ʼE Maʼuli Te Folafola ʼa Sehova

Ko He ʼu Puani ʼAoga ʼo Te Tohi ʼa Soele Pea Mo Amosi

KO TE meʼa pē ʼe ina fakahā ʼo ʼuhiga mo ia, ʼe ko ia ko “Soele te foha ʼo Petuele.” (Soele 1:1) ʼI te tohi ʼaē neʼe fakatoʼo kiai tona higoa, neʼe lahi age pē te palalau ʼa Soele ki te logo ʼaē neʼe ina faka mafola ʼi ʼihi atu ʼu logo, māʼia mo te temi ʼo tana fai fakakikite ʼe feala pē ke fakafuafua ki te taʼu 820 ʼi muʼa ʼo totatou temi, ʼo hili kiai taʼu e hiva, ʼo te nofo hau ʼa Usia ʼi Suta. He koʼē neʼe mole fia palalau ia Soele ʼo ʼuhiga mo ia totonu? Ko tona tupuʼaga tāfito he neʼe ina fia faka maʼuhigaʼi ia te logo ʼaē neʼe ina tala kae neʼe mole ko ia totonu ʼaē neʼe ina fia faka maʼuhigaʼi.

Koia ʼi te temi ʼo Usia, ko Amosi mai Suta pea neʼe ko “he tagata tauhi ovi pea mo he tagata huki fiku sekomole” neʼe fakanofo ke liliu ko he polofetā. (Amosi 7:14) Ko Soele neʼe gāue faka polofetā ia ʼi Suta, kae ko Amosi neʼe fekauʼi ia ki te ʼu telepī e hogofulu ʼo te puleʼaga ʼo Iselaele ʼo te potu noleto. Neʼe fakaʼosi e Amosi ia tana tohi ʼi te taʼu 804 ʼi muʼa ʼo totatou temi ʼi te hili pē ʼo tana toe liliu ki Suta, neʼe tohi ia tana tohi ʼaki he lea ʼe faigafua pea mo lahi ai mo te ʼu lea fakatā.

“MEʼA LĀ KE FEAFEAʼI KI TE ʼAHO ʼAIA”—KOTEĀ TONA TUPUʼAGA?

(Soele 1:1–3:21)

Neʼe sio ia Soele ki te hūfi ʼo te kolo e te ʼunufe, te heʼe pea mo te ʼelelū. ʼE faka ʼuhiga te ʼu kiʼi manu ʼaia ki “he hahaʼi kaugamālie pea mo mālolohi” pea ki “he ʼu tagata mālolohi.” (Soele 1:4; 2:2-7) Neʼe ʼui fēnei e Soele: “Meʼa lā ke feafeaʼi ki te ʼaho ʼaia, he kua ovi mai te ʼaho ʼo Sehova, pea ʼe hoko mai anai ia ohagē ko he fakaʼauha mai te Māfimāfi!” (Soele 1:15) Neʼe fakatotonu fēnei e Sehova ki te hahaʼi ʼo Sione: “Kotou liliu mai kiā te au mo tokotou loto kātoa.” Kapau ʼe natou fai ia te faʼahi ʼaia, ko Sehova “ ʼe ʼofa anai ki tana hahaʼi” pea ʼe ina kapu anai ki te “potu noleto” ia te hūfi ʼa te ʼu kiʼi manu. Kae ʼi muʼa ʼo te hoko mai ʼo te ʼaho lahi ʼo Sehova, ʼe ina “folahi . . . anai [tona] laumālie ki te kakano fuapē” pea ʼe ina “foaki anai he ʼu fakamelomelo ʼi te lagi pea mo te kele.”—Soele 2:12, 18-20, 28-31.

Neʼe fakaafe ia te tokolahi ke ʼomai ki te tau: “Kotou tuki ʼakotou huo tā kele ko he ʼu heletā pea mo ʼakotou pipi tuʼusi fulumeto ko he ʼu tao” pea mo kotou teuteu ki te tau. Neʼe fakatotonu age kiā nātou ke natou “hake ki te malaʼe mālalo ʼa Sosafate,” ʼaē ʼe fakamāuʼi pea mo fakaʼauha ai anai nātou. “Kae ki Suta, ʼe nofoʼi anai ʼo kaku ki he ʼu temi ʼe mole ʼiloʼi hona gataʼaga.”—Soele 3:10, 12, 20.

