Te ʼu Fehuʼi ʼa Te Kau Lautohi

Koteā te faka ʼuhiga ʼo te ʼui ʼaē e te Tagata Tānaki, neʼe ina maʼu pē te “tagata e tahi ʼi te toko lauʼi afe tagata” kae neʼe mole ina maʼu “he fafine ʼi te ʼu fafine fuli ʼaia”?—Tagata Tānaki 7:28.

Ke tou mahino lelei ki te ʼu folafola ʼaia ʼe haʼu mai te ʼAtua, ʼe tonu muʼa ke tou mahino ki te faʼahiga manatu ʼa te ʼAtua ʼo ʼuhiga mo te hahaʼi fafine. ʼE talanoa ʼi te Tohi-Tapu kiā Lute, te taʼahine ʼo te fafine vītua ko Naomi, ohagē ko “he fafine lelei ʼaupitō.” (Lute 3:11) Iā Tāʼaga Lea 31:10, ʼe ʼui ai ko he fafine ʼohoana lelei “ ʼe maʼuhiga age ia ʼi he ʼu mataʼi tofe.” (La Bible de Jérusalem) Koteā te faka ʼuhiga ʼo te ʼu palalau ʼaenī neʼe fai e te Hau ko Salomone ʼo te Iselaele ʼāfea: “Neʼe au maʼu . . . te tagata e tahi ʼi te toko lauʼi afe tagata, kae neʼe mole au maʼu pē lā he fafine e tahi ʼe faʼafai”?—Moffatt.

ʼI te kāpite 7, ʼi te temi ʼo Salomone lagi neʼe mole faʼa maʼuhiga ia te ʼu lēkula ʼo te ʼu aga ʼaē ʼe tonu ke fai ki te hahaʼi fafine. (Tagata Tānaki 7:26) Lagi neʼe fēia ʼuhi ko te ʼu fafine matāpule ʼaē neʼe tauhi kiā Paale. Heʼe māʼiapē lā mo te Hau ko Salomone neʼe higa ki te fakahala ʼo tona ʼu tuʼuga ʼohoana matāpule. ʼE ʼui fēnei ʼi te Tohi-Tapu: “Neʼe ko tona ʼu ʼohoana e fitugeau, te ʼu fineʼaliki, pea mo te ʼu fafine e tolugeau neʼe nonofo fēia mo ia, pea ko tona ʼu ʼohoana neʼe natou fakahehē tona loto” ke tauhi ki te ʼu ʼatua hala. (1 Hau 11:1-4) Neʼe mole toe lelei foki mo te aga ʼa te hahaʼi tagata—neʼe tahitahiga te maʼu ʼo he tagata agatonu ʼi he toko lauʼi afe tagata, e teitei pē ke mole maʼu he tagata fēia. ʼI te fakaʼosi ʼo te kāpite 7, ʼe ʼui fēnei e Salomone: “Koʼenī! neʼe au maʼu pē te meʼa ʼaenī: ko te ʼAtua moʼoni neʼe ina fakatupu te ʼu tagata agatonu, kae neʼe natou kumi te ʼu tuʼuga fakatuʼutuʼu.” (Tagata Tānaki 7:29) ʼE ko he fakaʼosi ʼo ʼuhiga mo te hahaʼi ʼo te mālamanei—ʼe fakaʼaogaʼi ki te hahaʼi fuli te kupu tagata, ʼo faka ʼuhiga tatau pē ki te hahaʼi tagata pea mo te hahaʼi fafine. Koia, ko te ʼu palalau ʼaia ʼe tou lau iā Tagata Tānaki 7:28, ʼe faka ʼuhiga ki te aga ʼa te hahaʼi ʼo te temi ʼo Salomone.

Kae ʼe ʼi ai te tahi faka ʼuhiga ʼo te vaega ʼaia. ʼE toe feala pē foki ke faka ʼuhiga ki he lea faka polofetā, koteʼuhi ʼe mole heʼeki he fafine kua fakalogo kātoa kiā Sehova. Kae ʼe ʼi ai te tagata fēia—ko Sesu Kilisito.—Loma 5:15-17.

[Paki ʼo te pasina 18]

Te “tagata e tahi ʼi te toko lauʼi afe tagata”