Ke Takitaki Tokotou ʼu Ala e Te Folafola ʼa Te ʼAtua
Ke Takitaki Tokotou ʼu Ala e Te Folafola ʼa Te ʼAtua
“Ko tau folafola ʼe ko he mālama taki ki toku vaʼe, pea ʼe ko he mālama ki toku ala.”—Pesalemo 119:105.
1, 2. He koʼē neʼe mole feala ki te tokolahi ke natou maʼu ia te tokalelei moʼoni pea mo te fiafia?
ʼE KOTOU manatuʼi koa ʼi he temi neʼe kotou fakalavelave ai ki he tahi ke ina fakahā atu te ala ʼaē ke kotou ʼolo ai? Lagi neʼe kua kotou ovi pē ki te potu ʼaē ʼe kotou fakatuʼutuʼu ke kotou ʼolo kiai kae neʼe mole kei kotou ʼiloʼi papau ia te ʼu kiʼi ʼafeʼaga fakamuli. Pea lagi kua kotou hehē ʼosi pea ʼe tonu ke fetogi te ala ʼaē ʼe kotou ʼolo ai. Pe koteā pē ʼaē kā kotou fai, kae ʼe lelei age hakotou mulimuli ki he tahi ʼe ina ʼiloʼi lelei te koga meʼa. ʼE feala kiā ia ʼaia ke tokoni atu ke kotou aʼu ki te faʼahi ʼaē kā kotou ʼolo kiai.
2 Lolotoga te ʼu taʼu e lauʼi afe, ko te hahaʼi ʼo te mālamanei neʼe mole natou fia muliʼi te takitaki ʼa te ʼAtua. Kae ʼi tanatou fia takitaki ʼāteaina ʼaia ʼo tonatou maʼuli, neʼe hehē ʼosi te hahaʼi heʼe haohaoa. Neʼe mole feala hanatou maʼu ia te ala ʼaē ʼe ina taki ia nātou ki te tokalelei moʼoni pea mo te fiafia. He koʼē neʼe mole feala hanatou aʼu ki te faʼahi ʼaia? Kua hili nei kiai taʼu e 2 500 tupu, neʼe ʼui fēnei e te polofetā ko Selemia: “ ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) Ko he tahi ʼe faiga ke ina takitaki ʼāteaina pē tona maʼuli mai te tokoni fakapotopoto, ʼe fua kovi pē anai ia tona maʼuli. ʼE hā mai, ʼe ʼaoga he takitaki ki te mālamanei!
3. He koʼē ʼe tuha mo Sehova ʼAtua ke ina takitaki ia te hahaʼi ʼo te mālamanei, pea koteā ʼaē ʼe ina fakapapau mai?
3 ʼE tuha mo Sehova ʼAtua ke ina takitaki. Koteā tona tupuʼaga? Heʼe ko ia pē ʼe ina ʼiloʼi lelei age te agaaga ʼo te tagata. Pea ʼe ina ʼiloʼi lelei te tupuʼaga ʼo te hehē ʼaē ʼo te hahaʼi ʼo te mālamanei. ʼE ina toe ʼiloʼi foki mo te meʼa ʼaē ʼe ʼaoga ki te tagata moʼo fakatonutonuʼi tona maʼuli. Tahi ʼaē, ko Sehova ʼi tona ʼuhiga Tupuʼaga, ʼe ina ʼiloʼi tuʼumaʼu te meʼa ʼaē ʼe lelei age ki te maʼuli ʼo te tagata. (Isaia 48:17) Koia, ʼe tou falala kātoa ki tana ʼu fakapapau ʼaē ʼe tuʼu iā Pesalemo 32:8: “ ʼE au fakaliliu anai ia koe ke ke fakasiosio poto pea mo au akoʼi anai koe ʼi te ala ʼaē ʼe tonu ke ke haʼele ai. ʼE au foaki atu anai he ʼu tokoni, ʼo au leʼoleʼo koe.” ʼE tou tui papau ʼo ʼuhiga mo te faʼahi ʼaenī: ʼe foaki e Sehova ia te takitaki ʼaē ʼe lelei. Kae ʼe feafeaʼi hana takitaki ia tātou?
