ʼE Feafeaʼi Hatatou Manavaʼofa?

“Tou fai te meʼa ʼaē ʼe lelei ki te hahaʼi fuli pē, kae tāfito foki kiā nātou ʼaē ko ʼotatou ʼu kāiga ʼi te tui.”—Kalate 6:10.

1, 2. ʼAki te lea fakatātā ʼo te tagata Samalitana aga faka kāiga, koteā te ako ʼaē ʼe tou tāʼofi ʼo ʼuhiga mo te manavaʼofa?

 ʼI TANA fai palalau mo Sesu, ko te tagata neʼe ina ʼiloʼi lelei ia te Lao, neʼe ina fehuʼi fēnei age kiā te ia: “Ko ai toku kāiga?” Moʼo tali kiai, neʼe fakamatala age e Sesu ia te lea fakatātā ʼaenī: “Ko te tagata neʼe hifo mai Selusalemi ki Seliko, pea neʼe fetaulaki ia mo te kau kaihaʼa, ʼo natou kaihaʼa ia ia pea mo natou tāmateʼi, pea natou ʼolo ai, kae tuku ai kua teitei mate. Pea fokifā pē kua ʼalu ifo te pelepitelō ʼi te ala ʼaia, kae ʼi tana sio ki te tagata, neʼe fetogi kauala ia pea hoko atu tona fagona. ʼO toe fēia pē, mo te Levite, ʼi tana kaku atu ki te potu ʼaia pea ʼi tana sio ki ai, neʼe fetogi kauala ia pea hoko atu tona fagona. Kae neʼe ʼi ai leva te tagata Samalitana, neʼe haʼu tona fagona ʼi te ala ʼaia, pea ʼi tana kaku mai ki te potu ʼaia pea mo tana sio ki ai, neʼe tupu atu aipē iā te ia te manavaʼofa. Pea neʼe fakaovi age kiā ia pea ina haʼi tona ʼu lavea, ʼo ina liligi kiai te lolo pea mo te vino. ʼOsi ʼaia pea ina fakaheka ia ia ki tana manu, pea ina ʼave ki te fale tali fagona pea taupau lelei ki ai. Pea ʼi te ʼaho ake, neʼe ina toʼo ia tenalio e lua, ʼo ina ʼavage ki te tagata ʼo te fale tali fagona ʼo ʼui māʼana, ‘Ke ke taupau lelei ki ai, pea ko te falā ʼaē kā ke puli anai kiai ʼo laka age, ʼe au totogi atu anai ʼi taku liliu mai.’ ” Pea neʼe fehuʼi leva e Sesu ki te tagata: “Ko ai lā ʼi te toko tolu ʼaia, ʼaē neʼe ko te kāiga ʼo te tagata ʼaē neʼe fetaulaki mo te kau kaihaʼa?” Neʼe tali fēnei e te tagata: “Ko ia ʼaē neʼe manavaʼofa kiā te ia.”—Luka 10:25, 29-37a.

² Ko te tokaga ʼa te Samalitana ki te tagata ʼaē neʼe lavea, ʼe ina fakahā lelei te ʼuhiga moʼoni ʼo te manavaʼofa! ʼI tana fakaʼofaʼofa ki te tagata, neʼe fai e te Samalitana he puleʼaki moʼo fakafīmālieʼi te tagata ʼaia neʼe lavea. Tahi ʼaē meʼa, neʼe mole feʼiloʼiʼaki ia te Samalitana pea mo te tagata ʼaia neʼe nofo ʼi te faigataʼaʼia. Ko te manavaʼofa ʼe mole tāʼofi anai e te lanu, peʼe ko te lotu peʼe ko he ʼu agaʼi fenua. ʼI tana ʼosi fakamatala ia te lea fakatātā ʼo ʼuhiga mo te Samalitana aga faka kāiga, neʼe fai age e Sesu ia te tokoni ʼaenī ki te tagata: “ ʼAlu lā, pea ke toe fai fēia mo koe.” (Luka 10:37b) ʼE tou lava mulimuli ki te tokoni ʼaia pea mo tou faiga ke tou manavaʼofa ki te hahaʼi. ʼO feafeaʼi? Ko te ʼu ʼaluʼaga fea ʼaē ʼe feala ke tou manavaʼofa ki te hahaʼi ʼi te ʼaho fuli ʼo totatou maʼuli?

