ʼE Haofaki Tātou Mai Te ʼu Hele ʼa Te Tagata Puke Manulele

“Ko [Sehova] ʼaē ʼe ina faka ʼāteaina anai koe mai te hele ʼa te tagata puke manulele.”—Pesalemo 91:3.

 1. Ko ai ia “te tagata puke manulele,” pea he koʼē ʼe ko he tahi ʼe kovi?

 ʼE ʼI AI te tahi ʼe ina fia puke ia te kau Kilisitiano fuli, ko he tahi ʼe māʼoluga age tona poto pea mo tana kākā ʼi te tagata. Iā Pesalemo 91:3, ʼe ʼui ʼo ʼuhiga mo ia ʼe ko “te tagata puke manulele.” Ko ai te fili ʼaia? Talu mai Te Tule Leʼo (Fakapilitānia) ʼo te ʼaho 1 ʼo Sūnio 1883, ʼe fakahā ai ko Satana te Tēvolo. Ko te fili mālohi ʼaia pea mo kākā ʼaē ʼe ina faigaʼi ke ina kākāʼi pea mo puke te hahaʼi ʼa Sehova ohagē ko te faiga ʼa he tagata puke manulele ke ina puke he manulele.

 2. He koʼē ʼe fakatatau ia Satana ki he tagata puke manulele?

² ʼI te ʼu temi muʼa, neʼe puke te ʼu manulele ʼuhi ko te matalelei ʼo tanatou tagi, mo te matalelei ʼo tonatou ʼu fuluʼi, peʼe moʼo kai pea mo fai he ʼu sākilifisio. Kae ko te ʼu manulele ʼe ko he ʼu manu ʼe nonofo tōkakaga, ʼe faigataʼa tonatou puke. Koia, ko he tagata puke manulele ʼi te temi ʼo te Tohi-Tapu neʼe ina tomuʼa akoako fakalelei ia te ʼu agaaga pea mo te ʼu agamāhani ʼa te ʼu manulele ʼaē neʼe ina fia puke. Koia neʼe ina fakakaukauʼi ai he ʼu faʼahiga fai moʼo puke te ʼu manulele. ʼI te fakatatau ʼa Satana ki he tagata puke manulele, ʼe tokoni mai ʼi te Tohi-Tapu ke tou mahino ki tana ʼu faʼahiga fai. ʼE akoako lelei e te Tēvolo ia tātou takitokotahi. ʼE sio ki tatatou ʼu agamāhani pea mo totatou ʼu agaaga pea ina fakatuʼu he ʼu hele ʼaki tana ʼamanaki ʼaē ke ina puke maʼuli ia tātou. (2 Timoteo 2:26) Kapau ʼe ina puke ia tātou pea ʼe puli ai tatatou felōgoi mo Sehova pea feala ke iku ki totatou fakaʼauha ʼo talu ai. Koia, ke puipui ia tātou, ʼe tonu ke tou ʼiloʼi te ʼu faʼahiga fai kehekehe ʼa “te tagata puke manulele.”

3, 4. Ko te temi fea ʼaē ʼe tatau ai ia te ʼu faʼahiga fai ʼa Satana ki ʼaē ʼa he laione? ki ʼaē ʼa he gata?

³ ʼAki he ʼu palalau fakatātā, ʼe toe fakatatau e te tagata fai pesalemo ia te ʼu faʼahiga fai ʼa Satana ki ʼaē ʼa he laione kei mui peʼe ki ʼaē ʼa he gata. (Pesalemo 91:13) Ohagē ko he laione, ʼi ʼihi temi ʼe ʼohofi fakahagatonu e Satana ia te hahaʼi ʼa Sehova, ʼo ina fakatagaʼi ia nātou peʼe ina fakaʼaogaʼi te ʼu puleʼaga. (Pesalemo 94:20) ʼI te ʼu ʼohofi ʼaia ohagē ko he laione, ʼe feala pē ke ʼi ai niʼihi ʼe natou liʼaki tanatou agatonu. Kae ʼi te agamāhani, ʼaki te ʼu ʼohofi ʼaia, ʼe tupu ai te logotahi ʼa te hahaʼi ʼa te ʼAtua. Kae ʼe feafeaʼi ki te ʼu ʼohofi ʼa Satana ʼaē ʼe kākā age ia, ʼaē ʼe hagē ai ko he gata?

