Kua ʼIloʼi Te Tupuʼaga ʼo Te Agakovi!

ʼI TE ʼuluaki sēkulō, tokolahi te kau Sutea neʼe natou fakatalitali ki te haʼu ʼa te Mēsia ʼaē neʼe fakapapauʼi age kiā nātou. (Soane 6:14) ʼI te haʼu ʼa Sesu ki te kele, neʼe ina foaki ia te fīmālie pea mo te mahino ki te Folafola ʼa te ʼAtua. Neʼe ina fakamālōlō te kau mahaki, mo fafaga te hahaʼi hālofia, mo fakagona te matagi, pea mo fakatuʼuake te kau mate. (Mateo 8:26; 14:14-21; 15:30, 31; Maleko 5:38-43) Neʼe ina toe tala foki mo te ʼu folafola ʼa Sehova pea mo fakahā ia te fakapapau ʼo ʼuhiga mo te maʼuli heʼegata. (Soane 3:34) ʼAki tana ʼu palalau pea mo tana ʼu gāue, neʼe fakahā lelei e Sesu neʼe ko ia te Mēsia, ia ia ʼaē kā ina faka ʼāteaina ia te mālamanei mai te agahala pea mo tona ʼu fua kovi fuli.

Neʼe tonu foki ko te kau takitaki lotu Sutea ʼaē ke natou ʼuluaki tali lelei ia Sesu, mo fagono ki ai, pea mo tali fakafiafia tana takitaki. Kae neʼe mole fēia pē lā ia tanatou aga ʼaē kiā Sesu. Neʼe fēhihiʼa nātou ki ai, mo natou fakatagaʼi ia ia, pea mo natou fonofono ke natou matehi ia ia!—Maleko 14:1; 15:1-3, 10-15.

Koia neʼe tāu mo te ʼu tagata ʼaia ke tauteaʼi nātou e Sesu ʼuhi ko tanatou agakovi. (Mateo 23:33-35) Kae neʼe ʼiloʼi e Sesu neʼe ʼi ai te tahi kehe ʼaē neʼe tupu ai te agakovi ʼo te kau takitaki lotu ʼaia, pea ʼe tonu ke toe tauteaʼi mo ia ʼaia. Neʼe ina ʼui fēnei age kiā nātou: “ ʼE kotou ʼomai koutou, mai takotou tamai te Tēvolo, pea ʼe kotou fia fakahoko te ʼu meʼa ʼaē ʼe holi kiai takotou tamai. Neʼe ko he fakapō ia ʼi tana kamata, pea neʼe mole haga nofo ia ʼi te moʼoni, heʼe mole iā te ia te moʼoni. Kā ina tala te loi, pea ʼe palalau ia ʼo mulimuli pē ki te ʼu ʼulugaaga ʼo ia totonu, koteʼuhi gutuloi, pea ʼe ko te tamai ʼo te loi.” (Soane 8:44) Neʼe ʼiloʼi lelei pē e Sesu ʼe feala ki te hahaʼi ke natou fai he ʼu aga ʼe kovi, kae neʼe ina fakahā ia te tupuʼaga tāfito ʼo te agakovi—ko Satana te Tēvolo.

ʼI te ʼui ʼaē e Sesu ko Satana “neʼe mole haga nofo ia ʼi te moʼoni,” neʼe ina fakahā ko te laumālie ʼaia ʼi te kamata neʼe ko te kaugana agatonu ʼa te ʼAtua, kae neʼe maliu kehe ia mai te faitotonu. He koʼē neʼe fakafeagai ia Satana kiā Sehova? Koteʼuhi neʼe lahi fau tana fia faka maʼuhigaʼi ʼo ia totonu, ʼo iku ai mo tana mānumānu ki te tauhi ʼaē neʼe ko te ʼAtua pē ʼaē neʼe tonu ke fai ki ai. a—Mateo 4:8, 9.

