Tou Fakalogo Ki Te Leʼo ʼe Haʼu Mai Totatou Loto

“[ʼE] fai e te hahaʼi ʼo te ʼu puleʼaga ʼaē ʼe mole iā nātou te lao [ʼa te ʼAtua], ia te ʼu meʼa ʼo te lao.”—Loma 2:14.

1, 2. (a) Koteā ʼaē neʼe fai e te tokolahi ʼi tanatou fia tokoni ki ʼihi? (b) Ko te ʼu faʼifaʼitaki faka Tohi-Tapu fea ʼe hā lelei ai ia te fia tokoni ʼaia ʼa ʼihi ki niʼihi?

 NEʼE laga te mahaki moa ʼo te tama ʼe taʼu 20 ʼi te taulaga ʼo te ʼu sāliote afi pea neʼe tō ki te ʼu ala ʼo te ʼu sāliote afi. ʼI te sio ʼa te tahi tagata ki ai, neʼe ina tuku age te ʼu nima ʼo tona ʼu ʼofafine ʼaē neʼe ina puke kae hopo ki te ala. Neʼe ina toho mai te tama ki te vaha ʼo te ʼu ala, pea takoto ki ai moʼo puipui ia ia mai te sāliote afi ʼaē neʼe haʼu ʼo tuʼu ʼi ʼonā muʼa. Ko ʼihi neʼe natou fakahigoaʼi te tagata ʼaia ko he tagata toʼa, kae neʼe ina tali age: “ ʼE tonu ke tou fai ia te meʼa ʼaē ʼe lelei. Neʼe au ʼofa ki te tagata kae neʼe mole au fai te faʼahi ʼaenī ke au logona peʼe ke vikiʼi au.”

² ʼE lagi kotou ʼiloʼi he tahi neʼe feala pē ke tuʼutāmakiʼia ʼi tana fia tokoni ki niʼihi. Tokolahi neʼe natou fai te faʼahi ʼaia ʼi te Lua Tau Faka Mālamanei, ʼi tanatou fufū ia te kau matāpule. Kotou toe manatuʼi mo te meʼa ʼaē neʼe hoko ki te ʼapositolo ko Paulo pea mo te ʼu toko 275 kau ʼafāsia ʼi Maleta, ʼe tuʼu ovi ki Sisile. Ko te hahaʼi ʼo te motu neʼe natou tokoni ki te kau matāpule ʼaia, ʼo natou fakahā kiā nātou ia te “ ʼofa makehe.” (Gāue 27:27–28:2) Kae feafeaʼi age lā ki te kiʼi taʼahine Iselaele ʼaē neʼe loto ke faitoʼo ia te mahaki ʼo te tahi tagata Silia ʼaē neʼe ina faka ʼaunofo ia ia, kae lagi neʼe mole fakatupu tuʼutāmaki ai tona maʼuli? (2 Hau 5:1-4) Pea kotou toe fakakaukauʼi age mo te lea fakatātā ʼiloa ʼa Sesu ʼo te tagata Samalitana aga faka kāiga. Neʼe mole tokagaʼi pē lā e te pelepitelō pea mo te Levite ia te tagata Sutea ʼaē neʼe kua meimeihiʼi mate ʼi te ala, kae neʼe ko he tagata Samalitana ʼaē neʼe tokoni age kiā te ia. Lolotoga te ʼu sēkulō, ko te lea fakatā ʼaia neʼe malave ki te hahaʼi ʼo te ʼu agaʼi fenua kehekehe.—Luka 10:29-37.

3, 4. Koteā te ako ʼe tou maʼu ʼo ʼuhiga mo te evolisio ʼi te tokaga ʼaē ʼa te tokolahi ki ʼihi logolā te feala ʼaē ke tuʼutāmaki ai tonatou maʼuli?

³ ʼE tou māʼuʼuli nei ʼi “te ʼu temi maʼuhiga ʼaupitō mo faigataʼa,” pea ko te tokolahi kua natou ‘aga fekai,’ pea ʼe ‘mole natou manako ki te meʼa ʼaē ʼe lelei.’ (2 Timoteo 3:1-3) Kae neʼe kua lagi tou fakatokagaʼi te ʼu gāue ʼofa, pea ʼi te ʼu gāue ʼaia neʼe lagi tou maʼu tona ʼu fua lelei kiā tātou. ʼI te fia tokoni ʼa te hahaʼi fuli ki ʼihi tatau aipē peʼe natou tuʼutāmaki ai, neʼe fakahigoaʼi ai e ʼihi ia te aga ʼaia, ko he “aga ʼe pipiki ki te ʼulugaaga ʼo te tagata.”