4, 5. ʼE lava takitaki feafeaʼi tātou e te ʼu folafola ʼa te ʼAtua?
4 Neʼe ʼui fēnei e te tagata fai pesalemo ʼi tana faikole kiā Sehova: “Ko tau folafola ʼe ko he mālama taki ki toku vaʼe, pea ʼe ko he mālama ki toku ala.” (Pesalemo 119:105) ʼE tou maʼu ʼi te Tohi-Tapu ia te ʼu folafola pea mo te ʼu fakamanatu ʼa te ʼAtua, pea ʼe tokoni mai ke tou tauʼi te ʼu fihifihia ʼaē ʼe fakatupu efihia ki totatou maʼuli. Koia, kā tou lau ia te Tohi-Tapu pea mo tuku ke ina takitaki tātou, ʼe tou logoʼi takitokotahi te manatu ʼaē ʼe fakamatalatala iā Isaia 30:21: “ ʼE logo anai tou ʼu taliga ki he folafola ʼe haʼu mai ʼou tuʼa, ʼo ina ʼui fēnei: ‘Koʼenī te ala. Kotou haʼele ai.’ ”
5 Kotou fakatokagaʼi, iā Pesalemo 119:105 ʼe talanoa ki te ʼu faʼahi e lua ʼe fai e te Folafola ʼa te ʼAtua. ʼUluaki, ʼe hagē ko he mālama taki ki totatou vaʼe. Kā tou tau mo te ʼu fihifihia ʼo te ʼaho fuli, ko te ʼu pelesepeto faka Tohi-Tapu ʼe tonu ke natou takitaki totatou ʼu ala ke feala hatatou fai he ʼu tonu ʼe lelei pea mo tekeʼi te ʼu hele ʼo te mālama ʼaenī. Lua, ko te ʼu fakamanatu ʼa te ʼAtua ʼe ko he mālama ki totatou ala, ʼe tokoni mai ke tou fai he ʼu tonu ʼe ʼalutahi mo tatatou ʼamanaki ʼaē ke tou māʼuʼuli ʼo heʼegata ʼi te Palatiso ʼaē neʼe fakapapauʼi mai e te ʼAtua. ʼAki he mālama ʼe ina inaina lelei totatou ala, ʼe feala ai anai hatatou ʼiloʼi mamaʼo te ʼu ikuʼaga ʼo he ala, peʼe tokalelei peʼe tokakovi. (Loma 14:21; 1 Timoteo 6:9; Apokalipesi 22:12) Tou vakavakaʼi age muʼa peʼe feafeaʼi te liliu ʼa te ʼu folafola ʼa te ʼAtua ko he mālama taki ki totatou vaʼe pea mo he mālama ki totatou ala.
“Ko He Mālama Taki Ki Toku Vaʼe”
6. Ko te ʼu ʼaluʼaga fea ʼaē ʼe liliu ai te ʼu folafola ʼa te ʼAtua ko he mālama taki ki totatou vaʼe?
6 ʼI te ʼaho fuli, ʼe tonu ke tou fai te ʼu tonu. Lagi ko ʼihi tonu mole faʼa maʼuhiga fau, kae ʼi ʼihi temi ʼe lagi ʼahiʼahiʼi tātou ʼo ʼuhiga mo he ʼu felāveʼi fakasino heʼeʼaoga, mo tatatou agatonu peʼe ko tatatou mole kau ki te ʼu meʼa faka politike. Moʼo tauʼi fakalelei te ʼu fihifihia ʼaia, ʼe tonu ki totatou “ ʼu fealagia fakakaukau ke akoʼi ke natou ʼiloʼi te meʼa ʼaē ʼe lelei pea mo te meʼa ʼaē ʼe kovi.” (Hepeleo 5:14, MN ) Kapau ʼe tou maʼu ia te ʼatamai mālama totonu ʼo ʼuhiga mo te Folafola ʼa te ʼAtua pea mo tou mahino lelei ki tana ʼu pelesepeto, ʼe tou akoʼi ai anai totatou leʼo ʼo loto ke ina fai he ʼu tonu ʼe leleiʼia e Sehova.—Tāʼaga Lea 3:21.
