“ ʼAua Naʼa Kotou Liufaki Ki He Tahi Te Kovi ʼUhi Ko Te Kovi”

“ ʼAua naʼa kotou liufaki ki he tahi te kovi ʼuhi ko te kovi. Kotou foaki he ʼu meʼa lelei iā muʼa ʼo te hahaʼi fuli.”—Loma 12:17.

 1. Koteā te faʼahiga agaaga ʼe tautau hoko?

 ʼI TE agamāhani kā humuki he tamasiʼi e hona tehina, pea ʼe ina toe liufaki te aga ʼaē neʼe fai age kiā ia. Kae ko te aga ʼaia ʼe mole ko te kihiʼi tamaliki pē ʼaē ʼe natou fai. Tokolahi te hahaʼi lalahi ʼe fēia foki mo tanatou aga. Kā neʼe natou lotomamahi ʼi he tahi, ʼe natou toe fia liufaki te aga kovi ʼaē neʼe fai age kiā nātou. ʼE moʼoni, ʼe mole natou humuki anai te hahaʼi ohagē ko tona fai e te tamaliki, kae tokolahi ʼe natou liufaki te kovi ʼaki te kovi ʼi hona tahi faʼahiga ʼaluʼaga. Lagi ʼe natou fatufatuʼi anai ia ia ʼaē neʼe agakovi age peʼe mo fai ni ʼu puleʼaki ke ʼaua naʼa fua lelei te ʼu meʼa ʼaē ʼe ina fai. Tatau aipē mo kapau ʼe kehekehe ia te ʼu puleʼaki ʼo ʼuhiga mo te faʼahi ʼaia, kae ko te fakatuʼutuʼu e tatau pē, ke liufaki te kovi ʼaki te kovi.

 2. (a) He koʼē ʼe tekeʼi e te kau Kilisitiano moʼoni ia te fia lagavaka? (b) Ko te ʼu fehuʼi fea pea mo te kāpite fea ʼo te Tohi-Tapu kā tou vakaʼi anai ʼi te ʼalatike ʼaenī?

² Logolā te mālohi ʼaē ʼo te fia liufaki ʼo he aga neʼe fai mai kiā tātou, kae ko te kau Kilisitiano moʼoni ʼe natou tekeʼi mālohi ia te faʼahi ʼaia. ʼE natou faiga ke natou muliʼi te tokoni ʼaenī ʼa te ʼapositolo ko Paulo: “ ʼAua naʼa kotou liufaki ki he tahi te kovi ʼuhi ko te kovi.” (Loma 12:17) Koteā ʼaē kā ina uga anai tātou ke tou maʼuliʼi ia te lēkula māʼoluga ʼaia ʼa te ʼAtua? Ko ai tāfito ʼaē ʼe mole tonu ke tou liufaki ki ai te agakovi? Koteā te ʼu fua lelei ʼe tou maʼu anai mo kapau ʼe tou tekeʼi ia te aga ʼaia? Moʼo tali ki te ʼu fehuʼi ʼaia, tou vakaʼi age muʼa te ʼu palalau neʼe fai e Paulo pea mo te ʼu manatu ʼo te kāpite 12 ʼo Loma, ʼe hā mai ai ko te tekeʼi o te fia lagavaka ʼe ko he aga ʼe totonu, mo ʼofa, pea mo agavaivai. ʼE tou vakaʼi anai takitahi te ʼu faʼahi ʼaia e tolu.

“Koia, ʼe Au Kole Mamahi Atu Kiā Koutou”

3, 4. (a) ʼI te kamataʼaga ʼo te kāpite 12, koteā ʼaē ʼe palalau kiai Paulo, pea ʼe faka ʼuhiga feafeaʼi tana fakaʼaogaʼi ʼaē ʼo te kupu “koia”? (b) Neʼe tonu ke malave feafeaʼi ia te ʼofa ʼo te ʼAtua ki te kau Kilisitiano ʼi Loma?