⁴ Ko te taʼi fia tokoni ʼaia ʼaē ʼe feala ke tuʼutāmaki ai tokita maʼuli ʼe mafola ia ʼi te ʼu agaʼi fenua fuli pea mo te ʼu lanu fuli, pea ʼe fakafeagai ia ki te ʼui ʼaē ko te tagata ʼe hoki maʼuli pē mo kapau ʼe ʼuluaki tokaga pē muʼa kiā ia totonu, ko tona faka ʼuhiga “ko ʼaē pē ʼe poto, mo toʼa pea mo mālohi ʼe feala ke maʼuli.” Ko Francis S. Collins, ko he polofesea ʼe ina ako te ʼu gènes ʼa te tagata pea mo te ʼu manu, pea neʼe ina takitaki te gāue ʼo te puleʼaga Amelika moʼo fakamahino ia te ʼu gènes ʼo te tagata (ADN), neʼe ina ʼui fēnei: “Ko te tokaga ʼaē ki ʼihi ʼe ko he faigataʼa lahi ia kiā nātou ʼaē ʼe natou ako te evolisio. Koteʼuhi ʼe mole feala ke ʼui ko te taʼi aga ʼaia ʼe tupu mai te ʼu gènes égoïstes ʼaē ʼe tuku hoholo.” Neʼe ina toe ʼui fēnei: “Ko ʼihi ʼe natou sākilifisioʼi ʼonatou maʼuli maʼa he kau matāpule ʼe mole natou feʼiloʼiʼaki. . . . Ko te aga ʼaia ʼe mole feala ki he akonaki faka Darwin ke ina fakamahino.”

Ko “Te Leʼo ʼo Loto”

 5. Koteā te aga ʼe tou fakatokagaʼi tuʼumaʼu ʼe fai e te hahaʼi?

⁵ ʼE fakahā e te Polofesea ko Collins ia te faʼahi ʼo te tokaga ʼaē ʼo ʼihi ki ʼihi: “Ko te leʼo ʼo loto ʼe ina uga tātou ke tou tokoni ki ʼihi tatau aipē peʼe mole liufaki mai ia totatou ʼofa ʼaia ʼaē ʼe tou fai kiā nātou.” a Ko tana talanoa ʼaē ki te “leʼo ʼo loto,” ʼe feala  ai ke tou manatuʼi ia te ʼu palalau ʼaenī ʼa te ʼapositolo ko Paulo: “Koteʼuhi kā fai e te hahaʼi ʼo te ʼu puleʼaga ʼaē ʼe mole iā nātou te lao, ia te ʼu meʼa ʼo te lao, ko te hahaʼi ʼaia logolā ʼe mole iā nātou te lao kae kua natou liliu ia nātou totonu ko he lao maʼa nātou. ʼE ko nātou totonu ʼaia ʼe natou fakahā ko te kakano ʼo te lao, ʼe tohi ʼi ʼonatou loto, kae ko ʼonatou leʼo ʼo loto ʼe natou fakamoʼoni pea mo fakahā te ʼuhiga ʼo nātou, ʼi tanatou ʼu manatu ʼa nātou totonu, peʼe ina faka lakahalaʼi peʼe ina faka lakatonuʼi ia nātou.”—Loma 2:14, 15.