7. Fakamatala he ʼaluʼaga ʼe feala ai ki he Kilisitiano ke fia fakakaugā mo he ʼu kaugā gāue ʼe mole lotu tahi mo ia.
7 Tou toʼo he faʼifaʼitaki. ʼE kotou faiga fakamālotoloto koa ke kotou fakafiafiaʼi ia te loto ʼo Sehova? (Tāʼaga Lea 27:11) Kapau ʼe kotou fai ia te faʼahi ʼaia, pea ʼe fai atu kiā koutou he fakafetaʼi. Kae kotou fakakaukauʼi age muʼa mo kapau ʼe fakaafe atu koutou e hokotou kaugā gāue ke kotou kaugā ʼolo mo nātou ki he faigaoʼi. ʼE natou leleiʼia tanatou fakatahi mo koutou ʼi te fale gāue, pea ʼe natou toe fia fakakaugā mo koutou ʼi tuʼa atu ʼo te gāue. ʼE lagi kiā koutou, ʼe mole ko ni hahaʼi agakovi. ʼE lagi lelei pē lā tonatou maʼuli. Koteā anai kā kotou fai? ʼE kotou tuʼutāmaki ai anai koa mo kapau ʼe kotou tali ia te fakaafe? ʼE lava tokoni feafeaʼi atu te Folafola ʼa te ʼAtua ke kotou fai te tonu ʼaē ʼe lelei ki te faʼahi ʼaia?
8. Ko te ʼu pelesepeto faka Tohi-Tapu fea ʼaē kā tokoni mai kiā tātou ke tou fakakaukauʼi te ʼu faʼahi ʼo ʼuhiga mo te ʼu fakakaugā?
8 Kotou vakaʼi age muʼa ia te ʼu pelesepeto faka Tohi-Tapu ʼaenī. Ko te ʼuluaki pelesepeto, ʼe tou maʼu iā 1 Kolonito 15:33, ʼe ʼui fēnei: “Ko te u fakakauga ae e kovi, e ina maumauʼi te u aga e lelei.” ʼE tapuʼi atu koa e te pelesepeto ʼaenī takotou fakakaugā ki te hahaʼi ʼaē ʼe mole lotu tahi mo koutou? ʼE mole ʼui mai ʼi te Tohi-Tapu ʼe tonu ke kotou fakamamaʼo ʼosi mai iā nātou. Pea ko te ʼapositolo ko Paulo neʼe ʼofa ki “te tagata fuape,” ko te hahaʼi ʼaē neʼe mole lotu tahi mo ia. (1 Kolonito 9:22) Ko te tafitoʼaga ʼo te Lotu Faka Kilisitiano, ke tou tokaga ki te ʼu meʼa ʼa ʼihi—ohagē lā ko nātou ʼaē ʼe mole tauhi tahi mo tātou. (Loma 10:13-15) ʼE feafeaʼi hatatou muliʼi te tokoni ʼaē ke tou “fai ia te lelei ki te tagata fuape,” mo kapau ʼe tou fakamamaʼo ʼosi mai te hahaʼi ʼaē ʼe lagi ʼaoga anai kiā nātou he tokoni?—Kalate 6:10.
