ʼAua Naʼa Veteki e Te Tagata Te Meʼa ʼAē Kua Haʼi e Te ʼAtua

“E mole foki kei na tokolua, kae ko te kakano e tahi. Koia, ko te mea ae kua haʼi e te Atua, ke aua naa veteki e te tagata.”—Mateo 19:6.

1, 2. He koʼē ʼe fakahā ʼi te Tohi-Tapu pea mo te maʼuli māhani, ʼe hoko anai ʼi ʼihi temi te ʼu fihifihia ʼi te maʼuli ʼo te ʼu taumātuʼa?

 KOTOU fakakaukauʼi age muʼa kua kotou tokalelei ke kotou ʼolo ʼo haʼele mo he motokā. ʼE hoko anai koa he ʼu fihifihia ʼi takotou ʼolo ʼaia? ʼEī, ʼe ʼi ai pē anai he ʼu fihifihia ʼe lava hoko! Ohagē lā, ʼe lagi tuʼu kovi anai te lagi, ʼo tonu ai ke kotou ʼolo māmālie ʼi te motokā pea mo haʼele tokaga. ʼI he tahi lakaga, ʼe lagi ko he fihifihia ʼo ʼuhiga mo te masini ʼo te motokā pea ʼe mole kotou poto ʼi tona faʼu, ʼo tonu ai ke kotou tau te motokā ʼi te kauala kae kotou ʼolo ʼo kumi tokoni. Kā hoko he ʼu meʼa fēia, ʼe tonu koa ke kotou ʼui ʼe mole tonu ke kamata fēia te ʼaho pea ʼe lelei age pē hakotou mole toʼo te motokā? Kailoa. Kā kotou fakatuʼutuʼu ke kotou ʼolo mamaʼo, pea ʼe kotou ʼiloʼi pē ʼe lava hoko he ʼu tuʼutāmaki faka punamaʼuli, koia ʼe kotou fai ai anai ni ʼu puleʼaki moʼo teuteuʼi te ʼu faʼahi ʼaia.

² ʼE toe fēia mo te ʼohoana. ʼE ʼi ai pē te ʼu fihifihia, pea ʼaua leva naʼa manatu he tama mo he taʼahine ʼe nā fia ʼohoana, ʼe nā maʼuli fiafia pē anai. ʼI te Tohi-Tapu, ʼe ʼui fakahagatonu iā 1 Kolonito 7:28 (MN ), ko te ʼu tagata ʼohoana pea mo te ʼu fafine ʼohoana ʼe tau anai mo he ʼu “mamahi ʼi tonatou kakano.” He koʼē ʼe hoko te faʼahi ʼaia? Koteʼuhi ʼe heʼe haohaoa te ʼu tagata ʼohoana pea mo te ʼu fafine ʼohoana, pea ʼe tou māʼuʼuli nei ʼi te “u temi faigataa i te u aho fakamuli.” (2 Timoteo 3:1; Loma 3:23) Koia, māʼiapē lā mo he taumātuʼa ʼe nā felōgoi lelei, pea mo mālolohi ʼi te faʼahi fakalaumālie kae ʼi ʼihi temi ʼe nā tau anai mo he ʼu fihifihia.

 3. (a) Koteā te manatu ʼa te tokolahi ʼo te mālama ʼaenī ʼo ʼuhiga mo te ʼohoana? (b) He koʼē ʼe faiga te kau Kilisitiano ke natou puipui tonatou maʼuli faka taumātuʼa?

