ʼE Mole Kei ʼi Ai Koa He Poto Tāʼofi ʼo Te Agakovi?

Ko te kiʼi tamasiʼi tagata ʼe fia ʼiloʼi meʼa fuli ʼe ina toʼo age te meʼa neʼe tanu ʼi te kele—ko he koga meʼa neʼe tanu ai te ʼu pulu—pea neʼe paʼulu ʼo kivi ai pea mo māʼimoa. Ko te faʼē ʼe ina liʼaki tana tamasiʼi neʼe hoki fānauʼi pē, ʼo ina fufū ʼi te tukuʼaga ʼotaʼota ʼi te vaʼe ala. Ko he tagata neʼe fakamavae ʼi tana gāue ʼe toe liliu ki tana fale gāue, pea ina fana ia nātou fuli pē ʼe sio ki ai, pea ki muli age neʼe ina toe fanahi pē ia ia totonu. Ko he tagata ʼe fakaʼapaʼapaʼi e te hahaʼi, ʼe ina fakaʼalikiʼi te tamaliki liliki.

ʼI MEʼA fakaʼofaʼofa foki, heʼe ko te ʼu taʼi fakamatala ʼaia ʼo te ʼu agakovi kua liliu ko he ʼu agamāhani ʼi totatou temi. Tahi ʼaē meʼa kua kovi age ʼosi, heʼe ʼi te agamāhani ʼe fufū ʼaki te ʼu fakamatala ʼo te matehi ʼo he hahaʼi kātoa, pea mo te agamālohi. Neʼe ʼui fēnei ʼi te nusipepa neʼe tā ʼi te taʼu 1995: “Neʼe ko te sēkulō ʼaenī ʼa Satana, he neʼe kua kovi ʼaupitō te mālamanei. Neʼe mole he tahi age temi neʼe fakahā ai e te hahaʼi hanatou loto pea mo hanatou holi lahi fēia ke natou matehi te ʼu lauʼi miliona hahaʼi ʼuhi ko tonatou lanu, peʼe ko tanatou lotu, peʼe ko tonatou tuʼulaga faka sōsiale.”

ʼI te sēkulō pē ʼaia, ʼe ʼulihi e te hahaʼi ia te ʼaele, mo te kele, mo tona ʼu koloa moʼo taupau te maʼuli fuli, pea mo tupu ai ia te mamate ʼa ʼihi manu. ʼE feala anai koa ki te tagata ke ina fakagata ia te ʼu tokakovi fuli ʼaia pea mo fakaliliu ia te kele ʼe ko he nofoʼaga ʼe lelei age pea mo fīmālie age? Peʼe faiga anai koa ia ke ina heu ʼaki he taufale ia he tai ʼe fānake mai? Neʼe ʼui fēnei e te polofesea neʼe lahi te ʼu manatu neʼe ina tohi ʼo ʼuhiga mo te agakovi: “Neʼe au fakatokagaʼi ia te maʼuhiga ʼaē ke au fai he fetogi lahi ʼi te mālamanei, ke lelei age te maʼuli ʼi te mālamanei. Kae ko te mālamanei ʼe mole fetogi ia.” Lagi ʼe fēia takotou manatu.

ʼE lava fakatatau ia te agaaga ʼo te mālamanei ki he vaka ʼi te tai ʼe ʼāʼāsili age tana hou ʼi te hoholo ʼo te ʼu ʼaho. Logolā ʼe mole he tahi ʼe fia ʼalu mo te vaka ʼi te hou ʼaia ʼo te tai, kae ʼe mole natou lava fetogi ia te ʼalu ʼo te vaka. ʼE hagatonu ʼosi pē te vaka ia ke mou ʼi te ʼafā, ʼe mole kei matatāʼofi.

ʼI hona faʼahiga ʼaluʼaga pē, ʼe feala pē ke ʼui ʼo ʼuhiga mo te ʼāsili kovi ʼo te mālamanei, heʼe tupu mai te ʼuhiga heʼe haohaoa ʼo te tagata. (Loma 3:23) Kae ʼe tupu pē ia ko te tagata ʼaē ʼe lahi ʼaupitō ai te agakovi, mo tona hagē ʼe fakaʼalu ʼo lēlēsili ʼosi. ʼE feala koa ke ʼui ʼe takitaki ia te tagata e he mālohi agakovi fakapulipuli? Kapau ko ia ʼaia, ko ai koa ia te mālohi ʼaia, pea ʼe feafeaʼi hotatou puipui mai ai? ʼE tali anai te ʼalatike kā hoa mai ki te ʼu fehuʼi ʼaia.

[Haʼuʼaga ʼo te paki pasina 3]

© Heldur Netocny/Panos Pictures