⁴ ʼE fakaʼaogaʼi e te Tēvolo tona poto ʼaē ʼe māʼoluga age ʼi te tagata moʼo ʼohofiʼi fakakākā pea mo matehi, ohagē ko tona fai e te gata kafo kona ʼi he koga meʼa ʼe ū. ʼI te ʼaluʼaga ʼaia, neʼe fua lelei ia tana kākāʼi ia te ʼatamai ʼo ʼihi ʼi te hahaʼi ʼa te ʼAtua, ʼo ina kākāʼi nātou ke natou fai tona finegalo kae mole ko te finegalo ʼo Sehova, ʼo hoko ai kiā nātou he tuʼutāmaki. Meʼa lelei foki, ʼe mole pulipuli kiā tātou ia te ʼu fakatuʼutuʼu ʼa Satana. (2 Kolonito 2:11) Tou vakaʼi ʼi te temi nei te ʼu hele e fā ʼi te ʼu hele fakatupu mate ʼaē ʼe fakaʼaogaʼi e “te tagata puke manulele.”

Te Mataku Ki Te Tagata

 5. He koʼē neʼe fua lelei te hele ʼaē ko “te mataku ki te tagata”?

⁵ ʼE ʼiloʼi e “te tagata puke manulele” te loto ʼaē ʼa te tagata ke tali pea mo leleiʼia ia ia e te hahaʼi. ʼE malave ki te kau Kilisitiano ia te manatu ʼa te hahaʼi ʼo ʼuhiga mo nātou. ʼI tana ʼiloʼi te faʼahi ʼaia, ʼe fia fakaʼaogaʼi e te Tēvolo tanatou fia ʼiloʼi ʼaē pe koteā te manatu ʼa te hahaʼi ʼo ʼuhiga mo nātou. Ohagē lā, neʼe ina puke ʼihi hahaʼi ʼa te ʼAtua ʼaki te hele ʼaē ko “te mataku ki te tagata.” (Tāʼaga Lea 29:25) Kapau, ʼuhi ko te mataku ki te tagata, ʼe fakatahi te ʼu kaugana ʼa te ʼAtua mo he hahaʼi ʼo fai he ʼu meʼa ʼe tapuʼi e Sehova peʼe mole natou fai te meʼa ʼaē ʼe fakatotonu age ʼi te Folafola ʼa te ʼAtua ke natou fai, kua puke nātou ia ʼi te hele ʼa “te tagata puke manulele.”—Esekiele 33:8; Sakopo 4:17.

 6. Koteā te faʼifaʼitaki ʼe hā lelei ai peʼe lava puke feafeaʼi ia he tūpulaga e “te tagata puke manulele”?

⁶ Ohagē lā ko he tūpulaga, ʼe feala ke fakalogo ki tona fakaneke e tona ʼu kaumeʼa ako pea suluka leva.  Lagi neʼe mole ina fakakaukauʼi ʼi te ʼaho ʼaia, ʼi tana ʼalu ki te faleako, ʼe suluka anai. Kae ki muli age, ʼe ina fai te aga ʼe fakatupu kovi ki tona maʼuli pea ʼe fehiʼa kiai te ʼAtua. (2 Kolonito 7:1) He koʼē neʼe fakahalaʼi ia ia? Lagi neʼe kovi tana ʼu fakakaugā pea neʼe mataku naʼa mole kei natou tali ia ia. Kau tūpulaga, ʼaua naʼa kotou tuku ke kākāʼi koutou e “te tagata puke manulele” pea mo ina puke koutou! Ke mole puke maʼuli ia koutou, ʼaua naʼa kotou tōtō ʼi te ʼu faʼahi ʼaē ʼe liliki. Kotou mulimuli ki te fakatokaga ʼi te Tohi-Tapu ke tou tekeʼi ia te ʼu fakakaugā kovi.—1 Kolonito 15:33.

