Ko ʼAfea Ka Hoko Mai Ai Te Puleʼaga?
“Moka kotou sisio anai ki te u mea fuli aia, ke kotou iloi kua ovi mai te Foha o te tagata, i te matapa.”—MAT. 24:33.
1, 2. (1) Kotea ʼae ʼe tupu ai tatatou mole manatuʼi pea mo tokagaʼi he meʼa? (2) Kotea ʼae ʼe tou iloʼi ʼo ʼuhiga mo te Puleʼaga ʼo te ʼAtua?
NEʼE lagi kua kotou fakatokagaʼi ʼe kehekehe te ʼu faʼahi ʼae ʼe manatuʼi e te hahaʼi ʼo ʼuhiga mo he aluʼaga. ʼO toe feia pe, ʼe lagi faigataʼa ki he tahi hana manatuʼi lelei pe kotea ʼae neʼe fakamahino age e te toketa ʼo ʼuhiga mo tona mahaki. Peʼe ko he tahi ʼe lagi mole ina maʼu ʼana kalavi peʼe ko ʼona matasioʼata, logo ai ʼe tuku pe ʼi ʼona muʼa. He ko ʼe ʼe hoko te ʼu aluʼaga ʼaia? ʼE ui e te kau faifekumi ʼe hoko ia te ʼu aluʼaga ʼaia moka tou faiga ke tou fai ia meʼa fuli ʼi he moʼi temi pe ʼe tahi. ʼO ha mai ai, ʼe feala pe ki totatou ʼuto ke tokaga tafitō ki he meʼa pe ʼe tahi.
2 ʼE toe hoko te ʼu aluʼaga feia ki te tokolahi ia ʼaho nei ʼo ʼuhiga mo te ʼu aluʼaga ʼae ʼe hoko ʼi te malama. ʼE lagi natou ui kua fetogi lahi te malama talu mai te taʼu 1914, kaʼe ʼe mole natou mahino ki tona fakaʼuhiga. ʼI tatatou ako ia te Tohi-Tapu, ʼe tou iloʼi ai neʼe kua hoko mai te Puleʼaga ʼo te ʼAtua ʼi te taʼu 1914 ʼae neʼe fakanofo Hau ai ia Sesu ʼi te lagi. Kaʼe, ko te faikole ʼae “Ke hoko mai tou Puleʼaga. Ke fai tou finegalo ʼi te kele, ohage ko selo” ʼe heʼeki fakahoko katoa ia. (Mat. 6:10, MN) ʼE fakahoko katoa anai moka fakaʼauha ia te malama agakovi ʼaeni. Pea ʼe hoki feala ai ke fakahoko ia te finegalo ʼo te ʼAtua ʼi te kele ohage pe ko selo.
3. Kotea ʼae ʼe tokoni mai ai tatatou ako ʼo te Tohi-Tapu ke tou mahino ki ai?
3 ʼE tou mahino ki te hoko moʼoni ʼo te ʼu lea fakapolofeta ʼi te temi nei, ʼuhi ko tatatou ako tuʼumaʼu ia te Folafola ʼa te ʼAtua. Koia ʼae ʼe tou kehekehe ai mo te hahaʼi tokolahi. Tupu ko tanatou maʼumaʼua fau, koia ʼae ʼe mole natou tokagaʼi ai te ʼu fakamoʼoni ʼae kua pule ia Sesu talu mai te taʼu 1914 pea mo tana kua vave fakaʼauha pe anai ia te malama agakovi ʼaeni. Kotou fai ia te fehuʼi ʼaeni: ‘ ʼE kei au tui koa kua tau ovi mai te fakaʼosi ʼo te malama ʼaeni pea ʼe fakamoʼoni koa ki ai ia te ʼu aluʼaga ʼae ʼe hoko ʼi te kele?’ Logo la ʼe heʼeki faʼa fualoa takotou kua papitema, kaʼe kotea ʼae ʼe kotou tokakaga tafitō ki ai? Tatau aipe pe kotea takotou tali, kaʼe tou talanoa kia tupuʼaga tafitō ʼe tolu ʼo tatatou iloʼi ʼae kua vave fakahoko pe anai te finegalo ʼo te ʼAtua ʼo ʼuhiga mo te kele.
