Tou Tokaga Lelei Ki Te Hahaʼi Matutuʼa
“Nai fanau liliki, aua naa tou oofa i te u palalau mo te alelo, kae tou oofa i te u gaue pea mo te mooni.”—1 SOA. 3:18.
1, 2. (1) Kotea te ʼu fihifihia ʼe felaveʼi mo te ʼu famili ʼe tokolahi, pea kotea te ʼu fehuʼi ʼe malaga ai? (2) ʼE lava tauʼi feafeaʼi e te ʼu matuʼā mo te ʼu fanau ia te ʼu fetogi ʼaia?
ʼE LAGI fakalotomamahi ʼaupito hakotou sisio ki ʼakotou matuʼā ʼae neʼe malolohi mo faʼifaʼitaliha pea kua faigataʼa leva tanatou tokakaga kia natou totonu. Neʼe lagi toka takotou Faʼe peʼe ko takotou Tamai ʼo fasi ai hona hui alaga, peʼe lagi mole kei ina iloʼi te meʼa ʼae ʼe ina fai mo ui, pe neʼe maʼu la hona mahaki kovi. ʼE toe feala foki ke faigataʼa ki te hahaʼi matutuʼa hanatou tali te ʼu fetogi ʼo tonatou aluʼaga mo tonatou malolō fakasino, he ʼe fakatuʼakoi ai tanatou faʼifaʼitaliha. (Sopo 14:1) Kotea ʼae ʼe tou lava fai moʼo tokoni kia natou? ʼE feafeaʼi hatatou lava tokakaga kia natou?
2 ʼI te alatike ʼo ʼuhiga mo te tokaga ki te hahaʼi matutuʼa neʼe ui ai, logo la ʼe feala ke faigataʼa te faipalalau ki te ʼu fihifihia ʼo te vaivai matuʼa, kaʼe ʼe faigafua age anai ki te ʼu famili moka natou fai fakatomuʼa ni tonu ʼo ʼuhiga mo tonatou malolō fakasino. ʼE tonu ke tou mahino ʼe mole feala hatatou taʼofi te ʼu fihifihia ʼo te vaivai matuʼa. Koia la ʼae ʼe maʼuhiga ai ke tou teuteuʼi totatou famili. ʼE feala ke faifaitahi feafeaʼi he famili ʼi te ʼofa moʼo fai te ʼu tonu faigataʼa ʼaia?
KOTOU FAI NI FAKATUʼUTUʼU KI “TE U AHO KOVI”
3. Kotea ʼae ʼe lagi tonu ke fai e te ʼu famili moka kua ʼaoga lahi he tokoni ki ʼanatou matuʼā ʼae kua matutuʼa? (Vakaʼi te ʼuluaki pakī.)
3 ʼE hoko mai anai te temi ʼae ʼe mole kei lava tokakaga ai te tokolahi ʼo te ʼu matuʼā kia natou totonu pea mo ʼaoga ai leva kia natou he tokoni. (Lau ia Ekelesiasi 12:1-7.) Moka hoko te faʼahi ʼaia, pea ʼe tonu ke fili fakatahi e te ʼu matuʼā ʼae kua matutuʼa mo te ʼu fanau pe ko te faʼahiga tokaga fea ʼae ʼe lelei age ki te ʼu matuʼā. Pea mo vakaʼi pe ko he faʼahi ʼe natou fealagia ʼi te faʼahi fakapaʼaga. ʼE lelei ke ʼi ai he fono fakafamili moʼo faipalalau ki te faʼahiga tokoni ʼae ʼe ʼaoga, mo tona fakahoko pea mo tanatou felagolagoʼaki. Pea ʼe tonu ki te famili katoa ʼo kau ai mo te ʼu matuʼā ke natou faiga malohi ʼo agafakapotopoto pea mo natou fefakahaʼaki ʼanatou manatu. Kapau ʼe haga nonofo te ʼu matuʼā ʼi tonā loto fale, ʼe feala koa ke mole hoko he tuʼutamaki kia naua? * Kotou faipalalau ki te ʼu faʼahi ʼae ʼe kotou lava fai takitokotahi ke maʼu ai e ʼakotou matuʼā ia te tokoni ʼae ʼe ʼaoga. (Taag. 24:6) Ko ʼihi ʼe feala tanatou tokoni ʼi te ʼaho fuli, pea ko ʼihi ʼe lagi feala tanatou totogi ni faitoʼo. Pea ʼe tonu ke tahi iloʼi e te famili tona maʼua, koteʼuhi ʼe feala ke fetogi ʼaki te temi te ʼu maʼua ʼaia pea mo natou fesuisuiʼaki tona fakahoko.