9. Koteā lā he tokoni faka Tohi-Tapu ʼe ʼaoga kiā tātou ke tou fakapotopoto ʼi ʼatatou felōgoi mo ʼatatou kaugā gāue?
9 ʼE ʼi ai te kehekehe ʼo hata felōgoi lelei mo he kaugā gāue pea mo hata aga fakakaumeʼa mo he tahi. ʼI henī, ʼe ʼi ai te tahi pelesepeto faka Tohi-Tapu ke tou tokagaʼi. Neʼe fai e te ʼapositolo ko Paulo ia te fakatokaga ki te kau Kilisitiano: “Aua [tatatou] pipiki tahi mo te hahai e mole tui.” (2 Kolonito 6:14) Koteā te faka ʼuhiga ʼo te ʼui ʼaē “aua [tatatou] pipiki tahi”? Ko ʼihi Tohi-Tapu ʼe natou fakaliliu fēnei ia te ʼu kupu ʼaia “ ʼaua naʼa haʼi fakatahi,” “ ʼaua naʼa faiga ke gāue fakatahi,” peʼe “tuku te fai ʼo te ʼu felōgoi ʼe mole tuha.” Ko te temi fea ʼaē ʼe kovi ai hakita fakakaugā ki hakita kaugā gāue? Ko te temi fea ʼaē ʼe tou lava tuʼutāmaki ai ʼi hata fakakaugā? Ko te Folafola ʼa te ʼAtua, ia te Tohi-Tapu ʼe feala ke ina takitaki koutou ʼi te ʼaluʼaga ʼaia.
10. (a) Neʼe feafeaʼi te filifili e Sesu tona ʼu kaumeʼa? (b) Koteā te ʼu fehuʼi ʼe lava tokoni ki he tahi ke ina fai he ʼu tonu ʼe lelei ʼo ʼuhiga mo te ʼu fakakaugā?
10 Kotou fakatokagaʼi te faʼifaʼitaki ʼa Sesu, ʼaē neʼe ʼofa ki te tagata talu tana fakatupu. (Tāʼaga Lea 8:31) ʼI tana kei ʼi te kele, neʼe lelei ʼosi ia tana felōgoi ʼaē mo tana ʼu tisipulo. (Soane 13:1) Neʼe toe ‘ ʼofa’ pē lā ki te tagata neʼe mole akoʼi fakalelei e te lotu. (Maleko 10:17-22) Kae neʼe toe faka tuʼakoi e Sesu ia tana fakakaugā ʼaē ki te hahaʼi. Neʼe mole fia pipiki ia ki te hahaʼi ʼaē neʼe mole natou fia fai ki te finegalo ʼo tana Tamai. ʼI te tahi ʼaluʼaga, neʼe ʼui fēnei e Sesu: “Ko koutou ko toku ʼu kaumeʼa mo kapau ʼe kotou fai te meʼa ʼaē ʼe au fakatotonu atu kiā koutou.” (Soane 15:14, MN ) ʼE lagi kotou felōgoi lelei mo he tahi ʼe gāue mo koutou. Kae kotou fai te ʼu fehuʼi ʼaenī: ‘ ʼE mulimuli koa ia ia ki te ʼu fakatotonu ʼa Sesu? ʼE ina fia ʼiloʼi koa ia Sehova, ia Ia ʼaē neʼe akoʼi mai e Sesu ke tou tauhi ki ai? ʼE tatau koa tana ʼu lēkula ʼo ʼuhiga mo te aga ʼaē ʼe tonu ke fai pea mo ʼaē ʼaʼaku ko te Kilisitiano?’ (Mateo 4:10) Kapau ʼe kotou fai palalau mo tokotou ʼu kaugā gāue pea mo fakahā lelei age te ʼaoga ʼo te maʼuliʼi ʼaē ʼo te ʼu lēkula faka Tohi-Tapu, ʼe kotou ʼiloʼi ai anai ʼaki tana ʼu tali ia tana manatu ki te faʼahi ʼaia.
11. Fakamatala he ʼu ʼaluʼaga , ʼe tonu ai ki te ʼu folafola ʼa te ʼAtua ke natou takitaki totatou maʼuli.
11 ʼE kei lahi age te ʼu ʼaluʼaga ʼe feala ai ki te ʼu folafola ʼa te ʼAtua ke liliu ko he mālama taki ki totatou vaʼe. Ohagē lā, ko he Kilisitiano ʼe mole hana gāue, ʼe lagi foaki age anai hana gāue. Kae ʼe kinakina te gāue, pea kapau ʼe ina tali ke ina fai ia te gāue ʼaia, ʼe lahi anai tana tō fono pea mole kei feala anai hana kau ki ʼihi gāue ʼo te tauhi moʼoni. (Pesalemo 37:25) ʼE lagi ko he tahi Kilisitiano ʼe holi mālohi ki he fakafiafia ʼe fakafeagai ki te ʼu pelesepeto faka Tohi-Tapu. (Efeso 4:17-19) Lagi ko he tahi ʼe lotomamahi anai ʼuhi ko he ʼu vaivaiʼia ʼo hona tehina peʼe ko hona tuagaʼane. (Kolose 3:13) ʼI te ʼu ʼaluʼaga ʼaia, ʼe tonu anai ke tou tuku ia te Folafola ʼa te ʼAtua ke liliu ko he mālama taki ki totatou vaʼe. ʼIo, kapau ʼe tou muliʼi te ʼu pelesepeto faka Tohi-Tapu, pea ʼe tou lava tauʼi anai he fihifihia pē ʼe tau mo tātou ʼi totatou maʼuli. Ko te Folafola ʼa te ʼAtua ʼe “ ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu.”—2 Timoteo 3:16, MN.