³ ʼI te kamata ʼo te kāpite 12, ʼe talanoa ia Paulo kiā faʼahi e fā ʼe pipiki tahi pea ʼe malave ki te maʼuli ʼo te Kilisitiano. ʼE fakamatalatala e Paulo tatatou ʼu felōgoi ʼaē mo Sehova, mo totatou ʼu tehina mo tuagaʼane, mo te hahaʼi ʼo te mālama, pea mo te ʼu pule takitaki ʼo te mālamanei. ʼE fakahā mai e Paulo ia te tupuʼaga tāfito ke tou tekeʼi ai te ʼu holi ʼe kovi, ʼo fēia mo te fia lagavaka, ʼi tana ʼui ʼaenī: “Koia, ʼe au kole mamahi atu kiā koutou, ʼu tehina, ʼaki te ʼu ʼofa mamahi ʼo te ʼAtua.” (Loma 12:1) Kotou fakatokagaʼi te kupu “koia,” ʼaē ko tona faka ʼuhiga “ ʼo mulimuli ki te manatu ʼaē neʼe kua tou vakaʼi.” ʼE ʼui e Paulo, ‘ohagē pē ko te meʼa ʼaenī neʼe au palalau atu kiā koutou, ʼe au kole mamahi atu ke kotou fai ia te meʼa ʼaē neʼe au ʼui atu.’ Koteā ʼaē neʼe fakamahino e Paulo ki te kau Kilisitiano ʼaia ʼi Loma?

⁴ Mai te kāpite 1 ki te kāpite 11 ʼo te tohi ʼa Paulo, neʼe palalau ai ki te faigamālie taulekaleka neʼe maʼu e te kau Sutea pea mo te kau Senitile ke natou liliu ʼo pule mo Kilisito ʼi te Puleʼaga ʼo te ʼAtua, ko he ʼamanaki neʼe mole tali e te kau Iselaele. (Loma 11:13-36) Ko te pilivilēsio taulekaleka ʼaia neʼe feala pē “ ʼaki te ʼu ʼofa mamahi ʼo te  ʼAtua.” Neʼe tonu ke tali feafeaʼi e te kau Kilisitiano ia te ʼofa makehe lahi ʼaia ʼo te ʼAtua? Neʼe tonu ki ʼonatou loto ke fonu ʼi te loto fakafetaʼi ʼo tupu ai leva tanatou fai ia te faʼahi ʼaenī ʼe ʼui e Paulo: “Kotou momoli ʼokotou sino ko he sākilifisio maʼuli, mo māʼoniʼoni, pea mo lelei ki te ʼAtua, ko he tauhi tapu ʼaki tokotou ʼatamai.” (Loma 12:1) Neʼe lava feafeaʼi ki te kau Kilisitiano ʼaia hanatou liliu moʼoni ko “he sākilifisio” ki te ʼAtua?

 5. (a) ʼE feafeaʼi ki he tahi hana foaki ʼo ia totonu ko “he sākilifisio” ki te ʼAtua? (b) Ko te pelesepeto fea ʼe tonu ke ina takitaki ia te aga ʼa he Kilisitiano?

⁵ ʼE toe ʼui fēnei e Paulo: “Kotou fakagata takotou muliʼi te tuʼu ʼo te ʼu faʼahiga meʼa ʼaenī, kae ke kotou fetogi ia koutou ʼo fakafoʼou tokotou ʼatamai, ke feala ai hakotou ʼiloʼi papau peʼe koteā te finegalo ʼo te ʼAtua, tona lelei, tona tali lelei, pea mo tona haohaoa.” (Loma 12:2) ʼE mole tonu ke natou tuku ia te laumālie ʼo te mālamanei ke ina fakahalaʼi tonatou ʼatamai, kae ke hagē tonatou ʼatamai ko te faʼahiga manatu ʼaē ʼa Kilisito. (1 Kolonito 2:16; Filipe 2:5) ʼE tonu ki te pelesepeto ʼaia ke ina takitaki ʼi te ʼaho fuli ia te aga ʼa te kau Kilisitiano moʼoni fuli, ʼo fēia mo tātou iā ʼaho nei.

