ʼE Maʼuli Te Folafola ʼa Sehova

Ko He ʼu Puani ʼAoga ʼo Te Tohi ʼo Tagilāulau

NEʼE sio ia te polofetā ko Selemia ki te fakahoko ʼo te tautea ʼaē neʼe ina tala iā taʼu e 40 ki muʼa atu. Neʼe feafeaʼi ia te polofetā ʼi te temi ʼaē neʼe sio tonu ai ki te fakaʼauha ʼo tona kolo ʼaē neʼe ʼofa mamahi ai? ʼE ʼui ʼi te ʼu ʼuluaki palalau ʼo te Septante Faka Keleka ʼo ʼuhiga mo te tohi ʼo Tagilāulau: “Neʼe heka ia Selemia ʼo tagi pea mo lāuga ki Selusalemi.” Neʼe tohi ʼi te taʼu 607 ʼi muʼa ʼo totatou temi kae neʼe heʼeki galo ʼi te ʼatamai ʼo te polofetā ia te ʼohofiʼi ʼo Selusalemi iā māhina e 18 pea mo tutu. ʼE fakahā lelei ʼi te tohi ʼo Tagilāulau ia te lotomamahi ʼaupitō ʼa Selemia. (Selemia 52:3-5, 12-14) ʼE mole he kolo ʼi te hisitolia neʼe fēia tona tagiʼi.

Ko te tohi ʼo Tagilāulau ʼe ko he tānakiʼaga tohi ʼo te ʼu palalau fakatuketuke e nima. Ko te ʼu ʼuluaki kāpite e fā ʼe ko te ʼu lotomamahi; ko te nima kāpite ʼe ko he kolekole, peʼe ko he faikole. Ko te ʼu ʼuluaki kāpite e fā ʼe ko te ʼu vaega ʼe kamata ʼaki te ʼu mataʼi tohi kehekehe ʼo mulimuli ki te ʼu mataʼi tohi Faka Hepeleo e 22. Ko te nima kāpite ʼe ʼi ai tona ʼu vaega e 22, ʼo tō tonu mo te lahi ʼo te ʼu mataʼi tohi Faka Hepeleo, kae ʼe mole tohi te ʼu vaega ʼo mulimuli ʼosi ki te fakahoahoa ʼo te ʼu mataʼi tohi Faka Hepeleo.—Tagilāulau 5:1, nota ʼi te lalo pāsina.

“KUA GAʼEGAʼE TOKU ʼU MATA ʼI TE TAGI”

(Tagilāulau 1:1–2:22)

“Ê! ʼe heka tokotahi, te kolo ʼaē neʼe mahu ai te hahaʼi! Kua liliu ʼo tatau mo he fafine vītua, ia ia ʼaē neʼe kaugamālie ʼi te lotolotoiga ʼo te ʼu puleʼaga! Kua lelei ki te gāue kinakina, ia ia ʼaē ko te fineʼaliki ʼi te lotolotoiga ʼo te ʼu tisitilike!” ʼE kamata fēia te ʼu tagilāulau ʼa te polofetā ko Selemia ʼo ʼuhiga mo Selusalemi. ʼI tana fakamahino ia te tupuʼaga ʼo te hoko ʼo te malaʼia ʼaia, ʼe ʼui fēnei e te polofetā: “Ko Sehova totonu neʼe ina tuku kiā te ia te lotomamahi ʼuhi ko te mahu ʼo tana ʼu talagataʼa.”—Tagilāulau 1:1, 5.

Neʼe fakatātā ia Selusalemi ki he fafine vītua ʼe mole kei ʼi ai hona ʼohoana pea mo hana fānau, ʼe ina fehuʼi fēnei: “ ʼE ʼi ai koa he mamahi ʼe tatau mo toku mamahi?” ʼO ʼuhiga mo tona ʼu fili, ʼe ina kole fēnei ki te ʼAtua: “Ke haʼu fuli tanatou ʼu agakovi ki ʼou muʼa, pea ke ke tauteaʼi ia nātou ohagē ko tau tauteaʼi ia au ʼuhi ko taku ʼu agahala fuli. Heʼe lahi toku ʼu mamahi, pea ʼe mahaki toku loto.”—Tagilāulau 1:12, 22.

