ʼE Mole Feala Ke Kaugana He Tahi Ki Ni Pule ʼe Lua
“E mole feala ki he tahi ke tauhi ki ni pule e toko lua. . . . E mole feala ke kotou tauhi ki te Atua mo Mamone [peʼe ko te ʼu koloa].”—MAT. 6:24.
1-3. (1) Kotea te ʼu fihifihia fakapaʼaga ʼae ʼe tau mo te ʼu famili ʼe tokolahi? (Vakaʼi te ʼuluaki pakī.) Pea ʼe faiga feafeaʼi e ʼihi ke natou fakatokatoka te ʼu fihifihia ʼaia? (2) Kotea ʼae ʼe tuʼania ki ai te ʼu matuʼā ʼo ʼuhiga mo te pusiaki ʼo ʼanatou fanau?
ʼI TE ʼaho fuli, neʼe tokagaʼi e Marilyn ia te liliu gaʼegaʼe mai ʼo tona ʼohoana ko James mai tana gaue. * Neʼe mole lahi te foʼi falā ʼae neʼe ina maʼu moʼo totogi te ʼu meʼa ʼae ʼe ʼaoga kia natou. Koia neʼe fia tokoni ia Marilyn ki tona ʼohoana pea mo loto foki ke maʼu e tanā tama ia Jimmy te ʼu meʼa ʼae neʼe maʼu e ʼona kaugā ako. Neʼe toe fia tokoni foki ki ʼona kaiga pea mo tanaki he foʼi falā ki te ka haʼu. Tokolahi ʼona kaumeʼa neʼe olo ʼo gaue ʼi he tahi fenua ke natou maʼu paʼaga ai. Pea neʼe toe manatu ia Marilyn ʼe lagi feala mo ia ke alu ʼo gaue ʼi tuʼa puleʼaga, kaʼe neʼe lotolotolua ia ki te faʼahi ʼaia. Kotea tona tupuʼaga?
2 Neʼe tuʼania ia Marilyn ki te ʼu aluʼaga ʼae ʼe feala ke hoko mo kapau neʼe ina tuku tona kiʼi famili pea mo tanatou tauhi tuʼumaʼu kia Sehova. ʼE feafeaʼi anai hanatou hoko atu te faʼahi ʼaia moka neʼe vaha mamaʼo mo tona kiʼi famili? Pea neʼe ina toe manatuʼi foki ia natou ʼae neʼe natou tuku ʼonatou famili kaʼe neʼe lagi kei natou tauhi pe kia Sehova. Neʼe feala pe koa ke ina pusiaki tana kiʼi tama pea mo akoʼi age ke tauhi kia Sehova ʼaki pe tanā faipalalau ʼi te Neti?—Efe. 6:4.
3 Neʼe kole tokoni ia Marilyn. Neʼe mole loto e tona ʼohoana ke alu, kaʼe neʼe ui pe e tona ʼohoana ‘moka ko he faʼahi ʼe ke loto ki ai ʼe mole au taʼofi anai ia koe.’ Neʼe fakatokaga age e te kau tagata ʼafeā pea mo ʼihi ʼi te kokelekasio ke ʼaua naʼa alu, kaʼe ko ʼihi tuagaʼane neʼe natou uga ia ia ke alu. Neʼe natou ui fenei: “Kapau ʼe ke ʼofa ʼi tou famili, pea ʼe ke alu anai. ʼE feala pe tau hoko atu tau tauhi ʼae kia Sehova.” Logo la tana tuʼania, kaʼe neʼe tauʼine Marilyn kia James mo Jimmy pea mo alu ʼo gaue ʼi te tahi fenua. Neʼe ina fakapapau fenei: “ʼE mole au fualoa anai.”
TE ʼU MAʼUA FAKAFAMILI MO TE ʼU PELESEPETO FAKATOHI-TAPU
4. He ko ʼe ko te tokolahi ʼe natou tuku tonatou kiʼi famili? Pea ko ai ʼae ʼe ina pusiaki te fanau ʼa te ʼu matuʼā ʼaia?
