Te ʼu Fehuʼi ʼa Te Kau Lautohi

ʼE feafeaʼi “te tau . . . ʼo te ʼAtua te Māfimāfi” ʼi Hala-Maketone, pea koteā anai tona ikuʼaga?—Apokalipesi 16:14, 16, MN.

Ko tona faka ʼuhiga fakanounou, ko Halamaketone ʼe ko he tau ʼe fai anai ʼi te kā haʼu ʼi te kele kātoa, pea ko Sesu Kilisito ia te Hau fakanofo ʼa Sehova, ʼe ina fakaʼauha anai ia te ʼu fili ʼo te ʼAtua. ʼE fakamahino ʼi te Tohi-Tapu ko te ʼu fili ʼaia, “te ʼu hau ʼo te kele kātoa ʼaē ʼe nofoʼi,” ʼe fakatahitahiʼi nātou e “te ʼu palalau ʼe haʼu mai te kau temonio” pea mo fakamāʼopoʼopo nātou “ki te tau ʼo te ʼaho lahi ʼo te ʼAtua te Māfimāfi . . . ki te potu ʼaē ʼe higoa ʼi te faka Hepeleo ko Hala-Maketone.”—Apokalipesi 16:14, 16, MN.

Ko te potu ʼaē ʼe fakatahitahi kiai te ʼu foʼi kautau ʼe mole ko he koga meʼa moʼoni. Ko te higoa Hala-Maketone ʼaē ʼe fakaliliu “Alamaketone” ʼi ʼihi Tohi-Tapu, ko tona faka ʼuhiga ko te “Moʼuga ʼo Mekito.” (Apokalipesi 16:16, nota ʼi te lalo pāsina) ʼE mole ʼi ai he moʼuga ʼe higoa fēia. Tahi ʼaē, ko “te u hau o te kelekele pea mo anatou fua tau” ʼe mole feala hanatou fakatahi ki he faʼahi e tahi. (Apokalipesi 19:19) Kae ko te kupu “te potu” ʼe faka ʼuhiga ki he aga ʼa te kau takitaki politike pea mo te hahaʼi ʼaē ʼe lagolago age kiā nātou—ko he aga ʼe fakafeagai kiā Sehova pea mo “te fua tau o te lagi” ʼe takitaki e Sesu Kilisito ia te “Hau o te u hau, Aliki o te u aliki.”—Apokalipesi 19:14, 16.

Koia, ko te kupu “Hala-Maketone” ʼe pipiki ki te kolo ʼāfea ʼa te kau Iselaele ko Mekito. Neʼe tuʼu te kolo ʼaia ʼi te potu ʼuesitē ʼo te Moʼuga ʼo Kalemeli, pea ko he tuʼuʼaga lelei he neʼe tuʼu ia Mekito ʼi te ʼu ala lalahi ki te ʼu fakatau koloa pea mo te tau ʼo te temi ʼaē. Neʼe ko he koga meʼa neʼe fehōkosi ai te ʼu tau lalahi ʼo te temi ʼaē. Ohagē lā, ʼi “te ʼu vai ʼo Mekito” ko te Tuʼi Fakamāu Iselaele ko Palake neʼe mālo ʼi te kautau Kanaane ʼaē neʼe takitaki e te Senelale ko Sisela. (Kau Tuʼi Fakamāu 4:12-24; 5:19, 20) ʼI te ʼu vai pē ʼaia, neʼe haga ai te Tuʼi fakamāu ko Kiteone ʼo fakaʼauha ia te kau Matianite. (Kau Tuʼi Fakamāu 7:1-22) ʼI te fakapipiki ʼo Mekito ki te tau ʼaē kā hoko mai ʼi te temi kā haʼu, ʼe fakapapau mai ʼi te Tohi-Tapu ko te ʼAtua ʼaki tona ʼAlo, ʼe ina fakaʼauha kātoa anai te kau takitaki fuli ʼaē ʼe fakafeagai age kiā te ia.

Koteā anai tona ikuʼaga? ʼI te tau ʼo Halamaketone, ʼe fakaʼauha ai anai te ʼu aga fakakākā fuli pea mo agakovi ʼaē ʼi te kele. ʼI te temi ʼaia, ʼe maʼu ai anai te kolōlia ʼi te mālamanei kātoa. (Apokalipesi 21:1-4) ʼAki te takitaki ʼofa ʼo te Puleʼaga ʼo te ʼAtua, ʼe liliu ai anai te kele ko he palatiso ʼaē kā māʼuʼuli heʼegata ai anai te kau faitotonu.—Pesalemo 37:29.