Te ʼu Fehuʼi ʼa Te Kau Lautohi

ʼE tonu koa ki he tahi ʼe tauhi kiā Sehova ke ʼaua naʼa ina fakaʼaogaʼi he meʼa ʼinu pea mo he meʼa kai ʼaē ʼe fai ʼaki te meʼa ʼe higoaʼi ko te caféine?

ʼE mole tapuʼi mai ʼi te Tohi-Tapu ki he Kilisitiano ke ina fakaʼaogaʼi te kafe, mo te tī, mo te sekola, pea mo te ʼu meʼa malie ʼaē ʼe fai ʼaki te caféine. Kae ʼe tou maʼu ʼi te Tohi-Tapu ia te ʼu pelesepeto moʼo tokoni kiā tātou ke tou fai he ʼu tonu ʼe lelei. Tou vakaʼi age muʼa te tupuʼaga ʼaē ʼe mole fakaʼaogaʼi ai e ʼihi ia te ʼu meʼa ʼinu pea mo te ʼu meʼa kai ʼaē ʼe fai ʼaki te caféine.

Ko te tupuʼaga tāfito ʼo tanatou mole fakaʼaogaʼi ai te ʼu meʼa ʼaia, heʼe ʼi tanatou manatu ko te caféine ʼe ko he faʼahiga toloke ʼe ina lava fetogi te aga ʼa he tahi, mo tana fakakaukau. ʼE feala ke liliu he tahi ʼo ina fakaʼaogaʼi tuʼumaʼu. ʼI te tohi ʼo ʼuhiga mo te ʼu faitoʼo ʼi te ʼu falemasi, ʼe ʼui fēnei ai: “Ko te fakaʼaogaʼi lahi pea mo fualoa ʼo te caféine ʼe feala ki te sino ʼo he tahi ke ina tali peʼe mo meʼa noaʼi, ke māhani kiai, pea mo manako kiai. Ko te ʼu fakaʼiloga ʼaē kua manako he tahi kiai, heʼe kapau ʼe ina tuku fakapunamaʼuli tana fakaʼaogaʼi ʼo te caféine, pea ʼe mamahi ʼulu, mo ʼitaʼita, mo loto hoha, mo ninimo tona ʼulu.” Neʼe tuʼu te ʼu fakaʼiloga ʼaia ʼi te tohi Diagnostic and Statistical Manual of Mental Disorders, ʼo ʼuhiga mo te liʼaki ʼo te fakaʼaogaʼi ʼo te caféine, ʼo tuʼu tahi mo ʼihi toloke. Koia lā ʼaē ʼe tou mahino ai, ko ʼihi ʼe mole natou leleiʼia te faʼahi ʼaia, naʼa natou pōpula kiai kae ʼe natou fia puleʼi ia nātou totonu.—Kalate 5:23.

Ko ʼihi ʼe natou ʼui, ʼe fakatupu kovi te caféine ki te maʼuli ʼo he tahi peʼe ki he tamasiʼi ʼe fuafatuʼi e tana faʼē. ʼE tonu ki te ʼu Kilisitiano ke natou ʼofa ki te ʼAtua ‘mo tonatou nefesi kātoa,’ ʼo mole natou fai he meʼa ʼe feala ai ke tuʼutāmaki tonatou maʼuli. Pea mai tona ʼaluʼaga ʼaē ʼe toe fakamaʼua age foki ke natou ʼoʼofa ki tonatou ʼu tatau, koia ʼe mole natou fakaʼaogaʼi anai he ʼu meʼa ʼe feala ai ke tuʼutāmaki he tamasiʼi ʼi te fatu ʼo tana faʼē.—Luka 10:25-27.

ʼE matatonu koa te taʼi tuʼania ʼaia? ʼE ʼi ai te fihi ʼo ʼuhiga mo te pikipikiga ʼo te ʼu faʼahiga mahaki pea mo te fakaʼaogaʼi ʼo te caféine. Mo ʼihi pē lā hahaʼi kumi, ʼe natou ʼui ʼe ʼaoga te kafe ki te maʼuli. ʼI te taʼu 2006, ʼe ʼui fēnei ʼi te nusipepa Time: “ ʼI te kamata neʼe ʼui [ko te caféine] ʼe tupu ai te kōsea ʼo te tānakiʼaga vai, te lahi ʼo te tōsio pea mo ʼihi ʼatu ʼu mahaki. Kae ʼe ʼiloga mai ʼi te sivi neʼe fai mole heʼeki faʼa fualoa, ʼe mole moʼoni ia te ʼu fua kovi ʼaia ʼe lau ʼe maʼu mai te fakaʼaogaʼi ʼo te caféine, kae ʼe ina fakahā ʼe maʼu te ʼu lelei maʼuhiga mai te fakaʼaogaʼi ʼo te caféine. Ko te caféine, ʼe ina lava puipui mai te mahaki ʼo te ʼate, mo te mahaki ʼe higoa ko Parkinson, mo te suka, pea mo te mahaki ʼe higoa ko Alzheimer, mo te ʼu kiʼi maka ʼi te ʼahu, mo te mahaki ʼulu pea mo ʼihi kōsea.” ʼE ʼui fēnei ʼi te sulunale ʼo ʼuhiga mo te fakaʼaogaʼi ʼo te caféine: “Ko tona kiʼi fakanounou, ke fakaʼaogaʼi fakapotopoto.”

ʼE tonu ki te ʼu kaugana fuli ʼa te ʼAtua ke natou fai hanatou ʼu tonu takitokotahi, ʼo mulimuli ki te ʼu fakamatala ʼaē ʼe fai ʼi te temi nei ʼo ʼuhiga mo te caféine pea mo fakaʼaogaʼi mo te ʼu pelesepeto faka Tohi-Tapu ʼaē ʼe pipiki kiai. Ohagē lā, ki he fafine faitama ʼe lagi mole ina fia fakaʼaogaʼi anai te caféine ʼi tona temi faitama heʼe ʼi tana manatu ʼe fakatupu kovi ki tana kiʼi tamasiʼi ʼaē ʼi tona fatu. Kapau ʼe tokagaʼi e he tahi kua hoko ʼita peʼe kua mahamahaki ʼuhi ko tana mole fakaʼaogaʼi putuputu ia te caféine, ʼe lagi lelei ke ina tuku muʼa te caféine, lagi ʼi he kiʼi temi. (2 Petelo 1:5, 6) ʼE tonu ki te ʼu Kilisitiano ʼaē, ke ʼaua naʼa natou faigaʼi ke muliʼi tanatou manatu.

ʼE fakalogo kiā koutou, peʼe kotou fakaʼaogaʼi he meʼa ʼinu pea mo he ʼu meʼa kai ʼaē ʼe fai ʼaki te caféine, kae kotou manatuʼi te tokoni ʼaenī ʼa Paulo: “Pe koutou kakai, pe koutou iʼinu, pe ko he meape e koutou fai, koutou fai ia meafuape ki te kololia o te Atua.”—1 Kolonito 10:31.