Te ʼu Fehuʼi ʼa Te Kau Lautohi

Ko te temi fea ʼaē kā fakagata ai te pāui ʼo te kau Kilisitiano ki te lagi?

ʼE mole maʼu he tali fakahagatonu ki te fehuʼi ʼaia ʼi te Tohi-Tapu. ʼE tou ʼiloʼi neʼe kamata fili ʼi te taʼu 33 ʼo totatou temi ia te ʼu tisipulo ʼa Sesu ʼaē ke natou ʼolo ʼo māʼuʼuli ʼi te lagi. (Gaue 2:1-4) ʼE tou toe ʼiloʼi foki ʼi te ʼosi mate ʼa te kau ʼapositolo, ko te “fulumeto” moʼoni ʼo te kau Kilisitiano fakanofo neʼe “tutupu fakatahi” mo te “vao kovi” ʼo te kau Kilisitiano loi. (Mateo 13:24-30, MN ) Pea, ʼi te fakaʼosiʼosi ʼo te ʼu taʼu 1800, neʼe toe kamata gāue ia te ʼu Kilisitiano fakanofo. ʼI te taʼu 1919 neʼe kamata toli ai “te taukai . . . o te kelekele,” ʼaē ko te tānaki ʼo te ʼu fakanofo fakamuli.—Apokalipesi 14:15, 16.

Talu mai te taʼu 1800 ʼo aʼu ki te taʼu 1931, neʼe fakatuʼutuʼu tāfito te fai faka mafola moʼo tānaki ia te toe ʼo te sino ʼo Kilisito. ʼI te taʼu 1931, ko te kau Ako Tohi-Tapu neʼe natou fua ia te higoa ko te kau Fakamoʼoni ʼa Sehova, pea ʼi te ʼalatike ʼo Te Tule Leʼo Fakapilitānia ʼo te ʼaho 15 ʼo Novepeli 1933, neʼe fakahā ai te higoa makehe ʼaia neʼe ko te “tenalio” ʼaē neʼe talanoa kiai ia Sesu ʼi te lea fakatātā iā Mateo 20:1-16. Ko te ʼu hola e 12 ʼaē ʼe talanoa ʼi te lea fakatātā neʼe ʼui ko te ʼu taʼu e 12 ʼaē neʼe kamata mai te taʼu 1919 ki te taʼu 1931. Hili te ʼu taʼu ki muli age, neʼe ʼui ko te pāui ki te Puleʼaga ʼi selō neʼe ʼosi ʼi te taʼu 1931 pea ko nātou ʼaē neʼe pāui ke kaugā hau mo Kilisito ʼi te taʼu 1930 pea mo te taʼu 1931 neʼe ko nātou “mumuli” ʼaia ʼaē neʼe pāui ki selō. (Mateo 20:6-8) Kae ʼi te taʼu 1966 neʼe fai ai te fakamahino foʼou ʼo te lea fakatātā ʼaia, pea neʼe ʼiloʼi lelei ai neʼe mole faka ʼuhiga ia ki te fakaʼosi ʼo te pāui ʼo te kau fakanofo.

ʼI te taʼu 1935 neʼe mahino ai ko te “toe hahaʼi tokolahi” ʼaē iā Apokalipesi 7:9-15 (MN ), ʼe natou faʼufaʼu te “tahi ʼu ovi,” ko te kau Kilisitiano ʼe natou māʼuʼuli ʼi te kele, pea ʼe tou sio anai kiā nātou ʼi “te u aho fakamuli” ʼo te tuʼu ʼaenī, pea ʼe natou hao anai ʼi Halamaketone. (Soane 10:16, MN; 2 Timoteo 3:1; Apokalipesi 21:3, 4) Hili te taʼu kātoa kiai, neʼe fakatuʼutuʼu leva ia te fai ʼo he ʼu tisipulo moʼo fakatahiʼi te toe hahaʼi tokolahi. Koia ʼi te ʼosi ʼo te taʼu 1966 neʼe ʼui tāfito ai, neʼe kua fakagata te pāui ki selō ʼi te taʼu 1935. Neʼe hagē neʼe kua fakagata te pāui ki selō heʼe teitei pē ko nātou fuli ʼaē  neʼe papitema ʼi te hili ʼo te taʼu 1935, neʼe natou ʼui ʼe natou maʼu ia te ʼamanaki ke natou māʼuʼuli ʼi te kele. Ki muli age, ko natou ʼaē neʼe pāui ki te ʼamanaki ki selō neʼe natou ʼui ʼe natou fetogi ia te kau Kilisitiano fakanofo ʼaē neʼe heʼe agatonu.

