Neʼe Natou Foaki Ia Natou ʼAki He Loto Lelei—ʼi Norvège

ʼI TE ʼu taʼu ki muʼa atu, ko te taumatuʼa kua taʼu 40 tupu, ʼae ʼe higoa ko Roald pea mo Elsebeth, neʼe nā maʼuʼuli fimalie ʼi Bergen, te lua kolo lahi ʼo Norvège. Ko naua mo ʼanā tamaliki ʼe toko lua, ia Isabel pea mo Fabian, neʼe natou lagolago lelei ki te ʼu gaue ʼo te kokelekasio. ʼE tagata ʼafeā ia Roald kaʼe pionie ia Elsebeth, pea ʼe ko he ʼu tehina mo tuagaʼane faiva ia Isabel pea mo Fabian ʼi te minisitelio.

Kaʼe ʼi te mahina ʼo Sepetepeli 2009, neʼe fakatuʼutuʼu e te kiʼi famili ʼaia ke natou olo ʼo faifakamafola ʼi te vahaʼa katoa ʼi he koga meʼa ʼe mole hahaʼi ai te kau Fakamoʼoni ʼa Sehova. Koia neʼe folau ai ia Roald mo Elsebeth pea mo Fabian, ʼae ʼe taʼu 18 ki Nordkyn, ʼe ko he koga ʼe tuʼu ʼi Finnmark. ʼI te koga meʼa ʼaia, ʼi te kolo ko Kjøllefjord, neʼe natou faifakamafola ai mo ʼihi atu tehina mo tuagaʼane neʼe ʼomai ʼo lagolago ki te faifakamafola ʼi te koga meʼa ʼaia. Neʼe ui fenei e Roald: “ ʼI te kamata pe ʼo te vahaʼa ʼaia, neʼe au fiafia ʼi taku fai ia he ʼu fakatuʼutuʼu ke au alu ʼo faifakamafola lolotoga he vahaʼa katoa.” Kaʼe ʼi te vahaʼa pe ʼaia, neʼe hoha ia Roald. Kotea tona tupuʼaga?

 HE ALUʼAGA NEʼE HOKO FAKAFOKIFA

ʼE fakamatala fenei e Roald: “Neʼe kole mai e Mario, ia te pionie mai Finnmark, peʼe feala la ke matou olo ki te kolo ʼe higoa ko Lakselv, ʼo tokoni ki te kiʼi kokelekasio ʼe natou toko 23.” Neʼe punamaʼuli ʼo ʼuhiga mo te aluʼaga ʼaia. ʼE ina fakamahino fenei: “Neʼe kua mā manatu mo Elsebeth ke mā olo ʼo tokoni ki he kokelekasio ʼe mole hahaʼi ai te kau Fakamoʼoni, kaʼe ʼe hoki mā fakahoko anai ia te faʼahi ʼaia moka hoki mavae ʼamā tamaliki ʼi tomatou loto fale.” Kaʼe, ʼi te ʼu kiʼi ʼaho pe ʼae neʼe nā faifakamafola ai ʼi te koga meʼa ʼaia, neʼe fakatokagaʼi ai e Roald neʼe fia ako moʼoni e te hahaʼi ia te moʼoni ʼo ʼuhiga mo Sehova. Neʼe ʼaoga ʼi te moʼi temi pe ʼaia ia te tokoni kia natou. Pea ina ui fenei: “Neʼe hoha taku fakakaukau lolotoga ni po ʼuhi ko te aluʼaga ʼaia.” Pea neʼe ʼave e Mario ia Roald mo tona kiʼi famili ki Lakselv, ia kilometa ʼe 240 ʼi te potu saute ʼo Kjøllefjord. Neʼe loto e Mario ke sio mata ia te kiʼi famili ʼaia ki te kiʼi kokelekasio ʼaia.

ʼI Lakselv, neʼe fakamamata e Andreas, te tahi ʼi te ʼu tagata ʼafeā ʼe toko lua ʼo te kokelekasio, kia natou ia te koga meʼa pea mo te Fale Fono. Neʼe lelei ia tonatou fakatalitali e te kokelekasio pea neʼe natou fakaha age kia Roald pea mo Elsebeth, ʼe natou fakaʼamu ke natou ʼomai ʼo lagolago ki te ʼu gaue ʼo tanatou kiʼi kokelekasio. Pea neʼe ui age e Andreas kua ina fakatuʼutuʼu ia te gaue maʼa Roald pea mo Fabian. Kotea ʼae ka fai anai e te kiʼi famili ʼaia?

