Te ʼu Fehuʼi ʼa Te Kau Lautohi

ʼE fakahā mai koa iā Tāʼaga Lea 22:6, mokā akoʼi fakaleleiʼi ia te ʼu fānau Kilisitiano, ʼe mole natou mavae anai ʼi he temi mai te ala ʼa Sehova?

ʼE tou lau fēnei ʼi te vaega ʼaia: “Akoʼi te tama ki te ala ʼaē ʼe ʼaoga ki ai; koteʼuhi kā matuʼa anai, pea ʼe mole fakamamaʼo anai ia mai ai.” Ohagē pē ko te maleʼe ʼa te vaʼa ʼe feala ai ke ʼiloga mokā lalahi ake ʼo liliu ko he fuʼu ʼakau, ʼo toe fēia mo te fānau ʼaē ʼe akoʼi fakalelei, ʼe lahi age tanatou fia tauhi kiā Sehova ʼi tanatou lahilahi ake. ʼE ʼiloʼi e te ʼu mātuʼa fuli, ko te taʼi akoʼi fānau ʼaia, ʼe ʼaoga lahi kiai he temi pea mo he faiga. Ke liliu tanatou fānau ko he ʼu tisipulo ʼa Kilisito, ʼe tonu ki te ʼu mātuʼa ke natou akoʼi fakalelei nātou, mo fakaloto mālohiʼi, pea mo akonakiʼi nātou ʼo natou tuku he faʼifaʼitaki lelei. ʼE tonu ke natou haga fai ia te faʼahi ʼaia ʼaki te ʼofa lolotoga ni ʼu taʼu.

Ko tona faka ʼuhiga koa mo kapau ʼe mavae he tamasiʼi mai te tauhi kiā Sehova, neʼe mole lelei te ako ʼa te ʼu mātuʼa kiā ia? ʼI ʼihi ʼaluʼaga, lagi neʼe mole tokaga te ʼu mātuʼa ʼo akoʼi tanatou fānau ʼi te ʼu akonaki pea mo te ʼu fakatokaga ʼa Sehova. (Efesi 6:4) Kae ʼi te tahi faʼahi, ko te tāʼaga lea ʼe mole ina faka ʼuhiga leva kapau neʼe akoʼi lelei he fānau pea ʼe fakatupu ai anai he fānau ʼe agatonu ki te ʼAtua. ʼE mole feala ki te ʼu mātuʼa ke natou faʼufaʼu tanatou fānau ke mulimuli ki ʼonatou loto. Ko te tamaliki ohagē pē ko te hahaʼi lalahi, ʼe natou maʼu ia te loto faʼitaliha pea ʼe fakalogo pē kiā nātou te filifili ʼo te faʼahiga maʼuli ʼaē ʼe natou loloto kiai. (Teutalonome 30:15, 16, 19) Logolā te ʼu faiga fakamālotoloto ʼa te ʼu mātuʼa, ko ʼihi fānau ʼe natou liliu ʼo heʼe agatonu, ohagē ko Salomone, ʼaē neʼe ina tohi te ʼu vaega ʼaē ʼe tou lolotoga vakaʼi nei. Neʼe ʼi ai pē lā mo te ʼu foha ʼo Sehova neʼe heʼe agatonu.

Koia, ko te koga tohi ʼaia ʼe mole faka ʼuhiga ʼi te ʼu ʼaluʼaga fuli ko he tamasiʼi “ ʼe mole fakamamaʼo anai ia mai ai” kae ʼi te agamāhani ʼe ko te meʼa ʼaia ʼe hoko. ʼE ko he faʼahi ʼe fakaloto mālohi ki te ʼu mātuʼa! ʼE tonu anai ke mahino ki te ʼu mātuʼa, ko tanatou ʼu faiga moʼo akoʼi tanatou fānau ʼi te ʼu ala ʼo Sehova ʼe fua lelei anai. Mai tona ʼaluʼaga ʼaē ko te gāue ʼa te ʼu mātuʼa ʼe maʼuhiga pea mo mālohi tona malave ki te fānau, ʼe fakaloto mālohiʼi te ʼu mātuʼa ke natou fakahoko lelei tanatou gāue.—Teutalonome 6:6, 7.

Tatau aipē mo kapau ʼe mavae te fānau mai te tauhi kiā Sehova, ko te ʼu mātuʼa ʼaē neʼe natou akoʼi fakalelei tanatou fānau, ʼe feala ke natou falala ʼe toe liliu mai anai tanatou fānau ki te moʼoni. Ko te moʼoni ʼo te Tohi-Tapu ʼe mālohi, pea ʼe mole galoʼi vave anai te ako ʼa te ʼu mātuʼa.—Pesalemo 19:7.