ʼE Fakalogotahiʼi Te Hahaʼi ʼi Te Mālamanei Kātoa—ʼO Feafeaʼi?

ʼE KOTOU faka mahino feafeaʼi anai ia te kupu “logotahi”? Maʼa te hahaʼi, ʼe faka ʼuhiga pē ia te kupu ʼaia ki te mole ʼi ai ʼo he ʼu tokakovi. Ohagē lā, kapau ko he ʼu puleʼaga e lua peʼe laka atu neʼe natou sinie ia he pepa fakamoʼoni ʼo he tālaga neʼe natou fai ʼo ʼuhiga mo te tokalelei pea mo natou ʼio fakatahi ki te ʼu fakatuʼutuʼu fuli ʼaē neʼe tohi ai, ʼe feala pē ke ʼui ʼe natou logotahi. Kae ʼe ko te ʼaluʼaga ʼaia ʼe hoko moʼoni koa? Kailoa ia.

Kotou fakakaukauʼi age muʼa ia te faʼahi ʼaenī: Lolotoga te hisitolia ʼo te tagata, neʼe fai ia te lauʼi afe tālaga ʼo ʼuhiga mo te tokalelei kae neʼe mole pē lā fakahoko te ʼu faʼahi ʼaia. Koteā tona tupuʼaga? ʼE tupu te faʼahi ʼaia heʼe lahi pē te manatu ʼa te kau takitaki ʼo te mālamanei ki tonatou ʼu tuʼulaga pule, ʼi hanatou faiga ki te tokalelei peʼe ko te logotahi. Pea ʼe tuʼaniaʼi e ʼihi puleʼaga ia te meʼa ʼaē kā hoko anai kiā nātou mo kapau ʼe puleʼi nātou e he tahi ʼu mālohi faka sōlia.

Koia kā mole fetauʼaki ia he ʼu puleʼaga e lua, ʼe mole faka ʼuhiga ia ʼe nā logotahi pea mo nā tokalelei. Ko he ʼu tagata e toko lua ʼe nā fefakahagaʼaki ʼonā pikinini, ʼe nā tokalelei moʼoni koa ʼuhi pē heʼe mole heʼeki he tahi iā nāua kua ina kamosi tana fana? ʼE ko he manatu vale ia te ʼui ʼaē ʼe nā māʼuʼuli ʼi te tokalelei! Kae ʼe lahi te ʼu fenua ʼe ko tonatou ʼaluʼaga ʼaia iā ʼaho nei. Ko te tuputupu ʼo te mole fefalalaʼaki neʼe tupu ai te tuʼania ʼaē naʼa hoko he ʼaho ʼe fakaʼaogaʼi ai te ʼu mahafu. Koteā ʼaē neʼe fai moʼo tāʼofi naʼa hoko he meʼa fēia?

Te ʼu Tuʼania Ki Te ʼu Mahafu Faka Nukeleʼea—ʼE Fakatupu Kovi Ki Te Logotahi

Tokolahi te hahaʼi ʼe natou falala ki te Traité de non-prolifération nucléaire (TNP), ko te tālaga ʼo ʼuhiga mo te tāʼofi ʼo te faʼu ʼo te ʼu mahafu faka nukeleʼea. ʼI te tukuʼaki ʼo te tālaga ʼaia ʼi te taʼu 1968, neʼe tapuʼi te faʼu ʼo te ʼu mahafu faka nukeleʼea ʼi te ʼu fenua ʼaē mole heʼeki natou maʼu pea mo fakasiʼisiʼi tona faʼu ʼi te ʼu fenua ʼaē kua natou maʼu. Ko te fakatuʼutuʼu ʼo te TNP, ʼaē kua sinie ʼi te temi nei e te ʼu fenua e 180 tupu, ʼe ko te pulihi kātoa ʼo te ʼu mahafu.

