Tou Kumi Ke Tou Fakahoko Ia Te Fakatuʼutuʼu ʼa Te ʼAtua Iā ʼAho Nei

“Neʼe mate [ia Kilisito] maʼa te hahaʼi fuli pē, ke feala kiā nātou ʼaē ʼe māʼuʼuli, ke mole kei natou māʼuʼuli maʼa nātou totonu pē.”—2 Kolonito 5:15.

 1. Kotou fakamatala te meʼa ʼaē neʼe hoko ki te misionea ʼi te koga meʼa ʼaē neʼe gāue misionea ai.

 NEʼE fakamatala fēnei e te misionea ko Aaron a: “Ko tamatou motokā neʼe ko te ʼuluaki motokā sivile, neʼe hū ki te kiʼi kolo veliveli pea mo tuʼu mamaʼo ʼi Afelika, ʼi te ʼosi ʼo te tau. Neʼe mole kei matou maʼu he ʼu logo mai te kiʼi kōkelekāsio ʼo te kolo veliveli ʼaia, pea neʼe tonu ke matou ʼiloʼi te ʼu meʼa ʼaē neʼe ʼaoga ki te ʼu tehina. Neʼe matou ʼaumai te meʼa kai, te ʼu mutuʼi meʼa, mo te ʼu tohi faka Tohi-Tapu, pea mo te kaseti viteo Les Témoins de Jéhovah : un nom, une organisation. b Neʼe tonu ke matou fakahā tuʼa lua ia te foʼi ʼata ʼaia, ʼuhi ko te kaugamālie ʼaupitō ʼo te hahaʼi ʼaē neʼe ʼomai ʼo sisio ʼi te fale ʼo te kiʼi kolo—neʼe ko he fale lau laulahi neʼe ʼai kiai te televisio pea mo te viteo. Neʼe lahi te ʼu ako Tohi-Tapu neʼe kamata ʼaki te fakahā ʼaia ʼo te foʼi ʼata. ʼE mahino ia, neʼe ʼaoga ʼaupitō tamatou ʼu faiga.”

 2. (a) He koʼē ʼe fakatotonu e te kau Kilisitiano ke natou fakaʼaogaʼi tonatou maʼuli moʼo tauhi ki te ʼAtua? (b) Ko te ʼu fehuʼi fea ʼaē kā tou vakaʼi anai?

² He koʼē neʼe fakahoko e Aaron pea mo tona ʼu kaumeʼa te gāue faigataʼa ʼaia? Koteʼuhi, ʼi tonatou loto fakafetaʼi ki te sākilifisio faitotogi ʼa Sesu Kilisito, neʼe natou foaki tonatou maʼuli ki te ʼAtua pea mo natou fia fakaʼaogaʼi moʼo mulimuli ki te fakatuʼutuʼu ʼa te ʼAtua. Ohagē ko nātou, ko te kau Kilisitiano fuli ʼaē kua foaki tonatou maʼuli ki te ʼAtua, ʼe natou fakatotonu “ke mole kei natou māʼuʼuli maʼa nātou totonu pē” kae ke natou fai ia meʼa fuli “ ʼuhi ko te logo lelei.” (2 Kolonito 5:15; 1 Kolonito 9:23) ʼE natou ʼiloʼi kā hoko mai te fakaʼosi ʼo te tuʼu ʼaenī, ko te paʼaga fuli pea mo te maʼu tuʼulaga ʼi te mālamanei ʼe mole kei ʼi ai anai honatou ʼuhiga. Koia ʼe natou fia fakaʼaogaʼi tonatou maʼuli pea mo tonatou mālohi ke ʼalutahi mo te fakatuʼutuʼu ʼa te ʼAtua. (Tagata Tānaki 12:1) ʼE tou lava fakahoko feafeaʼi te faʼahi ʼaia? ʼE tou lava maʼu ʼifea te lototoʼa pea mo te mālohi moʼo fai te faʼahi ʼaia? Pea koteā te ʼu faigamālie ki te gāue ʼe foaki mai kiā tātou?