 6. He koʼē ʼe tuʼu maʼua te hahaʼi fuli ki te Tupuʼaga?

⁶ ʼI tana tohi ki te kau Loma, neʼe fakahā e Paulo ko te hahaʼi ʼe natou tuʼu maʼua ki te ʼAtua koteʼuhi ʼe hā lelei ʼi te ʼu meʼa ʼaē neʼe ina faʼu ia Tona maʼuli moʼoni pea mo tona ʼu kalitātē. ʼE hā lelei te faʼahi ʼaia “talu mai te fakatupu ʼo te mālamanei.” (Loma 1:18-20; Pesalemo 19:1-4) ʼE moʼoni, ʼe tokolahi ʼe mole natou ʼiloʼi ia tonatou Tupuʼaga pea ʼe natou fai te ʼu aga fakalialia. Kae ko te finegalo ʼo te ʼAtua, ke mahino ia te hahaʼi ki tana faitotonu pea mo natou fakahemala mai tanatou ʼu aga ʼaē ʼe kovi. (Loma 1:22–2:6) Ko te kau Sutea neʼe tonu ke natou fai tāfito ia te faʼahi ʼaia, he neʼe foaki age e Moisese ia te Lao ʼa te ʼAtua kiā nātou. Kae māʼiapē lā mo te hahaʼi ʼaē neʼe mole natou maʼu ia “te ʼu folafola taputapu ʼa te ʼAtua,” neʼe tonu ke mahino kiā nātou, ʼe maʼuli moʼoni ia te ʼAtua.—Loma 2:8-13; 3:2.

7, 8. He koʼē ʼe fia fai ia te hahaʼi fuli ki te faitotonu, pea koteā tona faka ʼuhiga?

⁷ Ko te tupuʼaga tāfito ʼe tonu ai ki te hahaʼi fuli ke natou fakamoʼoni ʼe maʼuli moʼoni ia te ʼAtua pea mo natou fakalogo ki ai, heʼe natou logoʼi ʼi ʼonatou loto ki te leʼo ʼe feala ke ina ʼui age kiā nātou ia te meʼa ʼaē e lelei pea mo te meʼa ʼaē ʼe kovi. Ko tatatou fia fai ki te faitotonu, ʼe ko he fakamoʼoni ʼaia ʼe ʼi ai totatou leʼo ʼo loto. Tou toʼo he faʼifaʼitaki: Ko te ʼu tamaliki ʼe natou tuʼu fakaʼatu ʼo fakatalitali ke natou fakahoahoa ki te meʼa lū. Pea kā ʼalu he tamasiʼi ʼo lū, mole kei ina manatuʼi ia nātou ʼaē ʼe fakatalitali. Tokolahi te tamaliki ʼaē ʼe natou fakatalitali, ʼe natou ʼui fēnei: ‘Kaeā pē hana lū mo manatu ʼe ʼi ai ʼihi ʼe fakatalitali!’ Koia kotou fai ia te fehuʼi ʼaenī: ‘He koʼē māʼiapē lā mo te tamaliki ʼe natou fakahā mo nātou ia tanatou fia fai ki te faitotonu?’ ʼE hā mai ʼi tanatou aga ʼaia, ʼe ʼi ai tonatou leʼo ʼo loto. Neʼe tohi fēnei e Paulo: “Koteʼuhi kā fai e te hahaʼi ʼo te ʼu puleʼaga ʼaē ʼe mole iā nātou te lao, ia te ʼu meʼa ʼo te lao.” Neʼe mole ina ʼui ʼi henī: “Mo kanapau lā,” ohagē leva ko he meʼa ʼe tahitahiga tona hoko, kae neʼe ina fakaʼaogaʼi te kupu “koteʼuhi kā,” peʼe ko tona tahi faka ʼuhiga “mokā,” ʼo tou mahino ai ko he meʼa ʼe hoko tuʼumaʼu. Ko te hahaʼi ʼaē ʼe natou “fai . . . ia te ʼu meʼa ʼo te lao,” ko tona faka ʼuhiga neʼe uga nātou e tonatou ʼu leʼo ʼo loto ke natou maʼuliʼi te aga ʼaē ʼe tonu ke fai, ʼaē ʼe tou lau ʼi te lao ʼa te ʼAtua.

⁸ ʼE lahi te ʼu fenua ʼe ʼiloga ai te aga ʼaia ʼi te maʼuli ʼo te hahaʼi. Ko te polofesea ʼi Cambridge, neʼe ina ʼui ʼi te ʼu lēkula ʼa te kau Papiloni, mo te kau Esipito, pea mo te kau Keleka, ʼo fēia mo te kau Aborigènes ʼo Ositalalia pea mo te kau Amelika neʼe ʼi ai ia “te fakahā ʼo te ʼu agamālohi, te ʼu faifakapō, te ʼu aga fakakākā mo te ʼu loi, pea mo te ʼu fakatotonu ʼo ʼuhiga mo te agalelei ʼe tonu ke fai ki te hahaʼi mātutuʼa, mo te kau tūpulaga, pea mo te hahaʼi vaivavai.” Pea neʼe ʼui e te Polofesea ko Collins: “Ko te akonaki ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi, ʼe fai ʼi te mālamanei kātoa.” ʼE mole ʼalutahi koa lā ia te ʼu palalau ʼaia mo te manatu ʼaē iā Loma 2:14?