“Ko He Mālama Ki Toku Ala”
12. ʼE liliu feafeaʼi te ʼu folafola ʼa te ʼAtua ko he mālama ki totatou ala?
12 Iā Pesalemo 119:105, ʼe toe ʼui ai ko te ʼu folafola ʼa te ʼAtua ʼe natou lava fakamālamaʼi totatou ala, ʼo inaina tatatou haʼele. ʼE mole tou nonofo ʼi te faka pōʼuli ʼo ʼuhiga mo te kā haʼu, heʼe fakamatala ʼi te Tohi-Tapu te ʼuhiga ʼo te ʼu fihifihia ʼo te tuʼu ʼaenī pea mo te ʼu meʼa ʼaē kā hoko mai. ʼEī, ʼe tou ʼiloʼi kua tou māʼuʼuli nei ʼi “te u aho fakamuli” ʼo te tuʼu ʼo te ʼu faʼahiga meʼa ʼaenī. (2 Timoteo 3:1-5) Ko te ʼiloʼi fakatomuʼa ʼo te ʼu meʼa ʼaē kā hoko, ʼe tonu ke malave ʼaupitō ki totatou faʼahiga fakaʼaogaʼi ʼo totatou maʼuli ʼi te temi nei. Neʼe tohi fēnei e te ʼapositolo ko Petelo: “Mai tona ʼuhiga ʼaē ʼe tonu ki te ʼu meʼa fuli ʼaia ke māvetevete, ko te ʼu faʼahiga tagata feafeaʼi anai ia koutou ʼi te aga fakamāʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua, ʼo talitali pea mo kotou taupau lelei ʼi tokotou ʼatamai te hoko mai ʼo te ʼaho ʼo Sehova!”—2 Petelo 3:11, 12, MN.
13. ʼE malave feafeaʼi ki tatatou ʼu manatu pea mo totatou maʼuli ia te maʼuhiga ʼo te temi?
13 ʼE tonu ʼi tatatou ʼu manatu pea mo totatou maʼuli ke tou fakahā ʼe tou tui papau “e fakamole [anai] te malama-nei mo tana u holi.” (1 Soane 2:17) Ko te maʼuliʼi ʼo te ʼu pelesepeto faka Tohi-Tapu ʼe tokoni mai anai ke tou fai he ʼu tonu ʼe lelei ʼo ʼuhiga mo tatatou ʼu fakatuʼutuʼu ki te kā haʼu. Ohagē lā, neʼe ʼui fēnei e Sesu: “Kae koutou fua kumi te Puleaga o Selo mo tana susitisia pea e foaki atu anai kia koutou ia meafuape alâ.” (Mateo 6:33) ʼI meʼa lelei hata sio ki te kau tūpulaga e tokolahi ʼe natou tui ki te ʼu folafola ʼa Sesu, ʼaki tanatou kau ki te minisitelio temi kātoa! Ko ʼihi, ʼe kau ai mo te ʼu fāmili kātoa, neʼe natou lotolelei ke natou ʼolo ki te ʼu fenua ʼe ʼaoga ai he kau fai faka mafola ʼo te Puleʼaga.
