Te ʼu Fehuʼi ʼa Te Kau Lautohi

ʼE feafeaʼi hatatou mahino ki te ʼui ʼaē ʼa Paulo ʼe tonu ki he fafine vītua ke “ ʼohoana mo he tagata e tahi” ke feala hana maʼu he tokoni mai te kōkelekāsio faka Kilisitiano?—1 Timoteo 5:9, MN.

Kapau ʼe palalau te ʼapositolo ko Paulo ʼo ʼuhiga mo he fafine vītua, lagi ko te kupuʼi palalau “ ʼohoana mo he tagata e tahi” ʼe faka ʼuhiga ki tona maʼuli ʼi muʼa ʼo tana liliu ko he fafine vītua. ʼE faka ʼuhiga koa ʼe tonu ki te fafine vītua ke ʼohoana tuʼa tahi pē? Peʼe faka ʼuhiga koa te ʼu palalau ʼa Paulo ki he tahi age meʼa? a

Ko ʼihi ʼe natou ʼui neʼe palalau ia Paulo ʼo ʼuhiga mo te ʼu fafine vītua ʼaē neʼe ʼohoana tuʼa tahi pē. ʼE moʼoni, ʼe lahi te ʼu fenua, ko he fafine vītua neʼe mole toe ʼohoana neʼe faka ʼuhiga ʼe ko he fafine ʼe makehe tona nofo poto. Kae ko te manatu ʼaia ʼe mole ʼalutahi mo te ʼu palalau neʼe fai e Paulo ʼi tana tahi ʼu tohi. Ohagē lā, ki te kau Kilisitiano ʼo Kolonito, neʼe ina fakahā lelei logolā ʼi tana manatu ʼe fīmālie age he fafine vītua mo kapau ʼe nofo selipatea, kae “ ʼe ʼāteaina ia ke ʼohoana mo he tahi ʼe loto ki ai, kae ʼi te ʼAliki pē.” (1 Kolonito 7:39, 40, MN; Loma 7:2, 3) Tahi ʼaē, ʼi tana tohi kiā Timoteo, neʼe ʼui fēnei e Paulo: “E au loto ke ohoana ia [te kau vītua ʼaē ʼe] kei finemui.” (1 Timoteo 5:14) Koia, kapau ʼe toe fia ʼohoana he fafine vītua neʼe mole tonu ke valokiʼi.

ʼE tonu ke tou mahino feafeaʼi ki te ʼu palalau ʼa Paulo ʼaē kiā Timoteo? ʼE fakaʼaogaʼi tuʼa tahi pē ʼi te vaega ʼaia ia te kupuʼi palalau “ ʼohoana mo he tagata e tahi.” ʼI te lea faka Keleka, ʼe faka ʼuhiga ko he “fafine ki he tagata e tahi.” ʼE tatau te kupuʼi palalau ʼaia mo ʼaē neʼe fakaʼaogaʼi tuʼa lahi e Paulo ʼi tana ʼu tohi, tāfito lā ke “ ʼohoana mo he fafine pē e tahi,” peʼe ko he “tagata ki he fafine e tahi” ʼi te lea faka Keleka. (1 Timoteo 3:2, 12, MN; Tito 1:6) Neʼe fakaʼaogaʼi e Paulo te kupuʼi palalau ʼaē ‘ke ʼohoana mo he fafine pē e tahi’ ʼi tana fakahāhā te lisi ʼo te ʼu lēkula ʼaē ʼe fakamaʼua ki te kau taupau faka Kilisitiano pea mo te ʼu tagata faifekau faka minisitelio. ʼI te ʼaluʼaga ʼaia, ʼe faka ʼuhiga tāfito kiā ia ʼaē ʼe tuha mo he pilivilēsio ʼi te kōkelekāsio faka Kilisitiano, ko he tagata, peʼe kua ʼohoana, ʼe tonu ke agatonu ki tona ʼohoana pea ʼaua naʼa ʼi ai hona mele. b Kapau ʼe moʼoni te faʼahi ʼaia ki te hahaʼi tagata, pea ko te kupuʼi palalau ʼaē iā 1 Timoteo 5:9 ʼe toe fakaʼaogaʼi tatau pē ki te hahaʼi fafine: Ke feala ki he fafine vītua hana maʼu he tokoni mai te kōkelekāsio, ʼe tonu ke fakalogo pea mo agatonu ki tona ʼohoana ʼi tana kei maʼuli pea ke ʼāteaina mai he mele. Ko te tahi ʼu lēkula ke feala hana maʼu he tokoni mai te kōkelekāsio ʼaē neʼe tuʼu ʼi te lisi ʼa Paulo, ʼe natou tuhiʼi fuli pē te faʼahiga fafine ʼaia.—1 Timoteo 5:10.

[Kiʼi nota]