4. ʼO tupu ko te fetogi ʼo te ʼu aluʼaga, ʼe lava kumi tokoni ki fea ia he famili?
4 Moka kotou kamata taupau ʼakotou matuʼā, pea kotou toʼo he temi ke kotou iloʼi lelei age tonā mahaki. Kapau ʼe maʼu e takotou tamai peʼe faʼe he mahaki ʼe ʼasili kovi anai, pea kotou kumi pe ʼe fakaʼaluʼalu feafeaʼi anai te mahaki ʼi te ka haʼu. (Taag. 1:5) Kotou fakafelogoʼi ki te ʼu pilo ʼo te puleʼaga ʼo tokotou kolo ʼae ʼe tokaga ki te hahaʼi matutuʼa. Kotou kumi te ʼu tokoni fakasosiale ʼae ʼe lava tokoni ki ʼakotou matuʼā ke faigafua age ai takotou taupau mahaki. Moka kotou kamata fakakaukauʼi te ʼu fetogi faigataʼa ʼaia, pea ʼe feala ke kotou maʼu ai leva ni manatu ʼe mole lelei, lagi ʼe kotou lotomamahi, peʼe kotou punamaʼuli peʼe mole kei kotou iloʼi pe kotou haga ki fea. ʼI te ʼu lakaga ʼaia, ʼe feala hakotou fakaha ʼakotou manatu ki hokotou kaumeʼa ʼe kotou falala ki ai. Kaʼe ko te maʼuhiga pe, ke kotou fakaha kia Sehova ia te ʼu faʼahi fuli ʼae ʼe kotou hoha ki ai. ʼE ina lava foaki atu te tokalelei ʼae ʼe ʼaoga kia koutou ke kotou tali pea mo katakiʼi te ʼu aluʼaga fuli pe.—Pes. 55:23; Taag. 24:10; Filp. 4:6, 7.
5. He ko ʼe ko he agafakapotopoto ia te iloʼi fakatomuʼa ʼo te ʼu faʼahiga puleʼaki kehekehe?
5 ʼE ko he agafakapotopoto ʼa te hahaʼi matutuʼa pea mo tonatou kiʼi famili hanatou iloʼi fakatomuʼa te ʼu faʼahiga puleʼaki kehekehe. Ohage la, ʼe feala ke natou kumi pe lelei age anai ki te tamai peʼe ki te faʼe hana nofo mo hana tama peʼe taʼahine, peʼe ʼi he fale taupau ʼo te hahaʼi matutuʼa peʼe ko he tahi age puleʼaki. ʼI tanatou fai te faʼahi ʼaia, ʼe feala ai ke nofo teuteu te famili ki te ‘malaʼia pea mo te lotomamahi’ ʼae ʼe hoko ʼaki te vaivai matuʼa. (Pes. 90:10) Ko te ʼu famili ʼae ʼe mole natou fai fakatomuʼa ni fakatuʼutuʼu, ʼe feala ke natou fai fakatevili ni tonu moka hoko he aluʼaga fakapunamaʼuli. ʼE ui e te tagata poto, tuʼumaʼu pe ‘ko te lakaga ʼaia ʼae ʼe kovi age ai te fai ʼo he tonu.’ Moka ʼe maʼua ke foimo fai he tonu, pea ʼe lagi hoha anai te famili ʼo mole natou manatu tahi ki te meʼa ʼae ʼe tonu ke fai. Kaʼe moka tou fai fakatomuʼa ni fakatuʼutuʼu, pea ʼe faigafua age anai hatatou fakamamahani mo he ʼu fetogi.—Taag. 20:18.