KUA HA MAI TE KAU HEKA HOSI
4, 5. (1) Kotea ʼae ʼe lolotoga fai e Sesu talu mai te taʼu 1914? (Vakaʼi te ʼuluaki pakī.) (2) Kotea ʼae ʼe fakata ki ai te kau heka hosi ʼe toko tolu? Neʼe hoko feafeaʼi ia te lea fakapolofeta ʼaia?
4 ʼI te taʼu 1914, neʼe maʼu e Sesu Kilisito he kolona ʼi te lagi, ko tona fakaʼuhiga neʼe liliu ko te Hau ʼo te Puleʼaga ʼo te ʼAtua. ʼE talanoa ʼi te lea fakapolofeta ʼae ʼo te kapite 6 ʼo Apokalipisi, ko Sesu ʼe heka ʼi te hosi hina. ʼI tana liliu ʼo Hau, neʼe ina kamata atu aipe ia tana lele hosi ke malo ʼi te malama agakovi ʼa Satana. (Lau ia Apokalipisi 6:1, 2.) Neʼe fakakikite ʼi te lea fakapolofeta, ʼe hili pe anai te kamata tuʼu ʼo te Puleʼaga ʼo te ʼAtua, pea ʼe liliu vave anai te malama ʼo kovi age. Ohage la ko te tau, mo te hoge, mo te mahaki, pea mo ʼihi atu aluʼaga fakatupu mate ʼae kua laka age ia ʼi te temi muʼa. Ko te ʼu aluʼaga fakatupu mamahi ʼaia, ʼe fakata ʼi te lea fakapolofeta ki te kau heka hosi ʼe toko tolu ʼe natou muliʼi ovi ia Sesu Kilisito.—Apk. 6:3-8.
5 Ohage ko tona fakakikite ʼi te lea fakapolofeta, neʼe pulihi e te tau ia “te tokalelei i te kele.” Neʼe hoko te aluʼaga ʼaia logo la te fakapapau ʼa te ʼu Puleʼaga ke natou gaue fakatahi pea ke natou taupau te tokalelei. Ko te ʼUluaki Tau Fakamalamanei, ʼe ko te kamataʼaga pe ʼaia ʼo te ʼu tau fakamataku ʼae neʼe puli ai te tokalelei ʼi te kele. Logo la te kua lakalaka ki muʼa ʼo te faʼahi fakaekonomika mo fakasienesia talu mai te taʼu 1914, kaʼe ko te hoge ʼe ina haga fakatupu te maveuveu pea mo te ʼu tau ʼi te malamanei. ʼE mole feala ki he tahi ke ina ui ʼe mole sio ki te toko lau ʼi miliona hahaʼi ʼae ʼe mamate ʼi te taʼu fuli ʼuhi ko te ʼu mahaki, mo te ʼu tuʼutamaki fakanatula pea mo ʼihi atu aluʼaga fakatupu tuʼutamaki. Ko te ʼu aluʼaga ʼaia kua ʼaʼasili age ia tona fakamataku ʼi te temi muʼa, mo tona hoko putuputu pea mo te lahi ʼo te ʼu mateā. ʼE kotou mahino koa ki te fakaʼuhiga ʼo te ʼu aluʼaga ʼaia?
6. Ko ai ʼae neʼe ina tokagaʼi tafitō ia te fakahoko ʼo te lea fakapolofeta? Pea kotea ʼae neʼe natou fai ʼi te temi ʼae neʼe hoko ai te lea fakapolofeta ʼaia?
6 Tokolahi neʼe mole natou mahino ki ai ʼuhi ko te hoko ʼae ʼo te ʼUluaki Tau Fakamalamanei pea mo te mafola ʼo te taʼi mahaki Fakasepania. Kaʼe, neʼe fakatalitali malohi ia te kau Kilisitiano fakanofo ki te fakaʼosi ʼo te Temi ʼo Te Kau Senitile, peʼe “ki te katoa o te temi o te u puleaga” ʼi te taʼu 1914. (Luka 21:24) Neʼe mole iloʼi lelei e te kau fakanofo pe ʼe hoko feafeaʼi anai ia te lea fakapolofeta Fakatohi-tapu ʼaia, kaʼe neʼe natou mahino ʼe hoko anai ʼi te taʼu 1914 ia he aluʼaga maʼuhiga ki te Puleʼaga ʼo te ʼAtua. ʼI te temi pe ʼae neʼe natou mahino lelei ai pe neʼe hoko feafeaʼi te lea fakapolofeta ʼaia, neʼe natou tala ʼaki he lototoʼa ki te hahaʼi kua kamata pule te ʼAtua. Ko natou ʼae neʼe natou fakamafola ia te logo ʼo te Puleʼaga, neʼe fakamataku ʼaupito ia tonatou fakatagaʼi. Pea ʼaki te fakataga ʼaia neʼe hoko ai te lea fakapolofeta Fakatohi-tapu. ʼI ni taʼu ki muli age, neʼe faigaʼi e te ʼu fili ʼo te Puleʼaga ke natou fakagata te gaue faifakamafola ʼaki tanatou fakapilisoniʼi, mo fanahi, mo haʼi te ʼu kia pea mo tuʼusi te ʼu ʼulu ʼo ʼotatou tehina.—Pes. 94:20; Apk. 12:15.