Te ʼu Tali Ki Te ʼu Fehuʼi Faka Tohi-Tapu:

1:15; 2:1, 11, 31; 3:14—ʼE feafeaʼi ia “te ʼaho ʼo Sehova”? Ko te ʼaho ʼo Sehova ʼe ko te temi ʼaē ʼe fakahoko ai e Sehova ia tana fakamāu ki tona ʼu fili, ko tona faka ʼuhiga ʼe ina fakaʼauha ia nātou ʼaia kae ʼe ina haofaki ia tana kau ʼatolasio moʼoni. Ohagē lā ko te ʼaho ʼaē neʼe tō ai ia te Papiloni ʼāfea ʼi te taʼu 539 ʼi muʼa ʼo totatou temi, ʼi tonatou fakaʼauha e te kau Metia mo te kau Pelesia. (Isaia 13:1, 6) Ko te tahi “ ʼaho ʼo Sehova” kua ovi mai, ʼe ko te temi ʼaē kā ina fakahoko ai anai ia  tana tautea kiā “Papiloni Lahi”—te kautahi faka mālamanei ʼo te ʼu lotu hala.—Fakahā 18:1-4, 21.

2:1-10, 28—Neʼe hoko feafeaʼi ia te lea faka polofetā ʼo ʼuhiga mo te hūfi e te ʼu kiʼi manu? ʼE mole talanoa ʼi te Tohi-Tapu ki he hūfi ʼo te fenua ʼo Kanaane e he ʼu kiʼi manu ohagē ko tona fakamatala ʼi te tohi ʼa Soele. Koia ko te ʼohofi ʼaē neʼe fakamatala e Soele ʼe ko te fakamelomelo ʼo te temi ʼo te taʼu 33 ʼo totatou temi, ʼaē neʼe kamata foaki ifo ai e Sehova ia tona laumālie ki te ʼu tisipulo ʼa Kilisito pea mo natou kamata faka mafola ai ia te logo neʼe lave kovi ia ki te kau takitaki lotu. (Gāue 2:1, 10-21; 5:27-33) ʼE ko he pilivilēsio ia tatatou lagolago ki te gāue ʼaia ʼi te temi nei.

2:32—Koteā ia te faka ʼuhiga ʼo te “fetapa ki te huafa ʼo Sehova”? Ko te fetapa ki te huafa ʼo te ʼAtua ko tona faka ʼuhiga ko te mahino ki tona huafa, mo fakaʼapaʼapa ʼaupitō kiai, pea mo falala kiā ia ʼaē ʼe ina fua te huafa ʼaia.—Loma 10:13, 14.

3:14—Koteā ia “te malaʼe mālalo ʼo te tonu”? ʼE ko he koga meʼa fakatātā ʼo te fakahoko ʼo te fakamāu ʼa te ʼAtua. ʼI te temi ʼo te Hau Sutea ko Sosafate, ʼaē ko te faka ʼuhiga ʼo tona higoa “Ko Sehova ʼe Ko Te Tuʼi Fakamāu,” neʼe haofaki e te ʼAtua ia Suta mai te ʼu puleʼaga ʼo te ʼu tafaʼaki ʼo ina fakahēʼi tanatou ʼu kautau mālohi. Koia, neʼe higoaʼi ai foki ia te koga meʼa ʼaia ko “te malaʼe mālalo ʼa Sosafate.” (Soele 3:2, 12) ʼI totatou temi, ʼe faka ʼuhiga ki he koga meʼa fakatā ʼe lomi ai anai te ʼu puleʼaga ohagē ko he vite ʼi he meʼa lomi vite.—Fakahā 19:15.

Te ʼu Puani ʼe Tou Lava Tāʼofi:

1:13, 14. Ko te fakahemala moʼoni pea mo te loto fakafetaʼi kiā Sehova te ʼAtua moʼoni ʼe ko he ʼu faʼahi maʼuhiga ki te haofaki.

2:12, 13. Ko te fakahemala moʼoni ʼe tonu ke fai fakamālotoloto. ʼE tonu ke hagē ko he ‘hae ʼo totatou loto’ ʼi te ʼu faʼahi loloto ʼo tātou, kae mole ‘ko he hae ʼo he ʼu mutuʼi meʼa’ ʼo he faʼahi ʼo tuʼa.