4 ʼE mole loto e Sehova ke pakupaku ʼana kaugana. Koteʼuhi ʼi te hisitolia ʼa te tagata, neʼe olo te hahaʼi ʼa Sehova ki te tahi ʼu potu fenua ke ʼaua naʼa natou masisiva. (Pes. 37:25; Taag. 30:8) Ko Sakopo neʼe ina fekauʼi ʼona foha ki Esipito moʼo totogi mai hanatou meʼa kai naʼa natou pakupaku. * (Sen. 42:1, 2) Ia ʼaho nei, tokolahi natou ʼe olo ki ʼihi fenua ʼe mole natou pakupaku. Kaʼe he ko ʼe koa ʼe natou fai te faʼahi ʼaia? Koteʼuhi tokolahi ʼe tuʼu maʼua ki ʼihi. Pea ko ʼihi ʼe maʼuʼuli ʼi he fenua masiva. ʼE natou olo ki he koga meʼa ʼe faigafua ai te maʼu paʼaga, koteʼuhi ʼe natou fia maʼu meʼa pea mo maʼuli fimalie. Pea ko te ʼu matuʼā ʼae ʼe olo ʼo gaue ʼi he tahi fenua, ʼe natou tuku tuʼumaʼu tanatou fanau ke pusiaki e ʼihi. Ohage la ko hanatou tahi fanau, peʼe ko he kui, peʼe ko ʼonatou kaiga peʼe ko ʼonatou kaumeʼa. Logo la ʼe ko he aluʼaga fakalotomamahi tanatou tuku tonatou kiʼi famili, kaʼe ʼi tanatou manatu, ko te puleʼaki pe ʼaia ʼe tahi.
5, 6. (1) Kotea ʼae neʼe akoʼi e Sesu ʼo ʼuhiga mo te fiafia pea mo te maʼuli fimalie? (2) ʼI te faʼahi fakasino, kotea ʼae neʼe akoʼi e Sesu ki ʼana tisipulo ke natou faikoleʼi? (3) ʼE tapuakinaʼi feafeaʼi tatou e Sehova?
5 ʼI te temi ʼo Sesu, neʼe lahi te kau masisiva. Neʼe lagi natou manatu neʼe feala hanatou maʼuli fiafia pea mo fimalie mo ka na pau la neʼe natou maʼu paʼaga. (Mko. 14:7) Neʼe mole loto e Sesu ke natou falala ki ni meʼa ʼe fakatemi. Kaʼe ke natou falala kia Sehova ʼae ʼe ina foaki ni tapuakina ʼe heʼe gata. ʼI tana Akonaki ʼi te Moʼuga, neʼe akoʼi ai e Sesu ʼe tou fiafia mo maʼuli fimalie moʼoni ʼuhi ko ʼatatou felogoʼi ʼae mo Sehova kaʼe mole ʼuhi ko te ʼu meʼa ʼae neʼe tou maʼu ʼaki ʼotatou nima.
6 ʼI te faikole ʼa Sesu ʼae ko te Tamai ʼe ʼi Selo, neʼe mole ina akoʼi mai ke tou faikole ki te fimalie ʼi te faʼahi fakapaʼaga. Kaʼe neʼe ina akoʼi mai ke tou faikole ke ina “foaki mai . . . i te aho nei te pane.” Neʼe akoʼi lelei fenei e Sesu natou neʼe fagono kia te ia: “Aua naa kotou tanaki ni koloa i te kele aeni, . . . kae kotou tanaki ni koloa i selo.” (Mat. 6:9, 11, 19, 20) ʼE tou lava falala ʼe tapuakina anai tatou e Sehova ohage pe ko tana fakapapau mai. Pea ʼe mole gata pe tana tapuakina ʼi tana ʼofa ʼae kia tatou. ʼE ko he fakamoʼoni ia ʼe ina foaki mai anai ia meʼa fuli ʼe ʼaoga moʼoni kia tatou. ʼE hoki feala hatatou fiafia mo maʼuli fimalie moʼoni mo kapau ʼe tou falala ki tatatou Tamai ʼofa ko Sehova kaʼe mole ki te paʼaga.—Lau ia Mateo 6:24, 25, 31-34.