“Kapau Ko He Tehina . . . ʼe Telefua”

3, 4. He koʼē ʼe tonu ke tou faka maʼuhiga tāfito ia te manavaʼofa ʼi te kōkelekāsio faka Kilisitiano?

³ Neʼe ʼui fēnei e te ʼapositolo ko Paulo: “ ʼI te temi fuli pē ʼaē ʼe tou maʼu ai hotatou faigamālie, tou fai te meʼa ʼaē ʼe lelei ki te hahaʼi fuli pē, kae tāfito foki kiā nātou ʼaē ko ʼotatou ʼu kāiga ʼi te tui.” (Kalate 6:10) Tou ʼuluaki vakaʼi muʼa peʼe koteā ia te ʼu tuʼuga gāue fonu ʼi te manavaʼofa ʼaē ʼe tou lava fai ki ʼotatou ʼu kāiga ʼi te tui.

⁴ ʼI tana tokoni ʼaē ki te kau Kilisitiano moʼoni ke natou femanavaʼofaʼaki, neʼe tohi fēnei e te tisipulo ko Sake: “Ko te fakamāu ʼe mole fai anai ʼaki te manavaʼofa ki ʼaē neʼe mole manavaʼofa.” (Sake 2:13) ʼAki te ʼu vaega ki muʼa atu pea mo ʼaē ki muli age, ʼe ʼi ai te ʼu ʼaluʼaga ʼe tou lava fakahā ai ia te manavaʼofa. Ohagē lā, iā Sake 1:27, ʼe tou lau fēnei ai: “Ko te tauhi ʼaē ʼe maʼa pea mo heʼe mele iā muʼa ʼo totatou ʼAtua pea mo Tamai, ʼe ko ia ʼaenī: ko te taupau ʼo te ʼu fānau ʼaē ʼe hala mo tamai pea mo faʼē, pea mo te ʼu fafine vītua ʼi tonatou ʼu mamahi, pea ke ʼaua naʼa ʼulihi tātou e te mālamanei.” ʼE ʼui fēnei iā Sake 2:15, 16: “Kapau ko he tehina peʼe ko he tuagaʼane ʼe telefua pea ʼe mole hana meʼa kai ʼi te ʼaho fuli, pea ko he tahi iā koutou ʼe ina ʼui age kiā nāua: ‘ ʼOlo ʼi te tokalelei, ʼo fakamāfana pea mo kolua haga fafaga fakaleleiʼi ia koulua,’ kae ʼe mole kotou foaki age kiā nāua te ʼu meʼa ʼaē ʼe ʼaoga ki tonā ʼu sino, koteā anai tona ʼaoga?”

5, 6. ʼO ʼuhiga mo tatatou kōkelekāsio, koteā te ʼu gāue faka manavaʼofa ʼaē ʼe tou lava fai?

 ⁵ Ko te loto tokaga ʼaē ki te hahaʼi pea mo te fia tokoni kiā nātou ʼi te faigataʼaʼia ʼe ko he agaaga ʼaia ʼo te lotu moʼoni. Ko tatatou tauhi ʼe mole ina fakagafua mai ke tou tala gutu pē ki totatou ʼu tehina tatatou tokaga ʼaē kiā nātou, ʼo tou fakaʼamu pē ke ʼi ai he mafuliʼaga lelei ʼo tonatou maʼuli. Ko te fakaʼofaʼofa kiā nātou ʼe ina uga anai tātou ke tou fai he meʼa ʼe lelei kiā nātou ʼaē ʼe nonofo ʼi te faigataʼaʼia. (1 Soane 3:17, 18) ʼEī, ʼe lahi te ʼu gāue ʼe tonu ke tou fai moʼo fakahā ai ia te manavaʼofa, ohagē ko te kuka maʼa he tahi ʼe mahaki, te fai ʼo te ʼu gāue ʼo te loto fale ʼo he tahi kua mātuʼa, te feʼaveʼaki ki te ʼu fono ʼo he tahi ʼe faigataʼaʼia, pea mo agaʼofa kiā nātou ʼaē ʼe ʼaoga ki ai ia te faʼahi ʼaia.—Teutalonome 15:7-10.