2:28-32. ʼE gata pē “ko ʼaē ʼe fetapa ki te huafa ʼo Sehova ʼe hao anai ia” ʼi “te ʼaho lahi mo fakamanavahē ʼo Sehova.” ʼE tou fakafetaʼi kiā Sehova ʼi tana foaki mai tona laumālie ki te kakano fuapē, tūpulaga peʼe matuʼa, tagata peʼe fafine, ke natou lagolago ki te gāue faka polofetā, ko tona faka ʼuhiga, ke tou tala “te ʼu gāue taulekaleka ʼa te ʼAtua”! (Gāue 2:11) ʼI te kua ovi mai ʼo te ʼaho ʼo Sehova, ʼe mole koa lā tonu ke tou mahu ʼi “te aga fakamāʼoniʼoni pea mo te ʼu gāue ʼaē ʼe fakaʼiloga ʼaki [tatatou] pipiki ki te ʼAtua”?—2 Petelo 3:10-12.

3:4-8, 19. Neʼe fakakikite e Soele ʼo ʼuhiga mo te ʼu puleʼaga ʼo te ʼu tafaʼaki ʼo Suta ʼe tauteaʼi anai nātou ʼuhi ko tanatou gaohi koviʼi ia te hahaʼi ʼaē neʼe filifili e te ʼAtua. Neʼe hoko moʼoni ia te lea faka polofetā ʼaia, neʼe tauʼi ia te kolo ʼo Tile e te Hau ʼo Papiloni ʼaē ko Nepukanesa. Ki muli age, ʼi te temi ʼaē neʼe tō ai ia te kolo ʼaia ʼaē ʼe tuʼu ʼi te motu iā Alexandre le Grand, ko te toko lauʼi afe ʼo te kau tagata tau pea mo te hahaʼi maʼuhiga neʼe mamate pea ko te toko 30 000 ʼo te hahaʼi neʼe fakatau ke liliu ko he ʼu kaugana. Ko te gaohi koviʼi ʼo te kau Filisitini neʼe fakahoko tatau e Alexandre pea mo nātou ʼaē neʼe hoa mai ki ai. ʼI te fā sēkulō ʼi muʼa ʼo totatou temi, neʼe tuʼu lāvaki ia Etome. (Malakia 1:3) Ko te fakahoko ʼo te ʼu lea faka polofetā ʼe ina fakaloto mālohiʼi ai ia tatatou tui kiā Sehova ʼaē ʼe ina Fakahoko ia tana ʼu fakapapau. ʼE natou fakahā foki ʼe tauteaʼi anai e Sehova ia te ʼu puleʼaga ʼaē ʼe natou fakatagaʼi ia tana kau ʼatolasio ʼi te temi nei.

3:16-21. “ ʼE mahino papau ia, ko te lagi mo te kele ʼe galulu anai,” pea ʼe hoko anai ia te ʼu fakamāu fakamataku ʼa Sehova ki te ʼu puleʼaga. “Kae ko Sehova ʼe ko he holaʼaga anai ʼo tana hahaʼi,” ʼo natou maʼu ai ia he maʼuli ʼi he ʼaluʼaga faka palatiso. ʼE mole koa lā tonu ke tou lotomālohi ke tou pipiki maʼu kiā te ia ʼuhi heʼe kua ovi mai ia tona ʼaho fakamāu ki te mālama agakovi ʼaenī?

“TEUTEU KE KE FELĀVEʼI MO TOU ʼATUA”

(Amosi 1:1–9:15)

Neʼe maʼu e Amosi ia te logo ʼo ʼuhiga mo te ʼu fili ʼo te ʼu puleʼaga ʼo te ʼu tafaʼaki ʼo Iselaele pea mo Suta pea mo Iselaele. ʼE fakaʼauha anai ia Silia, mo Filisitini, mo Tile, mo Etome pea mo Moape ʼuhi ko tanatou gaohi koviʼi ia te hahaʼi ʼa te ʼAtua. Pea ʼe fakaʼauha anai mo te hahaʼi ʼo Suta “koteʼuhi neʼe natou lītuʼa ki te lao ʼa Sehova.” (Amosi 2:4) ʼE feafeaʼi ki te ʼu telepī e hogofulu ʼo Iselaele? ʼI tana ʼu agahala, ʼe kau kiai ia te gaohi koviʼi ʼo te hahaʼi māsisiva, mo te ʼu aga heʼeʼaoga, pea mo te mole fakaʼapaʼapa ki te ʼu polofetā ʼa te ʼAtua. Neʼe fakatokaga e Amosi ko Sehova ʼe ina “faka huʼi maʼua anai te ʼu ʼaletale ʼo Petele” pea ‘ ʼe ina  maumauʼi anai ia te ʼapi ʼo te temi momoko ʼo toe fēia ki te ʼapi ʼo te fasigā taʼu mātala.’—Amosi 3:14, 15.