6. He ko ʼe ʼe ʼaoga ia te faipalalau ʼo ʼuhiga mo te faʼahiga maʼuli ʼa te ʼu matuʼā ʼi tonā vaivai matuʼa?
6 ʼE lagi mata faigataʼa hakotou faipalalau mo ʼakotou matuʼā ʼo ʼuhiga mo ni fetogi ʼi tonā loto fale peʼe ko te ʼaoga ʼae ke nā fetogi ʼapi ʼi he ʼaho. Kaʼe neʼe ui e te tokolahi ʼe fua lelei anai te faipalalau ʼaia ki ʼamuli. Kotea tona tupuʼaga? Koteʼuhi ʼe faigafua age te faipalalau ki te ʼu faigataʼaia, mo fagono ʼaki he agafakaʼapaʼapa pea mo fai ni fakatuʼutuʼu ʼaoga ʼi muʼa ʼo te hoko mai ʼo te ʼu fihifihia. Pea ʼe feala ki te famili hanatou tahi fakaha fakahagatonu te ʼu meʼa ʼae ʼe natou leleiʼia, ʼo toe malohi ai anai ʼanatou felogoʼi mo manatuʼi te ʼofa ʼae ʼe natou femaʼuʼaki. ʼE lagi loto anai e te ʼu matuʼā ke nā haga maʼuʼuli pe ʼi tonā ʼapi. Pea ka felogoʼi te ʼu matuʼā mo tanā fanau ki te faʼahiga taupau ʼae ʼe nā leleiʼia, pea ʼe tokoni lahi anai kia natou fuli ʼi te temi ʼae ʼe maʼua ai ke natou fai he tonu.
7, 8. Kotea te ʼu faʼahi ʼae ʼe tonu ke faipalalau ki ai te ʼu famili pea kotea tona tupuʼaga?
7 ʼU matuʼā, lolotoga te ʼu faipalalau ʼaia, kotou fakaha ki tokotou famili te ʼu meʼa ʼae ʼe kotou loto ki ai, mo te lahi ʼo takotou foʼi falā pea mo te ʼu puleʼaki ʼae ʼe kotou leleiʼia. Pea kapau ʼe mole feala ʼi he ʼaho hakotou fai ni tonu maʼa koutou, ʼe feala anai hanatou toʼo te tonu ʼae ʼe kotou loto ki ai. ʼE mahino ia ʼe natou fakaʼapaʼapa anai ki te ʼu faʼahi ʼae ʼe kotou loto ki ai pea mo natou faiga malohi ke feala hakotou taupau tuʼumaʼu tokotou loto faʼitaliha. (Efe. 6:2-4) Ohage la, ʼe kotou fakaʼamu koa ke kole atu e hakotou fanau ke kotou maʼuli tahi mo tona kiʼi famili? Peʼe kotou fakaʼamu koa ki he tahi age meʼa? Koia kotou agafakapotopoto pea mo kotou manatuʼi ʼe lagi kehekehe ʼakotou manatu mo ʼae ʼo tokotou famili. Pea ʼe ʼaoga he temi ki te famili katoa ke natou fetogi ʼanatou manatu.