⁶ Logolā ʼe maʼuhiga te tokoni ʼi te faʼahi fakasino ki te hahaʼi ʼo te kōkelekāsio ʼaē ʼe tuputupu, kae ʼe toe maʼuhiga age te tokoni fakalaumālie. ʼE fakaloto mālohiʼi tātou ke tou “fai he ʼu palalau fakafīmālie ki te ʼu nefesi lotovaivai, mo [tou] lagolago kiā nātou ʼaē ʼe vaivavai.” (1 Tesalonika 5:14) ʼE fakaloto mālohiʼi “te kau finematuʼa” ke “natou akoʼi ki ʼihi te meʼa ʼaē ʼe lelei.” (Tito 2:3) ʼO ʼuhiga mo te ʼu taupau Kilisitiano, ʼe ʼui fēnei ʼi te Tohi-Tapu: “ ʼE tonu anai ke natou tahi liliu ko he nonoʼaga mokā matagi pea ko he holaʼaga mokā ʼafā.”—Isaia 32:2.

 7. ʼAki te faʼifaʼitaki ʼo te ʼu tisipulo ʼi Atiokia ʼo Silia, koteā te ako ʼaē ʼe tou tāʼofi ʼo ʼuhiga mo te fakahā ʼo te manavaʼofa?

⁷ Ko te ʼu kōkelekāsio ʼi te ʼuluaki sēkulō neʼe natou taupau lelei te kau vītua, mo te ʼu fānau ʼaē ʼe hala mo tamai, pea mo te hahaʼi ʼaē neʼe ʼaoga he tokoni pea mo he fakaloto mālohi ʼi tonatou ʼu kōkelekāsio. ʼI ʼihi temi, neʼe natou toe fai mo te ʼu fakatuʼutuʼu ʼo momoli he ʼu meʼa ʼofa maʼa te ʼu tehina ʼi te tahi ʼu kōkelekāsio. Ohagē lā, ʼi te fakakikite e te polofetā ko Akapo ʼe “hoko anai he toe hoge lahi ʼi te kele kātoa,” ko te ʼu tisipulo ʼi Atiokia ʼo Silia neʼe natou “fakatotonu ai ke natou momoli takitahi ʼo mulimuli ki te ʼu meʼa ʼaē ʼe natou maʼu, he ʼu meʼa ʼofa maʼa te ʼu tehina ʼaē ʼe nonofo ʼi Sutea.” Neʼe “ ʼave e Palenapa pea mo Saulo” te ʼu meʼa ʼofa ʼaia ki te ʼu tagata ʼāfea ʼo te kolo ʼaia. (Gāue 11:28-30) ʼE feafeaʼi iā ʼaho nei? Ko “te tagata kaugana agatonu mo poto” neʼe ina fakatuʼutuʼu he ʼu komitē moʼo tokoni ki totatou ʼu tehina ʼaē neʼe hoko kiā nātou he tuʼutāmaki, ohagē ko he ʼu ʼafā, he mafuike, peʼe ko te hake ʼo he peau. (Mateo 24:45) Ko te foaki ʼo totatou temi, mo totatou mālohi, pea mo tatatou ʼu koloa moʼo tokoni ki te fakatuʼutuʼu ʼaia, ʼe ko he faʼahiga fakahā ʼaia ʼo te manavaʼofa.

