Te ʼu Gāue ʼAē ʼe Fai e Te Kau ʼĀselo Ki Te Mālamanei

“ ʼI te hili ʼo te ʼu meʼa ʼaia, neʼe au sio ki te tahi ʼāselo ʼe hifo mai te lagi, mo te pule lahi . . . Pea neʼe kalaga ʼaki he leʼo mālohi ʼo ʼui māʼana: ‘Kua tō! Kua tō ia Papiloni Lahi!’ ”—Apokalipesi 18:1, 2, MN.

1, 2. Koteā ʼaē ʼe hā mai ko Sehova ʼe ina fakaʼaogaʼi te kau ʼāselo moʼo fakahoko tona finegalo?

 ʼI TANA ʼaunofo ʼi te motu ʼo Patemosi, ko te ʼapositolo matuʼa ʼofainaʼi ko Soane neʼe sio ki te ʼu fakakikite. “ ʼAki te [takitaki ʼa] te laumālie” neʼe sio ki te ʼu meʼa taulekaleka ʼi “te ʼaho ʼo te ʼAliki.” ʼE kamata te ʼaho ʼaia ʼaki te fakanofo hau ʼo Sesu Kilisito ʼi te taʼu 1914, ʼo aʼu ki te fakaʼosi ʼo te ʼAfio Ia Taʼu ʼe Afe ʼa Sesu.—Apokalipesi 1:10, MN.

² Neʼe mole ko Sehova ʼAtua totonu ʼaē neʼe ina fakahā te ʼu meʼa ʼaia kiā Soane. Neʼe ina fakaʼaogaʼi te meʼa gāue. ʼE ʼui fēnei iā Apokalipesi 1:1 (MN ): “Ko te fakahā ʼa Sesu Kilisito, ʼaē neʼe foaki age e te ʼAtua kiā te ia, ke ina fakahā ki tana kau kaugana te ʼu meʼa ʼaē kā ʼamanaki hoko. Pea neʼe ina fekauʼi tana ʼāselo, pea ʼaki ia ia neʼe ina fakahā ʼaki he ʼu fakaʼiloga ki tana kaugana ko Soane.” Ko Sehova ʼaki ia Sesu, neʼe ina fakaʼaogaʼi te ʼāselo moʼo fakahā kiā Soane te ʼu meʼa taulekaleka ʼaē kā hoko ʼi “te ʼaho ʼo te ʼAliki.” ʼI te tahi temi, ko Soane neʼe toe “sio ki te tahi ʼāselo ʼe hifo mai te lagi, mo te pule lahi.” Koteā te gāue ʼaē neʼe foaki age ki te ʼāselo ʼaia? “Neʼe kalaga ʼaki he leʼo mālohi ʼo ʼui māʼana: ‘Kua tō! Kua tō ia Papiloni Lahi!’ ” (Apokalipesi 18:1, 2, MN ) Neʼe maʼu e te ʼāselo mālohi ʼaia ia te pilivilēsio ke ina tala te tō ʼa Papiloni Lahi, te kautahi faka mālamanei ʼo te ʼu lotu hala. Koia, ʼe tou tui papau ʼe fakaʼaogaʼi e Sehova ia te kau ʼāselo ʼo ʼuhiga mo te fakahoko ʼo tona finegalo. ʼI muʼa ʼo tatatou vakavakaʼi fakalelei ʼi te fakatuʼutuʼu ʼa te ʼAtua ia te gāue ʼa te kau ʼāselo ʼaia pea mo tona malave ʼaē kiā tātou, tou vakaʼi age muʼa ia te kamataʼaga ʼo te ʼu laumālie fakapulipuli ʼaia.

Neʼe Feafeaʼi Te Kamataʼaga ʼo Te Kau ʼĀselo?