Ko He ʼu Fakatuʼutuʼu ʼe Tou Tuputupu Māmālie Ai Pea Mo ʼAoga

 3. Koteā te ʼu fakatuʼutuʼu tāfito ʼe tonu ke tou fai moʼo fakahoko ia te finegalo ʼo te ʼAtua?

³ Maʼa te kau Kilisitiano moʼoni, ko te fai ʼo te finegalo ʼo te ʼAtua ʼe ko he faʼahi ʼe natou fai ʼi tonatou maʼuli kātoa. ʼI te agamāhani, ko te ʼu fakatuʼutuʼu ʼe kamata ʼaki te tohi ʼo tokita higoa ʼi te Ako Faka Teokalatike, mo te lau ʼo te Tohi-Tapu ʼi te ʼaho fuli, mo te fai faka mafola, pea mo tuputupu ʼo aʼu ki te papitema. ʼI tatatou tuputupu ʼaia, ʼe tou manatuʼi te ʼu palalau ʼaenī neʼe fai e te ʼapositolo ko Paulo: “Metitāsio ki te ʼu meʼa ʼaia; nofo kātoa ai, ke ʼiloga tau ʼu faiga ki te hahaʼi fuli.” (1 Timoteo 4:15) ʼE mole tou tuputupu ʼi te faʼahi fakalaumālie ke faka kolōliaʼi tātou, kae ʼe ko te fakahā ʼaia ʼo tatatou fakatotonu ʼaē ke tou fai ia te finegalo ʼo te ʼAtua, ʼo mole tou manatu pē kiā tātou. Ko te fai ʼo te faʼahi ʼaia ʼe ina fakahā ai ʼe tou tuku ke takitaki e te ʼAtua tatatou ʼu fakatuʼutuʼu ʼi te ʼu faʼahi fuli ʼo te maʼuli, pea ʼe ina fai lelei age te faʼahi ʼaia iā tātou totonu.—Pesalemo 32:8.

 4. ʼE tou lava pulihi feafeaʼi he ʼu tuʼania ʼe mole honatou ʼaoga?

⁴ Kae kapau ʼe tou lotolotolua peʼe tou manatu fau kiā tātou, pea ʼe feala ke tāʼofi ai tatatou tuputupu ʼi tatatou gāue maʼa te ʼAtua. (Tagata Tānaki 11:4) Koia, ke feala hatatou fiafia moʼoni ʼi te tauhi ʼaē ki te ʼAtua pea mo te hahaʼi, ʼe lagi tonu muʼa ke pulihi tatatou ʼu tuʼania. Ohagē lā ko Erik, neʼe fia gāue ʼi he kōkelekāsio neʼe palalau ʼi he tahi lea. Kae neʼe tuʼania ia, ʼo manatu fēnei: ‘ ʼE natou tali lelei anai au? ʼE au ʼofa anai koa ki te ʼu tehina? ʼE natou ʼoʼofa anai koa kiā au?’ ʼE ina ʼui fēnei: “Neʼe au mahino leva neʼe tonu ke lahi age taku manatu ki te ʼu tehina ʼi haku manatu kiā au. Neʼe au fakatotonu ai ke ʼaua  taku tuʼania ki te ʼu faʼahi ʼaia pea ke au tokaga pē ki te meʼa ʼaē neʼe feala ke au foaki ki te hahaʼi, ʼo mole au manatu kiā au. Neʼe au kole kiā Sehova ke tokoni mai pea neʼe au fakahoko taku fakatuʼutuʼu. ʼI te temi nei, ʼe au fiafia ʼaupitō ʼi taku gāue ʼi ai.” (Loma 4:20) ʼEī, kapau ʼe lahi tatatou tauhi ki te ʼAtua pea mo te hahaʼi, ʼo mole tou manatu pē kiā tātou, pea ʼe lahi anai tatatou fiafia.

 5. He koʼē ʼe ʼaoga ke tou fakafuafua lelei ʼi tatatou kumi ke tou fakahoko ia te fakatuʼutuʼu ʼa te ʼAtua? Kotou tuku mai he faʼifaʼitaki.

