Koteā Te Puleʼaki Ki Te Fehiʼa Ki Te Lanu?

ʼI SEPANIA ʼe tāʼofi e te ʼalapiti ia te ʼaka fitipolo. Koteā tona tupuʼaga? Koteʼuhi tokolahi te hahaʼi mamata ʼi tanatou tauveleʼi ʼaē ia te tama ʼaka fiti polo mai Cameroun, neʼe tupu ai tana fia mavae ʼi te foʼi ʼaka. ʼI Lusia kua liliu ʼe ko he agamāhani ia te ʼu agamālohi ʼaē ʼe fai ki te kau Afelika, mo te kau Asia, pea mo te kau Amelika Latina; lolotoga te taʼu 2004, ko te ʼu ʼohofi ʼi Lusia ʼo ʼuhiga mo te fehiʼa ki te lanu kua tuputupu ʼi te toko 55 ʼi te teau ʼo aʼu ki te ʼu tuʼutāmaki e 394 ʼi te taʼu 2005. ʼI Pilitānia ʼi te hahaʼi Asia pea mo te kau ʼuli ʼaē neʼe fakafehufehuʼi, ko te vaega tahi ʼi te tolu, ʼe natou ʼui neʼe fakamavae nātou ʼi tanatou ʼu gāue ʼuhi ko te ʼu fakapalatahi ʼo ʼuhiga mo te lanu. ʼE hā mai ʼi te ʼu faʼifaʼitaki ʼaenī ia te aga kua fai putuputu ʼi te mālamanei.

ʼE kehekehe te faʼahiga fakahā ʼo te fehiʼa ki te lanu—mai te ʼu laukovi peʼe ko te ʼu faiga moʼo pulihi he tahi age lanu. Koteā te tupuʼaga ʼo te fehiʼa ʼaia ki te lanu? ʼE feafeaʼi hatatou tekeʼi ia te faʼahi ʼaia? ʼE feala koa hatatou fakaʼamu ʼi he ʼaho ko te ʼu fāmili fuli ʼo te mālamanei ʼe natou māʼuʼuli anai ʼi te tokalelei? ʼE fakahā ʼi te Tohi-Tapu ia te manatu ʼe lelei ʼo ʼuhiga mo te ʼu faʼahi ʼaia.

Ko Te Gaohi Koviʼi Pea Mo Te Fehiʼaʼinaʼi ʼo He Tahi Age Lanu

“Ko te holi ʼo te loto ʼo te tagata ʼe kovi talu mai tana kei veliveli,” ko te ʼui ʼaia ʼi te Tohi-Tapu. (Senesi 8:21) Koia, ko ʼihi ʼe natou fiafia ʼi te gaohi koviʼi ʼo ʼihi. ʼE ʼui fēnei ʼi te Tohi-Tapu: “Koʼenī, te ʼu loʼimata ʼo nātou ʼaē neʼe māʼuʼuli taʼomia, kae neʼe mole ʼi ai honatou tagata fakaloto fīmālie; pea neʼe maʼu te mālohi ʹi te faʼahi ʼo nātou ʼaē ʼe natou faka taʼomia ia nātou.”—Tagata Tānaki 4:1.

ʼE toe fakahā foki ʼi te Tohi-Tapu, ko te fehiʼa ki te lanu neʼe ko he aga ia talu mai fualoa. Ohagē lā, ʼi te 18 sēkulō ʼi muʼa ʼo totatou temi, neʼe fakaafe e te Falaone ʼo Esipito ia te tagata Hepeleo ko Sakopo pea mo tona fāmili ke natou ʼomai ʼo maʼuli ʼi Esipito. Kae ki muli age, ko te tahi Falaone neʼe mataku ki te toe hahaʼi haʼu ʼaia. Koia, ʼe fakamatala fēnei: “Neʼe ina ʼui fēnei ki tana hahaʼi: ‘Koʼenī! Ko te hahaʼi ʼo te ʼu foha ʼo Iselaele ʼe kaugamālie age pea mo mālolohi age iā tātou. ʼOmai! Kae tou fai he puleʼaki ʼo ʼuhiga mo nātou, naʼa natou liliu ʼo kaugamālie fau.’ . . . Koia neʼe fakanofo ai kiā nātou he ʼu pule takitaki ki te gāue fakakinau, ke natou faka taʼomia nātou mokā natou ʼamo ʼanatou kavega.” (Ekesote 1:9-11) Neʼe toe fakatotonu e te kau Esipito ke matematehi ia te tamaliki tagata fuli kei meamea ʼo te hōloga ʼo Sakopo.—Ekesote 1:15, 16.

