“Kotou Tutuʼu Ke Maʼu Pea Mo Kotou Mamata Ki Te Haofaki ʼa Sehova”

“ ʼE nofo Sehova mo au; ʼe mole au mataku anai. Koteā ʼaē ʼe feala ke fai mai e te tagata ʼaē neʼe toʼo mai te kele?”—Pesalemo 118:6.

 1. Ko te ʼu ʼaluʼaga fakamataku fea ʼaē ʼe ʼamanaki hoko anai ki te mālamanei?

 IĀ ʼAHO nei, ʼe ʼamanaki hoko anai ki te mālamanei te ʼu ʼaluʼaga fakamataku neʼe mole heʼeki hoko ki muʼa atu. ʼI tana fakakikite ia te ʼu ʼaluʼaga ʼaia ki totatou temi, neʼe fai e Sesu ia te fakatokaga ʼaenī ki tana ʼu tisipulo: “[ʼE] ʼi ai anai te mamahi lahi, ʼe mole hona tatau kua hoko talu mai te kamataʼaga ʼo te mālamanei ʼo kaku mai ki te temi nei, kailoa, pea ʼe mole toe hoko anai he tahi mamahi fēia. ʼIo, kā nā neʼe mole fakanounou lā te ʼu ʼaho ʼaia, ʼe mole hao anai he kakano; kae ʼuhi ko nātou ʼaē neʼe fili, ko te ʼu ʼaho ʼaia ʼe fakanounou anai.”—Mateo 24:21, 22.

 2. He koʼē ʼe mole heʼeki hoko mai te mamahi lahi?

² Logolā ʼe mole lava sio kiai ia te tagata, kae ko te ʼu ʼāselo ʼaē ʼi te lagi, ʼe natou lolotoga tāʼofi te hoko mai ʼo te mamahi lahi ʼaia. ʼI te meʼa ʼaē neʼe fakahā age e Sesu ki te ʼapositolo ko Soane, neʼe ina maʼu ia te pilivilēsio ʼaē ke mahino pe koʼē ʼe tāʼofi e te kau ʼāselo te hoko mai ʼo te mamahi lahi. ʼE fakamatala fēnei e te ʼapositolo ʼaē kua matuʼa ia te meʼa ʼaē neʼe sio kiai: “Neʼe au sio ki te ʼu ʼāselo e toko fā ʼe tutuʼu ʼi te ʼu potu ʼaē e fā ʼo te kele, ʼo natou tāʼofi maʼu ia te ʼu matagi ʼaē e fā ʼo te kele. . . . Pea neʼe au sio ki te tahi ʼāselo ʼe hake ake mai te hopoʼaga ʼo te laʼā, ʼe iā te ia te meʼa fakaʼiloga ʼo [te] ʼAtua maʼuli; pea neʼe kalaga leʼo mālohi ki te ʼu ʼāselo ʼaē e toko fā. . . . ‘ ʼAua naʼa kotou fai he meʼa ʼe kovi ki te kele peʼe ko te tai peʼe ki te ʼu fuʼu ʼakau, ʼo aʼu ki te ʼosi ʼo te fakaʼiloga ʼo te ʼu kaugana ʼo totatou ʼAtua ʼi tonatou ʼu laʼe.’ ”—Fakahā 7:1-3.

 3. Koteā ʼaē kā ʼuluaki hoko ʼi te mamahi lahi?

³ Kua vave ʼosi ia te fakaʼiloga fakamuli “ ʼo te ʼu kaugana [fakanofo] ʼo totatou ʼAtua.” Kua fakaovi mai te ʼaho ʼaē kā tuku age ai e te ʼu ʼāselo e toko fā ia te ʼu matagi ʼaia kā natou fakahoko ia te fakaʼauha. Kā natou tuku age anai ia te ʼu matagi ʼaia, koteā ʼaē kā ʼuluaki hoko? ʼE tali fēnei e te ʼāselo: ‘ ʼE lī fakatevili anai ia Papiloni te kolo lahi, pea ʼe mole toe maʼu anai ia ia ʼi he ʼaho.’ (Fakahā 18:21) ʼE hoko anai he toe fiafia lahi ʼi te lagi, ʼi te temi ʼaē kā fakaʼauha ai ia te kautahi faka mālamanei ʼo te ʼu lotu hala!—Fakahā 19:1, 2.