ʼI tona lotomamahi ʼaupitō, ʼe ʼui fēnei e Selemia: “ ʼI tona hauhau lahi [ko Sehova] neʼe ina peheʼi ki lalo ia te ʼu tala fuli ʼo Iselaele. Neʼe ina toʼo ia tona nima mataʼu ʼi muʼa ʼo te fili; pea ʼi loto ʼo Sakopo ʼe vela ohagē ko he afi kakaha neʼe manunū kātoa.” ʼI tana fakamatalatala tona mamahi ʼaupitō, ʼe tagi fēnei ia te polofetā: “Kua gaʼegaʼe toku ʼu mata ʼi te tagi. ʼE gaūgaūe toku ʼu gākau. Kua mafola toku ʼate ʼi te kele.” Māʼiapē lā mo nātou ʼaē ʼe fakalaka ʼe natou punamaʼuli, ʼo ʼui fēnei: “ ʼE ko te kolo koa lā ʼaia neʼe matou logo kiai: ‘ ʼE matalelei ʼaupitō, ko he fiafiaʼaga ki te kele kātoa’?”—Tagilāulau 2:3, 11, 15.

Te ʼu Tali Ki Te ʼu Fehuʼi Faka Tohi-Tapu:

1:15—Neʼe feafeaʼi kiā Sehova ia tana “molomoloki . . . ia te meʼa lomi vite ʼa te finemui tāupoʼou, taʼahine ʼa Suta”? ʼI tana fakaʼauha ia te kolo, ʼaē ʼe fakatatau ki he finemui tāupoʼou, neʼe lahi ʼaupitō ia te ligitoto ʼa te kau Papiloni, pea neʼe fakatatau ki he molomoloki ʼo te ʼu fuhiga vite ʼi he meʼa lolomi vite. Neʼe fakakikite e Sehova ia te faʼahi ʼaia pea neʼe ina tuku ke hoko, koia ʼe feala ai hata ʼui neʼe ina ‘molomoloki ia te meʼa lomi vite.’

2:1—Neʼe feafeaʼi te “lī ifo mai te lagi ki te kele ia te taulekaleka ʼo Iselaele”? “Ko te lagi ʼe māʼoluga age ʼi te kele,” pea ʼi ʼihi temi kā fakalainoaʼi  ia te ʼu meʼa māʼoluga pea ʼe ʼui ʼe “lī ifo mai te lagi ki te kele.” Ko “te taulekaleka ʼo Iselaele”—te kolōlia pea mo te mālohi ʼaē ʼe ina maʼu ʼuhi ko te tapuakina ʼa Sehova—neʼe lī ifo ʼaki te fakaʼauha ʼo Selusalemi pea mo te maumauʼi ʼo Suta.—Isaia 55:9.

2:1, 6—ʼE feafeaʼi ia te “hiliʼaga vaʼe” ʼo Sehova pea mo tona “fale lau”? Neʼe hiva fēnei ia te tagata fai pesalemo: “Tou hū ki tona tapenakulo lahi; tou tulolo ʼi muʼa ʼo tona hiliʼaga vaʼe.” (Pesalemo 132:7) Koia, ko te “hiliʼaga vaʼe” ʼaē ʼe talanoa kiai iā Tagilāulau 2:1, ʼe faka ʼuhiga ki te fale tauhi ʼo Sehova, peʼe ko tona fale lotu. Ko te kau Papiloni neʼe natou ‘tutu te ʼapi ʼo Sehova’ ohagē pē ko he fale lau ʼi he ʼōloto.—Selemia 52:12, 13.