⁵ Ke tou kumi ke tou fakahoko fakalelei ia te fakatuʼutuʼu ʼa te ʼAtua, ʼe toe maʼua ke tou fakafuafua lelei. ʼE mole lahi anai tatatou toʼo maʼua, heʼe feala ai ke tou kaugana ki te tuʼu ʼaenī pea ʼe mole kei tou ʼāteaina ai moʼo fakahoko ia te gāue ʼa te ʼAtua. ʼE fakamanatuʼi fēnei mai ʼi te Tohi-Tapu: “Ko ia ʼaē ʼe toʼo maʼua ʼe liliu ia ko te tagata kaugana ʼo te tagata ʼaē ʼe ina foaki te maʼua.” (Tāʼaga Lea 22:7) Kapau ʼe tou falala kiā Sehova pea mo fakamuʼamuʼa te ʼu gāue fakalaumālie, pea ʼe tokoni mai ke tou haga tokagaʼi ʼāteaina pē te ʼu gāue ʼaia. Ohagē lā ko Guoming pea mo tona ʼu tuagaʼane e toko lua, neʼe natou māʼuʼuli mo tanatou faʼē ʼi he koga meʼa neʼe totogi kovi te ʼu nofoʼaga pea neʼe faigataʼa te taupau ʼo he gāue. ʼAki tanatou fakaʼaogaʼi fakalelei tanatou falā, pea mo vaevae te ʼu meʼa ʼaē neʼe tonu ke totogi, neʼe natou maʼu tuʼumaʼu te ʼu meʼa ʼaē neʼe ʼaoga kiā nātou, māʼia pē lā ʼi te ʼu temi ʼaē neʼe mole natou gāue fuli ai. ʼE ʼui fēnei e Guoming: “ ʼI ʼihi temi, neʼe mole matou lī totogi fuli. Kae neʼe feala pē ke hoko atu tamatou selevisi pioniē pea mo tokaga fakalelei ki tamatou faʼē. ʼE matou loto fakafetaʼi ki te mole kole mai e tamatou faʼē ke tuku tamatou ʼu gāue fakalaumālie ke feala hana maʼu te ʼu lelei ʼo te maʼuli.”—2 Kolonito 12:14; Hepeleo 13:5.

 6. Ko te faʼifaʼitaki fea ʼaē ʼe fakahā ai ʼe tou lava faka ʼalutahi totatou maʼuli mo te fakatuʼutuʼu ʼa te ʼAtua?

⁶ Kapau ʼe lahi takotou kumi te ʼu meʼa fakamālama—te paʼaga peʼe ko he tahi age meʼa—ʼe lagi tonu ke kotou fai he ʼu fetogi lahi moʼo fakamuʼamuʼa ia te fakatuʼutuʼu ʼa te ʼAtua. ʼE mole feala ke fai te ʼu fetogi ʼaia ʼi te pō pē e tahi, pea mo kapau ʼe kotou tōtō ʼi te kamata, ʼe mole tonu ke kotou manatu ʼe mole feala anai ke kotou fetogi. Tou vakaʼi te faʼifaʼitaki ʼa Koichi, ʼaē neʼe lahi ʼaupitō tana fakaʼaogaʼi tona temi ki te ʼu gaoʼi viteo. ʼI tana kei tūpulaga, neʼe ina ako ia te Tohi-Tapu, kae lolotoga ni ʼu taʼu ko te meʼa tāfito ʼaē neʼe ina fai ʼi tona maʼuli ko te gaoʼi ʼi te ʼu gaoʼi viteo. ʼI te tahi ʼaho, neʼe fakakaukau fēnei ia Koichi: “Koteā ʼaē ʼe au lolotoga fai nei? Kua au taʼu 30 tupu pea ʼe mole ʼi ai haku fakatuʼutuʼu ʼi toku maʼuli!” Neʼe toe toʼo e Koichi tana ako Tohi-Tapu pea neʼe ina tali te tokoni ʼa te kōkelekāsio. Logolā neʼe fetogi māmālie pē ia Koichi, kae neʼe haga faiga pē. ʼAki tana faikole lahi pea mo te tokoni ʼofa ʼo te ʼu tehina, neʼe feala ki muli age ke ina tuku kātoa tana gaoʼi. (Luka 11:9) ʼI te temi nei, ko Koichi ʼe ko he tagata faifekau faka minisitelio fiafia.