ʼE Feafeaʼi Te Gāue ʼo Tokotou Leʼo ʼo Loto?

 9. Koteā te leʼo ʼo loto, pea ʼe lava tokoni feafeaʼi atu ʼi muʼa ʼo hakotou fai he meʼa?

⁹ ʼE fakahā mai ʼi te Tohi-Tapu, ko te leʼo ʼo loto ʼe ko he fealagia ʼe kotou maʼu iā koutou takitokotahi ke kotou ʼiloʼi pea mo sivisivi takotou ʼu aga. ʼE hagē ko he leʼo ʼe haʼu mai tokotou loto, ʼo ina ʼui atu peʼe lelei peʼe kailoa te aga ʼaē ʼe kotou fai. Neʼe ʼui fēnei e Paulo ʼo ʼuhiga mo te leʼo ʼaia ʼi tona loto: “ ʼE fakamoʼoni mai ia toku leʼo ʼo loto pea mo au ʼi te laumālie māʼoniʼoni.” (Loma 9:1) Ohagē lā, ʼi muʼa ʼo hakotou fai he meʼa, kua kotou logoʼi ia te leʼo ʼaia. ʼE feala ki tokotou leʼo ʼo loto ke tokoni atu ke kotou sivisivi fakatomuʼa he gāue pea mo fakahā atu ia te meʼa ʼaē kā kotou logoʼi anai mo kapau ʼe kotou fai ia te gāue ʼaia.

10. Koteā te gāue ʼe fai tuʼumaʼu e totatou leʼo ʼo loto?

¹⁰ ʼI te agamāhani, hoki ʼosi te meʼa ʼaē neʼe kotou fai pea kotou logoʼi tokotou leʼo ʼo loto. ʼI te temi ʼaē neʼe feholaʼaki ai Tavite mai te Hau ko Saulo, neʼe feala pē hana fai ia he aga ʼe mole fakaʼapaʼapa ki te hau ʼaē neʼe fakanofo e te ʼAtua pea neʼe ina fai ia te faʼahi ʼaia. Kae ki muli age, “neʼe mataku te  loto ʼo Tavite.” (1 Samuele 24:1-5; Pesalemo 32:3, 5) ʼE mole fakaʼaogaʼi ʼi henī ia te kupu “leʼo ʼo loto,” kae neʼe ko te meʼa ʼaia ʼaē neʼe logoʼi e Tavite, neʼe vevele ia tona leʼo ʼo loto. Mo tātou fuli, ʼe tou logoʼi ia te taʼi hoha ʼaia ʼi totatou leʼo ʼo loto. Kā tou fai he meʼa, pea ki muli age kua hoha totatou leʼo ʼo loto ʼo ʼuhiga mo te aga ʼaē neʼe tou fai. Ko ʼihi ʼaē neʼe mole natou totogi tonatou ʼu tukuhau, ʼi te lahi fau ʼo te hoha ʼo tonatou ʼu leʼo ʼo loto, ki muli age neʼe natou huʼi tonatou ʼu maʼua. Ko ʼihi neʼe natou logoʼi ʼe tonu ke natou fakahā ki ʼonatou ʼohoana tanatou tono mo he tahi kehe. (Hepeleo 13:4) Koia kā kita mulimuli ki tokita leʼo ʼo loto, pea ʼe kita logoʼi ʼi tokita loto ia te fiafia pea mo tokalelei.

11. He koʼē ʼe feala ke kotou tuʼutāmakiʼia mokā ʼe ‘takitaki pē koutou e tokotou leʼo ʼo loto’? Kotou fakaʼaogaʼi he faʼifaʼitaki.

