ʼU Tūpulaga—Kotou Fai He ʼu Fakatuʼutuʼu ʼe Faka Kolōliaʼi Ai Ia Te ʼAtua

“Ke ke akoako ke ke pipiki ki te ʼAtua.”—1 Timoteo 4:7, MN.

1, 2. (a) He koʼē neʼe vikiʼi e Paulo ia Timoteo? (b) ʼE feafeaʼi ki te kau tūpulaga iā ʼaho nei hanatou ‘akoako ke natou pipiki ki te ʼAtua’?

 “E MOLE au mau he tahi e hage ko ia, e tatau oma loto, pea e tokaga mooni anai kia mea o uhiga mo koutou. . . . O hage pe he fanau e tauhi ki tana tamai, nee fakatahi ia mo au o kaugana ki te Evaselio.” (Filipe 2:20, 22) ʼI tana ʼuluaki tohi ki te kau Kilisitiano ʼo Filipe ʼi te ʼuluaki sēkulō, neʼe fakahā e Paulo ia tana vikiʼi fakamālotoloto ʼaia. Ko ai ʼaē neʼe talanoa kiai? Neʼe talanoa kiā Timoteo, tona kaumeʼa kei tūpulaga neʼe feʼaluʼaki mo ia. Kotou fakakaukauʼi age muʼa, lagi neʼe malave ki te loto ʼo Timoteo ia te ʼofa pea mo te falala ʼaē neʼe fakahā e Paulo ʼo ʼuhiga mo ia!

² Ko te kau tūpulaga ohagē ko Timoteo ʼaē neʼe natou manako ki te ʼu meʼa fakalaumālie, neʼe natou maʼuhiga tuʼumaʼu ki te ʼu kaugana ʼa Sehova. (Pesalemo 110:3) Iā ʼaho nei, ʼe tapuakina te kautahi ʼa te ʼAtua ʼaki te ʼu tūpulaga e tokolahi ʼaē ʼe pioniē, misionea, mo nātou ʼaē ʼe lotolelei ʼo lagolago ki te ʼu laga fale kae mole totogi nātou pea mo te kau Petelite. ʼE toe fakafetaʼi lahi foki kiā nātou ʼaē ʼe lagolago mālohi ki te ʼu gāue ʼo te kōkelekāsio logolā tanatou tōkakaga ki tonatou ʼu tahi age ʼu maʼua. ʼE maʼu e te ʼu tūpulaga ʼaia ia te fiafia moʼoni ʼaē ʼe natou maʼu mai tanatou haga fai te ʼu fakatuʼutuʼu ʼe faka kolōliaʼi ai tatatou Tamai ʼaē ʼe ʼi selō ko Sehova. ʼE natou ‘akoako ke natou pipiki ki te ʼAtua.’—1 Timoteo 4:7, 8.

 3. Koteā te ʼu fehuʼi kā tou vakaʼi anai ʼi te ʼalatike ʼaenī?

³ Kapau ʼe kei kotou tūpulaga, ʼe kotou faiga koa ke kotou fai he ʼu fakatuʼutuʼu fakalaumālie? ʼE kotou lava maʼu ʼifea ia te tokoni pea mo te fakaloto mālohi moʼo fai ia te faʼahi ʼaia? ʼE kotou lava tekeʼi feafeaʼi te ʼu fakahala ʼo te mālamanei ʼo ʼuhiga mo te mānumānu koloa? Ko te ʼu tapuakina fea ʼaē ʼe kotou lava ʼamanaki ʼe kotou utu anai, mo kapau ʼe kotou fai he ʼu fakatuʼutuʼu ʼe natou faka kolōliaʼi ai te ʼAtua? Tou vakaʼi age muʼa te ʼu tali ki te ʼu fehuʼi ʼaia ʼaki tatatou vakavakaʼi ia te maʼuli pea mo te gāue ʼaē neʼe fai e Timoteo.