Tou Ako Ke Tou Fakapotopoto

 7. He koʼē ʼe tonu ke tou fakapotopoto ʼi tatatou fai te gāue ʼa te ʼAtua?

⁷ ʼE tonu ke tou faiga ʼaki totatou nefesi kātoa ke tou kumi ke tou fakahoko ia te fakatuʼutuʼu ʼa te ʼAtua. Ke ʼaua naʼa tou fai fakafeʼauga pē peʼe tou pipiko ʼi tona fai. (Hepeleo 6:11, 12) ʼE mole leva loto e Sehova ke tou liliu ʼo gaʼegagaʼe—ʼi te faʼahi fakasino, ʼi totatou fakakaukau, peʼe ko totatou loto. ʼI tatatou fakamoʼoni ʼaki he agavaivai ki tatatou mole lava fai ia te gāue ʼa te ʼAtua ʼaki totatou mālohi, ʼe faka kolōlia ai ia te ʼAtua pea ʼe hā ai ʼe tou fakapotopoto. (1 Petelo 4:11) ʼE fakapapau mai e Sehova ʼe ina foaki mai te mālohi ʼaē ʼe ʼaoga moʼo fai tona finegalo, kae ʼe mole tonu ke tou faiga ke tou fakalaka ʼi te ʼu meʼa ʼaē ʼe tou lavaʼi, ʼo tou faigaʼi ke tou fai he ʼu meʼa ʼe mole ina fakamaʼua mai. (2 Kolonito 4:7) Ke feala hatatou haga tauhi ki te ʼAtua kae mole tou liliu ʼo gaʼegagaʼe, ʼe tonu ke tou fakafuafua lelei tatatou fakaʼaogaʼi totatou mālohi.

 8. Koteā ʼaē neʼe hoko ʼi te faiga ʼaē ʼa te finemui Kilisitiano ke gāue lelei maʼa te mālamanei pea maʼa Sehova, pea koteā te ʼu fetogi neʼe ina fai?

⁸ Ohagē lā, iā taʼu e lua, ko Ji Hye, ʼaē ʼe maʼuli ʼi te Potu ʼEsitē ʼo Asia, neʼe maʼumaʼua ʼaupitō ʼi tana gāue fakamālama, pea neʼe toe pioniē. ʼE ina fakamatala fēnei: “Neʼe au faiga ke au gāue lelei maʼa Sehova pea maʼa te mālamanei, kae neʼe ko hola pē e nima ʼaē neʼe au moe ai ʼi te pōʼuli. Ki muli age, neʼe mole kei ʼi ai hoku mālohi ke au tokaga ai ki te moʼoni, pea neʼe mole kei au fiafia ʼi taku ʼu gāue fakalaumālie.” Ke feala hana tauhi kiā Sehova ʼaki tona ‘loto kātoa, mo tona nefesi kātoa, mo tona ʼatamai kātoa, pea mo tona mālohi kātoa,’ neʼe kumi e Ji Hye he gāue ʼe mole maʼumaʼua ʼaupitō ai. (Maleko 12:30) ʼE ina ʼui fēnei: “Logolā toku fakaneke e toku fāmili ke au maʼu paʼaga, kae neʼe au faiga ke au fakamuʼamuʼa aipē ia te fakatuʼutuʼu ʼa te ʼAtua. ʼE feʼauga pē taku falā moʼo totogi te ʼu meʼa maʼuhiga, ohagē ko he ʼu mutuʼi meʼa. Pea kua au ʼiloʼi takita  logo lelei mokā neʼe feʼauga takita moe! ʼE au fiafia ʼi taku minisitelio, pea ʼi te temi nei, ʼe au mālohi age ʼi te faʼahi fakalaumālie. ʼE lava te faʼahi ʼaia koteʼuhi ʼe mole kei lahi he ʼu faʼahi ke tupu ai haku tokaga ki te ʼu fakaneke pea mo te ʼu fakafiafia ʼo te mālamanei.”—Tagata Tānaki 4:6; Mateo 6:24, 28-30.