KOTEA ANAI TE TONU KA NATOU FAI ANAI?

ʼI te kamataʼaga, neʼe ui fenei e Fabian: “Neʼe mole au fia alu ki te koga meʼa ʼaia.” Neʼe mole fia mavae mai ʼona kaumeʼa lelei ʼi te moʼoni ʼae neʼe natou mahani ʼo alu ʼo maʼuli ʼi he kiʼi kolo veliveli. Pea neʼe heʼeki ʼosi tana ako ʼae ke liliu ko he tagata faihila. Kaʼe ʼi te temi ʼae neʼe kole age ai kia Isabel (ʼae neʼe taʼu 21) peʼe fia alu, neʼe ina ui fenei: “Neʼe ko te faʼahi ʼaia neʼe au fakaʼamu tuʼumaʼu ki ai.” Pea ki muli age, neʼe ina toe ui fenei: “ ʼI te lahi fau ʼo taku manatu ki te faʼahi ʼaia, ʼe au feʼuiʼaki peʼe tonu koa ke au alu. ʼE au manatuʼi anai koa ʼoku kaumeʼa? ʼE tonu koa ke au nofo ʼi taku kokelekasio heʼe lelei age pea mo au iloʼi lelei tona agaaga?” Kotea te manatu ia ʼa Elsebeth ʼo ʼuhiga mo te fakaafe ʼaia? Neʼe ina ui fenei: “Ki taku ia manatu, ko he gaue ia neʼe foaki mai e Sehova ki toku kiʼi famili, kaʼe neʼe au toe manatuʼi tomatou ʼapi ʼae neʼe toe fakafoʼou pea mo te ʼu koloa fuli neʼe matou maʼu lolotoga taʼu ʼe 25.”

ʼI te hili ʼo te vahaʼa ʼaia, neʼe toe liliu ia Roald pea mo tona kiʼi famili ki Bergen, kaʼe neʼe natou manatuʼi pe ia te ʼu tehina mo tuagaʼane ʼo Lakselv, ʼae ʼe natou vaha ia kilometa ʼe 2 100. Neʼe ui fenei e Elsebeth: “Neʼe au faikole liuliuga kia Sehova pea mo au taupau ʼaku felogoi mo ʼoku kaumeʼa ʼo matou vaevae te ʼu pakī pea mo te ʼu aluʼaga neʼe hoko.” Neʼe ui fenei e Roald: “Neʼe ʼaoga kia au he temi ke au fakakaukauʼi ai ia tamatou mavae. Neʼe au fakafuafua peʼe feala ia te faʼahi ʼaia. Peʼe feafeaʼi anai haku tokaga ki toku kiʼi famili? Neʼe lahi taku faikole kia Sehova pea mo au faipalalau mo toku kiʼi famili pea mo te ʼu tehina ʼae kua fakapotopoto.” Neʼe ui fenei e Fabian: “ ʼI taku manatu tuʼumaʼu ki te faʼahi ʼaia, neʼe mole he ʼuhiga ʼo taku fakafisi ki te fakaafe ʼaia. Neʼe au faikole tuʼumaʼu kia Sehova pea ʼaki te alu ʼo te temi neʼe ʼasilisili ai toku fia alu.” Kaʼe feafeaʼi kia Isabel? Neʼe ina toʼo tana selevise pionie moʼo teuteu ki tanatou mavae. Lolotoga tana pionie ia mahina e ono, neʼe ina fai tana ako Tohi-Tapu tokotahi pea ki muli age kua ina logoʼi kua feala tana alu.

NEʼE NATOU FAKAHOKO HE ʼU FAIGA KE LAVA ʼANATOU FAKATUʼUTUʼU

ʼI tanatou fakaʼamu ʼae ke natou olo faifakamafola ʼi te ʼu koga meʼa ʼae ʼe mole hahaʼi ai ia te kau Fakamoʼoni, neʼe natou faigaʼi ai ke lava ʼanatou fakatuʼutuʼu. Neʼe maʼu gaue lelei ia Roald, pea neʼe ina kole ia tona taʼu malolō. Kaʼe, neʼe kole age e tona patolo ke gaue ia vahaʼa ʼe lua pea malolō ia vahaʼa ʼe ono. Neʼe ui fenei e Roald: “Neʼe veliveli toku totogi kaʼe neʼe feʼauga pe.”

