Neʼe au taʼu 10 ʼi te taʼu 1985. Neʼe au maʼuli ʼi te kolo ʼo Columbus, ʼi Ohio, ʼi Amelika. Neʼe ʼomai ʼihi tamaliki mai Cambodge ki tamatou fale ako. Neʼe iloʼi e te kiʼi tama ia natou ʼaia ʼihi kupu Fakapilitania. Pea ʼaki he ʼu pakī neʼe ina fakamatala mai te ʼu hisitolia ʼo te hahaʼi neʼe gaohi koviʼi, mo tamateʼi pea neʼe tonu ke natou feholaki moʼo haofaki tonatou maʼuli. ʼI te poʼuli, neʼe au tagi mamahi ʼi taku manatu ki te kau tamaliki ʼo te fenua ʼaia. Neʼe au fia palalau age kia natou ʼo ʼuhiga mo te Palatiso pea mo te fakatuʼuake. Kaʼe neʼe mole natou mahino ki taku lea. Koia logo la taku kei veliveli, neʼe au fakatotonu ai ke au ako tanatou lea ke feala haku palalau age kia natou ʼo ʼuhiga mo Sehova. ʼI te temi ʼaia, neʼe mole au mahino ki te maʼuhiga ʼo te tonu ʼaia ki toku ka haʼu.

Neʼe faigataʼa te ako ʼo te lea ʼaia. Koia neʼe au fakatotonu tuʼa lua ai ke au tuku pe la tona ako. Kaʼe neʼe fakaʼaogaʼi e Sehova ʼaku matuʼā moʼo fakalotomalohiʼi au. Ki muli age, neʼe uga au e ʼaku kau faiako pea mo ʼaku kaumeʼa ako ke au maʼu haku gaue lelei. Kaʼe neʼe au fia pionie. Neʼe au filifili leva ke au ako ʼi te lise he ʼu faʼahi ʼe tokoni mai anai ke au gaue vaelua ʼi temi. Moka ʼosi taku ako, neʼe au tautau alu ʼo faifakamafola mo ʼihi pionie. Neʼe au toe tokoni ki ʼihi tupulaga ke natou ako te Fakapilitania. Neʼe tokoni mai te faʼahi ʼaia ki muli age.

ʼI taku taʼu 16, neʼe au logo neʼe ʼi ai te kutuga lea Cambodgien ʼi te kolo ʼo Long Beach, ʼi Californie, ʼi Amelika. Neʼe au alu ʼo fakafelaveʼi mo te ʼu tehina mo tuagaʼane ʼo te kutuga ʼaia. Neʼe natou akoʼi mai ke au poto ʼi te lautohi ʼi tanatou lea. ʼI te maʼu ʼo taku pepa, neʼe au toʼo atu aipe te selevisi pionie. Neʼe au hoko atu taku faifakamafola ki te hahaʼi ʼo Cambodge ʼae neʼe matou vahaʼa fale. ʼI taku taʼu 18, neʼe au fia alu ki Cambodge logo la neʼe kei fakamataku te aluʼaga ʼo te fenua ʼaia. Kaʼe ʼi te toko hogofulu miliona hahaʼi ʼae neʼe maʼuʼuli ai, neʼe tokosiʼi pe ia natou ʼae neʼe natou logo ki te moʼoni ʼo ʼuhiga mo te Puleʼaga. ʼI te temi ʼaia, neʼe ʼi ai te kokelekasio pe ʼe tahi neʼe maʼu ai te toko 13 kau faifakamafola. ʼI taku taʼu 19, neʼe hoki au alu ai ki Cambodge. Hili ki ai taʼu ʼe lua, neʼe au fakatotonu ke au alu ʼo maʼuli ai. Neʼe au maʼu taku gaue vaelua ʼi temi, neʼe ko te akoʼi mo fakaliliu ʼo te Fakapilitania. Ki muli age, neʼe au ʼohoana mo te tuagaʼane neʼe ma manatu tahi ʼo ʼuhiga mo te selevisi pionie. ʼE ma fiafia he neʼe ma tokoni ki te hahaʼi tokolahi ʼo Cambodge ke natou foaki tonatou maʼuli ki te ʼAtua.

Neʼe foaki mai e Sehova te ʼu meʼa ʼae neʼe au fakaʼamu ki ai. (Pes. 37:4) Ko te fai ʼo ni tisipulo ʼe ko te gaue lelei tokotahi. ʼI te ʼu taʼu ʼe 16 ʼo taku nofo ʼi Cambodge, neʼe liliu te kiʼi kokelekasio ʼe tahi ʼae neʼe toko 13 kau faifakamafola ko kokelekasio ʼe 12 pea mo kiʼi kutuga ʼe 4 ʼi te temi nei.—Neʼe fakamatala e Jason Blackwell.