 7. ʼE feafeaʼi ʼapē ʼo he taki e Satana ʼihi mātuʼa ke mole kei natou fakapotopoto ʼi te faʼahi fakalaumālie?

⁷ Ko te ʼu mātuʼa Kilisitiano ʼaē ʼe natou fakalogo ki tonatou leʼo ʼo loto, ʼe natou fakahoko fakalelei tonatou maʼua ʼaē ʼe tuʼu ʼi te Tohi-Tapu, ʼaē ko te foaki ʼo te ʼu meʼa ʼaē ʼe ʼaoga ki tonatou fāmili ʼi te faʼahi fakasino. (1 Timoteo 5:8) Kae ko te fakatuʼutuʼu ʼa Satana, ke mole fakapotopoto ia te kau Kilisitiano ʼi te faʼahi ʼaia. Lagi kua natou māhani ʼi te tō fono heʼe natou mulimuli ki te fakaneke ʼo tanatou pātolō ke natou gāue hola fakalaka. ʼE lagi natou mātataku ʼi te kole ʼo he ʼaho mālōlō ke natou kau ki te polokalama kātoa ʼo te fakatahi faka tisitilike, moʼo tauhi fakatahi kiā Sehova mo tonatou ʼu tehina. Moʼo puipui tātou mai te hele ʼaia, ʼe tonu ke tou “falala kiā Sehova.” (Tāʼaga Lea 3:5, 6) ʼO hilifaki kiai, ko tatatou manatuʼi ʼaē ʼe tou kau fuli ki te fāmili ʼo Sehova pea ʼe ko tona maʼua ʼaē ke tokaga kiā tātou, ʼe tokoni mai anai ke tou fakapotopoto. ʼU mātuʼa, ʼe kotou falala koa ʼe tokaga anai ia Sehova kiā koutou pea mo tokotou fāmili, mokā kotou fai tona finegalo? Peʼe puke maʼuli anai koa koutou e te Tēvolo pea mo kotou fai ai tona finegalo heʼe kotou mātataku ki te tagata? ʼE matou fakaloto mālohiʼi koutou ke kotou fakakaukauʼi ki te ʼu fehuʼi ʼaia ʼi te faikole.

Te Hele ʼAē Ko Te Fia Maʼu Fakavale Ia He ʼu Koloa

 8. ʼE fakaʼaogaʼi feafeaʼi e Satana te hele ʼaē ko te fia maʼu fakavale ia he ʼu koloa?

⁸ ʼE toe fakaʼaogaʼi e Satana te hele ʼaē ko te fia maʼu fakavale ia he ʼu koloa moʼo puke tātou. ʼI te agamāhani, ko te tuʼu fai fakatau ʼo te mālamanei ʼe ina uga ia te ʼu fakatuʼutuʼu ke maʼu fakavilivili ia he ʼu koloa, pea ʼe feala ke hē ai ʼihi ʼi te hahaʼi ʼa te ʼAtua. ʼI ʼihi temi, ʼe feala ke ʼui fēnei e he tahi: “Gāue kinakina! Kā kua ke maʼu lahi hau paʼaga, pea kua feala hau mālōlō pea mo ke fakafiafia ki te maʼuli. ʼE feala ai foki ke ke pioniē.” Ko te ʼu palalau ʼaia ʼe lagi ko he fakakaukau ʼa ʼihi, pea ʼe mole fakapotopoto, ʼe natou fia fakaʼaogaʼi tonatou ʼu tehina ʼi te kōkelekāsio moʼo maʼu paʼaga. Kotou fakakaukauʼi fakalelei ki te fakaneke ʼaia. ʼE mole hagē koa lā ko te manatu ʼo te tagata maʼu koloa “vale” ʼo te lea fakatātā ʼa Sesu?—Luka 12:16-21.

