“Sio Ki Te Taulekaleka ʼo Sehova”
ʼE feala ke tou mafasia moka tou tau mo he ʼu aluʼaga fakaʼofaʼofa. ʼE lagi tou hoha tuʼumaʼu ai, ʼo puli totatou malohi pea mo fetogi ai tatatou faʼahiga manatu ki te maʼuli. Neʼe malave ʼaupito kia Tavite te Hau ʼo Iselaele ia te ʼu ʼahiʼahi ʼae neʼe tau mo ia. Neʼe ina lava tauʼi feafeaʼi te ʼu aluʼaga ʼaia? Tou lau te tali ki te fehuʼi ʼaia ʼi te pesalemo malave loto ʼaeni: “I toku leo e au kalaga [kia Sehova], i toku leo e au tagi [kia Sehova]. E au liligi taku tagi i ona mua, e au fakamatala toku mamahi kia ia. Ka mamahi toku laumalie i toku loto, ko koe, e ke iloi toku ala.” ʼE moʼoni, neʼe kole tokoni ia Tavite ki te ʼAtua ʼaki he agavaivai.—Pes. 142:2-4.
Neʼe kole tokoni ia Tavite kia Sehova ʼaki he agavaivai ʼi tana tau mo te ʼu ʼahiʼahi
ʼI te tahi pesalemo, neʼe hiva fenei ia Tavite: “Ko te meʼa ʼe tahi neʼe au kole kia Sehova, ko te meʼa ʼaia ʼae ʼe au kumi anai: ke au nofo ʼi te fale ʼo Sehova ʼi te ʼaho fuli ʼo toku maʼuli, ke au sio ki te taulekaleka ʼo Sehova pea mo au mamata ki tona fale lotu ʼaki he loto fiafia.” (Pes. 27:4, MN) Neʼe mole kau ia Tavite ʼi te kau Levite. Kaʼe tou fakakaukauʼi tana tuʼu ʼi te malaʼe ʼae ʼe ovi ki te tapenakulo, te koga meʼa ʼae neʼe fakatuʼutuʼu ai te tauhi ki te ʼAtua. Neʼe lotofakafetaʼi ʼaupito ia Tavite ʼo ina loto ai ke nofo ʼi te potu ʼaia ʼi te ʼaho fuli ke feala hana “sio ki te taulekaleka ʼo Sehova.”
Ko te kupu “taulekaleka” ʼi te Fakahepeleo ʼe fakaʼuhiga ki he faʼahi ʼe kita leleiʼia moka kita sio ki ai pea mo kita fiafia ai. Neʼe leleiʼia tuʼumaʼu e Tavite ia te ʼu fakatuʼutuʼu ʼa te ʼAtua moʼo tauhi kia te ia. ʼE tou manatu tahi koa mo Tavite?
TOU “MAMATA” KI TE FAKATUʼUTUʼU ʼA TE ʼATUA ʼAKI HE LOTO FIAFIA
Ia ʼaho nei, ko te fakatuʼutuʼu ʼa Sehova moʼo fakaovi kia te ia ʼe mole fakatafito ki he fale lotu. Kaʼe neʼe fakatuʼutuʼu e te ʼAtua tona fale lotu lahi fakalaumalie ke feala ai hakita tauhi kia te ia. * Koia ʼe tou lava “sio ki te taulekaleka ʼo Sehova” mo kapau ʼe tou leleiʼia tana fakatuʼutuʼu ʼaia.
Tou manatuʼi te ʼaletale kapa ʼae neʼe tuʼu ʼi muʼa ʼo te uluʼaga ʼo te tapenakulo ʼae neʼe tutu ai te ʼu molaga. (Eke. 38:1, 2; 40:6) Neʼe fakaʼuhiga ia ki te lotolelei ʼa te ʼAtua ke ina tali te sakilifisio ʼo te maʼuli fakatagata ʼa Sesu. (Hep. 10:5-10) Tou fakakaukauʼi muʼa tona maʼuhiga kia tatou. Neʼe tohi fenei e te apositolo ko Paulo: “Nee ko tatou ko te u fili o te Atua, kae nee ina fakatokatoka tatou mo ia aki te mate o tona Alo.” (Loma 5:10) Koia ʼi tatatou tui ki te taʼataʼa ʼae neʼe liligi e Sesu maʼa tatou, ʼe feala ai hatatou “kaumeʼa” mo te ʼAtua. (Pes. 25:14, MN) Pea ʼe feala ke tou maʼu ai tona ʼofa mo tana falala.
ʼE toe feala ke ‘fakamolemole ʼatatou agahala’ pea ‘ke ʼaumai ai ni temi fakamokomoko e Sehova.’ (Gaue 3:19-20) ʼE tatau totatou aluʼaga mo ʼae ʼo he tagata pilisoni neʼe fakatuʼā ki te mate. ʼE loto fakahemala ʼuhi ko te ʼu meʼa kovi neʼe ina fai. Pea ʼe ina fai anai he ʼu toe fetogi ʼi tana talitali ki tona mate. Kaʼe ʼe sio te tuʼi fakamau manavaʼofa ki te ʼu fetogi ʼaia ʼo ina molehi tona tuʼā. ʼE mahino papau ia, ʼe fiafia mo loto fimalie ʼaupito ai te tagata pilisoni. ʼE hage pe ia Sehova ko te tuʼi fakamau manavaʼofa ʼaia koteʼuhi ʼe ʼofa ki te hahaʼi ʼae ʼe loto fakahemala pea ʼe ina molehi tonatou tuʼā ki te mate.
