Te ʼu Fehuʼi ʼa Te Kau Lautohi

Ko manu e fia ʼi te ʼu manu maʼa ʼaē neʼe fakahū e Noe ki te ʼaleka—ko manu e taki fitu ʼo te ʼu manu maʼa peʼe ko he ʼu hoaʼi manu e fitu?

ʼI te hili ʼo te faʼu e Noe ia te ʼaleka, neʼe ʼui fēnei age e Sehova: “Hū ki te ʼaleka, ia koe mo tou loto fale kātoa, heʼe ko koe pē ʼi te taʼiake ʼaenī neʼe au sio ʼe faitotonu ʼi ʼoku muʼa. ʼI te ʼu manu maʼa fuli, ʼe tonu anai ke ke toʼo taki fitu, he manu tagata mo he manu fafine, pea ki te ʼu manu heʼe maʼa fuli, ʼe ke toʼo taki lua anai, he manu tagata mo he manu fafine.” (Senesi 7:1, 2) Ko ʼihi fakaliliu Tohi-Tapu, ohagē ko te Tohi-Tapu Bible en français courant, mo te Tohi-Tapu Bible de Jérusalem, pea mo te Tanakh—The Holy Scriptures neʼe natou fakaliliu ia te kupu faka Hepeleo ki “te ʼu hoa e fitu.”

ʼI te lea faka Hepeleo, ko te kupusiga palalau “te ʼu fitu” ʼe faka ʼuhiga mokā tou lau, ko te “fitu, fitu.” (Senesi 7:2, nota ʼi te lalo pāsina) Kae, ko te fakaʼaogaʼi liuliuga ʼo he nūmelo ʼi te lea faka Hepeleo, ʼe mole faka ʼuhiga tuʼumaʼu ko te ʼu nūmelo ʼaia ʼe tonu ke tou hilifaki atu kiai. Ohagē lā ko te faʼifaʼitaki ʼe tou maʼu iā 2 Samuele 21:20 ʼaē ʼe fakahāhā ai ia “te tagata ʼe makehe ia tona lahi” mo ʼona “kauʼi tuhi e ono ʼi tona ʼu nima takitahi pea mo kauʼi vaʼe e ono ʼi tona ʼu vaʼe takitahi.” ʼI te faka Hepeleo, ʼe fakaʼaogaʼi liuliuga ia te mataʼi nūmelo “ono.” Logolā tona faʼahiga tohi ʼaia, kae ʼe mole faka ʼuhiga ko te tagata lahi ʼaupitō ʼaia neʼe ina maʼu he ʼu kauʼi tuhi e hogofulu-mā-lua ʼi tona ʼu nima pea mo he ʼu kauʼi vaʼe e hogofulu-mā-lua ʼi tona ʼu vaʼe. Ko tona fakaʼaogaʼi liuliuga ʼe ko te vaevae ʼaia ʼo te ʼu kauʼi tuhi ʼo te nima pea mo te ʼu kauʼi vaʼe ʼo te vaʼe.

Koteā ia te fakamahino ʼaē ʼe foaki mai e te tohi ʼo te lea faka Hepeleo ʼo ʼuhiga mo te fakaʼaogaʼi liuliuga ʼo te ʼu nūmelo? Kā tou talanoa kiā Senesi 7:2, 9, ʼe ʼui e William R. Harper ʼi te tohi Introductory Hebrew Method and Manual: “Ko te fakaʼaogaʼi liuliuga ʼo te ʼu kupusiga palalau ʼe faka ʼuhiga ki he vaevae.” ʼE ʼui e Gesenius ʼi te tohi ʼaē ko te Hebrew Grammar (Lua tohi faka Pilitānia): “Ko te vaevae ʼe hā . . . ʼi te toʼo liuliuga ʼo te ʼu mataʼi nūmelo kātoa.” ʼE tou maʼu tona faʼifaʼitaki iā Senesi 7:9, 15 pea mo 2 Samuele 21:20, ʼaē ʼe fakaʼaogaʼi liuliuga ai te mataʼi nūmelo “lua” pea mo te mataʼi nūmelo “ono.”

Koia ko te “fitu fitu” ʼaē ʼe tuʼu iā Senesi 7:2, ʼe mole faka ʼuhiga kiā hoa e fitu, peʼe 14, ohagē pē lā ko te fakaʼaogaʼi liuliuga ʼo te mataʼi nūmelo “lua” ʼe mole faka ʼuhiga ia ki he ʼu hoa e lua, peʼe fā ʼaē ʼe tuʼu iā Senesi 7:9, 15. Ko te fakaʼaogaʼi liuliuga ʼo he nūmelo ʼi te ʼu vaega fuli ʼe faka ʼuhiga ia ki te vaevae—kae mole ko he hilifaki ʼo te ʼu nūmelo. Koia, logopē lā te fakahū ʼo te ʼu manu maʼa ʼe “taki fitu” ki te ʼaleka, kae ko manu heʼe maʼa “pē ʼe lua” neʼe ina toʼo.

Koteā te manatu ʼo ʼuhiga mo te kupusiga palalau ʼaē ko “he manu tagata pea mo he manu fafine” ʼaē neʼe tohi ʼo fakapipiki ki te mataʼi nūmelo “fitu” ʼaē ʼe tuʼu iā Senesi 7:2? Neʼe lagi manatu ai ʼihi hahaʼi ki te fakatotonu age kiā Noe ke ina toʼo he ʼu hoaʼi manu e fitu ʼi te ʼatu ʼu manu maʼa kehekehe. Kae neʼe mole filifili pē te ʼu manu maʼa ʼaki ia te fakatuʼutuʼu ʼaē ke natou ili ʼi te kele. Iā Senesi 8:20, ʼi te hili pē ʼo tanatou hū mai ki tuʼa ʼi te ʼaleka, “neʼe fakatuʼu leva e Noe ia te ʼaletale maʼa Sehova pea ina toʼo te ʼu manu maʼa pea mo te ʼu manulele maʼa ʼo ina momoli ai te holokosetā kiā Sehova ʼi te ʼaletale.” Ko te sākilifisioʼi e Noe ia te fitu manu ʼo te ʼu faʼahiga manu maʼa fuli, ʼo ina taupau te ʼu hoaʼi manu ʼe tolu ʼaē neʼe toe ke ili ʼi te kele.