Neʼe hā ia te fakafeagai ʼa Satana ʼi te ʼōloto ʼo Eteni ʼi te temi ʼaē neʼe ina kākāʼi ai ia Eva ke ina kai ia te fuaʼi ʼakau ʼaē neʼe tapuʼi age. ʼI te ʼuluaki loi ʼaē neʼe ina fai pea mo tana fasituʼu ʼo ʼuhiga mo Sehova, neʼe fakaliliu aipē e Satana ia ia totonu ko “te tamai ʼo te loi.” Pea tahi ʼaē meʼa, ʼi tana fakaneke ia Atama mo Eva ke nā talagataʼa, neʼe ina fakatupu ai te agahala ʼo ina puleʼi ai ia nāua, mo taki ai ia nāua ki te mate pea mo tonā hōloga. Koia neʼe toe haga pē ia Satana ʼo fakaliliu ia ia totonu ko ‘he tahi ʼe fai  fakapō’—ʼi tona fakahagatonu ko ia ʼaē ʼe lahi tokotahi ʼi tana fai fakapō!—Senesi 3:1-6; Loma 5:12.

Neʼe toe aʼu ia te fakahala ʼa Satana kiā nātou ʼaē ʼe māʼuʼuli ʼi te lagi, ʼo ina toe fakahalaʼi ai ʼihi ʼāselo ke natou kau mo ia ki te fakafeagai ki te ʼAtua. (2 Petelo 2:4) Ohagē ko Satana, ko te ʼu laumālie agakovi ʼaia neʼe natou maʼu ia te ʼu holi heʼemaʼa ki te hahaʼi ʼo te kele. Kae ko te holi ʼaia ʼa te kau ʼāselo neʼe ko he ʼu felāveʼi fakasino fakalialia, ʼo tupu ai tona ʼu fua kovi.

Kua Fonu Ia Te Kele ʼi Te Agakovi

ʼE ʼui fēnei mai ʼi te Tohi-Tapu: “ ʼI te temi leva ʼaē neʼe kamata tuputupu ake te hahaʼi . . . pea mo natou maʼu tonatou ʼu ʼofafine, ko te ʼu foha ʼo te ʼAtua moʼoni neʼe natou tokagaʼi ko te ʼu ʼofafine ʼo te ʼu tagata, ʼe finelelei; pea neʼe natou toʼo maʼa nātou tonatou ʼu ʼohoana, ia nātou fuli ʼaē neʼe natou filifili.” (Senesi 6:1, 2) Neʼe ko ai ‘te ʼu foha ʼaia ʼo te ʼAtua moʼoni’? Neʼe ko te ʼu laumālie, kae neʼe mole ko he ʼu tagata. (Sopo 1:6; 2:1) He koʼē ʼe ʼui ko te ʼu laumālie? ʼUluaki, ko te fai ʼohoana ʼa te tagata pea mo te fafine neʼe kua fakatuʼutuʼu kua hili kiai te ʼu taʼu e 1 500, pea neʼe mole ʼi ai he tahi age fakatuʼutuʼu makehe ki te faʼahi ʼaia. ʼI te fakatokagaʼi mai te ʼu felāveʼi fakasino ʼaē neʼe fai e “te ʼu foha ʼo te ʼAtua moʼoni” ʼaē neʼe natou kofuʼi te ʼu sinoʼi tagata pea mo “te ʼu ʼofafine ʼo te ʼu tagata,” ʼe fia fakahā mai e te fakamatala ʼe ko he meʼa foʼou ia ʼaē neʼe hoko pea ʼe fakafeagai ʼosi ki te fakatuʼutuʼu ʼa te ʼAtua.

ʼI te faʼahiga fānau ʼaē neʼe tutupu ake ʼi te taʼi felāveʼi fakasino ʼaia, neʼe fakamoʼoni ai ʼe fakafeagai ki te fakatuʼutuʼu ʼa te ʼAtua. Neʼe higoaʼi te fānau ʼaia ko te kau Nefilime, heʼe ʼi tanatou lahilahi ake neʼe ko te ʼu tagata lalahi. Neʼe natou toe agamālohi ʼaupitō. Ko te kupu “Nefilime” ko tona faka ʼuhiga “Ko He Hahaʼi Agamālohi ʼAupitō.” ʼE lau ʼo ʼuhiga mo te ʼu tagata agamālohi ʼaia ʼe “ko te ʼu tagata mālolohi ʼo te temi muʼa, te ʼu tagata ʼiloa.”—Senesi 6:4.