 6. ʼO fakatafito ki te manatu ʼa Paulo iā Loma 12:1, 2, koteā ʼaē kā ina uga tātou ke tou tekeʼi te fia lagavaka?

⁶ ʼE tokoni feafeaʼi mai ia te manatu ʼa Paulo ʼi te koga tohi ʼo Loma 12:1, 2? Ohagē ko te kau Kilisitiano fakanofo ʼaia ʼi Loma, ʼe tou loto fakafetaʼi ʼaupitō ki te tokaga tuʼumaʼu pea mo te ʼu fakahāhā ʼofa ʼa te ʼAtua ʼaē neʼe ina foaki mai kiā tātou pea kei ina lolotoga fai mai pē ʼi te ʼaho fuli. Koia, ko he loto fonu ʼi te loto fakafetaʼi ʼe ina uga tātou ke tou tauhi ki te ʼAtua ʼaki totatou mālohi kātoa, mo totatou ʼu koloa, pea mo totatou ʼu fealagia. Ko te ʼofa lahi ʼaia ʼe ina uga foki tātou ke tou fai ia meʼa fuli ke tou manatu ohagē ko Kilisito kae ke mole hagē ko te mālamanei. Pea kapau ʼe tou maʼu ia te manatu ʼa Kilisito ʼe ʼiloga anai ʼi tatatou ʼu felōgoi mo ʼihi—totatou ʼu tehina mo tuagaʼane pea mo te hahaʼi ʼo te mālama. (Kalate 5:25) Ohagē lā: kapau ʼe tou manatu ohagē ko Kilisito, ʼe ko he faʼahi ʼe ina uga tātou ke tou tekeʼi te fia lagavaka.—1 Petelo 2:21-23.

“Ke ʼAua Naʼa Mālualoi Tokotou ʼOfa”

 7. Ko te faʼahiga ʼofa fea ʼaē ʼe talanoa kiai ia Loma kāpite 12?

⁷ ʼE mole tou liufaki te kovi ʼaki te kovi, koteʼuhi ko he aga ʼe totonu, kae mai tona ʼaluʼaga ʼaē ʼe ko he aga ʼe ʼofa. Tou fakatokagaʼi te manatu ʼa Paulo ʼo ʼuhiga mo te mālohi ʼaē ʼo te ʼofa. ʼI te tohi ʼo Loma, ʼe fakaʼaogaʼi tuʼa lahi e Paulo ia te kupu “ ʼofa” (agapê ʼi te lea faka Keleka) mokā palalau ki te ʼofa ʼo te ʼAtua pea mo ʼaē ʼa Kilisito. (Loma 5:5, 8; 8:35, 39) Kae ʼi te kāpite 12, ʼe fakaʼaogaʼi e Paulo te kupu agapê ʼi tona tahi faʼahiga ʼaluʼaga—moʼo talanoa ki te ʼofa ʼaē ʼe fakahā ki te hahaʼi. ʼI tana ʼosi talanoa ki te ʼu meʼa ʼofa fakalaumālie kehekehe ʼaia pea ʼe maʼu e ʼihi tehina mo tuagaʼane, ʼe talanoa ia Paulo ki te kalitātē ʼe tonu ke gāueʼi e te kau Kilisitiano fuli. ʼE ina ʼui fēnei: “Ke ʼaua naʼa mālualoi tokotou ʼofa.” (Loma 12:4-9) Ko te fakahā ʼo te ʼofa ki ʼihi ʼe ko te fakaʼiloga ʼaia ʼo te kau Kilisitiano moʼoni. (Maleko 12:28-31) ʼE fakaloto mālohiʼi tātou e Paulo ke tou vakavakaʼi lelei peʼe fakamālotoloto ia te ʼofa ʼaē ʼe tou fakahā ʼi totatou ʼuhiga Kilisitiano.