7. (1) Neʼe foaki kia ai e Sehova te maʼua ʼae ʼo te pusiaki ʼo te fanau? (2) He ko ʼe ʼe tonu ke pusiaki fakatahi e te ʼu matuʼā tanā fanau?
7 Ko tatatou fai te finegalo ʼo te ʼAtua ʼe kau ki ai tatatou tokaga ki ʼotatou maʼua fakafamili ohage pe ko tona loto ki ai e Sehova. Ohage la, ʼi te Lao ʼa Moisese neʼe fakatotonu ai ki te ʼu matuʼā ke natou akoʼi ʼanatou fanau ke natou tauhi kia Sehova. Pea ko te kau Kilisitiano ʼae ʼe natou fia fakafiafia te loto ʼo Sehova, ʼe tonu mo natou ke natou fai te faʼahi ʼaia. (Lau ia Tetelonome 6:6, 7.) Neʼe foaki e te ʼAtua te maʼua ʼaia ki te faʼe mo te tamai, kaʼe mole ki te ʼu kui peʼe ko he tahi age. Neʼe ui fenei e te Hau ko Salomone: “Oi toku foha, fakalogo mai ki te u akonaki a tau tamai, pea aua naa ke siaki te tokoni a tau fae.” (Neʼe matou fakaʼiloga keheʼi; Taag. 1:8) ʼE loto e Sehova ke maʼuʼuli fakatahi te famili ke feala ki te ʼu matuʼā hanā akoʼi pea mo takitaki tanā fanau. (Taag. 31:10, 27, 28) Pea tahi moka logo te fanau ki te faipalalau ʼa te ʼu matuʼā ʼo ʼuhiga mo Sehova mo sio ki tanā tauhi kia te ia ʼi te ʼaho fuli, pea ʼe feala ai ke natou faʼifaʼitakiʼi naua.
TE ʼU NUNUʼA ʼE MOLE KITA ʼAMANAKI KI AI
8, 9. (1) Kotea te ʼu fetogi ʼe tau hoko moka alu he tahi ʼi te ʼu matuʼā ʼo gaue ʼi he tahi fenua? (2) ʼE fakatupu kovi feafeaʼi ki he famili moka ʼe mole maʼuli fakatahi te ʼu matuʼā mo te fanau?
8 Tokolahi ia natou ʼae ʼe manatu ke natou tuku tonatou famili, ʼe natou mahino ʼe feala ke hoko ni fihifihia ʼaki tanatou tonu ʼaia. Kaʼe ʼe mole feala hakita iloʼi pe malave feafeaʼi anai te tonu ʼaia ki tokita famili. (Taag. 22:3) * ʼI te alu ʼae ʼa Marilyn ʼo gaue ʼi te tahi fenua, neʼe lotomamahi ʼuhi ko tana vaha mamaʼo mo tona famili. Neʼe toe lotomamahi ai foki mo tona ʼohoana pea mo tana tama. Pea neʼe tau fehuʼi fenei e Jimmy kia ia: “He ko ʼe neʼe ke liakī au?” Neʼe ko te fakatuʼutuʼu ʼa Marilyn ke alu pe ʼi ni kiʼi mahina kaʼe neʼe liliu leva te ʼu mahina ʼaia ko te ʼu taʼu. Pea neʼe fakatuʼania kia ia tana sio ʼae ki te fetogi ʼo tona famili. Koteʼuhi neʼe kua fetogi ia tana kiʼi tama. Neʼe kua tahitahiga te faipalalau ʼo tana kiʼi tama mo ia pea neʼe mole kei ina fia fakaha ki tana faʼe ʼana manatu. ʼE ui fenei e Marilyn: “Neʼe mole kei ʼofa ia au.”