8 Ka kotou fai ni fakatuʼutuʼu mo felogoʼi lelei, pea ʼe lahi te ʼu fihifihia ʼe kotou lava hao mai ai. (Taag. 15:22) Kotou palalau ki tokotou famili ʼo ʼuhiga mo te ʼu faitoʼo pea mo te ʼu faʼahi ʼae ʼe kotou leleiʼia. Pea ko te ʼu faʼahi ʼae ʼe tuʼu ʼi te kiʼi kate ʼo te toto Instructions médicales/Directives anticipées (DPA) ʼae ʼe maʼu e te kau Fakamoʼoni ʼa Sehova, ʼe tonu ke talanoaʼi lolotoga te ʼu faipalalau ʼaia. ʼE tonu ke iloʼi e te takitokotahi ia te faʼahiga faitoʼo ʼae ʼe feala ke fai ki ai peʼe ina tali peʼe kailoa. ʼE tuʼu anai ʼi te kiʼi kate ʼo te toto te ʼu faʼahi ʼae ʼe loto ki ai he tahi. Pea ʼe toe fakaha ai foki pe ko ai ʼae neʼe kotou fili ke ina toʼo ni tonu ʼe lelei maʼa koutou moka ʼe ʼaoga. ʼE maʼua ke maʼu ia te ʼu kiʼi kate e te hahaʼi matutuʼa mo natou ʼae ʼe tokakaga kia natou pea mo natou ʼae neʼe natou fili moʼo fai ʼanatou tonu. Pea ko ʼihi kau matuʼa ʼe natou taupau mo natou tanatou kiʼi kate ʼaia mo te tahi ʼu pepa maʼuhiga ʼo ʼuhiga mo te assurance, mo te fale paʼaga, mo te ʼu pilo ʼo te puleʼaga pea mo ʼihi atu.
KOTOU TAUʼI NI ALUʼAGA ʼE FETOGI
9, 10. Ko te temi fea ʼae ʼe lagi ʼaoga lahi ai ke tokoni te ʼu fanau ki ʼanatou matuʼā?
9 ʼI te agamahani, ʼe loto e te famili katoa ke maʼu tuʼumaʼu pe e te hahaʼi matutuʼa tonatou loto faʼitaliha. Kapau ʼe kei lava kuka te ʼu matuʼā, mo fai fakamaʼa, mo folo ʼanatou foʼi ʼakau pea mo faipalalau lelei, pea ʼe mole ʼaoga anai ki te fanau ke natou puleʼi te maʼuli ʼo ʼanatou matuʼā. Kaʼe ʼaki te teka ʼo te temi, kapau kua loto galogalo te ʼu matuʼā peʼe kua faigataʼa hanatou haʼele, mo fai fakatau, pea ʼe lagi ʼaoga anai ke fai e te fanau ni fetogi.
10 ʼE feala ke puli te ʼatamai ʼa te hahaʼi matutuʼa peʼe natou lotomamahi. Pea ʼe feala ke natou kamata tuli, mo kivi, mo loto galogalo, pea mo faigataʼa hanatou olo tokotahi ki te fale mamaʼo. Kaʼe kapau ʼe kamata ha te ʼu aluʼaga ʼaia, ʼe lagi ʼaoga anai he faitoʼo fakatoketa ki ai. Pea ʼaua naʼa kotou tuai ʼi te olo ki he toketa. ʼE lagi ʼaoga anai ki te fanau ke natou fai he ʼu vakai mahaki ʼa te ʼu matuʼā pea mo fai ʼihi faʼahi ʼe ʼaoga kia natou. Pea ke feala hanatou iloʼi pe maʼu e ʼanatou matuʼā te faitoʼo ʼae ʼe lelei, ʼe lagi ʼaoga anai ke natou palalau maʼa natou, mo fai te ʼu pepa, mo ʼave natou ki te toketa pea mo ʼihi atu ʼu faʼahi.—Taag. 3:27.