 4. Koteā te ʼu ʼaluʼaga kā ʼamanaki hoko mai?

⁴ Ko te ʼu puleʼaga fuli ʼo te kele ʼe natou fakatahitahi anai moʼo fakafeagai ki te hahaʼi ʼa Sehova. ʼE ʼi ai anai koa he fua ʼo te faiga ʼa te ʼu puleʼaga ke natou molehi ia te kau Kilisitiano agatonu ʼaia? ʼE hagē anai ʼe natou lava fakahoko ia te faʼahi ʼaia. Kae koʼenī! Ko te ʼu kautau ʼi selō ʼaē ʼe natou muliʼi ia Kilisito Sesu ʼe natou fakaʼauha anai ia te ʼu mālohi fakatagata ʼaia. (Fakahā 19:19-21) Moʼo fakaʼosi, ʼe lī anai ia te Tēvolo pea mo tana kau temonio ki te vanu fakatātā, ʼaē ʼe mole feala ai ke natou fai he meʼa. ʼE mole toe feala anai ke natou fakahēʼi ia te hahaʼi, heʼe haʼi anai nātou lolotoga taʼu e afe. ʼE mahino ia ʼe maʼu anai he fakaloto fīmālie lahi e te hahaʼi tokolahi ʼaē kā natou hao ʼi te ʼaho ʼaia!—Fakahā 7:9, 10, 14; 20:1-3.

 5. Ko te fiafia fea ʼaē kā maʼu anai e nātou ʼaē ʼe nonofo agatonu kiā Sehova?

⁵ Kua vave hoko mai te temi ʼaē kā tou sisio ai ki te hoko ʼo te ʼu ʼaluʼaga fakatalakitupua pea mo fakaofoofo ʼaia. ʼE ʼi ai tonatou pikipikiga fuli mo te temi ʼaē kā hoko ai ia te lagavaka ʼo ʼuhiga mo te pule faʼitaliha ʼa Sehova ʼi te ʼatulaulau. Pea tou fakakaukauʼi age muʼa ia te faʼahi ʼaenī:  kapau ʼe tou nonofo agatonu kiā Sehova pea mo tutuʼu ke maʼu ʼo lagolago ki tona pule faʼitaliha, pea ʼe tou maʼu anai ia te faigamālie ke tou kau ki te faka tapuhā ʼo te huafa ʼo Sehova pea mo te fakahoko ʼo tana fakatuʼutuʼu. ʼI toe fiafia lahi anai!

 6. ʼUhi ko te ʼu ʼaluʼaga ʼaē kā hoko mai, koteā ʼaē kā tou vakaʼi anai?