7. He ko ʼe ʼe mole mahino te tokolahi ki te maʼuhiga ʼo te ʼu aluʼaga ʼae ʼe hoko ʼi te malamanei?
7 Kapau ʼe iloga lelei ʼe kua tuʼu te Puleʼaga ʼo te ʼAtua ʼi te lagi, pea he ko ʼe ʼe mole tali e te tokolahi te faʼahi ʼaia? He ko ʼe ʼe mole natou sio ki te fakahoko ʼo te ʼu lea fakapolofeta e te ʼu aluʼaga ʼo te malamanei ohage ko tona talanoa ki ai te hahaʼi ʼa te ʼAtua talu mai ni taʼu? ʼE natou tokagaʼi pe koa te ʼu meʼa ʼae ʼe natou fia sio ki ai? (2 Ko. 5:7) ʼE natou maʼumaʼua fau koa ʼae ʼe tupu ai tanatou mole tokagaʼi te ʼu meʼa ʼae ʼe fakahoko e te ʼAtua? (Mat. 24:37-39) ʼE fakalelu koa ki ʼihi te ʼu manatu mo te ʼu fakatuʼutuʼu ʼo te malama ʼa Satana? (2 Ko. 4:4) ʼE ʼaoga ke tou maʼu te tui pea mo te sio mamaʼo ʼo mole gata pe ki te meʼa ʼae ʼe kita lava sio ki ai, ke feala ai hatatou mahino pe kotea ʼae ʼe lolotoga fai e te Puleʼaga ʼo te ʼAtua. ʼI meʼa fakafiafia foki ia tatatou lava mahino ki te ʼu faʼahi ʼae ʼe lolotoga hoko moʼoni nei.
KUA ʼASILI KOVI AGE TE AGAKOVI
8-10. (1) ʼE hoko feafeaʼi ia te lea fakapolofeta ʼo 2 Timoteo 3:1-5? (2) He ko ʼe ʼe tou ui ai kua ʼaʼasili age te agakovi?
8 Ko te lua tupuʼaga ʼo tatatou iloʼi ʼae kua vave takitaki pe anai e te Puleʼaga ʼo te ʼAtua ia te kele: ʼE ko te kua ʼaʼasili age ʼo te agakovi ʼi te temi nei ʼi te temi muʼa, pea ʼe kei toe age la tona ia kovi. Kua teitei taʼu ʼe teau nei mo tatatou sio ki te hoko moʼoni ʼo te lea fakapolofeta ʼae ia 2 Timoteo 3:1-5. Ko te ʼu aga ʼae ʼe talanoa ʼi te ʼu vaega ʼaia kua mafola ia ʼi te malamanei katoa. ʼE kotou toe sio koa mo koutou ki ai? Tou vakaʼi he ʼu faʼifaʼitaki.—Lau ia 2 Timoteo 3:1, 13.