 9. He koʼē neʼe puke ʼihi Kilisitiano ʼi te hele ʼaē ko te holi ki he ʼu meʼa?

⁹ ʼE gāue ia Satana ki tana tuʼu agakovi ke fakaneke ai te hahaʼi ke natou holi ki he ʼu meʼa. Ko te holi ʼaia ʼe feala ki muli age ke hū ki te maʼuli ʼa he Kilisitiano, ʼo ina taʼotaʼo te folafola pea mo ina fakaliliu ʼo “mole fua.” (Maleko 4:19) ʼE fakaloto mālohiʼi tātou ʼi te Tohi-Tapu ke tou faka feʼauga ki te meʼa kai pea mo te ʼu mutuʼi meʼa ʼaē kua tou maʼu. (1 Timoteo 6:8) Kae tokolahi neʼe puke ia nātou ʼi te hele ʼa “te tagata puke manulele” he neʼe mole natou maʼuliʼi te tokoni ʼaia. ʼE natou fialahi koa ke tupu ai hanatou manatu ʼe tonu ke natou maʼu he faʼahiga maʼuli fīmālie? ʼE feafeaʼi ia tātou takitokotahi? Ko tatatou holi ʼaē ke tou fia maʼu meʼa, ʼe ina ʼeke koa ia tātou ke mole kei tou fakamuʼamuʼa ai ia te ʼu gāue ʼo te tauhi moʼoni? (Osea 1:2-8) Meʼa fakaʼofaʼofa, heʼe ʼi te ʼu temi ʼaē neʼe faigataʼa ai ʼi te faʼahi faka ekonomika, ko ʼihi neʼe natou tuku te ʼu gāue fakalaumālie, kae natou taupau he faʼahiga maʼuli neʼe kua natou māhani leva kiai. Ko te fia maʼu fakavale ʼo he ʼu koloa ʼe fiafia ai “te tagata puke manulele”!

Te Hele ʼAē ʼo Te ʼu Fakafiafia Kovi

10. Ko te sivisivi fea ʼaē ʼe tonu ke fai e te kau Kilisitiano takitokotahi?

¹⁰ Ko te tahi faʼahiga fai ʼo “te tagata puke manulele” ʼe ko te pulihi ʼi te hahaʼi ia te ʼiloʼi ʼo te meʼa ʼaē ʼe lelei pea mo te meʼa ʼaē ʼe kovi. Kua lahi te ʼu fakafiafia kua maʼu ai ia te faʼahiga manatu ʼaē neʼe maʼu ʼi Sotoma pea mo Komola. Māʼiapē lā mo te ʼu logo ʼaē ʼi te televisio pea mo te ʼu sulunale ʼe fakahā lelei ai te agamālohi pea mo lahi ai te fakahā ʼo te ʼu felāveʼi fakasino. ʼE lahi te ʼu meʼa ʼaē ʼe hā ohagē ko he fakafiafia ʼi te televisio peʼe ko te ʼu sulunale, ʼe natou faka pōʼuliʼi ai ia te fealagia ʼa te hahaʼi ke natou “ ʼiloʼi te meʼa ʼaē ʼe lelei pea mo te meʼa ʼaē ʼe kovi.” (Hepeleo 5:14) Kae kotou manatuʼi te ʼu palalau ʼaē neʼe fai e Sehova ʼaki te polofetā ko Isaia: “Malaʼia kiā nātou ʼaē ʼe natou ʼui ko te meʼa ʼaē ʼe lelei ʼe kovi pea ko te meʼa ʼaē ʼe kovi ʼe lelei.” (Isaia 5:20) Kua ʼulihi māmālie koa e “te tagata puke manulele” ia takotou fakakaukau ʼaki te ʼu taʼi fakafiafia kovi  ʼaia? ʼE maʼuhiga ke kita sivisivi ia kita totonu.—2 Kolonito 13:5.