Te Haʼuʼaga ʼo Timoteo

 4. Fakamatala fakanounou te gāue ʼaē neʼe fai e te Kilisitiano ko Timoteo.

⁴ Neʼe tupu ia Timoteo ʼi Lusitala, ko he kolo veliveli ʼi te fenua Loma ʼo Kalate. ʼE lagi neʼe logo ki te Lotu Faka Kilisitiano ʼi tana kei tūpulaga, ʼi te temi ʼaē neʼe fai faka mafola ai ia Paulo ʼi Lusitala ʼi te taʼu 47 ʼo totatou temi. Neʼe mole tuai ia te logona ʼi te ʼu tehina ʼo te kolo ia te lelei ʼo te aga ʼa Timoteo. Hili taʼu e lua ki te liliu mai ʼa Paulo ki Lusitala pea mo logo ki te tuputupu fakalaumālie ʼa Timoteo, neʼe ina fili ia Timoteo ke gāue misionea fakatahi mo ia. (Gaue 14:5-20; 16:1-3) ʼI te kua fotufotuʼa fakalaumālie ʼa Timoteo, neʼe foaki age kiā ia te ʼu maʼua lahi, ohagē lā ko te ʼu gāue maʼuhiga ko te fakaloto mālohiʼi te ʼu tehina. ʼI te temi ʼaē neʼe faitohi ai ia Paulo kiā Timoteo mai te fale pilisoni ʼi Loma ʼi te taʼu 65 ʼo totatou temi, neʼe tagata ʼāfea ia Timoteo ʼi Efeso.

 5. Iā 2 Timoteo 3:14, 15, koteā te ʼu meʼa e lua ʼaē neʼe tupu ai te filifili e Timoteo ke ina fai hana ʼu fakatuʼutuʼu fakalaumālie?

⁵ ʼE hā mai neʼe fai e Timoteo tana ʼu fakatuʼutuʼu fakalaumālie. Kae he koʼē neʼe ina filifili ke ina fai ia te faʼahi ʼaia? ʼI tana lua tohi kiā Timoteo, neʼe talanoa ia Paulo kiā meʼa e lua ʼaē neʼe tupu ai ʼo tana fili ia te faʼahi ʼaia. Neʼe ina tohi fēnei: “Haga nofo ʼi te ʼu meʼa ʼaē neʼe ke ako  pea neʼe fakalotoʼi koe ke ke tui kiai, ʼi tau ʼiloʼi ʼaē pe ko ai ʼaē neʼe natou akoʼi atu kiā koe te ʼu meʼa ʼaia, pea talu mai tau kei veliveli ʼe ke ʼiloʼi te ʼu tohi taputapu.” (2 Timoteo 3:14, 15, MN) Tou vakaʼi age muʼa te faʼifaʼitaki ʼa ʼihi Kilisitiano neʼe malave ki te ʼu tonu ʼaē neʼe fai e Timoteo.

Te ʼu Fua ʼo Te ʼu Faʼifaʼitaki Lelei

 6. Koteā te ako neʼe maʼu e Timoteo, pea neʼe ina tali feafeaʼi ia te ako ʼaia?

⁶ Neʼe pusiaki ia Timoteo ʼi te loto fale ʼe mole lotu tahi. Ko tana tamai neʼe ko te tagata Keleka, pea ko tana faʼē ia Enise pea mo tana kui fafine ko Loise neʼe ko te ʼu fafine Sutea. (Gaue 16:1) Ko Enise pea mo Loise neʼe nā akoʼi age kiā Timoteo talu mai tana kei veliveli ia te ʼu moʼoni mai te ʼu Tohi faka Hepeleo. ʼI tanā ʼosi tafoki ki te Lotu Faka Kilisitiano, ʼe mahino neʼe nā tokoni ki tona fakalotoʼi ke tui ki te ʼu akonaki faka Kilisitiano. ʼE hā mai, ko Timoteo neʼe ina fakaʼaogaʼi kātoa te ako lelei ʼaia neʼe nā foaki age. Neʼe ʼui fēnei e Paulo: “E au fakamanatu te tui mooni e ia te koe, aia nee uluaki maù [e] tau kui ko [Loise] pea mo [Enise], tau fae, pea e au tui, e ko ia’pe ae e ia koe.”—2 Timoteo 1:5.