Koteā Te Tupuʼaga Tāfito ʼo Te Fehiʼa Ki He Tahi Lanu?

Ko te ʼu lotu ʼo te mālamanei neʼe natou lagolago ki te fehiʼa ki te lanu. Ko ʼihi ʼe moʼoni neʼe natou lototoʼa ʼo fakafeagai ki te agamālohi, kae ko te ʼu lotu fuli ʼi te agamāhani neʼe natou lagolago foki ki te hahaʼi agamālohi. Neʼe ʼi ai te aga fēia neʼe hoko ʼi Amelika, neʼe fakakinauʼi e te lao pea mo te tā ʼo te kau ʼuli ke natou fakalogo ki te kau Amelika papālagi, pea mo fai ia te ʼu lao moʼo tapuʼi ia te ʼu fai ʼohoana ʼa he Amelika papālagi pea mo he ʼuli, pea ko te faʼahi ʼaia neʼe fai ʼo aʼu mai ki te taʼu 1967. Neʼe toe fēia ʼi te Afelika Sautē ʼi te fakakehekeheʼi ʼo te kau papālagi mai te kau ʼuli, ko te tokosiʼi ʼaki te tokoni ʼa te puleʼaga neʼe natou puipui tonatou tuʼulaga pule ki te hahaʼi lanu ʼuli pea mo natou faigaʼi ke tapu te feʼohoanaʼaki ʼa te ʼu lanu. ʼI te ʼu faʼahi lualua ʼaia, ko ʼihi ʼaē neʼe kau ki te fehiʼa ki he tahi lanu neʼe natou tauhi lotu lelei.

Kae ʼe fakahā ʼi te Tohi-Tapu ia te tupuʼaga tāfito ʼo te fehiʼa ʼa he lanu ki he tahi lanu. ʼE ina fakamahino te tupuʼaga ʼo te agamālohi ʼa ʼihi lanu ki ʼihi. ʼE ʼui fēnei ʼi te Tohi-Tapu: “Ko ʼaē ʼe mole ʼofa neʼe mole ina ako ke ina ʼiloʼi te ʼAtua,  koteʼuhi ko te ʼAtua ʼe ʼofa. Kapau ʼe lau e he tahi: ‘ ʼE au ʼofa ki te ʼAtua,’ pea ʼe fehiʼa ia ki tona tehina, ʼe ko he tagata gutuloi. Heʼe ko ʼaē ʼe mole ʼofa ki tona tehina, ʼaē kua sio ki ai, ʼe mole feala ia ke ʼofa ki te ʼAtua, ʼaē ʼe mole sio ki ai.” (1 Soane 4:8, 20) ʼI te ʼu palalau ʼaenī, ʼe tou mahino ai ki te tupuʼaga tāfito ʼo te fehiʼa ʼa he lanu ki he tahi lanu. ʼE fehiʼa te lanu ki he tahi lanu—peʼe natou lotu peʼe kailoa—kae ʼe natou fēia lā ʼuhi heʼe mole natou ʼiloʼi te ʼAtua peʼe mo ʼofa ki ai.

Ko Te ʼAtamai Mālama ʼo Te ʼAtua, ʼe Ko Te Fakatafitoʼaga ʼo Te Felōgoi ʼa Te ʼu Lanu Kehekehe

ʼE feafeaʼi he faka felōgoi ia te ʼu lanu kehekehe ʼaki tatatou ʼiloʼi pea mo totatou ʼofa ki te ʼAtua? Ko te ʼatamai mālama fea ʼaē ʼi te Folafola ʼa te ʼAtua ʼe ina lava faka tāʼofi ia te hahaʼi ke ʼaua naʼa natou gaohi koviʼi he tahi age lanu? ʼE fakahā ʼi te Tohi-Tapu ko Sehova ʼe ko te Tamai ʼo te tagata fuapē. ʼE ʼui fēnei ʼi te Tohi-Tapu: “Kia tatou, ko te Atua e Tahi, te Tamai, iaʼia e haù mai ai te meafuape.” (1 Kolonito 8:6, Tauhi Foou) Pea ʼe toe ʼui fēnei: “Nee ina fakatupu aki he tokotahi te puleaga fuape.” (Gāue 17:26, Tauhi Foou) Koia, ko te tagata fuapē ʼe tautēhina.