 8. ʼE feafeaʼi hatatou lava fakahā he ʼofa ʼe mole mālualoi?

⁸ Tahi ʼaē, ʼe fakatokagaʼi e Paulo ia te faʼahiga fakahā ʼaē ʼo te ʼofa ʼe mole mālualoi, ʼo ʼui fēnei: “Kotou fehiʼa ki te meʼa ʼaē ʼe kovi, kotou pipiki ki te meʼa ʼaē ʼe lelei.” (Loma 12:9) Ko te ʼu  kupu “fehiʼa” pea mo “pikipiki” ʼe ko he ʼu kupu ʼe mālohi ʼaupitō. Ko te kupu “fehiʼa” ʼe feala ke fakaliliu ko he “fehiʼa lahi.” ʼE mole ʼaoga pē ke tou fehihiʼa ki te ʼu ikuʼaga ʼo te agakovi kae ke tou toe fehihiʼa foki ki te aga ʼaē ʼe kovi. (Pesalemo 97:10) Ko te kupu “pipiki” ʼe ina fakaliliu te kupu faka Keleka ko tona faka ʼuhiga “fakapipiki.” Ko he Kilisitiano ʼe ina maʼu ia te ʼofa moʼoni pea mo pipiki mālohi ia ki te agalelei, ʼe liliu te kalitātē ʼaia ko he koga ʼo tona ʼulugaaga.

 9. Koteā te tokoni ʼe fai liuliuga mai e Paulo?

⁹ ʼE fakahā liuliuga e Paulo ia te faʼahi tāfito ʼo ʼuhiga mo te fakahā ʼo te ʼofa. ʼE ina ʼui fēnei: “Kotou haga tapuakiʼi ia nātou ʼaē ʼe natou fakatagaʼi koutou, kotou tapuakiʼi kae ʼaua naʼa kotou faitutuku.” “ ʼAua naʼa kotou liufaki ki he tahi te kovi ʼuhi ko te kovi.” “ ʼAua naʼa kotou lagavaka, kau ʼofaina.” “ ʼAua naʼa kotou tō ʼi te agakovi, kae kotou haga mālo aipē ʼi te agakovi ʼaki te agalelei.” (Loma 12:14, 17-19, 21) ʼE fakahā lelei mai e Paulo ia te aga ʼaē ʼe tonu ke tou fai ki te hahaʼi ʼo te mālama, māʼiapē lā mo nātou ʼaē ʼe fakafeagai mai kiā tātou.

“Kotou Haga Tapuakiʼi Ia Nātou ʼAē ʼe Natou Fakatagaʼi Koutou”

10. ʼE feafeaʼi hatatou tapuakiʼi ia nātou ʼaē ʼe natou fakatagaʼi tātou?

¹⁰ ʼE feafeaʼi hatatou muliʼi ia te tokoni ʼaenī ʼa Paulo: “Kotou haga tapuakiʼi ia nātou ʼaē ʼe natou fakatagaʼi koutou”? (Loma 12:14) Neʼe ʼui fēnei e Sesu ki tana ʼu tisipulo: “Ke kotou haga ʼofa ki ʼokotou fili pea mo hūfaki ia nātou ʼe fakataga kiā koutou.” (Mateo 5:44; Luka 6:27, 28) Pea ko he faʼahiga tapuakiʼi ʼo natou ʼaē ʼe natou fakatagaʼi tātou, ʼe ko hatatou hūfakiʼi nātou, ʼo kolekole ki te ʼAtua mo kapau ʼe natou fakatagaʼi tātou ʼuhi heʼe mole natou mahino ki tatatou tauhi, ke haga ia Sehova ʼo faka mālama ai ʼonatou ʼatamai ki te moʼoni. (2 Kolonito 4:4) ʼE lagi mata faikehe foki hatatou kole ki te ʼAtua ke ina tapuakiʼi he tahi ʼe fai fakataga. Kae kā lahi tatatou faʼifaʼitakiʼi te manatu ʼaē neʼe maʼu e Kilisito, pea ʼe toe lahi age mo tatatou fakahā ia te ʼofa ki ʼotatou fili. (Luka 23:34) Koteā anai te fua mokā ʼe tou fakahā ia te taʼi ʼofa ʼaia?