Ko te agamālohi ʼaē neʼe maʼu e te kau Nefilime mo tanatou ʼu tamai neʼe heʼeki fēia he agakovi ki muʼa atu. ʼE ʼui fēnei iā Senesi 6:11: “Neʼe liliu te mālamanei ʼo kovi iā mata ʼo te ʼAtua moʼoni pea neʼe fonu te kele ko te agamālohi.” ʼEī, neʼe kua agamālohi ia te hahaʼi pea mo kovi ʼaupitō tonatou maʼuli ohagē pē ko te kau Nefilime pea mo tanatou ʼu tamai.

Neʼe fakahalaʼi feafeaʼi e te kau Nefilime pea mo tanatou tamai ia te hahaʼi ke natou fai ia te meʼa ʼaē ʼe kovi? Neʼe natou fakaoloolo te ʼu holi pea mo te ʼuhiga agahala ʼa te hahaʼi. Neʼe koteā tona fua? “Kua fakalialia te aga ʼa te hahaʼi fuapē ʼi te kele.” Pea neʼe fakaʼauha ai leva e Sehova ia te mālama ʼaia ʼaki he Tulivio ʼi te kele kātoa, ʼo gata pē ki te tagata agatonu ko Noe mo tona fāmili neʼe hao. (Senesi 6:5, 12-22) Kae ko te kau ʼāselo ʼaē neʼe natou kofuʼi te ʼu sinoʼi tagata neʼe natou toe liliu ufiufi ki te lagi. ʼI tanatou kua liliu ko te kau temonio, neʼe hoko atu pē tanatou fakafeagai ki te ʼAtua mo tana kau ʼāselo agatonu. Talu mai te temi ʼaia, kua tapuʼi e te ʼAtua kiā hanatou toe kofuʼi he sinoʼi tagata. (Suta 6) Kae ʼe kei mālohi pē tanatou ʼu fakahala ʼaē ki te tagata.

Kua ʼIloʼi Te Haʼuʼaga ʼo Te Agakovi!

Iā 1 Soane 5:19, ʼe fakahā ai te mālohi ʼo te agakovi ʼa Satana, ʼe ʼui fēnei: “Ko te mālamanei kātoa ʼe takoto ia ʼi te mālohi ʼo te agakovi.” Ko te Tēvolo ʼe ina fakatuputupu nei ʼi te  mālamanei ia te ʼu tuʼuga malaʼia. ʼE ina fakatuʼutuʼu tāfito ke ina fakalēsili age te agakovi. Koteā tona tupuʼaga? Koteʼuhi ko ia pea mo tana kau temonio kua kapu ifo ʼi te lagi talu pē te fakatuʼu ʼo te Puleʼaga ʼo te ʼAtua ʼi te taʼu 1914. ʼO ʼuhiga mo tonatou kapu ifo ʼaia, neʼe fakakikite fēnei ʼi te Tohi-Tapu: “Malaʼia ki te kele . . . , he kua hifo atu te Tēvolo kiā koutou, mo tona ʼita lahi, he kua ina ʼiloʼi kua nounou tona temi.” (Fakahā 12:7-12) ʼE fakahoko feafeaʼi e Satana tana fakahala ki te mālamanei iā ʼaho nei?

ʼE fakaneke tāfito e Satana ia he faʼahiga fakakaukau ke ina puleʼi manatu pea mo te aga ʼa te hahaʼi. Pea ki te faʼahi ʼaia ʼe fakahigoaʼi te Tēvolo iā Efesi 2:2 ko “te pule ʼo te mālohi ʼo te ʼaele, te laumālie [peʼe ko te manatu tāfito] ʼaē ʼe gāue ʼi te temi nei ki te ʼu foha ʼo te talagataʼa.” Ko te “ ʼaele” fakatemonio ʼaia ʼe mole ina uga ia te manavasiʼi ki te ʼAtua pea mo te agalelei, kae ʼe ina fakaneke ia te fakafeagai ki te ʼAtua pea mo tana ʼu pelesepeto. Koia ko Satana pea mo tana kau temonio ʼe natou fakaneke mo fakalēlēsili ai ia te agakovi ʼaē ʼe fai e te hahaʼi.