11. Kotea ʼae ʼe kotou lava fai ke faigafua ki te ʼu matuʼā hanatou fakamamahani mo te ʼu fetogi?
11 Kapau ʼe maʼu e ʼakotou matuʼā he mahaki tau sino, pea ʼe lagi tonu ke kotou fai ni fetogi moʼo tokaga kia natou peʼe ko tonatou loto fale. Moka ʼe mole lahi fau te ʼu fetogi ʼae ʼe fai, pea ʼe mahino ia ʼe faigafua age anai hanatou fakamamahani ki ai. Pea kapau ʼe kotou fevahamamaʼoʼaki mo ʼakotou matuʼā, pea ʼe lagi feʼauga pe he fakasiosio tuʼumaʼu ʼo naua e he Fakamoʼoni peʼe ko he tahi ʼo te vahaʼa fale. ʼE feala ai foki hanatou fakaha atu pe ʼe nā maʼuli malolō pe. ʼE gata ʼaki pe koa te fai ʼo tanā kuka pea mo tanā menasi? ʼE lagi ʼaoga anai ke fai ni kiʼi fetogi ʼi tonā ʼapi ohage la ko te fale maʼanu ke nā hao ai mai ni tuʼutamaki. Pea ko te faʼahi tafitō ʼae ʼe lagi ʼaoga ki te hahaʼi matutuʼa ke feala ai hanatou maʼuli faʼifaʼitaliha ʼi tonatou loto fale, ʼe ko he tahi ʼe tau tokoni kia natou. Kaʼe kapau ʼe mole kei feala anai hanatou maʼuli ʼateaina, pea ʼe ʼaoga anai ke taupau tuʼumaʼu natou. Tatau aipe pe kotea tonatou aluʼaga, kaʼe kotou kumi te ʼu tokoni fakasosiale ʼae ʼe maʼu ʼi tonatou kolo.—Lau ia Taaga Lea 21:5. *
ʼE TAUʼI FEAFEAʼI E ʼIHI IA TE ʼU FAIGATAʼAIA?
12, 13. Kotea ʼae ʼe fai ʼe ʼihi fanau ʼae kua lalahi moʼo fakaʼapaʼapa pea mo tokaga ki ʼanatou matuʼā ʼae ʼe maʼuli mamaʼo?
12 ʼE tou loto ke maʼuli haohaoa mo fimalie ʼatatou matuʼā koteʼuhi ʼe tou ʼoʼofa ia natou. ʼI tatatou iloʼi ʼae ʼe maʼu e ʼatatou matuʼā te tokoni ʼae ʼe ʼaoga, pea ʼe tokalelei ai tatatou fakakaukau. Kaʼe tokolahi te ʼu fanau ʼae kua lalahi ʼe natou maʼuli mamaʼo mai ʼanatou matuʼā. Ko ʼihi ia natou ʼaia, ʼe natou olo tuʼumaʼu ʼo fakasiosio ʼanatou matuʼā moka natou malolō. Pea ʼe natou tokakaga ai kia natou mo fai te ʼu gaue ʼo te loto fale ʼae ʼe mole kei natou lavaʼi. ʼE feala ke fakaha e te ʼu fanau ia tonatou ʼofa ki ʼanatou matuʼā ʼaki hanatou telefoni tuʼumaʼu peʼe ʼi te ʼaho fuli kia natou, mo momoli ni tohi ʼi te meli peʼe ʼi te neti.—Taag. 23:24, 25.
13 Tatau aipe pe kotou maʼuli mamaʼo mo tokotou kiʼi famili mai ʼakotou matuʼā, kaʼe ʼe maʼua anai ke kotou toʼo he tonu ʼo ʼuhiga mo te faʼahiga tokaga ʼae ʼe ʼaoga kia naua. Kapau ʼe kotou fevahamamaʼoʼaki mo ʼakotou matuʼā ʼae ʼe ko ni Fakamoʼoni, pea ʼe feala hakotou faipalalau pea mo kole tokoni ki te kau tagata ʼafeā ʼo tonā kokelekasio. Kaʼe tafitō foki, kotou faikole kia Sehova ʼo ʼuhiga mo ʼakotou matuʼā. (Lau ia Taaga Lea 11:14.) Maʼia pe la mo kapau ko ʼakotou matuʼā ʼe mole ko ni Fakamoʼoni, ʼe tonu ke kotou ‘fakaapaapa ki takotou tamai mo takotou fae.’ (Eke. 20:12; Taag. 23:22) ʼE mahino ia, ʼe mole tatau anai te ʼu tonu ʼae ʼe fai e te ʼu famili fuli. Koteʼuhi ko ʼihi ʼe natou loto anai ke maʼuli tahi ʼanatou matuʼā ʼae kua matutuʼa mo natou peʼe ke tuʼu ovi tonatou ʼapi ki ʼae ʼo ʼanatou matuʼā. Kaʼe ʼi ʼihi temi ʼe mole feala. Ko ʼihi matuʼā ʼe lagi mole natou fia maʼuʼuli tahi mo ʼanatou fanau ʼae kua lalahi pea mo tonatou kiʼi famili. ʼE lagi natou leleiʼia age tanatou maʼuʼuli ʼateaina pea ʼe mole natou loto ke natou liliu ko he kavega ki ʼanatou fanau. Pea ko ʼihi ʼe lagi feala hanatou totogi he tahi ʼe ina taupau anai natou pea ʼe natou leleiʼia te puleʼaki ʼaia.—Ekl. 7:12.