⁶ Kua tou nonofo teuteu koa ki te ʼu ʼaluʼaga maʼuhiga ʼaia? ʼE tou faka tui koa ʼe feala kiā Sehova ke ina haofaki tātou? ʼE tou falala koa ʼe tokoni anai kiā tātou ʼi tona temi totonu pea mo ina fai ʼi hona ʼaluʼaga ʼe lelei ʼaupitō? ʼI tatatou tali takitokotahi ki te ʼu fehuʼi ʼaia, ʼe feala ke tou manatuʼi te ʼu palalau ʼaē neʼe fai e te ʼapositolo ko Paulo ki te kau Kilisitiano ʼaē ʼi Loma: “Ko meʼa fuli ʼaē neʼe tohi ʼi te temi muʼa, neʼe tohi ia moʼo akoʼi ʼo tātou, koteʼuhi ke tou maʼu ia te ʼamanaki ʼaki tatatou faʼa kātaki pea mo te fakaloto fīmālie ʼaē ʼe haʼu mai te Tohi-Tapu.” (Loma 15:4) ʼI te ʼu meʼa ʼaē neʼe tohi moʼo akoʼi ʼo tātou, ʼaē ʼe tou maʼu ai te fakaloto fīmālie pea mo te ʼamanaki, ʼe kau ai ia te fakamatala ʼo te temi ʼaē neʼe haga ai ia Sehova ʼo faka ʼāteaina ia te kau Iselaele mai tonatou gaohi koviʼi e te kau Esipito aga fefeka. Ko he vakavakaʼi fakalelei ʼo te ʼu meʼa ʼaia neʼe hoko ʼi te haofaki e Sehova te ʼu foha ʼo Iselaele, ʼe ina fakaloto mālohi lahi anai tātou ʼi tatatou fakatalitali ki te mamahi lahi ʼaē ʼe fakaovi vave mai.

ʼE Haofaki e Sehova Tana Hahaʼi

 7. ʼI te taʼu 1513 ʼi muʼa ʼo totatou temi, neʼe feafeaʼi te ʼaluʼaga ʼaē ʼo Esipito?

⁷ Neʼe ko te taʼu 1513 ʼi muʼa ʼo totatou temi. Neʼe kua fakatō e Sehova ia te ʼu malaʼia e hiva ki te kau Esipito. ʼI te hiva malaʼia, neʼe fai e Falaone te fakatotonu ʼaenī kiā Moisese: “Mavae ʼi ʼoku muʼa! Tokaga kiā koe! ʼAua naʼa ke faiga ke ke toe sio ki toku fofoga, heʼe ko te ʼaho ʼaē kā ke sio ai ki toku fofoga, ʼe ke mate anai.” Neʼe tali fēnei e Moisese: “ ʼO mulimuli ki tau ʼu palalau, ʼe mole au toe faiga anai ke au sio ki tou fofoga.”—Ekesote 10:28, 29.

 8. Koteā ia te ʼu fakatotonu ʼaē neʼe fai ki te kau Iselaele ki tonatou haofaki, pea koteā ʼaē neʼe hoko?

⁸ Pea neʼe fakahā leva e Sehova kiā Moisese ʼe hoko anai te tahi malaʼia kiā Falaone pea mo te kau Esipito fuli, pea ʼe ko te malaʼia fakaʼosi. ʼI te ʼaho 14 ʼo Apipe (Nisani), ko te ʼu ʼalopoʼou ʼa te kau Esipito pea mo te ʼu ʼalopoʼou ʼa te ʼu manu fuli neʼe mamate. Kae neʼe hao te ʼu ʼapi ʼo te kau Iselaele, he neʼe natou mulimuli fakalelei ki te ʼu fakatotonu ʼaē neʼe tuku age e te ʼAtua kiā Moisese. Neʼe tonu ke natou vali te toto ʼo he ʼakeno ki te ʼu kaumatapā e lua pea mo te fuga matapā ʼo tanatou ʼu ʼapi pea mo natou nonofo maʼu ʼi tonatou ʼu loto fale. Koteā ʼaē neʼe hoko ʼi te pō ʼaia? ʼE ʼui fēnei e Moisese: “ ʼI te māʼupō, neʼe matehi e Sehova ia te ʼu ʼalopoʼou fuapē ʼi te fenua ʼo Esipito.” Neʼe pāui atu aipē e Falaone ia Moisese pea mo Alone, ʼo ina ʼui fēnei age kiā nāua: “Kolua tutuʼu ake, ʼo kolua mavae ʼi te lotolotoiga ʼo taku hahaʼi, . . . pea kotou ʼolo, kotou tauhi kiā Sehova, ohagē ko takolua ʼui.” Pea neʼe mavae atu aipē ia te kau Iselaele, ʼaē neʼe lagi ko te toko tolu miliona tupu, pea neʼe ʼolo fakatahi mo nātou ia te “toe hahaʼi  tokolahi pea mo kehekehe” ʼaē neʼe mole ko he kau Iselaele.—Ekesote 12:1-7, 29, 31, 37, 38.