 9. ʼE feala ʼapē ke malave feafeaʼi ki te hahaʼi tatatou ʼu faiga ʼi te fai faka mafola?

⁹ ʼE mole ko tātou fuli ʼaē ʼe feala ke tou tauhi ki te ʼAtua ʼo tou faka mafola te evaselio ʼi te temi kātoa. Kapau kua kotou matuʼa, peʼe mahaki, peʼe ko he tahi age faʼahi, ke mahino kiā koutou ko Sehova ʼe ina leleiʼia ʼaupitō takotou agatonu pea mo he faʼahiga gāue pē ʼaē ʼe kotou lava fai maʼa ia ʼaki tokotou loto kātoa. (Luka 21:2, 3) Koia ʼe mole he tahi iā tātou ʼe tonu ke ina meʼa noaʼi te malave ʼo tatatou ʼu faiga ki ʼihi, tatau aipē peʼe veliveli. Ohagē lā neʼe tou fai faka mafola pea neʼe mole tou maʼu he tahi neʼe fia logo ki te logo lelei. ʼI tatatou ʼosi mavae, ʼe feala ki te hahaʼi ʼo te ʼapi ke natou palalau fualoa ʼo ʼuhiga mo tatatou ʼaʼahi, māʼiapē lā mo kapau neʼe mole ʼavahi mai e he tahi! ʼE mole tou ʼamanaki anai ke tali e te hahaʼi fuli ʼaē neʼe natou logo ki te logo lelei, kae ʼe tali anai e ʼihi. (Mateo 13:19-23) Ko ʼihi atu ʼe natou tali anai ki muli age, mokā fetogi te ʼu ʼaluʼaga ʼo te mālamanei peʼe ko tonatou maʼuli. Kae kapau ʼe tou faiga lahi ʼi te minisitelio, ʼe tou fai ia te gāue ʼa te ʼAtua. Ko tātou ko “te ʼu kaugā gāue ʼa te ʼAtua.”—1 Kolonito 3:9.

10. Koteā te ʼu faigamālie ʼaē ʼe tou maʼu fuli ʼi te kōkelekāsio?

¹⁰ Tahi ʼaē meʼa, ko tātou fuli ʼe feala ke tou tokoni ki totatou fāmili pea mo totatou ʼu tehina mo tuagaʼane fakalaumālie. (Kalate 6:10) Ko totatou malave lelei ki ʼihi ʼe feala ke loloto pea mo fualoa. (Tagata Tānaki 11:1, 6) Kā faʼa gāue te ʼu tagata ʼāfea pea mo te ʼu tagata faifekau faka minisitelio moʼo fakahoko tanatou ʼu maʼua, pea ʼe lagolago ai ki te lelei pea mo te mālohi fakalaumālie ʼa te kōkelekāsio, pea ʼe tuputupu ai te gāue faka Kilisitiano. ʼE tou ʼiloʼi papau, mokā “lahi . . . [tatatou] ʼu gāue ʼi te ʼAliki,” pea “ ʼe mole vaʼiganoa” tatatou gāue.—1 Kolonito 15:58.