11. (a) Koteā te ako ʼe tou tāʼofi mai te faʼifaʼitaki ʼa Setefano? (b) Ohagē ko te meʼa ʼaē neʼe hoko kiā Paulo, koteā te fetogi ʼe lava hoko ʼi te maʼuli ʼo ʼihi hahaʼi fakataga?

¹¹ Ko Setefano neʼe ina hūfakiʼi nātou ʼaē neʼe natou fakatagaʼi ia ia, pea neʼe mole ʼalunoa tana faikole. Mole faʼa fualoa ki te ʼosi ʼo te Penikositē ʼo te taʼu 33 ʼo totatou temi, neʼe puke ia Setefano e te ʼu fili ʼo te kōkelekāsio faka Kilisitiano, ʼo lī ia ia ki te tuʼa kolo ʼo Selusalemi, pea mo tuki makaʼi. ʼI muʼa ʼo tana mate, neʼe kalaga fēnei: “Sehova, ʼaua naʼa ke lau tanatou agahala ʼaenī.” (Gāue 7:58–8:1) ʼI te ʼu tagata ʼaē neʼe hūfakiʼi e Setefano ʼi te ʼaho ʼaia neʼe kau ai ia Saulo, ʼaē neʼe lagolago pea mo tali ke matehi Setefano. Ki muli age, ko Sesu ʼaē neʼe fakatuʼuake neʼe ʼasi kiā Saulo. Kua liliu te fili ʼaia ko he tisipulo ʼa Kilisito pea neʼe higoaʼi leva ko te ʼapositolo ko Paulo, te tagata faitohi ʼo te tohi ki te kau Loma. (Gāue 26:12-18) ʼO mulimuli ki te faikole ʼa Setefano, ʼe mahino mai neʼe fakamolemole ia Sehova ki te agahala ʼa Paulo ʼi te temi ʼaē neʼe ina fakatagaʼi ai te kau Kilisitiano. (1 Timoteo 1:12-16) ʼO mole tou punamaʼuli ki te fakaloto mālohi ʼaenī ʼa Paulo ki te kau Kilisitiano: “Kotou haga tapuakiʼi ia nātou ʼaē ʼe natou fakatagaʼi koutou”! Neʼe mahino lelei kiā Paulo ia te faʼahi ʼaia, heʼe mo ia pē lā neʼe agamālohi, koia ʼe feala pē ki ʼihi hahaʼi fai fakataga ki muli age ke natou liliu ko he ʼu kaugana ʼa te ʼAtua. ʼO fēia mo totatou temi, ko ʼihi hahaʼi fakataga kua natou liliu ʼo tui ʼuhi pē ko te aga fakatokatoka ʼa te ʼu kaugana ʼa Sehova.

“Kotou Māʼuʼuli ʼi Te Tokalelei Mo Te Tagata Fuapē”

12. ʼE feafeaʼi te ʼalutahi ʼo te tokoni iā Loma 12:17 mo te manatu ʼaē neʼe ʼui e Paulo ʼi te vaega 9?