 3. Koteā te ʼu manatu ʼe mole totonu ʼe maʼu e te tokolahi ʼo ʼuhiga mo te kau ʼāselo?

³ Ko te ʼu toko lauʼi miliona hahaʼi iā ʼaho nei ʼe natou tui ʼe maʼuli moʼoni te kau ʼāselo. Kae tokolahi iā natou ʼe mole totonu tanatou ʼu manatu ʼo ʼuhiga mo te ʼu ʼāselo pea mo tonatou kamataʼaga. Ohagē lā, ko ʼihi hahaʼi lotu ʼi tanatou manatu mokā mate he tahi neʼe tou ʼoʼofa ai, pea ʼe hake ia ki te lagi pea ʼe liliu ia ko he ʼāselo. ʼE ko he akonaki koa ʼe akoʼi mai ʼi te Folafola ʼa te ʼAtua ʼo ʼuhiga mo te fakatupu pea mo te tupuʼaga ʼo te fakatupu ʼo te kau ʼāselo?

 4. Koteā ʼaē ʼe ʼui mai ʼi te Tohi-Tapu ʼo ʼuhiga mo te kamataʼaga ʼo te kau ʼāselo?

⁴ Ko te ʼāselo ʼaē ʼe lahi age tona mālohi pea mo ina maʼu ia te pule—ʼe ko te ʼāselo pule—ʼe higoa ko Mikaele te ʼalekaselo. (Suta 9) ʼE ko Sesu Kilisito pē. (1 Tesalonika 4:16) Kua hili te ʼu taʼu kua fualoa kiai, ʼi te temi ʼaē neʼe fakatuʼutuʼu ai e Sehova ke ina fakatupu ia meʼa fuli, neʼe ko tona ʼAlo ʼaia ʼaē neʼe ina ʼuluaki fakatupu. (Apokalipesi 3:14) Ki muli age, ʼaki tona ʼAlo ʼuluaki tupu ʼaia, neʼe fakatupu leva e Sehova ia te kau ʼāselo fuli ʼaē. (Kolose 1:15-17) ʼO ʼuhiga mo tona ʼu foha ʼaia ʼi te lagi, neʼe fehuʼi fēnei age e Sehova ki te pāteliaka ko Sopo: “Neʼe ke ʼifea ʼi te temi ʼaē neʼe au fakatuʼu ai te kele? Fakahā mai kiā te au, mo kapau ʼe ke lava fakamahino mai. . . . Ko ai ʼaē neʼe ina fakatuʼu tona maka tuliki, ʼi te temi neʼe kalaga fakafiafia fakatahi ai ia te ʼu fetuʼu ʼaho pea mo fai ai he ʼu kalaga ʼo te ʼu foha fuli ʼo te ʼAtua ?” (Sopo 38:4, 6, 7) ʼE hā lelei mai, neʼe ko te ʼAtua ʼaē neʼe ina fakatupu ia te kau ʼāselo pea neʼe kua fualoa tonatou tutupu ʼi te tagata.

 5. ʼE feafeaʼi te fakaʼaluʼalu ʼo te gāue ʼa te kau ʼāselo?

 ⁵ ʼE ʼui fēnei iā 1 Kolonito 14:33: “Ko te Atua e mole ko te Atua o te maveuveu, kae o te tokalelei.” Pea ki te faʼahi ʼaia, ʼe vahe tolu te fakaʼaluʼalu ʼo te gāue ʼa te ʼu foha fakalaumālie ʼa Sehova: (1) ko te kau selafimi, ʼe natou gāue ʼi te ʼafioʼaga ʼo te ʼAtua, ʼe natou tala tona māʼoniʼoni, pea mo puipui te maʼa fakalaumālie ʼo tana ʼu kaugana; (2) ko te kau kelupimi, ʼe natou puipui te māʼoluga ʼo Sehova; pea (3) ko te tahi kau ʼāselo, ʼe natou fai tona finegalo. (Pesalemo 103:20; Isaia 6:1-3; Esekiele 10:3-5; Taniela 7:10) Ko te ʼu ʼaluʼaga fea ʼaē ʼe tokoni mai ai te kau ʼāselo ʼaia ki te hahaʼi?—Apokalipesi 5:11.

Koteā Te Gāue ʼAē ʼe Fai e Te Kau ʼĀselo?