“Kapau ʼe Kotou Haga Fakapalatahi”

 8. ʼE fakafeagai feafeaʼi ia te fakapalatahi ki te manavaʼofa?

⁸ ʼO ʼuhiga mo te aga ʼaē ʼe fakafeagai ki te manavaʼofa pea mo “te lao fakahau” ʼo te ʼofa, neʼe tohi fēnei e Sake: “Kapau ʼe kotou haga fakapalatahi, ʼe kotou agahala, heʼe fakatonutonuʼi koutou e te lao ohagē ko he ʼu hahaʼi ʼe fakafeagai ki te lao.” (Sake 2:8, 9) Kapau ʼe lahi fau takotou tōkakaga kiā nātou ʼaē ʼe maʼu koloa peʼe ko nātou ʼaē ʼe faka maʼuhigaʼi, pea ʼe mole kotou tōkakaga anai ki “te tagi fakaʼofaʼofa ʼo ia ʼaē ʼe veliveli.” (Tāʼaga Lea 21:13) Ko te fakapalatahi ʼe ina tāʼofi te fakahā ʼo te manavaʼofa. ʼE tou manavaʼofa mokā ʼe mole tou fakapalatahi mo te hahaʼi.

 9. He koʼē ʼe mole kovi mokā tou fakahā he ʼofa makehe ki he tahi ʼe tāu mo te faʼahi ʼaia?

⁹ Ko te fakapalatahi, ko tona faka ʼuhiga koa ʼe mole tonu ke tou ʼofa tāfito ki he tahi? Kailoa ia. ʼO ʼuhiga mo tona tehina kaugā gāue ko Epafolotito, neʼe tohi fēnei e te ʼapositolo ko Paulo ki te kau Kilisitiano ʼi Filipe: “Kotou haga ʼoʼofa mamahi aipē ki te taʼi ʼu faʼahiga tagata ʼaia.” Koteā tona tupuʼaga? “Heʼe, ʼuhi ko te gāue ʼa te ʼAliki, neʼe meihiʼi pē ke mate, ʼo feala ke tuʼutāmaki tona nefesi moʼo fetogi kātoa ʼo takotou mole ʼi henī moʼo tokoni mai kiā au.” (Filipe 2:25, 29, 30) Neʼe tāu mo feʼauga ke vikiʼi ia te gāue agatonu ʼaē neʼe fai e Epafolotito. Tahi ʼaē meʼa, ʼe tou lau fēnei ia 1 Timoteo 5:17: “Ke ʼiloʼi ʼe tāu mo he fakaʼapaʼapa lahi ia te kau tagata ʼāfea ʼaē ʼe natou takitaki lelei, tāfito ia nātou ʼaē ʼe gāue kinakina ʼi te folafola pea mo te faiakonaki.” ʼE toe tāu mo feʼauga ke vikiʼi he tahi ʼo ʼuhiga mo tona ʼu kalitātē faka laumālie. ʼE mole ko he fakapalatahi ia.

‘Ko Te Poto Mai ʼOluga ʼe Fonu ʼi Te Manavaʼofa’