11. Ko te fakatokaga fea neʼe fai ʼi te nusipepa ʼaenī ʼo ʼuhiga mo te sioʼi ʼo te ʼu feuilletons ʼi te televisio?

¹¹ Iā teitei taʼu e 25 ki muʼa atu, neʼe fai te fakatokaga ʼofa ʼi Te Tule Leʼo, ki te kau ʼatolasio moʼoni ʼa te ʼAtua ʼo ʼuhiga mo te sioʼi ʼo te ʼu feuilletons (te ʼu kiʼi ʼata faka kogakoga) ʼi te televisio. a Ko te ʼu palalau ʼaenī neʼe fai ʼo ʼuhiga mo te fakahū fakakākā ʼo malave māmālie te ʼu kiʼi ʼata ʼaia ki te hahaʼi: “Ko te kumi ʼo te ʼofa ʼe ko te takuʼaki ʼaia moʼo fai ʼo te ʼu aga fuli pē. Ohagē lā, ʼi te ʼata, ko he taʼahine kua faitama kae mole heʼeki ʼohoana, ʼe ina ʼui fēnei ki tona kaufafine: ‘Kae ʼe au manako iā Victor. ʼE mole au tuʼania au. . . . ʼE maʼuhiga age kiā au taku fua ia tana tamasiʼi!’ Pea fakatagi leva he musika ʼe mālie tona fasi, ʼo faigataʼa ai te manatu neʼe kovi te aga ʼaē neʼe ina fai. Pea tahi ʼaē faʼahi, ʼe kotou leleiʼia ia Victor. ʼE kotou toe leleiʼia mo te taʼahine ʼaia. ʼE kotou ‘loto mahino.’ Ko te fafine neʼe sio ki te ʼu kiʼi ʼata ʼaia pea neʼe fetogi ki muli age tana aga ʼaia, neʼe ina ʼui fēnei: ‘ ʼE kotou punamaʼuli ki takotou haga ʼaē ʼo meʼa noaʼi te aga ʼaē ʼe kovi neʼe fai. ʼE tou ʼiloʼi ʼe kovi ia te aga heʼeʼaoga. . . . Kae neʼe au mahino ki muli age ʼi taku fakakaukau neʼe kua au tali te aga ʼaia.’ ”

12. Koteā ʼaē ʼe hā ai ia te tō tonu ʼo te ʼu fakatokaga ʼo ʼuhiga mo te ʼu faʼahiga ʼata ʼaē ʼi te televisio?

¹² Talu mai te tā ʼo te ʼu ʼalatike ʼaia, kua lahi age te fai ʼo te ʼu kiʼi faʼahiga ʼata ʼaia ʼaē ʼe natou ʼulihi te loto ʼo te hahaʼi. ʼE lahi te ʼu koga meʼa, ʼe hā te ʼu kiʼi ʼata fēia ʼi te ʼaho kātoa. Ko te hahaʼi tagata, mo fafine, pea mo tokolahi ʼi te kau tūpulaga ʼe natou fafaga tuʼumaʼu tanatou fakakaukau pea mo tonatou loto ʼaki te ʼu taʼi fakafiafia ʼaia. Kae ʼe mole tonu ke tou kākāʼi ia tātou totonu ʼaki he ʼu manatu ʼe hala. ʼE kovi hatatou manatu ko te ʼu meʼa ʼaē ʼe tou sio kiai ʼi te ʼu kiʼi ʼata ʼaia ʼe ko te ʼu meʼa pē ʼaē ʼe hoko moʼoni ʼi te mālamanei. ʼE feala moʼoni koa ke maʼu e he Kilisitiano he takuʼaki ki tana filifili ʼaē ke fakafiafia mo he ʼu faʼahiga hahaʼi ʼe mole manatu pē lā ʼi he temi ke ina fakaafe ia nātou ʼaia ki tona ʼapi?