 7. Koteā te tapuakina ʼe maʼu e te ʼu tūpulaga e tokolahi, pea ʼe lava fua lelei feafeaʼi kiā nātou te tapuakina ʼaia?

⁷ Iā ʼaho nei, ʼe tapuakina te ʼu tūpulaga e tokolahi heʼe ohagē ko Loise pea mo Enise, ko tanatou ʼu matuʼa pea mo tanatou ʼu kui ʼe natou manavasiʼi ki te ʼAtua, neʼe natou mahino ki te maʼuhiga ʼo te ʼu fakatuʼutuʼu fakalaumālie. Ohagē ko Samira, ʼe kei ina manatuʼi te ʼu fai palalau ʼaē neʼe ina maʼu ʼi tana kei finemui mo tana ʼu mātuʼa. ʼE ina ʼui fēnei: “Ko taku faʼē pea mo taku tamai neʼe nā akoʼi mai kiā au, ʼe tonu ke au maʼu ia te manatu ʼa Sehova ʼo ʼuhiga mo te ʼu meʼa pea ke au fakamuʼamuʼa ʼi toku maʼuli te fai faka mafola. Neʼe nā fakaloto mālohiʼi tuʼumaʼu au ke au toʼo te selevisi temi kātoa.” Neʼe tali lelei e Samira te ʼu tokoni ʼa tana ʼu mātuʼa, pea ʼi te temi nei ʼe gāue ʼi te Petele ʼo tona fenua. Kapau ʼe fakaloto mālohiʼi koe e tau ʼu mātuʼa ke ke fakamuʼamuʼa ia te ʼu fakatuʼutuʼu fakalaumālie, fakalogo ki tanā tokoni ʼaia. ʼE nā loto ke ke maʼuli fiafia.—Tāʼaga Lea 1:5.

 8. Neʼe fakaʼaogaʼi feafeaʼi e Timoteo te ʼu kaumeʼa Kilisitiano fakaloto mālohi?

⁸ ʼE toe maʼuhiga foki kiā koutou ke kotou kumi hokotou ʼu kaumeʼa ʼi te kau Kilisitiano ʼe natou fakaloto mālohiʼi anai koe. Neʼe ʼiloa ia Timoteo e te ʼu tagata ʼāfea ʼo tana kōkelekāsio pea mo nātou ʼi Ikoniome, ʼe tuʼu iā kilometa e 30. (Gaue 16:1, 2) Neʼe felōgoi lelei mo Paulo, ko he tehina mālohi pea mo fai fakatuʼutuʼu lelei. (Filipe 3:14) ʼE hā ʼi te ʼu tohi ʼa Paulo, ko Timoteo neʼe ina tali lelei te ʼu tokoni pea neʼe ina foimo muliʼi ia te ʼu faʼifaʼitaki ʼa te ʼu tehina ʼaē ʼi te tui. (1 Kolonito 4:17; 1 Timoteo 4:6, 12-16) Neʼe tohi fēnei e Paulo: “Nee ke muliʼi mo te agatonu taku akonaki, taku aga, taku tuutuuni, taku tui, taku kataki, toku ofa, taku faafai.” (2 Timoteo 3:10) ʼEī, neʼe muliʼi fakalelei e Timoteo ia te faʼifaʼitaki ʼa Paulo. ʼO toe fēia pē, kapau ʼe kotou  fakaovi ki te ʼu tehina mo tuagaʼane ʼe mālolohi ʼi te faʼahi fakalaumālie ʼi te kōkelekāsio, ʼe natou tokoni atu anai ke kotou fai hakotou ʼu fakatuʼutuʼu fakalaumālie lelei.—2 Timoteo 2:20-22.