³ ʼI te mālama ʼaenī, kā felāveʼi te ʼu taumātuʼa mo ni ʼu fihifihia, ko te puleʼaki pē kiai ʼe ko te māvete. ʼE lahi te ʼu fenua, kua lahi ʼaupitō ia te māvete ʼa te ʼu taumātuʼa. Kae ko te kau Kilisitiano moʼoni ʼe mole natou foimo māvete mokā hoko he ʼu fihifihia, ʼe natou kumi puleʼaki moʼo fakatokatoka te faʼahi ʼaia. Koteā tona tupuʼaga? Heʼe kiā nātou ko te ʼohoana ʼe ko he meʼa ʼofa taputapu mai ia Sehova. Neʼe ʼui fēnei e Sesu ʼo ʼuhiga mo te ʼu taumātuʼa: “Ko te mea ae kua haʼi e te Atua, ke aua naa veteki e te tagata.” (Mateo 19:6) ʼE moʼoni, ʼe mole faigafua tuʼumaʼu ia te muliʼi ʼo te ʼu pelesepeto ʼaia. Ohagē lā, ko te ʼu kāiga pea mo ʼihi, ʼe kau ai mo te hahaʼi fai tokoni ʼohoana, ʼe mole natou fakaʼaogaʼi te ʼu pelesepeto faka Tohi-Tapu, ʼi te agamāhani ʼe natou tokoniʼi te ʼu taumātuʼa ke natou tahi nofo peʼe ke natou māvete logolā neʼe mole nā maumauʼi he pelesepeto faka Tohi-Tapu. a Kae ʼe ʼiloʼi e te ʼu Kilisitiano, ʼe lelei age muʼa hanatou fakatokatoka ʼonatou fihifihia pea mo puipui tonatou maʼuli faka taumātuʼa, ʼi hona veteki fakavilivili. ʼIo, ʼe maʼuhiga ʼi te kamata ke tou fakatokatoka te ʼu fihifihia ʼo mulimuli ki te tokoni ʼa Sehova—kae mole tou mulimuli ki te tokoni ʼa te tagata.—Tāʼaga Lea 14:12.

Tou Tekeʼi Te ʼu Fihifihia

4, 5. (a) Ko te ʼu fihifihia fea ʼaē ʼe tonu ke fakatokatoka ʼi te maʼuli faka taumātuʼa? (b) He koʼē ʼe fua lelei ia te maʼuliʼi ʼo te ʼu pelesepeto ʼaē ʼe tuʼu ʼi te Folafola ʼa te ʼAtua tatau aipē peʼe hoko he ʼu fihifihia ʼi te maʼuli faka taumātuʼa?

⁴ ʼE tonu ʼi ʼihi temi ki te ʼu taumātuʼa fuli ke natou fakatokatoka tonatou ʼu fihifihia. ʼE lahi te ʼu ʼaluʼaga, ʼe tonu anai ke natou fakatokatoka  he ʼu kihiʼi fihifihia pē. ʼI ʼihi maʼuli faka taumātuʼa, ʼe lagi hoko ai he ʼu fihifihia lahi, ʼo tupu ai he maumauʼi ʼo tanatou felōgoi. ʼI ʼihi temi, ʼe lagi ʼaoga anai ke kotou kumi tokoni ki he tagata ʼāfea kua fotufotuʼa ʼi te faʼahi fakalaumālie. Kae ʼaua leva naʼa ʼui, ʼe mole kei lava puipui tokotou maʼuli faka taumātuʼa, ʼuhi ko te ʼu fihifihia ʼaia. ʼE hā ʼi te ʼu fihifihia ʼaia ia te maʼuhiga ʼaē ke maʼuliʼi fakalelei te ʼu pelesepeto faka Tohi-Tapu moʼo fakatokatoka te ʼu fihifihia.

⁵ Ko Sehova ko te Tupuʼaga ʼo te hahaʼi pea mo te ʼohoana, koia ʼe ina ʼiloʼi lelei age ia te meʼa ʼaē ʼe ʼaoga kiā tātou ke fua lelei ai tatatou felōgoi faka taumātuʼa. Koʼenī te fehuʼi ʼaē ʼe tonu ke tou tali kiai: Peʼe tou fakalogo anai koa ki te tokoni ʼaē ʼe tuʼu ʼi te Folafola pea mo tou maʼuliʼi? ʼE mahino ia, kapau ʼe tou maʼuliʼi te tokoni ʼa te Folafola pea ʼe fua lelei anai kiā tātou. Neʼe ʼui fēnei e Sehova ki tana ʼu kaugana ʼo te temi muʼa: “Kanapau lā neʼe ke tokagaʼi moʼoni taku ʼu fakatotonu. Pea ko tou tokalelei ʼe hagē anai ia ko te liuʼa, pea ko tau faitotonu ʼe hagē anai ko te ʼu peau ʼo te tai.” (Isaia 48:18) Ko te muliʼi ʼo te ʼu tokoni ʼaē ʼe tuʼu ʼi te Tohi-Tapu, ʼe maʼu ai te maʼuli fiafia ʼi te taumātuʼa. Tou vakaʼi age muʼa te tokoni ʼi te Tohi-Tapu ʼo ʼuhiga mo te ʼu tagata ʼohoana.