14. Neʼe feafeaʼi te fakalahi e te fāmili Kilisitiano ia tanatou minisitelio?
14 Kotou fakatokagaʼi te faʼifaʼitaki ʼa te taumātuʼa pea mo tanā ʼu toe e toko lua, neʼe natou mavae mai Amelika ʼo ʼolo ki te République Dominiquaine moʼo kaugā gāue mo te kōkelekāsio ʼe tuʼu ʼi te kolo ʼe nofoʼi e te toko 50 000 hahaʼi. ʼI te kōkelekāsio, neʼe ko te toko 130 kau fai faka mafola ʼo te Puleʼaga. Kae ʼi te ʼaho 12 ʼo ʼApelili 2006, neʼe ko te toko 1 300 ʼaē neʼe kau ki te ʼAho Fakamanatu ʼo te mate ʼa Kilisito! ʼI te telituale ʼo te koga meʼa ʼaia neʼe kua “hihina . . . ki te tānaki ʼo te taʼukai,” koia hili pē māhina e nima, ko te taumātuʼa pea mo tanā tama, mo tonā ʼofafine, neʼe natou fai ia te ʼu ako Tohi-Tapu e 30. (Soane 4:35, MN ) ʼE fakamatala fēnei e te tamai: “ ʼI te kōkelekāsio, ʼe ko te ʼu tehina pea mo tuagaʼane e toko 30 neʼe natou ʼomai mai ʼihi fenua moʼo tokoni kiā mātou. Lagi ko te toko 20 neʼe ʼomai mai Amelika, pea ko te toko 10 neʼe natou ʼomai mai te ʼu fenua ko Bahamas, Italia, Kanata, Niusila, pea mo Sepania. ʼE natou ʼomai mo he loto fia kau ʼaupitō ki te minisitelio pea ko he faʼahi ia neʼe fakaloto mālohi ai ki te ʼu tehina ʼo te kōkelekāsio.”
15. Koteā te ʼu tapuakina neʼe kotou maʼu heʼe kotou fakamuʼamuʼa ʼi tokotou maʼuli ia te ʼu gāue ʼo te Puleʼaga?
15 Kae ʼe tou mahino fuli pē, tokolahi ʼe mole feala hanatou ʼolo ʼo gāue ʼi he tahi age fenua ʼe ʼaoga kiai he kau fai faka mafola. Kae ko nātou ʼaia kapau ʼe natou fai he ʼu fetogi ʼi tonatou maʼuli moʼo kau ki te minisitelio ʼaia, ʼe mahino ia ʼe lahi anai te ʼu tapuakina kā natou maʼu. Pe kofea te koga meʼa ʼaē ʼe kotou gāue ai, kae ʼe kotou logoʼi anai te fiafia ʼi takotou kaugana kiā Sehova mo tokotou mālohi kātoa. Kapau ʼe kotou fakamuʼamuʼa ʼi tokotou maʼuli ia te ʼu gāue ʼo te Puleʼaga, ʼe fakapapau atu e Sehova ʼe ina “huaʼi moʼoni anai kiā koutou he tapuakina ʼo aʼu ki te mole toe ʼi ai ʼo he hoge.”—Malakia 3:10.
Te ʼu Fua Lelei ʼAē ʼe Tou Maʼu Mai Te Takitaki ʼa Sehova
16. ʼE fua lelei feafeaʼi anai kiā tātou mo kapau ʼe tou tuku ia te ʼu folafola ʼa te ʼAtua ke liliu ko hotatou takitaki?
16 Ohagē ko te ʼu meʼa ʼaē neʼe kua tou vakaʼi, ʼe taki tātou e te ʼu folafola ʼa Sehova iā faʼahi e lua. ʼE ko he mālama taki ki totatou vaʼe, ʼo tokoni mai kiā tātou ke tou haʼele ʼi te ala ʼaē ʼe totonu pea mo taki tātou mokā tou fai he ʼu tonu. Pea ko he mālama ki totatou ala, pea ʼe tou mahino lelei ki te kā haʼu. Pea ʼe tokoni mai ia te faʼahi ʼaia ke tou muliʼi te fakaloto mālohi ʼaenī ʼa Petelo: “Kotou fakagaūgaūe takotou fakakaukau ʼo ʼuhiga mo te gāue, kotou nonofo kātoa ʼi te agapoto; kotou tuku takotou falala ki te ʼofa heʼe tau ʼaē ʼe tonu ke foaki atu kiā koutou ʼi te temi ʼaē kā hā ai ia Sesu Kilisito.”—1 Petelo:1:13, MN.