ʼE fakamatala fenei e Elsebeth: “Neʼe kole mai e toku ʼohoana ke au kumi he ʼapi ʼi Lakselv pea mo fakalue ia tomatou ʼapi ʼae ʼe tuʼu ʼi Bergen. Neʼe kinakina ia te maʼu ʼo he ʼapi, kaʼe ki muli age neʼe faifai pe ʼo maʼu. Neʼe toe maʼu e ʼamā tamaliki ʼanā gaue vaeluaʼi temi, ʼo feala ai ke nā tokoni ki te toʼo ʼo te meʼa kai pea mo te ʼuʼutu ʼo te penisini.”

Neʼe ui fenei e Isabel: “ ʼI te veliveli ʼo te kolo ʼae neʼe matou olo ki ai, neʼe faigataʼa ia te maʼu ʼo he gaue ke feala ke hoko atu ia taku pionie. ʼI ʼihi temi, neʼe au lotovaivai.” Kaʼe, ʼi tana tali ia te ʼu kiʼi gaue vaeluaʼi temi fuli (neʼe ina fai ia kiʼi gaue ʼe hiva lolotoga tona  ʼuluaki taʼu), neʼe feala ke ina totogi ia te ʼu meʼa ʼae ʼe ʼaoga ki ai. Kaʼe ʼe feafeaʼi ki te faʼahi ʼo Fabian? “Ke feala ke katoa ʼoku pepa faihila, neʼe tonu ke au ako gaue. Neʼe au maʼu ia te faʼahi ʼaia ʼi Lakselv. Ki muli age, neʼe maʼu toku pepa, pea neʼe maʼu taku kiʼi gaue vaeluaʼi temi ʼi te faihila.”

NEʼE FAKATUPUTUPU FEAFEAʼI E ʼIHI IA TANATOU MINISITELIO

Neʼe fia gaue ia Marelius pea mo tona ʼohoana ko Kesia ʼi te ʼu koga meʼa ʼae ʼe mole hahaʼi ai te kau Fakamoʼoni. Neʼe ui fenei e Marelius, ʼae kua taʼu 29 nei: “Neʼe tokoni mai ia te ʼu akonaki pea mo te ʼu fakafehuʼi ʼi te ʼu fakatahi lalahi, ke au fakatuputupu ia taku minisitelio.” Kaʼe kia Kesia ʼae ʼe taʼu 26, neʼe faigataʼa ia tana mavae mai tona famili ʼo alu ki he tahi age fenua. ʼE ina ui fenei: “Neʼe au tuʼania ʼi taku manatu ʼae ʼe au mamaʼo anai mai toku famili.” Kaʼe, neʼe gaue ia Marelius moʼo huʼi ia te maʼua ʼo te ʼapi. Neʼe ina ui fenei: “ ʼAki te tokoni ʼa Sehova, pea mo ʼaku faikole liuliuga ki ai ke tokoni mai ke au fakahoko he ʼu fetogi, neʼe feala ai ke mā fakahoko ʼamā fakatuʼutuʼu.” ʼUluaki, neʼe nā toʼo he temi ki te ako ʼo te Tohi-Tapu. Pea neʼe nā fakatau tonā ʼapi, mo nā mavae mai ʼanā gaue pea ʼi te mahina ʼo ʼAukusito 2011, neʼe nā olo ki te kolo ko Alta, ʼi te potu noleto ʼo Norvège. Koia, ke feala ke nā toʼo ia te ʼu meʼa ʼae ʼe ʼaoga kia naua ʼi tanā pionie, ʼe lolotoga gaue pilo ia Marelius, kaʼe gaue Kesia ia ʼi te fale koloa.

Ko Knut pea mo Lisbeth, ko he taumatuʼa kua taʼu 30 tupu, neʼe malave kia naua ia te ʼu fakamatala ʼae ʼe maʼu ʼi te ʼu Annuaire ʼo ʼuhiga mo natou ʼae ʼe natou olo ki te ʼu koga meʼa ʼae ʼe mole hahaʼi ai te kau Fakamoʼoni. Neʼe ui fenei e Lisbeth: “Neʼe tokoni mai te ʼu fakamatala ʼaia ke mā fakatuʼutuʼu ke mā olo ki he tahi age fenua, kaʼe neʼe au lotolotolua, heʼe ʼi taku manatu ʼe mole tuha ia mo au.” Kaʼe neʼe nā fakahoko he ʼu faiga ke lava tanā fakatuʼutuʼu. Neʼe ui fenei e Knut: “Neʼe mā fakatau tomā koga fale, pea neʼe mā olo ʼo nonofo ʼi te ʼapi ʼo taku faʼe ke feala hamā tatanaki hamā foʼi fala. Ke feala ke mā ʼahiʼahi ia te selevisi temi katoa ʼi he fenua matapule, neʼe mā olo ʼo gaue taʼu katoa ʼi te kokelekasio lea Fakapilitania ʼi Bergen, ʼo mā nonofo ʼi te ʼapi ʼo te faʼe ʼa Lisbeth.” Mole faʼa fualoa, neʼe folau leva ia Knut pea mo Lisbeth ki Ouganda. ʼE nā liliu mai ki Norvège ʼo gaue ia mahina ʼe lua ʼi te taʼu. Koia ʼe feʼauga pe ia tanā foʼi falā moʼo toʼo ʼaki tanā meʼa kai pea mo nā faifakamafola ʼi Ouganda lolotoga mahina ʼe hogofulu.