 6. Neʼe fakaʼaogaʼi feafeaʼi e Sehova te kau kelupimi ʼo ʼuhiga mo te ʼōloto ʼo Eteni?

⁶ Ko te ʼuluaki talanoa fakahagatonu ʼo ʼuhiga mo te kau ʼāselo, ʼe fai iā Senesi 3:24, ʼaē ʼe tou lau fēnei ai: “[Ko Sehova] neʼe ina kapu ai leva te tagata pea mo ina fakatuʼu ʼi te potu ʼesitē ʼo te ʼōloto ʼo Eteni te ʼu kelupimi pea mo te mataʼi heletā ulo neʼe mamino tuʼumaʼu moʼo leʼoleʼo ʼo te ala ʼo te fuʼu ʼakau ʼo te maʼuli.” Ko te kau kelupimi ʼaia neʼe natou leʼoleʼo te hūʼaga ʼo te ʼōloto ʼo Eteni ke ʼaua naʼa toe hū ia Atama mo Eva ki loto. Neʼe ko te kamataʼaga ʼaia ʼo te hisitolia ʼo te mālamanei. Koteā te gāue ʼa te kau ʼāselo talu mai te temi ʼaia?

 7. Koteā ʼaē ʼe hā mai ʼi te faka ʼuhiga ʼo te ʼu ʼuluaki kupu ki te kupu “ ʼāselo” ʼo ʼuhiga mo te gāue ʼi te ʼu gāue ʼaē ʼe fai e te kau ʼāselo?

⁷ ʼE teitei tuʼa 400 te talanoa ʼi te Tohi-Tapu ki te kau ʼāselo. Ko te ʼu kupu ʼi te lea faka Hepeleo pea mo faka Keleka ʼo ʼuhiga mo te kupu “ ʼāselo” neʼe fakaliliu ʼaki te kupu “ ʼave logo.” Koia ko te kau ʼāselo neʼe natou faka felōgoi ia te ʼAtua pea mo te tagata. Ohagē ko tatatou vakaʼi ʼi te ʼu ʼuluaki palakalafe e lua ʼo te ʼalatike ʼaenī, neʼe fakaʼaogaʼi e Sehova ia te ʼāselo moʼo fakahā tana logo ki te ʼapositolo ko Soane.

8, 9. (a) Neʼe malave feafeaʼi kiā Manoa pea mo tona ʼohoana ia te ʼu ʼaʼahi ʼa te ʼāselo? (b) Koteā te ako ʼe feala ke maʼu e te ʼu mātuʼa ʼi te felōgoi ʼaē ʼa Manoa mo te ʼāselo ʼa te ʼAtua?

⁸ ʼE toe fakaʼaogaʼi foki te kau ʼāselo moʼo tokoni pea mo fakaloto mālohiʼi te ʼu kaugana ʼa te ʼAtua ʼaē ʼi te kele. ʼI te temi ʼo te kau Tuʼi Fakamāu ʼo Iselaele, ko Manoa pea mo tona ʼohoana paʼa neʼe nā fakaʼamu ʼaupitō ki hanā tamasiʼi. Neʼe fekauʼi e Sehova tana ʼāselo ke ʼalu ki te ʼohoana ʼo Manoa ʼo fakahā ki ai ʼe ina fānauʼi anai he tama. ʼE tou lau fēnei ʼi te fakamatala: “Koʼenī ʼe ke faitama anai, pea ʼe ke fānauʼi anai he tama; ʼe mole tonu anai ke tele tona ʼulu, koteʼuhi ko te fānau ʼaia ʼe liliu anai ko he Nasilea ʼa te ʼAtua ʼi te temi pē ʼaē ʼe ke fānauʼi ai; pea ʼe ko ia ʼaē kā ina fakatuʼutuʼu anai ia te haofaki ʼo Iselaele mai te kau Filisitini.”—Kau Tuʼi Fakamāu 13:1-5.