Logolā ʼe ko he fakatuʼutuʼu lelei ʼaia ʼa te TNP, kae ki te manatu ʼa nātou ʼaē ʼe fakafifihi, ʼe faiga e te TNP ke mole faʼu e ʼihi fenua hanatou ʼu mahafu fēia. Koia, ʼe tuʼania ai naʼa ko ʼihi iā nātou ʼaē neʼe natou sinie ia te tālaga ʼaia, neʼe ʼi ai tanatou tahi fakakaukau. ʼI tona fakahagatonu, ʼe manatu e ʼihi fenua ʼe  heʼe faitotonu tanatou tapuʼi age ʼaē ke natou faʼu hanatou mahafu fēia kae ʼe feala pē ke ʼaoga moʼo natou haofaki.

Ko te faʼahi ʼe toe faigataʼa ʼaupitō ai te fihi ʼaia—ʼo lagi feala pē ke fakatupu tuʼutāmaki—heʼe mole ʼi ai he fenua neʼe tapuʼi kiai te faʼu ʼo te hila faka nukeleʼea. Ko ʼihi ʼe natou tuʼania te faʼahi ʼaia, heʼe ko te ʼu puleʼaga ʼaē ʼe lau ʼe natou fakaʼaogaʼi ia te hila faka nukeleʼea moʼo fakatuʼu ia te tokalelei, ʼe lagi feala pē ke natou faʼu fakafufū he ʼu mahafu faka nukeleʼea.

Māʼia mo te ʼu fenua ʼaē kua ʼi ai tanatou ʼu mahafu faka nukeleʼea ʼe feala pē ke natou meʼa noaʼi te TNP. ʼE ʼui e nātou ʼaē ʼe natou fakafifihi ki te TNP, ʼe mole ko he agapoto ia te fakaʼamu ʼaē ki te ʼu fenua ʼaē ʼe lahi ʼanatou mahafu faka nukeleʼea, ke natou pulihi kātoa peʼe ke natou fakasiʼisiʼi tanatou mahafu. ʼE ʼui fēnei ʼi te tohi: “Ke hoko ia te fakatuʼutuʼu ʼaia, . . . ʼe maʼua ia ki te ʼu fenua ʼaē ʼe tau fefihiʼaki ke iā nātou he toe felōgoi lahi pea mo he fefalalamālohiʼaki, [kae ko he meʼa ia ʼe faigataʼa hakita ʼamanaki] ʼe hoko anai ʼi he ʼaho.”

Logolā he ʼu faiga fakamālotoloto ʼa te tagata ke ʼi ai he logotahi, kae neʼe tō noa ia. ʼE mole punamaʼuli te kau ako ʼo te Tohi-Tapu ki te faʼahi ʼaia, heʼe ʼui ʼi te Folafola ʼa te ʼAtua: “ ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) ʼE toe ʼui fakahagatonu ʼi te Tohi-Tapu: “ ʼE ʼi ai te ala ʼe totonu ki te tagata, kae ko tona fakaʼosi ʼe ko te ala ki te mate.” (Tāʼaga Lea 16:25) ʼE fakatuʼakoi te ʼu faiga ʼa te tagata ke fakatuʼu te logotahi. Kae ʼe ʼi ai totatou ʼamanaki.

Te Matapuna ʼo Te Logotahi Moʼoni

ʼE maʼu ʼi te Tohi-Tapu ia te fakapapau ʼa te ʼAtua, ʼaē ʼe logotahi anai te mālamanei, kae mole fakahoko ʼaki te ʼu faiga ʼa te tagata. Ko te ʼAtua ʼaē neʼe ina fakatuʼutuʼu ke māʼuʼuli te hahaʼi ʼi te tokalelei ʼi te mālamanei kātoa, ʼe ina fakahoko anai te meʼa ʼaē ʼe mole lavaʼi e te tagata. Maʼa ʼihi hahaʼi, ʼe faigataʼa tanatou tui ki te faʼahi ʼaia. Kae neʼe ko te fakatuʼutuʼu ʼa te ʼAtua talu mai te kamataʼaga, ke maʼuli te tagata ʼi te tokalelei mo te faifaitahi. a ʼE lahi te ʼu vaega faka Tohi-Tapu ʼe fakamoʼoni ai ʼe mole heʼeki fetogi ia te fakatuʼutuʼu ʼa te ʼAtua ʼo ʼuhiga mo te logotahi ʼa te tagata. Koʼenī te ʼu faʼifaʼitaki:

• “Kotou ʼomai, ʼo kotou mamata ki te ʼu gāue ʼa Sehova, peʼe feafeaʼi tana fakahoko te ʼu meʼa fakaofoofo ʼi te kele. Neʼe ina fakagata te ʼu tau ʼo aʼu ki te potu taupotu ʼo te kele. ʼE ina fasifasiʼi te nahau pea mo maumauʼi te tao; ʼe ina tutu te ʼu sāliote ʼi te afi.”—PESALEMO 46:8, 9.