9 Kapau ʼe mole maʼuli fakatahi te ʼu matuʼā mo ʼanā fanau, pea ʼe feala ke fua kovi kia natou fuli ʼo fetogi ai ʼanatou manatu ʼo ʼuhiga mo te meʼa ʼae ʼe lelei pea mo ʼae ʼe kovi. * Kapau ʼe kei tamasiʼi te fanau pea mo fualoa tanatou vaha mamaʼo mai ʼanatou matuʼā, pea ʼe lahi ai te ʼu fihifihia ka hoko. Neʼe fakamahino e Marilyn kia Jimmy neʼe ko he sakilifisio neʼe ina fai maʼa ia, kaʼe kia Jimmy neʼe hage ia neʼe mole kei ʼofa tana faʼe ia ia. ʼI te kamata, neʼe ita ia ʼi te puli ʼo tana faʼe. Kaʼe ki muli age, neʼe ita leva ia ʼi te haʼu ʼae ʼo tana faʼe ʼo fakasiosio ia ia. Ohage pe ko te ʼu fanau ʼae neʼe femamaʼoʼaki mo ʼanatou matuʼā, kia Jimmy neʼe mole kei tonu ke ʼofa ki tana faʼe pea mo fakalogo ki ai.—Lau ia Taaga Lea 29:15.
10. (1) Kotea ʼae ʼe feala ke hoko ki te fanau moka fetogi e te ʼu matuʼā tanatou puli ʼaki ni meʼa ʼofa? (2) Kotea ʼae ʼe mole feala ke fai e he famili moka alu he tahi ʼi te ʼu matuʼā ki he tahi fenua?
10 Neʼe faigaʼi e Marilyn ke ina fetogi ia tana puli ʼaki tana momoli kia Jimmy hana foʼi falā pea mo ni meʼa ʼofa. Kaʼe neʼe mahino kia ia ʼaki tana fai te faʼahi ʼaia neʼe ina fakamamaʼo tana kiʼi tama mai ia ia. Neʼe ina akoʼi kia ia ke ʼofa ki te paʼaga ʼo laka age ʼi tona famili maʼia pea mo Sehova. (Taag. 22:6) Meʼa fakaʼofaʼofa foki, he neʼe ui e Jimmy ki tana faʼe ke ʼaua tana toe liliu age kaʼe ke ina momoli tuʼumaʼu kia ia ni meʼa ʼofa. Pea neʼe mahino ai leva kia Marilyn neʼe mole feala ke ina pusiaki tana kiʼi tama ʼaki ni tohi, te faitelefoni peʼe ko te neti. ʼE ina fakamahino fenei: “ʼI te Neti, ʼe mole feala hakita faʼufua peʼe ʼumaʼi takita tamasiʼi ʼi muʼa ʼo tana alu ʼo moe.”
11. (1) ʼE fakatupu kovi feafeaʼi takita alu ʼo gaue ʼi he tahi fenua ki tokita maʼuli fakataumatuʼa? (2) Ko te temi fea ʼae neʼe mahino ai leva Marilyn ʼe tonu ke toe foki ki tona kiʼi famili?