2:16, 17—He koʼē ʼe mole kamata ia te vaega 16 ʼaki ia te mataʼi tohi ‛ayin pea mo te vaega 17 ʼaki te mataʼi tohi pé’ moʼo mulimuli ki te fakahoahoa ʼo te ʼu mataʼi tohi Faka Hepeleo? Ko te faʼahiga tohi ʼo te ʼu palalau fakatuketuke ʼaia, ʼi te agamāhani ko te kau faitohi ʼe natou mulimuli ki te fakahoahoa ʼo te ʼu mataʼi tohi Faka Hepeleo. Kae neʼe mole natou fai ia te faʼahi ʼaia ke mole kita mahino ki te ʼu manatu ʼaē neʼe tohi. Ko te manatu ʼaē ke tāʼofi, ʼaē neʼe maʼuhiga age ʼi hata ʼiloʼi he ʼu mataʼi tohi, he neʼe tokoni pē ia te faʼahi ʼaia ki te maʼu fakaʼatamai. ʼI te kāpite 3 pea mo te kāpite 4 ʼo te tohi Tagilāulau, ʼe tou toe maʼu ai foki ia te fetogi ʼo te ʼu tuʼuʼaga ʼo te ʼu mataʼi tohi, ko te mataʼi tohi pé’ ʼe ʼuluaki tohi ʼi te mataʼi tohi ‛ayin.—Tagilāulau 3:46, 49; 4:16, 17.

2:17—Ko te “folafola” tāfito fea ʼaē neʼe fakahoko e Sehova ʼo ʼuhiga mo Selusalemi? ʼE lagi talanoa ʼi henī ki te koga tohi ʼo Levitike 26:17, ʼaē ʼe ʼui fēnei ai: “ ʼE au haga atu anai kiā koutou pea ʼe mahino ia ʼe kotou lavā anai ʼi muʼa ʼo tokotou ʼu fili; ko nātou ʼaē ʼe fehihiʼa kiā koutou ʼe natou taʼomia anai koutou, pea ʼe mahino ia ʼe kotou feholaki anai kae mole he tahi ʼe ina tuli koutou.”

Te ʼu Puani ʼe Tou Lava Tāʼofi:

1:1-9. ʼE tagi mamahi ia Selusalemi ʼi te pōʼuli, pea ʼe hali ʼi tona ʼu kauʼahe ia tona ʼu loʼimata. ʼE maumauʼi anai tona ʼu matapā, pea ʼe goʼegoʼe tona ʼu pelepitelō. ʼE lotomamahi ʼaupitō tana ʼu finemui tāupoʼou. Koteā tona tupuʼaga? Koteʼuhi neʼe agahala mamafa ia Selusalemi. ʼE nofo ʼi tona lalo tapaʼi kofu ia tana aga heʼemaʼa. ʼE mole fakatupu fiafia ia tana talagataʼa; ʼe fakatupu tagi, fakatupu goʼegoʼe, fakatupu lotomamahi, pea mo kona.

1:18. Kā tauteaʼi e Sehova ia te kau talagataʼa, ʼe faitotonu tuʼumaʼu ia.

2:20. Neʼe fakatokaga ki te kau Iselaele kapau ʼe mole natou fakalogo ki te leʼo ʼo Sehova, ʼe natou malaʼia anai, ko tona faka ʼuhiga ʼi te ʼu malaʼia ʼaia ʼe kau ai anai mo tanatou kai ‘te kakano ʼo tonatou ʼu foha pea mo tonatou ʼu ʼofafine.’ (Teutalonome 28:15, 45, 53) ʼE mole ko he aga fakapotopoto anai mo kapau ʼe tou filifili ke tou talagataʼa ki te ʼAtua!

“ ʼAUA NAʼA KE FUFŪ TOU TALIGA KI TAKU KOLE FAKAFĪMĀLIE”

(Tagilāulau 3:1–5:22)

ʼI te kāpite 3 ʼo Tagilāulau, ʼe talanoa ki te puleʼaga ʼo Iselaele  ohagē ko “he tagata mālohi.” Logolā te ʼu fakataga ʼaē neʼe tau mo ia, kae ʼe hiva fēnei ia te tagata ʼaia: “ ʼE agalelei ia Sehova ki ʼaē ʼe falala age kiā te ia, ki te nefesi ʼaē ʼe ina kumi tuʼumaʼu ia ia.” ʼI tana faikole ki te ʼAtua moʼoni, ʼe ina kolekole fēnei: “ ʼE tonu ke ke fagono ki toku leʼo. ʼAua naʼa ke fufū tou taliga ki taku kole fakafīmālie, ki taku tagi atu.” ʼI tana kole kiā Sehova ke tokaga mai ki te manukinuki ʼo te ʼu fili, ʼe ina ʼui fēnei: “ ʼE ke liufaki anai kiā nātou ia he tūʼā, Ê Sehova, ʼo mulimuli ki te gāue ʼo ʼonatou nima.”—Tagilāulau 3:1, 25, 56, 64.