“Ke Kotou Haga ʼOfa Ki ʼOkotou ʼOhoana”

 6. Koteā te tokoni faka Tohi-Tapu ʼe fai ki te ʼu tagata ʼohoana?

⁶ ʼI te tohi ʼa te ʼapositolo ko Paulo ki te kau Efeso, ʼe tou maʼu ai te ʼu tokoni ʼaoga ki te ʼu tagata ʼohoana. Neʼe tohi fēnei e Paulo: “ ʼU tagata ʼohoana, ke kotou haga ʼofa ki ʼokotou ʼohoana, ohagē ko te ʼofa ʼa Kilisito ki te kōkelekāsio pea mo ina foaki ia ia totonu maʼa te kōkelekāsio. ʼE tonu ke fēia te ʼofa ʼa nātou tagata ki ʼonatou ʼohoana, ohagē pē ko ʼonatou sino totonu. Ko ʼaē ʼe ʼofa ki tona ʼohoana ʼe ʼofa pē kiā ia totonu, heʼe mole heʼeki he tahi kua fehiʼa ki tona sino; kae ʼe ina fafaga pea mo ina fakapelepeleʼi, ohagē ko tona fai e Kilisito maʼa te kōkelekāsio. Kae kiā koutou, ke kotou tahi ʼofa fēia ki tona ʼohoana, ohagē pē ko kita totonu.”—Efeso 5:25, 28, 29, 33, MN.

 7. (a) Koteā te meʼa maʼuhiga ʼaē ʼe tonu ke kau ki te fakatafito ʼo he ʼohoana Kilisitiano? (b) ʼE feafeaʼi ia te haga ʼofa ʼa te ʼu tagata ʼohoana ki ʼonatou ʼohoana?

⁷ ʼE mole talanoa ia Paulo ki te ʼu kihiʼi fihifihia fuli ʼaē ʼe malaga ʼi te maʼuli ʼo te taumātuʼa. Kae ʼe talanoa ia ki te tupuʼaga tāfito ʼaē ʼe hoko ai te fihifihia ʼi te taumātuʼa, ʼo ina fakahā lelei te tafitoʼaga moʼoni ʼo te ʼohoana Kilisitiano—ia te ʼofa. ʼE fakaʼaogaʼi tuʼa ono ʼi te ʼu vaega ʼaia, ia te kupu ʼofa. Kotou toe fakatokagaʼi, ʼe ʼui fēnei e Paulo ki te ʼu tagata ʼohoana: “Ke koutou haga ʼofa ki ʼokotou ʼohoana.” Neʼe lagi mahino kiā Paulo ʼe faigafua age hata manako ki he tahi, ʼi hata haga ʼofa ki ai. ʼE hoko tāfito te faʼahi ʼaia heʼe tou māʼuʼuli nei ʼi “te u aho fakamuli,” ʼaē ko te tokolahi kua “tahi ofa pe kia [natou totonu]” pea mo “loto fefeka.” (2 Timoteo 3:1-3) ʼE lahi ia te ʼu ʼohoana iā ʼaho nei kua maumau ʼuhi ko te ʼu aga ʼaia, kae ko he tagata ʼohoana ʼofa ʼe mole ina tuku anai ke fakahalaʼi tana ʼu manatu pea mo tana ʼu aga e te ʼu agaaga ʼo te mālamanei.—Loma 12:2.

ʼE Feafeaʼi Hakotou Tokaga Ki ʼOkotou ʼOhoana?

8, 9. Ko te ʼu ʼaluʼaga fea ʼaē ʼe tonu ai ke tokaga he tagata ʼohoana Kilisitiano ki tona ʼohoana?

⁸ Kapau ko koe ko he tagata ʼohoana Kilisitiano, ʼe feafeaʼi hau tekeʼi he ʼu aga ʼe mole lelei pea mo fakahā ki tou ʼohoana ia tou ʼofa moʼoni ʼaē kiā te ia? ʼI te ʼu palalau ʼa Paulo ki te kau Efeso ʼi muʼa atu, neʼe ina fakahā ia meʼa e lua ʼe ʼaoga ke kotou fai: ke kotou tokaga ki te ʼu meʼa ʼaē ʼe ʼaoga kiā te ia, pea mo fakapelepeleʼi ia ia ohagē ko takotou tokaga ki tokotou sino totonu. ʼE feafeaʼi hakotou tokaga ki ʼokotou ʼohoana? ʼE  kotou lava tokaga ki ai ʼi te faʼahi fakasino. Neʼe tohi fēnei e Paulo kiā Timoteo: “Kapau e i ai he tahi e mole tokaga ki ona kaiga, tafito natou o tona lotofale, kua fakafisi ki te tui, pe e koviʼage ia i he tagata pagani.”—1 Timoteo 5:8.