¹¹ Kae ʼe tonu pē koa ke ‘takitaki tātou e totatou leʼo ʼo loto’? ʼE lelei tatatou fakalogo ki totatou leʼo ʼo loto, kae ʼe feala pē ke mole lelei tana takitaki ʼaē ia tātou. ʼE feala ke tou hehē ʼi te leʼo ʼo te ‘tagata ʼaē ʼi totatou loto.’ (2 Kolonito 4:16) Tou toʼo he faʼifaʼitaki. ʼE fakamatala ʼi te Tohi-Tapu ʼo ʼuhiga mo Setefano, ko he tisipulo agatonu ʼa Kilisito, neʼe “fonu ʼi te tui pea mo mālohi.” Ko ʼihi Sutea neʼe natou lī ia Setefano ki tuʼa ʼo Selusalemi pea natou tuki makaʼi ki te mate. Ko Saulo (ʼaē ki muli age neʼe liliu ko te ʼapositolo ko Paulo) neʼe tuʼu ovi kiā nātou pea “neʼe lagolago ki te fakapōgi ʼo” Setefano. ʼI te tui papau ʼa te kau Sutea neʼe faitotonu ia te meʼa ʼaē neʼe natou fai, neʼe mole vevele pē lā ia tonatou ʼu leʼo ʼo loto. Neʼe lagi toe fēia mo te faʼahi ʼo Saulo, heʼe ki muli age neʼe “kei ina fai te ʼu fakamatakutaku pea mo te ʼu fai fakapō ʼo fakafeagai ki te kau tisipulo ʼa te ʼAliki.” ʼE mahino ia, neʼe mole heʼeki lelei tona takitaki ʼaē e tona leʼo ʼo loto.—Gāue 6:8; 7:57–8:1; 9:1.

12. Koteā lā he ʼaluʼaga neʼe feala ai ke ina fakahehē ia tatatou leʼo ʼo loto?

¹² Koteā ʼaē neʼe feala ke ina fakahehē ia te leʼo ʼo loto ʼo Saulo? Neʼe lagi ko tana fakakaugā ʼaē mo ʼihi. Tokolahi iā tātou, neʼe lagi kua tou fai telefoni mo he tahi pea ʼi tatatou fakalogologo ki tana palalau mai, ʼe tatau ʼosi tona leʼo mo ʼaē ʼo tana tamai. Neʼe lagi tupu ake pē mo te faʼahiga leʼo ʼaia, kae neʼe lagi ina toe fia faʼifaʼitakiʼi ia te faʼahiga palalau ʼo tana tamai. ʼO toe fēia mo Saulo, neʼe lagi fēia tana aga ʼuhi ko tana fakatahi ki te kau Sutea ʼaē neʼe fehihiʼa kiā Sesu pea mo fakafeagai ki tana ʼu faiakonaki. (Soane 11:47-50; 18:14; Gāue 5:27, 28, 33) Neʼe lagi ko te ʼu kaumeʼa ʼo Saulo ʼaē neʼe natou fakahehē ia tona leʼo ʼo loto.

13. ʼE malave feafeaʼi ki totatou leʼo ʼo loto te maʼuli ʼo nātou ʼaē ʼe māʼuʼuli fakatahi mo tātou?

¹³ ʼE feala foki mo totatou leʼo ʼo loto ke hehē ʼi he agaʼi fenua peʼe ko te hahaʼi ʼaē ʼe māʼuʼuli fakatahi mo tātou, ohagē pē ko he tahi ʼe feala ke tou logo ʼi tana ʼu palalau ʼe tatau mo te faʼahiga palalau ʼo te hahaʼi ʼaē ʼe fakatahi kiai. (Mateo 26:73) Neʼe lagi hoko he meʼa fēia ʼo ʼuhiga mo te kau Asilia ʼo te temi muʼa. Neʼe natou logona ʼuhi ko tanatou kautau sōlia, pea ʼi tanatou ʼu fakatātā togi ʼe hā ai tanatou fakamamahiʼi ia te hahaʼi ʼaē neʼe natou pilisoniʼi. (Naume 2:11, 12; 3:1) ʼE fakamatala ʼo ʼuhiga mo te kau Ninive ʼo te temi ʼo Sonasi ohagē ko ni hahaʼi neʼe mole natou ʼiloʼi “te kehekehe ʼo tonatou nima mataʼu pea mo tonatou nima hema.” Ko tona faka ʼuhiga neʼe mole ʼi ai hanatou lēkula ʼe totonu moʼo takitaki ʼo nātou ke natou ʼiloʼi ai ia te meʼa ʼaē ʼe lelei peʼe kovi ʼi te manatu ʼa te ʼAtua. Kotou fakakaukauʼi age muʼa ki he tahi neʼe lahilahi ake ʼi Ninive, neʼe lagi malave mālohi te manatu ʼaia ki tona leʼo ʼo loto! (Sonasi 3:4, 5; 4:11) ʼO toe fēia pē mo totatou temi, ʼe feala ke hehē te leʼo ʼo loto ʼa he tahi ʼuhi pē ko nātou ʼaē ʼe felōgoi mo ia.