9 Kotou fakatatau ia te ʼu aluʼaga ʼae neʼe mole fakapoipoi ki te hahaʼi ʼi te ʼu taʼu 1940 peʼe 1950 mo ʼae ʼe hoko ia ʼaho nei ʼi te ʼu fale gaue, mo te ʼu fakafiafia, mo te ʼu faigaoʼi pea mo te faʼahiga teuteu mo faʼu ʼo te ʼu lauʼulu. Kua mafola ia te agamalohi pea mo te ʼu aga heʼe ʼaoga ʼi te potu fuli. Pea ʼe faiga ia te hahaʼi ke natou fakatupu tukia ki ʼihi ʼaki tanatou agamalohi, mo tanatou aga heʼe ʼaoga pea mo tanatou aga fefeka. Ko te ʼu polokalama ʼo te televisio ʼi te ʼu taʼu 1950 ʼae neʼe mole lelei ki te tokolahi, kua liliu ia ʼi te temi nei ko he ʼu fakafiafia lelei ki te famili. Tokolahi kua natou tokagaʼi ia te malave ʼaupito ʼo te hahaʼi ʼae ʼe faitagata peʼe faifafine ki te ʼu fakafiafia mo te faʼahiga faiteuteu pea mo te faʼu ʼo te lauʼulu pea mo tanatou fakahaha tonatou faʼahiga maʼuli. Kaʼe ʼe tou lotofakafetaʼi lahi heʼe tou iloʼi te manatu ʼa te ʼAtua ʼo ʼuhiga mo te ʼu meʼa ʼaia.—Lau ia Suta 14, 15.
10 Kotou toe fakatatau mo te agatuʼu ʼae ʼa te kau tupulaga ʼo te temi muʼa mo ʼae ʼo te temi nei. Ohage la, ʼi te ʼu taʼu 1950, neʼe tuʼania te ʼu matuʼā ʼo ʼuhiga mo tanatou fanau, naʼa natou suluka, peʼe inu kava, peʼe natou meʼe ni faʼahiga meʼe ʼe mole tuha. Kaʼe ia ʼaho nei, ʼe tou tau logo ʼi te ʼu talalogo ki ni aluʼaga fenei: Ko he tupulaga ʼe kei ako ʼe taʼu 15, neʼe ina fana ʼona kauga ako, pea mate ai te tokolua mo lavevea te toko 13. Pea ko te kau tupulaga konana neʼe natou tamateʼi te kiʼi taʼahine ʼe taʼu hiva pea mo ta ia tana tamai mo tona kaiga. Neʼe ui ʼi te tahi talalogo neʼe fai e te kau tupulaga ia fakapo ʼe nimagofulu ki te teau lolotoga taʼu ʼe hogofulu ʼi te fenua ʼi Asia. ʼE feala koa ke ui e he tahi ko te ʼu aluʼaga ʼaia ia ʼaho nei ʼe mole kua ʼaʼasili age ia?
11. He ko ʼe ʼe mole mahino te tokolahi ki te kua ʼaʼasili kovi ʼo te malamanei?
11 Neʼe ui lelei fenei e te apositolo ko Petelo: “I te u aho fakamuli, e omai anai ni kau nukinuki, ae e haele anai o mulimuli ki onatou holi kovi totonu. E natou ui: Kofea te fakapapau o tana toe liliu mai? Koteuhi, koeni kua mamate foki atatou tamai, kae e tuu aipe te u mea fuli o hage i te kamataaga o te fakatupu o te malamanei.” (2 Pet. 3:3, 4) He ko ʼe koa ʼe manatu feia ʼihi? ʼE mahino ia moka tou mahani ki he aluʼaga pea ʼe mole kei tou faʼa tokagaʼi anai. Koia kapau ko he aluʼaga ʼe fetogi fakafokifa, ʼe lagi tou punamaʼuli anai ohage pe ko hotatou kaumeʼa lelei ʼe fetogi tana aga. Kaʼe ʼaki te temi moka fetogi mamalie te ʼu manatu mo te aga ʼa te hahaʼi, pea ʼe feala anai ke mole tou tokagaʼi. ʼE lagi mole tou punamaʼuli lahi ai anai, kaʼe ʼe mole tonu ke tou meʼa noaʼi te aluʼaga ʼaia. Koteʼuhi ʼe feala pe ke tou tuʼutamaki ai.
12, 13. (1) He ko ʼe ʼe mole tonu ke tou lotovaivai ʼi te ʼu aluʼaga ʼae ʼe lolotoga hoko nei? (2) Kotea ʼae ka tokoni mai anai ke tou ʼutakiʼi te ʼu ʼaho fakamuli “faigataa” ʼaeni?
12 Neʼe fakatokaga tatou e te apositolo ko Paulo ʼe “faigataa” anai te ʼu ʼaho fakamuli. (2 Tim. 3:1) Kaʼe ko tatou, ʼe tou lava ʼutakiʼi te ʼu faʼahi fakalotomamahi peʼe tuʼania fuli ʼae ʼe feala ke tou tau mo ia. Koteʼuhi ʼaki te tokoni ʼa Sehova, mo tona laumalie pea mo te kokelekasio Fakakilisitiano, ʼe feala ai hatatou nonofo agatonu kia te ia. Pea ko te ʼAtua ʼe ina foaki mai ia tona “malohi lahi.”—2 Ko. 4:7-10.