17. ʼE tokoni feafeaʼi mai anai ia te ako ʼo te Tohi-Tapu ke tou muliʼi ia te takitaki ʼa te ʼAtua?
17 ʼE mole tou lotolotolua ki te haga ʼaē ʼa Sehova ʼo takitaki ia tātou. Kae ko te fehuʼi ʼaenī ʼe tou lava fai: ʼE tou fakalogo anai koa ki te takitaki ʼaia? Ke kotou mahino ki te takitaki ʼaē ʼe foaki mai e Sehova, kotou fakatuʼutuʼu ke kotou lau ʼi te ʼaho fuli ia te Tohi-Tapu. Kotou metitāsioʼi te ʼu manatu ʼaē ʼe kotou lau, pea mo faigaʼi ke kotou mahino ki te finegalo ʼo Sehova ʼo ʼuhiga mo te ʼu faʼahi ʼaia, pea mo kotou fakakaukauʼi te ʼu ʼaluʼaga kehekehe ʼaē ke kotou maʼuliʼi ai te faʼahi ʼaia. (1 Timoteo 4:15) Koia, kotou fakaʼaogaʼi tokotou “ ʼatamai” mokā kotou fai he ʼu tonu kiā koutou totonu.—Loma 12:1, MN.
18. Kā tou tuku te Folafola ʼa te ʼAtua ke ina takitaki tātou, koteā te ʼu tapuakina ʼaē kā tou maʼu anai?
18 Kapau ʼe tou fakaʼaogaʼi te ʼu faʼahi ʼaia ʼi totatou maʼuli, pea ʼe fakamālamaʼi anai tātou e te ʼu pelesepeto ʼo te Folafola ʼa te ʼAtua pea mo foaki mai ia te takitaki ʼaē ʼe ʼaoga kiā tātou ʼo ʼuhiga mo te ʼu tonu ʼaē ke tou fai. ʼE tou lava falala ko te ʼu folafola ʼa Sehova ʼe ina fakaliliu “ke poto ia ia ʼaē ʼe mole heʼeki fakapotopoto.” (Pesalemo 19:7) Kā tou tuku te Tohi-Tapu ke ina takitaki tātou, ʼe tapuakina anai tātou ʼaki he leʼo ʼo loto ʼe maʼa pea mo tou fiafia heʼe leleiʼia tātou e Sehova. (1 Timoteo 1:18, 19) Kapau ʼe tou tuku te ʼu folafola ʼa te ʼAtua ke natou taki tātou ʼi te ʼaho fuli, ʼe fakapale anai tātou e Sehova ʼaki te maʼuli heʼegata.—Soane 17:3.
ʼE Kei Kotou Manatuʼi Koa?
• He koʼē ʼe maʼuhiga ke tou tuku ia Sehova ʼAtua ke ina takitaki totatou maʼuli?
• Ko te ʼaluʼaga fea ʼaē ʼe liliu ai te ʼu folafola ʼa te ʼAtua ko he mālama taki ki totatou vaʼe?
• ʼE lava liliu feafeaʼi te ʼu folafola ʼa te ʼAtua ko he mālama ki totatou ala?
• ʼE tokoni feafeaʼi mai anai ia te ako ʼo te Tohi-Tapu ke tou muliʼi ia te takitaki ʼa te ʼAtua?
[Fehuʼi]
[Paki ʼo te pasina 15]
Ko te temi fea ʼaē ʼe kovi ai he fakakaugā mo he tahi ʼe mole lotu tahi mo tātou?
[Paki ʼo te pasina 16]
Ko te ʼu kaumeʼa ʼo Sesu neʼe ko nātou ʼaē neʼe natou fai te finegalo ʼo Sehova
[Paki ʼo te pasina 17]
ʼE tou fakahā koa ʼi totatou maʼuli ʼe tou fakamuʼamuʼa ia te ʼu gāue ʼo te Puleʼaga?