“Haofaki Tou Loto”

ʼE hā te “ ʼaele” ʼaia ʼi te ʼu pāki pea mo te ʼu ʼata fakalialia ʼo ʼuhiga mo te ʼu felāveʼi fakasino heʼeʼaoga, ʼaē ʼe natou fakatupu te ʼu holi fakasino heʼemaʼa pea mo fai he ʼu aga heʼeʼaoga ʼe hagē mai ʼe mole kovi. (1 Tesalonika 4:3-5) ʼI te ʼu meʼa ʼaē ʼe pipiki ki te ʼu felāveʼi fakasino heʼeʼaoga ohagē ko he ʼu meʼa fakafiafia, ʼe kau ai te ʼu fakaʼalikiʼi, mo te agamālohi ʼi te ʼu felāveʼi fakasino, mo te fakaʼalikiʼi ʼe fakahoko e he kūtuga, mo te felāveʼi fakasino mo he ʼu manu, pea mo te fakaʼalikiʼi ʼo te tamaliki. Māʼia mo tona ʼu faʼahi ʼaē ʼe lau ʼe mole faʼa kovi, kae ko nātou ʼaē ʼe natou sioʼi te ʼu taʼi pāki pea mo te ʼu ʼata fakalialia ʼaia, ʼaki tanatou fai tuʼumaʼu te faʼahi ʼaia, ʼe faifai pē pea natou māhani kiai, ʼo liliu ko ni ʼu hahaʼi sio fakahehema. b ʼE fakatupu kovi ki te ʼu felōgoi ʼa te hahaʼi pea mo takita ʼu felōgoi mo te ʼAtua. ʼE hā ʼi te ʼu pāki pea mo te ʼu ʼata fakalialia ʼo ʼuhiga mo te ʼu felāveʼi fakasino heʼeʼaoga ia te faʼahiga manatu heʼeʼaoga ʼaē ʼe fakaneke e te kau temonio—ko he kau agatuʼu neʼe natou maʼu ia te ʼu holi fakasino heʼeʼaoga talu mai te temi ʼo Noe ʼi muʼa ʼo te Tulivio.

Koia neʼe matatonu ai te tokoni ʼaenī ʼa te hau poto ko Salomone: “Ko te meʼa tāfito ʼaē ʼe tonu ke ke haofaki, haofaki tou loto, heʼe haʼu mai ai te ʼu matapuna ʼo te maʼuli.” (Tāʼaga Lea 4:23) Ko te faka ʼuhiga ʼo te ʼu palalau ʼaenī, ʼe tonu ke tou haofaki tota loto mai te hele ʼo te ʼu pāki pea mo te ʼu ʼata fakalialia ʼo ʼuhiga mo te ʼu felāveʼi  fakasino heʼeʼaoga, lagi ʼe tonu anai ke fetogi te pāki ʼaē ʼe ʼasi mai ʼi te televisio, peʼe matehi te olotinatea naʼa ʼasi mai he ʼu pāki fakalialia. Pea ʼe maʼuhiga ke fai fakavilivili pea ʼaua te toe lotolotolua! ʼE kotou hagē pē ko he tagata sōlia ʼe ina faigaʼi ke kalo ʼi he foʼi pulu neʼe fakahaga ki ai. ʼE fia fanahi e Satana ia tokotou loto fakatātā—te tafitoʼaga ʼo takotou ʼu manatu pea mo tokotou ʼu holi—pea ʼe faiga ia ke ina fakahalaʼi.