¹² ʼE toe tokoni mai Paulo ki tatatou felōgoi ʼaē mo totatou ʼu tehina mo tuagaʼane pea mo te hahaʼi ʼo te mālama: “ ʼAua naʼa kotou liufaki ki he tahi te kovi ʼuhi ko te kovi.” Ko te palalau ʼaia ʼe ko te ikuʼaga ʼo te meʼa ʼaē neʼe ina ʼui ki muʼa atu, tāfito lā te manatu ʼaenī: “Kotou fehiʼa ki te meʼa ʼaē ʼe kovi.” Heʼe feafeaʼi anai he ʼui ʼa he tahi ʼe fehiʼa moʼoni ki te meʼa ʼaē ʼe kovi mo kapau ʼe ina fakaʼaogaʼi te kovi moʼo liufaki te kovi ki ʼihi? Ko te aga ʼaia ʼe fakafeagai anai ki te ʼofa  ʼaē ʼe ‘mole mālualoi.’ Pea toe ʼui e Paulo: “Kotou foaki he ʼu meʼa lelei iā muʼa ʼo te hahaʼi fuli.” (Loma 12:9, 17) ʼE feafeaʼi hatatou maʼuliʼi te ʼu palalau ʼaia?

13. ʼE feafeaʼi totatou maʼuli “iā muʼa ʼo te hahaʼi fuli”?

¹³ Ki muʼa atu, ʼi tana tohi ki te kau Kolonito, neʼe faitohi ia Paulo ʼo ʼuhiga mo te ʼu fakataga ʼaē kā tau anai mo te kau ʼapositolo. Neʼe ina ʼui fēnei: “Kua matou liliu ko he mataga ki te kau aselo mo te malama-nei pea mo te hahai. . . . E matou foaki te tapuaki kae lea koviʼi matou; ka fakatagai matou, e matou kataki; ka fasituu mai kia matou, e matou fakavaivai.” (1 Kolonito 4:9-13, Tauhi Foou) ʼO toe fēia iā ʼaho nei, ʼe sioʼi te kau Kilisitiano moʼoni e te hahaʼi ʼo te mālamanei. Kā sio te hahaʼi ʼi ʼotatou tafaʼaki logolā totatou gaohi koviʼi kae ʼe tou agalelei aipē, ʼe feala hanatou tali ia te logo ʼo te Puleʼaga.—1 Petelo 2:12.

14. Koteā te meʼa ʼe tonu ke tou faigaʼi ke tou fai moʼo maʼuli ʼi te tokalelei mo te hahaʼi?

¹⁴ Koteā te meʼa ʼe tonu ke tou faigaʼi ke tou fai moʼo maʼuli ʼi te tokalelei mo te hahaʼi? ʼE tonu ke tou fai ʼi te ʼu ʼaluʼaga fuli pē. ʼE ʼui fēnei e Paulo ki tona ʼu tehina Kilisitiano: “Kapau ko he meʼa ʼe feala, tāfito mo kapau ko he meʼa ʼe fakalogo kiā koutou, kotou māʼuʼuli ʼi te tokalelei mo te tagata fuapē.” (Loma 12:18) ʼE hā mai ʼi te ʼu kupusiga palalau “kapau ko he meʼa ʼe feala” pea “tāfito mo kapau ko he meʼa ʼe fakalogo kiā koutou,” ko te maʼuli tokalelei mo ʼihi ʼe mole ko he meʼa ʼe feala tuʼumaʼu. ʼE mole tou talagataʼa anai ki he fakatotonu ʼa te ʼAtua, ʼuhi pē ko tatatou fia maʼuli tokalelei pea mo te tagata. (Mateo 10:34-36; Hepeleo 12:14) Koia, ko meʼa fuli ʼe tou lavaʼi moʼo maʼuli tokalelei “mo te tagata fuapē” ʼe tou fai anai, ʼo mole tou maumauʼi anai he ʼu pelesepeto faitotonu ʼuhi ko te faʼahi ʼaia.