KOTOU ʼAHIʼAHI PEA MO KOTOU SISIO ʼE LELEI IA SEHOVA

Kaʼe kotea ʼae neʼe hoko kia natou ʼaia? Neʼe ui fenei e Roald: “ ʼE lahi age ia tomatou temi ʼae ʼe matou fakaʼaogaʼi fakafamili ʼi te koga meʼa ʼaia ʼo fakatatau ki tomatou maʼuli ʼi Bergen. ʼE malohi ʼamatou felogoi fakafamili. ʼE ko he tapuakina ia tamā sisio ki te tuputupu ʼo ʼamā tamaliki ʼi te faʼahi fakalaumalie. Neʼe fetogi ia tamatou faʼahiga sio ki te ʼu koloa fakamalama. ʼE mole kei faʼa maʼuhiga kia matou.”

Neʼe sio ia Elsebeth ki te maʼuhiga ʼo te ako ʼo he tahi age lea. Kotea tona tupuʼaga? ʼI te telituale ʼo te  kokelekasio ʼo Lakselv, ʼe ʼi ai te kiʼi kolo ko Karasjok, ʼe tuʼu ʼi te koga fenua ʼo te kau Sami, ko he ʼu hahaʼi mai te potu noleto ʼo te ʼu fenua ko Norvège, mo Suède mo Finlande pea mo Lusia. Ke feala hana faipalalau mo natou ʼaia, neʼe ʼaoga kia Elsebeth ke ina ako ia te lea ʼa te kau Sami. ʼI te temi nei kua ina lava fai he ʼu palalau nounou mo te hahaʼi ʼo te telituale ʼi te lea ʼaia. ʼE fiafia koa ʼi te gaue ʼi tana telituale foʼou ʼaia? Neʼe fiafia ʼi te fai ʼo te ʼu palalau ʼaeni: “ ʼE au fai ia ako Tohi-Tapu ʼe ono. Neʼe tonu pe ia ke au haʼu ki te fenua ʼaeni.”

Ko Fabian, ʼae ʼe lolotoga pionie nei pea kua faifekau fakaminisitelio, neʼe ina ui neʼe tokoni ia ia pea mo Isabel ki te ʼu tupulaga ʼe toko tolu ʼo tanā kokelekasio neʼe ʼaoga ki ai he fakalotomalohi ke natou faʼafai ʼi te ʼu gaue ʼo te kokelekasio. Kua faʼafai nei ia te ʼu tupulaga ʼaia ʼe toko tolu ʼi te minisitelio. Koia, kua papitema ia te foʼi toko lua pea neʼe nā pionie vaeluaʼi temi ʼi te mahina ʼo Malesio 2012. Ko te tahi neʼe lotovaivai ʼi te moʼoni, neʼe fakamalō kia Fabian mo Isabel ʼi tanā tokoni age. Neʼe ui fenei e Fabian: “Neʼe au fiafia ʼaupito ʼi tana fai mai te palalau ʼaia. ʼI meʼa fakafiafia leva takita tokoni ki he tahi!” Neʼe ui fenei e Isabel: “ ʼI te telituale ʼaia, neʼe au ʼahiʼahi pea mo au sio ai ʼe lelei ia Sehova.” (Pes. 34:9) ʼE ina toe ui fenei: “ ʼE au fiafia ʼaupito ʼi taku gaue ʼi te telituale ʼaeni.”

