Ako Mai Te Tohi-Tapu. Ki muli age, neʼe fetogi leva tana manatu ʼo ʼuhiga mo tana ako. Neʼe ina ʼui fēnei: “ ʼAki te tohi ʼaia, ko te ʼu akonaki tāfito ʼo te Tohi-Tapu neʼe tāsilo lelei.” ʼI te temi nei kua fai tuʼumaʼu te ako Tohi-Tapu ʼa Roman pea ʼe tuputupu ʼi te faʼahi fakalaumālie.
Kotou Haga Tuputupu ʼi Te Loto Fakafetaʼi
22, 23. ʼE feafeaʼi hatatou haga fakahā ia totatou loto fakafetaʼi ʼo ʼuhiga mo te ʼamanaki ʼaē neʼe foaki mai kiā tātou?
22 Ohagē ko tona fakamahino ʼi te ʼu Fakatahi Faka Tisitilike maʼuhiga “Kua Ōvi Mai Ia Te Haofaki!”, kua loto lā e te kau Kilisitiano moʼoni ke hoko mai ia te “ateaina heegata” ʼaē neʼe fakapapauʼi mai e te ʼAtua pea mo faka fealagia e te taʼataʼa ʼo Sesu Kilisito. Ko te faʼahi lelei pē e tahi ke kita fakahā tota loto fakafetaʼi lahi ki te ʼamanaki maʼuhiga ʼaia, ke tou haga fakamaʼa tātou “mai te u gaue mate koteuhi ke tou tauhi ki te Atua mauli.”—Hepeleo 9:12, 14.
23 ʼEī, ʼe ko he milakulo ia te haga fakahoko agatonu aipē e te toko ono miliona tupu kau fai faka mafola tanatou tauhi ki te ʼAtua, logolā ia te ʼu fakaneke mālohi ke natou manatu pē kiā nātou totonu. ʼE ko he tahi ʼaia fakamoʼoni ko te ʼu kaugana ʼa Sehova ʼe natou loto fakafetaʼi lahi ʼo faka maʼuhigaʼi ia te tauhi ki te ʼAtua, heʼe natou ʼiloʼi “e mole alunoa [tanatou] gaue i te Aliki.” ʼOfa pē ke tuputupu tuʼumaʼu totatou loto fakafetaʼi!—1 Kolonito 15:58; Pesalemo 110:3.
ʼE Kotou Tali Feafeaʼi Anai?
• Koteā ʼaē ʼe akoʼi mai e te tagata fai pesalemo ʼo ʼuhiga mo te loto fakafetaʼi ki te ʼAtua pea mo tana ʼu fakatuʼutuʼu fakalaumālie?
• ʼE hoko feafeaʼi iā ʼaho nei te ʼu palalau ʼaē ʼe tuʼu iā Asea 2:7?
• ʼE teuteuʼi feafeaʼi e Sehova ia tana ʼu kaugana ke natou tauhi fakalelei age kiā te ia?
• Koteā ʼaē ʼe kotou lava fai moʼo fakahā tokotou loto fakafetaʼi ki te agaʼofa ʼo Sehova?
[Fehuʼi]