14. Kotea ʼae ʼe feala ke hoko kia natou ʼe tokaga lahi age ki ʼanatou matuʼā?
14 Tokolahi te ʼu famili, ʼe lagi ko te taʼahine peʼe ko te tama ʼae ʼe maʼuli ovi ki ʼana matuʼā ʼae ʼe tokaga lahi age kia naua. Kaʼe ko natou ʼae ʼe tokakaga ki ʼanatou matuʼā ʼe tonu foki ke natou toe tokakaga ki tonatou kiʼi famili. Pea ko te temi mo te malohi ʼae ʼe maʼu e te takitokotahi ʼe fakatuʼakoi. Kapau ʼe fetogi te aluʼaga ʼo ia ʼae ʼe tokaga ki ʼana matuʼā, pea ʼe lagi tonu ke toe vakaʼi e te famili te aluʼaga ʼaia. ʼE lagi ko he tahi ʼi te famili kua lahi fau ʼona maʼua. ʼE feala koa ke natou fesuisuiʼaki ke lahi age ai te tokoni ʼa ʼihi ʼi te famili?
15. ʼE lava feafeaʼi ke mole ogosia ia ia ʼae ʼe tokaga tafitō ki ʼana matuʼā?
15 ʼE feala ke ogosia ia ia ʼae ʼe tokaga tafitō ki tana tamai peʼe ko tana faʼe ʼae kua vaivai, mo kapau ʼe maʼua ke taupau naua ʼi te temi fuli. (Ekl. 4:6) Logo ai ʼe ʼofa te ʼu fanau pea mo natou fia fai ia faʼahi fuli ʼe natou lavaʼi, kaʼe ʼe feala ke liliu ia tanatou tokaga ki ʼanatou matuʼā ko he kavega. Koia ʼe ʼaoga ai kia natou ʼae ʼe tokakaga ʼi te temi fuli ki ʼanatou matuʼā ke natou agafakapotopoto pea mo kole tokoni. Pea ʼe mole anai ʼaoga ke ʼave te ʼu matuʼā ki he fale taupau ʼo te hahaʼi matutuʼa moka ʼe tautau tokoni atu he tahi.
16, 17. Kotea ʼae ʼe feala ke logoʼi e te ʼu fanau moka natou tokakaga ki ʼanatou matuʼā? Kotea ʼae ka tokoni anai kia natou ke natou mahino ki te ʼu meʼa ʼe natou logoʼi pea mo nofo agafakapotopoto? (Kotou vakaʼi te fakamatala ʼae ʼi te ʼa takai “ ʼE Natou Lotofakafetaʼi Ki ʼAnatou Matuʼā.”)