 9. Ko te ala fea ʼaē neʼe taki ai e te ʼAtua ia Iselaele ʼi tanatou mavae ʼi Esipito, pea koteā tona tupuʼaga?

⁹ Ko te ala ʼaē neʼe ovi age maʼa te kau Iselaele neʼe ko te ala ʼaē neʼe fakalaka ʼi te Tai Metitelanea pea mo te fenua ʼo te kau Filisitini. Kae neʼe ko te ʼu fili ʼaia ʼo te kau Iselaele. Koia, ke lagi ʼaua naʼa laga tau ia tana hahaʼi, neʼe taki nātou e Sehova ʼi te toafa ʼo te Tai Kula. Logolā neʼe ko te toko lauʼi miliona kau Iselaele, kae neʼe natou haʼele fakatokatoka. ʼE ʼui fēnei ʼi te Tohi-Tapu: “Ko te ʼu foha ʼo Iselaele neʼe fakaʼatuʼatu ohagē ko hanatou ʼolo ki te tau, ʼi tanatou mavae ʼi te fenua ʼo Esipito.”—Ekesote 13:17, 18.

“Kotou Mamata Ki Te Haofaki ʼa Sehova”

10. He koʼē neʼe ʼui e te ʼAtua kiā Iselaele ke fakatuʼu tonatou nofoʼaga iā muʼa ʼo Pihahilote?

¹⁰ Pea neʼe hoko te meʼa fakapunamaʼuli. Neʼe ʼui fēnei e Sehova kiā Moisese: “Tala age ki te ʼu foha ʼo Iselaele, ke natou toe liliu mai pea mo fakatuʼu tonatou nofoʼaga iā muʼa ʼo Pihahilote, iā vaha ʼo Miketole pea mo te tai, ke natou haga ki Paale-sefone.” ʼI tanatou mulimuli ki te fakatotonu ʼaia, neʼe māpunusia te toe hahaʼi tokolahi ʼaia ʼi te lotolotoiga ʼo te ʼu moʼuga pea mo te Tai Kula. Neʼe hagē ia neʼe mole honatou holaʼaga. Kae neʼe ʼiloʼi lelei e Sehova te tupuʼaga ʼo tana fai ia te meʼa ʼaia. Neʼe ina ʼui fēnei kiā Moisese: “ ʼE au tuku moʼoni anai ke ʼuigataʼa te loto ʼo Falaone, ʼe ina tuli moʼoni anai nātou pea ʼe au fakakolōliaʼi anai ia au ʼaki ia Falaone pea mo tana ʼu kautau mālohi fuli; pea ʼe ʼiloʼi moʼoni anai e te kau Esipito ko au ia Sehova.”—Ekesote 14:1-4.

11. (a) Koteā ʼaē neʼe fai e Falaone, pea neʼe tali feafeaʼi e te kau Iselaele? (b) Neʼe tali feafeaʼi e Moisese ki te meo ʼa Iselaele?

¹¹ Neʼe manatu e Falaone neʼe faihala ʼi tana tuku ia te kau Iselaele ke natou mavae mai Esipito, koia neʼe ina tuli ai nātou ʼaki tana ʼu sāliote tau e 600 ʼaē ʼe lelei ʼaupitō. ʼI tanatou sisio ki te ʼu kautau ʼo Esipito, neʼe mātataku ai ia te kau Iselaele ʼo natou kalaga fēnei kiā Moisese: “ ʼE mole ʼi ai koa lā ni ʼu falemaka ʼi Esipito, ʼaē neʼe tupu ai tau ʼaumai ʼo mātou ki henī, ke matou mamate ʼi te toafa?” ʼI te falala ʼaē ʼa Moisese ko Sehova ʼe ina haofaki anai nātou, neʼe ina tali fēnei: “ ʼAua naʼa kotou mātataku. Kotou tutuʼu ke maʼu pea mo kotou mamata ki te haofaki ʼa Sehova, ʼaē kā ina fakahoko anai maʼa koutou ʼi te ʼaho nei. . . . Ko Sehova totonu ʼaē kā tau anai maʼa koutou, pea ʼe kotou nonofo fakalogologo anai.”—Ekesote 14:5-14.