11 Neʼe mole kei maʼu foki e Marilyn ni felogoʼi lelei mo Sehova. Neʼe fakatahi mo tana kokelekasio tuʼa tahi ʼi te vahaʼa pea ʼi ʼihi vahaʼa neʼe mole kau ki te ʼu fono. Pea neʼe mole kei lelei foki ʼana felogoʼi ʼae mo tona ʼohoana. Neʼe tonu ke ina tauʼi tona fakaoloolo e tona patolo ʼae ke nā felaveʼi fakasino. Pea neʼe mole feala kia James mo Marilyn ke nā fefakahaʼaki ʼonā fihifihia, koia ʼae neʼe nā tahi fakaha ai ki ʼihi ʼanā manatu pea neʼe teitei pe ke nā tono. Neʼe mahino ai kia Marilyn tatau aipe pe neʼe mole nā tono, kaʼe neʼe tuʼutamakiʼia tonā maʼuli fakataumatuʼa. ʼE fakatotonu ʼi te Tohi-Tapu ki te ʼu taumatuʼa ke natou fetokagaʼaki ʼi te faʼahi ʼo te loto pea mo te ʼu felaveʼi fakasino. Neʼe fevahamamaʼoʼaki ia Marilyn pea mo James, koia ʼae neʼe mole feala ai hanā fetokagaʼaki pea mo nā maʼu honā temi ʼateaina ohage ko te ʼu taumatuʼa fuli. (Ktk. 1:2; 1 Ko. 7:3, 5) Pea neʼe mole feala hanā tauhi fakatahi kia Sehova mo tanā tama. ʼE ui fenei e Marilyn: “ʼI taku iloʼi ʼae ʼi te fakatahi lahi ʼe maʼuhiga ke fai tuʼumaʼu te ako fakafamili ke tou hao ʼi te ʼaho lahi ʼo Sehova, neʼe au mahino ai neʼe tonu ke au toe foki ki toku ʼapi.” Neʼe tonu ke ina toe faʼufaʼu tona maʼuli fakafamili pea mo ʼana felogoʼi ʼae mo Sehova.
TE TOKONI ʼAE ʼE LELEI MO ʼAE ʼE KOVI
12. Kotea te tokoni Fakatohi-tapu ʼe lava fua lelei kia natou ʼae ʼe mole maʼuli fakatahi mo tonatou kiʼi famili?
12 ʼI te temi ʼae neʼe fakatotonu ai e Marilyn ke toe foki ki tona ʼapi, neʼe tokoni lelei ʼihi kia ia kaʼe ko ʼihi kailoa. Neʼe vikiʼi ia ia e te kau tagata ʼafeā ʼo tona kokelekasio. Pea neʼe faigaʼi e ʼihi ke natou taʼofi ia ia pea mo ui age ʼe mole feala anai ke ina maʼu hana foʼi falā moka toe liliu ki tona ʼapi. Neʼe natou ui fenei: “ʼE mole ke fualoa anai pea ke toe foki mai.” ʼE mole tonu ke fai e te kau Kilisitiano te ʼu taʼi palalau fakalotovaivai ʼaia, kaʼe ʼe tonu ke natou tokoniʼi “te hahai fafine tupulaga ke natou ofa ki onatou ohoana mo anatou fanau,” pea ke natou “tokaga ki te u gaue fakalotofale,” peʼe ke natou tokakaga ki tonatou kiʼi famili. ʼAki tanatou fai te faʼahi ʼaia, ʼe mole ʼulihi ai anai e te kau Kilisitiano te huafa ʼo te ʼAtua.—Lau ia Tito 2:3-5.
13, 14. He ko ʼe ʼe tonu ke kita maʼu te tui moʼo tauʼi te ʼu faʼahi ʼae ʼe loto ki ai te famili? Tuku mai he faʼifaʼitaki.
13 Tokolahi natou ʼe natou tuku tonatou kiʼi famili kaʼe olo ʼo gaue ʼi tuʼa puleʼaga, neʼe natou lahilahi ake ʼi he fenua ʼe fakamaʼuhigaʼi ai te ʼu aga ʼi fenua mo te famili, kaʼe tafitō te ʼu matuʼā. Koia ʼe tonu ke malohi ai te tui ʼa he Kilisitiano moʼo tauʼi te ʼu faʼahi ʼae ʼe loto ki ai te famili moka ʼe mole leleiʼia e Sehova.