ʼE fakahā e Selemia ia te ʼu meʼa ʼaē ʼi tona loto ʼo ʼuhiga mo te ʼu fua kovi ʼo te ʼu māhina e 18 ʼaē neʼe ʼohofiʼi ai Selusalemi pea mo tagi fēnei: “Kua lahi age ia te tūʼā ʼo te hala ʼo te ʼofafine ʼo taku hahaʼi ʼi te tautea ʼo te agahala ʼa Sotoma, ʼaē neʼe holoʼi fakavilivili, pea neʼe mole ʼi ai he tahi neʼe tokoni age kiā nātou.” ʼE toe ʼui fēnei e Selemia: “ ʼE lelei age ia te hahaʼi ʼaē ʼe mamate ʼaki te heletā ʼi te hahaʼi ʼaē ʼe mamate ʼaki te hoge, heʼe ko nātou ʼaia ʼe vaivavai anai ʼi te fia kai heʼe mole kei ʼi ai he ʼu fua ʼo te ʼu gāueʼaga.”—Tagilāulau 4:6, 9.

Ko te kāpite 5 ʼe talanoa ai ki te fai palalau ʼa te hahaʼi ʼo Selusalemi. ʼE natou ʼui fēnei: “Ke ke manatuʼi Ê Sehova ia te meʼa neʼe hoko kiā mātou. Tokaga ifo pea mo sio ki tomatou manukinuki.” ʼI tanatou fakamatala tonatou mamahi, ʼe natou kolekole fēnei: “Ê Sehova ʼe ke ʼafio anai ki he ʼu temi heʼegata. Ko tou hekaʼaga hau ʼe tuʼu ʼi te taʼiake fuli. Toe fakaliliu atu ia mātou kiā te koe, Ê Sehova, pea ʼe matou ʼolo atu anai. Foaki mai kiā mātou he ʼu ʼaho foʼou ohagē ko te temi muʼa.”—Tagilāulau 5:1, 19, 21.

Te ʼu Tali Ki Te ʼu Fehuʼi Faka Tohi-Tapu:

3:16—Koteā te faka ʼuhiga ʼo te ʼui ʼaē: “ ʼAki te maka ʼe ina fasifasiʼi toku ʼu nifo”? ʼE ʼui fēnei ʼi te tohi: “ ʼI te toe liliu mai ʼa te kau Sutea mai tanatou ʼaunofo, neʼe tonu ke natou fakamoho tanatou ʼu pane ʼi te ʼu pū neʼe natou keli ʼi te kele, koia ʼaē neʼe maʼu ai te ʼu kihiʼi maka ʼi tanatou ʼu pane taʼo.” Ko te kai ʼo te pane ʼaia neʼe fasifasi ai te ʼu nifo ʼo he tahi.

4:3, 10—He koʼē ʼe fakatatau e Selemia ia “te ʼofafine ʼo [tana] hahaʼi” ki te “ ʼu otulusi ʼi te toafa”? Ko te otulusi “ ʼe mole tokaga lelei ki tona ʼu ʼuhi, ohagē ia ʼe mole ko hona ʼu ʼuhi,” ko te ʼui ʼaia iā Sopo 39:16. Kā kua ʼosi foafoa tona ʼu fua; ko te otulusi fafine ʼe ina tuku te fātaʼi mo tona ʼu ʼuhi, pea ʼalu ia ʼo fakatahi ki he tahi ʼu otulusi fafine, kae ina tuku te ʼu ʼuhi ki te otulusi tagata ke tokaga kiai. Pea koteā ʼaē ʼe hoko mokā ʼe felāveʼi te ʼu ʼuhi mo he tuʼutāmaki? Ko te otulusi tagata pea mo fafine ʼe nā mavae mai te fātaʼi, ʼo nā liʼaki tonā ʼu ʼuhi. ʼI te temi ʼaē neʼe ʼohofiʼi ai Selusalemi e Papiloni, neʼe kovi ʼaupitō ia te hoge ʼi te kolo, pea ko te ʼu faʼē ʼaē ʼi te agamāhani ʼe natou lotoʼofa neʼe natou liliu ʼo fakapōgi tanatou fānau, ohagē ko te ʼu otulusi ʼi te toafa. Neʼe kehekehe ʼosi ia mo te tokaga ʼofa ʼa te ʼu kulī vao fafine.

