“Neʼe Au Leleiʼia Ia Te Makehe ʼo Tana Tui Mālohi”

KO GRASS GÜNTER neʼe ko he tagata faitohi Siamani pea neʼe ina maʼu ia te prix Nobel ʼo te Faitohi ʼi te taʼu 1999, neʼe tā tana tohi ʼi te taʼu 2006, ʼe ina fakamatala ai ia tona maʼuli. ʼE ina fakahā pē ia te temi ʼaē neʼe hū ai ki te kau sōlia ʼo Siamani. ʼI tana tohi ʼaia, ʼe palalau ai ki te tagata neʼe malave ki ai pea kua hili nei kiai taʼu e 60 kae ʼe kei ina manatuʼi pē. Neʼe makehe ia te tagata ʼaia ʼi tana pipiki maʼu ki tana tui logolā te ʼu fakataga.

ʼI tona fakafehufehuʼi ʼaē neʼe tā ʼi te sulunale ʼaē ʼe tufa ʼi te ʼaho fuli ko te Frankfurter Allgemeine Zeitung, ʼe manatuʼi ai e Grass ia te tagata makehe ʼaia neʼe fakafisi ki te toʼo ʼo te ʼu mahafu tau. Neʼe ʼui e Grass ʼo ʼuhiga mo te tagata ʼaia, “neʼe mole mulimuli ia ki te manatu ʼa te tokolahi, neʼe mole ko he Nasi, peʼe ko he Kominisi, peʼe ko he Sōsialisi. Neʼe ko te Fakamoʼoni ʼa Sehova.” Neʼe mole kei manatuʼi e Grass ia te higoa ʼo te Fakamoʼoni ʼaia, ʼaē neʼe ina fakahigoaʼi ko ʼE mole matou fai ia te ʼu meʼa ʼaia. ʼAki te ʼu kumi ʼa te kau Fakamoʼoni ʼa Sehova, neʼe natou maʼu ai ʼe higoa ko Joachim Alfermann. Neʼe tuʼa lahi ia tona tā pea mo tona fakalainoaʼi, pea neʼe pilisoniʼi tokotahi ʼi te kogafale. Kae neʼe nofo agatonu aipē ia Alfermann pea mo fakafisi ki te toʼo ʼo te ʼu mahafu tau.

“Neʼe au leleiʼia ia te makehe ʼo tana tui mālohi,” ko te ʼui ʼaia ʼa Grass. “Neʼe au feʼekeʼaki pē: Peʼe feafeaʼi ia tana kātakiʼi ia te ʼu ʼaluʼaga fuli ʼaia? Peʼe feafeaʼi ia tana hao mai ai?” ʼI te hili ʼo he kātaki fualoa moʼo maumauʼi ʼo tana tui, kae ki muli age ʼi Fepualio 1944, neʼe ʼave ai leva ia Alfermann ki te lotoʼā fakamamahi ʼo Stutthof. ʼI ʼApelili 1945, neʼe faka ʼāteaina ai ia ia, ʼo hao ai mai te tau pea mo taupau ia tona ʼuhiga Fakamoʼoni agatonu kiā Sehova ʼo kaku ki tona mate ʼi te taʼu 1998.

Neʼe kau ia Alfermann ki te toko 13 400 kau Fakamoʼoni—ʼo Siamani pea mo te ʼu fenua ʼaē neʼe puleʼi e te kau Nasi—ʼaē neʼe gaohi koviʼi ai ʼuhi ko tanatou tui. Neʼe natou mulimuli ki te takitaki ʼa te Tohi-Tapu, ʼaē ke natou ʼāteaina mai te fai politike pea mo natou fakafisi ki te toʼo ʼo te ʼu mahafu tau. (Mateo 26:52; Soane 18:36) Ko te toko 4 200 kau Fakamoʼoni neʼe pilisoniʼi ʼi te ʼu lotoʼā fakamamahi, pea neʼe mamate ai te toko 1 490. ʼO toe fēia aipē iā ʼaho nei, ko te agatonu ʼa te tokolahi ʼe malave ki te hahaʼi ʼaē ʼe mole ko he kau Fakamoʼoni ʼa Sehova kae natou leleiʼia ia tanatou agatonu.

[Paki ʼo te pasina 32]

Joachim Alfermann