ʼE Feafeaʼi Hatatou Akoʼi Fakalelei Ia Totatou Leʼo ʼo Loto?

14. ʼE fakamoʼoni feafeaʼi e totatou leʼo ʼo loto ia te ʼu palalau ʼaē iā Senesi 1:27?

¹⁴ Ko te leʼo ʼo loto, neʼe ko he meʼa ʼofa neʼe foaki e Sehova kiā Atama mo Eva, pea mai ia nāua neʼe tou maʼu ai totatou leʼo ʼo loto. Iā Senesi 1:27, ʼe ʼui mai neʼe faʼu te tagata ki te pāki ʼo te ʼAtua. ʼE mole ʼui leva neʼe faʼu tātou ohagē ko te sino ʼo te ʼAtua, heʼe laumālie ia kae tou kakano tātou. Ko te ʼui ʼaē neʼe faʼu tātou ki te pāki ʼo te ʼAtua, ko tona faka ʼuhiga ʼe tou maʼu tona ʼu kalitātē, ʼo kau ai mo te leʼo ʼo loto ʼe gāue. ʼE hā mai, ʼe feala ke tou fakamālohiʼi totatou leʼo ʼo loto, ke feala hatatou falala kiai. Ko tona faka ʼuhiga, ʼe tonu ke lahi tatatou ako ʼo ʼuhiga mo te Tupuʼaga, pea ke tou fakaovi kiā te ia.

15. Koteā lā he meʼa ke tou fai ke fua lelei kiā tātou ia tatatou ʼiloʼi tatatou Tamai?

¹⁵ Ko te Tohi-Tapu ʼe ina fakahā mai ʼe feala ke  tou ʼui ko Sehova ʼe ko he Tamai ʼa te hahaʼi fuli. (Isaia 64:8) Ko te kau Kilisitiano agatonu, peʼe ko nātou ʼaē kā māʼuʼuli ʼi selō peʼe ʼi te kele ʼi te palatiso, ʼe feala ke natou ʼui ko te ʼAtua ʼe ko hanatou Tamai. (Mateo 6:9) ʼE tonu ke tou fia fakaovi ki tatatou Tamai moʼo ako tana ʼu manatu pea mo tana ʼu lēkula. (Sake 4:8) Tokolahi ʼe mole natou fia fai ki te faʼahi ʼaia, koteʼuhi ʼe natou hagē ko te kau Sutea ʼaē neʼe ʼui fēnei e Sesu kiā nātou: “ ʼE mole heʼeki kotou logo ki tona leʼo pea mo sio peʼe feafeaʼi ia ia; pea ʼe mole nofo iā koutou tana folafola.” (Soane 5:37, 38) ʼE mole heʼeki tou logo ki te leʼo ʼo te ʼAtua, kae ʼi tatatou lau ia tana folafola ʼe feala ai ke tou ʼiloʼi ia tana manatu pea mo tou hagē ai ko ia, pea mo fai te meʼa ʼaē ʼe loto kiai.