12. Neʼe haofaki feafeaʼi e Sehova tana hahaʼi?

¹² Moʼo fakahoko ia te ʼu palalau ʼaē neʼe fai e Moisese, ʼaē ko Sehova totonu ʼaē kā tau maʼa te kau Iselaele, neʼe fakaʼaogaʼi ai leva e Sehova ia te ʼu mālohi fakalaumālie. Neʼe fai te milakulo e te ʼāselo ʼa Sehova, ʼo ina fakatuʼu ʼi muli ʼo te nofoʼaga ʼa Iselaele ia te ʼao moʼo takitaki nātou. Ko te ʼao ʼaia neʼe ina fakapōʼuligia ia te kau Esipito, kae neʼe ina fakamālamaʼi ia te kau Iselaele. (Ekesote 13:21, 22; 14:19, 20) ʼO mulimuli ki te fakatotonu ʼa te ʼAtua, neʼe faoʼi e Moisese tona nima pea koʼenī te meʼa ʼaē neʼe hoko: “Neʼe fakaholomuli e Sehova ia te tai ʼaki he tuʼani matagi ʼo te potu ʼesitē ʼi te pō kātoa. . . . Pea neʼe ʼolo te ʼu foha ʼo Iselaele ʼi te lotomālie ʼo te tai, ʼi te kele moamoa, pea ko te ʼu vai neʼe hagē ko he kaupā ʼi tonatou faʼahi mataʼu pea mo tonatou faʼahi hema.” Neʼe toe hoko atu e te kau Esipito tanatou tuli ia te kau Iselaele, kae neʼe lagolago ia Sehova ki tana hahaʼi. Neʼe ina fakatupu te maveuveu ʼi te nofoʼaga ʼo te kau Esipito, pea neʼe ina ʼui fēnei kiā Moisese: “Faoʼi tou nima ki te tai, ke mapeʼe ifo ia te ʼu vai ki te kau Esipito, ki tanatou ʼu sāliote pea mo tanatou ʼu tagata heka hōsi.” Neʼe fakaʼauha kātoa ia te ʼu kautau ʼo Falaone, pea neʼe mole hao he tagata sōlia e tahi!—Ekesote 14:21-28; Pesalemo 136:15.

Tou Tāʼofi He ʼu Ako Mai Te Haofakiʼi ʼo Iselaele

13. Neʼe tali feafeaʼi e te kau Iselaele ia tonatou haofaki?

¹³ Neʼe malave feafeaʼi ki te kau Iselaele ia tonatou haofaki faka milakulo ʼaia? Ko Moisese  pea mo te ʼu foha ʼo Iselaele neʼe natou hihiva, ʼo natou fakavikiviki kiā Sehova! Neʼe natou hihiva fēnei: “Ke au hiva kiā Sehova, heʼe kua ina fakaliliu ia ia ʼo māʼoluga ʼaupitō! . . . ʼE nofo hau anai ia Sehova ʼo aʼu ki he ʼu temi ʼe mole ʼiloʼi hona gataʼaga, ʼio, ʼo talu ai.” (Ekesote 15:1, 18) ʼEī, ko te meʼa ʼaē neʼe natou ʼuluaki manatu kiai, ʼe ko tanatou fakavikiviki ʼaē ki te ʼAtua. ʼI te ʼaluʼaga ʼaia neʼe hoko, neʼe hā ai ia te pule faʼitaliha ʼo Sehova.