Logolā neʼe kua lahi ia te ʼu tautea ʼaē neʼe kua hoko, kae neʼe hoko atu pē ia te talagataʼa ʼa te kau Iselaele tauhi taulāʼatua. Neʼe ʼui fēnei e Amosi: “Teuteu ke ke felāveʼi mo tou ʼAtua.” (Amosi 4:12) ʼE faka ʼuhiga ia te ʼaho ʼo Sehova maʼa te kau Iselaele ko tonatou “ ʼave pōpula ki tuʼa atu ʼo Tamaso,” ki Asilia. (Amosi 5:27) Neʼe felāveʼi ia Amosi mo te fakafeagai ʼa te pelepitelō ʼo Petele, kae neʼe mole mataku. Neʼe ʼui fēnei e Sehova kiā Amosi: “Kua hoko mai ia te fakaʼosi ki taku hahaʼi Iselaele. ʼE mole hoko atu anai ia taku fakamolemole kiā nātou.” (Amosi 8:2) ʼE mole he Seole peʼe ko he moʼuga māʼoluga ʼe feala ke ina haofaki ia nātou mai te ʼu fakamāu ʼa te ʼAtua. (Amosi 9:2, 3) Kae, neʼe ina fakapapauʼi ʼe ina toe fakatuʼu anai. Neʼe ʼui fēnei e Sehova: “ ʼE au toe ʼaumai anai ia te kau pōpula ʼo taku hahaʼi Iselaele, pea ʼe natou toe fakatuʼu anai te ʼu kolo ʼaē kua maumau pea mo natou toe nofoʼi anai, ʼe natou tō anai he ʼu vite pea mo natou ʼinu anai te vino, ʼe natou fai anai he ʼu ʼōloto pea mo natou kai anai ki tona ʼu fua.”—Amosi 9:14.

Te ʼu Tali Ki Te ʼu Fehuʼi Faka Tohi-Tapu:

4:1—Ko ai ʼaē ʼe fakatātā e te “ ʼu pipi ʼo Pasani”? Ko te fuga moʼuga tokalelei ʼo Pasani, te koga meʼa ʼe tuʼu ʼi te potu ʼesitē ʼo te Tai ʼo Kalilea, neʼe logona ʼi te ʼu faga manu lelei, ʼo kau ai te ʼu pipi. Ko te mahu ʼo te meʼa kai lelei ʼi te koga meʼa ʼaia neʼe kau ia ki te lelei ʼo te ʼu faga manu. Neʼe fakatatau e Amosi ia te ʼu pipi ʼo Pasani ki te ʼu fafine fia maʼu koloa ʼo Samalia. Ko te ʼu fafine ʼaia neʼe natou fakaneke “ ʼonatou pule,” tonatou ʼu ʼohoana, ke natou kaihaʼa ia nātou ʼe liliki moʼo faka faigafua kiā nātou ke natou fakahoko ʼonatou holi ki te ʼu koloa.

4:6—Koteā ia te faka ʼuhiga ʼo te palalau “te fakamaʼa ʼo te ʼu nifo”? ʼI tona faka ʼalutahi mo te “mole ʼi ai ʼo he pane,” ʼe feala ke fakaʼaogaʼi ia te palalau ʼaenī ki te temi ʼo te hoge ʼaē ʼe ʼui ai ʼe maʼa ia te ʼu nifo koteʼuhi ʼe mole he meʼa kai.

5:5—Ko te ʼaluʼaga fea ʼaē ‘neʼe mole tonu ai ki Iselaele ke ina kumi ia Petele’? Neʼe fakatuʼu e Selopoame ia te tauhi ki te pipi mui ʼi Petele. Talu mai ai, kua liliu ia te kolo ʼaia ko te tafitoʼaga ʼo te tauhi hala. Ko Kilekale pea mo Pelesepa neʼe ko he tahi ʼaia ʼu koga meʼa maʼuhiga neʼe fakahoko ai te tauhi faka ʼapositā. Ke natou hao mai te malaʼia ʼaia neʼe fakakikite, neʼe tonu ai ki Iselaele ke ina fakagata ia tana ʼu fagona faka lotu ki te ʼu koga meʼa ʼaia pea mo kamata kumi ia Sehova.