⁹ Pea neʼe fānauʼi moʼoni e te ʼohoana ʼo Manoa ia he tamasiʼi tagata, ko Samisoni, neʼe logona ʼi te hisitolia faka Tohi-Tapu. (Kau Tuʼi Fakamāu 13:24) ʼI muʼa ʼo te tupu ʼo te tamasiʼi, neʼe kole e Manoa ki te ʼāselo ke toe liliu mai kiā nāua ʼo fakahā age te faʼahiga akoʼi ʼo te tama. Neʼe kole fēnei age e Manoa: “ ʼE feafeaʼi anai te maʼuli ʼo te tamasiʼi, pea mo tana gāue?” Neʼe toe fakahā age e te ʼāselo ʼa Sehova ia te ʼu fakatotonu ʼaē neʼe kua ina ʼui age ki te ʼohoana ʼo Manoa. (Kau Tuʼi Fakamāu 13:6-14) Neʼe lagi lotomālohi ia Manoa ʼi tana logo ki te ʼu fakatotonu! ʼE mole kei ʼaʼahi fēia tātou e te kau ʼāselo iā ʼaho nei, kae ohagē ko Manoa, ʼe feala ki te ʼu mātuʼa ke natou kumi ia te takitaki ʼa Sehova mokā natou ako tanatou fānau.—Efeso 6:4.

10, 11. (a) Neʼe feafeaʼi ia Eliseo pea mo tana tagata kaugana ʼi te temi ʼaē neʼe ʼātakai ai nāua e te kautau Silia? (b) ʼE feafeaʼi hona ʼaoga kiā tātou te meʼa ʼaia neʼe hoko?

¹⁰ Neʼe ʼiloga makehe te tokoni ʼa te kau ʼāselo ʼi te temi ʼo te polofetā ko Eliseo. Neʼe nofo ia Eliseo ʼi Totane, ko he kolo ʼo Iselaele. ʼI te tahi ʼaho neʼe ʼala uhuuhu ake ia te tagata kaugana ʼa Eliseo pea mo sio ki tuʼa, kua ʼātakai te kolo e te ʼu hōsi pea mo te ʼu sāliote tau. Neʼe fekauʼi e te hau ʼo Silia te foʼi tau mālohi ke ʼolo ʼo puke ia Eliseo. Neʼe feafeaʼi te tagata kaugana ʼa Eliseo ʼi te temi ʼaia? Neʼe mataku, lagi neʼe nofo tuʼania, pea mo kalaga fēnei: “ ʼAliki! Koteā ʼaē kā tā fai?” Heʼe kiā ia, ʼe mole honā holaʼaga. Kae neʼe tali age e Eliseo: “ ʼAua naʼa ke mataku heʼe tokolahi  age ia nātou ʼaē ʼe kau mo tāua iā nātou ʼaē ʼe kau mo nātou.” Koteā tona faka ʼuhiga?—2 Hau 6:11-16.

¹¹ Neʼe ʼiloʼi e Eliseo neʼe ʼi ai te kau ʼāselo neʼe nonofo mo nāua. Kae neʼe mole sio tana tagata kaugana ki he meʼa. Koia “neʼe faikole ia Eliseo pea mo ʼui māʼana: ‘Ê Sehova, fakalelei ʼo ʼavahi ʼona mata, ke feala hana sio.’ Neʼe ʼavahi atu aipē e Sehova te ʼu mata ʼo te kaugana, ʼo feala ai ke sio; pea koʼenī! ko te koga meʼa moʼugaʼia neʼe lahi ai te ʼu hōsi pea mo te ʼu sāliote tau afi neʼe natou takatakai ia Eliseo.” (2 Hau 6:17) Neʼe kua feala leva ʼi te temi ʼaia ke sio te tagata faifekau ki te kau ʼāselo. ʼAki te sio fakalaumālie, ʼe feala mo tātou ke tou sio ki te ʼu ʼāselo ʼaia, pea ʼe takitaki nātou fuli ʼaia e Sehova pea mo Kilisito, ʼo natou tokoni pea mo puipui te ʼu kaugana ʼa Sehova.

Ko Te Tokoni ʼa Te Kau ʼĀselo ʼi Te Temi ʼo Kilisito

12. Koteā te tokoni ʼaē neʼe maʼu e Malia mai te ʼāselo ko Kapeliele?

¹² Kotou fakatokagaʼi te tokoni ʼaē neʼe maʼu e te tāupoʼou Sutea ko Malia ʼi tana logo ki te logo ʼaenī: “ ʼE ke faitamaʼi anai ʼi tou ʼalo pea ʼe ke faʼeleʼi anai he tama, pea ʼe tonu anai ke ke fakahigoaʼi ko Sesu.” ʼI muʼa ʼo te fakahā ʼo te logo ʼaia, ko te ʼāselo ko Kapeliele, ʼaē neʼe fekauʼi ifo e te ʼAtua, neʼe ina ʼui fēnei age kiā te ia: “ ʼAua naʼa ke mataku, Malia, koteʼuhi kua leleiʼia koe e te ʼAtua.” (Luka 1:26, 27, 30, 31, MN ) Lagi neʼe lotomālohi ia Malia ʼi tana logo ki te ʼu palalau ʼaia ʼe fakamoʼoni age ʼe ina maʼu te ʼofa ʼo te ʼAtua!