14 Tou vakaʼi te fakamatala ʼaeni ʼa Carin: “Neʼe tupu taku kiʼi tama ko Don kaʼe ma lolotoga gaue mo toku ʼohoana ʼi tuʼa puleʼaga. Pea neʼe ko taku hoki kamata ako ʼaia te Tohi-Tapu.” Neʼe fakaʼamu te famili ke ʼave e Carin ia Don ki ʼana matuʼā ʼo kaku ki te temi ʼae kua nā maʼu feʼauga ai hanā foʼi falā. ʼI te ui age ʼae e Carin ʼe ina pusiaki pe anai ia Don, neʼe lau ai e ʼona kaiga mo tona ʼohoana ko ia ʼe piko pea mo natou vaʼi ia ia. Neʼe ui fenei e Carin: “ʼI te temi ʼaia neʼe mole heʼeki au mahino lelei pe ko ʼe neʼe mole tonu ke au ʼave ia Don ki ʼaku matuʼā lolotoga ni taʼu. Kaʼe neʼe au iloʼi neʼe foaki mai e Sehova kia maua ʼae ko ʼana matuʼā ia te maʼua ʼae ke ma pusiaki tamā kiʼi tama.” ʼI te temi ʼae neʼe toe faitama ai ia Carin, neʼe loto e tona ʼohoana ʼae neʼe mole tui ke ina fakato tona fatu. Ko te tonu lelei ʼae neʼe fai e Carin ʼi muʼa atu neʼe ina fakamalohi tana tui, koia neʼe feala ai ke ina toe fai he tonu ʼe leleiʼia e Sehova. Ia ʼaho nei ko ia mo tona ʼohoana pea mo ʼanā toe ʼe natou fiafia fuli koteʼuhi neʼe natou maʼuli fakatahi. Kapau neʼe tuku e Carin ke pusiaki e ʼihi tanā kiʼi tama peʼe ko tanā kiʼi taʼahine, ʼe lagi mole natou maʼuli fiafia nei.
15, 16. (1) Neʼe feafeaʼi te pusiaki ʼo Vicky? (2) Pea he ko ʼe neʼe mole ina loto ke toe pusiaki feia mo tana kiʼi taʼahine?
15 ʼE ui fenei e te Fakamoʼoni ʼe higoa ko Vicky: “Lolotoga ni taʼu neʼe au lahilahi ake mo taku kui fafine, kaʼe neʼe taupau e ʼaku matuʼā toku kiʼi tehina veliveli. Kaʼe ʼi taku alu leva ʼae ki ʼaku matuʼā, neʼe kua fetogi ʼaku manatu ʼo ʼuhiga mo naua. Ko toku kiʼi tehina neʼe faʼifaʼitaliha ia mo naua, ʼo natou faʼufua pea mo natou felogoʼi lelei. Neʼe mole au felogoʼi faʼifaʼitaliha mo ʼaku matuʼā pea maʼia mo taku kua lahi leva neʼe faigataʼa kia au haku fakaha ʼaku manatu kia naua. Pea neʼe ma fakapapau maua tau tehina ki ʼama matuʼā ʼe ma tokakaga anai kia naua moka nā vaivavai. Kaʼe ʼe au fai anai te faʼahi ʼaia koteʼuhi ko toku maʼua kaʼe ʼe tokaga anai toku kiʼi tehina kia naua he ʼe ʼofa ia naua.
16 “ʼI te temi nei, ʼe loto e taku faʼe ke au tuku age taku kiʼi taʼahine ke ina pusiaki, ohage pe ko tana tuku au ki tana faʼe.” Neʼe fakalelei age ia Vicky ʼe mole ina loto ki te faʼahi ʼaia. ʼE nā loto pe naua taumatuʼa ke nā pusiaki tanā tamasiʼi ʼo nā akoʼi ki ai ke ʼofa kia Sehova. ʼE ui fenei e Vicky: “ʼE mole au loto ke fakatupu kovi ki ʼaku felogoʼi ʼae mo taku kiʼi taʼahine.” Pea ʼe iloʼi e Vicky ʼe hoki tou maʼuli fiafia pe moka tou ʼofa kia Sehova mo ʼana pelesepeto ʼo laka age ʼi te ʼu koloa maʼia mo te famili. Neʼe ui lelei fenei e Sesu: “E mole feala ki he tahi ke tauhi ki ni pule e toko lua,” ia te ʼAtua pea mo te ʼu Koloa.—Mat. 6:24; Eke. 23:2.