• “ ʼE mole fai anai he meʼa ʼe kovi pea ʼe mole fakatupu anai he maumau ʼi toku moʼuga māʼoniʼoni kātoa, heʼe fonu moʼoni anai te kele ʼi te ʼatamai mālama ʼo ʼuhiga mo Sehova ohagē ko te ʼuʼufi ʼo te tai e te ʼu vai.”—ISAIA 11:9.

• “ ʼE ina fakaʼauha moʼoni anai te mate ʼo talu ai, pea ʼe mahino papau ia, ko te Tuʼi ʼAliki ko Sehova ʼe ina holoholoʼi anai te ʼu loʼimata ʼi te ʼu fofoga fuli pē. Pea ʼe ina toʼo anai te lainoa ʼa tana hahaʼi ʼi te kele kātoa, he neʼe ʼui totonu e Sehova.”—ISAIA 25:8.

• “Ohagē ko tana fakapapau mai, ʼe tou talitali ki te ʼu lagi foʼou pea mo te kele foʼou ʼaē ʼe tonu ke nofo ai te faitotonu.”—2 PETELO 3:13.

• “[Ko te ʼAtua] ʼe ina holoholoʼi anai te ʼu loʼimata  fuli pē ʼi ʼonatou mata, pea ko te mate ʼe pulihi anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.”—FAKAHĀ 21:4.

ʼE feala hatatou falala ki te ʼu fakapapau ʼaia. Koteā tona tupuʼaga? Koteʼuhi ko Sehova ʼAtua ʼi tona ʼuhiga Tupuʼaga, ʼe ina maʼu te mālohi pea mo ina lavaʼi te fakalogotahiʼi ʼo te mālamanei. (Luka 18:27) Pea ʼe ina toe loto foki ke hoko ia te faʼahi ʼaia. ʼI te Tohi-Tapu, ʼe ‘leleiʼia e te ʼAtua ke toe fakatahiʼi ia meʼa fuapē iā Kilisito, te ʼu meʼa ʼaē ʼi te lagi pea mo te ʼu meʼa ʼaē ʼi te kele.’—Efesi 1:8-10.

Ko te fakapapau ʼa te ʼAtua ʼo ʼuhiga mo “he kele foʼou . . . ʼe tonu ke nofo ai te faitotonu” ʼe mole ko he fakaʼamu fēia pē. (2 Petelo 3:13) ʼO ʼuhiga mo te meʼa ʼaē neʼe kua fakapapau kiai ia Sehova ʼAtua, ʼe ina tala fēnei: “ ʼE mole toe liliu mai anai kiā te au kae mole hona ʼu fua, kae ʼe mahino papau ia ʼe ina fai anai te meʼa ʼaē kua au leleiʼia, pea ʼe lava lelei anai te meʼa ʼaē neʼe au fekauʼi kiai.”—Isaia 55:11.

Ko Te Logotahi ʼUhi Ko Te Folafola ʼa Te ʼAtua

Ohagē ko tona fakahā ʼi te ʼuluaki ʼalatike, ʼi te agamahani neʼe fakatupu e te ʼu lotu ia te ʼu mavetevete kae mole natou fakatupu te logotahi. Koia ʼaē ʼe tonu ai ke tou vakavakaʼi fakalelei ia te faʼahi ʼaia, heʼe kapau ʼe tou tui ʼe ʼi ai he Tupuʼaga, pea ʼe mole tou ʼamanaki koa lā ʼe maʼuli tokalelei anai pea mo logotahi ia nātou ʼaē ʼe ʼatolasio ki te ʼAtua?ʼE mahino ia!