Kua maʼuli fakafeʼauga ia Marelius pea mo Kesia ʼi te temi nei pea kua lelei age tonā maʼuli. Kua toko 41 ia te kau faifakamafola ʼi te kokelekasio ʼo Alta. Neʼe ui fenei e Marelius: “ ʼI taku toe manatuʼi ia te faʼahi ʼaia, ʼe ko he fakalotomalohi ia te iloʼi ʼae kua fetogi ia tomā maʼuli. ʼE mā fakamalō kia Sehova ia tana foaki mai ia te fealagia ʼae ke mā pionie ʼi te koga meʼa ʼaeni. ʼE mole he tahi age meʼa ʼe fakatupu fiafia age.” Neʼe ui fenei e Kesia: “Neʼe malohi ai taku falala katoa ʼae kia Sehova, pea neʼe tokaga lelei kia maua. ʼI taku maʼuli mamaʼo mai ʼoku famili, neʼe malohi ai ʼamā felogoi fakataumatuʼa. Neʼe mole au fakahemala ʼi tamā fai ia te fakatuʼutuʼu ʼaia.”

Kotea ʼae neʼe hoko kia Knut pea mo Lisbeth ʼi Ouganda? ʼE fakamatala fenei e Knut: “ ʼE ʼaoga he temi ke kita mahani mo te agaaga maʼuli ʼo te fenua. Logo la ʼi ʼihi temi neʼe mole ʼi ai he vai mo he hila pea neʼe mā tau mo te ʼu mahaki, kaʼe ʼe lahi ʼamā ako Tohi-Tapu.” Neʼe ui fenei e Lisbeth: “ ʼI te ʼu tafaʼaki, ʼe ʼi ai te ʼu telituale neʼe heʼeki fai ai te gaue faifakamafola. Pea kā mā olo ki te ʼu telituale ʼaia, ʼe mā maʼu atu te ʼu hahaʼi ʼe natou lau te Tohi-Tapu pea ʼe natou kole mai ke fai hanatou ako Tohi-Tapu. Ko te akoʼi ʼo te Tohi-Tapu ki te ʼu hahaʼi agavaivai ʼaia, ʼe tou maʼu ai he fiafia ʼe mole hona fakatatau.”

ʼE ko he aluʼaga fakafiafia kia Kilisito Sesu, totatou Pule, ia tana sio mai te lagi ki te tuputupu ʼo te gaue faifakamafola pea kua mafola nei ʼi te ʼu potu fuli ʼo te kele. Ki te hahaʼi ʼa te ʼAtua, ʼe ko he pilivilesio ia te foaki ʼo natou totonu ke natou fakahoko ia te fakatotonu ʼa Sesu ʼae ke natou “fai ni tisipulo i te u puleaga fuli.”—Mat. 28:19, 20.

[Fakamatala ʼo te pāsina 6]

ʼE ʼaoga mai ia te ʼu tokoni Fakatohi-tapu ke tou teuteu ki te faifakamafola ʼi he koga meʼa ʼe mole hahaʼi ai te kau Fakamoʼoni

• Kotou kole kia Sehova ke ina fakalotomalohiʼi koutou pea mo kotou maʼu ia “te poto.”—Taag. 3:21; Filp. 2:13; Sakp. 1:5.

• Kotou kumi tokoni kia natou ʼae kua fakapotopoto. “Ko ae e nofo tuumau mo te kau poto e liliu anai o poto.”—Taag. 12:15; 13:20.

• Kotou fai hakotou fakatuʼutuʼu. “Ko ia ae e tokaga o teuteui ana fakatuutuu e ina iloi anai te mau koloa.”—Taag. 21:5.

• Kotou mulimuli ki ʼakotou fakatuʼutuʼu. Kotou “fai te mea ae e lelei.”—Pes. 37:3.

Kapau ʼe kotou fakahoko ia te faʼahi ʼaia, ʼe mahino papau ia, ʼe tapuakina anai koutou e Sehova.—Taag. 16:3.

[Mape ʼo te pāsina 3]

(Vakaʼi te nusipepa)

Kjøllefjord

Lakselv

Alta

Karasjok

Cercle Polaire Arctique

OSLO

Bergen

[Paki ʼo te pāsina 3]

Ko Roald pea mo Fabian

[Paki ʼo te pāsina 3]

Ko Elsebeth pea mo Isabel

[Paki ʼo te pāsina 5]

Ko Knut pea mo Lisbeth ʼe nā fai te ako ʼa te kiʼi famili ʼi Ouganda

[Paki ʼo te pāsina 5]

ʼE faifakamafola ia Marelius pea mo Kesia ki te fafine Sami ʼi Norvège

[Paki ʼo te pāsina 6]

“ ʼE malohi ʼamatou felogoi fakafamili.”—Roald