16. Koteā ʼaē ʼe ʼasi mai ʼi te hisitolia ʼo Sosefo ʼo ʼuhiga mo te akoʼi pea mo te tokagaʼi ʼo totatou leʼo ʼo loto?

¹⁶ ʼE tou mahino ki te faʼahi ʼaia ʼi te hisitolia ʼo Sosefo ʼi te ʼapi ʼo Potifale. Neʼe faigaʼi e te ʼohoana ʼo Potifale ke ina fakahalaʼi ia Sosefo. Logolā neʼe maʼuli ʼi te temi neʼe mole heʼeki tohi ai ia he tohi faka Tohi-Tapu, pea neʼe mole heʼeki foaki ki Iselaele ia te ʼu Folafola e Hogofulu, kae neʼe ʼui fēnei e Sosefo: “ ʼE lava feafeaʼi anai haku fai te toe meʼa kovi ʼaia pea mo au agahala ki te ʼAtua?” (Senesi 39:9) Neʼe mole ina fai te faʼahi ʼaia ʼuhi pē ko tona fāmili he neʼe natou nonofo mamaʼo, kae neʼe ina fia fakafiafiaʼi tāfito ia te loto ʼo te ʼAtua. Neʼe mahino kiā Sosefo ia te lēkula ʼa te ʼAtua ʼo ʼuhiga mo te ʼohoana: ko he tagata e tahi ki he fafine e tahi, ʼo nā liliu ai ko te “kakano e tahi.” Pea lagi neʼe logo ki te fakamatala ʼo ʼuhiga mo Apimeleke, ʼi tana ʼiloʼi ʼaē neʼe kua ʼohoana ia Lepeka: kanapau lā neʼe ina toʼo ia Lepeka neʼe ko he aga ia ʼe kovi, ʼo feala ai ke ina fakatupu he malaʼia ki tana hahaʼi. Pea neʼe tapuakiʼi e Sehova ia Apimeleke, ʼo fēia mo Lepeka, ʼo hā ai tana manatu ʼaē ʼo ʼuhiga mo te tono. ʼI te mahino ʼa Sosefo ki te ʼu meʼa fuli ʼaia neʼe hoko, neʼe feala aipē ke mālohi tona leʼo ʼo loto, ʼo uga ia ia ke ina tekeʼi te ʼu felāveʼi fakasino heʼeʼaoga.—Senesi 2:24; 12:17-19; 20:1-18; 26:7-14.

17. ʼI tatatou faiga ʼaē ke tou tatau mo tatatou Tamai, he koʼē ʼe lelei age totatou maʼuli ʼi te faʼahi fakalaumālie ʼi te temi ʼaē ʼo Sosefo?

¹⁷ Kua lelei age ʼi te temi nei ia totatou maʼuli ʼi te faʼahi fakalaumālie. Kua tou  maʼu ia te Tohi-Tapu kātoa, pea kua feala ke tou ʼiloʼi ia te manatu ʼo tatatou Tamai pea mo te ʼu meʼa ʼaē ʼe loto kiai, ohagē ko te ʼu meʼa ʼaē ʼe ina leleiʼia pea mo te ʼu meʼa ʼaē ʼe ina tapuʼi mai. Kapau ʼe lahi te ʼu meʼa ʼaē ʼe tou ako ʼi te Tohi-Tapu, pea ʼe toe lahi age mo tatatou fia fakaovi ʼaē ki te ʼAtua pea mo tou fia faʼifaʼitakiʼi ia ia. Kapau ʼe tou fai ia te faʼahi ʼaia, pea ko totatou leʼo ʼo loto ʼe ina takitaki anai tātou ohagē ko te manatu ʼo tatatou Tamai. Kua ʼalutahi pē tana takitaki pea mo te finegalo ʼo te ʼAtua.—Efesi 5:1-5.

18. Logolā ʼe kei feala pē ke mulimuli totatou leʼo ʼo loto ki totatou maʼuli ʼāfea, kae koteā ʼaē ʼe feala ke tou fai moʼo akoʼi fakalelei totatou leʼo ʼo loto ke feala hatatou falala kiai?