Kotou Ako “Te ʼu Tohi Taputapu”

 9. ʼO mole gata pē ʼi te ʼu fakakaugā lelei ʼaē kā kotou maʼu, koteā ʼaē ʼe tonu ke kotou fai moʼo ‘akoako ʼo koutou ke kotou pipiki ki te ʼAtua’?

⁹ ʼE fakalogo koa te fakahoko ʼo te ʼu fakatuʼutuʼu fakalaumālie ki he filifili ʼo he ʼu fakakaugā lelei? Kailoa. Ohagē ko Timoteo, ʼe ʼaoga ke kotou akoʼi fakalelei “te ʼu tohi taputapu.” ʼE lagi mole kotou loko manako ki te ako, kae kotou manatuʼi ko Timoteo neʼe ina ‘akoako ia ia ke pipiki ki te ʼAtua.’ ʼI te agamāhani, ko te hahaʼi faigaoʼi ʼe natou gāue kinakina lolotoga te ʼu māhina ke fua tanatou ʼu faiga. ʼO toe fēia mo koutou, ke fua ia takotou ʼu fakatuʼutuʼu fakalaumālie, ʼe tonu ke kotou fai he ʼu sākilifisio pea mo he ʼu faiga mālohi. (1 Timoteo 4:7, 8, 10) Lagi ʼe kotou fai anai te fehuʼi ʼaenī: ‘ʼE lava tokoni feafeaʼi mai taku ako Tohi-Tapu ke au fakahoko taku ʼu fakatuʼutuʼu?’ Tou vakaʼi age te ʼu faʼahi e tolu.

10, 11. He koʼē ʼe uga anai kotou e te Tohi-Tapu ke kotou fakahoko he ʼu fakatuʼutuʼu fakalaumālie? Fakamatala he faʼifaʼitaki.

¹⁰ ʼUluaki, ko te Tohi-Tapu ʼe ina foaki atu anai te manatu ʼaē ʼe lelei. ʼE ina fakahā atu te ʼulugaaga taulekaleka ʼo tatatou Tamai ʼaē ʼe ʼi selō, mo tana toe gāue ʼofa lahi ʼaē neʼe ina fai maʼa tātou, pea mo te ʼu tapuakina heʼegata ʼaē neʼe ina fai maʼa tana ʼu kaugana agatonu. (Amosi 3:7; Soane 3:16; Loma 15:4) Kapau ʼe tuputupu takotou ʼatamai mālama ʼo ʼuhiga mo Sehova, pea ʼe lahi age anai tokotou ʼofa ʼaē kiā te ia pea mo takotou fia foaki ʼaē ʼo tokotou maʼuli kiā te ia.

¹¹ Tokolahi te kau Kilisitiano tūpulaga ʼe natou ʼui ko te ako tuʼumaʼu ʼo te Tohi-Tapu neʼe ʼaoga ʼaupitō kiā nātou moʼo tokoni ki tanatou taupau ʼo te moʼoni. Ohagē lā ko Adele, ʼaē neʼe lahilahi ake ʼi te fāmili Kilisitiano kae neʼe mole nofonofo pea ina fai lā hana ʼu fakatuʼutuʼu fakalaumālie. ʼE ina ʼui fēnei: “Neʼe ʼave au e taku ʼu mātuʼa ki te Fale ʼo Te Puleʼaga, kae neʼe mole au fai haku ako tokotahi, pea mo fakalogo ki te ʼu akonaki ʼaē ʼe fai ʼi te ʼu fono.” ʼI te ʼosi papitema ʼo tona taʼokete, neʼe kamata ako fakalelei leva e Adele ia te ʼu moʼoni ʼo te Tohi-Tapu. “Neʼe au kamata lau ia te Tohi-Tapu kātoa. Neʼe mole lahi taku lau pea neʼe au tohi ʼo fakamahino ia te ʼu meʼa ʼaē neʼe au lau. ʼE kei au nofo pē mo taku ʼu nota. Neʼe au lau te Tohi-Tapu ʼi te taʼu kātoa.” Ko tona fua, neʼe fia foaki ai leva e Adele tona maʼuli kiā Sehova. Logolā te kovi ʼo tona mahaki neʼe nofo mo ia, kae ʼi te temi nei kua liliu ko te pioniē, peʼe ko te fai faka mafola temi kātoa.