13, 14. Neʼe fakahā feafeaʼi e ʼihi ia te ʼu fua lelei ʼo te ʼu fakatokaga ʼaē ʼo ʼuhiga mo te televisio?

¹³ Neʼe fua lelei ki te tokolahi tanatou mulimuli ki te fakatokaga ʼaia neʼe foaki e “te tagata kaugana agatonu mo poto.” (Mateo 24:45-47) ʼI tanatou ʼosi lau te tokoni fakahagatonu ʼaia ʼaē ʼe fakatafito ki te Tohi-Tapu, neʼe faitohi ʼihi mo tala te malave ʼaē kiā nātou ia te ʼu ʼalatike ʼaia. b Neʼe ʼui fēnei e te fafine: “Iā taʼu e 13 neʼe mole au hala ʼi he feuilleton ʼi te televisio. Maʼa ʼaku, neʼe au mālohi pē au ʼi taku ʼalu ki te ʼu fono faka Kilisitiano pea mo taku ʼalu ʼi ʼihi temi ki te fai faka mafola. Kae neʼe kua au maʼu te manatu ʼa te ʼu kiʼi ʼata ʼaia ʼo te mālamanei, ʼaē kapau ʼe gaohi koviʼi koe e tou ʼohoana peʼe ke logoʼi ʼe mole ʼofainaʼi koe, ʼe feala ke ke tono—heʼe ko tana hala. Pea ʼi taku manatu ʼaē neʼe au ‘lakatonu’, neʼe au fai leva te aga ʼaē ʼe kovi, pea neʼe au agahala ai kiā Sehova pea mo toku ʼohoana.” Neʼe fakamavae ia te fafine ʼaia. Ki muli age, neʼe mahino leva ki te kovi ʼo tana agahala, neʼe fakahemala, pea neʼe toe fakahū ki te kōkelekāsio. ʼAki te ʼu ʼalatike ʼaē neʼe fai ai te fakatokaga ʼo ʼuhiga mo te ʼu feuilletons ʼi te televisio, neʼe ina maʼu ai te mālohi ke ʼaua naʼa fakafiafia mo te ʼu meʼa ʼaē ʼe fehiʼa kiai ia Sehova.—Amosi 5:14, 15.

¹⁴ Ko te tahi tuagaʼane neʼe malave kiā ia te ʼu kiʼi ʼata ʼaia, neʼe ina ʼui fēnei: “Neʼe au tagi ʼi taku lau te ʼu ʼalatike, he neʼe au mahino ai neʼe mole kei kātoa toku loto kiā Sehova. Neʼe au fakapapau ki toku ʼAtua ʼe mole au toe kaugana anai ki te ʼu kiʼi ʼata ʼaia.” Ko te tahi tuagaʼane, ʼi tana ʼosi fakamālo ʼo ʼuhiga mo te ʼu ʼalatike ʼaia, neʼe ina fakahā fakahagatonu tana mulimuli tuʼumaʼu ki te ʼu kiʼi ʼata ʼaia pea neʼe ina tohi fēnei: “Neʼe au feʼekeʼaki . . . pe neʼe mole fua kovi koa te faʼahi ʼaia ki taku ʼu felōgoi mo Sehova. Pe neʼe lava feafeaʼi haku kaumeʼa mo ‘nātou ʼaia’ pea mo au toe kaumeʼa mo Sehova?” Kapau, iā taʼu e 25 ki muʼa atu, ko te ʼu kiʼi ʼata ʼaia ʼi te televisio neʼe natou ʼulihi ia te loto, ʼe feafeaʼi age lā iā ʼaho nei? (2 Timoteo 3:13) ʼE tonu ke tou tōkakaga ki te ʼu  agaaga kehekehe ʼo te ʼu fakafiafia ʼaē ʼe kovi ʼaē ko te hele ʼe fakaʼaogaʼi e Satana, ohagē ko te ʼu feuilletons ʼi te televisio, peʼe ko te ʼu gaoʼi viteo agamālohi, peʼe ko te ʼu fakahāhāʼaga musika heʼeʼaoga.