Tou Kumi Ke Tou Fakahoko Ia Te Fakatuʼutuʼu ʼa Te ʼAtua ʼi Totatou Maʼuli

11. Koteā te tahi ʼu faigamālie ʼe feala ke tou maʼu ʼi tuʼa atu ʼo tatatou kōkelekāsio?

¹¹ ʼI totatou ʼuhiga Kilisitiano, ʼe tou leleiʼia ia te maʼuli, pea ʼe tou fia faka kolōliaʼi ia te ʼAtua ʼi te ʼu meʼa fuli pē ʼaē ʼe tou fai. (1 Kolonito 10:31) Kā tou faiga agatonu ke tou faka mafola ia te logo lelei ʼo te Puleʼaga pea mo akoʼi te hahaʼi ke natou mulimuli kiā meʼa fuli pē ʼaē neʼe fakatotonu mai e Sesu, pea ʼe tou maʼu lahi anai he ʼu faigamālie ki te gāue ʼe fakatupu fiafia. (Mateo 24:14; 28:19, 20) ʼO hilifaki ki tatatou gāue fakatahi mo tatatou kōkelekāsio, ʼe toe feala ke tou gāue ʼi te ʼu koga meʼa ʼaē ʼe ʼaoga lahi ai he kau fai faka mafola, ʼi he tahi age telituale, ʼi he tahi age lea, peʼe ko he tahi age fenua. Ko te kau tagata ʼāfea pea mo te kau tagata faifekau faka minisitelio ʼaē mole heʼeki ʼohoana, ʼe feala ke fakaafe nātou ki te Ako ʼo Te Minisitelio, pea ki muli age, ke natou gāue ʼi te ʼu kōkelekāsio ʼaē ʼe ʼaoga ai te tokoni ʼa he ʼu Kilisitiano kua fotufotuʼa, ʼi tonatou fenua totonu peʼe ʼi he tahi age fenua. Ko te ʼu taumātuʼa ʼaē ʼe kau ki te minisitelio temi kātoa, ʼe feala ke natou kau ki te ako ʼo te kau misionea ʼi Kileate pea mo gāue ʼi he fenua matāpule. Pea ʼe kei ʼaoga pē he kau gāue ʼi te ʼu gāue kehekehe ʼi te Petele peʼe ʼi te laga pea mo taupau te ʼu fale fono pea mo te ʼu Petele.

12, 13. (a) ʼE kotou lava filifili feafeaʼi te gāue ʼaē ʼe kotou kumi ke kotou fakahoko? (b) Kotou fakamatala te faʼifaʼitaki ʼe fakahā ai ko te poto ʼaē ʼe tou maʼu ʼi te gāue neʼe hinoʼi mai, ʼe feala ke ʼaoga ki te hahaʼi.

¹² Ko te ʼu faigamālie fea ʼaē ʼe tonu ke kotou kumi ke kotou fakahoko? ʼI tokotou ʼuhiga kaugana kua foaki tokotou maʼuli kiā Sehova, kotou kumi tuʼumaʼu tana takitaki pea mo te takitaki ʼo tana kautahi. Ko tona “laumālie lelei” ʼe tokoni atu anai ke kotou fai te tonu ʼaē ʼe lelei. (Nehemia 9:20) Kapau ʼe kotou fai he gāue neʼe hinoʼi atu, pea ʼe feala ke toe hinoʼi atu ki he tahi gāue, pea ʼi te agamāhani, ko takotou kua ʼiloʼi lelei pea mo popoto ʼi te fai ʼo he gāue ʼe feala ke toe ʼaoga anai ki he tahi gāue kā hinoʼi atu ki muli age.

¹³ Ohagē lā ko Dennis pea mo tona ʼohoana ia Jenny, neʼe nā lagolago tuʼumaʼu ki te laga ʼo te ʼu Fale ʼo Te Puleʼaga. ʼI te ʼosi maumauʼi e te ʼafā ko Katrina ia te potu sautē ʼo Amelika, neʼe nā kau ki te tokoni ʼaē kiā nātou neʼe ʼaoga ki ai. ʼE fakamatala fēnei e Dennis: “Neʼe mā fakaʼaogaʼi tamā poto gāue ʼaē neʼe mā maʼu ʼi te laga ʼo te ʼu Fale ʼo Te Puleʼaga, moʼo tokoni ki te ʼu tehina, ʼo mā fiafia ʼaupitō ai. Neʼe malave ʼaupitō kiā māua te fakafetaʼi ʼaē neʼe fai mai e nātou ʼaē neʼe mā tokoni ki ai. Tokolahi ʼi te tahi ʼu kūtuga neʼe mole fua lelei kātoa tanatou toe laga te ʼu ʼapi. Ko te kau Fakamoʼoni ʼa Sehova neʼe kua natou toe gaohi peʼe toe laga te ʼu ʼapi e 5 300  tupu pea mo te ʼu Fale ʼo Te Puleʼaga. Neʼe tokagaʼi e te hahaʼi te faʼahi ʼaia pea ʼi te temi nei ʼe natou fia logo ki te logo lelei ʼo te Puleʼaga.”