12, 13. (a) Ko te ʼu fetogi fea ʼaē kā tokoni anai e te ako ʼo te Tohi-Tapu ke fai e he tūpulaga, pea ʼe feafeaʼi? (b) Kotou fakahā he ʼu faʼifaʼitaki ʼo ʼuhiga mo te fakaʼaogaʼi ʼo te poto ʼe tou maʼu ʼi te Folafola ʼa te ʼAtua.

¹² Lua, ko te Tohi-Tapu ʼe tokoni atu anai ke kotou fai he ʼu fetogi ʼi tokotou ʼulugaaga. Neʼe ʼui e Paulo kiā Timoteo ko “te ʼu tohi taputapu . . . ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu, koteʼuhi ke kātoa lelei te ʼu kalitātē ʼo te tagata ʼa te ʼAtua, pea mo kātoa lelei tona teuteuʼi ki te ʼu gāue lelei fuli pē.” (2 Timoteo 3:16, 17, MN) Kapau ʼe kotou metitāsioʼi tuʼumaʼu ia te  Folafola ʼa te ʼAtua pea mo maʼuliʼi te ʼu pelesepeto faka Tohi-Tapu, ʼe kotou faka fealagia anai ki te laumālie ʼo te ʼAtua ke ina fetogi tokotou ʼulugaaga. ʼE ina fakatupu anai iā koutou ia te ʼu kalitātē maʼuhiga, ohagē ko te agavaivai, mo te faʼa kātaki, mo te ʼatamai, pea mo te ʼofa moʼoni ki tokotou ʼu tehina Kilisitiano. (1 Timoteo 4:15) Neʼe maʼu e Timoteo ia te ʼu kalitātē ʼaia, pea neʼe liliu ai ko he tokoni lelei kiā Paulo pea mo te ʼu kōkelekāsio ʼaē neʼe gāue ai ia Timoteo.—Filipe 2:20-22.

¹³ Tolu, ko te Folafola ʼa te ʼAtua ʼe ko he faleoko ʼo te poto ʼaoga. (Pesalemo 1:1-3; 19:7; 2 Timoteo 2:7; 3:15) ʼE tokoni atu anai ke kotou filifili lelei tokotou ʼu kaumeʼa, pea mo te ʼu fakafiafia lelei, pea mo tauʼi he ʼu tuʼuga fihifihia. (Senesi 34:1, 2; Pesalemo 119:37; 1 Kolonito 7:36) Ko te fai ʼo he ʼu tonu ʼe lelei ʼi te temi nei, ʼe maʼuhiga moʼo fakahoko ʼo takotou ʼu fakatuʼutuʼu fakalaumālie.

“Tau ʼi Te Tau Matalelei”

14. He koʼē ʼe mole faigafua ia te fai ʼo te ʼu fakatuʼutuʼu fakalaumālie?

¹⁴ Ko te fakamuʼamuʼa ʼo te ʼu fakatuʼutuʼu ʼaē ʼe natou faka kolōliaʼi ia Sehova ʼe fakapotopoto ʼaupitō kae ʼe mole faigafua hona fakahoko. Ohagē lā, kā tonu ke kotou fili he gāue, ʼe lagi tonu muʼa ke kotou tekeʼi te ʼu fakaneke ʼo tokotou ʼu kāiga, mo tokotou ʼu kaumeʼa, pea mo takotou ʼu faiako ʼaē ʼe natou fakaʼamu ke lelei tokotou maʼuli, heʼe ʼi tanatou manatu kapau ʼe kotou fai he ʼu ako lalahi pea mo maʼu he gāue ʼe totogi lelei, ʼe kotou maʼuli lelei ai anai pea mo fiafia ai. (Loma 12:2) Ohagē ko Timoteo, ʼe tonu anai ke kotou “tau ʼi te tau matalelei ʼo te tui moʼoni” ke feala ai hakotou “puke maʼu te maʼuli heʼegata” ʼaē kā foaki atu e Sehova kiā koutou.—1 Timoteo 6:12, MN; 2 Timoteo 3:12.