Te Hele ʼAē Ko Te ʼu Fetokakoviʼaki

15. Kua puke maʼuli feafeaʼi ʼihi e te Tēvolo?

¹⁵ ʼE fakaʼaogaʼi e Satana te ʼu fetokakoviʼaki ohagē ko he hele moʼo fakamavetevete ai te hahaʼi ʼa Sehova. ʼE feala ke tou tō ki te hele ʼaia tatau aipē pe koteā te ʼu pilivilēsio ʼaē ʼe tou maʼu. Ko ʼihi kua puke maʼuli ia nātou e te Tēvolo, koteʼuhi neʼe natou tuku te ʼu fetokakoviʼaki ke fua kovi ki te tokalelei pea mo te logotahi pea mo te tuputupu fakalaumālie ʼaē neʼe fakahoko e Sehova.—Pesalemo 133:1-3.

16. ʼE faiga māmālie feafeaʼi e Satana ke ina maumauʼi tatatou logotahi?

¹⁶ ʼI te ʼUluaki Tau Faka Mālamanei, neʼe faiga e Satana ke ina maumauʼi ia te koga ʼo te kautahi ʼa Sehova ʼi te kele, ʼaki te fakataga, kae neʼe mole hona fua. (Fakahā 11:7-13) Talu mai ai, neʼe gāue fakakākā moʼo maumauʼi tatatou logotahi. Kā tou tuku hatatou ʼu fetokakoviʼaki ke tupu ai he mavetevete, ʼe tou foaki ai ki “te tagata puke manulele” he faigamālie. ʼE feala ai ke tou tāʼofi ke ʼaua naʼa malave ia te laumālie māʼoniʼoni ki totatou maʼuli pea mo te kōkelekāsio. Kapau ʼe hoko te faʼahi ʼaia, ʼe fiafia anai ia Satana heʼe ko te pulihi ʼo te tokalelei pea mo te logotahi ʼo te kōkelekāsio ʼe fua kovi ki te gāue fai faka mafola.—Efesi 4:27, 30-32.

17. Koteā ʼaē ʼe feala ke fai e nātou ʼaē ʼe fetokakoviʼaki, ke feala hanatou fakatokatoka?

¹⁷ Koteā ʼaē ʼe feala ke kotou fai mokā kotou fetokakoviʼaki mo he Kilisitiano? ʼE moʼoni, ʼe mole tatau ia te ʼu ʼaluʼaga fuli. Kae, logolā te lahi ʼo te ʼu tupuʼaga ʼaē ʼe feala ke hoko ai he ʼu fihifihia, kae ʼe mole he tupuʼaga ke tuku fēia he ʼu fetokakoviʼaki, ʼo mole fakatokatoka. (Mateo 5:23, 24; 18:15-17) Ko te tokoni ʼi te Folafola ʼa te ʼAtua ʼe kātoa. Kā maʼuliʼi te ʼu pelesepeto ʼi te Tohi-Tapu, pea ʼe fua lelei tuʼumaʼu pē!