7:1—Koteā ʼaē ʼe faka ʼuhiga kiai ia te “luna ʼaē neʼe tuʼusi ki te hau”? ʼE mahino ia, ʼe faka ʼuhiga ki te tukuhau ʼaē neʼe fakamaʼua ki te kau Iselaele ke natou foaki ki te hau ʼaē ke natou tōkakaga ki tana ʼu tagata heka hōsi pea mo tana faga manu. Neʼe tonu ke totogi te tukuhau ʼaia “ ʼi te kamata homo ʼo te fulumeto ʼaē neʼe homo tauhala.” Ki muli age neʼe feala ai ki te hahaʼi ke natou tānaki tanatou taʼukai. Kae ʼi muʼa ʼo tanatou fai ia te faʼahi ʼaia, neʼe ʼomai te faga heʼe pea neʼe natou kai ia tanatou taʼukai.

8:1, 2—Koteā ia te faka ʼuhiga ʼo “te kato fuaʼi ʼakau ʼo te fasigā taʼu mātala”? Ko tona faka ʼuhiga kua ovi mai ia te ʼaho ʼo Sehova. Ko te fua ʼo te fasigā taʼu mātala ʼe tae ʼi te fakaʼosiʼosi ʼo te temi taʼukai, ʼaē ko te fakaʼosiʼosi ʼo te taʼu gāue kele. ʼI te temi ʼaē neʼe fakahā age ai e Sehova kiā Amosi ke sio ki “te kato fuaʼi ʼakau ʼo te fasigā taʼu mātala,” neʼe ko tona faka ʼuhiga, neʼe kua ovi mai ia te fakaʼosi ʼo Iselaele. Koia lā ʼaē neʼe ʼui ai e te ʼAtua kiā Amosi: “Kua hoko mai ia te fakaʼosi ki taku hahaʼi Iselaele. ʼE mole hoko atu anai ia taku fakamolemole kiā nātou.”

Te ʼu Puani ʼe Tou Lava Tāʼofi:

1:3, 6, 9, 11, 13; 2:1, 4, 6. ʼO ʼuhiga mo tona hauhau ki Iselaele, mo Suta pea mo te ʼu puleʼaga e ono ʼo te ʼu tafaʼaki, neʼe ʼui fēnei e Sehova: “ ʼE mole au fetogi anai taku fakatuʼutuʼu.” Ko te ʼu fakamāu ʼa Sehova ʼe mole feala ki he tahi ke hola mai ai.—Amosi 9:2-5.

2:12. ʼE mole tonu ke tou faka lotovaivaiʼi ia te kau pioniē ʼaē ʼe gāue kinakina, mo te ʼu taupau feʼoloʼaki, mo te kau misionea, te fāmili ʼo te Petele ʼo tou fakaloto mālohiʼi nātou ke natou fakafisi ki tanatou gāue temi kātoa, ʼaē maʼa te tokolahi ʼe natou faka ʼuhiga ko he ʼaluʼaga māhani ʼo te maʼuli. Kae ʼe tonu ke tou fakaloto mālohiʼi ia nātou ke natou haga hoko atu tanatou gāue lelei.

3:8. Ohagē lā ʼe fakamataku mokā tou logo ki he gugulu ʼa he laione, ʼe fēia mo Amosi neʼe ina logoʼi ia te fakamaʼua ʼaē ke fai faka mafola ʼi tana logo ki te ʼui fēnei e Sehova: “ ʼAlu ʼo fai fakakikite  ki taku hahaʼi.” (Amosi 7:15) Ko te manavasiʼi ki te ʼAtua ʼe tonu ke ina uga tātou ke tou liliu ko he kau fai faka mafola faʼa gāue ʼo te logo ʼo te Puleʼaga.

3:13-15; 5:11. ʼAki te tokoni ʼa Sehova, neʼe feala ai ki te tagata tauhi ovi loto tokaga ko Amosi ke ina “foaki he fakamoʼoni” ki te hahaʼi ʼaē ʼe maʼu koloa pea ko he hahaʼi ʼe mole natou tokatokaga ki he meʼa. ʼO toe fēia aipē ʼe teuteuʼi tātou e Sehova ki te tala ʼo te logo ʼo te Puleʼaga tatau aipē pe mata faigataʼa kiā tātou ia te telituale ʼaē neʼe foaki mai.