“ ʼAua Naʼa Kotou Lagavaka”

15. Ko te tupuʼaga fea iā Loma 12:19 ʼaē ʼe tonu ai ke tou liʼaki te lagavaka?

¹⁵ ʼE foaki mai e Paulo ia te tahi tupuʼaga mālohi ke mole tou fia lagavaka, ʼe ko te agavaivai. ʼE  ina ʼui fēnei: “ ʼAua naʼa kotou lagavaka, kau ʼofaina, kae kotou tuku ke fakalaka te ʼita; koteʼuhi neʼe tohi fēnei: ʼE ʼaʼaku te lagavaka, ʼe au liufaki anai te totogi, ko te ʼui ʼaia ʼa Sehova.” (Loma 12:19) Ko he Kilisitiano ʼe faiga ke lagavaka ʼe fiatuʼu. ʼE ina toʼo te tuʼulaga ʼe mole ʼa ia kae ʼa te ʼAtua. (Mateo 7:1) Tahi ʼaē, ʼi tana fia puleʼakiʼi te faʼahi ʼaia, ʼe mole tui ia ki te fakapapau ʼaenī ʼa Sehova: “E au liufaki anai.” Koia ko te kau Kilisitiano moʼoni ʼe natou falala ko Sehova ʼe ina “fai anai . . . te fakamāu ʼaē ʼe totonu ki tana hahaʼi ʼaē kua fili.” (Luka 18:7, 8; 2 Tesalonika 1:6-8) ʼE natou agavaivai ʼo tuku te lagavaka ʼo te kovi ki te ʼu nima ʼo te ʼAtua.—Selemia 30:23, 24; Loma 1:18.

16, 17. (a) Koteā te faka ʼuhiga ʼo te ʼui ʼaē ke “tānaki . . . he ʼu mamala kakaha” ki te ʼulu ʼo he tahi? (b) Neʼe kua kotou sio koa ki te malū ifo ʼa he tahi ʼe mole tui kiā Sehova ʼuhi pē ko te agalelei? Tuku mai he faʼifaʼitaki.

¹⁶ Kā kita lagavaka ki he fili ʼe lagi ʼitaʼita anai, kae kā tou agalelei ki ai ʼe lagi malu ifo anai tona loto. Koteā tona tupuʼaga? Kotou fakatokagaʼi te ʼu palalau ʼa Paulo ki te kau Kilisitiano ʼo Loma. ʼE ina ʼui fēnei: “Kapau ʼe fia kai tokotou fili, pea ke kotou fafaga ia ia; kapau ʼe fia ʼinu, pea kotou faka ʼinu ia ia; ʼi takotou fai ʼaia, ʼe kotou tānaki anai he ʼu mamala kakaha ʼi tona ʼulu.” (Loma 12:20; Tāʼaga Lea 25:21, 22) Koteā tona faka ʼuhiga?

¹⁷ Ko te “tānaki . . . he ʼu mamala kakaha ʼi [he] ʼulu” ʼe ko he palalau fakatā ʼo ʼuhiga mo te faʼahiga haka ʼo te ukamea ʼi te temi muʼa. Neʼe tutu te kele paʼaga, pea neʼe ʼai ki lalo mo ʼoluga ia te mamala. Ko te mamala kakaha ʼi ʼoluga neʼe ina fakaʼāsili te huhuʼa ʼo te ukamea pea mo fakamaʼa te kele paʼaga mai tona ʼu ʼotaʼota. ʼO toe fēia, ʼaki te fai ʼo te ʼu aga ʼe lelei ki he fili, ʼe lagi tou ‘fakamalu’ tona ʼita pea mo fakatupu ia te ia he ʼu kalitātē. (2 Hau 6:14-23) ʼIo, ʼe kaugamālie ia te ʼu tehina mo tuagaʼane ʼo te kōkelekāsio faka Kilisitiano neʼe natou ʼomai ki te tauhi moʼoni ʼaki pē te agalelei ʼa te ʼu kaugana ʼa Sehova ʼaē kiā nātou.