Ko te ʼu maveuveu ʼaē ʼe fakatupu e te ʼu lotu, ʼe mole ko he fakaʼata lelei ʼaia ʼo Sehova ʼAtua pea mo tana Folafola. Kae ʼe ko te ʼu fua kovi ʼaia ʼo te takitaki ʼa te ʼu lotu, ʼaē neʼe natou lagolago ki te ʼu fakatuʼutuʼu ʼaē neʼe fai e te tagata ʼo ʼuhiga mo te logotahi, kae mole natou lagolago ki te finegalo ʼa te ʼAtua. Neʼe fakahigoaʼi e Sesu ia te kau takitaki lotu ʼo tona temi ko te “kau mālualoi,” pea neʼe ina ʼui age kiā nātou: “Neʼe tonu ai te lea faka polofetā ʼa Isaia kiā koutou, ʼi tana ʼui ʼaē: ‘Ko te hahaʼi nei ʼe natou faka maʼuhiga au ʼaki ʼonatou laugutu, kae mamaʼo ʼaupitō tonatou loto iā te au. ʼE ko he maumau noa pē ʼo tanatou haga fai mai kiā te au he tauhi, heʼe natou akonakiʼi te ʼu akonaki ʼe ko he ʼu fakatotonu fakatagata pē.’ ”—Mateo 15:7-9.

Kae ko te lotu moʼoni ia, ʼe ina fakalogotahiʼi ia te hahaʼi. Neʼe fakakikite fēnei e te polofetā ko Isaia: “ ʼE hoko moʼoni anai, ʼi te temi fakaʼosi ʼo te ʼu ʼaho, ko te moʼuga ʼo te fale ʼo Sehova ʼe fakatuʼu maʼu anai ʼi te tumutumu ʼo te ʼu moʼuga, pea ʼe mahino papau ia ʼe māʼoluga ake anai ia ʼi te ʼu moʼuga liliki; pea ko te ʼu fenua fuli ʼe natou ʼolo anai kiai. Pea ʼe ina fakahoko anai tana fakamāu ʼi te lotolotoiga ʼo te ʼu puleʼaga pea mo ina fakatokatoka anai te ʼu meʼa ʼa te hahaʼi tokolahi. Pea ʼe tonu anai ke natou tuki tanatou ʼu heletā ke liliu ko he ʼu huo laga kele pea mo tanatou ʼu tao ke liliu ko he ʼu pipi moʼo pakimaga. Pea ʼe mole hiki anai he heletā e he fenua ki he tahi fenua, pea ʼe mole natou toe ako anai te tau.”—Isaia 2:2, 4.

Iā ʼaho nei, iā fenua e 230 tupu, ʼe mulimuli ia te kau Fakamoʼoni ʼa Sehova ki te ako ʼe foaki mai e Sehova ʼAtua ʼo ʼuhiga mo te maʼuliʼi ʼaē ʼo te logotahi. Koteā ʼaē ʼe fakatafito kiai tanatou logotahi? Neʼe tohi fēnei e te ʼapositolo ko Paulo: “Kotou kofuʼi ia te ʼofa, he ko he noʼo haohaoa ia ki te logotahi.” (Kolose 3:14) Ko te kupu Faka Keleka ʼaē neʼe fakaʼaogaʼi e Paulo ʼo ʼuhiga mo te “noʼo,” ʼe feala ke faka ʼuhiga ki te ʼu ivi ʼo te sino ʼo te tagata. ʼE mālohi ia te ʼu ivi ʼaia ohagē ko he ʼu maea, pea ʼe natou gāue kiā potu e lua. ʼE natou faka fealagia ki te ʼu koga ʼo te sino ke pipiki maʼu, pea ke fehokohoko lelei ia te ʼu hui.

ʼE toe fēia pē mo te ʼofa. Ko te kalitātē ʼaia ʼe mole ina tāʼofi pē te hahaʼi ke ʼaua naʼa natou fematematehiʼaki, kae ohagē pē ko te ʼofa ʼaē neʼe maʼu e Kilisito, ʼe ina faka fealagia ki te hahaʼi ʼo te ʼu haʼuʼaga kehekehe ke natou gāue fakatahi ʼi te tokalelei. Ohagē lā, ʼe ina faka fealagia ki te hahaʼi ke natou maʼuliʼi ia te Lēkula ʼAulo. Iā Mateo 7:12, neʼe ʼui e Sesu Kilisito: “Koia, ko te meʼa fuli pē ʼe kotou loto ke fai e te hahaʼi maʼa koutou, ʼe maʼua foki mo koutou, ke kotou toe fai fēia maʼa nātou.” Tokolahi ʼi tanatou mulimuli ki te lēkula ʼaia, neʼe feala ai hanatou tekeʼi ia tanatou fehiʼa ki he tahi lanu