13. Neʼe tokoniʼi feafeaʼi Sesu e te kau ʼāselo?

¹³ Ko te tahi faʼifaʼitaki ʼa te tokoni ʼa te kau ʼāselo neʼe hoko ʼi te ʼosi ʼahiʼahiʼi tuʼa tolu e Satana ia Sesu ʼi te toafa. ʼE tou lau ʼi te fakamatala, ʼi te ʼosi ʼo tona ʼahiʼahiʼi, pea “hoki tukunoaʼi ai e te Tēvolo, pea koʼenī te kau ʼāselo neʼe ʼomai pea natou tauhi ia ia.” (Mateo 4:1-11, MN ) Neʼe hoko te meʼa fēia ʼi te pō ʼi muʼa ʼo te matehi ʼo Sesu. ʼI te loto hoha ʼa Sesu, neʼe tuʼutuli ia Sesu pea mo kamata faikole, ʼo ʼui māʼana: “ ‘Tamai, kapau ʼe ke loto ki ai, fakamamaʼo ia te au te ʼipu nei. Kae, ke mole ko toku finegalo ʼaē ʼe tonu ke fai, kae ʼo koe ia.’ Pea neʼe hā kiā te ia te ʼāselo mai te lagi pea neʼe ina fakaloto mālohiʼi ia ia.” (Luka 22:42, 43, MN ) Kae ʼe feafeaʼi te tokoni ʼa te kau ʼāselo kiā tātou iā ʼaho nei?

Ko Te Tokoni ʼa Te Kau ʼĀselo ʼi Totatou Temi

14. Ko te ʼu fakataga fea ʼaē neʼe kātakiʼi e te kau Fakamoʼoni ʼa Sehova ʼi totatou temi, pea neʼe koteā tona ʼu fua?

¹⁴ Kā tou vakaʼi te hisitolia ʼo te kau Fakamoʼoni ʼa Sehova ʼo totatou temi ʼo ʼuhiga mo tanatou fai faka mafola, ʼe mole tou sio koa lā ki te tokoni ʼa te kau ʼāselo kiā natou? Ohagē lā, neʼe lava kātakiʼi e te ʼu kaugana ʼa Sehova ia te  ʼu fakataga ʼa te kau Nasi ʼi Siamani pea mo te Potu ʼUesitē ʼo Eulopa pea ʼi muʼa ʼo te Lua Tau Faka Mālamanei pea lolotoga te tau ʼaia (1939-1945). Lolotoga te temi fualoa neʼe kātakiʼi e te ʼu kaugana ʼa Sehova ia te fakataga ʼi te temi takitaki ʼa te ʼu pule Katolika Fasciste ʼi Italia, mo Sepania, pea mo Potukalia. Pea lolotoga te ʼu taʼu neʼe natou kātakiʼi te fakataga ʼi te Lusia Kominisi ʼāfea pea mo te ʼu puleʼaga ʼaē neʼe maluʼi e te puleʼaga Lusia. Ko te tahi faʼifaʼitaki, ʼe ko te kātakiʼi e te kau Fakamoʼoni ʼa Sehova te fakataga ʼi ʼihi fenua ʼo Afelika. a Mole heʼeki faʼa fualoa, neʼe tau te ʼu kaugana ʼa Sehova mo te ʼu fakataga mālohi ʼi te fenua ko Georgia. Neʼe faiga mālohi ia Satana ke ina fakagata te gāue ʼa te kau Fakamoʼoni ʼa Sehova. Kae ko tanatou kautahi neʼe tuʼu maʼu logolā te ʼu fakataga ʼaia pea neʼe natou tuputupu. Neʼe fealagia te faʼahi ʼaia ʼuhi ko te puipui ʼaē neʼe natou maʼu mai te kau ʼāselo.—Pesalemo 34:7; Taniela 3:28; 6:22.