Ko te ʼu lanu kehekehe ʼe feala hanatou fiameʼameʼa heʼe ko tonatou maʼuli fuli neʼe haʼu mai te ʼAtua, kae ʼe tonu kiā nātou fuli ke natou fakahemala ʼuhi ko tanatou ʼu kui. Neʼe ʼui fēnei e te tagata faitohi ʼi te Tohi-Tapu ko Paulo: “Aki he tagata e tahi nee hu mai te agahala ki te malama-nei.” Koia, “kua agahala fuli mo hala i te kololia o te Atua.” (Loma 3:23, Tauhi Foou; 5:12, Tauhi Foou) Ko Sehova ʼe ko he ʼAtua ʼo te ʼu meʼa kehekehe, pea ʼe tou kehekehe fuli. Kae neʼe mole ina foaki ki he lanu he meʼa makehe ke fia māʼoluga age ʼi he tahi lanu. Ko te manatu ʼaē ʼe lelei age he lanu ʼi he tahi lanu ʼe mole ʼalutahi mo te manatu ʼaē ʼi te Tohi-Tapu. ʼE hā mai, ko te ʼatamai mālama ʼaē ʼe tou maʼu mai te ʼAtua ʼe ina fakatupu ia te faka felōgoi ʼa te ʼu lanu kehekehe.

ʼE Tokaga Te ʼAtua Ki Te ʼu Puleʼaga Fuli

Ko ʼihi neʼe natou feʼekeʼaki peʼe ko te ʼAtua ʼe lagolago ki te fehiʼa ki te lanu, ʼi tana gaohi fakalelei te kau Iselaele pea mo akoʼi nātou ke natou fakamamaʼo mai te ʼu puleʼaga ʼaē. (Ekesote 34:12) ʼI te tahi temi, neʼe fili e te ʼAtua te puleʼaga ʼo Iselaele ko hana koloa makehe koteʼuhi ko te tui lahi ʼa Apalahamo ia te kui ʼo te kau Iselaele. Ko te ʼAtua totonu neʼe ina takitaki te Iselaele ʼo te temi muʼa, ʼo ina fili tonatou ʼu takitaki pea mo foaki age kiā nātou te ʼu lao. ʼI te temi ʼaē neʼe fakalogo ai te kau Iselaele ki te ʼu fakatuʼutuʼu ʼaia, neʼe feala ki te hahaʼi ke natou sisio ki te kehekehe ʼo te ʼu fua ʼo te puleʼaga ʼaē neʼe takitaki e te ʼAtua pea mo te ʼu fua ʼo te ʼu puleʼaga ʼaē neʼe takitaki e te tagata. Neʼe toe akoʼi foki e Sehova ki te kau Iselaele ʼo te temi ʼaia ia te ʼaoga ʼaē  ke fai he sākilifisio moʼo toe fakatokatoka ia te ʼu felōgoi ʼa te mālamanei pea mo te ʼAtua. Koia neʼe fua lelei ki te ʼu puleʼaga fuli ia te ʼu felōgoi ʼa Sehova mo Iselaele. Neʼe ʼalutahi mo te ʼu palalau ʼaē neʼe ina ʼui kiā Apalahamo: “ ʼAki tou hako ʼe tapuakina moʼoni ai anai te ʼatu puleʼaga fuli pē ʼo te kele, he neʼe ke fakalogo ki toku leʼo.”—Senesi 22:18.

Tahi ʼaē, neʼe maʼu e te kau Sutea ia te pilivilēsio ʼo te tala age kiā nātou ia te ʼu folafola taputapu ʼa te ʼAtua pea mo tanatou liliu ko te puleʼaga ʼaē neʼe tupu mai ai te Mēsia. Kae ko te faʼahi ʼaia neʼe toe hoko fēia foki ke fua lelei ki te ʼu puleʼaga fuli. Ko te ʼu tohi faka Hepeleo ʼaē neʼe foaki ki te kau Sutea ʼe maʼu ai he fakamatala taulekaleka ʼo te temi ʼaē kā maʼu ai anai e te ʼu lanu fuli te ʼu tapuakina lahi: “ ʼE lahi te ʼu fenua ʼe natou ʼolo anai pea ʼe natou ʼui anai: ‘Kotou ʼomai, pea ke tou hake ki te moʼuga ʼo Sehova pea ki te ʼapi ʼo te ʼAtua ʼo Sakopo; pea ʼe ina akoʼi anai kiā tātou tona ʼu ala.’ . . . ʼE mole natou hiki anai tanatou ʼu heletā, ko he puleʼaga ki he tahi puleʼaga, pea ʼe mole natou toe ako anai te tau. Pea ʼe natou tahi heka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamanavahēʼi ia nātou.”—Mikea 4:2-4.