13 Neʼe kamata e Paulo te lea fakapolofeta ki te ʼu ʼaho fakamuli ʼaki te kupusiga palalau ʼae “ke ke iloi.” ʼE fakamoʼoni ʼaki te kupusiga ʼaia ko te lea fakapolofeta ʼaia ʼe hoko moʼoni anai ia. ʼE tou iloʼi ʼe hoko atu pe anai te ʼaʼasili kovi ʼo te malama ʼo kaku ki tona fakaʼauha e Sehova. Neʼe tou sio ʼi te hisitolia ʼo te tagata moka meʼa noaʼi e te hahaʼi ia te ʼu lekula ʼo ʼuhiga mo te aga ʼae ʼe tonu ke fai, pea ʼe tau anai te ʼu puleʼaga katoa mo he ʼu nunuʼa kovi. Neʼe heʼeki meʼa noaʼi feia ʼi muʼa atu te ʼu lekula ʼo ʼuhiga mo te aga ʼae ʼe tonu ke fai ʼi te malamanei katoa. Pea tokolahi ʼe mole natou mahino ki tona fakaʼuhiga. Kaʼe ʼe tonu ʼaki te ʼu aluʼaga neʼe hoko talu mai te taʼu 1914 ke tou tui papau ai kua vave pulihi pe anai e te Puleʼaga ʼo te ʼAtua ia te agakovi.
ʼE MOLE PULI ANAI TE TAʼI TUPU ʼAENI
14-16. Kotea te tolu tupuʼaga ʼae ʼe tou tui ai kua vave hoko mai pe anai te Puleʼaga ʼo te ʼAtua?
14 ʼAki te hisitolia ʼo te hahaʼi ʼa te ʼAtua, ʼe tou maʼu ai te tolu tupuʼaga ʼae ke tou falala kua ovi mai te fakaʼosi. Ohage la, ʼi muʼa ʼo te kamata ʼafio ʼo te Puleʼaga ʼo te ʼAtua ʼi selo, neʼe tauhi te kiʼi kutuga ʼo te kau fakanofo agatonu ki te ʼAtua. Kaʼe kotea ʼae neʼe natou fai ʼi te mole hoko ʼo te lea fakapolofeta ohage ko tanatou ʼamanaki ki ai ʼi te taʼu 1914? Tokolahi ia natou, neʼe natou tauhi agatonu aipe kia Sehova pea mo katakiʼi te ʼu ʼahiʼahi mo te ʼu fakataga. ʼAki te temi, tokolahi ʼi te kau fakanofo ʼaia kua natou mamate agatonu.
15 ʼI te lea fakapolofeta ki te ʼu ʼaho fakamuli ʼo te malama ʼa Satana, neʼe ui fenei ai e Sesu: “E mole puli anai te taitupu aeni, kae e heeki hoko te u mea fuli aia.” (Lau ia Mateo 24:33-35.) ʼI te temi ʼae neʼe talanoa ai Sesu ki “te taitupu aeni,” ʼe tou mahino neʼe palalau ia kia kutuga ʼe lua ʼo te kau Kilisitiano fakanofo. Ko te ʼuluaki kutuga neʼe maʼuʼuli natou ʼi te taʼu 1914 pea neʼe natou mahino ki te kua kamata pule ʼa Kilisito ʼi tona ʼuhiga Hau ʼi te taʼu ʼaia. Ko te kiʼi kutuga ʼaia ʼae neʼe maʼuʼuli ʼi te taʼu 1914, neʼe kua fakanofo natou ʼaki te laumalie maʼoniʼoni ʼi te taʼu ʼaia peʼe ʼi muʼa ʼo te taʼu ʼaia.—Loma 8:14-17.