18. He koʼē ʼe tou fakatokatoka anai tatatou ʼu fetokakoviʼaki mo kapau ʼe tou faʼifaʼitakiʼi ia Sehova?

¹⁸ Ko Sehova ʼe “fakamolemole gafua,” pea ʼe ina “fakamolemole moʼoni.” (Pesalemo 86:5; 130:4) ʼE tou fakahā ko tātou ko te ʼu fānau ʼofaina ʼa Sehova mokā tou faʼifaʼitaki kiā te ia. (Efesi 5:1) Ko tātou fuli ʼe tou agahala pea ʼe ʼaoga ʼaupitō ke fakamolemole mai ia Sehova. Koia, ʼe tonu ke tou tōkakaga mo kapau ʼe mole tou fia fakamolemole. ʼE tou liliu anai ohagē ko te tagata kaugana ʼi te lea fakatātā ʼa Sesu, ʼaē neʼe mole ina fia molehi ki tona kaumeʼa kaugana ia te kiʼi koga neʼe veliveli age ʼi tona maʼua ʼaē neʼe kua molehi age e tona pule. ʼI te ʼiloʼi e te pule te faʼahi ʼaia, neʼe ina lī te tagata kaugana ʼaia neʼe mole fia fakamolemole ki te fale pilisoni. Neʼe fakaʼosi fēnei e Sesu ia te lea fakatātā: “Koia ʼe toe fai fēia pē anai kiā koutou e taku Tamai ʼaē ʼe ʼi selō, mo kapau ʼe mole kotou tahi fakamolemole ʼaki tokotou loto kātoa, ki tona tehina.” (Mateo 18:21-35) Ko hatatou metitāsioʼi ia te lea fakatātā ʼaia pea mo fakakaukauʼi te tuʼa lahi ʼaē ʼo te fakamolemole mai e Sehova, ʼe tokoni moʼoni mai anai mokā tou faiga ke tou fakatokatoka tatatou ʼu fetokakoviʼaki mo totatou ʼu tehina!—Pesalemo 19:14.

ʼE Haofaki Ia Tātou ʼi “Te Potu Fakalilo ʼa Te Māʼoluga”

19, 20. ʼE tonu ke feafeaʼi kiā tātou ia te “potu fakalilo” pea mo te “malumalu” ʼa Sehova ʼi te ʼu temi tuʼutāmakiʼia ʼaenī?

¹⁹ ʼE tou māʼuʼuli ʼi he ʼu temi tuʼutāmakiʼia. ʼE mahino ia, kua fakaʼauha nei ia tātou fuli e Satana mo kanapau lā neʼe mole tou maʼu ia te puipui ʼofa ʼa Sehova. Koia, ke mole puke tātou e “te tagata puke manulele,” ʼe tonu ke tou nonofo ʼi te potu fakatātā ʼaē ʼe tou maʼu ai te puipui, ke tou ‘nonofo ʼi te potu fakalilo ʼa te Māʼoluga,’ ʼo tou ‘nonofo ai ʼi te malumalu ʼa te Māfimāfi.’—Pesalemo 91:1.

²⁰ Ke tou faka ʼuhiga tuʼumaʼu ia te ʼu fakamanatu pea mo te takitaki ʼa Sehova ohagē ko he puipuiʼaga, kae mole hagē ʼe fefeka fau. ʼE tou tauʼi fuli ia te fili ʼaē ʼe ina maʼu te poto ʼe laka age ʼi te tagata. Kapau ʼe mole ʼi ai te tokoni ʼofa ʼa Sehova, pea ʼe mole hao anai he tahi mai te hele. (Pesalemo 124:7, 8) Tou faikole ke fakahao tātou e Sehova mai te ʼu hele ʼa “te tagata puke manulele”!—Mateo 6:13.

[Kiʼi nota]

ʼE Kei Kotou Manatuʼi Koa?

• He koʼē ko te “mataku ki te tagata” ʼe ko he hele ʼe fakatupu mate?

• ʼE fakaʼaogaʼi feafeaʼi e te Tēvolo ia te hele ʼaē ko te fia maʼu fakavale ia he ʼu koloa?

• ʼE puke feafeaʼi e Satana ia ʼihi ʼaki te hele ʼaē ʼo te ʼu fakafiafia kovi?

• Koteā te hele ʼe fakaʼaogaʼi e te Tēvolo moʼo maumauʼi tatatou logotahi?

[Fehuʼi]