15, 16. ʼE feafeaʼi te tokoni ʼa te kau ʼāselo ki te minisitelio faka mālamanei ʼa te kau Fakamoʼoni ʼa Sehova?

¹⁵ Neʼe fakalogo te kau Fakamoʼoni ʼa Sehova ki te fakatotonu ʼaē neʼe fai age kiā nātou ke natou faka mafola te logo lelei ʼo te Puleʼaga ʼo te ʼAtua ʼi te kele kātoa pea mo fai ni ʼu tisipulo, ʼo akoʼi age te ʼu moʼoni faka Tohi-Tapu ki te hahaʼi ʼaē ʼe fia logo ʼi te ʼu faʼahi fuli. (Mateo 28:19, 20) Kae ʼe natou ʼiloʼi lelei ʼe mole feala hanatou fai ia te fakatotonu ʼaia mo kapau ʼe mole natou maʼu te tokoni ʼa te kau ʼāselo. Tahi ʼaē, ko te manatu iā Apokalipesi 14:6, 7 (MN ), neʼe fakaloto mālohi tuʼumaʼu kiā nātou. ʼE tou lau fēnei ʼi te vaega ʼaia: “Neʼe au [te ʼapositolo ko Soane] sio ki te tahi ʼāselo ʼe lele ʼi te lotomālie ʼo te lagi, pea neʼe ʼi ai tana logo lelei ʼe heʼegata ke ina kalagaʼi ohagē he evaselio kiā nātou ʼaē ʼe nonofo ʼi te kele, pea mo te puleʼaga kehekehe, te telepī kehekehe, te lea kehekehe pea mo te hahaʼi kehekehe, ʼo ina ʼui leʼo mālohi: ‘Kotou manavasiʼi ki te ʼAtua pea mo kotou faka kolōlia kiā te ia, heʼe kua hoko mai te hola ʼo tana fakamāu, pea ke kotou ʼatolasio kiā te Ia ʼaē neʼe ina faʼu te lagi mo te kele mo te tai pea mo te ʼu matapuna vai.’ ”

¹⁶ ʼE hā lelei mai ʼi te ʼu palalau ʼaia, neʼe tokoni te kau ʼāselo pea mo natou takitaki ia te gāue fai faka mafola faka mālamanei ʼa te kau Fakamoʼoni ʼa Sehova. ʼE fakaʼaogaʼi e Sehova tana kau ʼāselo moʼo takitaki te hahaʼi fakamālotoloto ki tana kau Fakamoʼoni. ʼE toe takitaki foki e te kau ʼāselo ia te kau Fakamoʼoni ki te hahaʼi ʼaē ʼe tuha mo nātou ia te logo lelei. Tuʼa lahi ʼe tou logo, ko he Fakamoʼoni ʼa Sehova neʼe felāveʼi mo he tagata peʼe ko he fafine ʼi te temi tonu pē ʼaē neʼe tau ai mo hona fihifihia pea mo ʼaoga kiai he tokoni fakalaumālie, pea koia ʼaē ʼe mole tou lava ʼui ai neʼe hoko fēia pē.