ʼE mahino ia, kapau ʼe agahala he Kilisitiano fakanofo, pea ko Sehova ʼe ina fili he tahi moʼona fetogi. (Loma 11:17-22) Kae ko te kaugamālie ʼo te kau Kilisitiano fakanofo moʼoni ʼaē kua heʼe agatonu ʼe lagi mole kei natou kaugamālie. Tahi ʼaē, ʼi te ʼalu ʼo te temi, ko ʼihi Kilisitiano neʼe papitema ʼi te ʼosi ʼo te taʼu 1935 neʼe natou maʼu te fakamoʼoni ʼa te laumālie māʼoniʼoni, ʼe natou maʼu ia te ʼamanaki ke natou māʼuʼuli ʼi te lagi. (Loma 8:16, 17) Koia, ʼe hā mai ʼe mole feala ke tou ʼiloʼi papau ia te temi ʼaē kā fakagata ai anai te pāui ʼo te kau Kilisitiano ki te lagi.

ʼE ʼiloʼi feafeaʼi e he tahi ʼi tona loto kua fakanofo ia pea kua kau ki te kai ʼo te pane pea mo ʼinu te vino ʼi te ʼAho Fakamanatu? ʼE mole tonu ke tou valokiʼi. Ko te faʼahi ʼaia, ʼaʼana pē pea mo Sehova. (Loma 14:12) Kae ʼe mole tonu ke fai kiā nātou he tokaga makehe. ʼE mole natou ʼui ʼuhi he neʼe pāui natou ki te lagi, ʼe natou maʼu ai he ‘ ʼatamai’ makehe, ʼe laka age iā nātou ʼaē ʼe kau ki te toe hahaʼi tokolahi. ʼE mole natou ʼui ʼe makehe age tanatou ia maʼu ia te laumālie māʼoniʼoni ʼi te tahi ʼu ovi, peʼe ke fai age he tokaga makehe peʼe mo ʼui, ko tanatou kai ki te pane pea mo ʼinu te vino, ʼe natou māʼoluga age leva ʼi te kau tagata ʼāfea ʼo te kōkelekāsio. ʼE natou agavaivai ʼo manatuʼi, ko ʼihi tagata fakanofo ʼi te ʼuluaki sēkulō neʼe mole fili ko he ʼu tagata ʼāfea peʼe mo faifekau faka minisitelio. (1 Timoteo 3:1-10, 12, 13; Tito 1:5-9; Sakopo 3:1) Neʼe ʼi ai ʼihi Kilisitiano fakanofo neʼe natou vaivai ʼi te faʼahi fakalaumālie. (1 Tesalonika 5:14) Pea ko te ʼu tuagaʼane, logolā neʼe fili nātou ki selō, kae ʼe mole natou faiakonaki ʼi te kōkelekāsio.—1 Timoteo 2:11, 12.

Koia, ko te kau Kilisitiano fakanofo pea mo tonatou ʼu kaumeʼa ia te tahi ʼu ovi ʼe natou faiga ke natou mālolohi ʼi te faʼahi fakalaumālie, ʼo natou fakatupu iā nātou te fua ʼo te laumālie māʼoniʼoni pea mo gāue ki te tokalelei ʼo te kōkelekāsio. Ko te kau Kilisitiano fuli, pe neʼe fili nātou ki selō peʼe natou kau ki te tahi ʼu ovi, kae ʼi te takitaki ʼa te Kolesi Pule ʼe natou gāue kinakina ʼi te fai faka mafola pea mo fai ni ʼu tisipulo. ʼE fiafia ia te kau Kilisitiano fakanofo ʼi te fai ʼo te faʼahi ʼaia ʼo mulimuli pē ki te finegalo ʼo te ʼAtua ʼaē ke natou nonofo ʼi te kele ʼi tonatou ʼuhiga kaugana ʼa Sehova.