ʼE TAPUAKINAʼI E SEHOVA ʼATATOU FAIGA
17, 18. (1) Kotea te tonu ʼae ʼe lava fai tuʼumaʼu e te kau Kilisitiano? (2) Kotea te ʼu fehuʼi ʼae ka tou vakaʼi anai ʼi te alatike ka hoa mai?
17 Neʼe fakapapau e tatatou Tamai ko Sehova ʼe ina foaki mai ia meʼa fuli ʼe ʼaoga kia tatou mo kapau ʼe tou fakamuʼamuʼa te Puleʼaga pea mo tana faitotonu. (Mat. 6:33) Pea ʼuhi ko te fakapapau ʼaia, ʼe feala ke fai tuʼumaʼu e te kau Kilisitiano moʼoni ia te tonu ʼae ʼe lelei. Tatau aipe pe tou felaveʼi mo he aluʼaga faigataʼa ʼaupito kaʼe ʼe feala tuʼumaʼu pe ke tou fakafiafia te loto ʼo Sehova pea mo tou mulimuli ki te ʼu pelesepeto Fakatohi-tapu. ʼE fakapapau e Sehova ʼe ina foaki mai he “faigamalie ke [tou] hao ai.” (Lau ia 1 Kolinito 10:13.) Pea ʼe tou fakaha kia Sehova ʼaki ʼatatou faikole mo tatatou talagafua ʼe tou falala kia te ia. (Pes. 37:5, 7) ʼE sio anai ia Sehova ki ʼatatou faiga pea mo foaki mai ia meʼa fuli ʼae ʼe ʼaoga kia tatou. Pea ʼe ina tapuakinaʼi anai totatou maʼuli.—Vakaʼi mo Senesi 39:3.
18 Kaʼe ʼe tou lava fakatokatoka feafeaʼi te ʼu nunuʼa kovi ʼo tatatou mole maʼuli fakatahi mo totatou kiʼi famili? ʼE feafeaʼi hatatou tokaga ki totatou kiʼi famili ʼi te faʼahi fakasino tatau aipe pe mole tou olo ʼo gaue ʼi tuʼa puleʼaga? Pea ʼe feafeaʼi hatatou lava tokoni kia natou ʼae ʼe natou fakatotonu ke natou maʼuli fakatahi mo tonatou kiʼi famili? ʼE hoki tou tali anai ki te ʼu fehuʼi ʼaia ʼi te alatike ka hoa mai.
^ pal. 1 Neʼe fetogi te ʼu higoa.
^ pal. 4 ʼI te temi fuli pe ʼae neʼe olo ai te ʼu foha ʼo Sakopo ki Esipito, neʼe natou vaha mamaʼo mo tonatou famili ia vahaʼa ʼe tolu peʼe siʼi ifo. Ki muli age, neʼe ʼave e Sakopo mo ʼona foha ʼonatou ʼohoana pea mo ʼanatou fanau ʼi tanatou olo ʼae ki Esipito.—Sen. 46:6, 7.
^ pal. 8 Vakaʼi te alatike “Émigration : rêves et réalités” ʼi te Réveillez-vous ! fakafalani ʼo Fepualio 2013.
^ pal. 9 ʼI te ʼu sivi neʼe fai ʼi te ʼu fenua kehekehe ʼe fakaha ai, moka vaha mamaʼo he tahi mai tona ʼohoana pea mo tana fanau, ʼe hoko ni fihifihia lahi. ʼE kau ki ai te tono, te fai tagata mo te fai fafine, peʼe ko te fakaʼalikiʼi ʼo te fanau e he kaiga totonu. ʼE toe feala foki ke felaveʼi te fanau mo ni fihifihia ʼi te fale ako. ʼE lagi natou iita, lotohoha, lotomamahi, peʼe natou fia fakamate.