14. Koteā ʼaē ʼe feala ke kotou fai mo kapau ʼe kotou fia kumi ke kotou fakahoko ia te minisitelio temi kātoa?

¹⁴ ʼE feala koa ke kotou kumi ke kotou fakahoko ia te fakatuʼutuʼu ʼa te ʼAtua, ʼo kotou filifili ke kotou gāue ʼi te selevisi temi kātoa ʼi tokotou maʼuli? Kapau koia, pea ke kotou ʼiloʼi papau ʼe kotou maʼu anai he ʼu tuʼuga tapuakina. Kapau ʼe mole feala ke kotou fakahoko te faʼahi ʼaia ʼi te temi nei ʼuhi ko tokotou ʼaluʼaga, ʼe lagi feala ke kotou fai he ʼu fetogi. Kotou faikole ohagē ko Nehemia, ʼi te temi ʼaē neʼe ina fia fakahoko ai te gāue maʼuhiga, ʼo ina ʼui fēnei: “Fakalelei age, Sehova, . . . ke ke fai ke iku lelei ki tau kaugana.” (Nehemia 1:11) Pea kotou falala kiā ‘Ia ʼaē ʼe fagono ki te faikole,’ ʼo kotou fakahoko te meʼa ʼaē neʼe kotou faikole kiai. (Pesalemo 65:2) Ke tapuakina e Sehova takotou ʼu faiga ke kotou tauhi lahi age kiā te ia, ʼe tonu muʼa ke kotou faiga kiai. ʼI takotou kua ʼosi fakatotonu ʼaē ke kotou kamata kau ki te minisitelio temi kātoa, kotou mulimuli ki takotou tonu ʼaia. ʼAki te temi, ʼe kotou ʼiloʼi lelei age anai takotou gāue, pea ʼe toe tuputupu ai anai mo takotou fiafia.

Ko He Maʼuli ʼe Fakafiafia Moʼoni

15. (a) ʼE kotou lava maʼu feafeaʼi he ʼu lelei ʼaki takotou palalau pea mo lau te hisitolia ʼo te ʼu kaugana ʼa te ʼAtua talu mai fualoa? (b) Kotou fakamatala he hisitolia ʼo te maʼuli ʼa he kaugana neʼe fakaloto mālohiʼi ai ia koutou.

¹⁵ Koteā te ʼu lelei ʼaē ʼe feala ke kotou ʼamanaki kiai ʼi takotou kumi ke kotou fakahoko ia te fakatuʼutuʼu ʼa te ʼAtua? Kotou fai palalau mo he ʼu kaugana ʼa Sehova kua fualoa tanatou ʼi te moʼoni, tāfito ia nātou ʼaē neʼe lahi tanatou ʼu taʼu ʼi te minisitelio temi kātoa. Neʼe natou maʼuli fakafiafia ʼaupitō! (Tāʼaga Lea 10:22) ʼE natou ʼui atu anai ko Sehova neʼe tokoni tuʼumaʼu pē kiā nātou, māʼia mo te ʼu ʼaluʼaga faigataʼaʼia, ke natou maʼu te ʼu meʼa ʼaē neʼe ʼaoga moʼoni kiā nātou pea mo laka atu. (Filipe 4:11-13) Mai te taʼu 1955 ki te taʼu 1961, neʼe tā ʼi Te Tule Leʼo ia te ʼu ʼalatike ʼo te ʼu hisitolia ʼo te maʼuli ʼa te kau agatonu, ʼi te kupu tāfito “Comment je poursuis le but de ma vie” (Pe Neʼe Feafeaʼi Taku Fakahoko Taku Fakatuʼutuʼu ʼi Toku Maʼuli). Talu mai ai, neʼe tā te ʼu fakamatala ʼe lauʼi teau ʼo te maʼuli ʼo te tahi ʼu kaugana. ʼE fakahā ʼi te ʼu fakamatala takitahi ʼaia te faʼafai pea mo te fiafia, ʼaē ʼe fakamanatuʼi mai kiā tātou te faʼafai pea mo te fiafia ʼaē ʼe tou lau ʼi te Tohi-Tapu ʼi te tohi ʼo Gāue. Ko takotou lau te ʼu fakamatala fakaloto fiafia ʼaia ʼe ina uga anai koutou ke kotou ʼui fēnei: ‘ ʼE ko te faʼahiga maʼuli lā ʼaē ʼe au fia maʼu!’