10. He koʼē ʼe tonu ke tou lolomi totatou ʼalelo?

¹⁰ ʼO ʼuhiga mo te ʼalelo, neʼe tohi fēnei e Sake: “ ʼE ko he meʼa ia ʼe kovi, ʼe vale, ʼe fonu ia ko te kafo kona ʼe feala ke ina matehi he tahi. ʼAki ia ia ʼe  tou tapuakiʼi ia Sehova, te Tamai, pea ʼaki ia ia ʼe tou laukovi ki te tagata ʼaē neʼe fakatupu ‘ ʼo mulimuli ki te pāki ʼo te ʼAtua.’ Mai te gutu e tahi ʼe haʼu ai te tapuakina pea mo te laukovi.” ʼI te kāpite ʼaia, ʼe toe ʼui fēnei e Sake: “Kapau ʼe maʼu ʼi tokotou loto he maheka kovi pea mo he loto fakataupiepie, ʼaua naʼa kotou laupisi pea ʼaua naʼa kotou loi ki te moʼoni. ʼE mole ko te poto ʼaē ʼe haʼu mai ʼoluga kae ko te poto fakakelekele, fakamanu, fakatemonio. Heʼe ko te faʼahi ʼaē ʼe ʼi ai te maheka pea mo te manatu fakataupiepie, ʼe maʼu ai te tokakovi pea mo te ʼu faʼahiga meʼa kovi fuli pē. Kae ko te poto mai ʼoluga, ʼuluaki ʼe maʼa ia, pea ʼe tokalelei, ʼe agapoto, pea ʼe fia fakalogo, fonu ʼi te manavaʼofa pea mo te ʼu fua lelei, ʼe mole fakapalatahi ia, pea ʼe mole mālualoi.”—Sake 3:8-10a, 14-17.

11. ʼE feafeaʼi hatatou fakahā ʼi tatatou ʼu palalau, ʼe tou loto manavaʼofa?

¹¹ Koia, ʼaki tatatou ʼu palalau, ʼe lava hā ai peʼe tou maʼu te poto ʼaē ʼe “fonu ʼi te manavaʼofa.” Kae koteā ʼaē ʼe tou fakahā, mo kapau ʼe tou laupisi ʼo ʼuhiga mo tātou, peʼe tou loi, peʼe tou fasituʼu ʼo ʼuhiga mo he tahi, heʼe tou māheheka kiā ia pe neʼe tou fihi mo ia? ʼE ʼui fēnei iā Pesalemo 94:4: “ ʼE natou laupisi tuʼumaʼu, ia nātou fuli ʼaē ʼe natou fai te meʼa ʼaē ʼe kovi.” Pea ko te fasituʼu ʼe feala ke ina maumauʼi vave te matagafua ʼo he tahi neʼe mole ina fai he meʼa ʼe kovi! (Pesalemo 64:2-4) Tahi ʼaē meʼa, kotou fakakaukauʼi age muʼa ia te mamahi ʼaē ʼe feala ke fakahoko e ‘te tagata fakamoʼoni loi ʼaē ʼe loi tuʼumaʼu.’ (Tāʼaga Lea 14:5; 1 Hau 21:7-13) ʼI tana ʼosi talanoa ʼo ʼuhiga mo te fakaʼaogaʼi kovi ʼo te ʼalelo, neʼe tohi fēnei e Sake: “ ʼE mole tonu ke fēia, toku ʼu tehina.” (Sake 3:10b) Ko te manavaʼofa moʼoni, ʼe ina fakamaʼua mai ke tou fai ni ʼu palalau ʼe maʼa, mo tokalelei pea mo fakapotopoto. Neʼe ʼui fēnei e Sesu: “ ʼE au tala atu kiā koutou: Ko te palalau vaʼiga fuli pē ʼe fai e te hahaʼi, ʼe fakamāuʼi anai ia nātou kiai ʼi te ʼAho ʼo te Fakamāu.” (Mateo 12:36) ʼE maʼuhiga ʼaupitō ke tou fai ni ʼu palalau ʼe hā ai te loto manavaʼofa!

“Kotou Fakamolemole Ki Te Hahaʼi ʼAnatou Hala”

12, 13. (a) Koteā te ako ʼaē ʼe tou tāʼofi ʼo ʼuhiga mo te manavaʼofa ʼi te lea fakatātā ʼo te tagata kaugana ʼaē neʼe tonu ke ina huʼi tona maʼua lahi ki tona pule? (b) Koteā tona faka ʼuhiga ke “tuʼa fitugofulu-mā-fitu” tatatou fakamolemole ki totatou tehina?