ʼE tonu foki ke kotou toe puipui tokotou loto mai te manako ki te agamālohi, heʼe ʼiloʼi e te Tēvolo “ko ʼaē ʼe manako ki te agamālohi, ʼe mahino ia, ʼe fehiʼa ki ai [ia Sehova].” (Pesalemo 11:5) ʼE mole fakatuʼutuʼu e Satana ke kotou agamālohi ke kotou liliu ai ko he fili ʼo te ʼAtua; kae ʼe ina faigaʼi pē ia ke ina fakatuputupu ʼi tokotou loto ia he manako ki te agamālohi. Koia ʼe mole tou punamaʼuli ai ʼi tatatou sio ʼi te agamāhani ki te agamālohi ʼi te ʼu potu fuli pē. Kua mamate te kau Nefilime, kae ʼe kei maʼuli pē ia te ʼu agaaga ʼaē neʼe natou maʼu! ʼE ʼiloga koa ʼi takotou ʼu fakafiafia ʼe kotou fakafeagai ki te ʼu fakahala ʼa Satana?—2 Kolonito 2:11.

Kotou Fakafeagai Ki Te ʼu Fakahala ʼa Satana

ʼE lagi feala pē ke mata faigataʼa ʼaupitō kiā tātou hatatou fakafeagai ki te ʼu fakahala. ʼE fakahā ʼi te Tohi-Tapu ko nātou ʼaē ʼe natou fia fakafiafia ia te ʼAtua ʼe natou kau ki te “tau . . . ʼe fakafeagai ki te ʼu mālohi fakalaumālie agakovi,” pea ʼe natou tou toe tauʼi foki mo tonatou kakano agahala. Ke tou mālo ʼi te tau ʼaia pea ke leleiʼia tātou e te ʼAtua, ʼe tonu ke tou fakaʼaogaʼi te ʼu tuʼuga fakatuʼutuʼu mai te ʼAtua.—Efesi 6:12; Loma 7:21-25.

ʼI te ʼu fakatuʼutuʼu ʼaia ʼe kau ai te laumālie māʼoniʼoni ʼa te ʼAtua, te mālohi maʼuhiga ʼaupitō ʼaē ʼi te ʼatulaulau. Neʼe tohi fēnei e te ʼapositolo ko Paulo ki te kau Kilisitiano ʼo te ʼuluaki sēkulō: “Neʼe mole tou maʼu te manatu ʼo te mālamanei ʼaenī, kae ko te laumālie ʼaē ʼe haʼu mai te ʼAtua.” (1 Kolonito 2:12) Ko nātou ʼaē ʼe takitaki e te laumālie ʼa te ʼAtua ʼe tuputupu tanatou manako ki te meʼa ʼaē ʼe manako kiai te ʼAtua pea mo fehiʼa ki te meʼa ʼaē ʼe fehiʼa kiai. (Amosi 5:15) ʼE lava maʼu feafeaʼi e he tahi ia te laumālie māʼoniʼoni? ʼUluaki, ʼaki te faikole, mo te ako ʼo te Tohi-Tapu—ʼaē ʼe ko he fua ʼo te gāue ʼo te laumālie māʼoniʼoni—pea mo te ʼu fakatahi fakafiafia mo nātou ʼaē ʼe natou ʼoʼofa moʼoni ki te ʼAtua.—Luka 11:13; 2 Timoteo 3:16; Hepeleo 10:24, 25.

ʼAki takotou fakaʼaogaʼi te ʼu fakatuʼutuʼu fakaʼatua ʼaia, ʼe kotou kamata kofuʼi ai “te teu tau kātoa ʼo te ʼAtua,” te haofakiʼaga pē ʼaia e tahi moʼo fakafeagai ki “te ʼu kākā ʼa te Tēvolo.” (Efesi 6:11-18) Kua maʼuhiga ʼaupitō ʼi te temi nei ke tou fakaʼaogaʼi kātoa ia te ʼu fakatuʼutuʼu ʼaia. ʼO tou fakaʼaogaʼi feafeaʼi?

Kua Vave Pulihi Ia Te Agakovi!