⁹ ʼE mole gata pē tana tokaga kiā ia ʼi te faʼahi ʼo te meʼa kai, mo te ʼu mutuʼi meʼa, pea mo te puipui. Koteā tona tupuʼaga? Heʼe feala pē ki te tagata ke tokaga ki tona ʼohoana ʼi te faʼahi fakasino kae ki te ʼu meʼa ʼaē ʼo ʼuhiga mo tona loto pea mo tona maʼuli fakalaumālie, lagi mole tokaga leva ia kiai. Kae ʼe maʼuhiga tāfito kiā ia ke tokaga ki te ʼu faʼahi ʼaia. ʼE moʼoni, tokolahi te ʼu tagata Kilisitiano ʼe lahi ʼaupitō tanatou maʼumaʼua ki tonatou ʼu maʼua ʼi te kōkelekāsio. Kae ʼe mole tonu leva ke takuʼaki ʼe lahi tonatou ʼu maʼua ʼaē ʼi te kōkelekāsio, ke tupu ʼaki ai hanatou meʼa noaʼi tonatou ʼu maʼua faka fāmili ʼaē neʼe foaki age e te ʼAtua, ʼo mole natou fakahoko tonatou maʼua pule fāmili. (1 Timoteo 3:5, 12) ʼO ʼuhiga mo te faʼahi ʼaia, kua hili nei kiai te ʼu taʼu, ko te nusipepa ʼaenī neʼe ina ʼui fēnei: “ ʼO mulimuli pē ki te ʼu lēkula faka Tohi-Tapu, ʼe ko te ʼuluaki maʼua ʼo he ‘tagata tauhi ovi, ʼe ko tona loto fale.’ Kapau ʼe mole tokaga he tagata ʼāfea ki tona fāmili, ʼe feala pē ke fua kovi ki tona tuʼulaga tagata ʼāfea.” b ʼE hā mai, ʼe tonu ke kotou tōkakaga ki te ʼu meʼa ʼaē ʼe ʼaoga ki ʼokotou ʼohoana—ʼi te faʼahi fakasino, mo tonatou loto kae tāfito te meʼa ʼaē ʼe maʼuhiga iā meʼa fuli, ia te faʼahi fakalaumālie.

Koteā Te Faka ʼUhiga ʼo Te ʼUi ʼAē Ke Fakapelepeleʼi Tokotou ʼOhoana?

10. ʼE feafeaʼi ki he tagata hana fakapelepeleʼi ia tona ʼohoana?

¹⁰ Kapau ʼe kotou fakapelepeleʼi tokotou ʼohoana, ʼe kotou tōkakaga lelei kiā ia heʼe kotou ʼofa ki ai. ʼE lahi te ʼu faʼahi ʼe feala ai ke kotou fakahā ia te faʼahi ʼaia. ʼUluaki, ke lahi te temi ʼaē ʼe kotou fakaʼaogaʼi ki tokotou hoa. Kapau ʼe mole kotou tokaga ki tokotou ʼohoana ʼi te faʼahi ʼaia, pea ʼe puli māmālie anai ia tona ʼofa ʼaē kiā koutou. Kotou toe fakatokagaʼi foki, ko te meʼa ʼaē ʼe maʼuhiga ki tokotou ʼohoana, ʼe mole ko te temi pea mo te tokaga ʼaē ʼi takotou manatu ʼe ʼaoga ki ai. Ko tokotou ʼofa, ʼe mole gata pē ʼaki takotou fakahā te ʼu meʼa ʼaē ʼe kotou palalau kiai. ʼE tonu ki tokotou ʼohoana ke ina logoʼi takotou haga ʼaē ʼo fakapelepeleʼi ia ia. Neʼe tohi fēnei e Paulo: “Aua naa i ai he tahi e faiga ki tona lelei, kae ki te lelei o tona kaiga.” (1 Kolonito 10:24) Kapau ʼe kotou ʼofa ki tokotou ʼohoana, ʼe kotou fia ʼiloʼi moʼoni anai te ʼu meʼa ʼaē ʼe ʼaoga tāfito ki ai.—Filipe 2:4.