¹² Ko te tahi faʼahiga fakahā ʼo te manavaʼofa, ʼe maʼu ʼi te lea fakatātā ʼa Sesu ʼo ʼuhiga mo te tagata kaugana ʼaē neʼe tonu ke ina huʼi tona maʼua ki tona pule, ʼaē neʼe ko te hau, ko tenalio e 60 000 000. ʼI tana mole maʼu ʼo hana falā moʼo huʼi ʼaki tona maʼua, neʼe kolekole e te tagata kaugana ke manavaʼofa age tona pule. “ ʼI tana manavaʼofa kiā ia,” neʼe molehi e te pule ʼaia tona maʼua. Kae ʼi te mavae ʼo te tagata kaugana, neʼe felāveʼi mo te tahi tagata kaugana neʼe tonu ke ina huʼi age tona maʼua kiā ia, neʼe ko tenalio pē e teau pea neʼe mole manavaʼofa kiā ia kae neʼe ina lī ki te fale pilisoni. ʼI te logo ʼaē ʼa te pule ki te meʼa ʼaē neʼe hoko, neʼe ina faka fekauʼi ke ʼalu age te tagata kaugana ʼaia ʼaē neʼe ina fakamolemole age tona maʼua, pea neʼe ina ʼui fēnei age: “Tagata kaugana agakovi, neʼe au fakamolemole kātoa atu kiā te koe tou maʼua ʼi tau fakakolekole mamahi mai. Neʼe mole tonu koa lā ia ke ke toe manavaʼofa mo koe ki tou kaugā pōpula, ohagē pē ko taku manavaʼofa ʼaē kiā te koe?” Pea ko te pule neʼe ina ʼave ai ia ia ki te kau leʼo fale pilisoni. Neʼe fakaʼosi fēnei e Sesu ia te lea fakatātā: “Koia ʼe toe fai fēia pē anai kiā koutou e taku Tamai ʼaē ʼe ʼi selō, mo kapau ʼe mole kotou tahi fefakamolemoleʼaki tokotou loto kātoa, ki tona tehina.”—Mateo 18:23-35.

¹³ ʼE faka maʼuhigaʼi ʼaupitō ʼi te lea fakatātā ʼaia, ko he tahi ʼe loto manavaʼofa ʼe loto fakamolemole! Neʼe fakamolemole mai e Sehova totatou ʼu tuʼuga maʼua ʼuhi ko te agahala. ʼE mole tonu koa lā mo tātou ke tou toe “fakamolemole ki te hahaʼi ʼanatou hala”? (Mateo 6:14, 15) ʼI muʼa ʼo te fakamatala e Sesu ia te lea fakatātā ʼo ʼuhiga mo te tagata kaugana ʼaē neʼe mole manavaʼofa, neʼe fehuʼi fēnei age e Petelo: “ ʼAliki, ʼe tuʼa fia anai te feala ʼo toku tehina ke agahala mai kiā te au, pea mo tonu ke au fakamolemole kiā te ia? ʼE kaku anai koa ki te tuʼa fitu?” Neʼe tali fēnei e Sesu: “ ʼE au tala atu kiā te koe, ʼe mole kaku ki te tuʼa fitu, kae ki te tuʼa fitugofulu-mā-fitu.” (Mateo 18:21, 22) ʼEī, ko he tahi ʼe loto manavaʼofa ʼe loto fakamolemole “tuʼa fitugofulu-mā-fitu,” ko tona faka ʼuhiga ʼe loto fakamolemole tuʼumaʼu pē.

14. ʼO mulimuli kiā Mateo 7:1-4, ʼe feafeaʼi hatatou fakahā he loto manavaʼofa ʼi te ʼaho fuli?