15. Koteā te fakafeagai neʼe lagi tau mo Timoteo?

¹⁵ Kā mole leleiʼia takotou ʼu tonu e tokotou fāmili ʼaē ʼe mole lotu tahi mo koutou, ʼe feala ke faigataʼa ʼaupitō kiā koutou ia te faʼahi ʼaia. Lagi neʼe tonu kiā Timoteo ke ina tekeʼi he fakafeagai fēia. ʼE ʼui ʼi te tohi, ko te fāmili ʼo Timoteo lagi neʼe “kau ʼi he hahaʼi maʼuhiga pea mo koloaʼia.” Lagi ʼi te fakaʼamu ʼo tana tamai, ke ina fai he ʼu ako lalahi pea mo hoko atu ia te matani gāue faka fāmili. a Kotou fakakaukauʼi age muʼa pe neʼe feafeaʼi te tamai ʼa Timoteo ʼi tana ʼiloʼi ʼaē neʼe leleiʼia age e tona foha, ia te ʼu tuʼutāmaki pea mo te maʼuli masiva ʼo te gāue misionea mo Paulo!

16. Neʼe tauʼi feafeaʼi e te tūpulaga te fakafeagai ʼa tana tamai?

¹⁶ Ko te kau Kilisitiano tūpulaga iā ʼaho nei ʼe natou tau mo te taʼi fihifihia ʼaia. Ko Matthew ʼaē ʼe gāue ʼi te filiale ʼa te kau Fakamoʼoni ʼa Sehova, ʼe ina manatuʼi fēnei: “ʼI te kamata ʼo taku selevisi pioniē, neʼe lotomamahi ʼaupitō ʼosi ia taku tamai. ʼI tana manatu neʼe au ‘fakaʼalu noa’ taku ako, ʼuhi ʼaē moʼo faka fealagia ke au fakahoko taku minisitelio neʼe ko taku gāue ko te leʼo. Neʼe ina vāʼi au, ʼo ina fakamanatuʼi mai ʼe feala ke maʼu haku falā lahi mo kapau ʼe au gāue temi kātoa.” Koteā ʼaē neʼe fai e Matthew moʼo tauʼi ia te fakafeagai ʼaia? “Neʼe au mulimuli fakalelei ki taku polokalama lau Tohi-Tapu pea mo faikole tuʼumaʼu, tāfito lā ʼi te ʼu temi ʼaē neʼe feala ai ke puli taku faʼa kātaki.” Pea neʼe fua lelei ia te ʼu faiga mālohi ʼaia ʼa Matthew. ʼAki te temi, neʼe felōgoi lelei leva mo tana tamai. Pea neʼe toe lahi age te felōgoi ʼa Matthew mo Sehova. ʼE ʼui fēnei e Matthew: “Neʼe au sio ki te tokoni ʼa Sehova kiā te au, mo tana fakaloto mālohiʼi au, pea mo tana puipui ia au naʼa au fai he ʼu tonu ʼe mole lelei. Neʼe mole feala anai haku maʼu ia te ʼu meʼa fuli ʼaia mo kanapau lā neʼe mole au fakahoko taku ʼu fakatuʼutuʼu fakalaumālie.”