TOU LELEIʼIA TE TAUHI MOʼONI
Neʼe malama ia Tavite ki te agaaga ʼo te tauhi moʼoni ʼi te fale ʼo Sehova. Ohage la ko te ʼu fakatahi lalahi ʼo te kau Iselaele, mo te lau mo fakamahino ʼo te Lao, mo te tutu ʼo te iseso pea mo te ʼu gaue taputapu ʼa te kau pelepitelo mo te kau Levite. (Eke. 30:34-38; Num. 3:5-8; Tet. 31:9-12) Ko te ʼu agaaga fai ʼaia ʼe alu tahi mo te ʼu agaaga fai ʼo te tauhi moʼoni ʼi te temi nei.
Ia ʼaho nei ohage pe ko te temi muʼa, “e lelei aupito, e fakafimalie osi ki ni tehina ke nonofo fakatahi!” (Pes. 133:1) Kua liliu ʼo kauga malie ʼaupito totatou fale tautehina fakamalamanei. (1 Pet. 2:17) Tahi faʼahi, ʼe toe lau mo fakamahino te Folafola ʼa te ʼAtua ʼi ʼatatou fono. ʼAki tana kautahi ʼe fakatuʼutuʼu e Sehova he polokalama ʼe mahu ai totatou akoʼi. Kua lahi te meʼa kai fakalaumalie ʼe tou maʼu ʼi ʼatatou tohi ʼae ʼe feala ke tou ako takitokotahi peʼe fakafamili. Neʼe ui fenei e te tehina ʼe kau ʼi te Kolesi Pule: “Neʼe fiafia mo fimalie ʼaupito toku maʼuli ʼaki taku metitasio ki te Folafola ʼa Sehova, mo taku fakakaukauʼi tona fakaʼuhiga, mo taku kumi te poto mo te ʼatamai.” ʼE moʼoni, ‘ ʼe fai anai e te iloilo ni meʼa lelei ki totatou maʼuli.’—Taag. 2:10.
ʼI te temi nei, ʼe toe fakahake ʼi te ʼaho fuli e te ʼu kaugana ʼa te ʼAtua ʼanatou faikole kia te ia pea ʼe ina tali. Kia Sehova, ʼe hage pe te ʼu faikole ʼaia ko te iseso magoni. (Pes. 141:2) ʼE tou fiafia ʼi tatatou iloʼi ʼae ʼe leleiʼia e Sehova ʼAtua moka tou fakaovi kia te ia ʼaki he ʼu faikole agavaivai.
Neʼe faikole fenei ia Moisese: “Ke nofo ia tatou te kalasia o [Sehova], totatou Atua! Fakamalohii te gaue o omatou nima.” (Pes. 90:17) ʼE tapuakinaʼi e Sehova te gaue faifakamafola ʼae ʼe tou fai ʼaki he faʼafai. (Taag. 10:22) Neʼe lagi tou tokoni ki ʼihi ke natou ako te moʼoni. Peʼe lagi tou kataki ʼi te minisitelio talu mai ni taʼu ʼuhi ko te mahaki, mo te lotomamahi, peʼe ko te ʼu fakataga mo te mole fia fakalogo ʼa te hahaʼi. (1 Tes. 2:2) Kaʼe ʼe mahino ia, ʼi te ʼu faʼahi fuli ʼaia neʼe tou sio ki te “taulekaleka ʼo Sehova” pea mo te leleiʼia e tatatou Tamai ʼae ʼi selo ʼatatou faiga.
Neʼe hiva fenei ia Tavite: “Ko [Sehova] ko toku inasi mo taku kalise. Ko koe ae e ke taupau kia au toku vaega. Kua vahei mai kia au he tofiga lelei.” (Pes. 16:5, 6) Neʼe lotofakafetaʼi ia Tavite ʼuhi ko tona “inasi,” ko te pilivilesio ʼae ke ina maʼu he felogoʼi lelei mo Sehova, mo tona ʼofa pea mo tana tauhi kia te ia. Ohage pe ko Tavite, ʼe lagi tou tau mo he ʼu ʼahiʼahi kaʼe ʼe lahi age pe ia te ʼu tapuakina fakalaumalie ʼe tou maʼu. Koia tou leleiʼia tuʼumaʼu te tauhi moʼoni pea mo tou “mamata” ki te fale lotu fakalaumalie ʼa Sehova ʼaki he loto fiafia.
^ pal. 6 Vakaʼi Te Tule Leʼo ʼo te ʼaho 1 ʼo Sulio 1996, ʼi te pasina 14-24.