¹⁴ Neʼe fakahā e Sesu te tahi faʼahi ʼe feala ke tou manavaʼofa ai, ʼi tana ʼui fēnei ʼi te Akonaki ʼi te Moʼuga: “Tuku takotou fakamāu, koteʼuhi ke ʼaua naʼa fakamāuʼi koutou; heʼe fakamāuʼi anai koutou ʼaki te fakamāu ʼaē ʼe kotou fakamāuʼi ʼaki. . . . He  koʼē ia ʼe ke sioʼi te mohuku ʼaē ʼe ʼi te mata ʼo tou tehina, kae mole ke tokaga koe ki te lalago ʼaē ʼe ʼi tou mata ʼo koe? Peʼe feafeaʼi hau faʼa ʼui age ki tou tehina: ‘Tuku ke au toʼo te mohuku mai tou mata,’ kae koʼenī ia, ʼe ʼi ai te lalago ʼi tou mata ʼo koe?” (Mateo 7:1-4) Koia ʼe feala ke tou manavaʼofa ʼi te ʼaho fuli ʼo tou kātakiʼi te ʼu hala ʼa ʼihi kae mole tou fakamāuʼi nātou peʼe tou fatufatuʼi nātou.

“Tou Fai Te Meʼa ʼAē ʼe Lelei Ki Te Hahaʼi Fuli Pē”

15. He koʼē ko totatou manavaʼofa ʼe mole faka tuʼakoi pē kiā nātou ʼaē ʼi te kōkelekāsio?

¹⁵ Logolā ʼe faka maʼuhigaʼi ʼi te tohi faka Tohi-Tapu ʼo Sake te femanavaʼofaʼaki ʼa te ʼu tehina, kae mole faka ʼuhiga leva ʼe faka tuʼakoi pē ia te manavaʼofa kiā nātou ʼaē ʼi te kōkelekāsio. ʼE ʼui fēnei iā Pesalemo 145:9: “Ko Sehova ʼe agalelei ki te hahaʼi fuli pē, pea ʼe ʼiloga tona ʼu manavaʼofa ʼi tana ʼu gāue fuli.” ʼE fakaloto mālohiʼi tātou ke tou “liliu ko he kau faʼifaʼitaki ʼo te ʼAtua,” pea mo “fai te meʼa ʼaē ʼe lelei ki te hahaʼi fuli pē.” (Efesi 5:1; Kalate 6:10) Logolā ʼe mole tou manako ki “te mālamanei peʼe ko te ʼu meʼa ʼaē ʼe ʼi te mālamanei,” kae ʼe mole tou heʼeʼofa anai ki te hahaʼi ʼo te mālamanei ʼaē ʼe nonofo ʼi te faigataʼaʼia.—1 Soane 2:15.

16. ʼE fakalogo kiteā tatatou fakahā ia te manavaʼofa ki te hahaʼi?

¹⁶ ʼI totatou ʼuhiga Kilisitiano, ʼe tou fia tokoni tuʼumaʼu ki te hahaʼi ʼaē neʼe tuʼutāmakiʼia ʼuhi ko “te ʼu meʼa fakafokifā” ʼaē neʼe hoko kiā nātou. (Tagata Tānaki 9:11) ʼE mahino ia, ko te ʼu meʼa ʼaē ʼe feala anai ke tou fai pea mo foaki ʼe fakalogo anai ki totatou ʼaluʼaga takitokotahi. (Tāʼaga Lea 3:27) Kapau ʼe tou fia tokoni ki te hahaʼi ʼi te faʼahi fakasino, ʼe tou tōkakaga anai ke mole liliu te aga ʼaia ko he fakaloto mālohi ʼa he tahi ki te piko. (Tāʼaga Lea 20:1, 4; 2 Tesalonika 3:10-12) Koia, ko te manavaʼofa moʼoni ʼe tonu ke fai ʼuhi heʼe tou fakaʼofaʼofa pea mo loto mahino ki te hahaʼi, kae ʼe maʼua pē foki ke tou aga fakapotopoto ʼo ʼuhiga te faʼahi ʼaia.