5:7—ʼE tukugākoviʼi koa e Sehova ia te hahaʼi ki te ʼu hala ʼo tonatou ʼu tupuʼaga? Kailoa ia, ʼe mole hoʼi fakatūʼā e Sehova te hahaʼi ki te ʼu agahala ʼo tanatou ʼu kui. ʼE ʼui fēnei  ʼi te Tohi-Tapu: “ ʼE tou tahi huʼi maʼua anai ki te ʼAtua maʼa tātou takitokotahi.” (Loma 14:12) Kae ko te ʼu fua kovi ʼe feala ke hoholo fualoa pea mo fua ki te ʼu taʼiake ki ʼamuli. Ohagē lā, ko te tauhi ʼa te Iselaele ʼāfea ki te ʼu taulāʼatua neʼe faka faigataʼa ki te kau Iselaele agatonu ʼo te ʼu temi ki muli age hanatou mulimuli ki he ala ʼe faitotonu.—Ekesote 20:5.

Te ʼu Puani ʼe Tou Lava Tāʼofi:

3:8, 43, 44. Lolotoga te malaʼia ʼaē neʼe tō ki Selusalemi, neʼe mole fia logo ia Sehova ki te tagi ʼo te hahaʼi ʼo te kolo. Koteā tona tupuʼaga? Koteʼuhi neʼe talagataʼa ia te hahaʼi, pea neʼe mole natou fia fakahemala. Kapau ʼe tou loto ke tali mai ia Sehova ki tatatou ʼu faikole, ʼe tonu ke tou fakalogo kiā te ia.—Tāʼaga Lea 28:9.

3:20. Ko Sehova, “te Māʼoluga ʼAupitō ʼi te kele kātoa” ʼe māʼoluga fau, koia ʼaē ʼe ina fakamālalo ifo ai ia ia “ke sio ki te lagi pea mo te kele.” (Pesalemo 83:18; 113:6) Kae ko Selemia neʼe mahino lelei ki te lotolelei ʼaē ʼa te Māfimāfi ʼo sio ifo ki te hahaʼi, pea mo lotomahino kiā nātou moʼo fakaloto mālohiʼi ʼo nātou. ʼE ko he meʼa fakafiafia hata ʼiloʼi ko te ʼAtua moʼoni ʼe mālohi ʼaupitō pea mo poto ʼaupitō kae ʼe toe agavaivai foki!

3:21-26, 28-33. ʼE feafeaʼi hatatou lava kātakiʼi he ʼu mamahi faigataʼa? ʼE ʼui fēnei mai e Selemia, ʼe mole tonu ke galo iā tātou ko Sehova ʼe mahu ʼi te agaʼofa pea mo mahu ʼi te manavaʼofa. ʼE tonu foki ke tou toe manatuʼi, ko totatou maʼuli ʼe ko he tupuʼaga tāfito ʼaia ke mole puli iā tātou ia te ʼamanaki, pea ʼe tonu ke tou faʼa kātaki pea mo fakatalitali fakalogologo, ʼo mole tou muhumuhu, heʼe ko Sehova totatou haofakiʼaga. Tahi ʼaē meʼa, ʼe tonu anai ke tou “tuku ifo [totatou] gutu ki te efu,” ke tou agavaivai ʼi te ʼu ʼahiʼahi, ʼo tou mahino mokā fakagafua e te ʼAtua he meʼa ke hoko heʼe ʼi ai tona tupuʼaga tāfito.