14. (a) ʼAki te ʼu ʼaluʼaga ʼaē neʼe hoko ki Iselaele, koteā ʼaē ʼe tou ako ʼo ʼuhiga mo Sehova? (b) Koteā ia te vaega Tohi-Tapu ʼo te taʼu 2008?

¹⁴ Koteā te ako, mo te fakaloto fīmālie, pea mo te ʼamanaki ʼe tou maʼu mai te ʼu ʼaluʼaga fakaofoofo ʼaia neʼe hoko? ʼE mahino mai, ʼe feala kiā Sehova ke tokoni ki tana hahaʼi ʼi te ʼu temi ʼaē ʼe natou faigataʼaʼia ai. ʼE feala ke ina fakatokatoka ia te ʼu ʼaluʼaga fuli pē ʼaē ʼe hoko kiā nātou. Neʼe mole ko he faigataʼaʼia ia te Tai Kula maʼa Iselaele, he neʼe fakaʼaogaʼi e Sehova ia he tuʼani matagi mai te potu ʼesitē. Pea neʼe ina fakaʼauha ia te ʼu kautau ʼa Falaone ʼi te Tai Kula pē ʼaia. ʼI tatatou fakakaukauʼi ia te faʼahi ʼaia, ʼe feala ke tou toe fai mo tātou ia te ʼu palalau ʼaenī ʼa te tagata fai pesalemo: “ ʼE nofo Sehova mo au; ʼe mole au mataku anai. Koteā ʼaē ʼe feala ke fai mai e te tagata ʼaē neʼe toʼo mai te kele?” (Pesalemo 118:6) ʼE feala ke tou toe maʼu he loto fīmālie ʼi te ʼu palalau ʼaenī ʼa Paulo ʼe tuʼu iā Loma 8:31: “Kapau ʼe kau te ʼAtua mo tātou, pea ko ai ʼaē kā fakafeagai mai anai kiā tātou?” ʼE mahino ia ʼe tou maʼu he loto falala ʼaki ia te ʼu palalau ʼaia! ʼE natou fakasiʼisiʼi tatatou mataku pea mo tatatou lotolotolua kae ina fakafonu tātou ʼaki he loto ʼamanaki. Koia, ʼe tō lelei ai tatatou vaega Tohi-Tapu ʼo te taʼu 2008, ʼaē ʼe ina ʼui fēnei: “Kotou tutuʼu ke maʼu pea mo kotou mamata ki te haofaki ʼa Sehova”!—Ekesote 14:13.

15. He koʼē neʼe maʼuhiga ia te fakalogo ʼo ʼuhiga mo te haofaki ʼo Iselaele mai Esipito, pea he koʼē ʼe maʼuhiga iā ʼaho nei?

¹⁵ Koteā te tahi ako ʼe feala ke tou maʼu mai te Mavae ʼa Iselaele mai Esipito? ʼE tou ako ai ʼe tonu ke tou fakalogo kiā Sehova, tatau aipē peʼe koteā te meʼa ʼaē ʼe ina kole mai ke tou fai. Neʼe fakalogo ia te kau Iselaele ʼi tanatou mulimuli ki te ʼu naunau fuli ʼaē neʼe tonu ke teuteuʼi ki te Pāsikate. Neʼe natou fakalogo, ʼo natou nonofo maʼu ʼi tonatou ʼu loto fale ʼi te pō ʼo te ʼaho 14 ʼo Nisani. ʼI tanatou mavae leva ʼi Esipito, neʼe tonu ke natou “fakaʼatuʼatu ohagē ko hanatou ʼolo ki te tau.” (Ekesote 13:18) Iā ʼaho nei, ʼe maʼuhiga ʼaupitō ke tou mulimuli ki totatou takitaki ʼaē e “te tagata kaugana agatonu mo poto”! (Mateo 24:45) ʼE tonu ke tou fakalogo fakalelei ki te folafola ʼa te ʼAtua ʼaē ʼe ina ʼui fēnei mai ʼi ʼotatou tuʼa: “ ‘Koʼenī te ala. Kotou haʼele ai,’ mo kapau ʼe tonu ke kotou ʼolo ki te faʼahi mataʼu peʼe kapau ʼe tonu ke kotou ʼolo ki te faʼahi hema.” (Isaia 30:21) ʼI te ovi mai ʼo te mamahi lahi, ʼe lagi tuku mai anai te tahi ʼu fakatotonu. Ke feala hatatou hao ʼi te ʼu ʼaho faigataʼa  ʼaia, ʼe tonu anai ke tou haʼele ʼi te logotahi mo te tahi atu ʼu kaugana agatonu ʼa Sehova.