17. Koteā te gāue ʼaē ʼe lelei tāfito moʼo fakahā ia te manavaʼofa ki te hahaʼi ʼaē ʼo te mālamanei?

¹⁷ Ko te gāue ʼaē ʼe lelei tāfito moʼo fakahā ia te manavaʼofa ki te hahaʼi ʼaē ʼo te mālamanei, ʼe ko te faka mafola age ia te moʼoni ʼo te Tohi-Tapu. Koteā tona tupuʼaga? Heʼe iā ʼaho nei, tokolahi te hahaʼi ʼi te mālamanei ʼe natou haʼele fakataufā ʼi te fakapōʼuli fakalaumālie. ʼI tanatou mole ʼiloʼi peʼe feafeaʼi hanatou tauʼi tonatou ʼu fihifihia peʼe ʼi tanatou mole maʼu he ʼamanaki moʼoni ki te kā haʼu, tokolahi te hahaʼi ʼe natou “ ʼāhua pea mo mavetevete, ohagē he faga ovi ʼe mole honatou tagata tauhi.” (Mateo 9:36) Ko te logo ʼo te Folafola ʼa te ʼAtua ʼe feala ke liliu ko ‘he mālama taki ki ʼonatou vaʼe,’ ʼo tokoni kiā nātou ke natou maʼu he ʼu puleʼaki ki te ʼu fihifihia ʼo te maʼuli. ʼE toe feala ke liliu ko ‘he mālama ki tonatou ala’ heʼe fakakikite ʼi te Tohi-Tapu ia te fakatuʼutuʼu ʼa te ʼAtua ki te kā haʼu, ʼo natou maʼu ai he tafitoʼaga ki he ʼamanaki taulekaleka. (Pesalemo 119:105) ʼE ko he toe pilivilēsio lahi te fakahā ia te logo taulekaleka ʼo te moʼoni ki te hahaʼi ʼaē ʼe ʼaoga lahi kiā nātou! ʼI te ovi mai ʼo te “mamahi lahi,” ʼe ko te temi ʼaenī ke tou faʼafai ʼi te gāue fai faka mafola ʼo te Puleʼaga pea mo te fai ʼo ni ʼu tisipulo. (Mateo 24:3-8, 21, 22, 36-41; 28:19, 20) ʼE mole he tahi age gāue ʼe lelei moʼo fakahā ia te manavaʼofa ʼaia.

Tou Foaki Ia “Te ʼu Meʼa ʼAē ʼi Loto”

18, 19. He koʼē ʼe tonu ke tou haga gāue moʼo fakatuputupu totatou loto manavaʼofa ʼi totatou maʼuli?

¹⁸ Neʼe ʼui fēnei e Sesu: “Kotou foaki ia te ʼu meʼa ʼaē ʼi loto.” (Luka 11:41) Ke liliu te aga ʼaē ʼe lelei ko he manavaʼofa moʼoni, ʼe tonu ko he meʼa ʼofa ʼe fai ʼaki te ʼofa pea mo tou loto moʼoni kiai. (2 Kolonito 9:7) ʼI te mālamanei ʼaē ʼe lahi ai te aga fefeka, mo te manatu pē kiā kita, pea mo te heʼeʼofa ʼo ʼuhiga mo te ʼu mamahi pea mo te ʼu faigataʼaʼia ʼa te hahaʼi, ʼe mahino ia ko te manavaʼofa ʼe fakaloto fīmālie lahi!

¹⁹ Koia, tou haga gāue moʼo fakatuputupu totatou loto manavaʼofa ʼi totatou maʼuli. Kapau ʼe lahi totatou manavaʼofa, pea ʼe toe lahi mo tatatou faʼifaʼitaki ki te ʼAtua. ʼE liliu anai totatou maʼuli ko he maʼuli fiafia, ʼe ʼi ai hona fakatuʼutuʼu.—Mateo 5:7.

Koteā ʼAē Neʼe Kotou Ako?

• He koʼē ʼe maʼuhiga tāfito ke tou manavaʼofa ki te ʼu tehina?

• ʼE tou lava fakahā feafeaʼi totatou manavaʼofa ʼi te kōkelekāsio?

• Koteā te gāue lelei ʼaē ʼe tou lava fai ki te hahaʼi ʼo te mālamanei?

[Fehuʼi]