16 Pea ko natou fuli ʼae ʼo te lua kutuga ʼae ʼe kau ki “te taitupu aeni,” neʼe fakanofo natou ʼaki te laumalie maʼoniʼoni lolotoga te temi ʼae neʼe kei maʼuʼuli ai te kau fakanofo ʼo te ʼuluaki kutuga ʼi te kele. Koia ʼe mole kau te kau fakanofo fuli ia ʼaho nei ki “te taitupu aeni,” ʼae neʼe talanoa ki ai Sesu. Ia ʼaho nei kua matutuʼa leva te kau fakanofo ʼo te lua kutuga. Kaʼe ʼe tou falala ki te ui ʼae ʼa Sesu ia Mateo 24:34 ko ʼihi ʼi ‘te taʼi tupu ʼaeni ʼe mole puli anai’ ʼi muʼa ʼo tanatou sio ki te kamata ʼo te mamahi lahi. ʼE toe malohi age ai tatatou tui papau ʼae kua vave fakaʼauha pe anai e te Hau ʼo te Puleʼaga ʼo te ʼAtua ia te kau agakovi pea mo ina fakatuʼu he malama foʼou mo faitotonu.—2 Pet. 3:13.
ʼE FAKAʼOSI KATOA ANAI E KILISITO TANA MALO
17. Kotea ʼae ʼe feala ke tou ui ʼo ʼuhiga mo te ʼu lea fakapolofeta Fakatohi-tapu ʼae neʼe tou ako?
17 Kotea ʼae ʼe feala ke tou ui ʼo ʼuhiga mo te ʼu lea fakapolofeta Fakatohi-tapu ʼae neʼe tou ako? Ohage pe ko totatou fakatokaga e Sesu, ʼe mole tou iloʼi ia te ʼaho peʼe ko te hola totonu ʼo te fakaʼosi. (Mat. 24:36; 25:13) Kaʼe ʼe tou iloʼi ʼe “ko te hola aeni ke [tou] alaala ai mai te moe,” ohage pe ko tona ui e Paulo. (Lau ia Loma 13:11.) Koteʼuhi ʼe tou maʼuʼuli nei ʼi te ʼu ʼaho fakaʼosi. Koia tou tokagaʼi te ʼu lea fakapolofeta Fakatohi-tapu mo te ʼu meʼa ʼae ʼe lolotoga fai e Sehova ʼAtua pea mo Sesu Kilisito. Pea ʼe tou mahino lelei ai anai ki te ʼu fakamoʼoni ʼo te kua vave fakaʼosi ʼo te malama agakovi ʼaeni.
18. Kotea anai ka hoko kia natou ʼae ʼe mole natou tali ia Sesu Kilisito ko honatou Hau?
18 Kua vave ui pe e natou ʼae ʼe mole natou tali te takitaki ʼa Sesu Kilisito, ia te Tagata ʼae ʼe heka ʼi te hosi hina, neʼe natou faihala. ʼE mole feala anai hanatou hao ʼi te fakamau ʼae ka hoko kia natou. ʼI te temi ʼae ka hoko ai te aluʼaga ʼaia, ʼe kalaga fenei anai te tokolahi ʼi tonatou mataku: “Ko ai e feala ke tuu [peʼe tatali]?” (Apk. 6:15-17) ʼE tou maʼu tona tali ʼi te kapite 7 ʼo Apokalipisi. Ko natou ʼae ʼe “tuu,” ʼe ko te kau fakanofo pea mo natou ʼae ka ʼamanaki maʼuʼuli ʼi te kele koteʼuhi ʼe natou maʼu te ʼofa ʼo te ʼAtua. Pea mole faʼa fualoa ki ai, ko te toe hahaʼi tokolahi ʼo te tahi ʼu ovi, ʼe natou hao anai ʼi te mamahi lahi mo ulu ki te malama foʼou ʼa te ʼAtua.—Apk. 7:9, 13-15.
19. ʼI tatatou falala ʼae kua ovi mai te fakaʼosi, kotea ʼae ʼe tou fakaʼamu ki ai?
19 Koia kapau ʼe tou tokagaʼi te ʼu lea fakapolofeta Fakatohi-tapu ʼae ʼe hoko ʼi te temi nei, pea ʼe mole fakaleluʼi anai tatou e te malama ʼa Satana. Pea ʼe tou mahino ai anai ki te ʼuhiga moʼoni ʼo te ʼu aluʼaga ʼae ʼe hoko ʼi te malama. Kua vave fakaʼosi katoa anai e Kilisito ia tana malo pea mo ina fakaʼauha anai te malama agakovi ʼaeni ʼi te tau faitotonu ʼo Halamaketone. (Apk. 19:11, 19-21) Kotou fakafuafua muʼa te toe fiafia ʼae ka tou maʼu anai hili te ʼu aluʼaga fuli ʼaia.—Apk. 20:1-3, 6; 21:3, 4.