3:27. Ko te tauʼi ʼo te ʼu fihifihia ʼo ʼuhiga mo te tui ʼi tokotou temi tūpulaga, ʼe lagi tonu ke kotou kātakiʼi he ʼu faigataʼaʼia pea mo he fakalainoaʼi ʼo koutou. Kae ʼe ‘lelei ki he tagata mālohi ke ina ʼamo tona pou fakamamahi ʼi tona temi tūpulaga.’ Koteā tona tupuʼaga? Koteʼuhi kā kita ʼamo tota pou fakamamahi ʼi te temi tūpulaga, ʼe ko he ako moʼo teuteuʼi ʼo kita ke kita tauʼi te ʼu fihifihia ki muli age.

3:39-42. ʼE mole ko he aga fakapotopoto mo kapau ʼe tou ‘muhumuhu’ heʼe tou mamahi ʼi tatatou ʼu agahala. ʼAua naʼa tou muhumuhu ʼi tata utu ia te ʼu fua kovi ʼo te agakovi, kae “tou sivisivi tatatou ʼu ala pea mo tou vakavakaʼi te ʼu ala ʼaia, pea tou liliu mai kiā Sehova.” ʼE tonu ke tou agapoto ʼo fakahemala pea mo fakatonutonuʼi totatou ʼu ala.

Ke Liliu Ia Sehova Ko Tokotou Falalaʼaga

Ko te tohi ʼo Tagilāulau ʼe ina fakahā mai pe neʼe koteā te manatu ʼa Sehova ʼo ʼuhiga mo Selusalemi pea mo te fenua ʼo Suta ʼi te ʼosi tutu ʼo te kolo e te kau Papiloni pea mo tuku lāvaki ia te fenua. Ko te fakahā fakahagatonu ʼo te ʼu agahala ʼi te tohi ʼo Tagilāulau, ʼe hā lelei mai ia te manatu ʼa Sehova, neʼe hoko te malaʼia ki te kolo he neʼe ko te ʼu agahala ʼa te hahaʼi. Ko te ʼu hiva ʼo te tohi ʼaia, ʼe toe maʼu ai te ʼu hiva ʼe fakahā ai te ʼamanaki ʼaē kiā Sehova pea mo te fia liliu ki te agatonu. Kae ko te ʼu manatu ʼaia neʼe mole maʼu e te tokolahi ʼo te hahaʼi ʼi te temi ʼo Selemia, neʼe gata pē kiā Selemia pea mo te toe ʼa te kau Iselaele fakahemala ʼaē neʼe natou maʼu ia te ʼu manatu ʼaia.

Ko te sivisivi e Sehova te ʼaluʼaga ʼo Selusalemi ohagē ko tona fakahā ʼi te tohi ʼo Tagilāulau, ʼe kita maʼu ai ia te ʼu ako maʼuhiga e lua kiā tātou. ʼUluaki, ko te fakaʼauha ʼo Selusalemi pea mo te tuku lāvaki ʼo Suta, ʼe ina fakaloto mālohiʼi ke tou fakalogo kiā Sehova pea ʼaua naʼa tou meʼa noaʼi ia te finegalo ʼo te ʼAtua. (1 Kolonito 10:11) ʼE tou maʼu te lua ako mai te faʼifaʼitaki ʼa Selemia. (Loma 15:4) Logolā neʼe kua hagē ʼe mole kei ʼi ai he ʼamanaki, kae ko te polofetā lotomamahi ʼaupitō ʼaia neʼe haga kiā Sehova ke ina haofaki ia ia. ʼE maʼuhiga ke tou tuku ia tatatou falala kātoa kiā Sehova pea mo tana Folafola, pea ke liliu ia te ʼAtua ko totatou falalaʼaga!—Hepeleo 4:12.

[Paki ʼo te pasina 9]

Neʼe sio ia te polofetā ko Selemia ki te fakahoko ʼo te tautea ʼaē neʼe ina tala

[Paki ʼo te pasina 10]

Ko te tui ʼa te kau Fakamoʼoni Kolea neʼe ʼahiʼahiʼi ʼo ʼuhiga mo te mole kau ki te ʼu meʼa faka politike