Kotou Taupau Maʼu He ʼu Fakatuʼutuʼu Fakalaumālie

17. ʼE lava feafeaʼi ki ʼihi hanatou fakaloto vaivaiʼi ia nātou ʼaē ʼe natou fakatuʼutuʼu ke natou kau ki te selevisi temi kātoa? (Mateo 16:22)

¹⁷ Ko te tahi fakafeagai ʼe lagi mole tou foimo sio kiai ʼo ʼuhiga mo te fakaloto vaivaiʼi ʼo tātou ki tatatou ʼu fakatuʼutuʼu fakalaumālie, ʼe ko totatou ʼu tehina mo tuagaʼane fakalaumālie. Ko ʼihi ʼe lagi nātou ʼui atu anai: ‘He koʼē ʼe tonu ke ke  pioniē? ʼE feala hau maʼuli ohagē ko te hahaʼi fuli pea mo kau pē ki te fai faka mafola. Faigaʼi koe, ke ke maʼu hau gāue lelei pea mo tokaga ki tou kā haʼu ʼi te faʼahi faka paʼaga.’ Lagi ko he tokoni ʼe ʼaoga, kae ʼe kotou akoako anai koa ia koutou totonu ki te pipiki ki te ʼAtua mo kapau ʼe kotou muliʼi te taʼi tokoni ʼaia?

18, 19. (a) ʼE feafeaʼi hakotou taupau maʼu ia takotou ʼu fakatuʼutuʼu fakalaumālie? (b) Koteā te ʼu sākilifisio neʼe kotou fai ʼi tokotou ʼuhiga tūpulaga ʼuhi ko te Puleʼaga?

¹⁸ Ko ʼihi Kilisitiano ʼi te temi ʼo Timoteo, lagi neʼe natou maʼu te ʼu taʼi manatu ʼaia. (1 Timoteo 6:17) Moʼo tokoni kiā Timoteo ke ina taupau maʼu tona ʼu mata ki te ʼu fakatuʼutuʼu fakalaumālie, neʼe fakaloto mālohiʼi ia e Paulo, ʼo ina ʼui fēnei age: “E mole he tagata sōlia ʼe ina faka efihia ia ia ʼi he meʼa ʼo te maʼuli faka paʼaga ʼaenī, mo kapau ʼe loto ia ke leleiʼia ia e ia ʼaē neʼe ina filifili ia ia ki te tau.” (2 Timoteo 2:4, MN) ʼE fakamaʼua tāfito ki he tagata sōlia ʼe kei lolotoga selevisi ke ʼaua naʼa fakalelu ia ia e he ʼu maʼua faka sivile. ʼE fakalogo tona maʼuli pea mo ʼaē ʼa ʼihi ki tana tokaga tuʼumaʼu ʼaē ʼo fakalogo ki te ʼu fakatotonu ʼo tona pule sōlia. Kā ko koe ko he sōlia ʼa Kilisito, ʼe tonu ke ke tokaga pē ki te meʼa ʼe tahi pea mo tekeʼi te ʼu meʼa ʼe ina lava faka mafasia koe, ʼo tupu ai hau mole fakahoko kātoa tau minisitelio ʼaē ʼe ina haofaki ai tou maʼuli.—Mateo 6:24; 1 Timoteo 4:16; 2 Timoteo 4:2, 5.

¹⁹ ʼAua naʼa kita maʼuli fakafīfīmālie, kae tou maʼuli faka sākilifisio. “Too tou vaega i te tali mamahi o hage he tagata solia lelei a Kilisito Sesu.” (2 Timoteo 2:3) ʼI tana kaugā gāue mo Paulo, ko Timoteo neʼe ina ako te maʼuhiga ʼo te maʼuli faka feʼauga māʼiapē lā ʼi te ʼu temi faigataʼa. (Filipe 4:11, 12; 1 Timoteo 6:6-8) ʼE feala hakotou fai fēia. ʼE kotou tali koa hakotou maʼuli faka sākilifisio ʼuhi ko te Puleʼaga?

Ko Te ʼu Tapuakina ʼi Te Temi Nei Pea Mo Te Temi Kā Haʼu

20, 21. (a) Fakamatala he ʼu tapuakina ʼe kotou maʼu anai mai te ʼu fakatuʼutuʼu fakalaumālie. (b) Koteā ʼaē kā kotou fakatuʼutuʼu anai ke kotou fai?