11. Ko te aga ʼaē ʼe fai e te tagata ki tona ʼohoana, ʼe iku feafeaʼi anai ki tana ʼu felōgoi ʼaē mo te ʼAtua pea mo te kōkelekāsio?

¹¹ ʼE kotou toe lava fakahā ia takotou fakapelepeleʼi ʼo tokotou ʼohoana, ʼi takotou gaohi fakaleleiʼi ia ia, ʼi takotou ʼu palalau pea mo takotou aga. (Tāʼaga Lea 12:18) Neʼe tohi fēnei e Paulo ki te kau Kilisitiano ʼo Kolose: “U tagata ohoana, koutou oʼofa ki [ʼokotou] ohoana pea aua naa [kovi takotou] aga kia natou.” (Kolose 3:19) ʼO ʼuhiga mo te koga fakaʼosi ʼo te ʼu palalau ʼa Paulo, ʼe ʼui ʼi te tohi, ʼe lava fakaliliu fēnei tana ʼu  palalau: “ ʼE mole tonu ke gaohi ohagē ko he kaugana ʼo te ʼapi” peʼe “mole tonu ke gaohi ohagē ko he sinifu.” Kapau ʼe aga fefeka he tagata ki tona ʼohoana mokā ko nāua ʼāteaina pē, peʼe ʼi muʼa ʼo te kaugamālie, ʼe mahino ia ʼe mole ina fakapelepeleʼi tona ʼohoana. Kapau ʼe ina gaohi koviʼi tona ʼohoana, ʼe fakatupu kovi anai ki tana ʼu felōgoi mo te ʼAtua. Neʼe tohi fēnei e te ʼapositolo ko Petelo ki te ʼu tagata ʼohoana: “Kotou haga nonofo mo [tokotou ʼu ʼohoana] ʼo mulimuli pē ki te ʼatamai mālama, ʼo faka maʼuhigaʼi nātou ohagē ko he ʼipu ʼe vaivai age, te ʼipu fakafafine, heʼe mo koutou foki, ʼe kotou maʼu mo nātou te tōfiga ʼo te ʼofa makehe ʼo te maʼuli, ke ʼaua naʼa ʼi ai he meʼa ʼe ina fakatuta takotou ʼu faikole.” c—1 Petelo 3:7, MN.

12. Koteā te ako ʼe maʼu e he tagata ʼohoana mai te aga ʼa Sesu ki te kōkelekāsio?

¹² ʼAua naʼa kotou mulimuli pē ki te ʼofa ʼaē neʼe kua fakahā atu e tokotou ʼohoana. Kotou fakahā fakalelei age ʼe kei kotou ʼofa pē ia ia. Neʼe tuku e Sesu ia he faʼifaʼitaki ki te ʼu tagata ʼohoana Kilisitiano ʼaki tana aga ʼaē neʼe ina fakahā ki te kōkelekāsio. Neʼe agalelei, mo agaʼofa, pea mo loto fakamolemole—māʼiapē lā ia te tuʼa lahi ʼo te ʼu vaivaiʼaga ʼaē ʼo tana ʼu tisipulo. Koia, neʼe feala ai kiā Sesu ke ina ʼui fēnei ki ʼihi: “Kotou ʼomai kiā te au, . . . heʼe au agamalū pea mo loto agavaivai, pea ʼe kotou maʼu anai he fīmālie ki ʼokotou nefesi.” (Mateo 11:28, 29, MN ) ʼO mulimuli ki te faʼifaʼitaki ʼa Sesu,’ e agalelei anai he tagata ʼohoana Kilisitiano ki tona ʼohoana ohagē pē ko te agalelei ʼa Sesu ki tana kōkelekāsio. Kapau ʼe fakapelepeleʼi moʼoni e he tagata ia tona ʼohoana, pea ʼe hā te faʼahi ʼaia ʼi tana ʼu palalau pea mo tana ʼu aga, ʼe liliu anai ko he fakafīmālieʼaga moʼoni ki tona ʼohoana.