16. Koteā ʼaē ʼe fakafiafia ai ia te maʼuli ʼa he Kilisitiano?

¹⁶ ʼE manatuʼi fēnei e Aaron, ʼaē neʼe tou talanoa ki ai ʼi te kamata: “ ʼI Afelika, neʼe au tautau felāveʼi mo te kau tūpulaga neʼe natou fakalaka ʼi te fenua moʼo kumi he fakatuʼutuʼu ʼi tonatou maʼuli. Tokolahi neʼe mole natou maʼu hanatou fakatuʼutuʼu. Kae ko mātou, neʼe matou kumi ke matou fakahoko ia te fakatuʼutuʼu ʼa te ʼAtua, ʼo matou faka mafola ia te logo lelei ʼo te Puleʼaga, pea neʼe matou fiafia ʼi tamatou gāue kinakina pea mo maʼu he ʼuhiga ʼo tomatou maʼuli. Neʼe matou sisio tonu ai ki te fiafia lahi ʼaē ʼe tou maʼu ʼi tatatou foaki, ʼi tatatou tali.”—Gāue 20:35.

17. He koʼē ʼe tonu ke tou kumi ke tou fakahoko ia te fakatuʼutuʼu ʼa te ʼAtua ʼi te temi nei?

¹⁷ ʼE feafeaʼi kiā koutou? Ko te fakatuʼutuʼu fea ʼaē ʼe kotou kumi? Kapau ʼe mole ʼi ai hakotou fakatuʼutuʼu fakalaumālie ke kotou fakahoko, pea ʼe mahino ia ʼe kotou foaki anai tokotou temi pea mo tokotou mālohi kātoa ki he tahi age ʼu gāue. He koʼē koa ʼe kotou maumauʼi anai tokotou maʼuli ʼaē ʼe maʼuhiga ki he ʼu meʼa ʼo te tuʼu ʼa Satana ʼe mole honatou ʼaoga moʼoni? ʼI te hoko mai ʼo te “mamahi lahi” ʼaē kua ovi mai, ko te ʼu koloa pea mo te ʼu tuʼulaga ʼi te mālamanei ʼe mole kei ʼi ai anai honatou ʼaoga. Ko te faʼahi ʼaē ʼe maʼuhiga age ʼe ko takotou ʼu felōgoi mo Sehova. ʼE tou loto fakafetaʼi lahi anai ʼi tatatou tauhi ki te ʼAtua pea mo te hahaʼi, pea mo tou kumi ke tou fakahoko kātoa ia te fakatuʼutuʼu ʼa te ʼAtua ʼi totatou maʼuli!—Mateo 24:21; Fakahā 7:14, 15.

[Kiʼi nota]

ʼE Feala Koa Hakotou Fakamahino?

• Koteā te manatu ʼa Sehova ʼo ʼuhiga mo tatatou tauhi kiā te ia?

• Ko te fakahoko ʼo tatatou ʼu tonu pea mo te fakapotopoto ʼe tokoni feafeaʼi mai kiā tātou ke tou tauhi ki te ʼAtua pea mo te hahaʼi?

• Koteā te ʼu faigamālie ʼaē ʼe tou maʼu moʼo tauhi ki te ʼAtua?

• ʼE tou lava maʼu feafeaʼi he fakatuʼutuʼu moʼoni ʼi totatou maʼuli ʼi te temi nei?

[Fehuʼi]