²⁰ Lolotoga taʼu e 15, neʼe gāue kinakina ia Timoteo pea mo Paulo. Neʼe sio tonu ia Timoteo ki te laga ʼo te ʼu kōkelekāsio foʼou ʼi te faka mafola ʼo te logo lelei iā teitei potu fuli ʼo te Metitelanea ʼo te potu noleto. Kanapau lā neʼe fili e Timoteo ia te maʼuli “māhani,” neʼe mole koloaʼia anai tona maʼuli pea mo maʼuli fiafia. Kapau ʼe kotou fai hakotou ʼu fakatuʼutuʼu fakalaumālie, pea ʼe kotou utu anai ia he ʼu tapuakina fakalaumālie lahi. ʼE kotou felōgoi lelei anai mo Sehova pea mo logoʼi te ʼofa pea mo te fakaʼapaʼapa ʼo tokotou ʼu tehina mo tuagaʼane Kilisitiano. ʼO mole kotou maʼuli mamahi pea mo ʼiʼita heʼe ko te ʼu fua ʼaia ʼo te faiga ki ni ʼu fakatuʼutuʼu faka koloa, kae ʼe kotou maʼu anai ia te fiafia moʼoni ʼaē ʼe kita maʼu mai he maʼuli faka sākilifisio. Tahi ʼaē meʼa maʼuhiga, ʼe kotou “mau [anai] te mauli mooni”—ia te maʼuli heʼegata ʼi he palatiso ʼi te kele.—1 Timoteo 6:9, 10, 17-19; Gaue 20:35.

²¹ Kapau ʼe mole heʼeki kotou fai te faʼahi ʼaia, ʼe matou fakaafe atu koutou ke kotou foimo kamata atu nei, ʼo akoako ke kotou pipiki ki te ʼAtua. Kotou fakaovi kiā nātou ʼaē ʼi te kōkelekāsio ʼe natou lava tokoni atu ke kotou fakahoko takotou ʼu fakatuʼutuʼu fakalaumālie, pea mo kumi tanatou takitaki. Kotou fakamuʼamuʼa tuʼumaʼu ia te ako ʼo te Folafola ʼa te ʼAtua. Kotou tekeʼi fakamālohi te mānumānu koloa ʼo te mālama ʼaenī. Pea mo kotou manatuʼi tuʼumaʼu, ko te ʼAtua “ae e ina fakakoloa mai tatou, aki te meafuape, tou fakafiafia ai” ʼe ina fakapapau atu, ʼe feala hakotou maʼu ia he ʼu tapuakina lahi ʼi te temi nei pea mo te kā haʼu, mo kapau ʼe kotou fili te ʼu fakatuʼutuʼu ʼaē ʼe natou faka kolōliaʼi ia ia.—1 Timoteo 6:17.

[Kiʼi nota]

ʼE Kei Kotou Manatuʼi Koa?

• Kofea ʼaē ʼe lava maʼu ai e te ʼu tūpulaga he tokoni moʼo fakahoko tanatou ʼu fakatuʼutuʼu fakalaumālie?

• He koʼē ʼe maʼuhiga ʼaupitō te ako ʼo te Tohi-Tapu?

• ʼE lava tekeʼi feafeaʼi e he ʼu tūpulaga te ʼu fakahala ʼo te mānumānu koloa ʼo te mālama ʼaenī?

• Ko te ʼu tapuakina fea ʼaē ʼe maʼu mai te kumi ʼo te ʼu fakatuʼutuʼu fakalaumālie?

[Fehuʼi]

[Paki ʼo te pasina 25]

Ko te ʼu faʼifaʼitaki lelei fea ʼaē neʼe tokoni kiā Timoteo?

[Paki ʼo te pasina 26]

ʼE kotou fai koa hakotou ʼu fakatuʼutuʼu fakalaumālie?