Logolā neʼe fai faka mafola pē ia Sesu Kilisito ki te kau Sutea, kae neʼe ina toe ʼui fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa.” (Mateo 24:14) ʼE mole hala anai he puleʼaga mo logo ki te faka mafola ʼo te logo lelei. Koia neʼe tuku e Sehova ia he faʼifaʼitaki lelei ʼaki tana mole fakakehekeheʼi ia he lanu. “Ko te ʼAtua ʼe mole fakapalatahi, kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.”—Gāue 10:34, 35.

Ko te ʼu lao ʼaē neʼe foaki e te ʼAtua ki te puleʼaga ʼo Iselaele ʼāfea ʼo te temi muʼa, ʼe toe fakahā ai tana tokaga ʼaē ki te ʼu puleʼaga fuli. Kotou fakatokagaʼi ʼi te Lao tana fakamaʼua ʼaē ke gaohi fakalelei ia te kau matāpule ʼaē neʼe nonofo ʼi te fenua, ʼaki te ʼui ʼaenī: “Ko te matāpule ʼaē ʼe nofo iō koutou ohagē ko he matāpule ʼe tonu ke liliu kiā koutou ohagē ko he tahi ʼo koutou; pea ʼe tonu ke ke ʼofa ki ai ohagē pē ko koe totonu, he neʼe kua kotou liliu ko te ʼu hahaʼi ʼe nonofo matāpule ʼi te fenua ʼo Esipito.” (Levitike 19:34) Neʼe lahi te ʼu lao ʼa te ʼAtua ʼe natou akoʼi ki te kau Iselaele ke natou agalelei ki te hahaʼi matāpule. Koia, ko Poase te kui ʼa Sesu, ʼi tana sio ki te fafine masiva matāpule ʼe tae fulumeto ʼi tona gāueʼaga, neʼe ina fakahā ia te aga ʼaē neʼe ina ako mai te ʼAtua; neʼe ina fakatotonu ki tana hahaʼi tānaki taʼukai ke natou tuku fakalahi te fulumeto ke tae e te fafine.—Lute 2:1, 10, 16.

ʼE Akoʼi e Sesu Ki Te Hahaʼi Ia Te Agalelei

ʼE mole he tahi age iā Sesu neʼe lahi age hana fakahā ia te ʼatamai mālama ʼo ʼuhiga te ʼAtua. Neʼe ina fakahā ki tana ʼu tisipulo ia te faʼahiga agalelei ʼaē ke tou fai ki te hahaʼi ʼaē ʼe mole tatau mo tātou. ʼI te tahi ʼaho, neʼe fai palalau mo te fafine Samalitana. Ko te kau Samalitana neʼe ko he lanu ʼe fehiʼa kiai ia te kau Sutea e tokolahi, pea neʼe ko he faʼahi neʼe punamaʼuli kiai te fafine ʼi te palalau age ʼaē ʼa Sesu kiā te ia. Lolotoga te fai palalau ʼaia, neʼe tokoniʼi fakalelei e Sesu ia te  fafine ke mahino peʼe feafeaʼi hana maʼu ia te maʼuli heʼegata.—Soane 4:7-14.

Ko Sesu ʼaki tana fai ia te lea fakatātā ʼo ʼuhiga mo te tagata Samalitana agalelei neʼe ina akoʼi mai foki mo te faʼahiga aga ʼaē ke kita fai ki te hahaʼi ʼo he tahi lanu. Ko te tagata ʼaia neʼe sio ki te tagata Sutea lavea kovi neʼe ʼohofiʼi e te ʼu tagata kaihaʼa. Neʼe feala pē ke manatu fēnei ia te tagata Samalitana: ‘He koʼē koa ʼe au tokoni anai ki he tagata Sutea? Ko te kau Sutea ʼe natou fehihiʼa ki te hahaʼi ʼo toku fenua.’ Kae ko Sesu neʼe ina fakahā ko te Samalitana neʼe kehe tana manatu ʼo ʼuhiga mo te kau matāpule. Logolā ko ʼihi neʼe natou fakalaka ʼi te ala ʼaē neʼe takoto ai te tagata lavea, kae ko te tagata Samalitana “neʼe tupu atu aipē ia [tona] manavaʼofa” pea neʼe tokoni ʼaupitō ki ai. Neʼe fakaʼosi e Sesu ia te lea fakatātā ʼo ʼui kā loto e he tahi ke ina maʼu ia te ʼofa ʼo te ʼAtua pea ʼe tonu ke fai fēia.—Luka 10:30-37.