4:6-11; 5:4, 6, 14. Logolā te tōtō tuʼumaʼu ʼa te kau Iselaele ʼi tanatou “liliu mai” kiā Sehova, kae neʼe uga aipē ia nātou ke natou ‘kumi ia Sehova, pea ke natou māʼuʼuli ai.’ ʼAki te loto faʼa kātaki fualoa ʼa Sehova ʼe ina fakagafua ke hoko atu ia te agakovi ʼi te tuʼu ʼo te ʼu faʼahiga meʼa ʼaenī, ʼe tonu ke tou fakaloto mālohiʼi ʼihi ke natou liliu mai ki te ʼAtua.

5:18, 19. “Ko te loto ki te ʼaho ʼo Sehova” kae mole nofo teuteu lelei kiai, ʼe ko he aga vale ia. Ko te ʼaluʼaga ʼo te taʼi tagata ʼaē ʼe ina fai fēia, ʼe hagē ko he tahi ʼe hola mai he laione ʼo felāveʼi mo he uluso pea hola ia mai te uluso ʼo ʼuʼusi ai e te gata. ʼE tonu anai ke tou “nonofo ʼalaʼala” ʼi te faʼahi fakalaumālie pea mo tou nonofo teuteu.—Luka 21:36.

7:12-17. ʼE tonu ke tou lototoʼa pea mo tou loto falala ʼo tala ia te logo ʼa te ʼAtua.

9:7-10. Logolā ko nātou ko te hōloga ʼo te kau pāteliaka agatonu pea mo te hahaʼi ʼaē neʼe haofaki mai Esipito ʼo liliu ko te hahaʼi ʼaē neʼe filifili e te ʼAtua, kae neʼe mole ina tāʼofi ia te kau Iselaele heʼe agatonu, ke mole leleiʼia ia nātou kiā mata ʼo te ʼAtua ohagē ko te kau Kusite. Ko totatou tapuakina e te ʼAtua ʼe mole fakapalatahi, ʼe mole fakalogo ia ki hatatou haʼu mai he faʼahiga hākoga, kae ʼe fakalogo ia ki ‘tatatou manavasiʼi kiā te ia pea mo maʼuliʼi ia te faitotonu.’—Gāue 10:34, 35.

Koteā ʼAē ʼe Tonu Ke Tou Fai?

Ko te ʼaho ʼaē kā fakahoko ai ia te fakamāu fakaʼatua ki te mālama ʼa Satana kua ovi mai. Neʼe foaki ifo e te ʼAtua ia tona laumālie ki tana kau ʼatolasio, mo teuteuʼi ia nātou ke natou fakatokaga ki te mālamanei ʼo ʼuhiga mo te hoko mai ʼo tona ʼaho. ʼE mole koa lā tonu ke tou lagolago mālohi ki te tokoni ʼaē ki niʼihi ke natou ʼiloʼi ia Sehova pea ke natou ‘fetapa ki tona huafa’?—Soele 2:31, 32.

ʼE fakaloto mālohiʼi fēnei e Amosi: “Kotou fehiʼa ki te meʼa ʼaē ʼe kovi, pea ke kotou ʼoʼofa ki te meʼa ʼaē ʼe lelei, pea ʼi te matapā, kotou teuteuʼi ia he faʼahi ki te faitotonu.” (Amosi 5:15) ʼUhi ko te kua ovi mai ʼo te ʼaho ʼo Sehova, ʼe tou agapoto anai ʼo tou fakaovi ki te ʼAtua pea mo tou tokoni ki ʼihi ke natou mavae mai te mālama agakovi pea mo te ʼu fakatahi heʼeʼaoga. Moʼo kākusia ʼo te faʼahi ʼaia, ko he ʼu ako ʼe ʼaoga ʼe feala ke tou maʼu mai te ʼu tohi faka Tohi-Tapu ʼa Soele pea mo Amosi!—Hepeleo 4:12.

[Paki ʼo te pasina 24]

Neʼe fakakikite fēnei e Soele: “Kua ovi mai te ʼaho ʼo Sehova!”

[Paki ʼo te pasina 27]

Ohagē ko Amosi, ʼe tonu ke tou liliu ko he ʼu tagata fai faka mafola lototoʼa pea mo loto falala ʼo te logo ʼa te ʼAtua