“Kotou Femaʼuʼaki Te ʼOfa”

ʼE faiga fakamālotoloto te kau Fakamoʼoni ʼa Sehova ke natou fakamoʼoni ko nātou ko te ʼu tisipulo ʼa Kilisito, ʼo natou maʼuliʼi te ʼu palalau ʼaenī ʼa Sesu: “ ʼE ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.” (Soane 13:35) Neʼe hā ia te taʼi ʼofa ʼaia ʼi  he ʼu ʼaluʼaga makehe ʼi te ʼu temi ʼaē ʼe hoko ai te ʼu maveuveu faka politike pea mo te ʼu lanu. Ohagē lā, lolotoga te mātea ʼaē neʼe hoko ʼi Rwanda ʼi te taʼu 1994, neʼe fakahā e te kau Fakamoʼoni ʼa Sehova tonatou feʼofaʼaki. Ko te kau Fakamoʼoni Utu neʼe natou foaki tonatou maʼuli moʼo haofaki tonatou ʼu tehina Tutsi.

ʼE mahino ko he moemisi te manatu ʼaē ʼe feʼofaʼaki anai te ʼu puleʼaga pea ʼe iku ai anai ki te logotahi. ʼE fakamatala ʼi te Tohi-Tapu, ʼe fakahoko anai e te ʼAtua ia te faʼahi ʼaia ʼi tona temi totonu. Kae ʼi temi nei, kua lava kofuʼi e te hahaʼi ia te ʼofa pea mo natou logotahi ai.

Lolotoga te taʼu kua hili, neʼe fakaʼaogaʼi e te kau Fakamoʼoni ʼa Sehova iā hola e tahi miliale tupu moʼo ʼaʼahi ia te hahaʼi pea mo fai palalau mo nātou ki te Tohi-Tapu, pea mo fakahā kiā nātou ia tona ʼaoga ʼaē ki totatou maʼuli ʼi te temi nei. Ko te ʼatamai mālama totonu ʼo te Folafola ʼa te ʼAtua ʼe ina fakalogotahiʼi te ʼu toko lauʼi miliona hahaʼi, ko ʼihi iā nātou neʼe fefehihiʼaʼaki. ʼE ʼi ai te kau Alape mo te kau Sutea, mo te kau Alamenia mo te kau Tulukia, te kau Siamani mo te kau Lusia, pea mo te tahi atu ʼu faʼifaʼitaki.

ʼE kotou fia maʼu koa he tahi age ʼu fakamatala ʼo ʼuhiga mo te gāue ʼa te Folafola ʼa te ʼAtua, ia te Tohi-Tapu ki te fakalogotahiʼi ʼo te hahaʼi? Kapau koia ʼaia, kotou faigaʼi ke kotou felāveʼi mo te kau Fakamoʼoni ʼa Sehova ʼo tokotou kolo, peʼe kotou faitohi ʼo faka tuʼasila ki he tuʼasila ʼe tohi ʼi te pāsina 2.

[Kiʼi nota]

[Fakamatala ʼo te pasina 4]

Ko te lauʼi afe tālaga ʼo ʼuhiga mo te tokalelei kae neʼe mole pē lā fakahoko te ʼu faʼahi ʼaia

[Fakamatala ʼo te pasina 7]

Ko te maʼuliʼi ʼo te ʼu pelesepeto ʼi te Tohi-Tapu, ʼe ina fakahoko ia te meʼa ʼaē ʼe mole lavaʼi e te ʼu puleʼaga

[Paki ʼo te pasina 5]

ʼE fakahā e te Folafola ʼa te ʼAtua ia te Matapuna ʼo te logotahi moʼoni

[Paki ʼo te pasina 7]

Ko te fale fono ʼe laga fakatahi e te kau Fakamoʼoni ʼa Sehova Utu mo Tutsi