Te ʼu Fafine ʼAē ʼe Natou Mulimuli Ki Te ʼu Pelesepeto Faka Tohi-Tapu

13. Ko te ʼu pelesepeto fea ʼi te Tohi-Tapu ʼe lava tokoni ki te ʼu fafine ʼohoana?

¹³ ʼE toe maʼu foki ʼi te Tohi-Tapu ia te ʼu pelesepeto ʼe lava tokoni ki te ʼu fafine ʼohoana. ʼE ʼui fēnei ia Efeso 5:22-24, 33 (MN ): “Ke fakalogo te ʼu fafine ki ʼonatou ʼohoana ohagē ko hanatou fakalogo ki te ʼAliki, heʼe ko te tagata ʼe pule ki tona ʼohoana ʼo toe hagē pē ko Kilisito ʼe pule ki te kōkelekāsio, heʼe ko ia te fakamaʼuli ʼo te sino ʼaia. ʼIo, ohagē ko te fakalogo ʼa te kōkelekāsio kiā Kilisito, ke toe fēia aipē mo te fakalogo ʼa te ʼu fafine ki ʼonatou ʼohoana iā meʼa fuli pē. . . . Ko te fafine ʼe tonu ke ina maʼu he fakaʼapaʼapa lahi ki tona ʼohoana.”

14. He koʼē ko te pelesepeto faka Tohi-Tapu ʼo te fakalogo ʼe mole ko he meʼa fakalainoa ki te ʼu fafine ʼohoana?

¹⁴ Kotou fakatokagaʼi ia te faka maʼuhigaʼi ʼaē e Paulo ia te fakalogo pea mo te fakaʼapaʼapa. ʼE fakamanatuʼi ki he fafine ke fakalogo ki tona ʼohoana, heʼe ʼalutahi mo te fakatuʼutuʼu ʼa te ʼAtua. Ko meʼa maʼuli fuli ʼi te lagi pea mo te kele ʼe ʼi ai tona fakalogoʼaga. Māʼiapē lā mo Sesu neʼe fakalogo kiā Sehova ʼAtua. (1 Kolonito 11:3) ʼIo, ko he tagata ʼohoana ʼe ina fakaʼaogaʼi fakalelei ia tana pule, ʼe faigafua age anai ki tona ʼohoana hana fakalogo kiā te ia.

15. Koteā te ʼu tokoni ʼe maʼu ʼi te Tohi-Tapu ʼo ʼuhiga mo te ʼu fafine ʼohoana?

¹⁵ Neʼe toe ʼui foki e Paulo ko he fafine “ ʼe tonu ke ina maʼu he fakaʼapaʼapa lahi ki tona ʼohoana.” ʼE tonu ki te fafine ʼohoana Kilisitiano ke ina fakahā he “laumalie agamalu mo tokalelei,” kae ʼaua naʼa agapauʼu ki tona ʼohoana  peʼe fia faʼifaʼitaliha. (1 Petelo 3:4) Ko he fafine ʼohoana aga fakalotu ʼe gāue kinakina ki te meʼa ʼaē ʼe lelei ki tona loto fale pea ʼe ina fakatupu ai he vikiʼi ʼo tona ʼohoana. (Tito 2:4, 5) ʼE faiga anai ke palalau lelei ʼo ʼuhiga mo tona ʼohoana pea ke mole ina fai he meʼa ʼe feala ai ki ʼihi ke mole natou fakaʼapaʼapa kiā te ia. ʼE toe gāue kinakina anai ke fua lelei te ʼu tonu ʼaē neʼe fai e tona ʼohoana.—Tāʼaga Lea 14:1.

16. Koteā te ako ʼe maʼu e te ʼu fafine ʼohoana Kilisitiano mai te ʼu faʼifaʼitaki ʼa Sala pea mo Lepeka?

¹⁶ ʼE mole faka ʼuhiga leva ʼe mole kei lava fai e he fafine Kilisitiano ʼe agamalū pea mo tokalelei ia he ʼu tonu peʼe mole maʼuhiga tana ʼu manatu. Ko te ʼu fafine aga fakalotu, ohagē ko Sala pea mo Lepeka, neʼe nā fakahā tanā ʼu manatu ʼo ʼuhiga mo te ʼu meʼa ʼaē neʼe hoko, pea ʼe hā mai ʼi te hisitolia faka Tohi-Tapu neʼe tali e Sehova ia tanā ʼu tonu. (Senesi 21:8-12; 27:46–28:4) ʼE toe fēia mo te ʼu fafine ʼohoana Kilisitiano, ʼe natou lava fakahā ia te ʼu meʼa ʼaē ʼi ʼonatou loto. Kae ʼe tonu ke natou fai ʼaki he aga fakaʼapaʼapa, ʼaua naʼa natou agapauʼu. ʼE lagi natou tokagaʼi anai ko te taʼi faʼahiga felōgoi ʼaia ʼe lelei age pea mo fua lelei.

