Koteā ʼAē ʼe ʼAoga Ki Tokotou Maʼuli?

KO KENNY neʼe gāue ʼi te sōsiete ʼe haʼele lelei, ʼe totogi pea mo fakatau te ʼu ʼapi, pea neʼe ʼi ai tana foʼi motokā totogi kovi, pea mo nofo ʼi tona foʼi koga fale ʼi te kolo maʼuhiga neʼe māʼuʼuli ai te hahaʼi maʼu koloa. Neʼe faiva ʼi te fakatō fakamalu, pea neʼe fiafia makehe ʼi tana fakatotō ifo mai te vakalele ki te kele. Ko te ʼu meʼa fuli ʼaia neʼe ina maʼu pea mo fai, neʼe fakatupu fiafia ai koa ki tona maʼuli? ʼI te sulunale The Wall Street Journal, neʼe ina ʼui fēnei ai: “Ko toku taʼu 45, kae ʼe mole ʼi ai pē lā he kā haʼu ʼo toku maʼuli. . . . ʼE vaʼiganoa toku maʼuli.”

Ko Elyn, neʼe gāue kinakina ke liliu ʼo poto lelei ʼi te fakaheheke ʼi te ʼaisi. Pea neʼe fua tana ʼu faiga he neʼe liliu ai ʼo ʼiloa. Neʼe maʼu e Elyn ia te logona ʼaē neʼe fakaʼamu kiai. Kae neʼe hoi tona loto, ʼo ina ʼui fēnei: “ ʼE ʼifea te toe fiafia lahi ʼaē neʼe au fakaʼamu ke au logoʼi ʼi toku loto? ʼE au logoʼi pē taku nofo tokotahi. ʼE au finematuʼa anai, pea logolā taku maʼu falā, kae ʼe vaʼiganoa anai ia toku maʼuli mo kapau neʼe ko te fakatuʼutuʼu pē ʼaia ʼo toku maʼuli.”

Neʼe ʼiloa ia Hideo ʼi tona faiva fai pena pāki, pea ʼi tona maʼuli kātoa neʼe tokaga pē ia ki tana  gāue ʼaia. Neʼe mole ina fakatau tana ʼu pāki, heʼe ʼi tana manatu ʼe meʼa noaʼi ai anai tona faiva ʼi te fai pena pāki. Pea ʼi te fakaʼosi ʼo tona maʼuli, ʼi tona taʼu 98, neʼe lahi te ʼu pāki ʼaē neʼe ina pena, neʼe ina foaki ki te fale tānakiʼaga mātaga. Neʼe ina fakaʼaogaʼi tona maʼuli kātoa ki tana fai pena. Kae neʼe mole ina maʼu ai pē lā ia he fiafia, heʼe ʼi tana manatu neʼe mole heʼeki feʼauga ia te lelei ʼaē ʼo tana fai pena pāki.

Ko ʼihi neʼe natou lagolago mālohi ki te ʼu tokoni ʼaē ʼe fai ki te hahaʼi. Ohagē lā ko te tagata pule ki te ʼu fai ʼata ʼaē ʼi Hollywood. Neʼe hoa atu ia ki te pelesitā ʼo te sōsiete ʼe kau ki te ʼu sōsiete lalahi fai ʼata ʼi Amelika, pea neʼe felōgoi mo te ʼu hahaʼi ʼiloa pea neʼe nofo ʼi te ʼu fale matalelei pea mo totogi kovi ʼaupitō. ʼI tana ʼalu ʼo mālōlō ʼi te fenua ʼo Kamopotia, neʼe ʼalu age te kiʼi taʼahine ki te fale kafe ʼi Phnom Penh ʼo te temi kai afiafi, ʼo kole falā age ki ai. Neʼe ina foaki age tana foʼi falā pea mo tana meʼa ʼinu. Neʼe fiafia ia te kiʼi taʼahine. Kae ʼi te ʼapogipogi afiafi, neʼe toe liliu age te kiʼi taʼahine, ʼo toe kole falā age ki ai. Neʼe mahino ai leva ki te tagata ʼaia, neʼe tonu ke toe maʼuhiga age ia te tokoni ʼaē ke ina fai.

Hili te taʼu kātoa kiai, neʼe fakatotonu e te tagata pule ʼaia ke fetogi gāue—ke mavae ʼi te ʼu fale ʼaia neʼe fai ai te ʼu ʼata maʼa te hahaʼi, kae tokoni ki te hahaʼi māsisiva ʼi Kamopotia. Neʼe ina fakatuʼu he faleako ke maʼu ai e te tamaliki māsisiva honatou nofoʼaga, mo hanatou meʼa kai pea mo akoʼi ai nātou. Kae logolā te ʼu faʼahi fuli ʼaia, neʼe maʼuli hoha ia, heʼe logolā te fiafia ʼaē neʼe ina maʼu ʼo ʼuhiga mo te ʼu meʼa ʼaē neʼe ina fai, kae ʼi te tahi ia faʼahi, neʼe lotomamahi, ʼuhi ko te ʼu tuʼuga fihifihia ʼaē neʼe tau mo ia.

Ko te foʼi toko fā ʼaenī neʼe tou talanoa kiai, ʼi tanatou manatu neʼe kua natou ʼiloʼi ia te meʼa ʼaē ʼe ʼaoga ki tonatou maʼuli. Kae ʼi tanatou kua ʼosi fakahoko tanatou ʼu fakatuʼutuʼu ʼaē neʼe natou gāue kinakina kiai, ʼe mole pē lā natou fiafia ai. Koteā ʼaē ʼe ʼaoga ki tokotou maʼuli? Koteā ʼaē ʼe kotou fakamuʼamuʼa ʼi tokotou maʼuli? ʼE kotou ʼiloʼi papau koa ʼe mole kotou fakahemala anai ʼo ʼuhiga mo takotou faʼahiga fakaʼaogaʼi ʼaē ʼo tokotou maʼuli?