16 ʼE mole ko he aluʼaga fakafiafia foki tatatou sisio ki te kua kaku ʼatatou matuʼā ʼofaina ki te ʼu nunuʼa fakaʼofaʼofa ʼo te vaivai matuʼa. ʼI ʼihi temi ʼe feala ke lotomamahi ia natou ʼae ʼe tokakaga ki ʼanatou matuʼā, mo loto hoha, mo ita, pea mo natou tukugakoviʼi pe ia natou. Pea ʼe feala ʼi ʼihi temi ke ui e te tamai peʼe faʼe ʼae kua vaivai he ʼu palalau lave kovi pea mo natou maʼuli galo. Kapau ʼe hoko te aluʼaga ʼaia kia koutou, pea ʼaua naʼa kotou iita atu aipe. ʼE ui e te toketa faiva ʼi te mahaki ʼulu, moka tou iita, ʼe tonu muʼa ke tou tali ʼe tou maʼu ia te ita, pea ʼaua leva naʼa tou tukugakoviʼi ia tatou. Kotou palalau ʼo ʼuhiga mo te faʼahi ʼaia ki tokotou ʼohoana, peʼe ki he tahi ʼo te famili peʼe ki hokotou kaumeʼa lelei. ʼE tokoni atu anai te ʼu faipalalau ʼaia ke kotou mahino ki te ʼu meʼa ʼae ʼe kotou logoʼi pea ke kotou nofo agafakapotopoto.
17 ʼE hoko mai anai he temi ʼe mole kei feala ai hakotou foaki te tokaga ʼae ʼe ʼaoga ki he tahi ʼe kotou ʼoʼofa ai ʼi tokotou loto fale. ʼE feala anai ke toʼo e te famili te tonu ʼae ke maʼu e tanatou tamai peʼe faʼe ʼofaina te tokaga ʼae ʼe ʼaoga ʼi he fale taupau ʼo te hahaʼi matutuʼa. Ko te tuagaʼane neʼe ina fakasiosio teitei pe ʼi te ʼaho fuli ia tana faʼe ʼi te fale taupau ʼo te hahaʼi matutuʼa, ʼe ina ui ‘Neʼe mole feala hamatou tokakaga kia Mama ʼi te ʼaho mo te po. Pea neʼe faigataʼa kia matou ia tona ʼave ʼae ki te fale taupau ʼo te hahaʼi matutuʼa. Neʼe matou lotomamahi ʼaupito. Kaʼe neʼe ina tali pe te aluʼaga ʼaia pea neʼe ko te puleʼaki pe ʼaia ʼae neʼe lelei age ki te ʼu mahina fakaʼosi ʼo tona maʼuli.’
18. Kotea ʼae ʼe lava tui papau ki ai ia natou ʼae ʼe tokakaga ki ʼanatou matuʼā?
18 Ko te taupau ʼo ʼakotou matuʼā ʼae kua vaivai, ʼe feala ke faigataʼa mo fakalotomamahi. Pea ko te ʼu puleʼaki ʼae ʼe fakaʼaogaʼi ki te taupau ʼo te hahaʼi matutuʼa ʼe kehekehe koteʼuhi ʼe tahi alu pe mo tona aluʼaga. Kaʼe kapau ʼe kotou fai ni fakatuʼutuʼu fakapotopoto, mo felagolagoʼaki mo tokotou famili, mo felogoʼi lelei pea mo faikole tafitō kia Sehova, pea ʼe feala ai hakotou fakaʼapaʼapa kia natou ʼe kotou ʼoʼofa ai. Ka kotou fai te faʼahi ʼaia, ʼe feala ai ke kotou fiameʼameʼa koteʼuhi neʼe kotou tokakaga fakalelei kia natou. (Lau ia 1 Kolinito 13:4-8.) Kaʼe ko te faʼahi ʼae ʼe maʼuhiga age, ʼe tokalelei anai takotou fakakaukau pea ʼe kotou maʼu anai te tapuakina ʼa Sehova.—Filp. 4:7.
^ pal. 3 ʼI ʼihi aga ʼi fenua, ʼe ko he agamahani ʼa te ʼu matuʼā te maʼuli tahi mo ʼanatou fanau ʼae kua lalahi pea ʼe lagi natou leleiʼia.
^ pal. 11 Kapau ʼe kei kotou maʼuli tahi mo ʼakotou matuʼā, pea kotou vakaʼi pe maʼu te kalavi ʼo tokotou ʼapi e te kau taupau mahaki ʼae ʼe tuha mo te falala moka hoko he tuʼutamaki fakafokifa.