Te Maʼuhiga ʼo Te Fakapapau ʼAē Neʼe Fai e Te Taumātuʼa

17, 18. Ko te ʼu faʼahi fea ʼaē ʼe feala ai ki te ʼu tagata ʼohoana pea mo te ʼu fafine ʼohoana ke natou tekeʼi te ʼu fakahala ʼa Satana moʼo maumauʼi te nofo ʼohoana?

¹⁷ Ko te ʼohoana ʼe ko he fakapapau ʼo aʼu ki te mate. Koia, ʼe loto anai e te tagata pea mo te fafine ke fua lelei tonā maʼuli faka taumātuʼa. Kapau ʼe mole nā felōgoi, ʼe feala ke liliu te ʼu fihifihia ʼo fakaʼāsili age te ʼita pea mo lahi age. ʼI te agamāhani, ʼe mole kei felōgoi te taumātuʼa mokā hoko he ʼu fihifihia, ʼuhi he nā ʼiʼita. Ko ʼihi taumātuʼa ʼe natou fai puleʼaki moʼo veteki tonatou ʼohoana, lagi ʼo natou manako ki he tahi ʼi tuʼa atu. Neʼe fakatokagaʼi fēnei e Sesu: “Ko ʼaē ʼe ina haga sioʼi he fafine ʼo tupu ai hana holi ki ai, ʼe kua tono ia mo ia ʼi tona loto.”—Mateo 5:28, MN.

¹⁸ Neʼe tokoniʼi e te ʼapositolo ko Paulo ia te kau Kilisitiano fuli, ʼo fēia mo nātou ʼaē kua ʼohoana: “[Kotou] iʼita pe, kae aua naa koutou agahala ai, vakai naa to ifo te laa ki [tokotou] ita. Aua naa koutou tuku he faigamalie ki te temonio.” (Efeso 4:26, 27) Ko totatou fili lahi ko Satana, ʼe ina fakaʼaogaʼi te ʼu fihifihia ʼaē ʼe hoko ʼi te ʼu Kilisitiano moʼo fakahoko tana ʼu fakahala. ʼAua naʼa kotou tuku ke mālo! Kā malaga he ʼu fihifihia, kotou kumi ki te Tohi-Tapu ia te manatu ʼa Sehova ʼo ʼuhiga mo te ʼu faʼahi ʼaia, ʼo kotou fakaʼaogaʼi te ʼu tohi faka Tohi-Tapu. ʼAki te tokalelei pea mo te palalau fakahagatonu, kotou felōgoi ki te ʼu fihifihia ʼaē neʼe hoko. Fakaʼaogaʼi ʼi tokotou maʼuli te ʼu meʼa ʼaē kua kotou mahino kiai ʼo ʼuhiga mo te ʼu lēkula ʼa Sehova. (Sakopo 1:22-25) ʼO ʼuhiga mo tokotou maʼuli faka taumātuʼa, kotou faiga mālohi ʼo haga haʼele mo te ʼAtua, pea ʼaua naʼa kotou tuku ki he tahi peʼe ki he meʼa ke ina veteki te meʼa ʼaē neʼe kua haʼi e te ʼAtua!—Mikea 6:8.

[Kiʼi nota]

ʼE Kei Kotou Manatuʼi Koa?

• He koʼē māʼiapē lā mo te ʼu ʼohoana Kilisitiano ʼe hoko ai te ʼu fihifihia?

• ʼE lava tokaga feafeaʼi he tagata ki tona ʼohoana pea mo fakahā ki ai tana haga ʼaē ʼo fakapelepeleʼi ia ia?

• Koteā ʼaē ʼe lava fai e he fafine moʼo fakahā tana fakaʼapaʼapa lahi ʼaē ki tona ʼohoana?

• ʼE lava feafeaʼi ki he tagata pea mo he fafine hanā faka mālohiʼi ʼo tanā fakapapau?

[Fehuʼi]

[Paki ʼo te pasina 21]

Ko he tagata ʼe ina fakapelepeleʼi tona ʼohoana ʼe ko he fakafimālieʼaga ki tona ʼohoana

[Paki ʼo te pasina 23]

ʼE feala ki te ʼu fafine Kilisitiano ke natou fakahā te ʼu meʼa ʼaē ʼi ʼonatou loto ʼaki he aga fakaʼapaʼapa