Te Tupuʼaga ʼo Te Mole Lagavaka

18. He koʼē ʼe totonu, mo ʼofa, pea mo agavaivai te mole lagavaka?

¹⁸ ʼI tatatou vakaʼi fakanounou ʼo te kāpite 12 ʼo Loma, kua tou mahino ai ki te ʼu tupuʼaga tāfito ʼo tatatou mole “liufaki ki he tahi te kovi ʼuhi ko te kovi.” ʼUluaki, neʼe tou vakaʼi ʼe mole tonu ke tou lagavaka heʼe ko he aga ʼe totonu. ʼUhi ko te manavaʼofa ʼo te ʼAtua kiā tātou, ʼe totonu pea mo fakapotopoto ke tou foaki ia tātou totonu kiā Sehova pea mo lotolelei ʼo fakalogo ki tana ʼu fakatotonu—te fakatotonu ki te ʼofa ki ʼotatou fili. Lua, ʼe tou fakafisi ki te liufaki ʼo te kovi ʼaki te kovi heʼe tou ʼofa. Kapau ʼe tou liʼaki te lagavaka pea mo faiga ke tou maʼuli ʼi te tokalelei, ʼe feala ke tou uga anai te hahaʼi ʼaē neʼe fakafeagai ki te moʼoni ke natou liliu ko he ʼu kaugana ʼa Sehova. Tolu, ko te tekeʼi ʼo te liufaki ʼo te kovi ʼaki te kovi ʼe ko he agavaivai. Kapau ʼe tou lagavaka ʼe tou fiatuʼu, heʼe ʼui fēnei e Sehova: “ ʼE ʼaʼaku te lagavaka.” ʼE toe fakatokagaʼi mai tātou e te Folafola ʼa te ʼAtua: “Kua haʼu koa te fialahi? Pea ʼe hoko mai anai te ufiufi; kae ko te poto ʼe maʼu e nātou ʼaē ʼe fia mālalo.” (Tāʼaga Lea 11:2) ʼAki he aga fakapotopoto kā tou tuku ki te ʼAtua ke ina fai ia te lagavaka, ʼe tou fakahā ai tatatou agavaivai.

19. Koteā ʼaē kā tou vakaʼi anai ʼi te ʼalatike kā hoa mai?

¹⁹ ʼE fakanounou e Paulo tana palalau ʼo ʼuhiga mo tatatou faʼahiga felōgoi ʼaē mo te hahaʼi. ʼE ina ʼui fēnei ki te kau Kilisitiano: “ ʼAua naʼa kotou tō ʼi te agakovi, kae kotou haga mālo aipē ʼi te agakovi ʼaki te agalelei.” (Loma 12:21) Ko te ʼu mālohi agakovi fea ʼaē ʼe tau mo tātou iā ʼaho nei? ʼE feafeaʼi hatatou mālo iā natou? Ko te tali ki te ʼu fehuʼi ʼaia pea mo ʼihi fehuʼi ʼe pipiki kiai, ʼe tou vakaʼi anai ʼi te ʼalatike kā hoa mai.

ʼE Feala Koa Hakotou Fakamahino?

• Iā Loma kāpite 12, koteā te tokoni ʼe tou maʼu liuliuga ai?

• Koteā ʼaē kā ina uga anai tātou ke mole tou lagavaka?

• Koteā te ʼu fua lelei ʼe tou maʼu anai pea mo ʼihi mo kapau ʼe mole tou ‘liufaki te kovi ʼaki te kovi’?

[Fehuʼi]

[Talanoa ʼo te pasina 22]

ʼE talanoa te kāpite 12 ʼo Loma ki te felōgoi ʼa te kau Kilisitiano mo

• Sehova

• Te ʼu tehina mo tuagaʼane

• Te hahaʼi ʼo te mālama

[Paki ʼo te pasina 23]

Ko te tohi ʼa Paulo ki te kau Loma ʼe ko he tokoni ʼe ʼaoga ki te kau Kilisitiano

[Paki ʼo te pasina 25]

Koteā te ako ʼe tou tāʼofi mai te faʼifaʼitaki ʼa te tisipulo ko Setefano?