¹⁸ Pea ʼe feafeaʼi ki te mulimuli ʼo totatou leʼo ʼo loto ki te ʼu ʼaluʼaga neʼe tou māʼuʼuli ai? Lagi neʼe tou mulimuli ʼi te ʼu manatu pea mo te ʼu aga ʼo totatou fāmili pea mo te hahaʼi ʼaē neʼe tou lahilahi ake mo nātou. Koia ʼaē, kua lagi fakaʼauʼauganoa totatou leʼo ʼo loto peʼe kua hehē ia. Kua takitaki tātou e totatou leʼo ʼo loto ohagē ko te hahaʼi ʼaē ʼe tou fakatahi kiai. ʼE mahino ia, ʼe mole feala hatatou fetogi ia totatou maʼuli ʼāfea, kae ʼe feala ke tou filifili lelei totatou ʼu kaumeʼa pea mo te hahaʼi ʼaē kā natou uga anai totatou leʼo ʼo loto ki he ʼu meʼa ʼe lelei. Ko te puleʼaki pē kiai, ke tou fakatahi tuʼumaʼu mo te kau Kilisitiano ʼaē ʼe natou faiga talu mai fualoa ke natou faʼifaʼitakiʼi tanatou Tamai. ʼE tou maʼu ʼi te ʼu fono ʼo te kōkelekāsio ia te ʼu faigamālie ke tou felōgoi ai mo nātou ʼi muʼa pea mo te hili ʼo te ʼu fono. ʼE feala ke tou tokagaʼi ia te ʼu manatu faka Tohi-Tapu ʼo totatou ʼu tehina mo tuagaʼane pea mo tanatou ʼu aga, ʼo toe kau ai mo tanatou fakalogo fakavilivili ki te fakahā age e tonatou ʼu leʼo ʼo loto ia te manatu pea mo te ʼu ala ʼa te ʼAtua. ʼAki te temi, ko te faʼahi ʼaia ʼe feala ke tokoni mai kiā tātou ke tou faka ʼalutahi totatou leʼo ʼo loto pea mo te ʼu pelesepeto ʼo te Tohi-Tapu, ʼo lahi age tatatou faʼifaʼitakiʼi ia te ʼulugaaga ʼo te ʼAtua. Kapau ʼe tou fakamāmāhani ke fakalogo ia totatou leʼo ʼo loto ki te ʼu pelesepeto ʼo tatatou Tamai pea mo faʼifaʼitakiʼi te agatonu ʼo totatou ʼu tehina mo tuagaʼane, ʼe feala ai anai ke lahi age tatatou falala pea mo tatatou fakalogo ki te meʼa ʼaē ʼe ina ʼui mai ke tou fai.—Isaia 30:21.

19. Ko te ʼu faʼahi fea ʼo te leʼo ʼo loto ʼaē ʼe kei ʼaoga ke tou tokagaʼi?

¹⁹ Ko ʼihi ʼe natou faigaʼi ʼi te ʼaho fuli ke natou tokagaʼi te takitaki ʼo tonatou leʼo ʼo loto. Ko te ʼalatike ʼaē kā hoa mai, ʼe tou vakaʼi ai anai te ʼu ʼaluʼaga neʼe tau mo te ʼu Kilisitiano. ʼI tatatou vakavakaʼi te ʼu ʼaluʼaga ʼaia, ʼe feala ai ke tou mahino lelei ki te gāue ʼaē ʼe fai e totatou leʼo ʼo loto, mo te tupuʼaga ʼo te mole tatau ʼo te ʼu leʼo ʼo loto, pea mo feafeaʼi hatatou tokagaʼi ke lahi age tatatou fakalogo ki tana takitaki.—Hepeleo 6:11, 12.

[Kiʼi nota]

Koteā ʼAē Neʼe Kotou Ako?

• He koʼē ʼe maʼu ʼi te ʼu agaʼi fenua fuli ia te ʼiloʼi ʼo te meʼa ʼaē ʼe totonu pea mo te meʼa ʼaē ʼe kovi, ʼaē ʼe ʼui ko te leʼo ʼo loto?

• He koʼē ʼe tonu ke tou tōkakaga ke ʼaua naʼa tou mulimuli pē ki te takitaki ʼo totatou leʼo ʼo loto?

• Ko te ʼu ʼaluʼaga fea ʼaē ʼe feala ai ke tou akoʼi fakalelei ia te leʼo ʼaē ʼe haʼu mai totatou loto?

[Fehuʼi]

[Paki ʼo te pasina 11]

Neʼe vevele ia te leʼo ʼo loto ʼo Tavite . . .

[Paki ʼo te pasina 11]

kae neʼe mole fēia ia Saulo ʼo Talesi

[Paki ʼo te pasina 12]

ʼE feala ke tou akoʼi ia totatou leʼo ʼo loto