Ko te ʼapositolo ko Paulo neʼe ina akoʼi nātou ʼaē ʼe loto ke leleiʼia nātou e te ʼAtua ke fetogi tonatou ʼulugaaga pea mo natou faʼifaʼitakiʼi te faʼahiga tokaga ʼaē ʼa te ʼAtua ki te hahaʼi. Neʼe tohi fēnei e Paulo: “Kotou toʼo kehe iā koutou tokotou ʼulugaaga ʼāfea mo ʼana gāue, pea ke kotou kofuʼi te ʼulugaaga foʼou, ʼaē ʼaki te ʼatamai mālama totonu, ʼe fakafoʼou ʼo mulimuli ki te pāki ʼo Ia ʼaē neʼe ina fakatupu, ʼaē ʼe mole faka ʼuhigaʼi ai he Keleka peʼe ko he Sutea, he silikosisio peʼe ko he tahi neʼe mole silikosisio, he matāpule, he kaugana Site. . . . Kae, ʼo hilifaki ki te ʼu meʼa fuli ʼaia, kotou kofuʼi ia te ʼofa, he ko he noʼo haohaoa ia ki te logo tahi.”—Kolose 3:9-14.

Ko Te ʼAtamai Mālama ʼo ʼUhiga Mo Te ʼAtua ʼe Ina Fetogi Koa Te Hahaʼi?

Ko te ʼiloʼi ʼo Sehova ʼAtua ʼe ina fetogi moʼoni koa te aga ʼa te hahaʼi ki he tahi lanu? Kotou tokagaʼi te meʼa neʼe hoko ʼi Kanata ki he matāpule Asia, neʼe lotomamahi ʼi tana tau mo te fakapalatahi neʼe fai age kiā te ia. Neʼe felāveʼi mo te kau Fakamoʼoni ʼa Sehova, pea neʼe natou kamata ako mo ia te Tohi-Tapu. Ki muli age, neʼe ina fai kiā nātou ia te tohi fakafetaʼi, ʼe ina ʼui fēnei ai: ‘Ko koutou, ko te kau papālagi agalelei ʼaupitō ki te hahaʼi Asia. ʼI taku sio ʼaē ʼe kotou kehekehe ʼosi mo te hahaʼi ʼaē, neʼe au feʼekeʼaki pe koteā tona tupuʼaga. Neʼe au fakakaukauʼi pea mo ʼui ʼe ko koutou ko te kau Fakamoʼoni ʼa te ʼAtua. ʼE lagi ʼe ʼi ai hona pikipikiga mo te Tohi-Tapu. Neʼe au sio ʼi takotou ʼu fono ki te logo tahi ʼa te kau papālagi, mo te kau ʼuli, mo te kau nai, ʼuhi heʼe ko nātou fuli ʼe natou tautēhina pea mo tautuagaʼane. ʼI te temi nei kua au ʼiloʼi pe koʼē ʼe kotou fēia, ʼuhi heʼe ko tokotou ʼAtua.’

Ko te Folafola ʼa te ʼAtua ʼe ina fakakikite te temi ʼaē kā “fonu moʼoni anai te kele ʼi te ʼatamai mālama ʼo ʼuhiga mo Sehova.” (Isaia 11:9) ʼO aʼu mai ki te temi nei, ʼi te lea faka polofetā ʼo te Tohi-Tapu, ko te toe hahaʼi tokolahi e toko lauʼi miliona “mai te ʼu fenua fuli pea mo te ʼu telepī pea mo te ʼu hahaʼi pea mo te ʼu lea fuli” ʼe natou logo tahi ʼaki te tauhi moʼoni. (Fakahā 7:9) ʼE natou fakatalitali ki te temi ʼaē kā fetogi ai te fehiʼa ʼaki te ʼofa ʼi he mālamanei kā vave fakahoko ai te fakatuʼutuʼu ʼa Sehova ʼaē neʼe ina ʼui age kiā Apalahamo: “ ʼE tapuakina anai te ʼu fāmili fuli ʼo te kele.”—Gāue 3:25.

[Paki ʼo te pasina 4]

Neʼe akoʼi e te Lao ʼa te ʼAtua ki te kau Iselaele ke natou ʼofa ki te kau matāpule

[Paki ʼo te pasina 5]

Koteā te ako ʼe tou lava tāʼofi mai te lea fakatātā ʼo te tagata Samalitana agaʼofa?

[Paki ʼo te pasina 6]

Ko te ʼAtua neʼe mole ina foaki ki he lanu he meʼa makehe ke fia māʼoluga age ʼi he tahi lanu