Ko He Gāue Fakatalakitupua Kā Natou Fakahoko ʼi Te Temi Kā Hoko Mai

17. Koteā ʼaē neʼe hoko ki te kau Asilia ʼaki pē te ʼāselo e tahi?

¹⁷ ʼE fai e te kau ʼāselo ia te tahi gāue, kae mole gata pē ʼi tanatou gāue ko te kau faifekau pea mo foaki he fakaloto mālohi ki te kau ʼatolasio ʼa Sehova. ʼI te temi muʼa, neʼe natou fakahoko te ʼu tautea ʼa te ʼAtua. Ohagē lā ʼi te valu sēkulō ʼi muʼa ʼo totatou temi, neʼe ʼamanaki ʼohofiʼi ia Selusalemi e te foʼi kautau Asilia. Neʼe koteā te tali ʼa Sehova ki te faʼahi ʼaia? Neʼe ina ʼui fēnei: “ ʼE mahino ia, ʼe au puipui anai te kolo ʼaia moʼo haofaki, ʼuhi ko au pea ʼuhi ko Tavite taku tagata kaugana.” ʼE tou lau ʼi te fakamatala ʼi te Tohi-Tapu ia te meʼa ʼaē neʼe hoko: “Ko te meʼa neʼe hoko ʼi te pō ʼaia, ko te ʼāselo ʼa Sehova neʼe hū ki tuʼa pea neʼe ina fakaʼauha ʼi te nofoʼaga ʼo te kau Asilia ia te toko teau valugofulu-mā-nima afe. ʼI te ʼaʼala ake ʼa te hahaʼi ʼi te kei hegihegi ʼo te ʼaho, koʼenī ko nātou fuli neʼe ko te kau mātea.” (2 Hau 19:34, 35) ʼE mole feafeala ia ke fakatatau ia te ʼu kautau fakatagata mo te mālohi ʼa he ʼāselo pē e tahi!

18, 19. Koteā te gāue fakatalakitupua ʼe fai anai e te kau ʼāselo ʼi te kā hau, pea ʼe malave feafeaʼi anai ki te mālamanei?

¹⁸ ʼE fakaʼaogaʼi anai te kau ʼāselo moʼo fakahoko  te ʼu tautea mālohi ʼa te ʼAtua ʼi te kā haʼu. Kua vave pē anai te haʼu ʼa Sesu “ ʼaki tana kau ʼāselo mālohi ʼi he afi ulo.” Ko tanatou gāue kā natou fai, ʼe fakahoko anai “te lagavaka kiā nātou ʼaē ʼe mole natou ʼiloʼi te ʼAtua pea mo nātou ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu.” (2 Tesalonika 1:7, 8, MN ) ʼE malave mālohi anai te faʼahi ʼaia ki te mālamanei! Ko nātou ʼaē ʼe fakafisi ki te logo lelei ʼo te Puleʼaga ʼo te ʼAtua ʼaē ʼe tala nei ʼi te kele kātoa, ʼe fakaʼauha anai ia nātou. Gata pē kiā nātou ʼaē ʼe natou kumi ia Sehova, mo te faitotonu, mo te agavaivai, ʼe “fufū anai [ia nātou] ʼi te ʼaho ʼo te hauhau ʼo Sehova” pea ʼe mole fakaʼauha anai ia nātou.—Sofonia 2:3.

¹⁹ ʼE feala hatatou loto fakafetaʼi ki te fakaʼaogaʼi e Sehova tana kau ʼāselo mālohi moʼo tokoni pea mo fakaloto mālohiʼi tana ʼu kaugana ʼi te kele. Ko totatou loto fakafetaʼi ki te gāue ʼa te kau ʼāselo ʼi te fakatuʼutuʼu ʼa te ʼAtua ʼe fakaloto fīmālie tāfito, heʼe ʼi ai te kau ʼāselo neʼe natou fakafeagai kiā Sehova kae natou fakalogo ki te takitaki ʼa Satana. ʼE tou vakaʼi anai ʼi te ʼalatike kā hoa mai te ʼu puleʼaki ʼaē moʼo puipui ia te kau Kilisitiano moʼoni mai te ʼu fakahala ʼa Satana te Tēvolo pea mo tana kau temonio.

[Kiʼi nota]

Koteā ʼAē Neʼe Kotou Ako?

• Neʼe feafeaʼi te kamataʼaga ʼo te kau ʼāselo?

• Neʼe feafeaʼi te fakaʼaogaʼi ʼo te kau ʼāselo ʼi te temi ʼo te kau Pāteliaka?

• Koteā ʼaē ʼe fakahā mai iā Apokalipesi 14:6, 7 ʼo ʼuhiga mo te gāue ʼa te kau ʼāselo ʼi totatou temi?

• Koteā te gāue fakatalakitupua ʼe fai anai e te kau ʼāselo ʼi te kā haʼu?

[Fehuʼi]

[Paki ʼo te pasina 9]

“ ʼE tokolahi age ia nātou ʼaē ʼe kau mo tāua iā nātou ʼaē ʼe kau mo nātou”