ʼE ʼui fēnei e te tagata fai pesalemo: “Kā homo ake te kau agakovi ohagē ko te vao pea ʼe mātala ia nātou fuli ʼaē ʼe natou fai te meʼa ʼaē ʼe kovi, ke molehi nātou ʼo talu ai.” (Pesalemo 92:7) Ohagē pē ko te temi ʼo Noe, ko te mafola ʼo te agakovi ʼe ko he fakaʼiloga lelei kua ovi mai te fakamāu ʼa te ʼAtua, ʼo mole fakahoko pē ki te hahaʼi agakovi, kae ʼe kau ai mo Satana mo tana kau temonio, ʼaē kā lī anai ki te vanu ʼo mole kei feala ai hanatou fai he meʼa ohagē pē ko he fakakikite ʼo te fakaʼauha ʼaē kā hoko kiā nātou. (2 Timoteo 3:1-5; Fakahā 20:1-3, 7-10) Ko ai anai koa ʼaē kā ina fakahoko te tautea ʼaia? ʼE ko Sesu Kilisito totonu, ʼaē ʼe tou lau fēnei ʼo ʼuhiga mo ia: “Neʼe hā te ʼAlo ʼo te ʼAtua ʼuhi ko te fakatuʼutuʼu ʼaenī, ke ina maumauʼi te ʼu gāue ʼa te Tēvolo.”—1 Soane 3:8.

Kua kotou fakaʼamu koa lā ke pulihi ia te kovi? Kapau ko takotou fakaʼamu ʼaia, pea ʼe kotou loto fīmālie anai ʼaki te ʼu fakapapau ʼaē ʼe maʼu ʼi te Tohi-Tapu. ʼE mole he tahi age tohi ʼe ina fakahā mai ia te haʼuʼaga ʼo te kovi, ko Satana, pea ʼe mole he tahi age tohi ʼe ina fakahā mai peʼe feafeaʼi anai tona fakaʼauha ʼo talu ai pea mo tana ʼu agakovi fuli. ʼE matou fakaloto mālohiʼi koutou ke kotou ako ia te ʼatamai mālama totonu ʼo ʼuhiga mo te Tohi-Tapu, ke feala ai hakotou fakafeagai ʼi te temi nei ki te ʼu fakahala ʼa Satana pea mo maʼu he ʼamanaki ʼo he maʼuli ʼi he mālama kua pulihi ai te agakovi.—Pesalemo 37:9, 10.

[Kiʼi nota]

[Talanoa ʼo te pasina 6]

Ko He ʼu Fāgana ʼe Fakatafito Ki Te Hisitolia Moʼoni

ʼE tou maʼu ia te ʼu hisitolia ʼo ʼuhiga mo te ʼu tagata ʼe ʼi ai tonatou koga ʼatua, mo te ʼu tagata lalahi, pea mo he tulivio fakamataku ʼi te ʼu fāgana ʼāfea ʼo te mālamanei. Ohagē ko te Fakamatala Fakatuketuke Akatia ʼo Gilgamesh ʼe talanoa ai ki te tulivio, mo te vaka, pea mo te hahaʼi neʼe haofaki. Neʼe toe ʼui pē lā ko Gilgamesh neʼe ko he ʼatua ʼe koga tagata, neʼe manako ki te ʼu fakafiafia ʼo te kakano pea mo agamālohi. ʼI te fāgana Aztèque ʼe talanoa ai ki te mālama ʼāfea neʼe nofoʼi e te hahaʼi lalahi pea mo te tulivio lahi. ʼI te fāgana ʼo Te Potu Noleto ʼe talanoa ai ki te hahaʼi lalahi pea mo te tagata poto ʼe higoa ko Bergelmir neʼe ina faʼu ia te foʼi vaka, neʼe ina haofaki ai ia ia pea mo tona ʼohoana. Kā fakatahiʼi ia te ʼu fāgana fuli ʼaia, ʼe fakamoʼoni ai ki te fakamatala ʼa te Tohi-Tapu ʼaē ko te tagata fuli neʼe hifo mai te hahaʼi ʼaē neʼe hao mai te tulivio ʼaē neʼe ina fakaʼauha ia te mālama agakovi ʼo te temi muʼa.

[Paki]

Ko te maka neʼe tohi ai te Fakamatala Fakatuketuke ʼo Gilgamesh

[Haʼuʼaga ʼo te paki]

The University Museum, University of Pennsylvania (neg. # 22065)

[Paki ʼo te pasina 5]

ʼE ʼiloga te ʼu agaaga ʼo te kau Nefilime ʼi te hahaʼi iā ʼaho nei