16. Koteā te ako ʼaē ʼe tou maʼu mai te faʼahiga takitaki ʼaē neʼe fai e te ʼAtua moʼo haofaki ia te kau Iselaele?

¹⁶ Kotou toe manatuʼi foki, neʼe taki e Sehova ia te kau Iselaele ki he ʼaluʼaga neʼe hagē ia kua natou tō ki he hele, he neʼe ko te ʼu moʼuga ʼi te tahi faʼahi pea mo te Tai Kula ʼi te tahi age faʼahi. Neʼe hagē ia neʼe mole ko he takitaki lelei ʼaia. Kae neʼe fai e Sehova ia te ʼu puleʼaki ki te ʼu ʼaluʼaga fuli ʼaē neʼe hoko, pea neʼe hoko lelei ia meʼa fuli pē, ʼo tupu ai te fakavikivikiʼi ʼo tona huafa pea mo te haofaki ʼo tana hahaʼi. Iā ʼaho nei, ʼe lagi mole tou faʼa mahino ki he ʼu fakatuʼutuʼu ʼo ʼuhiga mo tatatou kautahi, kae ʼe feala ke tou falala moʼoni ki te takitaki ʼaē ʼe fai e Sehova ʼaki tana kaugana agatonu. ʼI ʼihi temi, ʼe hagē ʼe mālo totatou ʼu fili. ʼUhi ko tatatou ʼu tuʼakoi, ʼe mole lagi feala ke tou mahino kātoa ki te ʼu meʼa ʼaē ʼe hoko. Kae ʼe feala kiā Sehova ke ina fetogi ia te ʼu meʼa ʼaē ʼe hoko ʼi tona temi totonu, ohagē pē ko tana fai maʼa te ʼu foha ʼo Iselaele.—Tāʼaga Lea 3:5.

Tou Falala Kiā Sehova

17. He koʼē ʼe feala ke tou falala kātoa ki te takitaki ʼa te ʼAtua?

¹⁷ Kotou fakakaukauʼi age muʼa ia te falala ʼaē neʼe maʼu e te kau Iselaele ʼi tanatou metitāsio ki te ʼao ʼaē neʼe hā ʼi te ʼuhu pea mo te afi ʼaē neʼe mū ʼi te pōʼuli? Neʼe hā ia neʼe takitaki tonatou fagona ʼaia e “te ʼāselo ʼa te ʼAtua moʼoni.” (Ekesote 13:21, 22; 14:19) Iā ʼaho nei, ʼe feala ke tou falala ko Sehova ʼe ina takitaki, mo puipui pea mo haofaki ia tana hahaʼi. ʼE tou lava falala ki te fakapapau ʼaenī: “[Ko Sehova] ʼe mole ina liʼaki anai tana hahaʼi agatonu. ʼE ina taupau anai nātou, ʼeī, ʼo aʼu ki he ʼu temi ʼe mole ʼiloʼi hona gataʼaga.” (Pesalemo 37:28) ʼAua naʼa galo kiā tātou ia te ʼu kautau ʼāselo mālolohi ʼaē ʼe natou tokoni ki te ʼu kaugana ʼa te ʼAtua iā ʼaho nei. ʼAki tanatou tokoni ʼaia, ʼe feala anai ke tou “tutuʼu ke maʼu pea mo [tou] mamata ki te haofaki ʼa Sehova.”—Ekesote 14:13.

18. He koʼē ʼe tonu ke tou “kofuʼi ia te teu tau kātoa ʼo te ʼAtua”?

¹⁸ Koteā ʼaē kā ʼaoga anai kiā tātou fuli ke feala hatatou “tutuʼu ke maʼu” ʼi te moʼoni? ʼE tonu ke tou kofuʼi ia te teu tau fakalaumālie ʼaē neʼe talanoa kiai ia Paulo ʼi tana tohi ki te kau Efesi. Kotou fakatokagaʼi, ʼe fakatotonu mai e te ʼapositolo ke tou “kofuʼi ia te teu tau kātoa ʼo te ʼAtua.” Kua tou kofuʼi koa ia te ʼu koga fuli ʼo te teu tau fakalaumālie ʼaia? ʼI te taʼu ʼaenī kā haʼu, ʼe lelei anai ke tou tahi vakavakaʼi ia tātou ke tou ʼiloʼi papau peʼe kua tou kofuʼi fakalelei ia te ʼu koga kehekehe ʼo te teu tau ʼaia. Ko totatou fili, ia Satana te Tēvolo, ʼe ina ʼiloʼi totatou ʼu vaivaiʼaga, pea ʼe ina fia popō fakafokifā ia tātou, peʼe ina faigaʼi ke ina tauʼi totatou puani ʼaē ʼe tou vaivai ai. ʼE tou “tau” mo te ʼu laumālie mālolohi pea mo agakovi. Kae ʼaki ia te mālohi ʼa Sehova, ʼe feala ke tou mālo!—Efesi 6:11-18; Tāʼaga Lea 27:11.

19. Kapau ʼe tou faʼa kātaki, koteā anai ia te pilivilēsio ʼaē kā lagi tou maʼu?

¹⁹ Neʼe ʼui fēnei e Sesu ki tana ʼu tisipulo: “ ʼAki takotou faʼa kātaki, ʼe kotou maʼu ai anai tokotou ʼu nefesi.” (Luka 21:19) ʼOfa pē ke tou kau iā nātou ʼaē ʼe natou faʼa kātaki ʼo nonofo agatonu ʼi te ʼu faigataʼaʼia, pea ʼaki ia te ʼofa makehe ʼo Sehova, ke tou maʼu ia te pilivilēsio ʼaē ke tou “tutuʼu ke maʼu pea mo [tou] mamata ki te haofaki ʼa Sehova.”

ʼE Kotou Tali Feafeaʼi Anai?

• Koteā ia te ʼu ʼaluʼaga fakaofoofo ʼaē kā ʼamanaki hoko?

• Neʼe fakahā feafeaʼi e Sehova neʼe feala ke ina haofaki tana hahaʼi ʼi te taʼu 1513 ʼi muʼa ʼo tatatou temi?

• Koteā ʼaē kua kotou fakatotonu ke kotou fai ʼi te kā haʼu?

[ʼU fehuʼi ʼo te ako]

[Paki ʼo te pasina 22]

Ko te vaega Tohi-Tapu ʼaenī ʼo te taʼu 2008: “Kotou tutuʼu ke maʼu pea mo kotou mamata ki te haofaki ʼa Sehova.”—Ekesote 14:13.

[Paki ʼo te pasina 19]

“Ko meʼa fuli ʼaē neʼe tohi ʼi te temi muʼa, neʼe tohi ia moʼo akoʼi ʼo tātou”

[Paki ʼo te pasina 20]

ʼI te ʼuigataʼa ʼa Falaone, neʼe hoko ai te tuʼutāmaki ki Esipito

[Paki ʼo te pasina 21]

Neʼe haofaki te kau Iselaele he neʼe natou fai ia meʼa fuli pē ʼaē neʼe fakatotonu age e Sehova